|
مرسوم رئاسي بتشديد عقوبة القاتل دفاعاً عن الشرف
أصدر السيد الرئيس بشار الأسد اليوم المرسوم التشريعي رقم (37) للعام 2009 القاضي بإلغاء المادة 548 من قانون العقوبات والاستعاضة عنها بنص آخر وفيما يلي نص المرسوم .. الجمهورية العربية السورية المرسوم التشريعي رقم (37) رئيس الجمهورية بناء على أحكام الدستور يرسم مايلي .. المادة 1- تلغى المادة 54 من قانون العقوبات ويستعاض عنها بالنص التالي.. يستفيد من العذر المخفف من فاجأ زوجه أو أحد أصوله أو فروعه أو أخته في جرم الزنا المشهود أو في صلات جنسية فحشاء مع شخص آخر فأقدم على قتلها أو إيذائها أو على قتل أو إيذاء أحدهما بغير عمد على أن لاتقل العقوبة عن الحبس مدة سنتين في القتل. المادة 2- ينشر هذا المرسوم التشريعي في الجريدة الرسمية دمشق في 9-7- 1430 هجري الموافق 1-7- 2009 ميلادي. رئيس الجمهورية بشار الأسد يذكر أن المادة الملغاة كانت تقضي بتوقيف مرتكب القتل دفاعاً عن الشرف ستة أشهر في الحد الاقصى...وأحياناً لا يتوقف. سيريا ستيبس |
اقتباس:
|
النص القديم
اقتباس:
يعني طيّرو النقطة (2) اللي برأيي البعض كانت هي الأساس في تخفيف الحكم عن أشخاص قتلوا أخواتهم أو زوجاتهم لمجرّد الشك, و عالحكي في تشديد على انو رح يتم التشدد بانو الاسباب المخففة تكون فقط على مرتكبي الجريمة لحظة المفاجأة بالزنا المشهود. يعني تطبيق المادة القانونية بحرفيتها... لكن في شغلتين, أو لأ عدة شغلات: الأولى: من حيث المبداً, كإعطاء سبب مخفف لمرتكب جريمة قتل هو بشكل من الأشكال تبرير لهالجريمة التي لا تحمل مبرر أبداً, خصوصاً انو مخفف جداً (يعني جريمة قتل عليها سنتين؟! أي على تعليق بالانترنت راحو فيها ناس 3 و 4 و 5 سنين!!) الثاني: ما كتير فهمان شغلة "بغير عمد".. انو واحد استوحش و صار يضرب شروي غروي و اجت خبطة براس المرأة و ماتت؟ ما كان قاصد يقتلها؟ و للا بيعتبرو انو التصرّف بأكملو خلال لحظة الغضب هو تصرّف غير متعمّد؟ الثالث: اذا المرأة كمشت زوجها مع وحدة غريبة ما بتاخد أسباب مخففة اذا قتلتو (تخيلو عندو مسدس بالبيت و راحت صفقتو طلقة.. ) لأنو القانون مصاغ بالشكل التالي: قتلها أو إيذائها بشكل برغماتي, في تحسّن.. بشكل مبدئي, في مكياج .. و كل واحد ينقي على كيفو |
اي ابو الفيد .. شو مشان طيب ؟
اقتباس:
فادي خلينا نكون منطقيين .. ليش شفناها وقت كانت اقتباس:
يعني وقت كانت حد اقصى .. وما شفناها وقت صارت اقتباس:
صح يمكن مانو قد اللي منطمح فيه .. بس اي تغيير للأفضل لازم نزكرو .. ونمدح فيه .. متل اي تغيير للأسوأ .. نذكروا .. ونقول انو غلط .. :D |
اقتباس:
هلأ هون بهالنقطة هي .. يمكن انا ما كون فهمانا مزبوط .. بس انو اقل شي سنتين ؟. يعني في اكتر ما ؟ ولا ما في ؟ وهادا الشي على كل الجرائم .. يعني ازا شوّها مثلا .. وما قتلا .. شو وضعو؟ للاستيضاح فقط لا اقل ولا اكتر |
اقتباس:
على ألا يقل عن سنتين... يعني بموجب النص القانوني فينو يحكم سنتين, و فينو يحكم عشرين, الأمر يرجع للقاضي القصد من الملاحظة انو القانون يسمح بانو العقوبة تكون سنتين, ما يجبر انو يكون أكتر, و كان من المنتظر انو يكون النص القانوني موضّح انو العقوبة تكون إجباراً أكبر من هيك على كل حال, اذا تطبّق هيك بحذافيرو, بيكون خطوة, يجوز مو بكبر اللي كنا منتظرينا, بس بالنهاية خطوة (و هو يدخل التقييم الشخصي بأهمية هذه الخطوة). شخصياً -بغض النظر عن تقييمي لحجم الخطوة- مرتاح لأنو عمل حقوقي و قانوني و إعلامي متل الحملة الوطنية لأجل إيقاف جرائم الشرف جاب نتيجة, حتى لو كانت أدنى من المرغوب.. على الأقل انفتح طريق جيد في التعامل ما بين المواطن و الحكومة و المشرّع, طريق كان مسكّر جداً جزيلاً, و لساتو مسكّر.. بس نتمنى يكون عم ينفتح طبعاً |
اقتباس:
واضح من نص التعديل انو لحتى يستفيد الجاني من العذر المخفف لازم يكون في عنصر المفاجأة و حطولي خطين تحت المفاجأة , بالجرم المشهود , و حطولي خطين تحت المشهود , و فوق هاد كلو لازم يكون القتل غير عمد , و ع قد فهمي بالموضوع بمجرد استخدام اي اداة المعروف عنها انها قاتلة ( مسدس , سكين ) , بصير القتل عمد , و بالتالي ما بيستفيد القاتل من العذر المخفف . يعني من الناحية العملية صار الحصول على عذر مخفف بجريمة شرف شبه مستحيل , لصعوبة توفر كل العناصر , يعني تخيل واحد فاجأ مرتو مع البوي فريند تبعها بنص الفيلم , و بعدين قتلها بقنينة شامبو .......انا شخصيا لو كنت قاضي ما بحكمو اكتر من سنتين ..اي و الله . بقى انا شخصيا ارحب و بشدة بهالمرسوم ...و بوجه تحية لكل الشبيبة اللي تعبوا سنين وصولا لهاليوم :gem: |
اقتباس:
انشالله يتشددو بتطبيق القانون بحرفيتو... بيكون شي منيح كتير كود:
و بوجه تحية لكل الشبيبة اللي تعبوا سنين وصولا لهاليوم :D |
اقتباس:
اقتباس:
قد تموت وقد تعيش (في القانون اسمها ضرب باله حادة أدت الى الموت ) شو رئيك ؟ طبعا حالات ضيقة ومابكل غرفو نوم تمثال متل هاد (بس الازواج رح يحطوه بالفترات القادمة :o ) لذلك انا رح اميل شوي لما قالو ياس بهالخصوص اقتباس:
الواحد يقلق من التلاعب على المصطلحات والتفسيرات والنقطة الاهم طبعا ، ما عاد ممكن قتل بالشبهات او بالظن (هاي تحقق فيها انتصار اهم ) |
أول ما شفت الخبر دمعت عيني .. ولما قريت النص رجعت دمعت عيني مرة تانية.. زعلت كتير.. كتير..
انتبهت انو من أول ما بلش الكلام على موضوع هي المادة وبكل نقاش كان في اشخاص دايما يقولو انو هي المادة لا تقصر العذر على الرجل بل تشمل ايضا المرأة في اعطاء العذر المحل او المخفف وانو المادة ليست اهانة للمرأة وحقها بالحياة وانو كلمة زوجه تشمل الرجل والمرأة والخطأ هوي خطأ بترجمة النص المأخوذ عن الفرنسية .. وبحب ذكر هدول الاشخاص هون بالاخوية انو المرسوم اللي اجا اليوم بيوضح انو النص القديم كان بيشمل التخفيف عن الرجل فقط والمشرع الجديد أيضا شمل الرجل فقط واعطاه الحق بالقتل البهائمي على حد قول "بسام القاضي" .. |
الحقيقة انو ما عندي مشكلة أبدا بإعطاء عذر مخفف للرجل او للمرأة في حال الخيانة الزوجية ..
لكن برأيي يجب عدم تخصيص مادة للقتل بدافع الشرف او بسبب الخيانة ويجب الاكتفاء بالمواد الموجودة بالقانون السوري متل المادة 242 : يستفيد من العذرالمخفف فاعل الجريمة الذي أقدم عليها بثورة غضب شديد ناتج عن عمل غير محق وعلى جانب من الخطورة اتاه المجني عليه . واللي برأيي كافية وبتشمل القتل في جميع الحالات المذكورة بالمادة 548 والمرسوم المعدل لها |
اقتباس:
العمد يعني انو في فترة معقولة بين تكوين النية الجرمية بمخ القاتل وبين التنفيذ وهادا الشيء بيأكد على نية القاتل وتبييته وتخطيطه وتفكيره المستغرق بجريمته واللي بيأكد على خطورة القاتل كمجرم القصد بيعني انو الشخص لم يخطط للجريمة انما في لحظة طائشة قد تكون غضبا شديدا اخرجه عن طوره للحظات ارتكب جريمته وهاد الشي يجب ان يؤخذ بعين الاعتبار.. فالقاتل المخطط لا يتساوى مع القاتل الذي قد يكون فوجئ نفسه بالجريمة التي ارتكبها اما الحالة للي عم تحكيها انت وانو صار يضرب شروي غروي فهي ممكن تتصنف تحت القتل بالخطأ لأنو نيته الجرمية انتفت نهائيا.. يعني لا كان في قصد ولا كان في عمد |
اقتباس:
انا مختلف معك بتعريف القصد ، دايما ونحنا بنحكي بصفة عامة يطلع واحد يقول لاء انتو فهمتوني غلط انا مابقصد كذا ولكن بقصد كذا ، اعتقد والعلم عند الله ان القصد هو النية (بارتكاب الجريمة ) وبناءا عليه يصعب على البشر تحديد القصد تحديدا قاطعا وقاطعا للحكم على متهم . (النية لايعلمها الا الله ) انا بشوف ان القصد عبارة عن النية وهي غير قابلة للقياس بدقة . ومع ذلك انا ماعندي اي مانع من ان يكون تعريف القتل القصد هو وجود نية للقتل ولكن كما اعتقد بأن القتل بيتم بنفس الوقت او بوجود فارق زمني بسيط . اما عن القتل العمد ، اعتقد لا خلاف عليه انه يتطلب تخطيط واعداد مسبق وفترة زمنية كبيرة نسبيا (اللي انتي قلتي عنها معقولة )بين تكوين النية الاجرامية وبين تنفيذ الجريمة يعني رح يكون الفيصل الرئيسي بين القتل القصد والقتل العمد هو الفترة الزمنية بين النية على القتل وبين تنفيذ القتل . ومع ذلك القانون بحد ذاته خطوة متقدمة جدا جدا ورح يحد ويقل من القتل الظالم بحالات القتل عند الشك او الريبة ، كلنا سمعنا عن عائلات قتلت بناتها بدون وجود دليل واحد على حدوث علاقة جنسية بين البنت وبين اي شاب . ولكن القتل تم لمجرد شائعات ثارت حول البنت وبلش الجيران يتكلمو ، والعيلة بتقرر تخلص من العار وتنتقم لشرفها بناءا على ذلك . ثاني شيئ وهو ايضا مهم ، العالم مابتمشي ومعها مسدسات وبنادق وسيوف ، يعني اللي بدو يقتل رح يكون عامد ومع سبق الاصرار والترصد (مارح يكون قتل غير عمد ) في اغلب الحالات ، ومع ذلك رح يضل القتل الغير عمد قائم بس صورة اقل كتير كتير من المعدلات المرتفعة حاليا . |
خبر كويس كتير
ولو انو اقل من المطلوب الاساسي وهوي الغاء العقوية كلها كانها حالة خاصة ومعاملتها كاي جريمة قتل وسريان نفس احكام جرائم القتل عليها بمراعاة التخفيف او التشديد المنصوص عليهون ع جرائم القتل عامة بس بيضل انو احسن من مسخرة القانون السابق يبدو شوي شوي الحكي بمواضيع هيك حساسة عم يجيب نتيجة تحية لكل المساهمين انو يصدر اخيرا هيك قرار بشكل مباشر او غير مباشر ( ومنون اخوية طبعا:p ) |
اقتباس:
إسرائيل بتقتل كل يوم الصبح 100 فلسطيني وفجأة قررت تصير تقتل 80 فلسطيني بس هل عقلك وضميرك بيسمح بوصف هالشي بتغيير نحو الأفضل أو الأحسن؟؟ أساساً كيف بدنا نعتبر أي قانون بيتعامل بطريقة خاصة مع جريمة كاملة من الدرجة الأولى عم يتحسن أو عم يستاء؟؟ بتعرف شغلة حبيب أنا إذا بكرا بيطلع مرسوم بينزل الحد الأدنى للعقوبة لـ3 شهور مابتفرق معي أبداً ولا بعتبر هالشي إنو الوضع إستاء.. لأنو الوضع ككل قمة بالسوء فكم شهر بالزايد أو بالناقص مابيغيرو شي من حقيقة الموقف طالما المعادلة الأساسية قمة بالغلط اقتباس:
واذا شي حالة استثنائية ماحكم فيها القاضي وفق الحد الأدنى فبجلسة وحدة بمحكمة النقض بتنقض الحكم وبترجعو للحد الأدنى إجباري عن الدنيا... اقتباس:
بعدين خليني وضحلك نقطة كتير مهمة هون... السنة القضائية هي تسع شهور يعني بيطلعو السنتين سنة ونص فعلياً وبيستفيد القاتل من عفو أو من تلت المدة بتطلع راسمال جريمتو سنة معزز مكرم... هون في نقطة تانية كتير خطيرة إنو المرسوم كسابقه شامل للأصول والفروع بتعرف يعني انا مين فيني اقتل بدافع الدفاع عن الشرف؟؟ إمي وإختي وستي وعمتي وخالتي وبنت عمي"عمتي" وبنت خالي "خالتي" يعني كل شب بأي عيلة ومهما كان وضعو الأخلاقي بيسمحلو قانون "قلة" الشرف يقتلو خمسي ستين وحدة... وانتبهلي لفقرة " في صلات جنسية فحشاء " يعني كمان العينتين مو بس قايل زنا يعني اذا واحد أزعر مجرم حشاش قمرجي سكرجي عندو اخت وحيدة وأبوه عم يموت بيبعتلا واحد عالبيت بيدفش عليها الباب وبيفوت.. بيجي أخوها بيقوصها وبيترك الشب وبينحكم كم شهر كرمال الورتة... لسا فيك توصف أي شي بيخص هالقانون بالتحسن؟؟ اقتباس:
أما موضوع الجرم المشهود ففي كمالة الفقرة ويلي فاصل بيناتهون "أو" يعني يا الجرم المشهود يا صلات جنسية فحشاء... يعني فتح الإحتمالات للقاتل متل الوضع القديم وماعدل ولاحرف يعني بإختصار القصة إعلامية مو أكتر ولو كانت بغرض الإصلاح والحد من جرائم "قلة" الشرف يلي عم تكون أغلبها بأهداف تانية فكان الأولى يكتفى بفقرة وحدة بالمرسوم وهي إلغاء مادة السبب المخفف وعدم الإستعاضة عنها بأي شيئ. |
انشالله خير
يعني كأنوا الوضع بلش يصير أحسن شوي ....................... |
اقتباس:
الفرق بين القصد والعمد هو الفترة الزمنية اللي بتفصل بين النية والفعل بالعمد بتكون اطول بشكل ملحوظ منها بالقصد وبيكون الشخص بعيد عن الاستفزاز او الغضب المباشر.. وعلى كل حال بكتير مراجع قانونية بينذكر العمد على انه "القصد المبيت" :D |
شباب انا بقول نستنى لنشوف كيف رح يكون تطبيق هالمرسوم, لانو في مراسيم قبلو صدرت بقضايا تانية وما تنفذ منها شي ولا غيرت شي على الارض
مع انو رايي انو مكافحة طاهرة جرائم الشرف اعقد بكتير من مجرد تشديد العقوبة على القاتل طالما لسا الشعب بيعتبر مرتكب هالجريمة بطل دافع عن شرفو , ما رح يغير مية مرسوم الواقع |
هلاء مبارح اول ما سمعت انون وقفو قانون الاحوال الشخصية انبسطت وماساعتني الدنيا
بعدين اتخوزقت ولهلاء بيطلعوا التافهين بمجلس الوزراء بيقولوا انو مو هيك القانون وكلها اشاعات انو يعني بحياة اي شي بتعبدو لو هالقانون عبارة عن اشاعات ليس وقفوا ؟؟؟؟؟؟؟ منرجع لموضوع الاساسي كمان اليوم لقيتو خبر اكتر من رائع وشوي تانية كنت راح ارقص لو ما انبعصت من القانون وما قدرت لاقي فرق جذري بين القديم والجديد يعني القصة لعب ع الكلمات هلاء بكل بساطة هاد القانون بينطبق ع النساء ؟! يعني المرا اذا شافت جوزها او اخوها او احد فروعها عم يعمل سكس مع شي حدا وقتلتوا شو بتنحكم ؟؟؟؟ بعدين في شي كتير مهم انو اللي عم يشوف الوضع تحسن ما بفهم نظريتوا انا بشوف الوضع اسواء لانو عم يضحكو علينا و يسكتونا بكام كلمة تافهة متلون |
الف مبروك . بتمنى تشديدو أكتر بالمستقبل . وبتمنى تشديد عقوبات الدعارة . وبتمنى نشر الوعي لمحاربة جرائم الشرف |
للأسف . هي جريمة من جرائم الشرف صارت اليوم
شخص يقتل آخر ثم يقدم على الانتحار في قرية المتراس صافيتا في طرطوس الحوادث قام شخص (خ) بقتل شخص اخر (س) بإطلاق النار عليه, ثم أقدم على الانتحار مساء الثلاثاء في قرية المتراس صافيتا في طرطوس, على خلفية وجود الاخير في بيت مطلقة القاتل. ord=Math.random()*10000000000000000;document.write ('');  - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - وقال مصدر مطلع لم يرغب في الكشف عن اسمه لسيريانيوز إن (خ) أقدم على قتل الشخص الاخر بإطلاق النار عليه, بعد حصول مشادة كلامية بينهما, على خلفية وجودالاخير في بيت مطلقته", قبل ان يقوم بالاطلاق النار على نفسه". ولفت المصدر إلى أن "الجهات المعنية مازالت تحقق بالحادث", مشيرا إلى أن "الجثتين مازالتا موجودتين في مشفى الباسل بطرطوس". |
اي هي مو جريمة شرف
لانو ببيت مطلقته فالمخلوقة فهوي ما خصو بالمخلوقة |
اقتباس:
|
شو دخلو يكون عندها
مو انت قلت مطلقتوا ف شو دخلو فيها :? ولا كمان الو سلطة عليها بعد الطلاق |
اقتباس:
سلطة مالو . بس شو العلاقة بيناتهم وليش تطلقو مامنعرف . أنا ماعم دافع عنو . بس كمان ما أجا قوص الزلمة لأنو مثلا صافف سيارتو بمكان سيارة مطلقها . ولا راح قوص بنت الجيران لأنو صاحبها عندها . هية كانت مرتو وفي قصص بيناتهم . والجريمة ما أجت من فراغ |
اقتباس:
عفوا بس الكلام مانو منطقي هلق لو هوي طلقها لانو شافها معو لصاحبها فهاد الكلام مو ظابط لانو اذا دمو حامي كان قتلها بلحظتها مو بعد ما طلقها وصارت حرة وما بيحقلوا يتدخل فيها ولو هالزلمة صاحبها هوي مالو علاقة هي طليقوا يعني مرتوا السابقة فهو مجرم وبيستحق المؤبد |
الحل المنطقي الوحيد بهيك حالات اذا ماكان القتل فهوه الطلاق
بس الحلو بالموضوع ان الي بيطلق مرتو او الزوجة الي بتطلب الطلاق لان زوجتو او زوجها كان عم يخونها مع حدا ,هنن الخاسرين الوحيدين بالعملية لان بكل بساطة الي بيطلق مرتو راح يرجع يدفعلها كل مستحاقتها هاد غير النفقة عنها وعن صاحبها والي بتطلب الطلاق بتخسر كل مستحقاتها لي راح تتحول لصاحبتو لزوجها المحترم مابعرف اذا انذكر بهالقانون اي شي عن هالي انغدرو ...لان كتير حلو ضمن هالفورة الحقوقية نفكر شوي ان هالي عم يقتل او هالي عم تقتل شريكها شريكو لان عم يخونها يخونو ماعم يعملو هالشي تسلاية بل عم يعملو هالشي لان في شي جواتن انقتل بالمقابل ...لساتي متحفض عتغير القانون لان كنت بتامل ان يساوي مساوات بالعذر المخفف للطرفين من جهه وبيحددو الاطراف الي الها الحق بهالعذر بالنسب القريب (اخ اخت اب ام) مع بقاء العذر المخفف 6 اشهر |
اقتباس:
يعني برايك لازم يضل القانون ولازم عملية القتل تصير انا ضدها باي حال من الاحوال :D |
اقتباس:
ان هلق المطلوب ان تفوت عالبيت تشوف زوجتك نايمة مع رفيقك وتكفي بكل روح رياضية عالمطبخ تعمل فنجان قهوه ليخلصو منشان ما تنزع مراقهن؟ ماعم افهم ان صارنا بمرحلة الدفاع عن الخيانة الزوجية مثلا؟ انا عم اسال عن روح القانون ...ان هالي عم ينغدر او الي عم تنغدر مافي اي اهمية للاثر النفسي الي عم يصيبن يا اخي والله شي بيقهر وحاسس ان ماحدا عاطي اي اهمية ان كل هالجيوش المجيشة ليدافعو عن عاهر او عاهرة عم يمارس تمارس الدعارة وتخون كل المواثيق الزوجية الي يفترض تكون الها قدسيتها ان قتل الروح بنظري مابتقل عن قتل جسد هاد غير المشكلة القانونية الي بتجي بعدها الي ناجمة عن الطلاق لان بهالحالة راح تصير تصرف عزوجتك السابقة وعشيقها او تخسر المراءة وولادها وحقوقها المشروع في حالة ان طلبت الطلاق |
اقتباس:
جرائم الشرف يلي عم تحكي عنها .. قليل لتصير جرائم الشرف يلي عم تصير بسوريا عم تصير بناءً على : - زواج قريبة القاتل بشخص من غير دين او مذهب -زواج قريبة القاتل بالسر - الاشتباه بحمل قريبة القاتل (يعني ممكن تكون متزوجة او زنا ) بس بتنقتل -جريمة شرف لرفع العار عن المُغتصبة -------------- ع جنب: طلع مسلسل من شي كم سنة ... تأليف ما بعرف مين ... بس من افكر الخالد (محمد الماغوط) وكانت من بيناتهن حلقة انو عائلة بتقتل بنتها بس لأنو حدا باسها بالعتمة وهيي فكرتو جوزها وجزها هوي يلي فضحها.... بس آخر شي بتنقتل من قبل اخوها يلي على اساس جاية من اوروبا ومتحرر .... الله يرحمك يا ماغوط :pos: |
اقتباس:
عقابها انو ما تبقى معو ويتركها والرجال اللي بيخون مرتوا نفس الشي هلق بيقولولك انو الرجال لو ما مرتوا مقصرة بحقو ما بيطلع لبرا بس ما بيقولوا انو المرا لو ما مقصر بحقها زوجها ما بتطلع لبرا في مفارقات عجيبة |
اقتباس:
بالقانو ن العربي السوري كل الحاللات الاربعة مصير الجاني ان ينعدم ومابيستفاد من الشرط المخفف لان هاد اسمو قتل عمد ومو بفورة غضب بنفس الوقت مافيك تقول ان مافي خيانات زوجية بمجتمعنا اصلا جل هالقانون بينطوي تحت هالقصة فع اي اساس حكيك ؟ |
اقتباس:
ان شو معنات بتتركو ؟ان يطلقها بتطلع هيه الخسرانة كل حقوقها ومعن ولادها شو معنات يتركها؟ان يطلقها يعني بدو يدفعلها مواخر ونفقة مدي العمر هالقصة صارت مع شوفير الشركة الي عم اشتغل فيها مرتو خانتو مع رفيقو ولقطهن قام طلقها ,الحلو ان اكل الكم صارلو 18 سنة عم يدفعلها نفقة |
اقتباس:
فانو منين عم تقللي مصير الجاني هوي الاعدام ... لهلأ ما شفت هيك شي الصراحة ! :? |
اقتباس:
|
اقتباس:
بس ان بيعطي الحق لان تنقام الدنية وتقعد منشان كم سافل او سافلة كانو هاي القضية القومية الاولي بتاريخ هالوطن يارفيقي عالقليلة اذا مابدك توجد عذر مخفف اسقط كل حقوقو الزوجية ...بس ان فوق الموت عصة قبر اي شو هالمنطق؟ |
خيو لنفترض كمشت مرتك مع حدا ، ما عمقلك مافي عقوبات كـ زوج وزوجتو، وما حابب اطرح المثال كاخت او ام ... مشان المشاعر كـ حد أدنى ...
بس هاد ما بيعني انو القتل هوي الحل المثالي ، او الحل الوحيد، او الحل الأقل عقلانية بينهن ... ما بعرف شو ممكن يكون في حل ، وما عماقدر افترض اني كمشت مرتي مثلاً عمتخوني مع حدا بفرشتي انو شو ممكن اعمل بس بعرف تماماً انو مو الحل هوي بالقتل او بالضرب.. انا ملاك بريء يا زلمي :angel: |
اقتباس:
بتتفضل علي انت صديقي او اي حدا تاني بحكم محكمة واحد موقع من قاضي سوري بيعطي فيه حكم مخفف لاخ لان قتل اختو المغتصبة ؟ |
اقتباس:
بس كمان للازم نذكر انو لكل حالة وضع خاص فيها و ما بتتشابه مع اي حالة تانية ان كان بجرائم الشرف او اي جريمة تانية و ما ممكن نص قانون يحيط بكل هالحالات |
اقتباس:
:D |
| الساعة بإيدك هلق يا سيدي 17:42 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون
