دمشق: ٤٠ مليون دولار سنوياً عائدات زيارة مقام السيدة زينب
 

ذكرت وكالة الانباء السورية الرسمية (سانا) امس ان العائدات السنوية من زيارة السياح لمقام السيدة زينب الشيعي في الضاحية الجنوبية لدمشق بلغت ملياري ليرة (أربعين مليون دولار)، مؤكدة نية سوريا تطوير السياحة الدينية.
وقالت الوكالة ان »أعدادا هائلة من الزوار والسياح يؤمون مقام السيدة زينب شهريا ويقدرون بأكثر من مليوني سائح، كما يحقق هذا الموقع عائدات تقدر بملياري ليرة سورية سنويا«.
ويتدفق الزوار الشيعة من ايران والعراق والخليج ولبنان يوميا على مقام السيدة زينب وعلى مزار السيدة رقية في دمشق القديمة.
أضافت الوكالة »في إطار الاهتمام بالسياحة الدينية، حرصت سوريا على توفير الخدمات اللازمة لهذه السياحة وتطويرها بما يتلاءم مع النهضة العمرانية والثقافية والاجتماعية والسياحية«.
وأوردت الوكالة أن »عدد السياح وصل الى نحو ستة ملايين سائح« متوقعة أن »تصل عائدات السياحة خلال الاعوام الثلاثة المقبلة الى نحو ١٧٠ مليار ليرة سورية (٣ مليارات و٤٠٠ الف دولار). (أ ف ب)

جريدة السفير

شوي شوي رح نقلب السعودية الشيعية
ما عاد في سياحة بسورية بدها تطوير غير السياحة الدينية ؟؟؟
ويلي بتنتمي لطائفة واحدة
عجبي !!!!!!!!!!!!!!

شو يعني هالمقامات هاي وشو الفايدة منها؟!

انو اوك أمكنـة تواجدوا فيها الناس الصالحيـن..بس يعني ازا رحنا عليها رح تحل البركة علينا لما؟!

هاد إسمو جـهـل.. يكفي انتحاباً على الموت يكفي انتحاباً على الماضي..احنا ولاد اليوم ولازم نعمل مشان حاضرنا!!

يعني انا ما بصير حضاري بنظر حضرتك لحتى روح عالديسكو مثلا !!!
كل انسان حر بمعتقداتو, متل ما انتي ما بتعتقدي بصحة هالمواقع الدينية كمان في ناس بتامن فيها فمتل ما انتي حرة باعتقادك هنن كمان احرار باعتقادهم

والله انا ما قلت انو مشان تكون حضاري لازم تروح عالديسكو..لكن انا برأيي التشبث بالقبور والاموات والاشيا اللي حسب رأيي مش رح تنفعنا هوي جهل أي نعم جهل ..

وتماما متل ما انتي قلت انو هني حرين باعتقادهم وانا حرة باعتقادي
معناها بينتج انو انا كمان حرة برأيي وتفكيري متل ما هني أحرار برأيهن..

لا لما بتعد عائدات فرنسا من متحف اللوفر بتوقع بتقول انو في سياحة غير السياحة الدينية

ومين قلك انو ما في سياحة غير الدينية انا بعيني شفت لما رحت على تدمر مع جروب من الشباب والصبايا من البلد اللي انا فيه و شفت الاعداد الهائلة الموجودة بتدمر مو متل مامنسمع انو مافي سياحة

يا اخي انا ما سبيتش عليهن!!! .. انا قلت انو حالة جهل وتخلف لما منتشبث بشي ميت بشي قبر بشي مكان بينما منقدر نعمل مشان اليوم ومشان الحي! (الحي يعني الانسان العايش بما انو ابقى من الميت )

يعني بمتل هالحالة عم أستحضر كتير "خبز وحشيش وقمر"..ولاّ كمان نزار قباني عم يسب ويجرح العالم؟!

أنا ما قصدت اجرح بالعالم او اسب على حدا أعوذ بالله... وازا هيك انفهم آي آم سوري !

:D

هلأ بربك لما بتقولي لشخص انو متخلف وجاهل يعني ما بتكوني عم جرحيه ؟؟ عم تمدحيه مثلا ؟؟:shock:

ما انا يلي قلت
حضرتك يلي قلت بردك الاول عن الفاتتيكان
والخبر متل ما نشور عم يدعي لتطوير السياحة الدينية
مو السياحة العامة
وبتوقع انو واقع السياحة السوري معروف لكتار بسوء ادراتو
فاذا انت عندك راي تاني بهالشي
انت حر

الله محييّ أصلك سوريانا ، لك روح حمص وبئس المصير

هون بدك طولي بالك لأنو بهي الجملة عم تهيني ملايين البشر على هي الأرض :larg:

يعني احكيلك بصراحة .. انا ليش عم جمّل بالواقع؟!..يعني هاد رأيي وانا مقتنعة فيه..انا بشوف انو اللي بروحوا و بقعدوا يجوحوا عالقبور والمقامات فش عندهن وعي وتوعية كافية (منيح هيك خففنا كلمة جهل مع انو والله انا مش شايفة انها مسبة لما بقول عن الشعب العربي والاسلامي خاصة انو عندو جهل لأنو هاد هو الواقع المؤلم)

أي نعم.. عندهن جهـل ديني قبل ما يكون جهل بمختلف مجالات الحياة (لأنو انا متل ما بعرف ومتل ما تعلمت البكاء والنوح عالمقابر والمقامات هوي شيء مكروه بل ومذموم بقى من ناحية دينية كمان الشي غلـط!)

بالنهاية هـاد رأيي وفقط رأيي..وصدقني هالرأي مش مبني لا ع اساس طائفي ولا قومي ولا اي شي! .. (يعني تحسباً مشان اي تفكير او استنتاج خاطىء)

معليش بأغلب دول العالم في بالإضافة للسياحة العادية ، في كمان سياحة دينية وعنا بسوريا السياحة بشكل عام مستحيل توصل للسياحة الأوربية بمستواها والأسباب كتيرة لا داعي لذكرها ، بس بالنهاية ماشي الحال .

اوكي هاد رأيك بس انت حطيتيها طج ، يعني خبط لزق ، كان فينك مثلا تكتبي بالرموز :p

بتوصل لمستوى اعلى من السياحة الاوروبية لكن السياحة عنا مهملة بشكل قاتل

ما أنا جاوبتك:larg:

لأ طالما انا بعرف انو في ناس بتفهم كل نقد لفعل طائفة معينة نابع من طائفية الناقد فمن الافضل احكي هالملاحظة بوضوح..


بعدين انا حابة اوضح شغلة..انا مش ضد انو يروحوا الناس عالمقامات والقبور يطلبوا الرحمة والمغفرة لروح الميت ولكن انا ضد انو يروحوا ويتوسلوا الرب عن طريق الميت..يعني يعتبروه وكيل بينهن وبين الله.. ويآمنوا انو هو بيقدر يعمل معجزات وكرامات ..والخ من هالقصص..

اي وانا وحياتك من اول ما بلشت احكي بالقصة قصدي عن هالمشهد تحديدا مش عن أي شي تاني :cry:

ومبسوطين بحالون؟
ليش بللاه مين نفض الست زينب ؟ مين عمل فيها مشاريع ووسعها؟
مو ايران .؟
ونحنا مو شاطرين ننفض ولا نظبط شي
قبل ما تكون القصة سياحة دينية او مش دينية خليعون يهتموا بباقي المطارح وبعدين يحكوا
بغض النظر لو كانت دينية او لا
ملحوظة: تركيا عم تنفض تكية السلطان سليم
وبكرا مدري مين رح ينفض مدري شو

بحب احكي شغلة .. زيارة الاماكن المقدسة .. من مراقد ومقامات ومزارات .. واضرحة .. مانو جهل ابدًا
الجهل لا يقاس حسب ادا شخص زار مقام .. او ما زار ..

1) التوسل لـ الله عز وجل بـ ذكر اسماء ائمة .. او انبياء .. هو مش جهل .. انما امر طبيعي جدًا .. قد يشفع الله لكِ بـ حق الائمة (على سبيل المثال).. مثلاً .. لما والدة الامام علي بن ابي طالب عليه السلام .. كانت جنب الكعبة ورح تولد الامام .. طلبت الشفاعة من الله قائلةً " ايا ربي و بـ (حق هذا المولود) " الخ... من الدعاء .. وتمت الشفاعة متل ما معروفة القصة .. يعني التوسل امر طبيعي جدًا ..

يعني انتِ وبلا مؤاخذة مروة .. صرتي بتحكي متل ابناء الحركة الوهابية الواهية .. يللي بتنادي بـ عدم التوسل لـ الله بالانبياء .. وبعدم القسم بغير الله .. وما شاكل ذلك ...

2) البكاء عند المقام .. لما انا بروح مقام سيدنا الحسين او ستنا زينب عليهما السلام وببكي.. وين الغلط؟ كل انسان عندو مشاعر بيبكي على قصتهما ..عن قصتهم ما بينسمح انو تقولي عنو ماضي ونقطة انتهى..وانو نحنا ابناء اليوم بيكفي نتذكر الماضي..غلط تقولي هيك.. لانو هيدا شي صار بالماضي وما زال تأثيرو قائم حتى يومنا هذا + البكاء ممكن يكون من آلام الشخص نفسو..انا لما كون حاملة هم وابكي انا وعم اتوسل لـ ربي ولاهل البيت عليهم السلام..ببكي من كتر آلامي وحزني مع ثقتي بـ استجابة الدعاء ..

البكاء بيكون هيك .. ونحنا بنبكي جنب الضريح .. ما بنكب فوقه مرميين وبنبكي.. في فرق بين الشغلتين ..الاولى طبيعية ..

3) قصة اذا لها بركة او ما لها..فـ عن تجربة بقلك انو لها .. وعفوًا منك.. انتي ادا قالولك تعي زوري ضريح النبي (المقام) صلى الله عليه وآله..بترفضي؟ لاعتقادك انو ما بيجي منو بركة ولا له فائدة؟ هذا مكان مقدس ..

يعني حسب حكيك بيطلع انو ما في فرق تصلي وتدعي بمكان مقدس او مكان مدنس..(بحكي من ناحية الفائدة والقبول)
باعتبار الـ 2 ما بيجيبو بركة وما منهم فائدة ( بحسب قولك ومنظورك )

واخيرا بحب قول..نعتك بالجهل لـ يللي بيروحو طالبين شفاعة .. لا يعتبر راي..يعتبر تمادي ومساس .. لانو طلب الشفاعة والتوسل لا يمت للجهل بـ صلة .. باعتبار القديسين..المقدسين..الاطهار .. بكرامتهم وبشفاعتهم..وبحقهم ومعزتهم عند الله .. يستجيب الله لنا الدعاء .. ببركته وبركاتهم ..

-----

عفوًا ردي ما كان ع الموضوع..انما ع الردود .. ولو اني ما كتير مزاجي بيسمح لفوت بنقاش :D

بالنهاية الخلاف لا يفسد للود قضية..:D

وصدقيني لو كان الحكي ع طائفيتي متلا.(.وانا بعرف انو في من طايفتي كمان بآمنوا بهيك اشيا وفي مقامات وهيك) ..كان رح يكون حكيي متل الحكي هون وأشد..


حبي وإخلاصي دوماً :lol:

اي حلوة الخبرية
وليش استنكار القصة وين المشكلة اذا صار اهتمام بالمقامات الدينية او السياحة الدينية اذا بالنهاية بتسبب عائدات عالية لقطاع السياحة
وشو فيها بيخلي البلد بلون طائفي واحد
وهل هالحكي بينطبق على غير اماكن دينية متل الجامع الاموي مثلا يلي اهميتو ما بتقل عن اهمية الست زينب
وهل هالحكي بينطبق على كنائس منطقة دمشق (صيدنايا ومعلولا )ويلي السياح عم ينغلو فيها نغل
عجبي!!!!!

ألله بيقطع من عقول ناس و بيحط بعقول ناس ..

طيب هالغشيم اللي عم يروح ليدفع المبلغ كذا , ما يروح يشتري أكل لبيتو مانو أشرف , شي قميء المنظر هنيك عالم عم تشحد و عايفة سماها جايي لتدفع مشان مقام و يحزنون , ..

طبيعي جدا ً قلتيلي :lol:

يعني مثلا ً لو بني آدم راح و قال يا ستنا زينب بعتيلي رزقة ممكن ستو زينب تبعتلو !؟ :?

يعني مافي خلاف اي ضريح او اي شي تاريخي اوقديم عم يكون متل زيارة وين المشكلة

ياعمي
في شغلة ما عم نفهمها
بندعي انو عم ندافع عن الحريات وانو نحنا يساريين بنحب الحرية وبنؤمن بحرية المعتقد والتصرف
شو دخلكون اذا الواحد راح صرف مصرياتو على زيارة قبر او حج مكة او حج للست زينب ياعمي هيدي قناعة يعني متل ما البعض مقتنع بالعلمانية وبابعاد الدين ع نالدولة ومتل ما في ناس ما بتلاقي شي غلط بروحتها عالكازينو وصرف المصاري على الخمر في ناس كمان بتلاقي انو من حقها انو تزور الاماكن يلي بتشوفها مقدسة
ليش بندعي انو نحنا ندعم الحرية وبنجي بتمسخر على يلي بيروحو عالمازارت وفق معتقدون وفكرون
عنجد انا عم حس بالبعض هون عندون ازدواجية بالطرح
وبدون الحرية الو ولغيرون لا
وبينسبو التقدم والحضارة الو غيرون متخلفين
عجبي!!!!!