|
أوباما يمدّد العقوبات على سوريا
واشنطن ــ محمد سعيد
لم تنعكس أجواء الانفتاح الأميركي على سوريا إلغاءً للعقوبات المفروضة عليها؛ فقد أصدر الرئيس باراك أوباما، أمس، مرسوماً رئاسياً يتضمن تجديد العقوبات على سوريا لستة أشهر، علماً بأن هذه العقوبات فُرضَت في عام 2005 في عهد الرئيس السابق جورج بوش. وقال المتحدث باسم وزارة الخارجية الأميركية، روبرت وود إنّ «هذه ليست عقوبات جديدة، ونحن لا نزال قلقين من أنشطة سوريا في العالم»، مشيراً إلى أنّ هذه الخطوة «تبعث رسالة إلى سوريا مفادها أن لدينا قلقاً جاداً من أنشطتهم وتصرفاتهم» في العراق ومن دعم المنظمات الفلسطينية وحزب الله. وتابع وود: «ليس سراً أن لدينا مشاكل جدية مع الحكومة السورية، ونأمل بحلها، لكن ذلك يعود إلى حد كبير للحكومة السورية». ورداً على سؤال عن الزيارة الأخيرة للقائم بأعمال مساعد وزيرة الخارجية الأميركية للشرق الأوسط، ومسؤول ملف الشرق الأوسط في مجلس الأمن القومي الأميركي، دانيال شابيرو إلى دمشق، كشف وود أن هذه الزيارة تهدف إلى دفع سوريا إلى القيام بمزيد من الخطوات، وخصوصاً أن «هناك الكثير مما ينبغي لسوريا القيام به». من جريدة الاخبار |
اي كلها حجج واهية اللي بدو يتعاون وينفتح و يغير سيايتو بيورجي حسن نية بالاول مو العكس
|
انو دايماً بقولوا عقوبات على سوريا ومدري كيف ...:?
بس ازا في حدا يشرحلي شو هيي هالعقوبات بالتفصيل .. ازا ممكن ؟ وشكراً سونا :D |
اي ل اجر الكر
:jakoush: لنشوف شو اخرتها هالعقوبات |
اقتباس:
متل قلتها .. |
من عشر سنيين كانوا يقولوا انو ما رح يجي رئيس اسود لأمريكا غير اذا طارت الخنازير
وهي بعد اقل من مية يوم على استلام اوباما ...ظهرت انفلونزا الخنازير ..... و على فكرى ..لازم الفت رعايتكم لأمر مهم ... انو تجديد العقوبات على النظام السوري كان بسياق محاربة انفلونزا الخنازير ..... انا مع العقوبات قلبا و قالبا .. مع اني متأكد انو الشعب رح يبقى مع النظام حتى ولو مات من الجوع ( هي اذا ما كان عم يموت مسبقا ) .غريب السوري ,,كيف ما تضربو بيجي واقف. ..ورا قيادتو الحكيمة انو الواحد فيون ما بتسمع بأرصدتو غير لما بتجمدها امريكا !! . ....... اخيرا ...حبب قول انو بلدنا ما بيصير متل الخلق غير حتى الأسود يلي طارت ....ترجع تمشي على الأرض .... |
اقتباس:
عملت بحث وطلع انو تمديد العقوبات لمدة سنة واحدة.. وجب التوضيح:D:D |
اقتباس:
فالمترجم السوري كان عم يترجم بالعكس عينك عينك !! و لأ.. ما كانو عم يخفوا الصوت الأصلي ,,هههه ,,يعني بكل وقاحة ... و بنهاية الجلسة اهر التلفزيون السوري انو القرار كان انتصار للمواقف السورية بينداف للأنتصارات يلي عا شاكلتها ,,,,!! مع انو كان العكس عم يجري .... فيني سمي هيك شي استجحاش !! هلئ يمكن جريدة الأخبار ما لقت طريقة لتحريف الخبر ..راحو حرفوا المدة ... بس ولله بستطيني انو سنة ..كنت عم قول انو ست شهور مو حرزانة |
اقتباس:
|
اقتباس:
العقوبات هي معظمها ضد النظام ...يعني حسابات بنوك ,,قيود على حركة الديبلوماسيين ..و هيك شي ... ما بشوف فيها مشكلة |
اقتباس:
اقتباس:
وخليني اجي معك بأن العقوبات على الحكومة من جيب مين بدها تندفع ؟ انبسط معلم انبسط خليك مبسوط .. يمكن انت بتحب تأظهر حالك على مبدأ ( خالف تعرف ) وما حدا فارض عليك شي ... بس على الاقل احترم جنسية الدولة اللي انت حاملها وان كنت جدا متحامل عليها فقدم طلب باسقاطها عنك .. علقليلي وقت بتجيني السبة ما بتدايق لأنها جاية من شخص حامل جنسية متل جنسيتي .. |
اقتباس:
طيب ..واذا عند مشكلة مع افكاري ....انتقد افكاري ..بلا تحويل الموضوع لنقاش شخصي ..و غير جنسيتك و ما بعرف شو ! حبيب انا ما وجهت اهانة لا الك ولا لغيرك ...بس المشكلة انو الواحد بس يحكي على النظام بسوريا ...الناس كلها بتقوم كأني عم احكي على ناس من العيلة !! انا قلت انو العقوبات ضرورية ضد النظام ....طيب اذا الداخل مو قادر تحكي ...و يلي برا مو قادر لأنو كمان رح يرجع !! ...طيب شو الحل !!//الحل انو الدول الاوربيةو امريكا تضغط شوي عيوني ////مرة تانية ,,,العقوبات هي ضد النظام ,,يعني انا و انتي شو جايينا منها !! يا رجل ..بتشوفوها فرصة يعني انكن تنتشو بتصغيري و ظهار انو انتو الوطنيين !! ا |
اقتباس:
وقت بتم فرضت عقوبات على بلدي وحضرتك بتتفضل لتسمعنا رأيك بانك ( انبسطت ) بان المدة الحقيقية ضعف المدة المذكورة بالخبر شو بتتوقع مني حس ؟ فرحة عاملة بتغمرني مثلا ؟ اقتباس:
اقتباس:
المعارضة انك تعارض نظام الحكم .. تعارض على القرارات .. تعارض على منهجية الحكم السياسية بس انك تعارض ( الشعب ) وتنبسط بإنزال العقابات فيه فطز بهيك معارضة وبهيك حس وطني ... لمعلوماتك انا ما كنت بحياتي معني بالدفاع عن النظام . اقتباس:
فين شفت ان العقوبات بدها اتطال النظام بشكل فردي ؟ المقاطعات على مستوى الدول بدها تصير بس بين النظام في الدولة الفلانية والنظام عنا ولا على كافة المستويات ؟ شغلة تانية .. انت شايف الدول الاوروبية عم تفرض العقوبات على النظام لأن حابة تعمل خير مع الشعب السوري وتساعده بمحنته مثلا ؟! ما بتعرف انا وانت شو جايينا منا ؟!!؟!؟!؟!!؟!؟ وبخصوص تصغيرك ... الانسان الما عنده حس وطني والحقود على وطنه .. مو بحاجة لتصغير ابدا ... وفهمك كفاية |
اوفف لا تتخانقو..
يمكن انتو التنين نفس الرأي بالأخير بس بيجوز صديقنا الفيل مو عرفان أديش هي العقوبات رح تأثر علينا كشعب.. يعني ابو طوني في كتير ناس مو حاسين بالعقوبات ..لانو العقوبات اكتر شي عم تأثر على حركة المال بالبنوك وبالبورصات الخارجية وصعوبة التعامل مع البنوك بالخارج.. وربما استحالتها أحيانا.. ولأنو نحنا بالاصل "بقصد الشعب السوري" أصلا عايش بدون حركة مال وبدون مال من أصلو فمالنا حاسين بالمشكلة..وعلى مبدأ اكتر من القرد الله ما مسخ.. ما رح يصير أسوأ من هيك سواء بعقوبات اقتصادية ولا لأ.. |
اقتباس:
بيبقى مشهد تشويه ( الجثة ) مؤلم لدرجة كبيرة |
اقتباس:
استجابتي لردك هاد متل استجابة الأنسان العادي للمنظر المقزز عنجد يعني درس في الرياء مشان انو طز بحسي الوطني و انو الأنسان الصغير بيعرف حالو و بقية الأهانات يلي وجهتها ..ما رح رد عليك بنفس الطريقة بس بدي قلك ,,شو عمللنا حسك الوطني انتي و امثالك ,,,غير انو انباع الوطن و بلأحرى انبلع الوطن !! هلئ يمكن ما تكون انتي يلي بلعتو ...للوطن ..بس بظن انك عم تدافع عن يلي بلع مشان انو انا عار على المعارضة ...رأيك هدا,, ولما بكون رأيك ضمن هيك حدود ما ألي غير احترمو... أخر شي ...انا سوري ابن سوري ابن سوري و ما بقبل حدا يوجه هيك اهانة مرة تانية ....... |
اقتباس:
بس يا أبو طوني اذا الناس عنا ما بتعرف معنى حرية التعبير.. وما بتعرف معنى الديمقراطية ..وبيتم تتفيه القيم الانسانية على الملأ .. بالمختصر نحنا مدجنين متل الدجاج بالزبط.. الناس بدها تاكل تشرب وتتجوز وتموت هي حياتنا.. والحمد الله هدول موجودين.. عم تقلي عقوبات وما عقوبات نزيل على الشارع بتلاقي اكتر من 80 بالمية مو دريان فيها واذا دريان ما بيعرف على شو بتأثر |
اقتباس:
|
اقتباس:
حتى المثقفين والمطلعين ممكن يعددولك عدد النواب اللبنانية مثلا واحد واحد .. بينما ما عندن ايا فكرة على اسم نائب سوري واحد على القليلي .. اعلامنا بهوي وهي شغلة صارت بديهية بالنسبة النا وواقع مطلوب مننا نتعايش معه بس حتى المو عرفان شو الصاير بالبلد عم يحس بأن كلشي عم يغلى .. البضاعة المستوردة عم يرتفع حقا وعم يرتفع معها سعر البضاعة المحلية .. يمكن ما بيملك الانسان غير المطلع اجابة للشي اللي عم يصير .. بس أكيد عم يحس بأن في شي عم يصير .. :D |
اقتباس:
بخصوص درس الرياء .. انا ما عم اعطي دروس بالوطنية وماني متوقع بكلمتين مني يتولد ردة فعل وطنية تزلزل الأراضي .. الحس الوطني مانه صفة مكتسبة او حرفة منتعلمها بالكبر ... وما بتم توليدها بكلمتين او بجملتين او بردين فلا تتوقع اني كنت عم بيض عليك او اني كنت عم علمك شي .. اقتباس:
مين عم يدافع عن الحكومة ومين عم يدافع عن السطلة ومين عم يدافع عن اذا ما هللت للعقوبات المفروضة على بلدي بصير اسمي عميل للحكومة ؟!؟! والنعم والله ... اقتباس:
اذا كنت متدايق لأن العالم ما عم تحترمك .. معناها صار لازم تفكر تبدا تحترم العالم |
اقتباس:
حكوا قبلك كتير و فالج لا تعالج ... السيد فيل و قلعة حالف تكون كل مشاركاتو بأي موضوع بينزل بأخوية إن كان أخبار أو مقالات أو نقاشات بالصالون على طريقة شعبان عبد الرحيم : سبعمية غنية و النغمة دايماً هي زاتا .. و إذا بتسترجي تنتقد بتكون أجدب و مضحوك عليك و عم تبيّض صورة النظام و تدافع عنو و أنت و أمثالك اللي بهدلتوا البلد .. و هو بعدي اسمو الأبضاي الفهمان اللي كاشف اللعبة و عرفان كل مين على حقيقتو .. بقى لا تنقهر و صحتك بالدنيا و هي وردة الك :D |
اخي Ùˆ Øبيبي ابو طوبي ,,,هي بلدي متل مانا بلدك ..بتمنى انك تÙهم الشي هادا ...Ùكلامك انو ما تØكي على بلدي بوجودي ...يعني ما بعر٠شو بدي قول ..بس انو ما ألو معنى .
الكل قلبو على البلد ....الكل وطني ..الكل بيكره الخارج Ùˆ الاستعانة بالخارج ...Ùˆ عقوبات الخارج ..الكل بدو بلدو يكون اØسن شي بالعالم ,,, بس ليش الوضع من سيئ لأسؤا !! لأنو بصراØØ© ما عنا طلاب اندعست تØت الدبابات مشان بلدها ياخود الØرية ....هون عم انتقض الكل ,,مني Ùˆ جر ... بتمنى من مين قاعد بÙسط برج ايÙÙ„ يجاوبني عن هل سؤال |
*هامش:
اقتباس:
- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - |
اقتباس:
المهم صديقي افهمني برواق: أنا وياك منعرف انو ايليفانت أند كاستل أحياناً إلو أراء راديكالية وفيها نوع من التطرف بس رأيو هون أبداً انت ماحاولت تفهمو بالطريقة يلي هو قاصدو فيها لقلك ليش: الشب ماقال انو مع عقوبات تنفرض على الشعب السوري بهدف تغيير النظام ولاقال انو مع الأميركان يحاصرو سوريا اقتصادياً.. كل شي قالو انو العقوبات هي عم تنفرض على مسؤولين النظام وعلى أرصدتون بالخارج وعلى بعض المندوبيين الأمنيين بالخارج وتنقلاتون وماشاكل.. انت فهمت هالموضوع انو مساس بالسيادة الوطنية وفرض حصار لتجوييع الشعب السوري وقطع السمنة والرز والمحارم "متل التمانينات" عن سوريا وحتى وصلت معك الأفكار انو حملت الحصار"تجاوزاً" الأمريكي مسؤولية ارتفاع الأسعار بالبلد "عن جد هي صدمتني"... شوف معلم هالحصار صرلو فارضتو أميركا نظرياً من التسعينات وتشددت فيه من الـ 2005 وطلع قرار الحجز على أرصدة المسؤولين الأمنيين وكم واحد من بيت مخلوف بأميركا وبعض أوروبا.. هالشي كيف ممكن يأثر عليك وعليي مابعرف مع العلم اني ضد أي تدخل أميركي ببلدي... بس على اعتبار هالنظام بيخانق وبيصالح على كيفو وبيسكت للأميركان على كيفو وبيستقبلون "أول مبارح" على كيفو معناها يصطفلو بقلب بعض طالما الشعب لاكسبان شي ولا خسران شي... بحيثيات قرار العقوبات: كيف الحجز على أموال رامي مخلوف "يلي على قولتون مو موجودة" بأميركا حيأثر عليك؟؟ كيف منع تأشيرات الدخول لأميركا عن كم ضابط مخابرات ممكن يأثر عليك؟؟؟ كيف منع الحوالات المالية من أميركا لعشر أسماء من سوريا وكلون ضباط مخابرات أو من الشباب ممكن يأثر عليك؟؟ يعني هالعقوبات الهزلية صدقني مانها مأثرة شي غير شوية ضغط على هالنظام وعلى فكرة هالشي وفق تصريحات كل مسؤولينا الفهمانين انو هالعقوبات مالها أي أثر على سوريا بلدك وبلدي فغريب انك تكون ملكي أكتر من الملك... نقطة أخيرة غابي ارتفاع الأسعار والرواتب الحكومية التافهة والبطالة والمحسوبية وكل الفساد بالبلد سببو حكومتنا العتيدة مو العقوبات الأمريكية حتى اذا قريت هيك بجريدة البعث شي يوم :lol: وأحلى خمسمية محروقة لغابي وأيليفانت أند كاستل يلي بتدابح أنا وياه بالعادة :D |
اقتباس:
ناقل الكفر ليس بكافر:lol: بس للصراحة انا ما قريت الخبر الا بهالجريدة لانو غالبا بتابعها فاذا في خطا ... ما فيي قول غير انو محتمل جدا:D ويلي مبسوط بهيك اخبار .. ريتو الله يقلل من انبساطك شوي ( وينك يا الله ؟؟؟) بس من شان ننبسط نحنا ... لا وطنية ولا يحزنون |
Excuse me Guys .It s me or It seems like My last comment is shown in language that I am not familiar with ..Sorry For that Cuz I am Using Arabic Keyboard Site to type Arabic Texts
anyways I was saying that me And Abu Toni may have the same Ideas ..but the different manners of expressions caused that misunderstanding Thank you Viva Syria for You are always thoughtful Cheers mates |
اقتباس:
الخير حسب ما انذكر انو عقوبات ع سورية مو ع شخصيات سورية .. لانو في الاتنين وهني لو قصدون الشخصيات كانو ذكرو هالشي لانو معروف انو سورية ع القائمة السوداء ويعني في صادرات معينة ممنوع سورية تستوردها ( يعني مرة اشتريت كتاب برمجة كان مكتوب ع اخر صفحة الو انو سورية من الدول يلي ممنوع يتصدر الها الكتاب اضافة لدول اخرى طبعا ) طبعا اضافة للاسلحة والسفر المابشر ... وبتوقع القرار جاية على هيدا القصد .. لانو هيدي العقوبات اقدم من العقوبات يلي انفرضت ع الاشخاص ولما بسمع انا بهيك قرار .. وبشوف انو عمليا بينا وبين مصر ما في هالخلاف بالسياسة الداخلية ليقولو عن سوء الوضع في سورية ..اكيد هيدا بيشعرني بالاسف جدا ... وانان مع ابو طوني باستياؤو :D |
العقوبات الها تأثير على الشعب السوري, و تأثير كبير جداً, أوله انو كوم معامل (من هالكم معمل اللي عنا) ما عم تقدر تستورد قطع غيار لمكنات عم تتلف بسبب الحصار, و مافيك تستورد كوم شغلات, و في كتير تعاملات مصرفية بين الداخل و الخارج تعقّدت بسبب الحصار و بسبب اعتبار المصرف التجاري السوري ذو صفة ارهابية عند الأميركان (رح تقلي أي في مصارف خاصة.. و بقلك أوكي مزبوط, و لكن هالمصارف الخاصة بكتير خطوات لازم تتعامل مع المصرف التجاري السوري) ..
عدا عن انو السورية للطيران (حالياً الشركة العامة الوحيدة ذات امكانية ربح) ضل عندها 5 طائرات فقط..لأنو مافيها تشتري لا بوينغ و لا ايرباص, و الناس ما بتوثق بالروسي.. سياسياً فرض العقوبات و السياسة القاسية تجاه سوريا (و ليس فقط ضد الحكم) قوّى القيادة السورية و أعطاها مبررات للجمود بحجة التهديد الخارجي, و اعطاها حجة تخوين و بالتالي إلغاء كل أنواع المعارضة بحجة تبعيتها لأميركا, بمعنى آخر, بسبب غباء إعلامي أو قصور معارض و بسبب حملة إعلامية منظّمة من قبل السلطة و ملحقاتها طلع كل مين يحكي كلمة خاين.. و عم احكي بالمفهوم الشعبي مش بس أجهزة أمنية و مخابرات أميركا بتعرف هالشي (المكتوب بالأحمر) منيح جداً... وكل واحد يستقي من هالكلام النتائج اللي بدو ياها |
كلام ياس صحيح جدا
لا غبار عليه بالمرة :D |
اقتباس:
|
اقتباس:
أني وي... بعتقد انو كل مين بيعتمد على دعم خارجي إن كان مباشر أو غير مباشر, من أي جهة كانت, بيكون غلطان... كتير تدخلات خارجية بدول معينة نجحت بتقويض ديمقراطيات و إقامة دكتاتوريات, أو تقويض دكتاتوريات و إقامة ديكتاتوريات أخرى, لكن مافي تجربة تاريخية عن نجاح تدخل خارجي بإقامة ديمقراطية.. أبداً أدونيس قال ما معناه: "إن كنا عاجزين على أن نكون ديمقراطيين بأنفسنا, فلا يمكن لأحد أن يحولنا إلى ديمقراطيين" و هالكلام صحيح... أميركا بتعرف منيح انو كل التوجه الشعبي بالعالم كلو (و العربي خصوصاً) هو حب من يقف بوجه أميركا و كره من يقف معه.. و لذلك أنا بشوف انو لما تدعم قضية بالعالم العربي عم تدعمها لتعملها قضية مستحيلة لأنو بمجرد حكى مسؤول أميركي عنها راحت القضية و صحابها حتى لو هنن رفضو هالكلام, و لذلك كل شي تحكيه أميركا أنا بحس انها تريد عكسو بغض النظر عن انها فاقدة أي شرعية عند الحديث عن الحريات و الديمقراطيات كونها عرّابة 90% من ديكتاتوريات العالم, و هاد حكي تاني يطول.. |
اقتباس:
يعني اثتاء دراستنا للمادي الهزليةالمعروفي باسم "التربية القومية الاشتراكية" عرفنا انو بيتم ترحيص احزاب ضمن الجبهة بحيث لا تتعارض مع اهداف حزب البعث العربي الاشتراكي:shock:.. انو كيف معارضك ومعك للدم:?.. اقتباس:
Start>Control Panel>Regional and Language Options بعدين  من Languges في عندك Install Files For Complex Script And right-to-left languges بتحط حدها الصح..بيطلب منك السي دي وبحمل ملفات بعدها من نفس هاي النافذي بتروح عـ Details وبتضيف اللغة العربية للكيبورد..وبيصير فيك تكتب عربي.. :D |
اقتباس:
جاسس القصة متل واحد خلق تراجيديا وصدقها... قلي أخي سألتك عشر أسئلة بردي عليك عن شو نقصت العقوبات الأمريكية عليك... شو نوع كمبيوترك؟؟ أديش حق نسخة الويندوز عندك؟؟ عم تلاقي معكرونة ورز ومحارم وسكر ولا لاء؟؟ في شي معامل بحلب واقفة لأنو بدها قطع غيار؟؟ عم تلاقي طيارة تسافر وقت بدك ولا لاء؟؟ لك اذا معامل سيارات عنا ... بقا حاج يكذبو "الأميركان والنظام ويقولو العقوبات على سوريا" لعلمك غابي أنا ضد أي تصرف بتاخدو الادارة الامريكية مو بس العقوبات لانو تجربتنا معون مريرة وبعرف انو همون الوحيد هو مصلحة أميركا واسرائيل... وكل شي عم حاول فهمك ياه انو مافي شي على الشعب ويصطفلو بقلب بعض خليون يتسلو... |
اقتباس:
اقتباس:
وين هدول المعامل؟؟ انت بتعرف اسم شي معمل بسوريا واقف لأنو بدو قطع غيار من أميركا وماعم يقدر يجيب؟؟ اذا خطوط انتاج كاملة "مو بس قطع" إجت لمعمل البتركيمايويات تبع زاهر دعبول مباشرةً من أميركا... اذا معاملنا عم تبيع قطع غيار مستعملة للبنان ومصر من وفرة قطع الغيار فأنو معامل هي واقفة؟؟ اقتباس:
حطنا بصورة كم شغلة من يلي ممنوع استيرادون والشعب السوري حاسس بنقص بسبب غيابون عن الأسواق!!!... طيب اكتر من هيك عطيني أي شي أميركا مانعا تصديرو لسوريا ومانو موجود بالسوق وشرطك نظامي ومو تهريب وأرخص من دول الجوار من الكمبيوتر ومستلزماته وجر.. اقتباس:
غريب هالحكي وهل فرض أميركا لضوابط مشددة على عمليات التحويل الخارجية ذات القيم العالية من المصرف التجاري أثرت على الشعب أو على التجار بقشرة بصلة؟؟؟ طيب معناها عطيني أي منتج بسوريا ارتفع سعرو نتيجة هالإجراءات الهزلية؟؟ ولعلمك هالإجراءات هي نفسها يلي فرضتها الادارة الامريكية على كل لنوك الدنيا من قصة مراجعة الفيدرالي الامريكي لقصة فحص الارهاب... يعني القصة اعلامية مة اكتر اقتباس:
هون إجينا للفكرة يلي بتوضح انو كل ماسبق ذكروا من عقوبات مالو أي تأثير وهو عبارة عن مسرحية... شو دخل العقوبات الأمريكية بالصفقات المجرمة يلي عملتها حكوماتنا المتوالية بشراء الطائرات وقطع الغيار؟؟ شو دخل أميركا بالخطط القذرة لافشال السورية للطيران مشان تحويل الخطوط كلها لشركة رامي مخلوف "اللؤلؤة"... شو دخل العقوبات الأمريكية بسوء الإدارة والطريقة السيئة بالتعامل ويلي خلت الناس تهرب من السورية للطيران؟؟ بعدين انت مصدق انو نحنا كنا بدنا قطع غيار للطائرات وماقدرنا نجيب؟؟ هي نفسها الحكومة تبع تهريب البترول العراقي ضمن برنامج النفط مقابل الغذاء ونفسها تبع تهريب الصواريخ لحزب الله بتقلي ماقدرت تهرب قطع غيار طائرات؟؟؟ مابدي تهريب حورجيك كيف بعد مخططاتون القذرة لتدمير السورية مانجحت كيف مشي الحال ومو بس جابو القطع واجو الاميركان براسون يصلحو الطيارات ويبعونا طيارات جديدة وهاد شو قال عقوبات قال: من أرشيف البعث: أعلن السيد يعرب بدر وزير النقل " انه تسلم الخميس رسالة خطية من وزارة التجارة الامريكية مفادها ان الوزارة اعطت موافقتها لشركة بوينغ على تعمير طائرتي 747 اللتين خرجتا من الخدمة منذ عام 2008" والتابعتين لمؤسة الطيران السورية. واضاف انه " تم الطلب الى الجهات المالية والفنية بالمؤسسة لدراسة جدوى عملية التعمير واتخاذ الاجراءات اللازمة في هذا الشأن". ومن أرشيف سوريا نيوز: علمت سيريانيوز أن مؤسسة الطيران السورية تدرس احتمال شراء طائرات بوينغ أمريكية جديدة إضافة إلى طائرات الإيرباص المزمع شراؤها بموجب مذكرة التفاهم الموقعة مع الشركة. وقال مصدر في مؤسسة الطيران لـسيريانيوز إن "هناك محاولة لشراء طائرات بوينغ الأمريكية في أعقاب الاتفاق مع الشركة على تزويد سورية بقطع غيار". وكانت الولايات المتحدة وافقت على تزويد سورية بقطع غيار خاصة بطائرتي بوينغ 747 خرجتا من الخدمة بسبب عدم التمكن من التعمير المطلوب في حينه جراء الحظر الأمريكي, ما اعتبر تطورا لافتا على صعيد العلاقات بين الجانبين وتهاونا من واشنطن في تطبيق قانون "محاسبة سورية". وأضاف المصدر الذي فضل عدم الكشف عن اسمه أن "مؤسسة الطيران بدأت دراساتها لمعرفة الآلية التي سيتم بموجبها تعمير الطائرات التي تحتاج كل واحدة منها 4 أشهر". اقتباس:
لاء رجاءً حاج تقول عقوبات تجاه سوريا...أنو عقوبات ضد سوريا هي النص الحرفي لقرار فرض العقوبات: وكان الرئيس الامريكي باراك أوباما قد وقع على وثيقتين في السابع من مايو/أيار ونشرهما البيت الأبيض الجمعة وقال: "إنني أمدد لسنة الحالة الوطنية الطارئة التي أعلنت في ما يتعلق ببعض أعمال الحكومة السورية". وأضاف أن الإجراءات "للتعامل مع هذه الحالة الطارئة يجب أن تستمر إلى ما بعد 11 مايو/أيار". وتضم الوثيقة الثانية تجديداً لفرض إجراءات بحص حوالي العشرين مسؤولاً حكومياً سوريا تتهمهم الولايات المتحدة الأمريكية بالفساد.. اقتباس:
يعني كتير فارقة ماهي التهمة بليرة من الخيانة لمحاربة النظام الاشتراكي للمس بهيبة الدولة.. وكل هالتهم عم تتوجه لمعارضين شرفاء... ولعلمك لم تشد المحاكم السورية بكل أنواعها قضية بخق أي شخص بتهمة التعامل مع أميركا.. فهي كمان مازبطت معي.. ملخص: أنا ضد أي تدخل خارجي بسوريا وضد تصرفات الادارة الامريكية مهما حبو بعض هنن والنظام ومهما كرهوا بعض... وفكرتي تكمن انو هالعقوبات مالها أي تأُير على سوريا لا اقتصادياً ولا سياسياً ولا اجتماعياً ولا حتى على النظام يلي معاقب على أساس وكل يوم وفد أميركي بالشام. وشكراً لا تأخذونا على الخط لأنو معلق الـ Arial |
دايما بمر على الشعوب فترات صعبة بحيث بينجبر البعض انو يتعامل مع الخارج ليغيرو الوضع يلي بالأغلب بكون غير قابل للتغير من الداخل بدون اي مساعدة خارجية !!
في اكتر من العداوة بين الفرنسيين و الأنكليز ...بس لما كانت الحكومة الفاشية بفرنسا موالية للنازيين ..ما كان من الفرنسيين غير انو التجأو لأنكلترا مشان يجمعو صفوفون ,,,و نجحوا الفرنسيين بعد فترة ! ..و التاريخ ما سماهون عملاء .... طيب ,,الأمثلة ما تخلص ... شو رأيكن .. ثانيا ..بتمنى انو ..ما في داعي للعصبية ! شكرا Jimy ...رح اعمل متل ما قلتلي تماما . |
Sir Viva Syria
ما هدا هو كلامي ... انو الشباب مفكرين العقوبات عم تأذي الشعب السوري ...هي بالحقيقة ضد النظام...يعني تماما متل ما حضرتك ذكرت ..لما النظام يتفاوض مء امريكا او اسرائيل عم ياخود رأيي هالناس يلي بتعصب على ابسط كلمة !! ..النظام مو شايلكون و مو شايلنا من أرضنا ..لهيك يصطفلو منون لأمريكا ...يتفاوضوا ,,يتبادلو عقوبات ...طالما هيك هيك بالنسبة للشعب ..اكتر من القرد ما مسخ الله ..يعني الشعب عم يموت الف موتة بالساعة من سياسات النظام !! و اخر همو انو تجمد رصير مخلوف بأمريكا |
اقتباس:
بدي اعتزر عن الاغلاط الاملائية الكتيرة بس والله عم اكتب على كمبيوتر فايت بالحيط وعم يعلق ومافيه عربي فلا تأخذونا :D |
بعد ما قريت الردود مرة تانية ...بعترف انو يمكن انا ما عندي الأسلوب الخاص بالكتابة ..متل مثلا VivaSyria ..Yass
بس هيك انا طبيعتي ,,عم اكتب كأني عم احكي مع رفقاتي بشي مقهي مثلا ..و ماني مضطر ابدا اكتب بأسلوب غيري و قلدو لأنو رح يطلع شي مشوه مشان انو امريكا عم تعطي التبرير للنظام ليعزز اسلوبو ...يعني يا استاذي الكريم Yass..انو النظام اذا انزعج من امريكا بروح بينتقم من شعبو !! لأعطي مثال .... ايام المجازر الأسرائيلية بغزة ...اتحفنا المعلم بتصريح ,,عنجد بتحس انو جاي على بالك تكسر التلفزيون بس مشان تخلص من كلامو .. التصريح كان عم يقول ,,,بما انو اسرائيل ما عم تحترم حقوق الأنسان بفلسطين ..لهيك ما بدنا حدا يتدخل بحقوق الأنسان بسوريا !!! يالله ...يعني انو اذا اسرائيل عم تقتل الفسطينيين من دون اي انتقاد ..تركونا لكن نقتل شعبنا كمان من دون انتقاد !! ,,,انا عنجد خجلت انو انا سوري و هادا سوري !! ليش الرئيس الأسد بجولتو بفرنسا ,,كان كل همو يوصل للأوروبيين رسالة انو رجاء ما حدا يتدخل بحقوق الأنسان بسوريا ...لنقدر نتفاوض عا شغلات تانية !! بحس انو كرامتنا و حقوقنا و اخلاقنا عم يتم التجارة فيها مع الأوروبي .... |
اقتباس:
الجزئية الأولى: لما يكون في عقوبات أو مشاكل و يكون في صوت عالي و يكون في كل هالحكي دائماً يكون في حجة عند أي نظام لحتى يشد الحبل على الحريات و الحقوق بحجة الأمن القومي.. لاحظ انو حتى بدول ديمقراطية هالحكي صار (طبعاً مع فروقات) فيعني لما يكون في تهديد خارجي و لو كان اعلامي فأي فرص عمل حقوقي أو في سبيل الحريات تلاقي قدامها تقييد شديد بحجة التهديد الخارجي, و هالحجة تمشي عالشعب و خصوصي لما في تخويف من مصير مشابه لمصير العراق أو شماتة بـ "ديمقراطية" لبنان ... راح تقلي انو أي نظام ديكتاتوري ما يحتاج إلى حجة أو مبرر لحتى يقمع الحريات, و هذا كلام صحيح تماماً و لكن لما يكون الوضع هادئ دائماً الأمر أصعب لألهم. الجزئية التانية: وقت أميركا تحكي عن حقوق الإنسان بسوريا فرضا رأساً رح يكون في توجّه إعلامي انو مصطلح "حقوق الإنسان" هو منتج أمريكي, و كلمة منتج أمريكي سوقها الشعبي مضروب جداً (بما يخص السياسة.. ) و يضرب هالشي بمصداقية كل المدافعين عن حقوق الإنسان حتى لو كانو ضد أميركا بشكل شرس.. لأنو خلص أميركا حكت عن حقوق الإنسان يعني هدول رفقاتها.. و نفس الشي عن الديمقراطية و نفس الشي عن كل هالأمور... و القصد انو أميركا تعلم انو تضر بهالقصص لما تدّعي دعمها و بالتالي أنا بفكر انها تتعمد هالشي لأسبابها السياسية الخاصة تذكرو لما طلعت كوندوليزا بتقول انو الإدارة الأميركية خصصت 5 مليون دولار لدعم جهود المعارضة السورية من كم سنة.. و طبعاً هالتصريح طلع بكل الجرايد التابعة للحكومة و شبيهاتها.. و لكن ما حدا نشر انو 90% من أحزاب المعارضة (اللي أنا ناقد لتقريباً كل شي بيعملوه و مع ذلك هون تصرفو صح) مش بس التزمو الصمت و انما رفضو هالحكي رفضا قاطعا و قالو انو ما بدهون دولار واحد من برا (و بتذكر مقال ساخر لميشيل كيلو بهالخصوص قبل اعتقالو).. حسب ما اتذكر مافي إلا الغادري رحب بهالحكي بس ما شاف فرنك منهون... كوندوليزا ما بتعرف انو هالإعلان يضر بالمعارضة السورية و يقوّي القيادة السورية شعبياً؟؟ أكيد بتعرف و جداً, معناتا ليش عملتو؟؟ عملتو لأنو من مصلحتهون انو تكون المعارضة السورية غائبة.. هامشية... و مش حبا بالقيادة الحالية انما بيعرفو انو هالموجودين لازم يكونو أقوياء لحتى الاتفاق معهون يكون ذو مفعول دائم و بدون مشاكل... أنا هاي نظريتي التآمرية... و العقوبات هي استكمال لهالنظرية.. حتى لو كانت ذو مفعول محدود (رغم انو أنا ما بشوف انها ذات مفعول محدود.. ) |
- انفقدت كمية كبيرة من الأدوية أغلبها عم يفوت تهريب و كانت تتصنّع وطنياً لأنو في أجزاء من التركيب تملكها شركات أميركية ترفض تصديرها لسوريا, و كان هالشي سبب من أسباب أفلاس عدد من شركات الأدوية. (رغم انو العقوبة نظرياً لا تشمل الأدوية و المواد الغذائية لكن العديد من مركبات الأدوية تحوي مواد كيميائية, هيدروجينية على الأغلب, تعتبر ذات استخدام ثنائي و لذلك لا تباع لمن لا يرغبون..) و إحدى الشركات المتضررة هي تاميكو..
- في تضييق من شركات تقنيات الانترنت تجاه سوريا, يعني مو مكفينا الحكومة تحجب مشان يجو كمان يضيقو على هالخلق, و بعرف انو يكفي تغيّر اسم مكان اقامتك ليمشي الحال بخصوص الخدمات المجانية, و لكن هالشي بذاتو يكفي ليكون إزعاج لمواطن سوري برئ, ليش لحتى يكتبو أهل البلد انو عايشين بغير بلد ليقدرو يعملو حساب غوغل أو يفوتو عالمسنجر؟ شو يعني سوريا بغير كوكب؟ - خلال سنوات عديدة ما دخلت قطعة صيانة وحدة للسورية للطيران, و كانت الإدارة الأميركية واضحة جداً بمنعها, و انخفاض عدد الطائرات خلا الشركة تلغي كتير محطات و تقلل عدد الرحلات الأوربية خصوصاً متل من اسبانيا, اللي كان يجي منها 4 رحلات على دمشق و حلب أسبوعياً و هلأ صار في رحلتين فقط من مدريد حصراً و فقط إلى دمشق, و كانت الرحلة بتموز بحوالي الـ 400 -500 يوريو ذهاب إياب و السنة الماضية كانت التذكرة بـ 940 و صف عالدور.. يا تطير هالشهر يا ما تطير.. هالشي كان بسبب العقوبات, حتى لو آخر سنة و نص تلحلحت الأمور الإدارية و صار حكي و اتفاقات شوي بس لحد هلأ ما أجت طيارة وحدة على سوريا رغم انو ناطرينها, و على اعتبار أنا مواطن سوري و متضرر من هالشي متلي متل كتير مغتربين فبعتقد بيحقلي قول انو هالعقوبة أضرتني كسوري بدون ما يجي حدا و يحاول إخراسي.. - بالنسبة للتجاري السوري, حوالات من مغتربين إلى الداخل كانت تمر عبر التجاري السوري من الولايات المتحدة و كندا و غيرها تمت عرقلتها و الإجبار على البحث عن طريقة أخرى لتنفيذ هالحوالات (و ما بيهمني اذا الطرق الأخرى موجودة.. بيهمني انو أكبر بنك بسوريا مصنّف كإرهابي, و فيو تعاملات لشريحة واسعة من المواطنين السوريين لأنو الحرامية حساباتهون بسويسرا و ببنما و جزر الكايمان.. مش بالتجاري السوري). يجوز ما منعت شي بشكل كامل هالعقوبات.. يعني مش متل عقوبات كوبا أو العراق, و لكن بدرجة منيحة أضرّت بناس سوريين أو على الأقل صعّبت عليهون بعض الأمور.. و حتى لو.. حتى لو ها, ما كان الها أي مفعول... شو مشان الولايات المتحدة الأمريكية تعاقب سوريا؟ شو سلطتهون الأخلاقية ليعملو هالشي؟ حاوين أوسخ وسخات العالم و جايين يتشارفو علينا؟ أنا معارض للنظام السوري و مع ذلك كرامتي (أو مفهومي للكرامة) بيمنعني من أنو أوافق على انو بلد أجنبي يجي يفرض عقوبات على بلدي, حتى لو مالها مفعول, و حتى لو المقصود هو النظام و مش أنا... |
| الساعة بإيدك هلق يا سيدي 05:09 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون