|
بشو غلطو أهالينا ؟!
بعيدا عن الأم مدرسة إذا أعددتها أعددت شعبا طيب الأعراق وعن كل فتاة بأبيها معجبة وطب الجرة عتما ... ولنهاية كل الجمل وكل القدسية اللي محيطة بأهالينا فينا للحظة نوقف مع حالنا إذا مو مع العلن
ونقول .. أهلي أنتو غلطتو .. .أي تخيلو غلطو غلطتو بتربايتي ب ( واحد وتنين وتلاتة ... ) وما نحس بالذنب ما نحس أنو نحنا عم نكسر صنم خلقوه جواتنا أسمو أهالينا علمونا .. بأنو الأهل ما بيعملو الا المنيح لولادن ... لك يمكن يكونو فعلا ما بيريدولنا ألا المنيح بس ما بيلغي عنون صفة البشرية والأخطاء ( يمكن حبون للتملك .. رغبتون الزائدة أنو نكون الأفضل .. أحلامون اللي كبرت فينا ... رغبتون أنو نشبهون ... ما بعرف الاحتمالات كتيرة ) فينا نوقف ونقول .. أنتو قلتولي هيك بس انا رح قول لولادي غير هيك (( كان والداي قد قالا لي : لقد أدينا واجبنا وأعطيناك الحياة مثلما أعطيناها وبسخائهما وحسن نواياهما أعطاني أيضاً قاعدة سلوك بالية الأسلوب شبه ممحية الحروف كنت أتهاجأها بصعوبة كانت طريقة الاستعمال تقول يجب فعل هذا ولا يجب فعل ذاك وعندما أستوضح السبب كان والداي يجيبان أن هذا حسن ولأن ذاك سيء ولكنني لم ادرك لم هو حسن ولم هو سيء وكان والداي أيضا يجهلان ذلك أنا أبدا ماعم أنكر انو أنا اليوم مرسيل على بواب مرحلة كبيرة بحياتي أني صناعة أبويي منتج من بين أيديون بس هالمنتج عندو عقل وعندو تميز ومو بالضرورة يشابه الأصل وفيو يدرك أنو ربما في بعض الضعف اللي فيو هوي من تربايتو أنا فيني قول مثلا ً .. وبكل وضوح وبكل محبة واحترام لأهلي : أنتو دللتوني زيادة .. انا اليوم بنت بعيدة قليلا عن الواقعية وعايشة شوي بورديتي لأنو أنتو صورتولي العالم يمتد بين بيتنا والكنيسة وكلاهما ما بيشكلو عينة عن العالم الحقيقي في مقطع من كتاب أنا كتير بحبو أسمو حدثني عن الحب لميشال كواست ولم ألبث أن تبينت أن أمي وأبي لم يكونا يعيشان دائما وفق ما يقولان وكذلك كان البالغون من حولي أما رفاقي فكثيرون منهم كانو يعلنون ساخرين أن قاعدة سلوكي المندثرة منذ زمن طويل لم تعد قابلة للتطبيق منذ زمن لكنهم لم يعرفو قواعد سواها )) برجع بكرر مشان ما تفهموني غلط .. مالهدف أبدا تقليل قيمة الجهد اللي بذلو وماني بصدد أذكرلون أعذار من كونو في فرق أجيال انتهاءً لتسارع وتيرة الحياة .. والضغوط ... وتطول القائمة كل اللي بدي نقولو هني غلطو هيك ... نحنا وقت رح نربي ولادنا أكيد رح نغلط بس مو الغلط نفسو لأنو وعينا أنو هني غلطوه وناطرة ردودكون :D |
أنا معك إنو الأهل بأثرو فينا وبيشتغلو على توجيه سلوكنا على أساس الصورة يللي رسموها إلنا حتى من قبل ما نخلق وأنا ممكن برر هاد الشي للأهل لأنو عادة بكون نابع عن حب ورغبة منهن لحتى يشوفنا بأحسن صورة
لكن بتصور إنك حمّلتي الأهل مسؤولية الوضع يللي إنت فيه بالرغم إنك أكيد على يقين إنو البيئة المحيطة بالشخص إلها دور كبير بتوجيه سلوكو و اكتسابو عادات غير يللي اكتسبها من بيتو وأهلو.............كما إنو في شي إسمو طبع والطبع ما بيتغير مهما كانت المؤثرات الخارجية يعني ممكن إنو الشي يللي إنت فيه إلو علاقة بطبعك وما يكون في شخص تاني إلو يد فيه. مشكورة:D |
اقتباس:
دقيقة دقيقة دقيقة ما تاخديني بالزحمة وبأني بحب اللون الموف اللي عم تكتبي فيو أنا ما كنت عم قول أنو انا ناقمة على أهلي انا قلت التالي : أهلي بيحبوني أهلي محبتون بشرية البشر بيغلطو أهلي بيغلطو أهلي ربوني بمثالية ولا واقعية أنا رح حاول ربي ولادي بواقعية أكتر ( بتمنى تكون وصلت الفكرة من دون تحليل لنفسيتي وبتمنى كل شخص يكتب تجربتو هوي مع أهلو وليس أسقاطاتو عليي ويسلمو :D ) |
اقتباس:
|
اول شي شكرا عالموضوع يلي قريتو بجهد كبير و يعني قريتو وحياة الغوالي :lol:
تحياتي :D |
:cry: كالعادة ميمو ضربتي عالوتر الحساس
تربية اهلي خلقت عندي اكتر من مشكلة ..... وطبعا ماعم لوم اهلي لانو كلشي عملوه معي عملوه عن حب لامتناهي واهتمام كمان لامتناهي...... هني حاولو وفعلا كانو الاهل المثاليين (ضمن حدود الامكانيات البشرية) او خلونا نقول الاقرب للمثالية هلأ اول شي علموني حب الانسانية بكل اشكالها وبكل عقائدها وماالى هنالك وانو كل الناس رح تحبني طالما انا انسانة كويسة وانو انا لازم حبون كمان..... بس لما طلعت عالحياة الفعلية شفت انو الحب مو بسيط لهلدرجة وانو في كتير ناس رح يوقف حبون الي لمجرد الاختلاف عنون بفكر او دين او اي شي..... وفي ناس عندون الحب مصلحة وبس وفي ناس.... وفي ناس..... المهم انو هي كانت صدمة هائلة بحياتي لانو الحياة والحب اللي فيها بعيد كتير عن المثالية اللي ربوني اهلي عليها هلأ المشكلة التانية باهلي والاخطر انو البابا كان همو اني كون انسانة صاحبة شخصية مستقلة وقوية بغض النظر عن رأي الناس بهالشي وبالأنثى القوية...... اما الماما كان همها متل كل ام تقريبا انو يرضى عني المجتمع اكتر من رضايي انا عن نفسي..... وهاد خلق عندي تناقض كبير بشخصيتي ويمكن حالة ضياع وبالنهاية مع انو اهلي غلطو بس كان فيون شغلة رائعة انو قدرو يتقبلوني لما طلعت مختلفة لحد كبير عنون حتى لو بقلبون ماكانو راضيين كتير عن اختلافي عنون وعن كتير ناس بالمجتمع وهاد شي كتير اهل عاجزين يتقبلوه باولادون هاد هلأ اللي خطر ببالي ويمكن الي رجعة عالموضوع اذا خطر ببالي شي تاني وشكرا ميمو عالموضوع :D |
موضوع رااائع جداا
شكرا لألك بيوتي فيري .. :D :D عنجد موضوع قيّم ويحتاج القرآءة .. والله انا كنت رح ابكي بعد شوي لأن انا بس شوف هيك مواضيع بصير لازم ابكي أو احسّ فيها ..
وشكرا جزيلا لكي .. والسلااام .... |
ميرسي مرسيل ع فكرة الموضوع
هلق انا عم اتعذب لاكتب بالعربي بس راح حاول اعطي بعض النقاط يللي بحب انو احكي فيها بدون ما استفيض بالحكي عن اخطاء اهلي...بس بيهمني نحكي عن كم نقطة... ـاختلاف اسلوب التربية باختلاف جنس الطفل..الاهل دايما بيعززو النزعة الذكورية عند الذكر وبالمقابل بيخنقوا الحس الانثوي عند الانثى وحتى الانساني عندها..واحيانا بشغلات كتير بسيطة مو مقصودة.يعني بتطالع الام الصبي من الحمام من هون وبيبلش الدلال من هون عقولة..دخيل هالزيزي ما احلاها ومن هالحكي..ـطبعا عفوا عالاسلوب ـ التربية باستخدام العنف الجسدي ولو بأبسط اشكالو يلي بيشوه مفهوم الثواب والعقاب عند الطفل وبيزرع بلاوعيه فكرة الاقناع بالاكراه...ومع الايام بيصير مصدر لاضطرابات نفسية واجتماعية كبيرة.. في حكي لسى بس صارت الساعة 9 ولازم بلش شغل.. |
بالفعل ... ترباية الأهل كتير بتصنع جوانب بحياة الإنسان...
بين بابا العملي وماما العاطفية.. طلعت أنا خليط ضايع بنئطة معينة!!! كتير بكره هالشغلة فيني... إزا حدا كتير بيعز مين ما كان عليي جرحني... ممكن إزعل منه... ممكن بطل حاكيه... للأبد.. إزا كانت هالشغلة كبيرة كتير... بس جواتي حبه ما بيسكن ولا بيفتر وبضل حس فيه وبيضل معي حتى لو شو ماكان عامل معي... بنسى شو عمل وبتزكر بس إنو بيعنيلي... بعيش بإحساسات رهيبة تتنازعني... بين إنه لازم إنسى وإرجع لإني بحبه... وبين إني لازم كون عملية وإنسى وأطلع لمستئبلي وإنسى الماضي... نفسي أخلص من هالشي... كون عملية وتضرب المشاعر ويوما... وبحس إنه هالشي يلي ورته من ترباية أهلي... كتير متعبني!!! بس من النواحي التانية... طلعت استقلالية... بحب الحرية.. بعرف لوين رايحة... وبعرف شو بدي.. يعني نحنا كمان لازم نفكر كيف رح يطلعو ولادنا يلي رح نربيون!! يمكن ما يطلع معنا شي كتير مثالي وأحسن من يلي تربينا عليه!!!! ميرسي كتير على الموضوع الحلو...:D :D :D |
;-) الاهل بعالمنا بالذات دائما عندهم شعور انهم دائما على حق و دائمل يفهمون مصالحنا اكثر منا!!!! المشكلة الثانية اهلنا ما يريدونا نعاني من اي مشكلة و لذلك نحن نتربى على شي معين و هو بعيد عن الواقعية لان العالم الخارجي مليئ بكل انواع الناس و فيه الخير و الشر و المنيح و المو منيح ! و اهلنا دائما يصدون الشغلات اللي مو منيحة عنا بدل ما يعلمونا كيف نواجه المشاكل و بذلك يمنعونا من التجربة و قدرة التفكير على الحل و انا اظن الخطا في النظرة هم ببالهم انو يحمونا بس المفروض مو يتصرفوا بدالنا و لا احنا روبوتات المفروض يوجهونا نحو الصح و حتى لو بقليل من القوة بس اهم شي ما يسلبون الارادة !!!!!!! بس الشاب او البنت بعد ما يصطدم شوي شوي بالعالم الخارجي هو رح يصقل حاله بحاله !!! و رح يرجع يعيد نفس الدورة على ولاده !!!!!!!! :clap: موضوعك اكثر من رائع :larg: :D |
اقتباس:
الدلال ... فعلا ... اليوم هي من الأغلاط اللي بخاف أعملا مع ولادي |
اقتباس:
المثالية والأنسانية والمبادئ اللي نادرا ما تسمعيا برات البيت ... وتفكري أنو أنا الغلط ولا مين ؟ اقتباس:
وناطرة الرجعة :mimo: |
أنو ........أي
يعني أنا بهاللحظات قصدي قبل ما طل عالنت بشوي كانت مولعة معي من هالموضوع بقا جيت بوقتك:D بيضلو أهالينا يزرعو فينا بهالمثاليات لحتى نطلع ونستقل بالسكن عنن و وقتا ........ يا سلام شو بيصير فيه شغلتين اسمن الأنانية والتطنيش:larg: يعني بس لو كنت بمتلك نسبة صغيرة منن يمكن كنت وفرت ع حالي كتير صدمات ومواقف ووقت:pos: عنجد والله الانانية شغلة مو بشعة ولكن اذا استخدمها الشخص بالوقت والظرف المناسب وكمان التطنيش وأبشع شي أنك تكون الصغير بالبيت بالرغم من كل المكاسب اللي بتحصل عليها :gem: ولكن بتضل صغير ولو صار عمرك 100 سنة أنا هيك ولك لسا صار عمري 24 وبيعاملوني كأنو عمري 14 بعدين شي بيفقع ولو....:frown: والانكى انو الصغير بيصير الكل بدو يتدخل بتربايتو وكل واحد بدو يطبق عليه نظرياتو:larg: بس لااااااااء وين النهفة النهفة اذا انا اجيت لاتدخل باولادن ولك ما بيخلوني ومو بس هيك غير أنن بيزعلو:? :shock: خلص بيكفي هيك باي:larg: |
اقتباس:
وناطرين رأيك ... :D |
بشو غلطو اهالينا ؟ سؤال برأيي ولا حدا يزعل مني انو اناني كتير اذا كان المقصود منو هو حط اللوم على الاهل,
نحنا بدنا اهالينا يفكروا بطريقتنا بدنا ياهون يعملو متل ما بدنا ,يعاملونا متل كأنو مالون شغلة وعملة غيرنا, البابا ما عندو شغل طول النهار ليأمن لي حياة كريمة وامي مانها منقوعة بشغل البيت طول النهار!. الاولاد دائما انانيون ما بيفكروا غير بحالون ودائما بينسبو اسباب فشلون الكلي او الجزئي للظروف وللأهل وترباية الأهل , وكأنو الاهل عاملين دورة تربية حديثة او انو بس اجى الواحد فينا اجى معو كتيب شرح الاستخدام! لي ما بنتطللع على جدودنا شو قدموا لأهالينا وبعدين بنحكم. لي ما بنتطللع على اهالينا كيف بيفكروا ونسألون بشو غلطو اهلون معون بشو غلطو اهالينا؟ اهالينا عملوا اللي شايفينو صح ضمن امكاناتون الفكرية و ثقافتون وتأثرهون بالمجتمع, واذا حدا غلطان فهو نحنا , لانو ما عم نقدر نصحح الغلط او اللي شايفينو غلط. على فكرة انا التقيت بكتير ناس كانو يشكو من اهليهم وبعد ما اجاهون اولاد اتعاملوا معون بنفس الاسلوب كلمة اخيرة والحق يقال انو الموضوع حلو ولازم والواحد يفكر فيه كمان وكمان شكرا على الموضوع والي رجعة |
موضوع حساس كتير و اكيد فيو المئات اذا مو الالاف من التجارب الشخصية و الخاصة ......
لأنو كل انسان تجربتو مع اهلو شكل و ما بتنطبق على غيرو لاختلاف الظروف و الخلفية و و و و ....... الخ هاللا لكل ياللي عم يعترض على ترباية الاهل انا عندي رأي مخالف شوي ( مع الاحترام لكل الآراء ) ..... طبعا عم احكي عن النموذج الجيد من الترباية مو ترباية اهل بدهم ابنهم يطلع حرامي ( مثلا ) ...... الاغلب انتقد بشكل او بآخر الجو ياللي عاشه بالبيت و بعدين انصدامه بالواقع بحياته العملية , و بأنو اهله لم ينتبهوا لهال أمر , و ان حياتنا بالبيت كانت حلم وردي و بعدين صدمة هائلة بالحياة العملية ( أنا نفسي عانيت من هالامر )..... طيب انا بدي اسأل سؤال هون ..... هل والدينا بينتموا لنفس جيلنا ؟؟!!!!! اكيد لأ ...... شباب .... اهالينا عاشو بجيل مختلف تماما عن جيلنا ..... جيل الحب , جيل الرومانسية , جيل كان ينطر ام كلثوم تطل كل ليلة خميس ( على الراديو ) بلكي تفرغله العواطف الموجودة بصدره , جيل المشاعر الوطنية و الثورات ( شوفو كم حزب عظيم تأسس ) , جيل كان افتخار الانسان باخلاقه و علمه ...... مافي كومبيوتر , مافي موبيل , مافي بطر , مافي و مافي و مافي ........ حياة بسيطة , فقيرة , حلوة , ممتعة , واهم شي صافية و نظيفة ..... القيم و الاخلاق كانت شغلة كبيرة ...... اما على ايامنا ...... السرقة صارت بأيامنا شطارة , الرشوة حربقة , النصب لا بد منه , حلال على الشاطر ......الخ أنا ما بقصد انه جيلون ملائكة و جيلنا شياطين , أكيد لأ ....... لكن بظن انو المعطيات اختلفت كتير ..... من وقتها لهاللا ...... أنا بيكفيني اعرف ان والدي حرق نفسه بالشغل من اجل تأمين حاجاتي الاساسية من طعام و شراب و دراسة و غيره ..... بيكفيني اتذكر كيف والدتي سهرت الليالي جنبي ايام دراستي بالبكلوريا , حرقت نفسها الف مرة من اجل انو اوصل ..... انا بالنسبة الي هذا شي كتير كتير كبير ( ممكن انا نفسي ما اعملو مع اولادي ) , بيمحي كل شي ممكن يكون صار غلط بتربايتي ...... على اي حال انا حابب راهن الموجودين :p ....... انو اولادنا رح يعترضوا على تربايتنا لهم , و رح يشتكوا بأنها لم تكن واقعية و و و ....... و من يعيش يرى ....... تحياتي butterfly .......:D |
بس عندي تعليق صغير على اللي حكاه ابو مزيد والى حد ما تايغر
نحنا لما بنحكي عن اخطاء اهلنا ماعم نجرمون باي شكل بالعكس انا بحترم اهلي لدرجة رح توصل للتقديس شوي تانية ومقدرة اللي عملوه الي لاقصى الدرجات وعارفة تماما انو اي شي عملوه معي عملوه لقناعتون انو هالشي لمصلحتي (ومن ملاحظاتي لميمو مثلا انها نفس الشي ) بس مع ذلك وقعو باخطاء بالتقدير هاد والقصد من الموضوع لفت الانتباه الى حد ما لهي الاخطاء عسى انو فينا نتلافاها مع ولادنا ونطلعون احسن منا وانو من خلال نقدنا للاهل نحاول نفهم حالنا اكتر بركي فينا نتلافى هالاخطاء ونصحح ناتجها بشخصيتنا وبالنهاية انا بعتبر انو اهلي نجحو بتربيتي لحد كتير كبير...... يعني اكيد ماني الانسانة المثالية (واللي مستحيل تنوجد بالكون كلو) بس انسانة كتير مقبولة وناجحة بنظري وبنظر المجتمع كمان اما لما بتحكو شباب عن انو اهلنا حرقو حالون كرمالنا.... هلأ هالحكي حلو وصحيح بالنسبة لكل الاهل الطبيعين وانتو عم تعتبروه شي ايجابي وانا معكن انو ايجابي بس احيانا المبالغة بهالشي ولما بنحسس الابن او الابنة فيه رح يعطي نتائج سلبية عالولد يعني لما الولد بيحس انو هوي كلشي بالنسبة لاهلو رح يحس انو هوي مركز الكون ورح يتوقع انو كل الناس من المدرس لزملاء المدرسة والعمل لمدير العمل والكل لازم يعاملوه على هاد الاساس..... يعني حتى الشي الايجابي بالتربية اذا زاد بيصير سلبي مابعرف اذا توضح الموضوع واهدافه:D |
اقتباس:
وهدفوا على ما اظن كمان واضح انو كيف نربي ولادنا بدون ما نحاول انو يكونو فوتوكوبي عنا كيف يكونو مستقلين وغير مختلفين كيف يتعاملوا مع المجتمع بواقعية بالرغم من مثالية الافكار اللي عم نعطيها مو ؟ اي مو بس كمان نحنا عم نعيش حياة معهون يعني مافي وقت للدرس ابني عم يشوفني باستمرار شو عم ساوي وردود افعالي وكيف عم اتصرف معناها انا بدي ربي حالي منيح وعيد ترابايتي على ايدي من اول وجديد بعدين جيب ولد مشان ما يتأثر بأللي انا اتأثرت فيه من اهلي واللي شايفو انا سلبي وهاد الشي صعب كتيييييييييييير او فيني قللك انو مستحيل شوي بيكفي انا امنلو حياة كريمة لبين ما يكبر وديرس ويتثقف وهوي بينقي طريقوا طبعا بارشادات على الخطوط العريضة مني وهاد الشي على حسب ثقافتي ومستوى تفكيري |
اقتباس:
يعني اكيد ضمن جيلنا مستحيل نكون فوتوكوبي عن اهلنا واكيد عنا اختلاف عنون ومن حقنا انو نعبر عنو مع العلم انو كتير ناس بيعتبرو انو مجرد اختلفنا عن اهلنا بنكون قللنا من احترامنا الون واحترامنا لتربيتون النا..... انا برأيي انو هاد كتير غلط لانو انا ماني البابا وماني الماما مع انو اكيد بحمل كتير من صفاتون بس كمان انا شخص مستقل عنون ومختلف كتير والي الحق اني اظهر هالاختلاف :D واسفة ميمو حاسة اني انبحتت بالموضوع زيادة بس هي الفكرة كتير بتشغل بالي بالاضافة لانو كتير قليل يتنزل بالصالون موضوع بيستاهل النقاش متل هاد...... شكرا كتير ميمو:D |
في مشكلة كبيرة وهية لما الاهل بحاولو يحققو احلامون عن طريق ولادهون.
هاي برأيي اكبر مشكلة ممكن تواجه هالولد. عندي تعليق صغير على ابو مزيد اقتباس:
لما انت كابن عم تشوف اللي عم يعملو والدك وتعمل متلو. فهاد شي تاني, هاد الشي انت اخترتو. فبالطبع ما فيك تلوم حدا عليه. لاكن بظن متل ما فهمت من الموضوع الحكي كان عن انو لما الاهل بحاولو يخلوك انت تطلع هيك. هالشي باغلب الاحيان بسبب ضياع عند الابن |
مابعرف موضوع اجا بوقتو
اليوم كمان كانت فاقعة معي عالأخير يمكن هوي صار سوء فهم بس انا نرفزت اهالينا احيانا بقلقون وخوفون الزايد وانو بدو يحمونا كتير احيان بيكونو عم يخنقو احيانا بيجوز مايقصدو بيحسسونا بعدم ثقة مع انو انت لوقت طويل بتحس انو اديش هني واثقين فيك ومقدرين جهودك وعم يدعموك وكلو وكنت عم احكي مع المانجر تبعيتي بالشغل وقلتلا انو كتير بخاف اتعامل مع ولادي بطريقة تعامل اهلي معي لاني انا تربيت هيك وبيجوز باللاوعي اتصرف مع ولادي نفس التصرف بحب كتير اعطيون حرية وثقة ويكون عندون قوة مواجهة قالتلي اكيد مارح تتصرفي لانو وقتا رح يكون عندك حرية الاختيار والتصرف مارديت عليها لاني ماكتير اقتنعت بس بنفس الوقت كتير تمنيت انو يكون حكيا صح بيجوز لانها مارقة بنفس التجربة وقدرت تغير من تربيتا لولادا حسستني بالاحسن |
والله يا ميمو معك كل الحق
كنت دائما ردد هالجملة مستحيل ربي ولادي متل ما تربيت لاني عانيت ولساني عم عاني وخصوصي بالغربة بس حاليا بطلت اسأل اذا انا الغلط ولا الناس اللي هون لاني وصلت لنتيجة انو الغلط بتربايتي اللي كانت تصورلي كل الناس جيدين والابشع انو صرت برر اخطاء الغير وسامح واغفر كنت بتمنى الغربة تقسيني كتير وتفيدني بهالموضوع بس شكلي راح افشل والتاريخ عم يعيد نفسو معي للاسف :pos: |
اقتباس:
انا ياللي قصدته بكلامي ( ما بعرف اذا قدرت وضح منيح ) انه اهالينا ربونا بناء على تجربتهم الخاصة بالحياة ...... في كتير اهل واعيين و مثقفين وحاولوا انهم يعملوا مننا كائن اجتماعي قادر على الحياة بهالزمن .... لكن المشكلة انهم كانوا عايشين بزمن غير زمننا ...... يعني الانسان كل تجاربه بتتكون على اساس الواقع ياللي عايش فيه ....... و عليه اهالينا ( برأيي ) وضعوا كل خبرتهم بالحياة في تربيتنا .... لكن المشكلة بالزمن ياللي تغير بسرعة ( المجتمع ) مو بتربايتهم ( طبعا انا لا أنفي وجود عالم تربت غلط بس اكيد كلامي مو عنهم ) .... و لهيك انا راهنت اننا رح نوقع كمان مرة بنفس المشكلة مع اولادنا ..... رح احكي بشكل شخصي ...... انا لما بلشت أوعيى و بلشت اكبر صرت حس بالفرق بين الشغلات ياللي تعلمتها بالبيت و بين الحياة العملية .... انا تعلمت بالبيت بان لا ارد على اساءة احد لي , بس هالقانون ما مشي معي بالمدرسة ( مثلا ) و عليه صرت ( tiger ) ......:p بس ما بقدر قول انو الاساس ياللي تعلمته بالبيت غلط ( لانو فعلا مو غلط ) ...... وهيك صرت قارن بين الشغلات ياللي تعلمتها بالبيت و الامور ياللي بشوفها بحياتي العملية ...... و اكيد صار المئات اذا مو الالاف من النقاشات بيني و بين اهلي عن هالامور و مرات انا كنت اربح و مرات هم ...... و هون صارت مشكلتي و التحدي الخاص فيني بانو اطلع من قوقعة البيت الى الدنيا ( الحقيقية ) , و لكن مو بشكل كامل , بحيث اني ضلني ماسك الشغلات المنيحة الموجودة بالمكانين.... و متل ما قلتي انا ما صرت الانسان المثالي , لكن بالنهاية صار في عندي تجربتي الخاصة بالحياة ..... هالشي برأيي اعطاني قوة كتير كبيرة , صرت بعرف انه انا اساسي صح و قوي , و صرت ادخل بمرحلة نقاش مع نفسي كل ما اتعرض لموقف (من هدول ) ياللي بتعاكس مبادئي...... و عليه نظرتي للحياة اختلفت كتير و صرت فعلا عم اعرف شو عم ساوي ..... أكان غلط او صح ....... انا هاللا كتير مختلف عن الشخص ياللي حاول اهلي تربيته ..... اكيد مو بكل شي لكن بقدر قول نسخة معدلة , واقعية شوي اكتر ..... لكن كل الشكر لهم للاساس اللي اسسوني عليه ..... أنا برأيي انو هادا كان شي كتير ايجابي بحياتي ...... |
اقتباس:
عبرت عن كل شي كنت بدي قولو وما عرفت عبر عنو باسلوب سلس متل اسلوبك تحياتي معلم وتحياتي للجميع :D |
اقتباس:
وكمان أنا بحس وما تكرهوني أني ممكن أضرب ولادي شوي :oops: ميرسي حسان نورت الموضوع :mimo: |
اقتباس:
|
اقتباس:
الصغير .. بتعرفي المشكلة متل ما بتقول ماجدة ( لا تنسى يا صغيري بعينيا ما صرتي كبيرة ) مهما كبرنا منضل بالنسبة ألون أننا صغار :D |
اقتباس:
اقتباس:
هلق أبو مزيد معو حق شوي بس تايغر .. لك يا زلمي كنت معي أنا وعم اكتب الموضوع المفروض تكون وضحت ببالك فكرتي .. .بتجي بتقلي تعبو وشقيو ... بصراحة ما بحب حدا يزاود عليي بمحبتي لأهلي وكأني البنت العاق اللي ما عم تقدر المجهود ... وكون تعبون بيمحي أخطائون لأ اعذرني ما بيمحيا وما المفروض يمحيا ... ألا إذا كانو أهالينا ألهة .. أهلي بعشقون عشق .. أبوي مستحيل حب حدا بحياتي قدو .. بس بقدر قول أنو غلط مانا مشكلة .. ولا نا أنانية يا جماعة من أول بالموضوع ذكرت مانا هون لنذكر أعذار الأعذار موجودة ومبررة .. نحنا هون جلسة نفكر شو غلطو ويا ترى نحنا شو منغلط ..؟ ؟ و:D |
اقتباس:
|
اقتباس:
|
اقتباس:
واضافة صغيرة انو لما اهلك واهلي ربونا على القيم الصحيحة متل انو ماتقابل الاساءة بمثلها كان شي صح منهم بس كمان يفترض يعطونا شوية وعي انو هالشي مع انو كتير صحيح واخلاقي بس بالتعامل مع بعض الناس مابيمشي هيك مو لانو الغلط بالفكرة الاخلاقية بحد ذاتها بس لانو بعض الناس مابتستاهل..... بكلمة تانية يزرعو فينا الاشياء اللي بيشوفها اخلاقية وبنفس الوقت يعطونا شوية ديناميكية وواقعية تناسب المجمتع..... وطبعا شغلة عدم مقابلة الاساءة بمثلها كان بس مثل بينطبق على كل او اغلب الاشياء اللي ربونا عليها :D |
تربية اهالينا بتتركز على المبادئ والعادات اللي عاشوها بزمانهم.لما بخرج للشارع عن جد بحس انو في كتير اشيا من تربيتي اللي اخدتها من اهلي ما بتلائم بعض الناس.متلا كون اهلي ربوني على التعامل بطيبة وباحترام لغيري فوقت بصادف حدا مو مربي على هيك مبادئ.بقول لحالي ما بينفع معو مبدأ التعامل باحترام وبنفس الوقت ما فيي غير اسلوبي لاني هيك اتربيت عليه.*ما عندي مشكل في هيك لانو تربية الاهل هي اللي بتكون شخصية الانسان*بس المشكل بيكمن في التربية STABLEما بتتطور مع تغير الاجيال.في هيك لازم الاهل بين قوسين*يعملو ميزا اجوغ*ونترجم بدورنا ما تربينا عليه وفق المجتمع اللي عايشين فيه.مع الاحتفاظ باخلاقياتنا:D
ميرسي كتير ميمو:D اشتقنا لمواضيعك بالصالون:deal: |
كنت بدي اقتبس من امرأة وجاد وميمو بس ما عرفت شو بدي اقتبس لاقتبس الموضوع صار كتير كمبلوكيتد
بس على العموم نورتونا بافكاركون امرأة كأنك قاعدة بعقلي ويلي قصدي جاد, ويلي عليك شلون بتفسر الحكي انا موافقكون على اللي عم تقولوه تماما بس يمكن انو انا نطيت على كيفية التصحيح وعلى صعوبة التصحيح وعلى مدى نجاعة اللي رح نقوم فيه على اساس انو تصحيح :D |
بتسمحيلي يا باترفلاي انو استعير عبارتك
(ما بحب حدا يزاودني على حب اهلي) يعني ما رح ضيف على اللي قلتيه انتي وامرأة من ورق بالرد على ابو مزيد وتايغر لحتى ما نشعب الموضوع غير أني بضم صوتي لالكن:D |
اقتباس:
|
اقتباس:
|
اي سيدي غلطوا وبرياحه كمان....
:x غلطوا لما طلعوني بنت شبه مثالية بتعاملي مع الاشخاص...وصورولي انو الكل رح يكون منيح معك اذا انتي كنتي منيحه معون.... طلع في عالم لو بتشعلون العشره رح بضلو مو مناح... غلطوا لما ربوني ترباية ديمقراطية كتيرررررررررررررر جدا جدا لابعد الحدود...:frown: .. لاني لقيت حالي باختلاف تام مع كل وحده كانت معي بالمدرسة...فصرت متل الضايعه انو مين الصح؟؟؟؟ انو انا اذا كان عندي شي رفيق شب... بروح فورا بقول لاهلي الموضوع اقل من عادي وبحياتي مارح فكر انو بقول او لاء؟؟؟ طلعوا رفيقاتي بالمدرسة بروحوا فيها جرائم اذا اهلها عرفوا عن علاقات .... غلط بابا لما كان اب افلاطوني .... انو عادي لو قلي شي وما رديت عليه...عادي لو رح زرت رفيقتي وبعد ما قررت من حالي نام عندها وتذكرت باخر الليل دقلو تلفون وقلو اي انا رح ضل هون عم خبرك... لانو لما فتت بعلاقة عاطفية...لقيت الموضوع فيو مسؤوليه وخصوصي انوو اذا كان مختلف عن ابي... يعني اذا قال بدو شي انا لازم اعملو..مو بكل بساطة بدي قلو لا ما بدي ... يعني بكرى لما بصير ببيت زوجي اكيد اكيد زوجي مارح يعاملني متل الوالد.... انا برايي انهن كان لازم يعملو حساب ويعلموني ع كل شي..مو بس الاشيا المثاليه... ومتل ما قال الامام علي (( لا تعلموا اولادكم اخلاقكم..فلقد خلقوا لزمان غير زمانكن..)) :D |
اقتباس:
ان كانو ديمقراطيين وان كانو ديكتاتوريين وان كانو شو ما كانو المهم الحق عليهون بالاخير انا ما عم افتري يا ري مي ويا ميمو ويا امرأة |
اقتباس:
بس انا عم قول انو بس لو كانو شوي متوسطين بديمقراطيتهن يعني الدكتاتورية حلوه كمان.... وهديك اليوم كان رفيقتي عم تشكيلي عن اهلها وهيك..وكنا فاتحين جلسة نميمة عن اهالينا...رح قلتلها ولك بكرى مو يمكن بنتي وبنتك يقعدو سوى نفس هالقعده وينمو علينا...:lol: ..!!!!!!!!!!!!!!!!! |
اقتباس:
باترفلاي انتي شلون فهمتي اني عم زايد ممكن اعرف ؟؟!!!!!! شفتي شي اشارة باني اتهمتك بشي او لمحتلك بشي بيخصك شخصيا او بيخص اي حدا تاني ؟؟!!!! كل كلامي كان بشكل عام ....... و استعملت كلمة ( برأيي ) اكتر من مرة يعني هذا رأي خاص ..... و لما جبت سيرة العائلة , استعملت عائلتي و حياتي الخاصة ..... انا بصراحة ما شفت تفسير لهالتحسس !!!!! على ما يبدو متل ما قلتي انا رديت بعيد عن صلب الموضوع و ما قدرت وصل للفكرة المطروحة ...... و عليه انا باعتذر منك و من المشاركين اذا انا زايدت على حدا او حدا تحسس من كلامي ..... انا بسحب كلامي و اعتبروا مشاركاتي ما انكتبت ..... موفقين ....... |
| الساعة بإيدك هلق يا سيدي 08:56 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون