|
الأخوان المسلمين والديمقراطية ..كلمات لن تنسى
أحببت أن أورد هذه الكلمات من الادبيات الأساسية للأخوان لكي لا نخدع بالمظهر الديمقراطي للرجعي المتوحش..
في لقاء مع صحيفة الوطن العربي ذكر محمد الجراح العضو القيادي في التحالف الوطني لتحرير سوريا حينها أنه في لقاء مع حسن هويدي وعدنان سعد الدين " المراقب ونائب المراقب العام للأخوان المسلمين " وكان الحديث عن الديمقراطية قال حسن هويدي ..: نحن لا نقبل بالديمقراطية فهي حكم الشعب والجكم لله فأجاب محمد الجراح هل هذا تبرير للديكتاتورية يجيب هويدي لا الديكتاتورية أيضا حكم الشعب ونحن لا نؤمن إلا بحكم الله الشعب عبر الديمقراطية قد يجيء بمن ينفذ احكاما تتعارض مع شرع الله .. فاجابه القومي العربي محمد الجراح : ما يتنافى مع شرع الله نرفضه ... .. مو هيك الديمقراطية اللي كلنا بدنا اياها تحياتي الحارة ظل جيفارا |
صحيح وكل ادبيات الاخوان بنرسم ببدايتها شعار السيفين المتقاطعين كرمز لحركتهون ..
واهل الشام بيقولو " من جرب المجرب عقلو مخرب" |
ملا تشكيلة :pos:
ربنا يبعدهم عن الشام واهل الشام بعد السما عن الارض ((أميـــــــــــــــــــــ ـن)) |
إجرام الاخوان المسلمين أكبر دليل على نظرتهم الوحشية المتنافية مع أي تفكير يكرم الإنسان أو حتى يؤنسنه هؤلاء الوحوش مازالت أياديهم تقطر من دماء الكفاءات السورية التي اغتالوها بدناءة.
الاخوان المسلمون كأي تنظيم سلفي ارهابي لا يؤمن إلا بديمقراطية المرة الواحدة التي تكفي لوصوله إلى السلطة ثم تلغى الانتخابات بحجة الأمر الإلهي. أصلا الاخوان المسلمون ليسوا سوى اسقاط غريب على الاسلام السوري المنفتح سوريا التي تحتوي على أكبر تنوع من المذاهب الاسلامية وغير الاسلامية في الوطن العربي تمثل قمة الرقي في التعايش والتلاقح. |
أي تنظيم ديني يتسلط على حكم أي دولة حينما يعتمد على قوانين غير قابلة للمناقشة أو التعديل فهو بالضرورة تنظيم قمعي و رجعي . و تيار الاخوان المسلمين تنظيم اسلامي و كـ غيره من هذه التنظيمات فهو يرفض الديمقرطية و المشاركة والاختلاف مستمداً هذا الرفض من السلطة الالهية المطلقة . |
المشكلة إنو في حديث عم يدور وحتى بين النخب عن عودة هؤلاء إلى الوطن "أحيانا يأخذ الطرح شكل إنسانيا بعودتهم كأشخاص "
وصديقي عياش كلماتك كتير قيمة حقيقة إن الإسلام السوري منفتح جدا على الأخر ولم تكن شعبية الأخوان في فترة ماضية سوى رد فعل غير منطقي على سلوكيات النظام حاول هؤلاء عبر تضخيمها وتقديمها للشعب السوري على إنها قضية إضطهاد طائفي أن يكسبوا تأييد الشارع السوري ولكن تفجير الأزبكية الإرهابي كان الفيصل وعاد الشعب السوري لرفض الجماعة ومن حينها اعتقد أن الجماعة قد فرط عقدها ..فإنقسمت إلى جماعتين ..ودخلت في متاهات لن تخرج منها ... تحياتي الحارة ظل جيفارا |
اقتباس:
أنا برأي عودتهم كمواطنين أمر مرهرون بندمهم عما فعلوا وبمحاكمة المسؤولين عن العمليات الارهابية بشكل مباشر أما عودتهم للحياة السياسية فستكون عواقبه وخيمة خصوصا في هذه المرحلة. |
اقتباس:
بختلف معك بنقطتين 1- الاخوان حركة سياسية متل كل الحركات بسورية كان فيها متعلمين كتير وعلى مستوى عالي جدا.. وهي نقطة وجب الاعتراف بها.. من جهة تانية ما كان مستهدف للشباب الفقير ابدا وبضمنلك انو معلوماتي دقيقة لانو الاخوان كانو ابناء التجار الكبار بحلب وبدمشق وبحماه.. طبعا لا يخلو الامر من بعض لحالات الاخرى.. 2- عودتهم كمواطنين امر مفروغ منو.. لكن عودتهم حتى كحزب سياسي يجب أن يكون مقبولا.. وما بيجوز منع اي حزب حتى لو كان الو تجارب ارهابية من العمل داخل الوطن .. ووعي الشعب هوي الكفيل بإيقاف عمله واذا كان الناس اتقبلت الحزب من جديد ووقفت معو بالمدن السورية فألله لايردون |
اقتباس:
انا شفت الاعضاء فوق نظرتهم لنص الكاسه الفاضية انا بعترف الاخوان المسلمين الهم كتير سلبيات وعندن انانية وعدم تقبل للآخر بتتنافى مع اتجاهم الاسلامي لهيك خسرو بسلوكياتهم كتير ناس وعفكرة عندن نظرة طبقية كتير بزكروك بطبقة الاشراف قبل الثورة الفرنسية نيجي لنص الكاسه المليان اما عن ثقافتهم هن على مستوى عالي من الثقافه ولو انفتحو شوي فيهم يجذبو عدد كبير الهم وكل القصص الارهابية اللي لصقت الهم ما الها اي اساس صحيح فبركه بفبركه وانا بشوف انهم منطقيين بعدم تقبل الديمقراطية والدكتاتورية على حد سواء |
و كأنو الأخوان المسلمين ما بيستفيدوا من تجارب التاريخ ! دايما القرار الخطأ بالوقت الخطأ ...او حتى كمان ما بيستفيدوا من تجارب الحركات الأسلامية الناجحة(على ندرتها) ...
يصراحة ,,المعارضة مريضة ..والنظام قوي جدا و مهما منظن انو وراقو خلصت منكتشف انو لسا عندو وراق يقامر عليها !! ... المعركة طويلة ..........................والكفاح مستمر ..مع او بدون الأخوان ,,مع او بدون رفعت و خدام . |
اقتباس:
|
اقتباس:
من جهة تانية انا ما قلت عند الاخوان في ثقافة ما جبت هالسيرة منوب قلت انو متعلمين على درجة عالية يعني دكاترة مهندسين محامين اما مثقفين !!!! حتى على مستوى الحزب كلو حركة الاخوان ماانتجت مثقفين على حد علمي باستثناء عصام العطار وزهير سالم وحتى هدول هنن منظرين للحزب مو مثقفين بالمعنى العام للكلمة... من جهة تانية القصص الارهابية ملفقة!!! اول مرة بسمع هالكلام.. حتى هنن معترفين بالعمليات الارهابية.. من وين هي ملفقة.. وجب التوضيح مع جزيل الشكر |
اقتباس:
اما العمليات الارهابية وقت يطلعو واحد الو لحية ويعترف ويقول انو من الاخوان هلا خلص صار اخوان؟ ما حلنا نفهم هالسيناريو اللي مألفينو اليهود ومخرجيتو امريكا وحاطين ممثلين مسلمين بظاهر هلا ما بعرف بجوز الاخوان عاملين شي بسوريا بس مو لازم نعرف شو نعمل فيهم ليعملو شغلات ارهابية هاد السؤال بتمنى اجاوبي عليه وشكراااا |
اقتباس:
|
اقتباس:
|
اقتباس:
مشان الجهة التانية فالمقصود أو حسب رأيي فالاخوان حركة قديمة جدا و لو بلشت بشكل سرري يعني بظن من عدة أجيال مو من جيل مثلا و تم تنشئة جيل جديد منها و هوي يلي اتفضلوا الشباب و حكوا عنو فوق يلي هني أبناء التجار و أصحاب رؤؤس الأموال و برأيي فروؤس هالأموال مو اجت عن عبث و انما عن تخطيط مسبق أما الدفعة الجديدي و هاي يلي بظن عم يحكوا عنها الشباب فهي محاولة زيادة الأعضاء و لمهم منين ما كان فلجؤا للشباب الفقراء الدراويش و بللشوا الاقناع فيهن و هاي عمليي سهلة برأيي من خلال بعض المغريات لشباب معدوم عايف الله اللي خلقوا (متل ما تحاول تعمل بعض الأحزاب هلأ) أما مشان رقم 2 برأيي هاد كلام عواطف يحتاج الى صفنة تفكير أخرى و مرحبا وعي شعب لو هالشعب عندو وعي ما كنا هون أو بالأحرى لو مسموح للشعب يتوعى و بلاع يا الله و يا وطن بلاع |
اقتباس:
وبرأي لا يمكن التعويل على نضج الوعي السياسي الشعبي خصوصا في مثل هكذا ظروف طالما ظلت تحكم الشارع عقلية المراهقة المتخبطة والمتأثرة أولا وأخيرا بالاعلام المرئي فقط. |
اقتباس:
بين الطوائف ممنوع..بين الاديان ممنوع..عن اي تلاقح عفوا؟:? انو بالنسبة الي بشكل انساني ومتل ما قال ما قال عياش العودة سياسيا بالنسبة الي مرفوضة تماما..ولا ممكن اتقبل وجودون... |
الاسلام السوري هو الاسلام الوحيد الذي يحتضن هذا التنوع المذهبي السوري المتميز مسيحيا واسلاميا لا أظن أن هنالك دولة أخرى في الوطن العربي على الأقل او العالم الاسلامي تحتضن مثل هذا التنوع في المذاهب الاسلامية والتشيعات كما في سوريا.
|
اقتباس:
كذلك التمازج السوري الفلسفي ( الغنوصي) الاسلامي الذي أنجب المذاهب التي تتفرد سوريا وإلى حد ما لبنان (سوريا الكبرى) بحضنها. |
عذراً بدايةً ...
لكن فيما يخص النصف الفارغ والنصف الممتلئ من الكأس بـ موضوع / الإخوان المسلمين / ... لا التسلسل التاريخي ولا الإقليمي ولا العقائدي للإخوان المسلمين بيوحي للناظر والباحث / حتى بحيادية / بأنه ممكن يكون في نصف .. أو ربع على الأقل من الكأس مليان... أعمال الإخوان المسلمين في سوريا لا يمكن للتاريخ أن ينساها ، ما بنكر المجازر اللي صارت بحقهن ، وما بقول أنها مبررة تبعاً للي ساووه ، لكن فعلياً ، مافيني أنكر أعمالهن بالداخل السوري ، وما بقدر بررلهن هالشي ، وما بقدر اتقبلهن أبداً كـ حزب سياسي أو ديني . تانياً .. فيما يخص عودة الإخوان ... بالفترة الأخيرة أي الفترة الحالية ... وبصفتي مواطن سوري أؤمن بأن عقيدتي سوريا / بالألف حصراً / وديني سوريا .. وحزبي سوريا ... ووطني الأول والأخير سوريا ... ومن حقي التام أني اختار انو يكون بلدي بأكبر درجات الأمان.. / وما يُقصد بكلمة أختار أي بيني وبين نفسي .. وليس فرض عـ هالشعب كامله / ... برفض رفض تام عودة الاخوان كـ حزب سياسي ؟ ... لأنه تحزبه السياسي من وراه أهداف دينية بحتة كـ حزب ديني ؟ ... مافي أي مواطن أو شعب أو حتى دولة من اللي بيتمتعو بالعقلانية ... بيقبلو انو يكون في تحزّب ديني .. كـ مواطن وجزء من الشعب ؟ ... هون النقطة الأهم ... على شو بدهن يطالبو بمواطنتهن ؟ اذا كانو ليسو فقط أعداء للنظام وللحكومة ولأجهزة الأمن ... بدايتها ونهايتها كانو عميسعو لإزاحة النظام للتربع على عرش الدولة وبهالحالة بيرجع الشعب لـ تحت يد الدكتاتورية الدينية .. وآخر شيء ممكن يفكر فيه الإخوان المسلمين المقصودين بالحديث / الخبر / .. انهن يطالبو بالمواطنة ... لأنهن ما بيحملو من الـ / سوريّة / .. إلا ما تم تدوينه على الهوية .. أو نقلاً عن آبائهم وأجدادهم. :D |
اقتباس:
لكن مافيني قول .. أنو سوريا ... قادرة أنها تعايش هالأديان والطوائف مع بعضها .. ومع بعض الاستثنائات ... سوريا من أكبر الدول احتضانا للتنوع الديني ... كما أنها أيضا من أكبر الدول ... احتضانا لـ فعل الطائفية. احتضان لا يساوي بالضرورة تعايش . |
هاد ما اسمو تلاقح برايي..
انا راح بالي على تلاقح تاني |
اقتباس:
1_ مرحبا 2_سلبياتهم عدم تقبل الاخر ؟؟!!!ولا هو انهاء الاخر قتل الاخر سحق الاخر تفجير الاخر 3_ثقافتهم ثقافة الدم ثقافة الأشلاء 4_من وين جبتيها انو قصص ملفقة ومفبركة !!!! غريبة :shock: 5_ بتشوفيهم منطقيين بعدم تقبل الديمقراطية والدكتاتورية ؟؟؟؟ شلون زبطت معك هي بالله عزيزتي بماانك مابتعرفي شو عملو هدول القتلة المجرمين الوحوش مصاصين الدماء بسوريا وبالشام وحلب تحديدا فا الله يرضى عليكي اسألي قبل ماتحكي وعن توجهاتهم مالها علاقة بالاسلام ولا ب اي ديانة سماوية هدول همهم الاكبر هو الحكم وبس والدين عباية يخبو فيها وجوههمالمقرفة المرعبة وانيابهم الله لايردهم الخلاف بالرأي لايخلف للود قضية ...تحياتي |
اقتباس:
كلامي مو كلام عواطف.. وانا شخصيا بتمنى انو ما يرجعو ابدا لكن اذا كنا مندعو لمنع اي حزب من العمل ببلدو فمنكن عم نفتح بواب كتير لمنع احزاب اخرى ممكن يسارية او اسلامية او غيرها بحجة الخطر على البلد.. ""والقضية المركزية والهائنا عن قضايانا الاساسية وبتنعاد الكليشة نفسها"" من جهة تانيةالاخوان المسلمين حزب مقسم لتيارات ايضا وعصام العطار كان معادي لاستعمال السلاح بالحزب ذاتو .. يعني انا ما عم قول انو يرجع متل ما كان لكن ما بيجوز ديمقراطيا انك توزن بمكيالين .. انك تنادي بالديمقراطية وتعددية حزبية بعدين تمنع حزب من العمل.. |
اقتباس:
انا معك تماما.. لكن احمد قبل السبعين فيك تسأل أهلك.. كانت الناس من مختلف الطوائف تحب بعضها كتير.. مدينة القنيطرة كانت مركز لكل الديانات والطوايف بالمنطقة وكانو الناس متفقين مع بعض كتير.. كمان في كتير ضيع بمناطق حمص وحماه مختلطة يعي نص الضيعة سني ونص علوي او نص مسيحي ونص علوي وهيدا الشي بيدل على انو الناس كانت قادرة انها تعيش مع بعضها وبعد السبعين بلشت هي الضيع تقل وبلشت تصير من طايفة او من دين واحد لانو احد الطايفتين صارو يهاجرو من الضيعة نهائيا لانو ماعادو قادرين انو يتعايشو مع الطرف الاخر .. بس من السبعين وانت جاية صارت العشائرية والطائفية والتدين اكثر حدة واكتر بعد عن التسامح وازداد الموضوع بعد الثمانينات وبعدما صارت مشاكل الاخوان بالبلد |
اقتباس:
بتوقع صعب جدا انو نقارن مثلا بينون وبين الحزب الشيوعي مثلا او اي حزب اخر مالو نفس التاريخ..هيك كمان لح نكون عم نكيل بمكيالين... اقتباس:
انو كانوا يتجوزوا من بعض؟؟؟ما بتوقع نهائيا وهي هي نقطة التلاقح اللي كنت عم بحكي عنها... |
عالهامش
الله حيو اخوية بلشت تفيق:gem::gem::clap::yahoo::yahoo: |
اقتباس:
من جهة التلاقح اي والله ما كان في تلاقح.. بس كان الموضوع ابسط بكتير منفتح اكتر بكتير فيو محبة وما كان السؤال الاول لما بتعرف عليك من وين انت؟ متل وقتنا الحالي " بالمناسبة صرلنا ساعة منحكي وما بعرف انت من وين;)" |
تعيش حركة الاخوان ويموت كل حاقد لها لانكم ماخاطوهم ولاعرفتو ايش تفكيرهم
تحياتيييييييييييييييييييي يييييي:jakoush: |
اقتباس:
على فكرة .. بسوريا وجهوا نشاطن بعمليات الاغتيال ناح الكيميائيين بشكل واضح كتير ، ما بعرف شو الكيميائيين كانوا عاملينلن بس اللي بعرفه انه الكيميا قريبة كتير على الصيدلة فديري بالك على حالك :lol: بالنسبة الي بديهية كتير منطق رفض الديكتاتورية ... بس رفض الديمقراطية فينك تحطيلي اسباب منطقية اله ولدوافعه :? الديمقراطية فعل سامي وقيمة مثالية لا يمكن ادراكا بشكل قطعي .. افضل ما يمكن التقرب منها .. كلما تقرب منها التنظيم او المؤسسة او المجتمة بيزداد تحضر ورقي وبترتفع اسهم العاملين فيه .. فشو ممكن يكون سبب منطقي ومقنع لرفض قيمة سامية كالديمقراطية ؟ |
اقتباس:
كل تنظيم بيعتمد على " الموت لمن لا يقف إلى صفنا " لا يمكن وصفه الا بالمتخلف والرجعي .. وبكل الاحوال ما فينك تستفيد منه شو ماكانت افكاره سامية " ان كانت طبعا " لأن تماذجي طرحي وهدام ماله ايا اوجه بناءة بتشكرك :lol: |
اقتباس:
|
اقتباس:
|
انتبهويا شباب هدول اللتاتين لا تردو عليهون.. خايفة يتسكر الموضوع..
من زمان ما نزل هيك موضوع حلو بالاخوية |
انشاء قانون للاحزاب يمنع تشكيل الاحزاب الدينية بتصوري ما رح يكون مخالف للديمقرطية بقدر ما بيكون حماية الها وحماية للوطن من الانتمائات الغير وطنية ومن خطر القضاء على التجربة الديمقراطية .
|
اقتباس:
المهم انا مبارح كنت قاعد مع اختي وقلتلها انو الشيوعيين عندن التزام اكتر من الأخوان انا مو مع الاخوان بس المشكله انا بطلع ايجابيات وسلبيات بس انتو ما عندكم غير السلبيات ازا ابليس بزمناتو كان عامل منيح هلا الاغتيالات طبعا انا ضدها مع مين ما كان بس بجوز ناس تتصرف بوحشية كرد فعل لأنن تعاملو بوحشية هلا الديمقراطية والله الديمقراطية لشعوب الحرة اللي محترمه نفسها اما ناس متخلفة نعملن ديمقراطية متل ما صار عنا وقت ناس كتير ببيعو اصواتهم مشان 100 دينار هدول جماعه حرام نخليهم يمارسو الديمقراطية انا لما كنت بالجامعة تأذيت من جماعة الاخوان منيح ومن سلوكهم مع هيك مو حامل حقد وبحاول كون موضوعية فياريت تكون موضوعي:D |
اقتباس:
قلت من قبل انو كان في تيارات بالاخوان المسلمين كانت رافضة العنف واستعمال السلاح اهم هدول الاشخاص البيانوني نفسو والعطار اخوها لوزيرة الثقافة سابقا نجاح العطار.. هدول كانو رافضين العنف .. يعني الحزب مو كلو ايدو ملطخة بالدماء.. من جهة تانية كان في احزاب ذات صبغة يسارية بالمنطقة وكان الها ميول عنف متل المنظمة الشيوعية العربية بسوريا واللي منها هيثم نعال 27 سنة بالسجن و" فارس مراد" اللي توفى من اسبوعين تقريبا بعد ما امضى 29 سنة بالسجن |
اقتباس:
قلت من قبل انو كان في تيارات بالاخوان المسلمين كانت رافضة العنف واستعمال السلاح اهم هدول الاشخاص البيانوني نفسو والعطار اخوها لوزيرة الثقافة سابقا نجاح العطار.. هدول كانو رافضين العنف .. يعني الحزب مو كلو ايدو ملطخة بالدماء.. من جهة تانية كان في احزاب ذات صبغة يسارية بالمنطقة وكان الها ميول عنف متل المنظمة الشيوعية العربية بسوريا واللي منها هيثم نعال 27 سنة بالسجن و" فارس مراد" اللي توفى من اسبوعين تقريبا بعد ما امضى 29 سنة بالسجن |
المعنى الفكري و المعنى السياسي...
فكرياً ما بطيق الإخوان.. هيك كفكر و طريقة و أسلوب.. و بالضبط الفزلكة تبعيتهون (ع فكرة كلام مزبوط انو الاخوان كتنظيم هو تنظيم نخبوي من حيث كلهون الدكتور فلان و الدكتور علتان.. شي دكتور طب و شي دكتوراه, و بعدين عندك المناصرين و الأتباع بس هدول على هامش التنظيم) الفزلكة تبعيت نحنا فهمانين و نحنا هيك و هيك.. و وقت يجي واحدهون يتفزلك ع ربي وقت يصير الحكي عن الحريات (لأنو عندهون مفهوم الحرية كتير مفصّل ع قياسهون و قياس فكرهون) و يحكيلي وقت اعترض ع حكيهون انو "انت لساتك شب و كتير مفتون بالغرب و حرياتو الناتجة عن الانحلال :?" (السمايلي المندهش ناتج عن انو اللي عم يحكي صرلو أربعين سنة عايش بفيينا و لندن و باريس و لو تنزلو هلأ ع مدينتو بسوريا يضيع فيها:lol:). أي, قلنالكون انو ما بطيقهون فكرياً.. شو كمان؟ الأحداث اللي صارت أول التمانينات و هيك يعني... صار فيها دم كتير... و يعني بصراحة هنن قتلوا و انقتللهون, ماقصّرو ببعض الشبيبة و ما راحت غير عالمساكين اللي كانو بنص النار بين الطرفين, و هنن أثبتو انو حاملين دم هالناس و ماشيين فيه مزايدة و علاك من وقت ما رضيو يتحالفو مع واحد اسمو عبد الحليم خدام (اللي كان واحد من أهم أربع أشخاص بالحكم وقت صارت الأحداث) فيعني كتير انتهت صلاحية حجة حماه من وقتا. لكن... في يوم من الأيام لازم تنحط "نقطة انتهى" من الطرفين, هنن جزء من هالشعب السوري حبينا أو لأ (لأنو للأسف الشعوب ما تتفصّل على مراقنا), و مش أول مرة تصير محاولة تقرّب يعني و هالأمر معروف... أما حكيهون عن الديمقراطية ... فشي كوميدي عالآخر.. يعني البيانوني مفكر حالو ابراهام لينكولن لأنو عامل لحية متلو :lol: هاد بما يخص اخوان سوريا... اللي هنن (لازم ما ننسى) جزء من التنظيم العالمي للاخوان المسلمين اللي جزء منهون اخوان مصر و الأردن ( اللي مافي مشاكل معون بما يخص الحكومة السورية انما العكس) و حماس و الاخوان المسلمين الفلسطينيين (و ما أدراك ما حماس). أنا متوقع صراحة انهون في لحظة ما رح يرجعو, و ازا ظلت الأمور هادية أنا شبه متأكد انو رح يرجعو و كتنظيم اسلامي (يجوز ينجبرو يتغيّر اسمون أو شي من هالقبيل).. يجوز مو حزب سياسي, يجوز شبكة جمعيات أو شو ما كان, و ضمن صفقة و اتفاق واضح.. و اعتقد هالشي لسبب بسيط هو انو الاخوان هيك بشكل عام (بكل العالم الاسلامي يعني) مخهون تجاري و يحبو الهات و خود (يعني ع قولة غروتشو ماركس اللي حطينا موضوعو بالسقيفة من كام يوم: هذه هي مبادئي.. إن لم تعجبك فعندي غيرها), و يجوز منيح يكون في تنظيم اسلامي ذو علاقة وطيدة مع الحكومة لاحتواء المد الاسلامي اللي موجود و واضح للعيان... لأنو عدم احتوائو خطير جداً بعتقد... و جماعة صغيرة تابعة للقاعدة أخطر بكتير من كل اخوان سوريا اللي هلأ كلهون ختايرة مشحورين و ما عندون لا قاعدة شبابية و لا عندون أي قدرة على "الشغب"... أي و هاكازا :D |
| الساعة بإيدك هلق يا سيدي 10:44 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون