|
العمل التطوعي
كيفكون اخواتي اليوم حابب انو اخود رئيكون بشي اسمو العمل التطوعي هلق كتعريف بسيط العمل التطوعي هو ايا عمل دون مقابل مادي شخصي يهدف لمصلحة المجتمع متل ((( حملة التشجير , الهلال و الصليب الحمر , حملات التنضيف للسواحل )) طيب انو هالشي كتير حلو بس انو ليش معدومين بمجتمعاتنا يعني ولا مرة حسيت بواجبي انو قوم بعمل تطوعي انا عما احكي عن حالي انو ايا ابو وليام بذاتو ولا مرة حس انو عندو واجب القيام بعمل تطوعي (( انو شو يابا بدي ضوع وقتي المهم على شي فاضي )) طيب هالحالة طبيعية و بتمنى من الشباب و الصبابا المشاركين بشي جمعيات فيها عمل تطوعي يخبرونا عليها بركي هيك يمكن لأنو نتحسوس على حالنا و نفكر نتطوع بشي شغلة :deal: |
بس لنلحّق اعمالنا المأجورة وحياتك ما منقصّر بس مين عندو وقت؟؟
هاد الحكي باوربا بأمريكا.......بالبلاد الشبعانة |
أنو العمل التطوعي ببلادنا متل الضحك على اللحى (( وهاد ما انتقاص من قيمتو لا بالعكس العمل التطوعي كتير مهم وكتير اخلاقي )) بس للاسف يا أبو وليم ما عنا وعي اجتماعي مرافق لهيك عمل يعني عملنا مرة عمل تطوعي لتنضيف حي من الاحياء , أنو نحنا مبسوطين حاملين هالمكانس وهل الرفوشة ومازلين تنضيف بهل الشارع بيجو واذ ما منشوف غير ابن حلال بيجي لمحل ما منضفين وبكب زبالة بيتو وببابتسامه منتصرة يعني هاد بحد ذاتو ما بخليك تكره رب العمل على رب التطوع.
شغلة تانية بحملة التشجير (( عمل تطوعي )) بتكون شي زارع الشتلة بيجيك ولد صغير البرائة عم تشرشر منو بيشلع هالشتلة من محلها ليشبع ثقالتو وبيركد ورا رفيقو ليضربو فيها , حرام بدن يلعبو الولاد واسا بتقلي عمل تطوعي |
انا
مع وأؤيد وشخصيا مشترك باحدى الحركات التطوعية وصرلي سنة كاملة على هاي الحالة مافي احلا من العطاء المجاني .. صدقوني ما في احلى منه |
انا يا شباب كنت بأكتر من جمعية تطوعية
شيلوهن كلهن وخليني احكي تجربتي مع أهم جمعية وهي كتير مشهورة ... إنتسبنا بعجقة هالأفكار بالراس ... وخدمت لأكتر من تلات سنين متل الشطور بالنهاية تفاجات إنو إنتا بتشتغل مشان الإنسان وبالتراتبية الطبيعية اللي فوقك بيكون عم يشتغل مشان قصص تانية ... ع أساس حياد بتتفاجئ يعني .. ما عدت لاقي سبب للعمل ..ببلادنا حتى العمل التطوعي صار مقرف تحياتي الحارة ظل جيفارا |
اقتباس:
هاموش مو على بنا حكينا بالموضوع مبارح المسا |
اقتباس:
طب رح خبر عن التطوع شوي هلق كتير حلو وبتحس حالك عم تعمل شي كبير لما تقدم جهد تطوعي من قلبك وما حدا عم يمننك فيه وافضل محل لهالشي فعليا هو الهلال الاحمر وهالشي بين معون خلال حرب تموز وفيضانات الحسكة ومساعدات العراقيين وغرون كتير وفي الكشاف كمان ورح اترك لبنفسجة هي تخبر عنه اكتر هلق غيرون في شي يعني كلو جمعيات خيرية وس وفي منها للاسف مبنية على طابع طائفي بس برجع بقول انو اي حلو العمل التطوعي وبتحس حالك شغلة كبيري |
اممممممم .. الموضوع جميل ورح حاول اني اختصر ليش منبحث عن عمل تطوعي ؟ وأيا عمل تطوعي .. بيناسب كل شخص ؟ أول شي الحاجة .. يعني الأنسانية بحاجة لكتير من العمل .. في كتير ألم ومتألمين .. فقر ، حاجة ، جهل ، إلخ إلخ إلخ .. تاني شي القدرة .. يعني ببساطة الكل " مهما كان طاقتو ووقتو وقدرتو " يمتلك القدرة على مساعدة الآخرين تلاتة .. الشغلة بتصب بقلب بعضا وبترجع عالشخص بالنفع :) يعني فرح العطاء + التغيير في المجتمع ككل .. هادا كلو رح يرجع عالزلمي اللي عم يتطوع بنتائج إيجابية . . تاني شي أيا عمل تطوعي بيناسبك " بيعتمد على شو القضايا اللي بتهمك بحياتك : الشباب الطفل الضعيف ذوي الاحتياجات الفقراء ؟ قدي عندك وقت ؟ وقدي هالجمعية بتتطلب وقت ؟ " رح حاول ادرج هون بالموضوع المعلومات اللي بقدر جيبا عن التطوع بسوريا :D |
موضوع ممتاز بهنّي صاحبو عليه :D
العمل التطوعي من مقومات أي مجتمع سليم, يعني المجتمعات المتطوعة تلاقي فيها العمل التطوعي للأفراد خارج عملهون ذو المردود المادي تحصيل حاصل, كل واحد حسب وقتو و حسب استطاعتو, بينما عنا لسى هالشي جدا نايم, رغم بوادر مشجعة لنشاطات أهلية اجتماعية و ثقافية. بعتقد انو العمل التطوعي ما يحتاج انو تكون بجمعية أو بمجموعة و تلتزم فيها, مقوّمها الأساسي انك تعمل شي ايجابي للمجتمع, حسب وقتك و استطاعتك.. و حسب حتى رغبتك و ميولك و هواياتك طبعا بشجّع الجميع على التفكير بالعمل التطوعي كوسيلة دعم ايجابي للحياة الاجتماعية السليمة تحياتي :D |
رح أبدا الجمعيات اللي بتهمني :) واللي بيعنيلي جدا أني أدعو الاشخاص اللي عندن القدرة والوقت والرغبة أنن يشتغلو معن أسرة الإخاء السورية شعارها رائع : " من أنت هذا لا يعنيني .. أنت تتألم هذا يكفي " هي جمعية تهتم بمعالجة الأطفال ذوي الاحتياجات الخاصة ، تأسست في عام 1978 - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - برجع للموضوع :D |
يوم عن يوم عم يزيدو الاغنياء;) .. بس بنفس الوقت ماعم يقلو الفقراء .. بالعكس عم يكتروو .. لو كل شخص غني ببلد معين تطوع او طلع جزء من الي معوو لأي عيله محتاجه ماكان بقي فقراء وحتاجين بهالدنيا .. يمكن بالنسبه الو شي حقير .. بس لغيرو بتعني كتير .. أنا أكيد مع التطوع ببلادنا لانوو عدد المقتدرين والمرتاحين مو قليل .. فيهن يقضوو عالقليله على نص الحالات الي بتحتاج لمساعده .. |
متابعة ... :D
|
اقتباس:
بس انو هالحكي في الواحد يعملو هون و خصوصي في كتير وقت فاضي بدال ما الواحد يقضي 4 ساعات تلفزيون او 5 ساعات انترنت يقيم ساعتين هيك اقتباس:
منوقف ما بعرف بس انو هالاحباط الزايد هلق انا بكوني ما جربت اعمل عمل تطوعي مافيني احكي و نظر اقتباس:
طيب غابي شو استفدت من هالسنة شو عطيت و شو اخد منك ؟ اقتباس:
بشرتنا بالخير يا غالي بس انو هدول يلي عما تحكي عليون متل الغبرا ما فيك تخلص منون |
اقتباس:
طبعا غير الجمعيات الخيرية يلي هي بالاساس قايم على الطايفة او الحارة انو هي الجمعية لهدول العالم و هي لهدول و عما انتظر المعلومات :D اقتباس:
طيب انو مو الحق بهالضعف على الجمعيات او المنظمات نفسها أنو مثلا ما بيسوقو فكرت الجمعية بشكل صح ليقدرو يجذبو الشباب يعني الشباب عنا 3\4 وقتو فاضي بين الشدة و الشوارع يعني و لما تجي تقلون تطوعو لح يضحكوا انو شو يابا تطوع و شو هالحكي طيب هالشي ما بدو معالجة بالتربية او حتى بالتدريس و المناهج :D اقتباس:
كمبدئ و شعار بهني هالجمعية :D اقتباس:
هلق ام الروور خلطتي بين التطوع و التبرع انا عما احكي عن شي ما بينشرى بالمال متل زيارة لدار المسنين زيارة لأطفال مصابين بالسرطان . رحلة ل ذوي احتياجات خاصة يعني طبعا العامل المادي بهيك حركات كتير مهم بس كمان العامل البشري مو قليل :D اقتباس:
|
حلو كتير هاد من فترة قررنا انا واختي ناخد ولادها الى الحديقة ووقع اختيارنا على حديقة السبكي في العاصمة دمشق دخلنا واعدنا وعم يلعبو الاولاد ماشفنا غير سيارة على الاغلب للهلال الاحمر ونزلو منها شباب بنات وصبايا وفي اجانب كان جايين من بعض السفارات ليقموا بعمل تطوعي وهو تنظيف جميع الحدائق العامة مع الاطفال الموجودين لنقوي عندهم حس النظافة هي رقم واحد ورقم 2 اللعب مع الاطفال بالعاب مختلفة ودور حديقة السبكي هو اخر يوم سبت من كل شهر اذا عبالك خيي اب وليم حول |
زياد... طرحت موضوع كتير مهم..,
العمل التطوعي شي كتير مثري اجتماعيا وخطوه بالغة الاهميه بطريق التطور الاجتماعي العطاء هو الشي يلي ما مننتظر مقابلو والعظاء واجب ع يلي بيفكر ياخد يعني مو معقول انا ضل اتوقع من بلدي ومجتمعي ومؤسساتي اشيا وانا ما جرب حتى اني كونى جزء منها... انا صرلي تلات سنين في خدمة التطوع وكتير مرتاحه نفسيا هشي مابيتطلب مني اكتر من اربع ل- خمس ساعات اسبوعيات ساعات لي قبل كنت اقضيهن على اتفه الاشيا الاحساس انك بتعمل شي... بتساهم بشي وبتكون جزء من تقدم ونجاح شي، بيعطي الواحد طاقه ليكفي بغير مجالات... هي هيي الرساله الاجتماعيه يلي بتدق باب كل فرد فينا... |
هيدا سيدنا العمل التطوعي شي بيعبر عن حضاااااااارة.....رقي ....تقدم....انتمااااااااء.....ب شلون لو قلنا انه كل موظفين الدولة من طبقة الياقات الزرق (وهلأ البيض كمان)بيشتغلو هيك عمل تطوعي شنو الراتب يللي بياخدوه ما بيكفي للخبز والمي والكهربا ....وباقي شغلهن رايح عمل تطوعي...حتى الجمعيات الخيرية بتوفر خبز ومي للمتطوعين..بقى نفس الشي....يارفيق العمل التطوعي شي بيتحقق في مجتمع( الحرية مو الضرورة) يعني الواحد لما يشبع حاجاته الغريزية الاساسية ويحصل على الامان الوظيفي والمستقبلي مستعد يكنّس عواصم الوطن العربي...مجانا!!بس على راي جان جاك روسو(كيف تطلب من انسان الانتماء الى مدينة لم يذق فيها غير الجوع والظلم-كتاب العقد الاجتماعي)
|
طرح كتير حلو .. منبلش معكن
اقتباس:
رح احكي عن حالي .. انا من الاشخاص اللي بوصل ل 5 الشهر راتبي ولا حبة منو .. وعليي ديون ما هب ودب .. هاد بيعني اني مو مستوفي أعمالي المأجورة .. او بالاحرى أعمالي المأجورة مانها كافية الي ولكن مع ذلك هالشي ما منعني اني قوم بعمل تطوعي .. اولاً واخيراً هالعمل التطوعي ما بيستدعي منك تدفع أي شيئ من جيبك .. إنما يمكن هوي بحاجة أكبر لمجهود شخصي، بحاجة لقدر كافي من الاحساس تجاه هالشيئ اللي عمنتطوع للعمل من أجلو .. الجمعيات الطوعية لما قامت ما كانت بحاجة ابداً لأي دعم مادي من الأفراد، ولو أنها بحاجة كانت اندرجت تحت الجمعية الخيرية قبل ما تدرج تحت تسمية جمعية طوعية. اقتباس:
مانها مشكلتك ابداً انو طلع واحد بهيم وكب زبالتو او طلع ولد قليل ترباية خرب اللي انت عملتو، بالنسبة الي هاد الشي صحيح بيدايقني بوقتها لكن هالشي رح يخلي عندي اصرار اكبر انو استمر، واثبت لهالاشخاص الهمجيين ( هيك يفترض تسمايتهن )، انو مو هيك الحضارة. حابب هون اذكر مثال يمكن بعيد يمكن قريب لكن يفترض ذكرو .. مرة مرقت معي صورة لمحل "سوبر ماركت" كاتب على الواجهة : "لا تبصق على الأرض يا مواطن،فأرض وطنك تستحق أن تقبلها." هالجملة كتير بتحفزني عالاستمرار بالعمل الطوعي، وبتخليني اقتنع بزيادة انو العمل الطوعي كمان مانو بحاجة لجمعيات لتنفيذو، هالبادرة من صاحب هالمحل الي بكنلو أعظم درجات الاحترام بعتبرها عمل طوعي. اقتباس:
هلئ بدي احكي عن حالي شوي .. من ناحيتي تطوعت بكتير جمعيات منظمة وغير منظمة ( غير منظمة بقصد فيها انا ورفقاتي ) وبمجالات عديدة ( الطفل - الاسرة - المدينة ... الخ ) كانت البداية بسنة الـ 2000 طلعت انا ورفقاتي ( تقريباً 12 شخص ) بنشر سور على طريق بستاننا بضيعتنا هالشي يمكن تشوفوه عادي كتير لكن مع وجود اسباب كـ ( سرقات للمواسم بشكل كبير يعني عنا بالضيعة معروف .. فوت اهلا وسهلا .. وتاكل من عنا مية اهلا وسهلا .. وخود للحبايب والقرايب قد ما بدك لكن لا تاخد لتتاجر .. ما منحاسبك ازا اشتهيت لقرايبك - رفيقك .. الخ صندوق تنين عشرة تفاح او دراق او كرز مثلاً بالعكس .. مننبسط كتير ... لكن ما مننبسط ابداً ازا اخدت سرقة لتتاجر فيهن وهاد للاسف الي كان يصير من الهجانة "حرس الحدود" ) لهيك بعلم جميع مالكين هالاراضي عالطريق الموجود بين بيتنا وارضنا "طريق طوله حوالي 9 كلم" تم نشر هالسور على طرفي الطريق لمنع هالقصص هي .. او عالقليل لتصعيب المهمة، وبناء هالسور تم بدون أي تكاليف ( عواميد من أشجار الحور ومعروف عن الحور قطاع فرع منو بيطلع عشرة + قشر شجر الحور للوصل بين هالعواميد ) هالحملة اكلت منا شغل بحدود الشهرين، يمكن ما نكون قدمنا شي .. او ممكن نكون قدمنا شيئ بسيط جداً ولا يستحق الذكر، لكن انا بالنسبة الي بعتبرو انجاز عظيم جداً. اشتركت ب3 حملات لتنظيف نهر بردى بين أعوام 2002 و 2004 بالاتفاق مع السفارة اليابانية - والتانية مع السفارة الفرنسية - والتالتة رجعت مع السفارة اليابانية وقت حرب تموز بلبنان صار توافد كبير عنا عالضيعة من اللبنانيين كمان تطوعت بتأمين شوية مستلزمات يومية ( خبز - اكل - خضار - ملابس ... الخ ) لأجلهم مع رفقاتي وهالعمل كان بالتنسيق فقط مع مختار الضيعة ولا دخل لاي جمعية او هيئة حكومية بهالشي بالاضافة لتطوعي حالياً بعدة جمعيات طوعية بتتعلق بالأطفال والعجزة .. كان بودّي اعطيكن عناوين انترنت لهالجمعيات لكن للأسف ما عندهن مواقع، بلكي بحاول بوقت لاحق لأفضى شوي اني نزل نبذة عن هالجمعيات بالاضافة لوسائل الاتصال فيهن |
شو يا معلمين؟؟؟في مقص رقابة باخوية؟؟؟لتاني مرة ردودنا بتطلع مقطوشة؟؟كتبنا 12سطر ماطلع الا سطر واحد
|
مممممممممممممممممم ..
تسجيل متابعة ..لأنو انا كمان بدي اعمل عمل تطوّعي .. بس بدي عقّب عشغلة زغنوتة اقتباس:
هلأ هون مرسيل في عنا ضعف شوي بسوريا لانو في كتير بتهم الشباب وما ملاقينلا جمعيّات . يا أما الجمعيات بيكون مغلوب على امرا وما حدا بيعرف فيها متل الجمعية اللي زكرتيها .. انا بحياتي ما سمعان فيها .. رح تم متابع معكون .. ومع مرسيل اكتر شي .. بركي منلاقي شي شغلة .. تعقيب تعقيب .. انو احيانا بنلاقي شغلة كتير حلوة .. بس بتكون محصورة بالعاصمة .. وهدا سبب تاني .. تحياتي :D |
طيب هي شوية معلومات عن كم جمعية الجمعية السورية للبيئة Syrian Enviromen Association أهداف الجمعية - رفع وعي المواطنين بمسؤوليتهم تجاه حماية البيئة والتراث - خلق أجيال واعية بيئياً وتشميل مبادئ حماية البيئة في المناهج الدراسية. - إقامة شبكة اتصال وتعاون مع الجمعيات والمنظمات المعنية بالبيئة والتراث , محلياً وإقليمياً ودولياً . - إنشاء بنك معلومات عن الدراسات المتعلقة بالبيئة والتنمية المستدامة . مشاريع الجمعية 1- برنامج حماية نهر بردى ( أوقفوا موت بردى ) بالتعاون مع الحكومة اليابانية وأعضاء الجمعية السورية للبيئة ومتطوعيها والسكان المحليين وأعضاء السفارة اليابانية والجايكا .( 2002-2003 ) 2- مشروع الحديقة البيئية النباتية بالتعاون مع السفارة السويسرية ومحافظة دمشق ( 2003 - 2005 ) يهدف المشروع إلى إظهار التنوع الحيوي النباتي بحوض بردى والغوطة ومدينة دمشق القديمة 3- برنامج بناء القدرات بالتعاون مع منظمة Movi Mondo الايطالية يهدف المشروع إلى تدريب المتطوعين على القيام بمهمة مدربين بيئيين بالحملات والمدارس خلال الأنشطة والمشاريع البيئية ورفع مستواهم من الوعي والفهم البيئي الى درجة عالية 4- مشروع تنمية المجتمع الريفي في جبل الحص والمساعدة في تسويق منتجات النساء الريفيات في هذه المنطقة بهدف مساعدتهن اقتصادياً وتفعيل دورهن في عملية التنمية المستدامة في المنطقة 5- حملات التشجير ( حرستا - قاسيون - دمر - وادي بردى ) بالتعاون مع وزارة الزراعة والمراكز الثقافية ( اسباني - بريطاني - فرنسي ) وجمعية الهلال الأحمر , الاتحاد الرياضي العام , طلبة الجولان ,كشافة آجيا صوفيا " صيدنايا " , وجمعية المكفوفين , وأعضاء ومتطوعي الجمعية هدفت الحملات إلى إعادة إحياء الغطاء النباتي الحراجي في منطقة دمشق ومحيطها وتنوعها النباتي الطبيعي . وسائل الاتصال بالجمعية الجمعية السورية للبيئة العنوان : دمشق القديمة- جادة الحمراوي ( خلف قصر العظم ) ص.ب : 26022 دمشق - سوريا هاتف : 44677800 - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - |
العمل التطوعي
بصراحة يحتاج لروح الايمان بذلك العمل بالاضافة لأن العمل التطوعي اذا أخذ طابع الالتزام فلن يكون تطوعي وسينحرف عن مسيرته . هذا بالتحديد ما خلصت اليه من عامين في محاولة انشاء برفقة بعض الاصدقاء مجموعة تطوعية في غزة لماذا لايتم انشاء مجموعة تطوعية من أفراد واعضاء أخوية وهم على قدر من الكفائة والثقافة ؟ |
العمل التطوعي
بصراحة يحتاج لروح الايمان بذلك العمل بالاضافة لأن العمل التطوعي اذا أخذ طابع الالتزام فلن يكون تطوعي وسينحرف عن مسيرته . هذا بالتحديد ما خلصت اليه من عامين في محاولة انشاء برفقة بعض الاصدقاء مجموعة تطوعية في غزة لماذا لايتم انشاء مجموعة تطوعية من أفراد واعضاء أخوية وهم على قدر من الكفائة والثقافة ؟ |
اقتباس:
:D تحياتي الحارة ظل جيفارا |
العمل الطوعي
فكرتوا رائعه و حلوة كتير
عنا بالضيعه لي انا عايش فيها ولي صار عدد سكانها شي 15000 الف نسمة و عدد بيوتها زاد كتير بس عمال النظافة (تحية الهن) ضل عدد و كانو من عشر سنين يعني ما زاد العدد و البلدية بتقول انو ما في حدا بيرضى يشتغل بهالضيعه شغل عامل تنظيفات طبعا لانو المبرر انو اقل واحد معوا سادس بالضيعه عمروا ب 20 و الامية وما بعرف لشو ربط الثقافة و العلم بهالوظيفة المهم : انو صار في جماعة (اسمها اصدقاء قرية .....) و كلها من الشباب المحصلين (male-female( وبلشت الفكرة انو كل واحد بيحط سلة قدام بيتوا او قدام عمود الكهرباء او اي عمموود و بيزرع شجرة و وضع ملصقات ع الطرقات لنجعل بيئتنا نظيفة ..... او نحو شارع بيئي سليم و بالفعل تم نشر مقال بجريدة بلدنا عن هالنشاط و صار حركة تنظيف رهيبة بالضيعه مهندسين - دكاترة - طلاب- اساتذة- عمال - باطنجية - الااااااااااااااااااااا عمال النظافة قال ما بيشتغلوا خارج اوقات الدوام الرسمي المهم انا شاركت و صورنا كم صورة نحنا و عم انكنس و نزرع :larg: يعني فكرة العمل الطوعي رائعه و شكرا :D |
بداية بسمة إن انطلاق جمعية بسمة تم فعلياً في بداية عام 2005 حين بدأت مجموعة من الشباب والشابات بترتيب زيارات دورية إلى مشفى الأطفال في دمشق وحدة أمراض الدم والأروام (المركز الوحيد في سورية المعني بعلاج الأطفال المصابين بالسرطان) بغية تقديم الدعم المعنوي والنفسي والاجتماعي لهؤلاء الأطفال. سبق ذلك سنة كاملة من البحث وجمع المعلومات اللذين قامت بهما صاحبة مبادرة التأسيس رئيسة الجمعيةً ميّا أسعد سعياً للإطلاع على واقع هؤلاء الأطفال وأهاليهم وطبيعة ونوعية الخدمات المقدمة لهم في سورية، وللإطلاع أيضاً على تجارب دول أخرى كالمغرب واليونان ومصر والأردن ولبنان وكيفية تعاطيهم مع قضية هؤلاء الأطفال من منظور اجتماعي ونفسي وتنموي. وفي نهاية عام 2005 كان لدى الفريق رؤية واحدة وهي ضرورة إنشاء جمعية مستقلة تخدم هذه الشريحة... فكانت ولادة "بسمة". وقد اتخذت بسمة منذ تأسيسها منحى التركيز على الجانب الاجتماعي للمرض وأثره على عائلة الطفل المصاب نفسياً واقتصادياً، بالإضافة إلى الاهتمام بالجانب الطبي للمرض أيضاً انطلاقاً من حقيقة وجوب العمل على الجانبين من أجل ضمان حصول الطفل على علاج ورعاية مناسبين. أشهرت جمعية بسمة وهي أول جمعية من نوعها في سورية لدعم الأطفال المصابين بالسرطان وأهاليهم بعد فترة تحضيرية دامت سبعة أشهر في 18 نيسان 2006. رسالة بسمة تأسست جمعية بسمة للعمل على تحسين الواقع الصحي والاجتماعي للأطفال المصابين بالسرطان في سورية من خلال تقديم الدعم النفسي والمعنوي للأطفال وأهاليهم خلال فترة العلاج، كما تعمل على دعم عائلات هؤلاء الأطفال مادياً لتحمل نفقات المعالجة، ودعم وحد معالجة سرطانات الأطفال في سورية طبياً بهدف تحسين واقع الخدمات الطبية المقدمة للأطفال وتشجيع المبادرات المتعلقة بإنشاء وحد جديدة محلياً، ونشر التوعية المجتمعية حول مرض السرطان عند الأطفال. أهداف بسمة 1. تقديم الدعم المعنوي والنفسي والتعليمي للأطفال المصابين بالسرطان في سورية خلال فترة العلاج. 2. تقديم خدمات دعم مادية اجتماعية نفسية لأهالي الأطفال المصابين بالسرطان لتحمّل أعباء المرض. 3. العمل على تأمين الخدمات والمواد الطبية غير المتوفرة والكوادر الطبية المتخصصة في وحدات معالجة سرطان الأطفال في سورية. 4. نشر التوعية حول مرض سرطان الأطفال بين عائلات الأطفال المصابين بالسرطان وفي المجتمع ككل، وتعبئة المجتمع لدعم هذه القضية. 5. بناء علاقات تعاون مع مراكز معالجة سرطان الأطفال إقليمياً وعالمياً والجهات الحكومية كافة وغير الحكومية المعنية محلياً وإقليمياً وعالمياً. مقر الجمعية : بالمزة صندوق بريد: 124, دمشق, سوريا هاتف : 5087 البريد الالكتروني: \n - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - الموقع الالكتروني : - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - :deal: |
اقتباس:
|
الهلال الأحمر السوري
الهلال الأحمر السوري نشأته : تأسس الهلال الأحمر العربي السوري بموجب مرسوم جمهوري رقم 540 صادر بتاريخ 30 أيار 1942 بعد اتفاق مجموعة من الأطباء على تأسيس هذه الجمعية.وفي 20 حزيران 1946 أرسلت اللجنة الدولية للصليب الأحمر كتاباً إلى الهلال الأحمر السوري كتاباً بالاعتراف به دولياً. وبعد ذلك انتمى الهلال الأحمر بعد ذلك إلى اتحاد جمعيات الصليب الأحمر والهلال الأحمر. أهداف منظمة الهلال الأحمر العربي السوري: الهلال الأحمر العربي السوري منظمة إنسانية يشمل نشاطها الجمهورية العربية السورية ومركزها الرئيسي دمشق. ولها فروع في جميع المحافظات السورية. تتمتع بشخصية اعتبارية و استقلال مالي وإداري، وهي جمعية ملتزمة باتفاقيات جنيف، والمبادئ الأساسية وهي عضو في اللجنة الوطنية العليا للكوارث. شارة منظمة الهلال الحمر العربي السوري: هلال أحمر على أرضية بيضاء طرفاه متجهان إلى يمين الناظر وإلى يسار حامل الشارة. فروع الهلال الأحمر العربي السوري:
أبو رمانـــــــــة - شارع مهدي بن بركة مقابل سفارة الإمارات العربية المتحدة دمشـــــــق - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - 00963.11.3331441 أوقات الدوام الرسمية: يوميا من الساعة التاسعة صباحاً حتى الثانية ظهراً من الأحد إلى الخميس |
| الساعة بإيدك هلق يا سيدي 22:31 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون
