|
كمشة عطر(زجل)
صباحكن عطر
هلق انو ليش كمشة عطر ؟؟؟؟ لانو الزجل عطر الشعر الطبيعي مو الصناعي لانو لما بتكون موهوب فيك تكتب متل ماانت يعني مافي داعي تبحبش بالمعاجم على كلمة تناسب المعنى والقافية بتكتب متل مابتحس ضمن اوزان معروفة ومنحطها شي يوم بموضوع ولانو انت بتحب باللغة العامية وبتتغزل باللغة العامية وبتحب ضيعتك او مدينتك باللغة العامية منكتب زجل باللغة العامية وهلق رح نفتحلكن قنينة عطر من شغل خليل روكز وهوي شاعر من لبنان عشق الارز ولبنان وسما تنين من اولادو التلاتة واحد ارز وواحد لبنان والكبير ع اسم العيلة روكز خليل خلق سنة التنين وعشرين ومات سنة التنين وستين وبيناتهن عمل حدعشر باقة عطر منهن ابن الحرمان كفر وايمان دموع الطير هند وجميل من ارق واجمل شعر الغزل وسكب وجدانو عطر صافي بهالباقات وكمان كان شاعر منبري وطلاتو على جوقاتالتحدي كانت تخوف خصومو وعنو قال زغلول الدامور بحفلة بيت مري (اجا روكز على المنبر تمرد تمردسيف عم تلهب شفارو) وقنية عطر اليوم عن حبيبتو لما قصت شعرها وعنوانها (شعرك المقصوص) قصيدة شعرك المقصوص شعرك الكان يلفّني وينام .... لفّة عيون الطفل بالأحلام ومنو لحالو كان يتخصّل ...... خصلة خديدية وخصلة حرام واغفى , وشعرك يسهر عليي ...... وبغفوتي يسبل عَ عينيي وأوعى ولفّو بين ايديي ....... متل الملاك بتخت ريش نعام ولمّا كنت اصحى من الوهلي ..... وجدّلك بالعتم عَ مهلي وجدايلك تضحك وتندهلي ....... وتقول خلصّني من الإعدام بيظهر عرف شعرك رح تقصّيه ..... وكان يندهلي تا أشفع فيه وما في الو غيري , أنا مربيه ...... وبيني وبينو فرّقو الأيام وأنتي ضميرك بالعمى موصوف .... ومتلك الحلاق ما بيشوف وصار شعرك متل شي خاروف ...... عم يحتمي من الديب باللحّام ... وانت يا حلاّق بدعي عليك .... نشالله بينقل هم قلبي ليك أصعب ما تعمى وييبسوا ايديك ...ويصير عمرك مدرسة أوهام كيف لك قلب تقطع أمل عمري؟ ..... وانتي يا أم الأملس الخمري فطمتي طفل رابي على غمري .... تا تعيشيه عَ سفرة الأيتام كيف المقص الفوق شعرك مرّ ؟ ...طاوع ابن أدم عَ فعل الشر ويا هلترى مطرح ما شعرك هرّ ؟ .... ما انفلشت حكاية من الالآم هيدي حكاية من دموعي البكر ... البقيو من عيوني بشعرك ذكر هودي نقط من شمع قدس الفكر .... هودي ألف قاموس استفهام ... بعدو معي منديلك الأصلي ... بكرّمو , وبعاملو بأصلي وتا يضل يبكيلك , ويرقصلي ... من شعرك البيحّن عَ وصلي انكان عندك بعد شي خصلي .... ابعتيها ذكر للمنديل حتى يشبّع جوعتو وينام . ------------------------------------------------------ بتمنى تعجبكن وموعدنا قنينة عطر جديدة |
ايييه شو هاد شو
قلتلّي ما بدك قواميس ومعاجم لكن , بدل ما كنت تركض ورا الكلمة وتفتح المعجم لتعرف وين حطك الشاعر , صرت بدك تركض بدنيا اللغة العامية الخصبة وجملها وتراكيبها المعتقة , وعب منها كاس ورا كاس تا توصل حدود السما وأبعد من حدود السما الشعر العامي واللي هوّي بالأول بالأخير شعر شعر , بكل ما يعني الشعر ,لا وكمان شعر ومكفي , وبتصور كان ألو دور كبير بتطور الشعر الفصيح من الناحية اللغوية البنيوية و وبالأخص شعر الزجل اللي منتشر بكثر ة في لبنان وفلسطين وسوريا وبالأخص بالمناطق الجبلية , متل جبل الحلو ووادي النضارة وجبل العرب و ويمكن اقتبس جمالو وغناه من جمال المناطق المنتشر فيها , وبتصور نحنا كشعب سوري هاضميلو حقو لهالشعر بشكل كبير وياريت أخي طوروس " صحيح بالمناسبة بجبل طوروس ما عندي علم يا ترى ياطوروس بيستخدمو الزجل" إذا في عندك تسجيلات ممكن تنزلنا غياا لنستمتع بطريقة إلقاء الزجل الفريدة , والقدرة الهائلة عند الشعار على الإرتجال ومشكور كتييير على هالموضوع وياريت ما توصلنا بنص البير وتقطع الحبلة فينا , أو تشربنا كاس وتسكر القنينة بالفلينة وتحياتي |
مشكور عالتقديم الحلو والي بمحلو .. وعالقصيدة الي بال الزجل عطر بيعرف محلو:D
|
الاخوة مجنون واخيليوس
بتمنى تكون مشاركتي عجبتكون خيي مجنون كل شعب بالعالم عندو زجلو من جبال طوروس حتى سيبيريا حتى كيب تاون الزجل بيكتب حياة الناس اليومية وبالنسبة لانو تشرب الكاس وسكر القنينة مارح سكرها طول مافي حدا مستمتع بهالكاس وذا خلصت منفتح كرتونة واذا خلصت الكرتونة منفتح المقشش والكركة شغالة واما (وادي النضارة ) هالاسم مو بالجغرافيا السورية والتسمية اجت لما المصريين احتلو سوريا بستينات القرن الماضي اسمو وادي النصارى وطبعا بيتمتع بالنضارة بس الاسم اسم والوصف وصف ارجو اخد العلم اخيليوس الشاعر مو بس اللي بيكتب الشعر الشاعر اللي بيشعر بحلاوة الكلمة شكرا لمرورك العطر |
اقتباس:
|
مرحبا من جديد
اشتهر شعار الزجل بالاارتجال وكتير من المواقف الطريفة كانو يعبرو عنها بردات زجل سريعة وقصيرة بس بتحمل معنى المناسبة كامل وفي شاعر اسمو طانيوس عبدو مجوز بنتو ببيروت وبنتو ولدت عروس وسمتها بربارة وبعتتلو برقية تفرحو بالخبر وكتبتلو ------------------------------------- بربارة الله يعيشها ونجوم الليل تناغشها انشالله بتكبر وبتصير جيبة جدا تفتشها _________________________________ بيرد عليها عمنا طانيوس ببرقية وبيقول --------------------------------------------- هزيلا بالمرجوحة وانبسطي بخفة روحا ولاتتعذب بالتفتيش جيبة جدا مقدوحة واليوم رح نفتح قنينة عطر كمان عليها توقيع خليل روكز حتى نوفر تعريف بالشاعر_____________________________ واسم القصيدة مقبرة --بيحب وحدة وبيطلبلها الموت بس ليش ؟؟؟خلينا نشوف سوا ---------------------------------------------- ما زال رح تبقى عاحبّي مكبّره وما زال ما في عفو عند المقدره انشالله تموتي وما حدا لدفنك يجي وقيمكْ لوحدي ووصّلك عالمقبره وصدفِه ان إجا إنسان تا يحملْ معي بقلّلو تْركْني وبالوصيِّه بدّعي من ميل* تحت النعش بخفي مدمعي ومن ميل وحدي بكون حامل جوهره وكل فشخه** كنتْ بقعد بستريح بْزيحْ الغطا وبِتأمّل بوجهك منيح وبسقي شفافك من عطش قلبي الجريح وبطلب من عيونك شفاعه ومغفره وكل ما ارتحت ورجعت قيمك من جديد بصير صلّي تالقبِرْ يبقى بعيد منشان إشبع والنعش يشبع نهيد شبعِةْ أبد حامل بنعش الآخره وغنّي فراقيات وسنيني الكتار يدوبو عاداير نعشك الأبيض غبار ونوقع أنا والنعش آخِرةْ النهار وقعِةْ إبن مريم عا درب الناصره وبرجع بقيم النعش عن أرض الهموم وبشحد شوية عمر من عمر الغيوم وبعود إمشي هون أوقع هون قوم وضيّع نهاري بالمشي وعند الغياب نوصل أنا وإنتي سوا عالمقبر ---------------------------- اي حتى يوصلو سوى ع المقبرة انشاء الله تعجبكن وموعدنا قنينة عطر جديدة |
حلوة البديهة الحاضرة, خاصة بالشعر ..
|
اخيليوس عنوان للمجد انكتب ب الياذة الهوميروس بحروف الدهب متل النسر لو طل فوق المعركة بتصير طروادة تحت شفرة لهب ------------------------- بشكر مرورك |
كتر منهم عمي كتر متابع حتى المقبرة
|
انشاالله ياسام بعيد عنك هالمكان بكتب زماني وبستعر فوقو زمان حتى تطل علا قناني معطرة شي مية عام وفوقهن وردة كمان بشكر مرورك |
طوروس يلي شذاك عطّر منتدانا
هواك نسّم وطابق عاهوانا تسلم لقلبي يا قمر طالع ويا شمس شرقت تاتنور سمانا |
جوابك مرهم يبلسم جروحي بهيك فكار رح ابني صروحي ان كان المنتدى بالقلب غالي انتو يارفاق رفاق روحي بشكر طلتك |
اخوان من كل البلاد اتجمعوا
أحرار يكرهوا الظلم ومنبعو كلمة حق تهد جبال وأبيات تحيي قلوب لو يسمعوا ------------------------- اعذرني يا خيي عادخولي لجنتك حاتم طي وأنا طمعت بضيافتك ان كان دخولي لعندك مزعج كتير سامحني وهي بوسة مني لوجنتك :D:D |
بطلتك ع جنتي بتزيد طيب انت ياشاعر المذوقوفكر النجيب وحتى مانبقى تقال ع باقي البشر جبلي رسايل خاصة ومتلك بجيب |
لا خاص ولا عام أصلا طلعو هالكم كلمة من عطرك وشذاك وهي اول مرة بكتب زجل بس بحب اسمعو
تحياتي الك ومتابع معك |
عَذبٌ هَذا اللحن ,. :D |
اقتباس:
يا خايف تثقل علينا بالفنون رجع الريشة تـ تعزف عالوتر شو ثقلكن؟ كحلة على رموش العيون |
قالو الي كل المرض حظ ونصيب
قلتلهن اصلو جفا قلب الحبيب ولو كان فيي كل اوجاع الدني دلكيني منيح عـ ديكي بطيب لو كان فيي كل اوجاع الدني دلكيني منيح وبجسمي اعتني واتدلدقي فوقي يا عمري وانحني قلبي انفطم بكير عن شرب الحليب وطلي وبعنقك شوشحي السلسال حتى يقمز من الوادي عالتلال تركت ديني وتركت اهل الهلال ولاحق صليبك ع درب هاك الصليب |
جولة حلا عمري بعيونك جالها
وسر.... المحبة من البراءة شالها المتلك انـرفت شالها بيوم الهنا بيضيع عمري تحت رفة شالها |
من منقولي ------------ ليلة على الشباك مسمرني السهر كان القمر جوعان شبّعتو نظر وقلت بلكي بالقمر بتطّلعي وبيلتقو عيوني وعيونك بالقمر ____________________ ومن قولي ----------- يابوسيلينا حروفك بتقطر حلا قول الشعر ياشريك تلتينو صلا انشاالله سيلينا نشوفها حد العريس وتكون واقف انت لاحول ولا _____________________ بشكر مرورك |
الجازة شغل اقدار لا حول ولا
مظبوط... بس في شروط تـ نقول (مبلا) يكون بيو من نسب نستاهلو وامو تحوف الف سجادة صلا |
وينك يا طوروس الجبل قدك
حامي الحِمى عَ حدودنا بعدّك سقالله نشوف الناس ملتمي عَ حد سيف المعرفة حدك ما هم خيي او ابن عمي نفس الفكر هالمدّني مدّك نهج وعقيدة وبعد منسمي تاريخ جدي اسسو وجدك نفس العدو همك متل همي نفس البلاء الهدني هدك لكن لابد تعود هاللمة ترد جمع الشمل ع مردك وبفرد وقفة تقوم هالامة تقلع بذور الشوك عن درب النضال ونزرع بدالن ورد عَ خدك |
مساكن عطر
شعار الزجل عادة بيكونو معرضين اكتر من غيرهن لمواقف مطلوب منها رد ارتجالي وسريع لانو الناس بتتحركش فيهن لتسمع هيك رد وبزمانو الشاعر اسعد السبعلي طالع بالبوسطة !!!!!!!!مينو اسعدالسبعلي !!!!!!!!!! مين مابيعرفو ياعمي هادا اللي قال ---------------------- عتّق عليك العمر ياطقمي الوحيد وانحلّ خيطك والفرج بعدو بعيد فكري لهمني بالمتاحف اعرضك بيشتروك وبشتري بحقك جديد ---------------------- قصيدة رائعة بيوصف فيها حالة طقمو اللي لازم يلبسو بمناسبة بسفارة من السفارات هلق اذا لقيتها كاملة بجيبها واذا حدا عندو هيي يشرف موضوعي بكتابتهاهلق منرجع يوم اللي كان الع بالبوسطة ع سبعل وقعدت حدو مرا من جيلو وقالتلو شبنا ياشيخ اسعد ----------------------------- بيرد عليها الشيخ وبيقول حاجي تقولي يابنت حوّا صرنا كبار وشعرنا ضوّا مهما التلج يعلا ع سطح البيت بيضلّ في نار ودفا جوا ------------------ وقنينة عطر اليوم رح نفتحها من عند شكيب موسى الصديق العزيز وماني متأكد انو بلاقي عندو قناني عطر لانو بالزمان اجتو هدية قنينة عطر فضاها وعباها عرق بلدي وبماانو شكيب شاعر والشاعر بيفصل اله ع قياسو وبيناتهن الفة ومحبة مزح وجد صحك وبكي ومرة شكبو راح مشوار خلونا نشوف سوا شوشاف وعنوانها سكرة -------------------------------------- مّرة ع سكرة طلعت صبحية صوب السما شوف شو عليي وقبل ماأدخل ع جناح الأب وقفت عند المدخل شوية شفت شوفة بترعب الآلباب منبع خمر من صدر حورية مثلث عاجمر جهنم اللهاب ومسحوب بالكركي السماوية وبتعرفُ أنو الطبع غلآب سألتها كيفك ياعينيي ومتل الكأنو نقص ملح وداب وبقيت وحدي فرفك بديي راحت وتركتني بأمل كذّاب وتقوم ارجع مابقا فيي وصفّى بعينيي النعيم خراب والله عليي سجّل خطية قلت لازم بعد كل حساب صفي حساباتي بصدق نية ورحت عاجناحو وقرعت الباب ولما انفتح باب الآلوهية شفت الإله وفي معو كتاب يعني متل ماتقول ذاتية قلي تعا لا تخاف ياحباب وقدمت أوراقي الثبوتية هوي لمح اسمي أخدني وغاب وشفت الخطايا كيف مدرية قلي ياشكبو بعد هيك غياب ماتركت عندي وراق فاضية عاكل حال رجاع عالمرأب خود سيارة على حسابي وجبلي معك دفتر خمسمية هادا كان مشوار شكيب موسى وموعدنا قنينة عطر جديدة |
متل ماالحياة مليانة بالمواقف الطريفة كان الزجل كمان لانو بيعيش الحياة يوم بيوم قصة صارت مع شحرور الوادي
كان عم يتمشى بالسوق وانقطع شريط صباطو دخل على محل قبالو اسمو محل الهاشم حتى يشتري شريطة بدل اللي انقطعت البياع بالمحل عرفو وقلو مابدنا منك مصاري اعطينا شي ردة رد عليه الشحرور محل الهاشك بالوادي عم بيصرخ وينادي بضاعة منيحة بسعر رخيص حق شريطة قرادي وبعد مدة من الزمن شاعر تاني مرق قدام المحل تذكر الشحرور وفات ع المحل وسأل البياع المرحوم اسعد كان بحياتو يشتري شرايط برداتو بعد لليوم بتبيعو ذات بالبضاعة وبالسعر ذاتو وهلق النا رجعة على قصايد خليل وهون خليل بيفوت على عمق المأساة الانسانية وبيصورلنا حالة يتيمة واجتها نكبة الطوفان وراحت تتخبا من الطوفان عند الجيران هلق الفيلم مو من اخراج ستيفن سبيلبرغ ولا المرحوم الشهيد مصطفى العقاد الفيلم من اخراج شاعر زجل مكتوب على هويتو الشهادة التي يحملها( امي ) خلونا نتفرج ع يتيمة ربيت يتيمة بكوخ متواضع حقير ......... وغير الله ما لها عون ونصير تغزل وتلبس من شغل ديها تياب ......... وأحيان تعتاز العصاية من الضريروكل شي مضي عليها شقى وهم وعذاب ......... قانعة ومستسلمي لحكم المصير بعمر البدر متل الندي بقلب العشاب ......... بيشهقلها الزنبق على حفافي الغدير وليلة شتي وع الكون غضبان السحاب ......... والأرض صارت تحت أمر الزمهرير وكوخ اليتيمة من الشتي والرد غاب ......... والمي طافت ع الفراش وع الحصير جنّ الهوا وبالكوخ ما خلاّ بواب ......... والحيط فسّخ والسقف بلّش يطير والبنت تبكي والهوا يزق الخشاب ......... وتقول يا ربّي لا تقطع بالفقير ترجف يتيمة وما بقى إلها ركاب ......... تقيمها، وصارت تنادي وتستجير هربت من الكوخ لحقوها الدياب ......... وع الدرب صارت بالغصب عنها تسير قطعت أملها وقلبها من الخوف داب ......... وصار الخلاص بعينها حبلو قصير وصارت تصلّي بقلبها ت الرب جاب ......... للديب رحمة وهوّن الأمر العسير خلصت بأعجوبة من صحاب النياب ......... ودخلت ع جنّة صاحب البيت الكبير للخيانة البنت ما عملت حساب ......... والجار عند الجار بيأمّن كتير علقت متل عصفور بمخالب عقاب ......... ومن توب عفّتها انسحب خيط الحرير وهون انطفى الحيا والوعي غاب ......... واستفرس المارد على الطفل الصغير تصرخ يتيمة، ومين بيرد الجواب ......... ليلة جهالة وغافية عيون الضمير وين المربّي البعد منّو الطهر ساب ......... ووين إيد الـ كانت تهز السرير شَعر الأمانة بإبن 14 شاب ......... وشَهد الشهامة صار حنظل بالقفير وانتحرت العفّة بكفر طيش الشباب ......... وطهر الفتوّة صار للذّة أسير وينك يا الله ليش ما بتعمل حساب ......... إنت الـ وعدت الكون باليوم الأخير حَلّها تطلع الشمس من بعد الغياب ......... وحَلّك بقى من الأرض تسحب هالسفير هالكون لازملو خراب وانقلاب ......... شو بعد ناطر لازم تدق النفير بلا مواخذي لملم بقايا هالكتاب ......... ولو سألتني شو صار؟ ببقى بجاوبك أكتر من الـ صار شو بدّك يصير |
هلق يا بنتي بيت بيّك ودعيــه تقضي الشـرايع تتركينا وتتركيه واتمنطقي في حلة الطهر الصحيح وراسك بإكليل المفاخر زينيــه واتمنطقي في حلة الطهر الصحيح والراس يتكلل باللطف والعقل الرجيح كوني لزوجك متل ما قال المسيح اتـركي امـك وبيـِّـك واتبعيه اتركي امـك وبيـِّـك والجميـع كوني مطيعـة ربنـا يحب المطيع واتنشقي شـمات زهرات الربيـع لا تعبثي ان جـار الزمـان تحمليه لا تعبثي ان غـمّ زمانك وصفا امشي بطولة بـال عادروب الوفـا زوجك يا بنتي لا تحاكيه بجفـا كرّمـي لـو أهـل بيتـو وكرميه كرمي لو أهل بيتـو واسـلكي معهن بعطف ولطـف وقلـة حكي واذا حدا خلقو طلع لا تنتكي كوني شــهيمة رايقة لا تجاوبيه كوني شهيمة والشهامة بتنعرف من حاد عنها الدمع من عينو ذرف زوجك شي يوم اذا من مالو صرف مش متل غيرك تعملي وتناقريه مش متل غيرك تنحري وتتكبري عالكبر يا ما بتقدري تتدبـري إذا صابتك شي مصيبي تصـبري من صبـر بينال كل اليبتغيـه من صبر بينال من بعد الهـلاك مهما المصايب نصبت حـولة شباك كوني نقية طاهرة متل المـلاك لو كان عشب الأرض بدك تاكليه لو كان عشب الأرض زادك والطعام فوق منك رب عيونو لا تنـام عند الصبح صلي الأبانـة والسـلام بعد الصـلا تبقي كلامي تذكريه بعد الأبانة والصلاة قولي دليــل يرشدك عالحق والمبـدا الجميـل انتي وحبيبك بالهنا وعمر الطويـل بالمحبة، بالأمانة، بالوفا تعيشو سـوا ويدللـك وتدلليـه |
موضوع حلو ..:D
|
طوروس!!!!
وصلتنا بنص البير وقطعت الحبل؟؟ كمل وفتاح عطر جديد ناطرين |
شو حلووووووووووووووووووووووو وووو ...
|
لاحبة المشاركين في الموضوع اعتذر على التأخير في تقديم مااحببتم ولكن مايبرر هذا التاخير هو الانشغال
وليس الاهمال او الرغبة في اغلاق الموضوع ولاايصالكم لنص البير وقطع الحبل وبما ان الموسم الان موسم اعياد وهدايا ارجو ان تكون هدية الله للناس وقف مذبحة غزة التي لااراها بعيدة عن يوماتنا وارجو ان يتوقف سفك الدماء وخاصة الاطفال واما عن هديتي لكم فهي قصيدة بعنوان هدية للشاعر خليل روكز اسمعو هالقصيدي لي صار عمرا 58 سني يــاريت عنـــدي وأخ لــــوفيــّي ......... عاقـــد حبّـــي جبلك هــــديّي كنت بهديــكي شــــذا الــوردات ........ وأســرار أحــــلام الطفوليّي وكنت بتعمشق على النجمــــات .......... بسحّب شلل خيطـان فضّيّي وبكــلّف ملايــــك وحوريّــــات ....... .... تحيكلك بـــــــلوزة ألوهيّي ******* وبالبحر كنت بغافل الســــمكات .......... وبغطس متل فكر الحراميّي وبقطف زبد من رغوة الموجات ..........ومن جـــدايل شمس مرخيّي بكمّش وهــج وبحوّلو بوســــات ......... بلون أشـــواقي المــــورديّي ومن هون ببعتها مع النســــمات ......... لهونيك لعيونك خصوصيّي ******* والطفل كنت بقشّــطو البســمات ........ وبغرف من عيونو صفا نيّي وعرس الربيع بشلحــو الغنجات ........ وكل شي معو لهتات عطريّي وبكلخ من جفون السـحر دمعات ........ كلّهــــــا غيــــــره وحنّـــــيّي وبلفّهـــــا بعيــــون خمريـــــّات ........ وبــــروح حـــافي سلمّك هيّي ******* ومن كل طير بنتّف الريشـــات ........ وبفلش طـــريقك ريش حريّي وعالمروج بســــــابق النحلات ........ بجبلك ضميـــر زهور بكريّي وبطير مع أحـــلام وخيــــالات ......... عابــــلاد مدري ويـن مبنيّي بجـدلك من ســـوالف الغيمــات ........ مرجـــــوحتك عاكتاف جنيّي ******* وبغزلك شراشف من الهمسات ......... وحـــرام من قلب النعــوميّي وجــودلي من السّحر ومخدّات .......... من شـــعر آلهــــــة الفنيقيّي وبرش عاعيونك هنا الغفـوات .......... المحـــروم منها حـظ عينيّي وخلّي الحــلم يحكيلك حكايات .......... عن حــالك لحالك غــراميّي ****** هيهات لوعنــدي حــلم هيهات ......... عاقـــد ماعنـــدي أنـــــانيّي بحـــّولك إنتــــي أنا بــــالذّات ......... وبلبّســـك روحي الطبيعيّي لكن إذا فشــــــلو التّمنيّـــــات .......... وعمري اسـتسلم للعبوديّي بترك إلك منّي تـــلات كلمات ......... (محبّــتي والآخ والنهدات ) .................... من القلب هالبيحبـــّك هديّـــي ............................................. أبــــــو روكــــــــــز |
اقتباس:
|
بتبلش بكلمة وبتخلص بكلمة الكلمة عمود- الكلمة دنيا كاملة ومن هيك بيقول الشاعر عصام يوسف ______________________________ حلّك يا أدم تسمع الكلمي بعرفك خاطي على عِلمي مش عيب تسمع حيّة الرَقْطه و تخطى ... الخطيّة بتعملك زلمي مش عيب تسقط عَ الأرض سَقْطه و تبقى الجَنّة حلمك و حلمي..؟!!!! من فوق... بتشوف الأرض نقطه و من تحت... بتشوف السما كلمه ------------------------ والشاعر انطون سعيد بيحب وبيشوف الحب مصور بعيون الحبيبة وبيقول ___________- شفت الحب بعينيكي مصور تصوير طيور الحب حواليكي ترفرف وتطير تفاحة خدك جمرة وريحتها طيوب لاقيني بليلة حمرة ملياني ذنوب نكاية بحبك يا سمرة العشي بي توب شدي عليي بالغمرة ما عدت زغير سامع صدرك بي قلي فيي موعود حاجي اسعارو تغلي بيبكي العنقود جايي لكرمك تا ملي عناقيد السود كرامة حبك لا تفلي جوعان كتير جسمك الوانو ماجو ابيض دباح ولقلبي عرفت علاجو والفكر رتاح جسمك بينتي عاجو وبلوز انزاح صدرك هاجو امواجو والبحر كبير شفت الحب بعينيكي مصور تصوير طيور الحب حواليكي ترفرف وتطير |
قصيدة شعرك المقصوص __________________________________________________ ________________________________شعرك الكان يلفّني وينام .... لفّة عيون الطفل بالأحلام ومنو لحالو كان يتخصّل ...... خصلة خديدية وخصلة حرام واغفى , وشعرك يسهر عليي ...... وبغفوتي يسبل عَ عينيي وأوعى ولفّو بين ايديي ....... متل الملاك بتخت ريش نعام ولمّا كنت اصحى من الوهلي ..... وجدّلك بالعتم عَ مهلي وجدايلك تضحك وتندهلي ....... وتقول خلصّني من الإعدام بيظهر عرف شعرك رح تقصّيه ..... وكان يندهلي تا أشفع فيه وما في الو غيري , أنا مربيه ...... وبيني وبينو فرّقو الأيام وأنتي ضميرك بالعمى موصوف .... ومتلك الحلاق ما بيشوف وصار شعرك متل شي خاروف ...... عم يحتمي من الديب باللحّام ... وانت يا حلاّق بدعي عليك .... نشالله بينقل هم قلبي ليك أصعب ما تعمى وييبسوا ايديك ...ويصير عمرك مدرسة أوهام كيف لك قلب تقطع أمل عمري؟ ..... وانتي يا أم الأملس الخمري فطمتي طفل رابي على غمري .... تا تعيشيه عَ سفرة الأيتام كيف المقص الفوق شعرك مرّ ؟ ...طاوع ابن أدم عَ فعل الشر ويا هلترى مطرح ما شعرك هرّ ؟ .... ما انفلشت حكاية من الالآم هيدي حكاية من دموعي البكر ... البقيو من عيوني بشعرك ذكر هودي نقط من شمع قدس الفكر .... هودي ألف قاموس استفهام ... بعدو معي منديلك الأصلي ... بكرّمو , وبعاملو بأصلي وتا يضل يبكيلك , ويرقصلي ... من شعرك البيحّن عَ وصلي انكان عندك بعد شي خصلي .... ابعتيها ذكر للمنديل حتى يشبّع جوعتو وينام . ------------------------------------------------------ بتمنى تعجبكن القصيدة الاواى من شغل خليل روكز وهيي كانت اول قصيدة بالموضوع وحبيت عيدها لانو انكتب هيي وقصيدة مارون كرم بنفس المناسبة وحدة من شلتهن قصت شعرها وحبو يتبارو مين بيكتب قصيدة احلى بالمناسبة وبقدملكن قصيدة مارون كرم شَعرك الـْ كان يلفّني ويْنـامْ ويطير فيِّي بْجانِح الأحلامْ ياما نْظَمْتِلُّو قَصايِدْ بكْر ما خطّها شاعر وَلا رسّـامْ شعرك الأشقر متل ضوّ الشّمْع هالْكان يلمـَع بالليـالي لمْـع ياما ويـــاما مْحَمِّمو بالدَّمع ومْمَّشّـطُو لِلْخَلْف وِلْقَدَّامْ كنْت مِنّو لِعِبْ ما إشبع لِفُّو عَ إيدي مَقْطَعْ ومَقْطَـع بالكون كِلُّو شَعر ما بقْشَع ياحبـال شمس مْخايْلِة عَ رْخامْ قدَّيْش بدَّا تْنوح الِمْخدِّة ! الـْ هامِتْ بشَعرِك هالحلو قـدِّي وقدَّيْش بَدُّو يِفِقْدو خَدِّي اللِّي فضَّلو عَ ألف ريش نْعام وقدَّيْش بدّو التَّخت يِتْذَمَّر لمَّا بْيعْرِف شَعرِك تْقَصَّر وقدَّيْش بدَّا قْلوبْ تِتْحَسَّر لمِّنْ رح تْطِّلِّي بِهالْهِنْدامْ كنتي إذا بْهالحيّ رِحْتي شويّ تِعِمليلي مْظاهَرة بالحيّ: هايْدا يْصَرِّخْ آخ، هايْـدا خيّ هايْدا يْرِشِّكْ ورد هايْدا خـْزام وْهايْدي تْناقِرْ جَوزْها المَفْجوع هايْدي تْهَدِّي إبنْها المنزوع وْهايْدي تْشارِع خيَّها المَوجوع لكنْ ِبشَرْعي ما حدا بْيِنْلام بِدْعي على الحلاق؟!، شو ذنبو ؟؟ معقول؟!، مُشْ معقول ما حبُّو ما قَصَّرو، ولا طاوعو قلبو لوما بْشِغلو للقرش خِدّام بِدْعي على التّمْدين، عَ الموضة؟ وْبِدْعي على أذواق مَمْروضة بِدْعي عَ عصْر النّور والفَوضى يِلْعَن أبو التمْدين والأيام .. الـْ مِنْ شَعرك المِشَّـقَرّ حرْموني وشالو حِلِمْ أخضر مْنِ عْيوني ولوما تْكوني شْويّ مجْنونِة مــا تْركْتِي مْقَصّ .. يِلْمُسْ لَمْـس .. الشَّعر اللي كان يلفّنا .. ويْنــــام. ---------------- وموعدنا قنينة عطر جديدة |
طه حسين هو عميد الأدب العربي، خرّيج السوربون، وزير المعارف في مصر وأشهر عميانالقرن العشرين وصاحب مؤلفات عدّة منها \"مع المتنبي\" عظيم شعراء العرب، أراد يوماًحين زار لبنان سماع الشعر العامي وتحديداً فن الزجل فحضر فجأة إلى حفلة كانت تقيمهاجوقة شحرور الوادي في المَعامِلتَيْن الواقعة على الساحل اللبناني وجاء فيها علىلسان الشحرور الردّة التالية:
ما بين جبيل وجونيه ** تكوّنتِ يامَعامِلتَيْنخَدتي التلت من عيوني ** ومن عقلي وروحي التلتينوحين دخولطه حسين مكان الحفل استرعى حضوره الجمهور والجوقة وهو المعروف جيداً من خلالنظارتيه السوداوين وطربوشه الأحمر الطويل فعلا هتاف الحاضرين أهلا وسهلا بطه حسين،عندها قال الشحرور وعلى وزن اللازمة: أهلا وسهلا بطه حسين ** ربّي عطانيعينينالعين الوحدي بتكفيني ** خدلَك عين وخلِّي عينوتابع الشاعر عليالحاج قائلاً: أهلا وسهلا بطه حسين ** بيلزملك عينين تنينتكرّم شحرور الوادي ** منّو عين ومنّي عينأمّا أنيس روحانا، وهو الشاعر الثالث في الجوقة،قال: لا تقبل يا طه حسين ** من كل واحد تاخد عينبقدملك جوز عيوني ** هديّةلا قرضَة ولا دينوجاء دور الرابع، الشاعر طانيوس عبده، فقال: ما بيلزملوطه حسين ** عين ولا أكتر من عينألله اختَصّو بعين العقل ** بيقشَع فيهاعالميلين |
:D:D:D كل الياسمين ألك
|
من اجمل قصائد الزجل قصيدة الشاعر زين شعيب وزادها رونقا اداء المطرب سمير يزبك
يا مين ع شحاد يهديني كرمال سر الكار يعطيني لا مال بدي ولا برزق طمعان ولا مقصدي ضيعه ولا مديني بدي عصا من قرنة العميان اتعكز عليها بتكفيني اتدروش وأمرق على الجيران عكل عتية ينحني جبيني ايه شحاد بشحدلك عاطفة وحنان للقلب لي ابتعد عني ونسيني بشحدلك كحلت الغزلان لعيونك لي فيهم قتلتيني بشحدلك من الورد والريحان حتى وين ما دعستي تأشعي زيني وببكي وببكي على مجنون ليلى مجروح والكاويه كاويني وبقصد على الأرزة مهد جبران وبقلوا ع سلمى دخلك اهديني تاشوف شو قلتلها قصدان من روح احلى روح غزيني لو كان قلبك من صخر صوان حله يلين الصخر وتليني راضي لا والله مش زعلان اعدام بقبل لو حكمتيني عشرط انتي تفصلي الأكفان وابقي ع قبري بالسنة مرة حسنة لوجه الله زوريني |
حلوة كتير يسلمو دياتك
:D:D:D |
ومن روائع الشاعر شكيب موسى قصيدة عن حال الشرق وعلاقته التبعية للغرب وركوعه على ابواب الدولار القصيدة بعنوان الاخضر الاخضر رح خّّّبرك ليش الشرق منهار وليش زندو قصر عن كّمّّّو وليش اللي كانو من البداية كبار صارو بهالأيام ميزمّو وليش اللي كانو صغار ضلو صغار وأكلوا الورد ببدل مايشمّو وليش الشعر ما انسّم بالأفكار ووحدو الهوا الشرقي اللي بيسمّو وليش الطفل وقت اللي بيوّ طار صار الشرق يسهر عند أمّو وليش الورد لما وقع بالنار ما عرف مين الامر بيهمّو وليش لما بيوقع الدولار كل الشرق بينخّ تايلمّو :D:D:D:D يسعد صباحك ياشام |
اقتباس:
يسعدني ان اقدم مايسعدك كل الصباحات الجميلة لك وللشام ولياسمين الشام :D:D:D:D يسعد صباحك ياشام |
ولشكيب موسى ايضا
وهيك الدني ما عاد يعجبني الحلا كلّو وتمرمر السكر على حلّو وبكرا انسألني تمك العطشان وينو عبير الورد؟ شو بقلّو؟ بقلّو انتهينا وكان ياما كان والمجدبدها نهايتو تذّلو ولا بد أنو يوصل الانسان ع الأرض مهما جوانحو يعلّو ولا بد أنو يآمن الشيطان ويرجع ل الله ويسكن بظلّو ولا بد أنو يكفر الايمان وينسو صحاب المعبد يصلّو وهيدي الدني سكانها ألوان من غسيل الشمس بيحلّو :D:D:D:D يسعد صباحك ياشام |
جميل وكأن أذني حاراتنا القديمة
لقد طربت هنا جدا وكم أتمنى أن أفتح لك بنفسي قارورة عطر جديدة |
| الساعة بإيدك هلق يا سيدي 06:53 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون