|
جمهورية البوكمال الصديقة تحت النار... سورية تشجب وتستنكر
سألني أحد الأصدقاء البارحة ما هي حدود سوريا من الشرق فأجبت العراق... قال لي لا انها البوكمال... لم أفهم أولاً مقصده لكنني استوعبت فيما بعد... أن حكومتنا تعاملت مع الأمر وكأن البوكمال جمهورية مستقله وليست أرضاً سورية...
لو لم تكن البوكمال أرضاً سورية بل كانت دولة مجاورة تعرضت لضربة عسكرية أمريكية ماذا سوف تكون ردة فعل حكومتنا العتيده... سوف تكون الشجب والاستنكار أيضاً... هل باتت أرضنا ودمائنا مستباحه لهذه الدرجة بفضل سياسة الصمود والتصدي المواجهة والممانعة؟ ماعلينا قلنا لنتابع الخبر والوضع الطبيعي لنتابع خبر بهالحجم هاد وجريمة بهالحقارة انك تحط على الفضائية السورية... حطينا على فضائيتنا المغوارة وبلشت تابع شريط الأخبار من أوله... أول خبر عن زيارة مولر "وزير خارجية الدنمارك" ...تاني خبر عن مولر .. تالت خبر عن مولر... الرابع عن مولر .. اتصورت للحظه انو مولر هو طارق بن زياد بعدين اتزكرت انو اهتمامات حكومتنا البطله بالسياسة الخارجية أولاً والشأن الداخلي يأتي في المرتبه التسعين.. المهم وأخيراً طلع خبر العدوان على أرضي ويلي راح ضحيتوا 8 شهداء منون طفلين ومرأه... صيغة الخبر وبكل وقاحه مصدر مسؤول يستنكر الاعتداء ويحمل أميركا المسؤولية... لأول وهلة انصدمت معقول هيك بس؟؟ استنكار ومصدر.. بس مصدر وبس استنكار.. وتحميل أميركا المسؤولية؟؟ ما أحلاكون والله مثلاً تحملو الشعب المسؤولية... انو وين الـ15 ألف عسكري يلي على حدود العراق.. ليكونو بس عم يحمو الحدود من اتجاه سوريا العراق ومحطوطين بس مشان ترضى أميركا "بحكم انو نحنا دولة الممانعه الوحيده بالمنطقه"... وين الشعور القومي ياشباب وين الكرامة والشرف... وين المضادرات الأرضية وين السلاح يلي صرلو عم ينشرا من أربعين سنة.. لك وين الأمن الحارق الخارق؟؟ أه عفواً هاد الأمن مهمتو بس رصد المتأمرين والعملاء في الداخل أما هيك قصص صغيرة مابيتدخل فيها... قبل ماحدا يقلي هي أميركا شوفينا نعمل... ضربتنا اسرائيل بعين الصاحب وخرسنا واحتفظنا بحق الرد وضربتنا بالكبر بالجزيرة السنة الماضية وخرسنا واحتفظنا بخق الرد والطيران الاسرائيلي وصل لفوق القصر الجمهوري باللادقية ونحنا محتفظين بحق الرد.... انو وبعدين؟؟ شو فرقنا عن أي دولة من دول الانهزام... الفرق الوحيد انو هدوليك مابينضربو نحنا مننضرب ومنخرس... المهم مافي ضرر لحق بأبراج سيريتل ولا بأبار النفط... الباقي عادي... مقترحات مشان ماحدا يقلي شو منقدر نعمل: التصدي لهالطيران يلي اخترق أجوائنا وللإنزل يلي صار.. تحديداً انو الطائرات كانت طائرات عامودية... خطين تحت عامودية يعني هيلكوبتر يعني مو F16 ولا F22 حتى نقول انو مضاداتنا مابتجيبا... والرد على أرضنا بتكفلو كل المواثيق والأعرفا الدولية... بس أكيد في سبب وجيه عند الشباب انو مانرد... قطع العلاقات الدبلوماسية مع أميركا وطرد القائم بالأعمال... الرد على الغارات الاسرائيلية المتواصلة ويلي استباحت أرضنا وشعبنا... الرد بدو يفتح جبهة؟ اي عمي تنفتح هالجبهة بقا.. صرلنا 40 سنة عم نستعد للمواجهة.. ما حلنا نجهز بقا؟؟ أو اذا مابدنا نعمل كل هدول نكون صادقين شوي مع شعبنا ومع حالنا... ونقول شو حجمنا وشوإمكانياتنا ونقول انو نحنا جماعه علاكين وكذابين ولافي مواجهة ولافي مسخرة... انما الموضوع مجرد أداة لترويع الشعب وقمعو... أمنية وطنية: كتير كنت حابب انو على القليلة يعلنو الحداد الوطني على الشهداء... عن جد لو يلي ماتو صوماليين بس على ارضنا كانو أعلنو الحداد الوطني... بس يبدو انو دم المواطن السوري صار مستباح داخلياً وخارجياً... وليش لنعتب عليون اذا نحنا مو فارقة معنا.. عين الصاحب الكبر اللادقية البوكمال... وبكرا وين الله أعلم ومازلنا نشجب ونستنكر وندين... عاش الصمود.. عاشت الممانعه... عاشت قلعة الصمود والتصدي... عاش جيشنا الباسل المغلوب على أمره... الرحمة على الشهداء... الرحمة على الوطنية... الرحمة على الشرف |
[quote=VivaSyria;1145617]
انو وين الـ15 ألف عسكري يلي على حدود العراق.. ليكونو بس عم يحمو الحدود من اتجاه سوريا العراق ومحطوطين بس مشان ترضى أميركا "بحكم انو نحنا دولة الممانعه الوحيده بالمنطقه"... وين الشعور القومي ياشباب وين الكرامة والشرف... وين المضادرات الأرضية وين السلاح يلي صرلو عم ينشرا من أربعين سنة.. لك وين الأمن الحارق الخارق؟؟ أه عفواً هاد الأمن مهمتو بس رصد المتأمرين والعملاء في الداخل أما هيك قصص صغيرة مابيتدخل فيها... انو بلا ظلم - يمكن الـ 15000 عسكري نايمين وحرام نوعيهم منشان 8 ضحايا راحو بقضاء وقدر لا يمكن خربطت شوي هدول مابدهم مين يوعيهم نحنا بدنا مين يوعينا الحكومه بدها مين يوعيها ولك وين عايشين نحنا كيف بدنا نحس بالامان وين الجيش الرحمه على الشهداء |
وهاد تقرير مصوّر عن القصّة، والطيّارات مبينة بالتصوير:
- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - قادرين يصوروا بس مو أكتر!!! العمى على هالمسخرة. ومتل ما قال معلّق عالحدث: حماة الدّيار عليكم سلام... إي والله عليكم سلام ومع السّلامة! |
شي بيخجل ..والتلفزيون السوري بكل وقاحه عم يبث الخبر ويجيب صور ..
|
اقتباس:
اما الجماعه فا بديك تعذريون لان مضيعين الخجل والاحساس.... لانك معقول ابو كمال ..صارت جمهوريه ؟؟؟؟؟؟؟؟؟امتى ..:shock: فعلا انه مسخره .... |
اذا ردينا بالقوة... هاد دليل على "الحنكة السياسية للقيادة الحكيمة"..
اذا ما ردينا بالقوة.. هاد دليل على "الحنكة السياسية للقيادة الحكيمة".. اذا شجبنا و استنكرنا.. هاد دليل على "الحنكة السياسية للقيادة الحكيمة".. اذا ما عملنا شي.. هاد دليل على "الحنكة السياسية للقيادة الحكيمة".. يعني يا مواطن يا عربي سوري لا تهتم... رغم انو كل العالم فوقك لكن معليه.. "قيادتك الحكيمة عندا حنكة سياسية"... يكسّر حناكهون انشالله.. حدا يقول آمين الله يرحم الشهداء, و الصبر و السلوان لأهاليهم.. و لو ظل عند حكومتنا شوي, شوي ها من الكرامة كان تكفّلت بهالعائلات المنكوبة فورا.. و على الأقل 3 أيام حداد رسمي... |
المواطن السوري يسأل وين ال75% من ميزانية الدولة اللي بتروح عالجيش ؟؟ وماشفنا شي من هاد الجيش ؟؟؟ لسا كل ماصار انتهاك بيطلع المسؤولين وبيقولوا "سنحتفظ بحق الرد ونشجب ونستنكر وندين " و و الخ وآخرتها؟
بكل الاحوال انتهكت حرمة الاراضي السورية شو عاد بدو الشعب اكتر من هيك الله يرحم المعترين والشهداء من ابناء الوطن |
[quote=yass;1145717]
يكسّر حناكهون انشالله.. حدا يقول آمين quote] أمين ميه مره ....:pos: |
اقتباس:
بتوقعلك اليونسيف -اذا بدهون -بيطلع بايدون اكتر من حكومتنا العتيده ..بما انو في طفل شهيد الله يرحمهن اجمعين |
بكل وقاحة الدنيا يخرج تلفزيون الدنيا علينا بالخبر التالي:
ارتفع عدد الشهداء إلى عشرة ومعلومات جديدة تشير أن طائرتين من الطائرات المغيرة قد حطت على الأرض ونزل أفرادها واقتحمو البناء وأردوا كل من فيه قتلى... وبقيت الطائرتان المتبقيتان في الجو تؤمن الحماية لعناصر الكوماندوس المقتحمين وقد استمرت العملية أكثر من ساعه... ويذاع الخبر مترافقاً بصورة جثث الشهداء ببراد أحد المشافي... وصور دماء الشهداء تلطخ الجدران والتراب... ماعم افهم شو المطلوب مني كمواطن سوري... انو شوف جثث شهداء قتلتون أميركا داخل أرضك وخراس... وشوف هالمنطقة نفسها عم تموت من الجفاف والجوع وخراس... شوف كرامتك بالأرض وخراس... ومازالت وزارة الخارجية تحمل الولايات المتحده الأمريكية المسؤولية... ومازال معاون وزير الخارجية يتصل بالسفراء العرب ليضعهم بصورة الهجوم ويطالب الحكومة العراقية بتفسير... حدا يفسرلو مشان الله .. لك لسا بدكون تفسير... اسألو ولد صغير صار عندو تفسير وجماعتنا لسا ما لقوا التفسير.. مابعرف شو بدي قول غير عيب والله عيب... بكل قهر الدنيا عم قول عيب. |
الي .. زمااااان .. كتير ما عم احكي .. والي فترة .. عنجد متمسح من طرفهم ..
بس اللي عم يصير عنجد .. وصلو للقمّة بالوطاوة .. ووصلو للقمة .. بتوطاية الراس .. الله يرحم كل نقطة دم نزلت من ايا انسان .. وما يجيه النوم .. لايا كائن بشري .. كان الو ايد بهيك قصّة .. لانو بصراحة اللي عنا ما عاد فيهم صفة الانسانية ليكونو بشر .. للأسف ومشي حالن .. تحولّو .. للمستوى الادنى وبدرجات .. رحمة الله عليهم .. :D |
 دماء السوريين الشهداء ستبقى تروي تراب الوطن...  الطائرات الأمريكية تجوب سماء سوريا وتقتل السوريين.... ومازلنا نحتفظ بحق الرد مافي داعي حط صور الجثث بالمشفى... بيكفي هيك |
قال ....:
الموقع ...تابع للقاعده ... امريكا تعترف بالهجوم .....الحمد الله يا عمي ... قوات التحالف ليس لديهم خبر بالغاره ...(هدول متل قلتهن ) بغداد ..تتأمل ان لا تتاثر علاقتها مع سوريا بعد الغاره (شي بيرفع الراس والله) ماراحت غير ع الي ماتوا ..........الله يرحمون |
اقتباس:
خيو بلا الاجراءات العسكرية اللي عم تحكي عنها, بس يقطعوا العلاقات الدبلوماسية , لك مو على اساس نظام ممانعة وواقف بوجه امريكا لحالو و مدوخ الامريكان طيب اقطعوا العلاقات الدبلوماسية لنشوف شافيز طرد السفير الامريكي لسبب بكتير من اللي صار ومو سائل عن امريكا بس هي من سابع المستحيلات عندن , ما هني باسوا الارض ليفتحوا قناة تفاوض مع اسرائيل بس لتتعطف امريكا وتقبل تبعتلن شي مسؤول درجة عاشرة بوزارة الخارجية ليتصور مع بطل الصمود والتصدي مشان هيك حتى لو الامريكان ضموا البوكمال للعراق متل ما تركيا ضمت اسكندرون واسرائيل ضمت الجولان ما رح يتغير شي , مو المهم سوريا تروح كلها المهم عنا قيادة حكيمة ملزقة على كرسي الحكم |
الله يرحمهن جميعا .....:D
|
اقتباس:
ورغم هيك صرعونا بحكمة القائد المناضل والحنكة السياسية اللي انقذت سوريا من دون ما يتحرك جندي واحد ونفس النغمة الله وكيلك , من 1967 لهلق , والخلاصة اللي بدن يفهمونا ياها بقى انو خيو شوفو, البلد مو مهم وانتو الشعب مو مهمين , المهم نحني نبقى بالحكم ونورث لاولادنا المزرعة اللي اسمها سوريا |
اي قال اميركا انو الاشخاص هدول هني عالم عم يسهلوا دخول المقاتيلن الاجانب للعراق وانو هني طلبوا من سوريا مرار انو تحمي حدودها ولما ما ردت نحنا اتدخلنا
يا ولاد الستين حرام شاطرين نهب بالنفط والقمح والمياه بهالمنطقة بس انو نجي ندعم نخدم نقوي هالبقرة اللي اسما دير الزور والبوكمال فهاد هدر للمال العام شو عم يعملوا الجنود عالحدود؟ لك مضادتكون الارضية وسلاح اللي استريتوه من روسيا وينه ؟ شاطرين بس بالممانعة والصمود طيب يا قيادة منيعة عالاقل اوقفوا برامجكون واعلنوا الحداد لسا حاطينلي نانسي عجرم وامجد طعمة وتحت بالشريط الاخباري ارتفاع عدد الشهداء الى9 ومصدر مسؤول يدين العملية بس لا عادي وطبيعي بالنسبة الكون ليش وقت انفجار ليلة القدر كلفتوا خاطركون واعلنتوا الحداد طبعا لا ليش؟ لانو نحنا ناس من ورق الله يكسر ايديكون امين |
اقتباس:
مو بس امين .. وكليون امين كمان ما بيكفي انو نشغر بالخجل .... عم اشعر بالقرف ...القرف من حالي اولا .. وبعدين البقية |
لك الاوقح من هيك انو بيطلعوا محللين سوريين بيقولوا انو اي هي ادارة بوش بدا تروح وهلق ويعني طبيعي تبحث عن حجج تسويقية لاعمالها قبل ما تروح
|
للأسف ، حقيقة شي مؤسف يلي صار .. أنـا ما عم طالب سـوريا برد عسكري (حتى ما يتحقق لأمريكا مرادها) خصوصاً أنو لو صار حرب ، مافي أي دولة عربية رح توقف مع سـوريا (نفس الحال مع العراق) لكن أنـا بطالب بأي رد كان يحفظ كرامتنا نحنا الشعب السوري (إن كان سياسي , إقتصادي , علاقات , ... بطيخ) والله يرحم كل القتلى ، |
9 شهداء تغمدهم الله برحمته قد إنضموا إلى مواكب الأبطال، سوريــا لا تفكر بالعقلية العربية القاضية .. (إنزال بـ إنزال ، صاروخ بصاروخ) لن نخضع للإبتزازات الأمريكية ولن يستدرجوننا إلى ما ليس في مصلحتنا ، نحن قوم لا نُستفز ولا نؤخذ بالعواطف ,, الرد قادم ,, وكما ردت سوريا على إختراقات الطائرات الإسرائيلية لأجوائها بشن حرب ضروس في جنوب لبنان كبدت العدوان الإسرائيلي خسائر فادحة، فإنها سوف تنتقم لأبنائها من الجنود الأمريكيين ومن يساندهم من العملاء العراقيين .. و ليس من الضروري أن تعلن سوريا العظيمة (شعباً أولاً و حكومة ثانياً) أنها ردت ولكنكم ستشعرون بجحيم الرد في جلودكم ، وسلامي لكل سوري ولكل صامد مضمد لجراحه سائر على طريق المجد. تحياتي , :D |
من المعيب كتير أنو نتعامل مع الموضوع و كأنو حكومتنا طرف تالت
العملية صارت على أرضنا و الشهداء مواطنين سوريين و الرد السوري كان .. استدعاء القائم بالأعمال الاميركي و العراقي و توجيه احتجاج أي مرحبا .... أكيد ما كنت بتوقع يكون في رد على العملية ( عسكرياً ) لأنو المنطقة مع العراق ما فيها و لا قطعة عسكرية و ما فيها غير جماعة الهجانة الي كل واحد منهم معو بارودة و بس .. و ما في على طول الحدود لا رادار ولا دفاعات جوية ولا شي ... طبعا شو السبب ما بعرف يعني قديما كانت العراق دولة عربية شقيقة على عيني و راسي مافي داعي لنكثف تواجد الجيش هنيك بس من 5 سنين و لهلق العراق هو مركز أنطلاق كل العمليات العسكرية الأميركية و الكل بيعرف انو سوريا مهددة من قبل أميركا و اذا بدو يصير شي علينا أول شي رح يكون الدخول من العراق و نحن ما عنا شي هونيك أكيد ما طالبنا يكون الرد و الردع مباشر و قبل تنفيذ المهمة ( مع أنو اذا طالبنا مو غلط ) هادا الجيش الي عم ينصرف عليه الملايين . بس على الأقل يكون في رد سوريا ديبلوماسي على نفس مستوى المصيبة .. ولا بجد البوكمال مو لسوريا .... يا ترى لو كانت العملية بالشام أو بحلب أو باللاذقية ... كانت ردة الفعل مماثلة ؟!!! |
اقتباس:
|
اقتباس:
لك يا اخي شو بدنا غير انو نكون معززين مكرمين النا فخر بشغبنا وبلدنا .. بس للاسف لهلق ما عم لاقي شي بياكد كلامك ع ارض الواقع .. ولا شي يا ريت يتحقق بس واحد من يلي اذكرتون بردك .. وتعا قلعلي عيني.. بس المهم ما يتاجل هيدا الى ما شاء الله :D |
اقتباس:
أنـا كـ سوري ، بحب بلدي و بحب سوريتي ، (إن كنت موالي أو معادي) بتمنى هالشي من قلبي و قلت إن شاء الله يكون في رد سوري (بأي شكل وبأي طريقة كانت) يحفظ كرامتنا نحنا الشعب السوري و العربي و أكيد ما بفضل و بستبعد الرد العسكري ، لنفس الأسباب يلي ذكرتها بردودي السابقة ، :D |
اليوم شفت عالتلفزيون اراء الشعب السوري والكل يشدد ويندد عاللي صاير وعم يتمنو انو يكون في رد عاللي صار
|
اقتباس:
انت عم تحكي عن حرب ضروس في جنوب لبنان ؟؟ فيك تقلي ايمتى نحني ضربنا رصاصة وحدة على اسرائيل من جنوب لبنان ؟؟؟؟ انت عم تحكي انو كل عمر النظام الجبان تبعنا , نظام الاسد اللي رافعلك راسك , متخبي وراء حزب الله وبس ناكل ضربة من اسرائيل منحكي مع حسن نصر الله بلكي بيحاربلوا شوي عننا , يعني متل حكاية نكاح الاستبضاع تبع الجاهلية (على راي نزار نيوف) , يعني واحد عنين بيستاجر واحد لينام مع مرتو بلكي بيعوضلو شوي من شرفو الضائع يا اخي اتركني من جنوب لبنان , هداك اسمو لبناااااااااان , يعني دولة تانية نحني عنا جبهة الجولان , الجبهة الاكثر امنا بين كل الجبهات العربية , هالشي ما بيرفعلك راسك كمان؟؟ على كل انا قلت برد سابق , اذا في رجال واحد بهالنظام يا اخي يسترجوا بس يسحبوا السفير تبعن بواشنطن او يطلبوا من القائم بالاعمال الامريكي يغادر الشام , بس هيك ما حدا عم يطالب بدخول حرب مع الامريكيين |
الرد المنطقي على هذه الاهانة على الاقل كان يجب ان يكون بطرد القائم بأعمال السفارة الأمريكية واستدعاء السفير السوري في واشنطن وقطع العلاقات الدبلوماسية مع حكومة العراق والتكفل بالجرحى والقتلى .
رحمة الله على كل القتلى ونتمنى من الله ان يشفي كل الجرحى. |
هلا رد عسكري مستحيل يصير شو يابدنا نضرب اميركا ياالعراق وعالجهتين مو زابطة....
بس ضروري جدا الرد...الرد سياسي دبلوماسي اقتصادي شوماكان...الوضع جدا مخزي ومخجل... الله يرحم اللي ماتو:D ويكون مع الجرحى |
أبو حلب خدني بحنانك شوي الله يرضى عليك لأنو عن جد كنت بتمنى انك تكتفي بالرد يلي قبل هاد بحكم انو أقرب للواقع وللحقيقة:
اقتباس:
اقتباس:
إلون الشرف العرب اذا بيفكرو بهالطريقة يلي عم تحكي عنها... بس ياريت أعرف شو العقلية يلي النظام بيفكر فيها؟؟؟ ضربة بعمق الأراضي السورية بدير الزور وتدمير بناء عسكري واستشهاد عدد من المواطنين...ياريت تنتبه معي هون على هالعوامل انو اسرائيل ضربتنا بالعمق وانتهكت الأجواء السورية وراح شهداء من الغارة.... نحنا كيف ردينا؟؟؟ ماسمعت عن رد على هالعملية إلا اذا بتقصد انو بعد شي عشر أيام من هالقصة حماس ضربت صاروخ اجا بصحراء النقب... اذا هي طريقة الرد المشرف يلي انت بتشوفها مناسبة على يلي صار ما فيني قلك شي غير الله يهنيك.. بس عندي إلك سؤال وياريت تجاوبني بصدق: إنت شايف انو طريقة رد حكومتنا العظيمه سليمه ومشرفه؟؟ يعني اسرائيل بتضربنا وأميركا بتضربنا..وبيضربونا علناً..ونحنا منروح مشان الله ياحزب الله عملو شي أو ياحماس دبرونا...برأيك هي طريقة الرد الصح؟ هي الطريقة يلي بتحفظ الكرامة؟؟ اقتباس:
ماعم افهم شو هالطريقة الخطابية هي.. يعني مع احترامي إلك بس هي الطريقة كبيرة علينا شوي وهالكلام حرام يطلع مننا مشان ما يفقد قيمتو... تروك هالكلام لحسن نصرالله أو لهوغو تشافيز ياسيدي... اتركو لحدا عن جد عمل شي بحياتو غير الحكي الفاضي.. اقتباس:
كمان سؤال: انت بينك وبين حالك مقتنع بيلي عم تقولو؟؟ شهداء وجرحى وبهدلة وانت عم تحكي بهالطريقة الخطابية الخشبية... يعني انت شايف الوقت مناسب؟؟ والله يا أبو حلب نحنا مو باجتماع حزب ولا بموضوع تصاميم للرئيس... خلينا نحترم شوي الموقف.. اقتباس:
والخلود لرسالتنا. |
الله اكبر يا ناس
|
الله يرحم اللي توفوا
|
!!!!!!!؟؟؟؟؟؟؟؟؟؟؟؟
بس يا ترى شو العمل
|
الله يرحم الشهداء يللي ماتو ..طبعا كانت فرصة دهبية للبعض للشماتة بسوريا وقيادتها و ما بيعرفوا انو هاد وسام ع صدر الشعب السوري يللي عم يدعم المقاومة بالعراق فهيك كان انتقام ادارة بوش منو قبل ما تنقلع ...
يعني اذا في حدا هون مو سوري "و عامل حالو سوري" قاعد عم يحكي بالعاطل عن سوريا و قيادتها بنصحوا يخرس.. لأنو ما حدا من كل الدول العربية بيطلعلوا يحكي عن سوريا ودورها بالمقاومة والممانعة للأسف في ناس ما عم تفكر بواقعية ... و كأنو بدها سوريا تقصف واشنطن بشي كام صاروخ ..أو تعمل انزال بنيوورك...سوريا عندها مجال محدود للرد ولا يمكن تجاوزه ببساطة فقط للمرجلة..أما لما نصير متل روسيا أو الصين وقتا فينا نرد متل ما بدنا ... و مع ذلك صدقوني اننا نستطيع ان ترد بشكل موجع ضمن هذا المجال |
اقتباس:
... لكرامتنا |
اقتباس:
والله ما حدا هون عامل حالو سوري الا اللي ما بيعرف يميز بين وطنو وبين كم واحد ازعر مافيوزي اغتصب السلطة وخرب البلد واوصلنا للحالة اللي نحني فيها بنصحك تعملك شي ابريق متي يا رفيق و تحطلك شي اغنية لوفيق حبيب احسنلك من الخوض في مواضيع ما بتفهم فيها |
اقتباس:
اقتباس:
قسماً بالله أنا سوري.. بتحب ورجيك هويتي أما إخرس بكل الأحوال؟؟؟ اقتباس:
مين جاب سيرة الدول العربية؟؟ اقتباس:
كمان ياريت كان في شوية احترام بردك للبشر يلي هون... |
اقتباس:
يا زميلنا لو سمحت هون ما حدا بيخرس حدا, و هالطريقة بالحكي جدا مزعجة بمكان يُبتغى فيه الحوار, فلذلك لو سمحت لا تستخدمها و شكرا |
اقتباس:
أولاً بدي وضح شغلة ، أنـا ما برفع لي راسي نظام ، أنـا قلت سابقاً ، نقطة إيجابية بعبر عنها .. و سلبية بعبر عنها ، لهيك مافيك تحددلي موقفي إنت من النظام كـ كل. بالنسبة لحرب تموز ، إرجع إلى أرشيف الحرب إن شئت .. ولعلمك سوريا قدمت لـ لبنان وحده 30 ألف شهيد و الجبهة اللبنانية بالنسبة لسوريا هي بمثابة تهديد أمن قومي أكثر من الجولان (كلامي ليس دفاعاً عن النظام كونه لم ينهي أمر الجولان طيلة 40 عام) ثانياً لو أن سوريا قامت بالرد على إسرائيل على الإنتهاكات لقلبوا الموقف على سوريا فعندما حماس تطلق صواريخ رداً على هجوم الدولة اللقيطة المجتمع الدولي يقلب الوضع على حماس وإنها يجب أن لاتطلق الصورايخ علماً بأن المعتدي هو الكيان الصيوني !! لهيك أنـا ما بأيد الرد العسكري ، لكن بنفس الوقت بطالب برد (أياً كان) يحفظ كرامة الشعب الســوري وبالنسبة لإقتراحك ، يا أخي أنـا ما بهمني إش يعملوا .. بهمني رد يحفظ كرامتي و كرامتك وبس. :D |
اقتباس:
أنـا دائماً آخدك بحناني ، الله يحن عليك و علينا يارب. :D اقتباس:
بأي ذنب ؟ بذنب تغافل وتقاعس جيشنا و إنقطاع الكهربا عن المضادات ، (شي مؤسف الحقيقة) مين رح ياخد بتارهن؟ هاد الشي يلي عم نطالب فيه من أجل القتلى ، و من أجلنا جميعاً اقتباس:
كل دولة إلها طريقة معينة بالرد. و لو أن سوريا قصفت الطائرات الأمريكية لاتخذتها أمريكا لإجتياح سوريا في حرب غير متكافئة و لكن لسوريا طرق أخرى (وهاي يلي عم نطالب فيها لحفظ كرامتنا) ;) اقتباس:
أنـا بشوف أنوه سـوريا قوية باللعب بالأوراق ، و إذا هاد الشي عم تلعبه صح ضد أعدائنا ، بنظري أنـا مشرف .. (كون أنو عملت شي أو قدرت تعمل شي) المهم نحنا نستخدم نقطة قوتنا .. و أنا ما بشوفها متل ما إنت شايفها "ونحنا منروح مشان الله ياحزب الله عملو شي أو ياحماس دبرونا" أنـا شايف دعمنا للمقاومة بحد ذاته ووقوفنا مع المقاومة ضد الأعداء .. شي مشرف ل دولة عربية اقتباس:
نعم نعم :larg: ----------------------------------------------- بالنهاية ، نحنا (أبو حلب والشعب السوري) نطالب برد (أياً كان) يحفظ كرامتنا (أبو حلب و الشعب السوري) ورحمة الله على القتلى ، |
| الساعة بإيدك هلق يا سيدي 01:00 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون