|
انا و كرشي و بس
بحب كرشي أنا بحب الأكل من لما كنت صغنون يعني على حسب ما بذكر على فيائي المتواصل بهل حياة من لما كنت صغنون و أنا ايلي كرش و المهم مو هون المشكل انو أنا بذاتي ماني شايف مشكل بالوضع يعني شو فيها إذا أنا بحب الأكل و عندي كرش يعني أنا سمين و بدين و دولفين و كلشي بينتهي ب (ين) يا أخواتي الغريب انو شو كانوا يئلولي انو (كول تئبرني ما تاكول غير الصحة اتغذى حبيب قلبي بكرا كلو بيروح طول ) يحرق مخ هالطول يلي معو حولة الحسن هني بيقولو طول بس صاير بالعرض أنا شو ئول لحالي هني أكبر و بيفهوا أكتر (قال: أكبر منك بيوم أعلم منك بسنة) بس مو ضروري دائما هالشي صحيح بهون كان كلو عادي كبرنا و بلشنا نوعى أي لا طلع في مشكلة و نص بس للغريب ماني شايف هالمشكلة أول مشكل (( و الله يا أستاذ ما عنا مئاسك )) يعني كل ما تفوت على محل لازم تسمع ها لجملة وإلا ما بتهنى بالمشوار تاني شي فهم العالم الذائد عن اللزوم كل واحد متعرف على خضرجي بالحارة قام صار يفهم بالتغذية و الحمية و خلافو بتسلم على واحد من هدول الجماعة }بيئلك لك شبك خيو كل مالك عما تروح بالعرض لك عملك شي ريجيم و بيبلش يئطش و يلحش عن خبرتو بالتغذية { أنا قول سماع و سطح و مالو حارق قلبي إلا توم كروز و جورج كلوني على شو البنات بيحبون ما بعرف انو يعني لو كروز كان مقاس كنزتو XXL كانوا حبو ولا كلوني كان الو كرش شو كان صار يعني و ربي مصطفى دياب أحلى منون شخصية و ستايل (مع حبي للفنان مصطفى دياب ) يتبع .... :D |
بخـصوص النمره رقم تنين - تبع الناس تقلّك انو صحيا و مابعرف شو ليش ما بتعمل ريجيم- فيا اخي اللي بيقهر عاده بحكي الناس انّو بحالتك ممكن يكون صاحبنا اللي عم ينصحك كرشو لحلقو بس ما شايف من كلّ اقصه غير كرشك انت من باب انّو هو خايف عليك انت و ما بخاف عحاله لانّو انت اهم و هو فداء للوطن :lol: ..
مــتابعه معك ابو وليم |
بانتظار اليتبع:D
|
انا وكرشي لحالنا ..
متابع خيّّو .. |
الجزء التاني
و من ايمتا و مين يلي قال انو الواحد الطبيعي لا زم يكون نحيف لا يا خيي أنا مو هيك فهمان الشغلة و لا هيك طالع معي بالتفكير التحليلي شيت مخي أنا الطبيعي و انتو يلي لازمكن (ريجيم تسمين ) بكل صراحة عما احكي و مشتهي اعرف يلي اخترع هالـخزعبلات يلي اسمها الريجيم ( لقوصو بين عيونو ) لا وشو يلي كانو يئولو (كول تئبرني ما تاكول غير الصحة ....) صار يئولو (يعدمني ياك قوم لح تكسر الكنباية :deal: قوم من عليها ) المهم ما علينا أضحكت على حالي و قررت سجل بنادي جمال اكسام (كمال أجسام):gem: سجلنا و فتنا لعند المدرب طلع المدرب شي ستة و صالون بس موديلو غير موديلي هوي ديلوكس أنا كسوة قديم (قلي خير شو بدك , قلتلو ما بعرف برئيك بدي زيادة وزن ولا تنقيص وزن ,, صفن الصفنة العجيبة قلي بدك قسم نصين و بعدين كل نص منعملو رررريجيم المهم بلشنا رياضة و ما رياضة(دمبل و باربل و صاندو الخ..) تمرنا و ما استفدنا قال شو : لازمك حب تنشيف قلتلو كرمال ولادك ,, داخل عليك شو تنشيف ما بيمشي الحال بلا غسيل بعد عدة جولات نقاش قلنا و اخدنها ( يعني مناخد تنشيف و غسيل و كوي شوفي ورانا ما في شي ) يتبع ... :D |
فعلا معك حق شوش
يعني بأغلب الأوقات للأسف الجمل ما بيشوف حردبتو بعدين بتعرفي هون اخر سطر اقتباس:
|
اقتباس:
اقتباس:
|
له له له ياحرام:oops:
بانتظار البقية عمو.... |
بانتظار يتبع تبعيتك زياد بيك
بس عنجد ع حسب ماقلت على توم كروز وكلوني انو في كتار نصحانين ومابون شي عاديين يعني |
أنا لا أجرؤ على كِتابةِ قصةٍ كـَ تلك أنتَ رائع يا بو وليام صدق أني قرأتها أكثر من مرة وَ مازالتُ أمَحصُ تفاصيل " كرشك " أتتحسسَ " كرشكَ " بـِ افتخار ٍ الآن أعلم :D |
اقتباس:
ما بتعرفي المتل الرجال بلا كرش متل البيت بلا عفش :adal: اقتباس:
اقتباس:
حبيب القلب نوار عجبتني قصة الافتخار ما انا مخي مخبي بكرشي :yahoo: |
بحسب معرفتي بأبو ويلم
وبحسب معرفتي بالشي اللي دفعك تكتب هاد الحكي ما بقدر قول غير الله حيو ابو الويل ... وننتظر بشغف اليتبع من شخص قوي وكبير متل ابو ويلم " ملك الكمون ;) " |
أبو وليم رهيب :D وجريء
قصتك حبيتا لأنها عفوية كتير وبعتقد كتار هلا لما عم يقروها عم يهزو براسهم وبيقولو اي صح :lol: بانتظار ال يتبع.... بشغف |
الجزء التالت
هلق للحقيقة استفدنا كان في نتيجة ((بس كالعادة كان هالشي متل ايا معادلة بالحياة في ايجابيات و في سلبيات بس للاسف ما حسبناها صح و كان السلبيات اكتر من الايجابيات )) و بعد شهرين زمان أنضرب الصرف الصحي لك أي الصرف الصحي بس مو تبع الحارة تبع جسمي أنضرب (الكلاوي شيتي ) قال شو بدك توقف رياضة لمدة سنة و يلي قالها دكتور شي 89 نجمة يعني بدك تضل 3 ساعات ما تنتظر ليحكي معك 10 دقايق ب 1000 ليرة ( هادا اذا حكى – بأغلب الأوقات بيشوف الايكو و بيقرا التحليل و بيكتبلك الراشيتة و يلي بعدو ) الفكرة انو هوي قلي وقف الرياضة أي بس ما جرى و قلي و قف الأكل او خفف الأكل بقا ضليت اكول و اتشطح و اكول و ارجع اتشطح ( طبعا مع ممارسة رياضة سرية جدا و هي التريكس ) المهم وزنا زاد و رجعنا نفكر من أول و جديد بها الأثناء فتنا على الجامعة و يا ويلي و يا ويل جدي مشان هيك فكرت تفكير مطول بالقصة و فقع براصي شي كم عرق و بدي خلص قررت انو انهي القصة يتبع قريبا ...:D |
تحياتي ام السوس و غابي :D
|
روح اب وليم ملك الكروش شايفلك
|
الجزء الرابع
قررت انو لازم تدخل عسكري ....قصدي جراحي رحنا لعند سكر طعشر دكتور و كل دكتور معلق شي عشر طعشر شهادة و يلي بيدهش انو كلون زملاء ( يعني هادا زميل المنظمة الملكية للطب و هادا زميل مدري شو يعني ما في دكتور بلا زمالة ولا تعباية سطور ) قال عندك عدة احتمالات و لا واحد على ضمانتون كلون على ضمانتي الشخصية : انو نحطلك جنط ... قصدي حلقة على المعدة و هي الحلقة معها ريمونت كونترول مشان التحكم فيها و بتعمل على الطاقة الشمسية و صديقة للبيئة !!!! انو نشفيها قلتلو نشفي شو أي شو أنا خاروف حتى تشفوني قالي مو أنت لمعدتك يعني نقسمها نصين نص نكبو و نص نخليلك يا !!! (يا محلا الرمونت كونترول ) نغيرك مجرى سير الأكل يعني خيو أنت بتاكول من تمك بيروح دغري دغري على الأمعاء الغليظة و بعدين ... قلتلو أي شو هوي ميكرو لح يتغير مسارو ؟ طبع الشفط تبع الدهون ما بيمشي حالو معنا قال مو لحالتك .. يتبع ... :D |
اب وليم ... :D
|
أود ان اكمل معك الطريق
لا أريد النزول بمحطتي الك  |
ريمي:D
ارسلان :D :deal: |
بانتظار البقية بفاااااااااااارغ الصبر عمو......:D.................
|
الجزء الخامس
طبعا طلعت من عند الدكتور و قد تكشر وجهي تكشير ذاتي و أنا راجع على البيت بلاقي واحد نادالي ابو وليام التفتت لورا شفت واحد بس انو ما بعرفو اجا قرب سلم عليي شبك خيو ما عرفتني قلتلو هلق انت مو غريب عليي بس ماني متذكر قلي و لو لك أنا الطشط من مدرستك بصف الحادي عشر قلتلو الا لك شريك كان كرشك اكبر من كرشي ب 4 متر تعا يا لئلوء تعا شلون نحفت حالك و الله يا اب وليام ريجيم و رياضة مالك الا التخفيف و الرياضة لك يا بطيخ مبسمر انت من ايمتا بتخفف و من ايمتا بتتحرك و بتعمل الرياضة مو اذا أنا بطلع ب 5 سندويشات من عند الراعي انت كنت تطلع ب 7 و حركة ما بتتحرك من بيتك قلي يا زلمة بس بدك الصراحة قلتو أي شو جاي تسلبها على سمايي قلي مالك الا الدخان انت بتدخن مو قلتلو أي بس انو مو كتير و مو نظامي يعني قلي لا الدخان بيسد النفس و ما بيخليك تاكولو كل ما تجوع دخن و بما اني كنت يائس لدرجة الحضيض بعد التنشيف و الدوخانبين الدكاترة بقا كنت مستعد جرب كلشي حتى لو بيئلولي انو البامية بتنحف مستعد اكلها المهم بلشنا بالدخان بس انو يا أنا عكس معاكس يا اما في مشكلة انو بدي افطر الصبح بدخن سيكارة على اساس انو بتسد نفسي كل مالها تفتح نفسي و ابو اللول ياكول و كل ما جوع دخن بس برجع باكول يعني كنا بمشكلة صرنا بمشكلتين الاكل و الدخان و اكتشفت انو ما حدا بيعطيك سرو و كل العالم عما تنشر خازوق للتاني _________________ هامش الراعي : من أطيب محلات الشاورما بالشام ____ يتبع : ... و يمكن الجزء الأخير :D |
اقتباس:
مكملين معك وعجبتني شغلة انو الدكاترة كلون تاع الزمالة :D |
كنت مليانة وصاحباتي كانو يتخوتو عليي مع اني كنت مليانة مش ناصحة وما كانلي كرش !!
وما نفعني لا ريجيم ولا اشي سمة البدن كانت كفيلة تخسرني 20 كيلو من وزني بس ما خلصت من حكي حدا صار الكل يحكيلي انصحيلك شوي شوفي وجهك شو صار فيه ! انو النصاحة مش منيحة اكيد لصحتك وممكن تسبب أمراض بس برضو ما تسمع كلام حدا.. روحك حلوة وهاد الأهم :D |
خيلة خيلة مان .. كمّل كمّل بالإنتظار نحن وأنا
:D |
اقتباس:
ابو الريم :D |
اقتباس:
من عندا هالكم دكتور يلي من أخويتنا :p هدول اذا خبصوا و جربوا بالعالم معليش |
اقتباس:
;) اقتباس:
:D |
الجزء الأخير {الرسالة}
رجعت بعد هالدوخات على البيت و شعلت سيكارة و قررت انو أنا هيك و بدي ضل هيك
و يلي بيفكر لجزء من الثانية انو يحكم عليي من كرشي بقلو مو أنا يلي بدي عمليات جراحية او ريجيم انت يلي بدك عملية جراحية لمخك يمكن لأنو فيه عكفة مخفية او لازمك ريجيم تثقيي باحترام الاخر او عدم احترامو من فكرو مو من كرشو و يلي مو عاجبو مشكلتو و إذا المجتمع مو عاجبوا كمان كمان مشكلتو عشتم و عاش كرشي !! انتهـــت {Abu William } :D |
اقتباس:
وعدم الحكم على الناس من الشكل الخارجي معك يا كبير .............:clap::clap: |
يعيش كرش ابو ويليام يعيش يعيش يعيش
بيني وبينك ؟ عالم هالايام بيشوفو حدا عندو كرش ما بيتركوه وبيشوفو حدا ماعندو كرش بطنو لزقان بظهرو كمان بيعلقو عليه |
اي مبروك الكرش المخلد عمو أبو ويليام:ss: يعيش كرشك..يعيش يعيش:clap:
|
وعاش كرش أبو وليم :D
ويسقط يلي مو عاجبو |
شيئ لطيف عنجد ، أسلوبك حلو يا زياد
اللي مابتعرفو انتو انو انا الوحيد اللي ناصرت كرش ابو وليم وانا اكتر واحد اتأثرت سلبنا من كرشو (وخزين المعبد شاهد ) على كل حال نصر الله كرشكم على اعداء الكرش الوليمي . دعم مولانا لكرشكم لا حدود له كما كرشكم لا حدود له . |
هلا سؤال منطقي جدا ابو اللول انت كرشك عن حقيقة ولا بس بالقصة؟؟
هلا منجي للجد رائعة الاصة... واسلوبك رائع تابع والى الامام...:D |
اقتباس:
اقتباس:
المهم الواحد هوي شلون بيطلع لحالو مو المهم العالم شلون بتطلع اقتباس:
اقتباس:
اقتباس:
اقتباس:
:D شكرا للكل :D |
يكبر كرش أب وليم يكبر يكبر يكبر
تعا لقلك هالقصة هاد ياسيدي أنا من شي سنتين بتطلع علي بتقول شو هالبدي غارد هاد ياخي إي سماع لكمل يعني كتافي عراض وهيك شغل أبو علي وكنت إلعب حديد بس لما صارت البكلوريا ماعاد لعبت وبتعرف قعدة وأكل قعدة وأكل أخر الحلقة طلعلي كروش صغير لعما شو هالمصيبة!!! خلصت بكلوريا ورجعت عالنادي بدي نشفو وأفتك من ربو بئا راحو العضلات شي إسبوع ولا طار لعما صرت أمشي بالشارع حس ناقصني شي غير سيكارتي صرت حط إيدي ع بطني لعما راح ماعاد حدا عرفني قام قعدتلك بالبيت كم يوم وعلا أكل يامعلم قام رجع بس أظغر من قبل يعني شي شوي بس بس إنو فرحت فيو وبرجعتو وهلق يوم بيروح يوم بيرجع |
اقتباس:
مزبوط ... معك انا 100% ، بوافقك ... زياد :akh: |
ابو وليم ... ما بعمري حبيتون ليلي عندون كرش...بس اذا كلون متلك فليحيا الكرش :gem:
|
شخصيا يمكن ما كتير اقدر استوعب موقفك خصوصا اني ما عانيت من البدانة باي فترات حياتي وبأي مراحل من مراحل عمري
يمكن صعب علي افهم عليك بالضبط شو بتقصد من فكرة الوزن بس مع هاد الشي فزلكة يعني كل العالم بتفوت " وانا اولهم " على النت وبتكتب " الشكل ما بهم ... سخيف اللي بينظر للشكل ... مرضان عقلي اللي بقيم الانسان بناء عن شكله " مع العلم انه ردة فعل الاولى والانطباع الاول ما بيلعب فيه دور رئيسي غير الشكل وبالتحديد الوزن انا مش معك بفكرة " المو عجبه ما يطلع " قد ما كانت معك بفكرة " بدي حاول غير من حالي " ما عبقول انت صح او انت غلط لأن بالاخير مافي قاعدة بتحدد هاد الشي وطالما انت هيك مبسوط انا بجي معك وبردد على صدى صوتك ليحيا كرشي :lol: |
| الساعة بإيدك هلق يا سيدي 10:20 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون
