|
ظاهرة الوشم .. تظهر مجددا في حلب ..
ألقى عناصر فرع الأمن الجنائي بحلب القبض على شاب لقيامه بوشم الشبان في محل تجميل خاص به في حي السريان القديمة منذ أيام .
وتم القبض على " سربست . أ " البالغ من العمر 27 عاما في حي " بستان الباشا " بعد أن وردت معلومات للفرع عن قيامه بوشم الشبان بأدوات مخبأة في محله الخاص للحلاقة الرجالية، حيث اعترف خلال التحقيق بأنه يقوم بعمل الوشم لفتية صغار مقابل الحصول على المال . في حين أغلق محل الخاص بـ " سربست " بالشمع الأحمر بعد أن تم توقيفه من قبل عناصر الفرع . وتعتبر عادة الوشم إحدى العادات الدخيلة على المجتمع العربي والسوري خصوصا لما تحمله من مخاطر نقل أمراض فتاكة جراء استخدام أدواتها بين عدة أشخاص . واستخدام الوشم ينطوي على مخاطر بحسب أطباء منها: إمكانية الإصابة بسرطان الجلد والصدفية والحساسية التي تحصل في الجلد في بعض الحالات والالتهاب الحاد بسبب التسمم وسوء التعقيم الذي يؤدي إلى انتقال العدوى بأمراض الالتهاب الكبدي وفيروس الإيدز والزهري . |
طبعا ... اصل هالظاهرة هوي دباغة جلد الحيوانات .. مشان تتميز عن بعضها ..
يعني أنا بعتبر اللي بيوشم .. صار ما بيفرق شي عن الحيوان .. عذرا ولكن هذه هي الحقيقة .. وكل شي بيكون عامل وشم .. بيكون عندو نقص .. وبدو يحاول يميز حالو .. بالوشم .. ديرو بالكن .. لاتوقعو هالوقعة ... هادا غير المضار الصحية .. |
.. فــي وشــم غــير دائــم .. افضــل ولــونو احــلى ع البشــره وبيســمح بالتـغــيير |
اي هو الوشم خطر ... بس أوقات بشوفو حلو أنا
منيح صار في شي اسمو رسم بمادة متل الحنا عالجسم بتضل لمدة اسبوع أو متل لزقات الها اشكال ... يعني حلو وبيعطي جمالية وهيك الواحد بيغير شكل |
اي وشوفيا
ضروري يتشبه بالحيوان في تاتوات بتزول بمجرد غسلها بالمي وانا شخصيا اشتريت منها من شان حطها بس اكييد ولا يمكن اني حط تاتو صبغة بس التاتو الارتيفيسيال ليه لاء بحطو وبعدين بشيلو بالمي عموما يسلمو ابو جعفر :D |
يعني بفهم من هالخبر إنو الوشم ممنوع بسوريا :? لأنو شايف محلات كتير شغلتها الوشم و ما حدا مقرب ناحها
|
اقتباس:
3ada dajhila abadan ma el3arab men zaman biwachmou aslan bdone enou elwachm balach 3ana nehna el3arab |
افففف ليش حتى الوشم ممنوع بسوريا؟!
بعدين مين قال انو الوشم بس "للحيوانات" وانو يلي بيعملو بيكون "حيوان" صحيح انا ما كتير بحبو و احيانا بشوفو كتير مقرف بس كمان احيانا بلاقية حلو ويعني ما بتزعجني شغلة انو حدا عامل وشم |
اقتباس:
وبما انو هالشي شبه مستحيل عنّا والامن ما بيعرف يتعامل مع المشكلة بشكل صحيح متل كتير مشاكل (ما ننسى المحلات يلي بتوشم برضى الامن) فرح يضل كل واحد فاضي ومالو شغلة يعملها رح يجبلو شوية معدّات بدائية ويوشم بالبيت او عالسطوح وما بتهمو لا النضافة ولا كون انو عم يوشم لطفل صغير طالما رح يقبض قرشين نضاف.... اقتباس:
اقتباس:
أمّا انو نجي بكل بساطة (لأنّنا نملك الحقيقة دائماً!) و نحكم عكل واحد عمل وشم ونعتبرو حيوان :o -لأ وفوق هالشي نعتبر حالنا بهيك أسلوب عم نوعّي الناس من ضرر صحّي!- فيعني.............. أهلاً بنا في بلاد العجائب !!! |
لك شو محلات وشو رخص ..ومين الحيوان صار ؟ ..
يه .. ههههههه واللهي تسالي شي بضحك .. انو كتير عادي الوشم .. هوي بالاخير فن .. بس بالمعقول .. يعني الواحد يعمل تاتو بمحل ومنظر حلو .. وع فكرة اغلب التاتو اللي عم يعملوه العالم تجميلي .. بسوريا (متل ما عم تقول حضرتك) ما عنا شي عم يكون اوفر ..وازا كان اوفر عم يكون بحالات خاصة ونادرة جدا جزيلا.. هادا الشب ممكن ياخدوه بس لانو عم يعمل لاولاد صغار متل ما قلت ...لانو متل ما بعرف انا انو لازم يكون فوق ال 17 او 18 ات ليست مشان البشرة تبعيتو وبكون بمرحلة نمو ..يعني مو منيح يعمل تاتو بعمر صغير ... بس التاتو مستحيل يكون ممنوع .. اي عم ارسم وبرضاة هالشب شو دخلك لعفى :shock:.. |
مين اجا فيي انا...لك اقبر قلبو العاطل في احلى من الوشم!!!
لقلكن ما بعرف شو قول بس بالنسبة الي انا بشوف انو الوشم شي مزعج شوي مو كمنظر ولكن يعني ممكن الشخص بعد ما يساويه لفترة يحس قديش انو نفسو يشيلو لانو تغيرت نفسيتو تجاهو ممكن انو يكون حلو بس يعني فينا نعمل تاتو مؤقت بحيث انو نكون قادرين نشيلو وقت بدنا..بس حرام انو صغار يعملو وشم بوجهة نظري |
اقتباس:
بس قصدي انو بدل ما تكون الطاسة ضايعة خلي ينظمو شغلة الوشم بطريقة واعية .... احسن ما تطلعلنا مواقع متل عكس السير (مصدر الخبر) وتبلش تخربط وتفوت الدنية ببعضا...... ويتقارن آخر شي التاتو يلي انا عاملو وبحبو (واستنيت سنين وانا عم زبط الرسمة لصارت عمل فني) بشي بقعة بويا كانو يدهنوها عضهر الخواريف :o |
شباب وصبايا روقو ... ووشم الجمال .. بعتذر .. مش قصدي هيك ..
طبعا في وشوم صغيرة حلوي .. ومهضومة .. وممكن تلبق للشخص اللي بيحطها .. بس أنا بقصد الأشخاص اللي بيملو كل جسمن تاتو مشان يبينو بالمجتمع ... عأيدين وضهرن وصدرن .. وحتى على وجهون ... هودي بتوقع مانن بشر ... بس للفت النظر وشكرا .. |
اقتباس:
ومعك حق بكل كلمة لانو كلشي بالعقل ممكن ينقبل غير هيك عبث |
اه ايوااه
انا معك بهي لانو مو حلو منوب الرجال بيفقد رجولتو والمرة بتفقد انوثتها :D |
اقتباس:
أنا إلي واشم أربع سنين ما لاقيت أي مضار صحيّة ؟! ممكن تتفضل تشرحلي شو بيعمل الوشم مضار صحيّة ؟! و بعدين أخي أزا معتبر اللي بيوشم ما بيفرق عن الحيوان أحتفظ برأيك لنفسك دخيل عيونك .. |
اقتباس:
مع العلم .. اني سمعت .. انو إذا كان اللي عمل الوشم مش خبير .. ووصلت المواد الي مستعملة بالوشم لطبقة معينة من الجلد .. ممكن تسبب أمراض خبيثة .. فقط لأخذ العلم .. وبعتذر منك مجددا .. وبرجع بقللك أنا قصدت الفئة من المجتمع اللي بتغطي حالها بالوشم .. |
هو أنا شخصيا ما بحب الوشم و لا بتسظرفو كتير... لكن ما عندي موقف تجاه اللي بيوشمو.. مجرد رأي شخصي..في ناس تحبو و تستظرفو.. انا ما كتير بحبو
يجوز الدخيل علينا بشكل عام هو التقنيات الحديثة تبع الوشم و الألوان.. لكن الوشم ليس عادة دخيلة أبدا.. فعلى الأقل في منطقتي تجد الغالبية الساحقة من العجزة و كبار السن مليئين الوشوم في الذراع و الأيدي و حتى بالوجه (طبعا وشوم بدائية كان يعتقد قديما انها تقي الأمراض! ) و هناك كذلك عادة وشم عبارات من طراز "رضاكي يا أمي" و " أبو فلان" ... الخ.. هذه عادات قديمة جدا في مناطق كثيرة من سوريا |
اقتباس:
مع العلم انو تستخدم مادة "الزرنيخ" السامة في صنع حبر الوشم ... وانا عملت هالموضوع مشان التوعية .. ومو مشان اعمل مشاكل مع اللي واشم وشوم .. طبعا وبسبب الحجب ما بقدر نزل صور يا ريت حدا ياخد الصورة من الرابط ويحطها بالموضوع ... We ask the Syrian government to stop banning Akhawia هادا الرابط ... http://tbn0.google.com/images?q=tbn:...yTattoKona.jpg |
اقتباس:
هو لازم يكون في تشديد على هالناحية من ناحية نوع الحبر المستخدم, في أنواع حبر ما بيضر بالصحة و بعدين كمية الحبر ما كتير تلعب دور.. كون الحبر يتوضع بين طبقات الجلد و ما بيوصل لداخل الجسم.. معزول يعني.. أما استخدام الزرنيخ.. من عقود بعتقد الحبر اللي فيه زرنيخ ممنوع حتى بحبر الأقلام.. الخطر الأكبر هو استخدام الأبر بشكل جاهل.. هاد الخطر الحقيقي.. و هو اللي لازم يراقبوه و ينظموه |
اي وشو عليه؟
كل واحد حر بحياتو يعني ازا الناس اللي جايين عندن بدن يحطو تاتو هالامن شو خصن ؟ انا وحدة من هالناس اللي ناوية حط تاتو ولسعتني عم بستفسر ع هالمضار اللي عم تحكو عنا بس انو عم فكر لبينما حط تاتو اللي مابيضل كتير وبينشال |
اقتباس:
بس بتوقع هادا غير الدائم لسا بيضر أكتر من الدائم .. لأأن الدائم بيتم تمويت الخلايا محل الوشم مشان ما تمتص البشرة الحبر ... بس غير الدائم .. يتم رسم التاتو رسم ويمكن للبشرة أن تمتصه .. .كل واحد يتصرف حسب اقتناعو .. بس قبل ما تعملو أي شي استشيرو حدا أكبر منكن أو حدا من رفقاتكن ..لأن رفيقي عمل وشم ..وندم ورج عمل عملية لحتى شالو .. وضل معلم محلو ..وصعب يروح نهائيا .. شو بدكن بهالشغلة . حدا بيجيب الدب لكرمو ... |
قصدكون الدائم هاد اللي كان بيحطو جد جدي وجدك و...و...و..الخ؟:?
|
بـصراحة بحب التاتو ..وفي اشكال كتير حلوة وممكن الانسان عن طريقو يعبّر عن حالو..فكرة معينة او جانب من حياتو..
بس انو المضار الصحية الناجمة عنو اكيد كتير خطرة..غير عن هيك ممكن متلا هالمرحلة من حياتك اللي انتي خلّدتها بواسطة التاتو ييجي وقت وتصير بدك تنساها فـ رح يكون التاتو الو تأثير سلبي عليك.. بالنهاية هاي شغلة حرية شخصية..بعدين منيح انو في رقابة على هاد الشغل..لانو في شروط معينة لوضع التاتو .. لو كان التاتو مش مضر صحيا ولو كان مش حرام دينيا (انا بعرف انو حرام لانو مضر) كان حطيت 3 وشوم :p واحد بيعبر عن الوطن..واحد عن الدين..وواحد عن برجي يمكن او شي بعبر عن شخصيتي :oops: |
على فكرة هالموضوع كتير مهم وما بحق لحدا يزعل منو لأنه بنشر معو حق بأنه الناس بتطلع لموضوع الوشم على انه زينة وبس وبنشر قصدو عن الوشم الدائم يلي بيعملو اشخاص ما عندن خبرة بكون بياع عالبسطة وبييجي يتفلسف ويعمل وشم بالابر وامثالها وهون لازم الكل ينتبه مشان يضمن صحتو.......لانه بالدول العربية المحتلة انه بكون بعض الغرب عندن عادي انه يستخدم الشخص نفس الابر لاكتر من واحد وعملو احصاء وسمعنا كتير عن هالحالات فكتير عرب بتورطو وبياكلوها فديرو بالكن على حالكم
اضرب شو بلعي!!!!!!!!! يسلمو بنشر |
و ليش كل هالتدقيق يعني ؟
انا بشوف انو الوشم شغلة عادية جدا و الشغلة بين اللي بيوشم حالو و بين حالو يعني لا انا و لا اي حدا فيه يغير رأيو ب هالشغلة اما بالنسبة لشغلة التشبيه بالحيوانات ف هاي الشغلة عيب والله يا شباب بس جد الموضوع حلو و خرج يعني ينحط من زمان |
اقتباس:
يعني ب ايامنا ما عاد حدا راح لعند اي حدا مشان يوشم ..انو مو متل اول متل ما حكى ياسين عن القديمين... هلأ الخبير بخصصلك ابرة بتنحط بعلبة واسمك عليها .. مشان الاعادة .. او ازا بدك ترجع تعمل مرة تانيي .. بيفتحلك وحدي نيو .. |
وشو بدهم من الشباب ؟!!؟
هلق اذا بدي اوشم على جسمي كمان لازمني موافقة أمنية ؟!؟!؟!؟! |
انه الوشم اذا مرتبط بذكرى حلو
بس يعني يكون عند محل موثوق مو سربست :D |
ذكرتني بالممثلات والمغنيات متل برتني سبيرز يلي بيعملوا وشم خصوصي بأماكن معينة بجسمها على صدرها أو أسفل صرتها أو على مؤخرتها أو بأماكن أخرى ، مع الاعتذار مسبقاً
بس أنا الصراحة بعتبر هالشي قرف بقرف ونجاسة وبيكش بدني لما بشوف صبية حلوة واشمة بطنها أو سفل ضهرها بشي شغلة ، بحس حالي حاستفرغ غير الأمراض والبلاوي يلي بالحبر المستعمل بهيك وشم ، في واحد قرايبي قللي بالفعل أحياناً الزرنيخ بيدخل بالحبر ولونه المستخدم بالوشم وهو مادة سامة من النوع الأول . حدا متابع فلم الهريبة من السجن لما المهندس بيوشم خريطة السجن على ظهره وبيعمل جريمة ليفوت السجن ويطالع أخوه ، عنجد فلم بيعقد بس بدون الوشم تحياتي لبنشر موضوعك كتير حلو |
ما بحب الوشم
اول شي حرام.. تاني شي مو حلو عالجسم:sick:قولكم هداك الوشم اللي حاطاه ليلى غفران حلو ع ذراعها:frown:هيك باقي الاوشام . في لزقات الاغتيفيسيال مثل ماقالت ساريتا وبالوان بتجنن هي حلوة ولابقة للصبايا.غير هيك ما بحب شوف الشباب واشمين او حتى حاطين لزق .. |
طيب على علمكون الوشم المؤقت قديش بيضل ((مو الاستيكرز ))
يعني يلي بينرسم رسم لأنو كنا ناويين على وشم دائم قام دكتورتنا العزيزة رعبتنا :sick: |
اقتباس:
انو حسب .. حسب قديش بدا تعيد عالرسمة .. لاو التاتو مشان يضل المفروض يعيد عالرسمة شي تلات او اربع مرات ازا عملتا دور واحد المفروض تروح بعد فترة .. صحي كمان بترجع للون اللي عم تحطو والكمية وطبيعة بشرتك ...كلياتن ب أثروا ... وياهلا :larg: |
اقتباس:
هي شغلة و الشعلة التانية ... لك هادا مو فيلم !! هادا مسلسل !! و اسمو مو الهريبة من السجن ....:o اسمو Prison break اول شي فكرتك عمتحكي عن فيلم مصري ...بس بعدين ... استنتجت بذكائي الحاد انو هو Prison break :lol::lol: بس فعلا حلو كتير ..:D |
على فكرة انا بعرف شغلو لسربست ...
الزلمة فنان ومعلم نظامي ... اوكي كان طماع وغلواتي ... بس شغلو مرتب ... اي رسمة بتعطيه ياها ولو شو ماكانت بيوشما طبق الاصل ولا تكة غلط ... عالعموم .. وا حبذا ... يعني وا حبذا ... انو نتطور شوي .. انو وفقا لحساباتي .. واستنتاجاتي ... انو الوشم يندرج تحت الحرية الشخصية ... مو هيك ؟؟ فيا ريت ما كل واحد يجي ينظّر انو هاد شي صح او غلط او انو بصير نوشم او لأ ... يعني بالاخير اذا انا بدي اعمل وشم ... ف عم بعملو على جسمي مو على جسمك ... حياكم .. :sly: |
اعتقد ان المشكلة الكبرى هي عندما يتقدم الانسان صاحب التاتو او الوشم بالعمر. فان منظر الجلد المسن وعليه التاتو او الوشم سيكون مقرفا على الاغلب
|
الوشم شي حلو كتير على الشب أو البنت بس أنا ما بفضل الوشم الدائم وانما المؤقت اللي بروح بعد فترة :D
الوشم بالنسبة الي مغري جداً وكتير بنجذب للبنت العاملة وشم على جسما :larg: وبدي اعمل وشم قريبا انشالله بس بأي رسمة بتنصحوني ؟؟ :gem: |
اعمل وشم بيعنيك أو بيعر عنك عن أفكارك
|
اقتباس:
بس أكيد بدي اعمل شي حسو أنا والا ما رح اعمل :larg: وشكرا عالنصيحة :D |
اف اف ..
كل هالحكي مشان الوشم .. نمبر واحد .. كل شي منبوذ اجتماعيا .. بيصير عنا بمجتمعنا .. حرام . غير لائق .. ومدري شو من هي الجمل اللي بتجي بالعادة لك اخي شبو الوشم .. بربي ما فيه شي .. هلأ انا بالنسبة الي .. مشتهي كتير اعمل وشم .. بس انا شو عملت انا ورفقاتي الاعازيز وصينا على حنة من قطر .. وجبناها .. ورسمناها .. وامتو خلصت تمت الشغلة 3 شهور .. هلأ هون الشغلة مو شغلة خوف .. من المضار الصحية .. لانو ازا بدي اقعد دور على كل شغلة بتضرني .. بيطلع ما في شي بالحياة مفيد .. حدا .. اي حدا .. يعطيني اي شغلة لجبلك اضرار من هون للصبح هلأ انا في شغلة اللا مبالاة عندي .. مريحتني كتير .. طيب .. ازا اجينا لنحسبا .. حريات شخصية .. اي نعم يا سيدي حريات شخصية .. طيب فيني افهم في شغلات مانا ممنوعة ليش مثلأ؟ مثلا الكلمات الموشومة .. باطل .. سورية يا حبيبتي .. كلنا فداك يا اسد .. وهلمّ جرا هلأ عراسي كل واحد بيحط اللي بدو ياها .. انا بدي حط جملة .." طيب مقلي .. بيتنجان "ل.. حدا الو عندي شي .. ؟ |
| الساعة بإيدك هلق يا سيدي 10:26 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون