|
القرميدة المكسورة
النعيق (تحشيشية، فاشلة، تصدر غالبا بعد هزة بدن) العدد 4 القرميدة المكسورة، هيي واحدة من اروع روايات الاديب اللبناني (و لو انو لما كانوا يسألوه كان يقول انو هوي سوري متل ما جبران سوري) الراحل "سعيد تقي الدين"عدد خاص سعيد تقي الدين درزي، لما كان صغير، كان ينزل كل يوم من ضيعتو على مدرستو يللي ببيروت. ع الطريق كان في دير مسيحي قديم، و كان هالدير يغيظ سعيد لأنو كان قرميد سطحو مكسور و حالة الدير مزرية، و كان يستغرب ليش هيك المسيحيين هاملين هالدير بالذات. ببلد متل لبنان، الطائفية فيه متل الخبز، كتير بيهتموا بدور العبادة لدرجة انو مستحيل تلاقوا معبد إلا و احلى من قصر يلدز إلا هالدير، عتيق، مبهدل، لدرجة انو حتى قرميد سطحو مكسور كبر سعيد و تخرج، و تعين سفير لبنان بالفليبين، بالاضافة انو كان صحفي يكتب بجرايد لبنان، و يهتم كتير بالسياسة. بهالوقت، بزغ نجم علامة كبير اسمو انطون سعادة، اسس حزب علماني اسمو الحزب السوري القومي الاجتماعي، بيرفض الطائفية و الاقطاع و كل الاوبئة الاجتماعية يللي ما زلنا ليومنا هاد منعاني منها، و هيي السبب الاساسي بتخلفنا. سعيد كره انطون سعادة اكتر من كرهو للدير المبهدل لمجرد انو انطون سعادة كان مسيحي، و كان ... طول فترة تواجدو بالفليبين يكتب مقالات يهاجم فيها سعادة، و كان دايما يختم كل مقالاتو بالعبارة التالية: "عندما اعود إلى لبنان، سأعلق رأس هذا الولد (بيقصد انطون سعادة، كان دايما يلقبو بالولد لصغر سنو) على خشبة في رأس بيروت" بتموز سنة 1949، تم اعدام انطون سعادة، عن طريق شنقو بمنطقة راس بيروت و لما سعيد تقي الدين قرا الخبر صعق، لأنو تنبأ بأنو سعادة رح ينعدم شنقا براس بيروت تحديدا، و لمعلوماتكم، ما تم اي عملية اعدام وحدة بمنطقة راس بيروت إلا عملية اعدام انطون سعادة بعد هالحدث، استقال سعيد و رجع ع لبنان، و صار يقرا فكر سعادة و مبادئ حزبو، ... و اقتنع فيها و انتمى للحزب السوري القومي الاجتماعي. و بيوم من الايام و هوي و راجع على ضيعتو، و هوي ع الطريق شاف الدير القديم، بس هالمرة كان مرمم و مصلحين قرميدو و منظر الدير من احلى ما يكون، انبسط انو تصلح الدير، و فات عليه و سأل الخوري سعيد: الله معك ابونا الخوري: الله معك يا ابني سعيد: و اخيرا رممتوا الدير، ايمت رممتوه ؟ الخوري: آخر مرة رمموه متل مو مكتوب بالسجلات كان سنة 1860 سعيد: 1860 ؟؟؟!!! مستحيل!!!!، ايام الدراسة من 10 سنين كنت كل يوم امرق من هالدير و كنت شوفو مبهدل الخوري: يا ابني، صرلي عم اخدم بهالدير اكتر من 40 سنة، و من يوم ما فتت عليه لليوم، ما تغير حجر واحد فيه حسب ما كتب سعيد تقي الدين، الدير فعلا ما تغير فيه شي، يللي تغير هوي افكار سعيد تقي الدين نفسو و نظرتو للامور بالماضي، كان الحقد الطائفي الاعمى و كرهو للمسيحيين يخلوه يشوف الدير مبهدل، بس بعد ما لغى الطائفية من حياتو... صار يشوف الدير على حقيقتو بتمنى لو يجي اليوم يللي اقدر الغي الطائفية من حياتي متل اديبنا العظيم سعيد تقي الدين، ساعتها، اكيد، رح اقدر شوف الامور على حقيقتها و بجمالها الطبيعي فشل، و فاشلون: بناءا على طلب مشرفنا الغالي yass رح نزل هالزاوية بهالمجلة المبهدلة بس اليوم رح احكي عن سبب اختياري للفشل بمانشيت المجلة حسب اكتر الاحصائيات تفاؤلا، عدد الناجحين بهالحياة لا يتجاوز الـ 10% من الناس، كل الجوائز الهم، كل المقالات بتحكي عنهم، كل الدنيا بتدور حواليهم اما هالتسعين بالمية المساكين ... هدول ولاد البطة السودا و بما اني من انصار "توم" ضد انتصارات "جيري" المتلاحقة، و من انصار "المدمرون" ضد "جونغر" و من انصار الفلسطينيين ضد الاسرائيليين و من انصار المعارضة بسوريا ضد الموالاة و المخابرات و من انصار "الضعفاء" اينما وجدوا ... لسبب بسيط اني واحد منهم مشان هيك قررت انو تكون هالزاوية من اليوم و طالع، هيي تسليط ضوء على بعض الفاشلين، او على فشل بعض الناجحين عقل بالكف: (زاوية مستقلة، لا تعبر بالضرورة عن رأي كاتبها) خدام من باريس، يريد انقاذ السوريين من الجوع البيانوني من ميونخ، يريد انقاذهم من الكفر رفعت من ماربيا، يريد انقاذهم من الامبريالية البعثيون من دمشق، يريدون انقاذهم من الذل و الهوان الغادري من واشنطن، يريد انقاذهم من الديكتاتورية اللبواني من السجن، يريد انقاذهم من السجون انور البني، يريد انقاذهم من الظلم اما السوريين انفسهم، يريدون من ينقذهم من جميع هؤلاء في ناس من كتر ما حبوا وطنهم.................. قضوا عليه (اسامة الرحباني) شاخصة مرورية: (القيادة فن و ذوق و اخلاق) اخي السائق، افضلية العبور للقادم من جهة اليمين،............. و لأبن الوزير، و ابن المدير، و ابن الضابط، و ابن عضو مجلس الشعب، و ابن .... باختصار... افضلية العبور للجميع ما عداك و العقل زينة |
رائعة رائعة رائعة ....
تسلم ايديك كريم على هالمجلّة " المرتّبة " :سوريا: اقتباس:
|
برافو كريم هالعدد افضل من الاخير
في تطور سريع احتمال بعد اسبوع تروح تكتب لمجله كبيرة ويمكن عاخر السنه تكتب فالنيوز ويك او واشنطن بوست (بشرط تستمر فالتقدم كل يوم )صعبتها عليك شويه.. بس مشان توصل للعالميه لازم يكون طريقك صعب شويتين تلاته ويمكن اربعه |
شكرا انجل و شكرا محمد على تشجيعكم
بس ما بتصور انو ع آخر السنة رح اكتب بالنيوز ويك، اصلا انا ما بحبها لهالمجلة كتير عموما الكتابة لما تكون غاية بحد ذاتها، بتصير كتير تافهة المهم عندي هوي الحقيقة... لأني بآمن انو "لا عقيدة اسمى من الحقيقة" و شكرا الكم مرة تانية |
1 ملف مرفق .
نسيت نزللكم كاريكاتور العدد
مشان هيك رح نزلو هون ملطوش من موقع الدومري - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - |
انو نطرتني من مبارح على نار لاقرا الموضوع
بس محتار علق على الطائفية ولا على الفشل ولا على السوريين المشكلة انو التلات مجموعات انا منهون فما بقدر علق على حالي انو تحياتي الك وناطرين الاعداد الجاي |
:lol: :lol:
كريم ... كاريكاتور العدد المفروض كان ينزل مع العدد الماضي .. كمساعدة بالسؤال;-) |
استاذ كريم تقبل تحياتي العظيمة على موضوعك الجبار .....
رغم اني قررت من فترة الإبتعاد عن المولضيع السياسية ووجع الراس ( حتى أخبار بطلت تابع ) بس مافيي .. متل ما بيقول المثل ( الشــر *** ) اذا تابت بتطلع من الدرخوش ) وهي عم يصير فيني ... المهم مالنا فيها .... الله يقويك |
يا معلم!! فعلا شي حلو كتير ... و مشكور على الأخذ باقتراحي
بانتظار أعداد قادمة:سوريا: |
قوية يا معلم .... رووووووووح والقلب داعيلك ... :gem: :gem: :gem:
|
يعني
شو قول ما بعرف شكرا كركوبة عمل رائع واكتر من بعد اذنك بدي صير استخدم اعداد مجلتك وابعتها بالايميل موافق قلي بسرعة مشان ما الطوش بدون حقوق :p :p :p :p |
اقتباس:
بالتأكيد موافق زين ... كحقوق ملكية لو بدي دور عليها ما كنت نزلتها باخوية، بعد ما نزلت باخوية صارت ملك كل الاخويين عموما هالشي اكيد بيفرحني |
ثـــــانكيو
مــــــــــــــــان |
بهنيك بهني نفسي فيك
|
والله من المواضيع اللي بدها up
وللي ما قري الأعداد اللي قبل - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - هلق يا أما كريم ما عاد شي يهزلو بدنو .. :cry: لهيك توقفت المجلة ... أو التحشيش وقف :shock: ناطرين :D |
اقتباس:
بتعرفي وضع البلد مابسمح هلىء لأنو المرشحين مشغولين بالأنتخابات:melody: |
انو شي غريب جدا
هي المجلة وين كنتو خافيينها وليش كريم ماعاد نزل هيك شغلات عنجد هالشي حرام ما بيصير أطالب بإعادة النشر |
حبيت اعمل UP مشان الكل يقرأ موضوع كريم
 :D |
شكرا souriana..
لولا تعليقك ما كان سنحتلي الفرصة ان اقرا هذا الابداع.. وياريت نرجع نشوف ابداع جديد لكريم ..حتى نحيي على هذه المجلة الرائعة.. |
أسأل المولا عز و جل أن يفك أسرك
و أن تقراء كلماتي هذه المتواضعة و تعلم أن هناك من كان قلبه عليك لمجرد أنه قراء موضيعك و للعلم أني قرأت النص الذي بسببه تم القبض عليك على كل حال لا بد من دفع الثمن لأن الحرية لا تأتي بدون ثمن لأنها غالية قلبي يتفطر ألما عليك و على الأخوى الباقين أسأل الله أن يفك أسرهم جميعا تحيات و دعاء أخوك حلبي :D |
اقتباس:
|
انشالله العدد القادم من مجلة النعيق قريبا نشوفو
اشتقنالك كريم!!! |
لاتنسوا تخبرونا بنتائج المحكمة ..
|
انشالله بيطالعوه براءة
هيك عندي شعور |
أنا حاسس حالي برات الجو
إذا في محاكمة لكريم يا ريت حدا يخبرنا شو عم يصير فيها إذا كان حدا قادر يا ريت نسمع خبر بيفرح القلب عن الكبير كريم يا رب يرجع مشان ترجع شوي من هيبة أخوية الضايعة بهالإيام انشالله خير ... |
| الساعة بإيدك هلق يا سيدي 09:02 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون