|
ابتسم للعدسة
مع تقدم التكنولوجيا وانتشار عدسات التصور بشكل هستيري ، وبشكل متناسب مع سهولة امتلاك عدسة تصوير " كاميرا منفصلة او حتى كاميرا تبع الموبايل " صار من المحتل يكون كل واحد فينا هدف للعدسات في الأماكن العامة
شو ممكن تعمل وقت بتلاقي حدا عم يصورك ؟ بتدايق ؟ ولا بتتعامل مع الوضع بشكل عادي ؟ ممكن تهجم على الشخص اللي عم يصورك ولا بتعتبرها نقطة ما بحقلك تدخل فيها ؟ سمعونا رأيكن :larg: |
بقيم الموقف ...
ممكن اضربوا وممكن اسامحها و اعملها سمايل وممكن اكسرلوا الكاميرا وممكن احكيلها ... واو .... شو هالكاميرا الحلوة ... يعني حسب كيف الامور بتكون ميدانيا ...:lol: |
عادي بتكون وحدة معجبة فيني لهيك مابعمل شي وبعطيها ابتسامة :ss:
أما اذا كان معي بنت فأكيد مارح اسمح لحدا يصور كرمال البنت اللي معي طبعا:larg: هي اذا كنا بمكان عام أما اذا كنا بحفلة أو سهرة وئتا بتكون ضايعة الطاسة لانو كلو بصور كلو :yahoo: موضوع جميل ابو طوني مشكور :D |
اقتباس:
طب عندي سؤال بعيد عن جنس المصور بتفرق معك اذا كان الشخص هاوي او محترف ؟ |
اقتباس:
بس فيني عدلك صياغة السؤال / بتفرق معك اذا كان هالشخص مصور صحفي ، أو مصور منتسب لجمعية او اتحاد ما .. او كان هالشخص بيصور لمجرد التصوير بغض النظر ان كان نيتو عاطلة او حابب يصور للاحتفاظ باعماله :larg: |
اقتباس:
لأن بيئتنا الشرقية عندا بروتوكولات مسبقة نحو الموضوع .. خلينا نحل المشاكل اللي عم بين المارة والشب الماشي مع البنت نتيجة ( التطليعة ) حتى نقدر نفتح ملف البنات والذكورية ويا باطل :lol: خلينا عندك انت .. انه انت كـ " مرتجى " شو بتحس وقت بتلاحظ ان حدا عم يصورك بتحس ان خصوصيتك عم تنتهك ؟ ولا بتعتبر ان الشخص القدامك عنده هواية تصوير وعم يمارس هوايته مثلا . ويا هلا :D |
اقتباس:
بتتذكر حديثنا عن الموضوع وكيف رفيقك آكل قتل كتير من هلموضوع لسعته عم يفتل براسي .. ولهلق ما صار عندي الجرأة لأرفع عدستي بوج العالم نتيجة هلفكرة :sick: |
اقتباس:
المهم هون الوجع بالنسبة النا كـ مصورين ، العدسة ... صاير اعتبارها متل االلبس القصير للبنت مثلاً بمجتمعنا وللتوضيح انا ما عمانتقد اللبس القصير .. ما عندي مشكلة باي شي انا ... لكن طالما الشعب عندو النسبة الغالبة من البنت الي بتلبس قصير = عاهرة هالشي صار تماماً بالنسبة للعدسة ... كل مصور = فضائح او نية عاطلة رغماً انو مو كل العاهرات بيلبسو قصير :) ومش كل فضيحة أيضاً بحاجة للعدسة .. وهاكزا ... تتناثر الأوجاع هون وهنيك |
بس المشكلة بأن العاهرة فينك تميزها من تصرفاتا او من طريقة مشيتها ( ترا انت اللي فتحت قصة العاهرات انا مالي علاقة :lol: )
بس المصور والعدسة كيف بتم تمييزن ؟ بعدين السؤال .. الانسان هاد لو عرف بان ما عندي نية عاطلة وقت عما صوره .. واهتمامي مو فيه بقد اهتمامي بالمشهد اللي عم انقله بعدستي .. بدها تفرق معه القصة ؟ |
اقتباس:
أول شي بقيم الموقف اذا حسيت الشغلة فيها اهانة ممكن اعمل كلشي :jakoush: بس كحالة عادية اذا كان هاوي أو محترف ماعندي مشكلة أبدا واذا لزمو مساعدة بساعدو كمان :larg: |
الست الوالدة تبع حضرتنا كانت من الناس الي ساهمت بضرب احد المتطفلين :p . انا بشوف انو التصوير الصحفي والتلفزيوني مقبول مرات نوعاً ما . بس انو حدا يجي من الباب للطاقة يصور بالناس بتصور هاد اعتداء ع الخصوصية :pos:. فيك تصور مكان عام / طبيعة / مبنى / شارع / . بس انك توقف قبال شخص وتصورو بدون اذنو فهالشي فيو كتير غلاظة . وانا من موقعي برفضو . و من عندي احمد وابو طوني بتستاهلو الضرب .:lol: |
اقتباس:
بس انو احيانا بتكون بدك تصور مشان المشهد اللي خلقو هالبني ادم يعني بيصير جزء لا يتجزء من المشهد ما فيك تحذفو باي شكل احيانا تانية بيكون العكس... بس ازا صار وكنت خالقة مشهد بهالشارع يستحق التصوير :larg: ايه بتصور ....:ss: |
حسب شو الوضع الي عمبتصور فيه
يعني مثلا لما كون هيك مزبط حالي وهيك فعادي ماعندي مشطلة اما مثلا لما كون هيك مبهدل وقتا بقرف عيشتو او مثلا كنت بوضع حساس فوقتا بخفي عن وجه الارض ومابيهم هالمصور شو انكان صحفي او لا |
بنظر الو نظرة استخفاف بزبلو يعني وبيعرف اني قللت من قيمتو ...
خالصين ... |
هي الشغلة فيها شكوك وريبة
يعني واحد عمال يصورني وانا في الشارع شوووو اللي عاجبة فيني حتى ولو كان سائح او غريب ما صورني الا في شغله عاجبته فيني او مخلوق غريب بالنسبة له وكلاهما تنرفز وخصوصا كاميرا الجوال لانها فضيحة بجلاجل....مين جلاجل دي؟:? حد يعرف جلاجل دي طلعه منين؟؟ |
مافي عندي مشكله بنوب ! ! ما بهم لا الجنس ولا الشخص ذاته ! ! :? بس ألا ما يكون فيها شك , ليه انا :shock:, وهيك شغلات ؟ ؟ ! ! |
اقتباس:
بس اكتر شي بشوفها مزعجة هالظاهرة بالاعراس بتلاقي نص المعازيم ماسكين كاميرات الموبايل وهات يا تصوير وازا بهمك بقلك شغلة مزعجة من ناحية ازا العرس غير مختلط وفي بنات متحجبات مصيبه وفي مرات اخوات او امهات بيستخدمو هالشي ازا الهن اخ او ابن بدو يتزوج بروحو بصورو وبرجعو بعطوه وهو حاط رجل على رجل وبنقي والمصيبه حتى لمحجبات بالاعراس بياخدو راحتهم باللبس فبتكون النتيجه سودا . بس شغله اخيرة ممكن الواحد ازا بدو يصور يستأزن الناس يعني عايزنا نزيع نزيع هون بكون اسلوبو مؤدب وبما انو التصوير فن فالفن بزينو الادب |
لماذا يصرون على جعلي تحت الضوء.. وانا نكرة
أتراني سأضيء يوماً ,؟ فماذا عنك ياطوني؟ |
انا مرة صارت معي وانا بفسط الشغل ...
طبعاً البركة بكاميرات الموبايلات .. الشاطر بيشفط صور بدون ماتحس العالم طبعاً بشغلنا ما منتأمل شو عم يعملوا الزباين بس هاد المخلوق كان رفيق الزبون يلي عندي ماشفت غير الأخ حاطط عدسة الموبايل مقابيلي و عم يعمل حاله انه عم يتصل .. حسيت عليه :frown:وطرقته هديك الزورة .. قديش اشتهيت قوم اضربه بوكس ب نص عيونه:adal: العمى ضربه قديش قليل ذوق .. ع اساس ما منحس عليهم |
اقتباس:
يعني تعابير الشخص وهوي عم يصورك ولا الموقف اللي انت فيه ؟ مشان المساعدة بتخيل انك ما تضربه بتكون افضل مساعدة عم تقدمله ياها :lol: :D اقتباس:
بعطيك امثلة وانت احكم عليها بنفسك .. هي الصور لاحمد :   مفروض واحد يروح يقلن " يا شباب لا تتحركوا وخليكن طبيعيين بحركتن .. حابب اصوركن :shock: " وهي انا حاطتها :  الصورة هي وقت صورتا كنت كأني عم اسرقلي شي شغلة .. ولو الزلمة حس علي ابصر شو كان عمل فيني :pos: هلأمثلة من الصور برايك ممكن يعطوا اي معنى لو حذفنا الأشخاص من المشهد ؟ وبرأيك ممكن قله لشخص ما بعرفه ( جاي على بالي صورك ) ويقلي ( تفضل خود راحتك ) الأفضل انك تلطش الصورة دون علمه .. اذا ما حس بكون مشي الحال .. واذا حس هية قتلة وما كانت :lol: مو بقولولك الحياة مغامرة علينا خوضها :larg: اقتباس:
|
اقتباس:
طبعا الحكي بيختلف بين الشباب والبنات .. لان البنات اكثر عرضة للتصوير ( الهابط ) يعني اكثر عرضة للتصوير بهدف اظهار شكل جسما اوقات بكون الانسان معصب او متدايق .. تقاطيع وجه .. طريقة مسكته للسيكارة .. وقفته وطريقة سندة راسه على ايده او طريقة وقوفه على الحيط هي التفاصيل مهمة كتير بالنسبة للشخص اللي فعلا حابب يلقط المشهد اللي عم تخلقه عم قلك هلحكي لأن بحسب سمعت بأن العالم صاير قرية صغيرة يعني ممكن مع الايام كون انا الشخص اللي بدك تخفيه عن وجه الأرض :lol: اقتباس:
اقتباس:
جلاجل :shock: شهيتني على حشيشة صغّيرة بهلمناسبة :lol: |
ابو طوني عم احكي انا عن احساس الي عم بيتم تصويرو . ما فيك تفرض على حدا احترام اختراقك لحياتو او خصوصيتو . مثلاً هالشب او هالصبية ما بيحبو يظهرو بصور وانت قمت بهالشي خلسة بالتالي ازا بهدلك انا ما بلومو . يعني المصورين الهواة بيحبو ياخدو صور لكتير شغلات ( بالمناسبة انا بصور كتير كمان ) و هالصور بيكونو البشر جزء ما بيتجزء من الصورة ليقدرو ياخدو صورة ويحققو رغبة خاصة فيهون وهي الحصول على صور فريدة يضيفوها لارشيفهون . وبدهون يتحملو عواقب مضايقتهون لبعض الاشخاص . . انا شخصياً ما بمانع حدا بدّو يصوّر طلتي البهية بس انو الي بيمانعو وبيقاتلو حتى لو قاتلوني انا اثناء تصويري الهون ما رح لومهون . بالنهاية انا ما عم طالب المصورين الهواة بالتوقف عن التصوير بل بعدم المطالبة بترحيب الجميع بفضوليتهون . :D |
أول ما طلعو الموبايلات يلي فيهم كاميرا .. بتذكر كنت بحلب ومرت سيارة وإذ فيها شب وجه موبايلو لناحيتي ومن حركتو عرفت أنو صورني. لسوء الحظ كان متل ما ذكرت بسيارة وبالنتيجة ما قدرت اعملو شي وبتأمل دايماً تكون الصورة مو واضحة بسبب سرعة السيارة
كلما بتذكر هالموضوع بتضايق كتير .. بأي حق يصورني ومن وين لوين !! بالمقابل اثناء وجودي بفرنسا تقدم شخص وطلب تصويري مشان ريبورتاج عم يعملو لصالح إحدى المجلات وأنا رفضت بكل أدب ، يمكن عامل الدهشة والاستغراب خلاني ارفض بعتقد يلي بيلعب دور بقبولي هيك صور أو لا هو الغاية من الصور يعني بالمثال الأول كانت غاية المصور مش جيدة ولا منيحة .. وإنما عبارة عن حركة زعرنة وبالتالي طبعاً برفض هيك جركات أما المثال التاني فالغاية مختلفة تماماً ومتعلقة بشغل وعمل وما فيها شي مؤذي للشخص يلي عم يتصور |
اقتباس:
اقتباس:
بس مشان الإستئذان .. انه كتير اوقات بتكون الصورة لحظية .. زلمة معصب مثلا ومنرفز ..لازم روح لعنده وقله ( حبيب قلبنا خليك هيك .. بدي صورك :lol: ) ما كتير حاسس في ضرورة لحتى اسأل الشخص قبل تصويره . اقتباس:
ومن قال ان المشاهد لا تلتقط إلا القسم المضيئ من الأشخاص ؟ قد يكون لطيفك بصمة صامتة داخل احدى العدسات .. لماذا التشاؤوم ؟ :D |
اقتباس:
اقتباس:
عم ناكل القتلة من تم ساكت :lol: بس عم نحاول يعني نفهم العالم بأننا ما عم نعمل شي غلط :cry: اقتباس:
لو كان مثلا الزلمة حس انك عنصر دعم كتير مهم للريبورتاج تبعه ( قلنا مثلا يعني :p ) .. ما كان احسنله لو صورك بدون ما تحسي ;) |
ابو طوني بتعرفني أكتر واحد بحيب يتصور
بس انو حدا بدو يصورني بدون ما اعرف فهي حسب الحالة بيجوز كووون معصب وطالع ديني لإاكيد راح اضربوا اما لما بكووون عادي فما في مشكلة بالعكس بضحكلووو :lol: بش مشان قصة العاهرات انو بتكون معروفة من تصرفاتها بقلك انو مو بكل الاحيان ممكن تعرفا ;)أحيانا لازم تكون حربوء |
انو ازا اجى حدا بدو يصورني ومن دون ما انتبه ومابعرفو ... صح الصورة ممكن تطلع حلوي ...بس بنفس الوقت هوي ماقلي ...
وبظن بالشكلين لازم يخبرني .. انو انا اخدتلك صورة انتي ومو منتبهة ... او ازا بتريدي بدي اخدلك صورة ... وقتا مابعرف انا حسب الشخص او بوافق او لاء .... :lol:... هديك السني بالقاهرة انو بنات وشباب كانوا يطلبوا منا نتصور معن :? كتير عادي ... بجوز تقلي شو عرفك مايكون هاد الشخص مو منيح ؟ بدو يستخدم صورتك لاشيا مو منيحة ؟ ... بس سبق وزكرت انو حسب هاد الشخص ... |
هلق لما بشوف سائح أجنبي (ببين طبعا ) عم يصور ما بعرف ليش بنبسط وبحس إنو بدي قلو روح فرجيون إنو نحنا ما منعض....
بس قمة الاستفزاز بالنسبة إلي لما بشوف خليجي فاتح تمو وراخي بزاقو وعم يصور أي هدف جنسي بيطلع قدامو ليفرجي العربان شقد نحنا مبسوطيييييييييين وكلو على كلو لما تشوفو قلو فهاد بحس بدي أكسر الكاميرا على راسو......... طبعا أنا بحكم موقعي لازم تكون صوري موجهة مو اعتباطية لهيك بتجنب التصوير مرغما... |
يعني بتختلف معيار الامور ...
بس انا من شهر وانا عم امشي بالشارع .لاحظت سياره سعوديه واقفه .. ولفت انتباهي انه الشخص الي فيها عم يصورني ....بكل بساطه ..ابتسمت اله وقربت ع السياره ووانا عم قرب فتح الشباك ..لحظتها خطفت الموبايل من ايدو ومشيت وولحقني واجيت بدي اكسرو ..ع راسو ..وبلشت بهدل برب الي خلقو ..وقعد يبرر انه لا ماعم يصور ..ولميت رب العالم ..بالاخير مارضيت رجعلو الموبايل ..الا ما شفت اذا كان مصور ولا لا وفعلا كان مصور..صحي الصوره مو واضحه ..بس مارضيت اسكت ما جبتلو رب الشرطه تلعن دينو ..بالاخير كان لازم ارفع فضيه ومدري شو ..فا اكتفيت انه امحي الصوره وبهدلو قدام الكل .....مدري ليش حسيت بعدين انه كان لازم طنش ..... سيدي طولت بس حادثه مناسبه لموضوع ... وسوري ع الطوله .... |
انو مابعرف
بس بفضل اني ما بتصر الا بعلمي أكيد ولو إني عاملة كزا عملات بس الله وكيلك ما بتضل بموبايلي يوم واحد بقى منجي للسبب ليه ؟ انا بقلك ليه شباب مجتمعنا اغلبيتو نيتو عاطلة هاد من جهة بس من جهة في هاويين التصوير <<<اللي متلي يعني أحم أحم ما فينا نقلون لاءا بدون سبب بالاول بقدم اعتزاري وبقول السبب وازا ما فهم بقلو يدور ع رب قرنة جديدة وهيك منكون خلصنا بس بضلني ع موقفي اني ما بحب حدن يصورني بدون ما أعرف |
أنا ببتسم للعدسة وبخليه يصورني وبعدين بتصور صورة أنا وياه أو أنا وياها
|
يعني مرة كنا بئلعة حلب..وجيت عم صور رفئاتي..
 هاي "البنت" كانت هيك عجنب.. يعني كان المفروض روح قلها: انتي.. هي هونك ..يوووه.. يا مخلوئة.. لك اي .. بعدي هيك بدي صور..:? -------- ليك ابو طوني حسب الكميرا.. إذا كانت هيك شكلها غاليي وعدسات وحركات..بكون احسن:gem:.. كما انو ابن خالتي عندو جاكيت بيضا..فجبنا ورق طباعة (هاد خصوصي بيتلزقو عالتياب).. فطبعنا Prees من ورا و Photography من قدام مع لوغو كميرا :larg: (تصميمي وفكرتي).. وكل ما اجا حدا عليه بحكيه بالانكليزي..بقلو محي الصورة بحكيه بالانكليزي.. بعدها بيتركو وبينفد من قتلي :gem:.. *هاموش:  يا لطيف الحلبيي مأحلاهون :p.. |
هلا و انا عم بقرا فوق
لقيت كتير عالم عم تحكي ع الاذن انولو اخد اذني بخلي يصور.. لو اخد ازنك ما بتعود الصورة بنفس الطبيعية و التلقائية.. يعني في عامل بالمشهد بيجوز اللي بدو يصورك بيكون عم يصورك مشانو ازا عرفت انك عم تتصور 90% هالعامل رح يختفي و انا لما حكيت اني بتصور راح عن بالي انو اللي بدو يصورني ممكن يكون خليجي فبحب ضيف...انو ازا هيك بفضح عرضو و ما بتصور :jakoush: |
جيمي انت هيك عم تخرق حقوقا الخصوصية يا ريتا منتفيتك :lol: .. عنجد بتستاهل . ما قلنا تروح تخبرا بانو بدي صور رفقاتي طلعي من الصورة . نحنا عم نحكي عن الصورة بشكل عام مثلاً انت عجبك تأمل شي ختيار قاعد على كرسي قمت طلعت كاميرتك وطقيتلو صورة . بقا هون ازا بهدلك بيكون حقّو . وبيكون زوق منك ازا خبرتو بعدا او اعتذرت منو في حال انتبه وتفهمو هدفك من التصوير . يعني لما يكون في ناس عم تتصور بالشارع اكيد بيطلع معهون حدا تاني وراهون ما رح يعملو حظر تجول مشان صورة و من هالنوع تحديداً من الصور ما حدا بينزعج . الانزعاج بيجي من هواة التصوير الي بيشلو كاميرتهون وبيطقو صور للعالم . |
اقتباس:
انا بدها تنتفني :frown:.. مو حاجي سمحتلها تضل جزء مو صورتي وما احطلها:frown:.. بعدين يمكن مو واضح بالصورة بس كانت عم تزور رفئاتي:jakoush:..كانو في شي موعاجبا ما بيكفي انو ما عملت مشكلي:adal::lol:.. كمان.. يعني شوف صورة احمد هون يعني معئول ياخد اذن كل واحد فيهن على حدا مشان ينشر الصورة عالانترنيت:pos:.. حتى ما ينتهك خصوصيتهن:?.. |
انا بالنسبه لالي مهووووووووسه بشي اسمو تصويير
كتيييييير بحب هالشغله بس اما بالنسبه لموضوعك انو يجي واحد من الباب للطائه ويصورني لاااا طبعاا ما رح ارضى لانو شو بيعرفني شو رح تكون غايتو من هالتصوير :p يسلمووووووو ايديك ابو طوووووووني :D |
اقتباس:
الي قلتو مو مطلوب ياخود اذنون ولا يوقف تصوير . بس هوي عم يخترق خصوصيتهون وازا عصّبو عليه المفروض ما يلومهون . هاي هي كل القصة . يعني بحالة احمد . بفرض حالي كنت مع هالشلة ( بعيد الشر :pos:) بئا وقام احمد طق هالصورة و قمت انا طقيت رقبتو . فأنا غير ملام :frown: . باختصار : هالنوع من التصوير فيو انتهاك للخصوصية ( ما في خلاف ع هالنقطة ) . بعض الناس ما عندها مشكلة معو بنوب . وبعض الناس عندها تحفظ . وبعض الناس بترفضو بتاتاً . فكرة الموضوع الوصول للي عندهون تحفظ و محاولة الشرح انو يا جماعة الخير حاولو تميزو بين الاشخاص الي عم بيصوروكون ولا تتعاملو معهون جميعاً بنفس الطريقة . بس بكل الحالات ردة الفعل لازم تكون مقبولة عند المصورين . وبمجتمعنا رفض التصوير اكبر بسبب طبيعة المجتمع ( المحافظ = ولي شو بكره هالكلمة :pos: ) وطبيعة العلاقات القائمة بين افرادو . |
اقتباس:
وهيك بصير بكل العالم..وهيك بيعملو المصورين المحترفين..دائما لازم يتاخد موافقة المتصور.. بس اذا انتي كنت بهالموقف وحدا صورك بدون ما تعرف وبعدها طلب موافقتك..وئتها ما بحقلك ابدا تطق رقبتو :D.. وبرجع بئلك ابن خالتي كتير بصور ومن زمان ما اكل قتل..فورا بس يشوفوه خايف ومرعوب ومو ميفهم عليهن(عاساس:p) ومو ميفهموا عليه.. بيتركوه عادة:larg:.. |
اقتباس:
ولقلك كمان . هالشغلة انا بحددها حسب الي مصورني وحسب مزاجي . يعني الي الحرية بالقبول والرفض . يعني انا عم احكي بمنطق مجتمع متل مجتمعنا صعب يرضى بأي نوع تصوير نظراً لاسباب بتتعلق بالمصورين و بثقافة المتصورين ايضاً . بس المطلوب التمييز بين المصوّر الازعر و المصوّر الهاوي الي بيهمو المشهد مو شي تاني مو اكتر من هيك رغم انو بالحالتين في نوع من التعرض للخصوصية . و هي الك :D مشان تقوم تدرس :p |
اقتباس:
وأكيد كنت عنصر دعم هام لأن لو تشوف نظرة الخيبة بعيونو لما رفضت بتتأكد من هالشي :p هلا ما بعرف ليش طلب مني الموافقة عالتصوير يمكن مشان ما يعلق بإشكالية قانونية في حال اكتشفت إني مصورة بمجلة بدون علمي .. واليوم بمناسبة هالموضوع بظن اني تصورت بكذا صورة لناس ما بعرفون ... لأن بالمترو كان في سياح من شرق آسيا وطلع شحاد عم يغني بالمترو وكان جنبي واقف والعالم نزلو فيه تصوير وأنا طالعة بكل الصور عالاغلب :angel: هلا أكيد بهيك حالة ما رح خانق لأن واضح إني تصورت عالصدفة كوني جنب الزلمة .. يعني بتفرق عن أنو حدا هيك يجي ويصورك بدون استئذان :sly: :pos: |
| الساعة بإيدك هلق يا سيدي 11:02 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون
..