|
القتل المسموح به
مرحبا
هلق بللا بدي اسال عن شي انو ليش منبرر قتل اعدائنا ولو كانوا مدنيين ونجن لمى ينقتلوا عالم من عنا طب هدول مو بشر مو الون الحق يعيشوا متلون متلنا ؟ ليش ينسمح بقتلون؟ونهلل لقتلون ونعمل بطولات |
بالنسبة الي طارق انا بشوف انو في اكتر من وجهة نظر...يعني مثلا هجمة 11 سبتمبر انا ضدها جملة وتفصيلا...لانو راح فيها الصالح والطالح ...اما تيجي تحكيلي انو يللي بنقتلو بفلسطين من اليهود مدنيين وحرام فهون انا بوقف وبقلك غلطان لانو بمجرد وجودهم بفلسطين فهاد معناه انو همو مع هالاحتلال وانو همو مو مدنيين فقتلهم ما بشوف انو بنافي الانسانية....
مجرد وجهة نظر |
بالعكس ان رايي من راي طارق (يمكن هيك الاسم )
انا ضد قتل المدنيين بكل اشكاله وبالنسبة لراي وشم الجمال ما بعرف ليش يعني دايما قتل المدنيين حرام اما اليهود غير انو ليش يعني هني مش بشر كمان ولا شو ؟؟ اكيد مجرد راي مش اكتر :D |
اقتباس:
انا مو ضد اليهود لكني ضد الاحتلال وهمو محتلين فانا ضد اليهود المحتل:Dورأيك عراسي |
اقتباس:
لو شي مثال توضيحي زكاة عينك ... شنو ما فات براسسي هالحكي يللي صاير بالعكس ... عم تموت شعوب كاملة عنا ...و المجتمع العالمي ما عم يرفلّو جفن حتى نحنا ... تعودنا عليها و صرنا منلاقيها طبيعية بينما إذا مات مواطن ( من المواطنين الدرجة الأولى بالعالم ) بتقوم الدنيا و ما بتقعد |
يمكن معك حق انو كلهم بشر.. بس للأسف انو العالم هالايام لغة التفاهم نسيتها وعم تتعامل بلغة الحرب اول شي بينما المفاوضات والمعاهادات صح عم تصير بس كلها عالفاضي..مجرد كلمات على ورق
|
اقتباس:
وحدة من أكبر الأمور المثيرة للاشمثزاز بثقافة ازدواجية المعايير العروبية العفنة هي التالية: أيام عبد الناصر (الله يرحمو بس لا يعيدو) انطرد أكثر من ربع مليون يهودي من مصر شر طردة... ركّبوهون السفن و قلّعوهون على اسرائيل.. و غالبيتهم المطلقة ما كان بدهون يرحلو على اسرائيل و لا كان هاد خيارهم, و لليوم في يهود مصاروة بيحلمو بالعودة... طيب اذا كتير متحاملين على المهاجرين اليهود على فلسطين ليش قلّعتو اليهود اللي كانو عايشين بيناتنا بأمان و سلام.. و ساهمتو بزيادة حركة الهجرة؟؟؟ العربان نزلو و لساتهون نازلين حشك و مسبة بالدول اللي تخلّصت من اليهود عن طريق ارسالهم لاسرائيل.. و هنن عملو نفس الشي بالزبط.. و مافي أبشع من اللي يساوي شي بنفس الوقت اللي عم يهاجم غيرو ازا ساواه نفس اللي صار بمصر صار بالعراق, أو باليمن, أو بالمغرب.. بعد قيام اسرائيل العرب ساعدو بشكل فعّال في زيادة عدد سكانها عن طريق طرد اليهود إليها بعدين هاد حكي نظري.. نظري بحت و دوغماتي من النوع الثقيل... يعني الجيل الثاني و الثالث هلأ شو بيعملو؟ شو بيساوو فيهون؟؟ عم اسأل رد واقعي.. مو شعارات.. يعني العربان دائما ينبحون بضرورة عودة اليهود من حيث أتو.... طيب ماشي.. بترجعو اليهود المصريين على مصر و ترجعولهون شركاتهون اللي أممتوها؟؟ و بيوتهون (اللي كانت منها قصور تسلبطوها ضباط الجيش المصري) .. بترجعو يهود العراق؟ يهود اليمن؟ يهود المغرب؟ على حد علمي الدولة الوحيدة اللي ظلت فاتحة الباب لعودة اليهود اللي هاجرو منها هيي سوريا ( و للمعلومات: من سوريا قليلين جدا اليهود اللي هاجرو على اسرائيل, الغالبية اتجهت إلى الولايات المتحدة و الأرجنتين و البرازيل) |
اقتباس:
بالضبط هاد اللي بدي قوله انو ليش؟ |
طيب يا عمي فهمني انا شو ذنب الفلسطينيين من الجهة المقابلة؟؟؟؟
انا معك بانو مثلا طفل بعمر خمس سنين شو ذنبو وشو فهمو بس شاب بعمر 20 سنة كمان شو ذنبو وهوي صار جندي عندن ومدرب وعقلي محشي كره وحقد وحلم بارض الميعاد؟؟؟ومجرد سؤال لانو جد حابة اعرف هلق ما فيهن يهاجروا يعني من فلسطين لاي بلد تانية ؟؟؟ وهالعرب يللي بتحكي عنهم همو من الاساس اجرموا بحق يللي بتحكي عنهم من اليهود وساهموا بشكل او باخر بزيادة الهجرة اليهودية وهمو من يوم يومهم اذا بسووا اي حركة للاسف بيزيدوا الطين بلة بس هون يعني شو الفلسطينيين بدهم يساووا؟؟؟يتقتلوا ويقعدوا ساكتين لانو الانسانية بتتطلب هيك شي؟؟؟ ولانو همو اولادهم يللي عمرهم 5 سنين وسنة ويوم خلص عمرهم بس يا حرام اليهود اتكفلوا بهل مهمة!!!يعني يا استازي هلق نحنا عايشين بمجتمع حسب اعتقادي لازم يكون فيه ضحايا ابرياء سواء من جانيبنا او جانبهم بس هاد لا يعني ابدا انو نحنا فقدنا انسانيتنا لكن من منطلق الدفاع عن الحق ولو كان هالدفاع نوعا ما مستهجن ومو حقاني 100% |
اقتباس:
|
اقتباس:
صار عملية استشهادية فدائية ما بعرف شو بتسميها بفلسطين وانقتل كم مدني بموقف باص او يمقهى او بشي محل مو عسكري بيطلع وقتا 1000 بني ادم وبكل مطرح بيهللوا للعملية وبينبسطوا وانو بيستاهلو وهيك شي طيب هاد الزلمي اللي اتقتل مو بشر ؟ مو متلي متلك متل غيرنا انسان اله حق الحياة ؟. باي حق بيتصادر حقه بالحياة؟ ومن الطرف التاني يللي عم يصير بغزة وصار بحرب تموز والعراق وافغانستان وغيرون بيطلعوا بيقولوك انو والله حرب على الارهاب وما بعرف شو وحروب وقائية طيب ما هدول كمان بشر يحقلون يعيشوا على هذه الارض وضحت؟ |
اقتباس:
و رح اجي معك.. يعني شو ذنب الفلسطينيين.. ماذنبون شي طبعا.. بس كون الذنب مو ذنب الفلسطينيين فمعناتو ساعتها ما فينا نوزّع ذنوب ع كيفنا.. واقعية.. شوية واقعية!!! أغلب سكان اسرائيل هلأ من الجيل الثاني و الثالث.. يعني أي محشي كراهية للي بدهون يطردوه مما يفترض انو هاد بيتو.. متلو متل ولاد العربان. و لنفرض انو هالشخص راجع نفسو و شاف انو أبوه مذنب و ما كان لازم يهاجر إلى اسرائيل (و الشي اللي ما رايدين تشوفوه انو نسبة كبرى من الناس اللي وصلو على فلسطين وصلو مطرودين من حيث كانو.. تحت سمع و بصر و شراكة العرب) .. أي.. خلص الزلمة اقتنع انو غلطانين بني قومو.. شو بيساوي؟ شو بيساوو فيه؟ هاتي لنشوف...عطيه بديل.. هاد حكي كان لازم مفكرين فيه قبل النكبة.. مو بعد ستين سنة... اقتباس:
و مافي قتل ما بينافي انسانية.. مهما كان القاتل و مهما كان القتيل.. و هالقول تحديدا بينافي انسانية قائله |
اقتباس:
يعني عم تحكي عن آراء فردية مو آراء عامة حتى بحرب تموز و لما اسرائيل هدمت لبنان فوق أهاليه .... ضل حزب الله لفترة كبيرة يحاول يحيّد المدنين الاسرائيليين عن القصف بينما المشكلة الكبيرة برأيي هي بالجانب الآخر ...يللي بيعتبر الانسان العربي ... انسان من الدرجة العاشرة ... و ما في مشكلة بقتلو .. حتى منشوف آراء الشارع عم تكون بنسبة كبيرة مع الحروب الاستباقية و الوقائية |
اقتباس:
يعني الكلام شامل الطرفين |
اقتباس:
اما قبل شي شهر يمكن شب ركب على "شوفل" هي الرافعة تبعت العنار ونزل على الشارع يقتل باليهود الاسرائيليين هي شو ؟؟ انا مش عم قول انو اليهود الاسرائيليين ملايكة بس بتصور انو هذا شي مش انساني بالمرة ومتوحش كمان بعرف انو الجنود عم يعملو اشياء اصعب من بالفلسطينين اما هذا مش حل اذا بدهن يدافعو عن حالهن وارضهن وهيك لازم فيهن يقاتلو الجنود مش المدنيين |
كتوضيح.. ما بقصد انو يعني قتل المدنيين العرب بالمجان. هالأمر بديهي انو لأ طبعا.. جريمة كبرى و ما بيجوز أخلاقيا تمر بدون عقوبة...
فقط عم يقول انو يتعاقب المسؤول.. و العقوبة لا تعني الانتقام العشوائي معنى الكلام.. انو ضربة من حزب الله على دبابة ميركافا تلعن سماها تخيف اسرائيل و ترعبها أكثر من 20 قتيل بتفجير سوبر ماركت (بالعكس.. الحالة الثانية مفيدة جدا للاسرائيليين.. اعلاميا يعني) و حتى أخلاقيا عشرة على عشرة... حماس قتلت مدنيين أضعاف أضعاف المدنيين اللي قتلهون حزب الله.. طيب مين أكثر كفاءة؟ مين أكثر اخافة لاسرائيل؟ مين حرر أرضو و مين لأ؟ |
اقتباس:
وهلق يعني كرمال الله جاوبني....انا مثلا مؤمنة بقصة الانسانية ومؤمنة انو حرام يموتوا يللي مالهم ذنب بس هلق اعطيني شي حل منطقي للموضوع؟؟؟يعني هدولاك بيقتلوا وبيعذبوا وبيحرقوا ونحنا هون لازم نكون انسانيين لانو هدول محشيين من اهلن يا حرام ....طيب وامنا بالله انو حرام هالعمليات لانو اسما قتل اولا واخرا فيعني بدنا نلجأ للمفاوضات يعني ونكمل مسلسل التنازلات مع شلة الخونة وكان الله بالسر عليما؟؟؟؟ وعلى فكرة من منطلق انساني كمان صفى انو نقتل يللي بحاربوا هاد كمان حرام شنو معبئين وما عندن اي خلفية غير الخلفية يللي بلدهن بتعطيهن ياها ويعني همو نتاج تفكير اهلهن فيعني نحنا بنكون كمان مذنبين اذا حاسبناهم ما هيك!!! |
اقتباس:
يمكن لهيك كانت عمليات المقاومة بالسبعينات والثمانينات واصل صداها اكتر من اليوم |
اني لا اكره الظالم اذا تربى على ظلم فلا ذنب له ولا القاتل اذا تربى على القتل فلا ذنب له ولا الوم الحقير ان كانت بيئته من ربته |
اقتباس:
بعدين في فرق بين الحل العسكري و الحل الاجرامي, و شتان بين الأمرين حل حزب الله (رغم تحفظاتي عليه جدا يعني.. ايديولوجيا) هو حل عسكري شرعي و مشروع... و ما بتذكر عنصر من حزب الله حط متفجرة بسوبر ماركت أو بالشارع.. هل هو أجبن من عنصر الجهاد الاسلامي مثلا؟ طبعا لأ.. لكن المعركة الها استراتيجية و اهداف.. و ليست القتل لمجرد القتل اقتباس:
اقتباس:
بلشنا نحمّل المسؤولية لمن يستحق.. بداية موفقة و على حد علمي شلة الخونة بيهتفولهون بالشوارع و بيعلقولهون لافتات و صور اقتباس:
|
اقتباس:
يعني انا بعرف انو ميزان القوة هوي الميزان يللي بسيطر يعني الحق مع الأقوى فهون مين يللي بحاكم ما دام القوي لما يحكي انو حرب عالارهاب بصير ارهاب..؟؟؟وما دام كلشي مسيس ؟؟؟ |
اقتباس:
|
اقتباس:
و في شي اسمو استثناء ( لهالقاعدة ) و يللي ممكن يكون رأي فردي .. أو رأي مجموعة قليلة ما بتعبر عن مجتمع كامل أنا برأيي الرأي يللي أوردتو انت ...هو رأي أقلية عربية مو أكترية |
طيب بصراحة ما بعرف شو قول لانو انا ما عندي كتير خلفية بموضوع المقاومة العسكرية...
بس يعني هلق بفلسطين متاحة هالنوع من المقاومة؟؟؟وبامكانياتهم المحدودة؟ |
اقتباس:
|
اقتباس:
الاقلية عم تهلل لقتل المدنيين الاسرائيليين .. يعني القصة مو كتير خطيرة |
كمان سؤال ياسين
هلق الاطفال الفلسطينيين يللي بربوا من صغرهن على مشاهد القتل والتدمير والحرب كمان ليش ما عطيتن هالعذر يللي عطيتو لليهود يللي انو همو تربوا ومالهم ذنب بهالشي؟؟؟؟؟ يعني طفل ابوه وعيلتو كلها بتروح بقذيفة بالله عليك منين بدو يجيب عقل ليقعد يقارن ويحكي هاد الو ذنب وهاد ما الو؟؟؟؟يعني هوي كمان صفى نتاج الظروف يللي خلتوا يلجئ لهيك سلوكيات ويفرح بهيك شي..... هلق احكيلي براغماتية وعلى تقيل كمان!!!انا للمرة الالف ما بحكي انو هاقتل صح بس بنحلل الموقف يللي من الطرف المغضوب عليه لانو مو انساني وما بقدر ظروف هالمساكين اليهود |
اقتباس:
انا شخصيا مابعرف غير الاطفال (كمدنيين ) اطفال اسرائيل فقط شوف ياعزيزي نظام التجنيد باسرائيل مختلف عن انظمة التجنيد اللي بنعرفها بالشرق وكمان بالغرب يعني في اي لحظة ممكن يعلنو استدعاء قوات الاحتياط واللي هي " المدنيين بوجهة نظرك" يعني المدنيين في وجهة نظرك هما بنفس الوقت قوات احتياط في الجيش الاسرائيلي !!! يعني عنا بتاخد فترة تجنيدك ومعك فترة تانية ممكن يستدعوك تحت اي ظرف للعسكرية ، في اسرائيل هالفترة اطول بكتير "ربما لقلة عدد الاسرائليين " بس هاد مش مربط الفرس . عل كل حال ، مرة من سنتين ونص تقريبا كتبت باحد موضوعاتي اني ضد قتل المدنيين الاسرائيليين وصحح لي شخصين الفكرة" انو المدنيين باسرائيل مش مدنيين حقيقيين" لكن على كل حال هذا ما بيتيح قتل شخص لا يتاح له فرصة للدفاع عن نفسه او حتى ليس في ساحة معركة !!!(طبعا من وجهة نظري) ولكن ربما لانو اللي ايدو بالمي مو متل اللي ايدو بالنار ، لو كنت فقدت اهلي بفلسطين (اكيد كان رئيي رح يختلف) وكنت رح اشجع قتال قوات الاحتياط اللي بتشوفها " مدنية " حدا فكر شو هي معاناة اللبناني اللي فقد اهلو جراء قصف اسرائيل لمدينتو ؟؟ طبيعي انو هالشخص يتبنى اراء مختلفة عني وعنك نظرا لظروفو . |
اقتباس:
خيي اسال اي حدا وشوف شو بيقلك ما بيقلك الله لا يردون ؟ تحب طلعلك كم موضوع بالاخوية عن عالم مؤيدة لقتلون؟ كم خبر بالجزيرة والعربية والب بي سي وغيرون التعليقات كلها مؤيدة الهون وقديش كمان في ناس ومنون مشاهير من العالم كانت مع قتل المدنيين بحرب تموز وغيرها ومع حرب العراق وانو هدول لازم ينقتلوا |
يعني حضرتك كتير خايف عالاسرائيلين و زعلان عليهون
و عم تقلي انو ابن 5 سنين مالو ذنب صحيح مالو ذنب بس الحق على اهلو الاسرائيلي يلي بيعرف حالو بدو يموت بفلسطين ينقلع منها يعني قصدك انت انو يحتلو ارضنا و ما يرضو يطلعو و يبلطو و ما نطلعهون بالقوة اذا ما بدهن يطلعو بدنا نقتلهون و هادا شي مو غلط ابدا |
قتل قتل قتل... الم يثبت التاريخ ان القتل لا يحل اي شئ بعد انظرو الى حزب الله الان مثال حي بالسياسة والدهاء من بعيد لبعيد ارضخ كل المفكرين الاسرائلين وذلهم استرجع الاسرى بقتلى بطل زمانه. . . |
اقتباس:
عفوا ينقلع لوين؟ لك اخي ليش نقتلهون اذا انا قادر حرر بلدي بطريقة اذكى من هيك |
اقتباس:
هالشي مو مقياس اقتباس:
اقتباس:
بحرب تموز ما صار كتير قتل للمدنيين الاسرائيليين ... على عكس المدنيين اللبنانيين و لما كان يطلع هيك رأي كان يجي بإطار أنو أهلنا مو أرخص من الاسرائيليين ..... يعني آراء عاطفية |
اقتباس:
شو رأيك نحلقلون من هون ..؟؟  |
اقتباس:
أنا بتفهّم السبب اللي يؤدي لحتى شب بعمر الورد يعبي حالو متفجرات و يروح يتدربس بباص أو بسوبر ماركات.. متفهمو تماما و متفهم ظروفو.. و بلاقي شي طبيعي مية بالمية انو يكره و انو يكون عندو نزعة انتقامية.. لذلك عتبي مو عليه (بالعكس.. أتألمو جدا ) عتبي على اللي يتاجرو فيه و يستعملوه.. العربان الجايفة (أي أي الجايفة.. يعني اللي بتاكل الجيفة, يعني الجثة) تهلل و تصفق لما أي واحد من هدول المساكين يعمل عملية.. و ما ينتبهو انو كل عملية تصير هي نقطة جديدة بدفتر خيبة العرب و وضاعتهم و حقارتهم.. لو هالشب اللي بعمر الوردة عندو تضامن حقيقي و مساعدة حقيقية من قبل عربان التنك كان لقى وسيلة تانية يدافع فيها عن نفسو غير طريقة "علي و على اعدائي", و كان ما مات, و لا مات أبوه, و لا مات جدو... و بتقوليلي انو اخبار عذاب الفلسطينيين ما تهم المجتمع الدولي؟ ليش تهم المجتمع العربي أساسا؟ عنا شوفة الأخبار و حلقة باب الحارة متل بعضهون (نخوة و نشامة كرتونية معفنة) |
اقتباس:
الحق على اللي عم يحشيله مخه اكثر بدل ما ياهله ويساعده انو يكون خادم اقوى للمجتمع وهون بعتقد دور المجتمع المدني الفلسطيني والعربي بس وينه؟ |
اقتباس:
بس كيف شعب كامل ما فيو مدنيين بعدين انا بعرفو لهالقانون الي عم تحكي عنو بس شو مع الناس الرافضة لهاد الاشي ؟؟ |
اقتباس:
انا وضحت بس يمكن متل ماقلتي على لسانكلما قلتي " ماكنت افهم عليك " المدنيين انا قلت انهم الاطفال ، وكونك بتعرفي هالقانون فهاد بيخليكي تتفهمي كلامي اكتر من غيرك اللي مابيعرف هالقانون ،مزبوط؟ ارجعي اقري اللي رح احط الو لون مختلف بنص كلامي . اقتباس:
وهاد هو اللي كتبتو بردي الاول (كونك انتي ما فهمتيه فهاد ما بينفي حقيقة اني كتبتو من قبل !!!) |
هذا الحكي الي علمتو فاهمييتو 100% وبايدك فيو كمان
بس مشكلتي مع انو الاطفال الاسرائيليين هني المدنيين فقط في كتير ناس رافضة هذا القانون هدول الناس شو وضعهن بالنسبة الك ؟؟ |
ان سرقة روح انسان فعل ظالم و غير شريف ابدا
انه كما تفضل اخي محمد ابراهيم بالجملة اللي كاتبها بالازرق العريض و مفادها ان المعركة تكون بين طرفين او اكثر و تكون كل الاطراف لها القدرة على الدفاع عن نفسها...و بوجود نية الاعتداء من احد الاطراف هنا فقط يمكن ان يكون القتل مشروع مع مراعات عدم المساس بالاطفال و الشيوخ و النساء و العاجزين عن الدفاع عن انفسهم هاته هي القوانين التي يمكن ان يكون القتل مشروعا ضمنها امّا ما نلاحظه الان من عمليات القتل فهي اعمال جبانة غير شريفة و غير مشروعة لا تقبلها قوانين الارض و السماء |
| الساعة بإيدك هلق يا سيدي 14:59 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون