|
رمضان مشكلة عند البعض..!!
انو شو مشان هالسنة هي .. عدد المنزعجين من رمضان ومن الصيام اكتر من باقي السنين ؟
يعني صاير شي هالسنة اكتر من بقية السنين ؟ انو مثلا عدد مدعين الصوم اكبر من بقية السنين ؟ ولا انو مظاهر رمضان السنة صارت مزعجة لبعض الناس اللي عم يتدايقو منها ؟ يعني هل في شي جديد او اضافات جديدة لمظاهر رمضان خلتها مزعجة للبعض ؟ ولا القصة .. قصة الوقاحة زادت... او الجراة زادت بالتهجم على كل شي مقدس عند الغير ومحاولة تسفيهو؟ على صعيد آخر : اللي مو صايم .. سواء لانو ما بدو يصوم او لانو دينو مو اسلام .. شو بيزعجو بوجود ناس صايمة ؟ او ناس مو صايمة ؟ او ناس مو صايمة وعاملة حالها صايمة ؟ يعني شو هالشي العظيم ..... لواحد اساسا مو صايم ؟؟ والاحلى انو اللي ما بصوم لشو بدو يفتي بالصيام ويقلك شلون الصوم الصح؟؟ طبعا عم احكي لاني بيوم من الايام ما كنت صوم رمضان بأيام الجاهلية ... وبعرف شو يعني انك ما تكون صايم وبعرف كل ردات الفعل من اللي حواليك وقت تكون مو صايم .. والاهم انو وقت كون مو صايم ما بحاول اتدخل او ازعج الصايم منو لربو يصطفل .. ومو شغلتي علمو الصيام اذا انا نفسي ما عم اعملو وياريت نفرق بين حالة فردية وحالة عامة انو مثلا في فرق بين اني قول ..رفيقي فلان عم يفطر ويشرب ويجيب نسوان برمضان وبين اني قول يا اخي المسلمين منافقين عم يفطرو ويشربو ويجيبو نسوان برمضان والدليل رفيقي فلان بقى ليش اللف و الدوراان ؟؟ القصد انو كل شي عم يتغير ...... من زمان مين كان يقدر يحمل سيكارة بالطريق لك حتى اخوانا المسيحين النسوان كانو برمضان يتسترو كرمال حرمة و احترام الغير هلئ صار الواحد بيدايق من الصيام و بيفطر و بكل عين وقحة بيقلك انا مفطر كل شي تغير...........:cry::cry: |
اي لاتزكرني يازلمي ..... عم يصير كل فصل ! :pos:
بس انو موضوع الصيام مانو مزعج لاء .. عادي .. بضلو عادي لتوصل لهاي النقطة : نقطة انو بدك تصوم ؟ اوكي صوم بس ما تحمل الله منيّة ... لان انت اولا واخيرا صايم لحالك و ل الله تبعك مو صايم الي ... :lol:.. يعني ع مستوى اليوم حوالات جاييتني عالشركي بدي ابعت المراسل تبعنا يجيبن ... بعتو اول مرة وهوي مكشر .. اي ما استرجيت قلو تاني مرة الله وكيلك :o |
أنا بشوف بالعكس
مع اني بصوم بس بشوف أنو الصايمين هني يللي بوجهو الاهانات للغير صايمين وصلت لدرجة نعت الغير صائمين ( أو الصائمات تحديداً ) بنعوت كتير بشعة من جهة تانية .... حلو أنو الواحد يحترم مشاعر الصايمين ..( متل أنو ما ياكل قدامون مثلاً ) بس هادا يعتبر زوق منو ... مو حق للصايم بيطلبو طلب |
اقتباس:
 |
هلا انا قريت الموضوع بس ما فهمت انو هية قصة صايرة معك او شو ما بعرف ..
لهلا من كل اللي بعرفن واللي شفتنم عالاقل بيحترمو اللي صايم قدامو .. بس انو ما فهمت الموضوع بالضبط .. لشو او الهدف منو ؟ :D |
مشكور أخي الكريم على الموضوع
بس بحب أقول أن الكثير من الناس حساسين زيادة عن اللزوم في شهر رمصان صدقني أخي الكريم يعني كيف بتتصور أخوانك المغتربين في أوروبا مافي مين يدللو عليه على كل حال أجواء رمضان لها نكهة خاصة و هنيئا و لمن يتمتع بها |
اقتباس:
الموظفين برمضان ما بيشتغلو شي.. والشوفيرية بيخانقو... والبياعين وجهون ما بيتفسر.. وقبل الافطار ب3 ساعات الشام كلها بتجن متل اللي بيجنو... وماعاد فيك تلاقي لا تكسي ولا سرفيس ولا حتى طرطيرة.توصلك لى بيتك.. اذا انت صايم وبدك تكسب حسنات لا تحمل الاخرين فوق طاقتون.. وتخليهون يدفعو هنن تمن صيامك.. |
نص الموضوع كتير متداخل وماكتير واضح
بس انا رأي انو كل واحد حر بيصوم ما بيصوم ماحدا دخلواا بالشغل مثلا عندي اللي بيصموا تنين والباقي لاء بس ولامرة صا حساسية بالموضوع بالعكس بوكرة رفيقي صايم عازم الشبيبة ع شيبس الصبح و عحسابوااا :p بس طبعا يا عزا بعمرك اذا كنت ماشي بالشاع وعم تاكل عكلة او شربت شربة مي بتلاقي الاغلبية عم يطلعوا فيك من تحت لفوق ومانك عاجبون وبتكون فاسق وكافر |
رمضان ماتغير ولا الاسلام ولا الفرائض
الي تغير همه الناس ...... في البلاد العربيه تتاكد انو في اسلام بس مافي مسلميين |
اقتباس:
وثم من متى بيتقيم الناس على أساس مين صايم ومين مو صايم وبعدين لازم كل شي يتغير شو انشالله بدك تقلّي حابب توقف الزمن كمان [/color] وكل عام والصائمين بألف خير وانشاء الله بهلة هلال رمضان القادم منكون كتير متغيرين ومتطورين نحو الأفضل |
اقتباس:
لايكثر بس |
اقتباس:
لانو مابيحترم الناس الصااايمين ,, وخصوصا في بلد عربــي مسلم ,, |
اقتباس:
|
اقتباس:
بكل عين وقحة قال انا مفطر وراح شرب مي ولا كان فيه دم ولا احترام للدين وللغير اقتباس:
انا معك اقتباس:
اقتباس:
بهنيك يا خليل على شجاعتك وصراحتك وانشالله يا رب دايما تكون للأحسن يا رب عليت بنظري كتيير;) وصرت احترمك اكتر بصراحتك هي:lol: :yahoo: اقتباس:
اقتباس:
ايه والله الله يجيرنا انا بظن انو السبب الرئيسي من التنشئة الخاطئة من قبل الأهل بعملو الدين لأولادن كأنو شي بعبع وبخوف ويا ويل ويلن اذا بيفطرو وما بصلو وما بكون في رحمة ورفق بالأطفال وهنن باسلوبن هاد ما بيعرفو انون بنفرو الولاد من الدين بدل ما يحببوه فيه مشان هيك بيكبر وبكل عين وقحة حاقدة على الدين وبتكره شي الو علاقة بالدين... وبصير يعملو هيك الله يثبتنا بالقول الثابت بالحياة الدنيا والآخرة يا رب.. مشكور عالموضوع خليل كتيير لأن هيك موضوع يستحق النقاش بالصالون.... كل شي تغير...........:cry::cry: |
اقتباس:
بس يا ريت ما يكون قصدك بـ"أنو المسيحين النسوان كانو برمضان يتسترو" يعني أنو هني ما عندن احتشام أو هيك شي.. |
شهر
بشهر رمضان لا تغيير سوى بعض التعصيب الزائد لاني انا باكل بالطريق و بشرب بالسرفيس
يعني انا هيك تصرفي مقصود و علني ومو فارقة معي :frown::pos: |
اقتباس:
يعني الكل كانو ملايات والمراة المتطورة شوي بتلبس فسطان وعلى راسها غطا بتربطو تحت رقبتها.. يعني المسألة لا احترام ولا شي.. ومشان السيكارة بالشارع كان اللي بيشوفو مفطر بالشارع بيروح على السجن لغاية أول يوم العيد هي الشغلة تحديدا بالستينات .. |
يلي بيصوم من قلبو ولربو ما بتفرق معو يعني انا بصوم وبشوف كتير ناس وبقعد مع ناس احيانا بيدخنو وبيفطرو وبيحاولو قال يخلوني افطر معهن بس برفض طبعا هني مسلمين ومع ذلك ما بتفرق معي يعني لو بدي افطر بفطر بس انو انا بصوم الي ولربي .. ومافي شي بيخلني افطر ولا ممكن اشتهي شي ..
|
يعني انا ما كتير فهمت شو المزعج بالموضوع
هي انا بالبيت الكل صايم ماعدايي ولابجي نظر على حدا ولاحدا بينظر عليي انا مابدي صوم وحرة اشرب واكل وين مابدي متل ما الصايم حر ما ياكل ومايشرب لبعد الادان هلق هالفترة الكل خلاقو طالع لانو الصيام جايي بصيف ونطرو لسا 10 سنين بالصيف يلي بدو يصوم وبدون تنظير لازم يتعلم الصبر وللاسف عم يعملو كلشي الا قواعد الصوم الاساسية متل ما انا شايفة على كل كل واحد حر يصوم او ما يصوم الصايم مافي داعي يزعج يلي مو صايم والعكس صحيح تماما |
اقتباس:
و بصفتك شو حكمتي عليه أنو وقح أنو يعني إذا انتي صايمة .... ليش تمنني الخلق أنا صايم ... و اليوم كنت عازم الشباب عندي الضهريات عالمتة وين المشكلة بالموضوع ..؟ |
هلق بظن أنو الصيام......مو بس عن اكل وشرب........الصيام عن كف الأذى وضبط اللسان........بعدين شو هل الصيام هاد الي أعدين عم منن الله فيو.........خيو صومو.........وما دخلكون بي حدا......يعني ما بعرف شو يعني اذا شفت واحد عم بياكول ويشرب أدامك؟؟؟؟؟
بظن هاد بيقوي الايمان أكتر.........الا اذا هاد مو موجود.........غير تنظيرين........تركو الناس....ولتهو بي حالكون...... في متل بي قول.....العبادة الصح ما بتكون بين الئيئيان......بتكون بين السيئان......:o |
لسه ما قرأت كم سطر من الموضوع استفزني مع اني اكلة ومكترة وعم اتحلى يعني هلىء خود بقا على نقاشات ومهاترات وكلام برات الطريق وتجريحات المهم ما علينا كلامك كلو غلط بغلط وفايت ببعضو مع الاعتذار:D اي نعم صار الانسان المتدين شغلة غريبة وناقصة ومليان خبسطبعشر عيب بس هاد مو معناها انو نعمم مثلا انا مديري دائما العقدة بوجهو بس برمضان كلياتنا اجمعنا على انو الطف ومتفهم اكتر النا ولظروف الشغل برأيي الصيام هي من أقدس العبادات وأقربها لله لانو الانسان طول ماهو صايم بحس انو قريب من ربو وبيحسب حساب الغلطة والكلمة والتصرف يلي موبيمحلون اما بالنسبة للناس التافه الغير محترمة الغير جديرة بالاحترام يلي عم تحكي انت عليها انو بيتزلزل بدنون بس يشوفو صايم هدول منعاملهم معاملة الزبالة بالحاوية وبالنسبة لموضوع احترام الشخص الصائم وماياكلو ادامو هي شغلة نسبية وبتعود للشخص في صديقة بالمكتب معنا مسيحية لامبارح ولا اليوم رضيت تاكل مع انو الكل قلها وفي ناس مابيهما هالموضوع خيي خليل مابدها هالقد ولا تحملها هالقد كل يلي ذكرتو مو مستحق زعلك خليك اكبر من هالمجموعات التافه الغير محترمة لنفسها قبل ماتحترم قدسيات غيرها يخليلي عينك روقلي حالك لساتنا ب 2 رمضان ومية اهلين:D |
اقتباس:
كنتى نتمناكي من الصائمين بس مع هيك مية اهلين:D صح رمضان هالسنة ولعشر سنين متعب بس صدقا يلي بدو يقلل زوق ويعصب وياكل هوى ومدري شو لانو عطشان وجوعان هاد من الاساس انسان عاطل وسيء الاخلاق مادخل الصيام يعني من مبدا الطبع غلب التطبع مثلا انا طبعي نرفوزة:oops: بس برمضان ولله بنشرب مع المي العكرة الله يحميني:gem: |
اقتباس:
خصني انو كل انسان لازم يكون عندو احترام لغيرو متل ما بحب الناس تحترمني وتحترم ديني لازم احترما كمان واحترم معتقداتا متل ما حكا خليل عن المسيحيات بالشام من عشرات السنين كيف كانو يحترمو المسلمين ويتحشمو برمضان... بظن انو أي انسن مسلم صايم ما بمنن حدا لأن صيامو لربو وبس والسبب انو بيقدر ياكل ويشرب بعيد عن عيون الخلئ بس لأنو بحب ربو ما بياكل بالخفية بئا كيف بمنن غيرو ما بظن الشخص اللي بمنن الغير بأي شي الا انو مريض نفسيا... |
اقتباس:
ياكلو ويشربو وياكلو بوظة وشوكولا كالاكسي وسويسرية ويا روزة مايهزك ريح:cry: مع الاحترام مابعرف انا هيك اشخاص ما بتأثر فيني ابدا ولا بشوفون اصلا خليكم ريلاكس كوووول:larg: |
اقتباس:
حدا خطر على بالو يطلب من شي صاحب مطعم يضب شوايات الفراريج يللي قدام محلو ..؟ متل ما قلت قبل ... يللي بحب يراعي مشاعر غيرو ... فـ يكتر خيرو .. هادا زوق منو .. بس مو واجب .. و لا بتقدري تجبريه و من العيب تقولي عنو وقح لازم تتركو قشور الصيام ... و تفهمو شو بيعني بالضبط القصة مو بس مظاهر و مين أكل قدام مين القصة بينك و بين ربك بتحبي تصومي .. صومي لحالك .. ما بتحبي .. بكيفك بس ما خصك بغيرك |
اقتباس:
قولتك حبيبتي وردة بيضاء نحن أكبر من انو نعبر هيك ناس ما عندن درة احترام أنا من جهتي ما بعيرو أي اهتمام لأن اللي ما بيحترمني ما بحترمو وانا أكبر من أعطيه أي اهتمام... عن جد خليل ولا يهمك انت اكبر من انو هيك موضوع يعكرك الله خلئ للناس عقل وكرامة ودم واحترام ومروءة وكل مين بيعمل بأصلو... ما هيك;) |
يا جماعة حابب ذكركون بي شي.........لا أكراه بل الدين
لك شبكون......هاد دين الي عم تحكو عنو ولا شو؟؟؟!!!!:shock: حاج نفر الناس بقى........روقو. |
اقتباس:
انو كل دين اخد لحالو مركز سكن ومحتكرو يعني مثلا وين منطقة تجمع المسيحيين ؟؟القصاع باب توما؟؟ اي منهم لحالهم موقفين شوي فراريج وكباب وحتى الخبز ببيطلو يحطولو حليب وخد على هالقصص بقا بتعرف سمرا بتعجبني فيك انسانيتك يعني مسلم وصايم وعم دافع عن البشرية بكل اطيافها وتحس بمعناه المسيحيين لما يكونو صايمين ويشمو ريحة الكباب يلي بتغوب القلب:hart: زقفولو:D احلى اب سمرا |
خلينا نحكي بالمفتوح
ايمتا حضرتك و امثالك احترمت طقوس و شعائر غيرك او حتى التزامات غيرك ؟ ايمتا حضرتك شفت صديقك الغير مسلم صايم و احترمت صومو ؟! بعدين اكيد صادفت ناس عندا شعور غثيان و فقدان شهية .. و انت اكلت... ما فكرت بهذا المريض مثلا لو ما عندك امر تحترم مشاعر غيرك ؟! بعدين انت اذا كنت صايم ... و حدا شرب قدامك شو رح يصير عندك؟ انا مجربها انقطاع تام و كل اصدقائي اكلو و شربوا قدامي و شو يعني؟ من تقعد تراقب غيرك و تنسى نفسك ... هذا التفكير اكيد ناتح عن عدم الايمان و انما حب الظهور فكرت مرة تحترم غيرك ؟؟ ما اعتقد ! بدك تحمل الله منية ... لا تجي تحمل الناس منية انو انت صايم ... اوكي؟! نسيت قول .. استخدام كلمات نابية يدل على ضعف الموقف و الكره .. لذلك ما اسنعملتها ! |
طيب يا جماعة ..انا الصبح لما بطلع بالسرفيس وبيكون حاطط تسجيل لشي داعية اسلامي.. عم يخطب ويحكي ويحكي ويحكي..والحكي تبعو بيزعجني لأبعد الحدود هل بيكون شوفير السرفيز وقح ولا لأ..
لما يوم الجمعة الجامع اللي جنب بيتنا بحارتنا اللي كلياتها مسيحيين ودروز بيضل حاطط قرآن 3 ساعات قبل وبعد الصلاة وايمتى ما اجا على بالو بيحط قرآن وبين قوسين وبعتذر للتعبير بيزعج الجيران.. يا ترى بتتصف هي وقاحة ولا لأ.. ولما بشوف واحد ماشي بالطريق وعم بفرك سنانو بالمسواك وتشط ريالتو ويمسحها بتكون هي وقاحة ولا لأ.. انا شخصيا ما بصنف التصرفات اللي حكيتها وقاحة .. بس بالمقارنة مع انو اشرب مي قدام واحد صايم فالتصرفات اللي ذكرتها أكتر وقاحة بكتير.. |
اقتباس:
شنو عم عاني منها :sick: نحنا حارتنا في بنصها جامع قد الحارة كلها ...وحارتنا مليانة من جميع الطوائف والمزاهب ... بيحط القرآن ساعتين قبل الآدان ... وانا مضطر اتحملو وما حط اغاني بالبيت (لأنو باكل بهدلة ) .. وبدي اتحمل صوتو اللي بيخـــ......... ـلي الواحد ينرفز وقت يأدن ... وخصيصاً ع صلاة الصبح .. يلي بيفيق الدب النايم من كتر صوتو مو عالي :frown: المهم بالنسبة لقصة الصيام ... فا انا بصوم وما بحس بايا وقاحة من حدا عم بيدخن .. عم يشرب .. عم ياكل قدامي ... بالنسبة الي هوي حر .... وانا حر بصيامي .. الا ازا كنت معتبر صيامي للعالم ... وبالتالي فا رح اتدايق .. بس هادا الشي مو زنبو ... مو زنبو يتحملني وانا صايم وما ياكل وما يشرب وخصيصاً ازا كان معي بنفس الشغل او بالطريق او بالبيت !! :pos: |
اقتباس:
أنا مثلاً من سنتين كنت ساكن بطرطوس ( بالمدينة ) و كان موقع بيتي ضمن المدي المجدي لـ 3 جوامع يتنافسوا بين بعض .. مين مركب أمبلي أقوى يعني مثلاً آذان العصر كان يجي بموعد قيلولتي اسمع التلات جوامع سوا .. بفارق زمني شي ثانية بين الجامع و التاني يعني تصوري حالك نايمة .. و تسمعي هالتلات اصوات مع بعض و بفارق صغير بالوقت .. بيطلع متل الصدى بحفلات علي الديك و بالرغم من اني كنت عصب ... و كنت احيان كتير انحرم من نومة الضهر بس ولا مرة خطرلي أنو يللي عم يأدن ...... وقح ..:? |
اقتباس:
و كانت تجي رفيقة اختي تدرس عنا بالبيت بذكر ضلينا يمكن اربعين يوم .. ناكل أكل نباتي .... احتراماً للضيفة ... لأنها كانت صايمة بس لو اني بوقتا اشتهيت شي سندويشة شاورما مثلاً ....... ما بظن كانت رح تقول عني وقح |
اقتباس:
لانو الجوامع بسوريا بتخضع لنظام معين مجبورين عليه من جماعة الامن لاسباب كتيرة الجوامع تفتح وقت الصلاو فقط وتغلق بعدو مباشرة مابيطلع من الماذنة غيرصوت المؤذن وصلاة الجمعة فقط واحيانا نصف ساعة قرأن حصريا فقط يوم الجمعة وبالنسبة لرمضان نفس الشي عدا العشر الاخير تفتح طول الليل لصلاةة التهجد والقيام وماشابه اما تقليلي جامع وبسوريا يقدحك 3 ساعات قران؟؟ معلش يعني بزمن العثمانيين ماصارت |
اقتباس:
وين بطرطوس ها المكان جاية على بالي اشتري بيت هونيك حبيت المنطقة ومواصفاتها ممكن تقلي وين بطرطوس؟؟؟ في مدى مجدي ل 3جوامع |
اقتباس:
بزمتي المأدن يلي جنبنا .. وصوت القرآن يلي بيحطو .. والبفلات يلي بيبخشوا طبلة الادن ... رح تكفرني ! :pos: وانا عكس الشباب .. بعتبرو وقح وكتير لأنو لا عم يحترم مسلمين ولا مسيحيين .. يلي ساكنين عنا بالحارة :frown: |
الي يردي يصوم يصوم
والي ما يريد بكيفة لا تزر وازرة وزر اخرى |
اقتباس:
طرطوس على قد مو صغيرة ... أي جامع فيها عندو استعداد يصرع المدينة كلها و طرطوس فيها حوالي العشرين جامع مع أنو واحد بيكفيها |
اقتباس:
اقتباس:
لنفرض انو الاسلام اجى الاول والمسيحيين واليهود وغيرهم هننى اللي بيصومو هلئ ، على فرض اني مو مسلم ، هل انا ملزم ما احمل سيكارة بالطريق واذا صبية مسيحية ملزمة تغطي شعرها او تبطل تلبس قصير !! بصراحة شايف اني مو ملزم ، وبناء عليه هنى هلئ مو ملزمين (مارح ناقض حالي واقبل الون اللي ماقبلتو عحالي) بس بيضل الموضوع قائم تحت بند مراعاة المشاعر والزوء والمودة مو اكتر . |
| الساعة بإيدك هلق يا سيدي 09:07 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون