|
الديــــن و الإلـــــــحاد "دعـــوة للتعايـــش"
رسالة وسؤال ..بحب وجههم لأخوتي المؤمنين ولأخوتي الملحدين .. بنلاحظ أنو أكتر اختلافاتنا وأشدها حدية بتتعلق بأمور الدين ولا مرة تخانقنا على شي نظرية فيثاغورثية .. أو على مين كاتب شي جملة أدبية .. ولما بنفكر بالنهاية بنلاحظ أنو كل خناقاتنا وإهاناتنا ما وصلت لأي نتيجة .. غير ضياع النقاش طول ما نحنا هيك ما فينا نوصل كلمتنا .. وبعدين ؟ .. ماحدا رضيان ولا حدا مبسوط من الطرفين .. نحنا هون بأخوية عم نحاول نلاقي مساحة تحتوينا .. اذا الواقع ما احتوانا .. نحنا يمكن مهجرين من أراضينا .. يمكن معنفين ..يمكن معانين من الطائفية ... يمكن مكتأبين ... يمكن موملاقيين حدا يسمعنا .. يمكن بس حابين نعبر .. نكوّن صداقات .. نغني أفكار .. نحنا شوي شوي بدل ما نخلي أخوية ملاذ إلنا عم نخليها أمر من الواقع أحيانا .. ونحنا فينا نصل لحل يرضي جميع الأطراف .. كيف ؟ لازم كلنا نتعاون أخوتي المؤمنين .. ( مسلمين ومسيحين ) ما بدنا طائفية!! لاتحاسبو شخص فينا بناءا على دينو .. أو لا دينو طالما هالشخص عم يعبر عن فكرو ..رأيو الخاص خلونا نحافظ على حرية معتقدو .. متل ما نحنا بحاجة نحافظ على حرية معتقدنا .. نناقشوا باحترام .. نحنا ما لنا أنبيا لنهدي حدا نحافظ على حرية إيمانو أو لا إيمانو - وكلنا بنعرف لا اكراه بالدين- ولما شخص بيهينك لشخصك.. بيهينك لدينك ... رح يكون المشرف اول شخص بيخالفو .. أخوتي الملحدين : كمان لاتحاسبو شخص فينا بناءا على دينو أو لا دينو .. مو كل مسيحي أو مسلم متزمت ارهابي متخلف .. مالنا مقتنعين بدينو - هو حر -طالما هو ما عم يأذيك .. سواء صح كان أو غلط برأيك اذا قيدلك حرية رأيك - واتهمك بالاهانة تبلياً - وما كان على حق رح يكون المشرف أول مين ينصرك ...ماحدا بيكمم الأفواه هون .. خلونا نحترم معتقدات بعض آراء بعض .. مانتحاسب على أساس مؤمن مع ملحد .. مسيحي مع مسلم نتحاسب على أساس إنسان مع إنسان ..أخ مع أخ .. اذا زعلنا من قبل واختلفنا خلونا نبدأ صفحة جديدة .. مابدي كلامي يكون مقالة تنظيرية أو مجرد حكي .. نحنا بحاجة أخوية .. وهي بحاجتنا مافي قكرة بتصل بالختاق .. ومافي حدا صح على طول .. خلونا ما نتشبث بالرأي .. يمكن بآخر لحظة نكتشف أنو كنا غلطانيين خلونا نتقبل الحوار .. وسؤالي الكن بالنهاية .. بهالطريقة فينا نتعايش مع بعضنا ملحدين ومؤمنين مسلمين ومسيحيين تحت سقف أخوية ؟ خلونا نتعاون .. شاركوني آرائكن لنصل سوا .. دون الحياد عن الموضوع :D |
أنا موافق على فكرة التعايش... وبتمنى الطرف الأخر يتخلى عن مبدأ الكره لمجرد الإختلاف.. يعني مو كل حدا مو متلي لازم اكرهو وهاجمو وقيم عليه الحد.. بس للأسف باعتبار هي المبادئ "هيَ العقيدة" مابتخيل نقدر نوصل لحل..
والسلام |
انا خلقة متعايشة
بس لنحكي شي.. انا كتير بتزعجني فكرة انو لما حدا يكتب شي يمكن بيمت شوي للدين .. بيجي حدا بيقلب الموضوع لمسخرة واستهزاء بـ ما كـُـتب .. وهيك بتعلق بين الـطرفين.. ( بمعزل عن مين هالحدا .. ) .. بطبيعة الحال غالباً اذا مو دائماً بكتفي بـ انو المشرفين هنّي يحذفوا وما بفوت بهيك احتدامات.. بس قلك كوني ما عم فوت بهيك احتدامات يعني شي ما عم يزعجني؟ لا عم يزعجني وكتير كمان.. انو ليه ما بيصير نقاش عقلاني ادا حدا بدو يناقش.. انو كتير بلاقي تطاول على ما يؤمن به الطرف الآخر .. ان كان على الرب او على المعتقد وَ ما شاكل .. عم بحكي بغض النظر عن شو هو المعتقد يللي بيؤمن فيه الطرف الآخر.. بس بيصير تطاول وَ تكاتف على هالتطاول .. متل ما حكينا انا وبلاك ايريز من كم يوم.. يا ريت يصير تعايش.. برايي لحتى يصير هالتعايش.. ما لازم يضل ولا موضوع بيمت بـ صلة للدين بغير القسم المخصص للدين واللي ما يؤمنوا بدين لا يفوتوا هالقسم و انو ما لازم تضل مواضيع حقيقةً بنحكي كتير بيتخللها تعدي على الدين نفسو..من قبل كاتبين ما بيؤمنوا بشي يمكن.. انو خيي انت ما تؤمن بحدا حريتك.. بصراحة وبصدق بقلك حريتك ومش شأني انك تؤمن ولا ما تؤمن بس ما في داعي للسخرية على معتقدات الآخرين :D الك ooopss |
حلو الكلام ,,,, وانا من الناس اللي ما بتفرق معي واول ما دخلت هون بعرف انو في ملحدين وغيرو وبحياتي ما حكيت مع واحد او كرهتو لسبب انو ملحد او انو من دين غير ديني ,,,بس لانو اكتر الاشخاص الملحدين لما بدهم يفتحو موضوع بيغلطو عالذات الالهية يعني لو ما حدا بيغلط ما رح يصير في اي شي بين ملحد او مؤمن او غيرو,,,,
|
طريقتي يجب ان تكون كما يلي :
لي معتقدي ..لا اطالب احد بتبني هذا المعتقد .. ولا أحقر او اهين او حتى املك الحق بتقييم معتقد احد بالمقابل .. لي الحق بأن يُحترم معتقدي .. وليس لاحد تحقير او اهانة ما اعتبره مقدس وليس لاحد تقييم فكري او ثقافتي بناءاً على هذا المعتقد .. بالنهايه فكلنا يمارس حقه ooopss :D |
أهم شي من كلا الطرفين يحترموا آراء بعض وما يحاولوا يكتبوا شي استفزازي والي بخلي هالشي كلو يتأجج
متل مو صاير هلأ بأحد المواضيع الموجودة حاليا والي الشباب نازلين ببعضون وبصراحة في كتير شباب عم تحكي حكي جدا استفزازي وأخي لكم دينكم ولي ديني كل واحد على دينو ومعتقداتو الله يعينو |
عذروني رح رد بالمجمل وارجع بعدين رد عليكن واحد واحد... كل النقط يلي عم تحكوا عنها هي يلي بدنا نحلها ... -يعني حكيكن مزبوط بالمجمل انو الطرفين عم يتهجموا عبعض أحيانا... ومشان هيك نحنا بلشنا وبدنا نبدأ من جديد ونحل المشكلة مع بعضنا ..بمساعدتكن .
|
المشكلة أنو في ناس بتفكر أنو اهانة الاله هو كنوع من أثبات ذاتو الالحادية وأنا بشوف أنو في تناقد كتير بأفكارهم . لما بيبنوا كل نقاشهم على نقد وألغاء مالا يؤمنو به بسهولة اذا كنت لاتؤمن بوجود الرب فلماذا تذكره ليل نهار لما بيكون الشخص مالو مؤمن بشي المفروض أنو مايذكروا لأنو أصلا بالنسبة الو هو شيء غير موجود بعتقد أنو الناس بكل المعمورة كأفراد . عم يدورو على شيء يجمعهم . والناس وصلت لأنو تحترم حيوان بالهند مثلا لأنو ممكن يكون مقدس عندهم . بس لحنا لسا منهين معتقدات بعضنا . على مبدأ أثبات الذات |
اقتباس:
لانو كل ما رح يحتد الحوار رح يبرم الدولاب عن جديد وعلى قصة نشر دعوة وعلى قصة تبشير وعلى نهي عن لتنين اقتباس:
بس خود بعين الاعتبار انو نحنا او العالم كلها تربت على وجود اللة وعلى قوة اللة واحيانا بتصير الشغلة كأنها كلمة ومنقالة يعني بتنقال لمجرد تعويد مو لانها مقصودة واحيانا اخرى في ناس برغم انكارها ل "اللة" بيضل عندها خوف معين وعدم قناعة بيظهرها ال "لا وعي" عن طريق تكرار عبارات تذكرو |
اقتباس:
|
جاي على اشوف اول بني آدم بالطريق " ما بتفرق معي ملحد او مؤمن " واتعايش معه :larg:
لك صعي فين راحوا جماعة " اللادينيين " وجماعة الحنفيين تحت اي باب بيندرجوا .؟؟؟؟ دينيين ... لادينيين .... ملحدين ..... بياعين بطاطا .... يعني شو وضعهم بالاعراب :shock: |
اقتباس:
حلو كثير هالحكي .. خصوصا هالجملة .. يعني لو كل الاعضاء يلتزموا فيها .. حتى لو كان عن مزح او عن تعبير عن رأي .. بدون اهانة لمعتقد غيرنا .. مشكورة على هاللفتة الحلوه .. وانشالله نتعلم جميعنا .. |
حلوة كتير فكرة التعايش oopss .. بس لقلك شغلة التعايش رح يتجسد اذا كان في احترام وتكاتف بين كل الاعضاء ...يعني ما في داعي الواحد يتعرض لمعتقد التاني...اذا كان المؤمن بيشوف الملحد مخطئ فما في داعي للتجريح...و اذا كان الملحد مو مقتنع بمعتقد المؤمن فكمان ما في داعي للتعرض لمعتقد الطرف التاني...يعني نحكي بالمعقول..الكل هون بالغين و واعيين انّو اي موضوع بينطرح و يكون استفزازي رح يثير الطرف التاني اكيد... و رح نشوف الردود اللي ما الها فائدة و شتائم و زعل....الخ
فلهيك الحل انو كل واحد بدّو يعرض موضوع للنقاش فلازم يكون خالي من العبارات التجريحية و كمان تدخل المشرفين عالمنتدى ضروري...يعني لمّا يصير حكي برّات الموضوع او يصير في تطاول على شي معتقد لازم يكون المشرف موجود لحتى يكّف التطاول...كمان شغلة تانية لازم يكون المشرف عادل في قرارو...يعني يكون حيادي... مشكورة oopss عالموضوع...و رح نوقف جنبك لتحقيق هذا الهدف :D |
مع احترامي لكل الأعضاء المتفائلين ومع احترامي للمنسقة الجيدة المتحمسة والي عبتحاول من فرط حماسها تعمل نقلة نوعية بالأخوية
بعرف بدي اواجه انتقاد كتير على هاد الرد بس عادة اذا واحد بدي يمشي بنوعه بيلطشوه كيف مشان يفيق ويصحى مع اني ما بحب آخد موقف الضارب الكف لأن كل العالم بدها تعلق معي بس هوي كف ولازم ينضرب عاجلا ام آجلا .... مشكلة العلقة بين الدينيين والادينيين مانها مشكلة جديدة ومن الصعب جدا حلها " هاد من المنظور المتفائل جدا لكن واقعيا لا يمكن حلها ابدا " هلق الشعب الديني بشكل عام هوي الشعب اللي يعتبر الدين محور حياته وبينبني حياته على مبادئ وتوصيات الدين واحكامه وانا شخصيا كانسان ما كتير بيخرط لي مشطي فكرة الدين واصنف نفسي من مشتقات اللادينيين ، شخصيا ما عندي اي مشكلة مع انسان من هاد النوع طالما بينه وبين ربه القصة وما عبيتعدى على غيره . بينه وبين ربه حر .. ما حدا ماسكه ... بكون ابن وأب ... يكون عابد ومعبود ... يكون آلهة ومنفذ للأوامر ... متل ما بده يكون يكون انا ما بهمني واصلا غلط اني اهتم بهيك شي لأنها علاقة شخصية جدا بين الانسان والقوة العليا ما بحق لحدا يتدخل فيها .. بس وقت بده يكون معي لازم يكون انسان فقط لازم يتعامل معي كانسان فقط ما لازم يهتم شو لون عيوني وشو نمرة رجلي وشو وضع العلاقة اللي بيني وبين الآلهة وللأسف العالم بتدخل بشكل كتير سافر ووقح بالعلاقة اللي مفترض تكون شخصية بين الانسان والقوى العليا هي اول باشتان تاني باشتان انا مستعد احترم كل الاديان ومستعد احترم كل الآلهة وابعد عنها وما اجيب سيرتها على لساني طالما لا اتباعها ولا هية بذات نفسها عبتجيب سيرتي بالعاطل يعني وقت بتم تصنيفي على اني كافر ويحلل سلبي حياتي ويحلل قتلي بالمكان اللي بشوفوني فيه لا اسمحوا لي يعني مشاعركم اكيد مش اهم من حياتي بدي سب والعن واتمصخر حتى موت من الضحك لأن بكل الأحوال انا ميت وميت عبنتظر احد المجاهدين لينفذ حكم الله ، الآلهة نفسه اللي مانه مستعد يحترم حقي بالحياة وحقي باختيار الشي الأنسب " بحسب وجهة نظري وما حدا مجبر يقنعني فيها " فقبل ما تطلبوا من اللادينيين يحترموا الدينيين اطلبوا من آلهة الديينيين يحترم اللاديينيين ويعتبرهم بشر من حقهم الحياة اذا كان في حل فهو ان الدينيين يعيفوا دينهم على طرف ويشاركوا كبشر ومن منطلق انساني بعيد عن اي مذهب ديني برجع بقول اذا كان في حل ... |
اقتباس:
تالت شي بقدر افهم من كلامك انو الدينيين مش بشر,,, واخيرا انا اذا بدخل بموضوع فيه شي من هالحكي فانا ما بدخل الا اذا لاحطت انو في ناس بتغلط على الذات الالهية ,,, او بتجيب سيرة ديني بالعاطل ,,ولو ما بشوف هيك حكي انا ما بدخل لانو متل ما نتا قلت كل واحد بينو وبين ربو وبين الالهة تبعو ,,, بالاخير هوي اللي رح يتحاسب مش انا ,,,, |
هو بس يكون احترام للطرف الآخر ولو شو مكان معتقدو أو فكرو طالما هالشي ما بيأثر عليه
وبالمقابل الطرف الآخرما بيفرض رأيو وطريقة حياتو ومعتقدو عالبقية هون بيصير التعايش |
اقتباس:
بس مو لنبدا بحالنا بالاول !!! ما تزعلي مني سندرا .. :D |
اقتباس:
اقتباس:
|
اقتباس:
انا شوفتني هنتك او هنت العلمانية .. !! او عاملت واحد من هالمنتدى على اساس دينة !!! يعني بس فهمني مو اكثر .. بس يا ريت تكون طريقة كلامك معي فيها احترام لغيرك .. ليكون في احترام الك .. ما حبيت ارد على تعليقك الي قبل .. لانو ما افهمت شو جاب سيرة احترامي للعلمانية !! مع اني مو ماشي على هيك نهج .. وبس .. |
اقتباس:
بس انتي .. فهمتني .. انو عيب ازا كانو كل المشرفين علمانين وانو هي شغلة اقرب للكفر بهالشي هاد .. انتي هنت العلمانين صح او لاء؟ |
اقتباس:
انا قولت لازم الواحد يكون علماني .. يعني محصور للعلمانيين .. وهمي حريين بهالنقطة .. شوفت من ردي تهجم على المشرفين او شي .. !! |
فش تعايش ...
|
يا جماعة ارجعو لصلب الموضوع
احنا بدنا هون ناقش الحل :pos: |
المشكلة جدلية ...
يعني نحنا الملاحدة ما عندنا مشكلة ... يكون الانسان مؤمن ... يكون .. ملحد ... يكون زنديق ... يكون مثلي ... ما بتفرق معنا ... طالما هالشغلة امر بيخص سين من الناس بذاتو وما عم يزعجنا فيه ... بس المشكلة كالتالي ... عندك مجموعة من البني آدمين عم تعتبر انو معها الحق او الحقيقة المطلقة ... بمعنى انها اصلا ما عم تحترم الاختلاف الطبيعي ... وبالتالي بالنسبة الهن نحنا مجرد مجموعة من المساكين ... واليتامى وعابري السبيل ... بالاضشافة لان الفكر الديني متقوقع واسمحولي احكي هالكلمة " متحجر " ... ما في مرونة ليقبل اي نقاش ... سواء مبني على منطق او علم ... لهيك في كتير مواضيع كان المفترض بها انها تكون علمية ... كمواضيع بتمس الداروينية ونظرية النشوء ... تحولت لانو شغلة بتخص الله ونفي قاطع للنشوء بدون ادلة علمية وصار الموضوع موضوع ديني بحت ... نفس الشي لانعكاس الاقطاب المغناطيسية للارض ... بمعنى ان الدين في كتير احيان عم يتدخل بامور ما عم تمت له بصلة ... ما رح ناقش كتير ... بس شغلة بتصرع .. كل يوم "اسم الجلالة طلع على الشجرة ... اسم الجلالة نزل عن الشجرة" ... برأيي الحل للتعايش ... انو ما للآلهة للآلهة وما لقيصر لقيصر ... يعني ما يدخل الله بكل موضوع عم نحكي فيه ... |
تعقيب
مرحبا صبايا وشباب
"أخوية" هاد الاسم هو اول ما جذبني لاني افتح واتطلع على هالمنتدى كنت مفكر اول ما قريت الاسم ومن طريقة الكتابة بعناوين المنتدى والتعليمات انو منتدى للحكي يلي مالو طعمة يعني كتابة بالعامية وكلمات هيك حلوة خفيفة ومرحة. بس لما دخلت وقريت كم موضوع تغيرت نظرتي تمام اول مرة بلاقي منتدى ماهو نمط واحد يعني فيه تشكيلة كبيرة من حملة الافكار وانا مارح قول دينية او طائفية او حتى عرقية او اي من هي المصطلحات انا رح قول فيه كوكتيل افكار والاحلى انها افكار صريحة ومثقفة يعني في اختلاف بالفكر بين أخ وأخ تاني من اعضاء الاخوية اختلاف جميل وهو يلي بخلي المواضيع تكون غنية ومثيرة وبيحتد فيها النقاش . هلق برجع بقول الاختلاف جميل بس ما يصل فينا لمرحلة الخلاف وبصراحة عم يصير في اخطاء من بعض الاعضاء يلي عندها شوي جهل بأصول النقاش "مني وجر" لكن على الاغلب هدول الاعضاء على حسب ما لاحظت انهم بكونو اعضاء جدد لذلك بدنا نعذرهم مو نعذرهم انو نتغاضى عن خطأهم لا. بس نعذرهم اننا ما ننجر بالنقاش لمكان نحنا ما نريد نوصلوا. او احيانا في كلمات انا بقولها وهي ما بتعني شي الي او حسب فكري انا انها كلمة عادية لكن هي حسب فكر الاخر بتكون كلمة استفزازية وخطيرة بحق أفكارو ومعتقدو.ومن هون منبلش ببعض على خدني وجيتك ومنشطح عن المواضيع الاساسية هلق بتقولوا اي شبو هاد ما صرلو بالقصر من البارح العصر. اي لا انا من اكتر من سنة وانا بتابع اخبار الاخوية بس من فترة لصار نصيب وسجلت وبعدين هاد الكلام من محبتي للمنتدى ككل وللاعضاء اخ واخت وياريت كنت بعرفكم شخصيا واحد واحد من الافكار الحلوة والغنية يلي بيحملها ك واحد فيكم اعذروا اطالتي بالموضوع وتقبلوا محبتي الكم |
اقتباس:
اقتباس:
|
طيب ... لاحظو ردودكن كلكن .. كلكن بدكن وموافقين .. حبيتو الفكرة .. وعم تقولو مارح تزبط بسبب الطرف الآخر .. طيب بلا ما نلوم الآخر ...ونقول ماحتزبط ... خلونا نبدأ من جديد .. كتير حابة رد عليكن بس تنسيق الخط ما عم يساعدني . ما عم احسن اقتبس .. رح ارجع رد عليكن فردا فردا
|
اقتباس:
مفكرة انو الطرف الآخر هوّ يللي عم يعمل مشكل.. بقا لهيك كل واحد يضبط حالو.. ويبعد حالو عن مواضيع الدين او اللادين..وبتنحل انشالله يعني كل واحد يبدأ بحالو.. ويردع حالو عن هالعلقات.. |
اقتباس:
بتمنى أنت كمان لا تزعل مني :D |
viva syria.... تمام انت موافق على فكرة التعايش ... هاد المهم .. أبدأ من عندك .. يعني كل واحد يبدأ من عندو ..وخلينا نعتقد أنو فينا نصل لحل مو أنو مافينا .. تحية الك
|
>gabriel... حكيك مزبوط متحمسة وجديدة :d بس مو غلط نحاول ..بس مو بحاجة كف يصحيني .. يعني بعرف أنو الشغلة صعبة بس مالها مستحيلة .. أنو نكون عالقليلة بأخوية أعضاء واعيين مع بعضنا .. ونحنا مهمتنا نحاول ..بعدين ليش صعبة ؟ أنت بدك وكل واحد كتب رد بدو طيب هي خطوة منيحة بقي نلاقي الصيغة ونتفاهم عالأسسس هي أول الشي .. تاني الشي , كلامك مزبوط لازم يكون التعامل انسان لانسان .. مو عاساس الدين .معك حق تنزعج لما حدا يسيء الك .هلأ الحل : يلي اقترحتو انت " الدينيين يعيفوا دينهم على طرف ويشاركو كبشر ... الخ " مزبوط بس ناقص .. لازم بالاضافة لألو اللادينيين كمان ما يسفهو المعتقدات ويحترموها .. الحل بدو طرفين . بدو نخفف الحدية واللهجة ... وفي نقطة بحب احكي فيها ياريت تقنعكن .. مو كتير ضروري نرد الاساءة بالاساءة ... يعني واحد أسألك .. عم ينزل من قيمتو مو من قيمتك .. موضروري نزود المشكلة ونرد الاساءة .. المشرف بيتصرف ولاكيف ؟ _ تحية الك
|
اقتباس:
بالاول كان متل ردة فعل على الهجمة المدري شو رب دينها تبع اسم الله على سمكة وعلى قطعة لحم وعلى ظهر جرادة وبيني وبينك لو واحد لا ديين كان كاتب موضوع تبع اسم الله على اللحم كان اعتبر اهانة واسائة واعتبر عبحقر بالمعتقدات وعبهين المقدسات و..... الخ بموضوع تبع فيفا سيريا دخل شب حط آية دينية طيب انا شو مطلوب مني بهي النقطة اعمل !!؟!؟! شو مطلوب مني اتصرف ؟!؟! احسن رد بالنسبة الي كان بزمانه " يا جماعة اتركوا الدين على زيق " وعلى نطاق الأخوية اول ما بينكتب شي موضوع مثلا خليه على الفضاء او على لون الثياب الداخلية ... اي شي يعني ما بتلاقي غير واحد كبسك آية مبعرف من فين ناكشها وتفضل ناقش كل القصة انه الانسان العربي = 0 خارج نطاق الآيات وخارج نطاق الدين والشباب بكل وضوح عبروا اكتر من مرة انهم ما بيسوا شي بدون الدين " كان هدفهم يوصلوا لنا مسج اننا ما مننسوا شي بس واننا سخيفين واننا بلا شرف وبلا اخلاق وبلا ..... راح عن بالهم انهم صرّحوا بموقف صريح انهم ما بيسووا شي وانهم خلقوا للعبادة والتعبد والعبادة هية الفرق الوحيد بينهم وبين بقية الكائنات من حيوانات ونباتات" وخليني قول لك ليش القصة مستحيلة اذا حاولتي تشتغلي على مجموعة من الاعضاء لتوصلي معها لنقطة الدين برات النقاش الدين خارج صفحات الأخوية ووروه بشكل سيئ او جيد امر غير مستحسن مع اول عضو جديد حيجي يكبسك آية من شكل آخر بتشوفي كل الشباب رجعوا لنفس النقطة وكبسوا هنن بدورهم آية تانية في متل بقول لك " دنب الكلب اعوج لو حطوه بالقالب 100 سنة " اذا حابة فعلا تعملي شي بنصحك تبدي بتأهيل المجتمع لأن على هيك مجتمع صعب تبني شي عيفيها عوجا وخلينا ننعوج معها ... احسن حل ... :D |
انا مع جابرييل انو ادخال ايات بموضوع علمي احيانا بيغير بمجرى الموضوع
بس كمان فينا نعتبر الاية هي اقتباس من كتاب متل وقت بقتبس من كتابات افلاطون او فرويد او اي كاتب تاني الفرق الوحيد يلي لازم نراعيه يعني يلي بدو يستشهد باية من القران او الانجيل او العهد القديم بدو يعمل حساب انو لاقتباس يلي حطو بدو يتناقش لذلك بدو يكون حذر بالاقتباس تبعو ومن ناحية تانية اننا نحنا كمان ما نحقر باقتباسو ولا نحقر بالكاتب المقتبس عنو شغلة تانية يمكن خارج الموضوع شوي انو لما بدك توصل انسان لفكرة معينة ما بصير نعطي اياها مقولبة وجاهزة ليقتنع فيها الافضل انو تخليه يعرف يفتح مداركو وتفكيرو ليصل هو بنفسو للفكرة ويقتنع فيها |
gabrielحاجة تقلي القصة مستحيلة ..وتحبطني ماعم تجي بقاموسي هالكلمة! .. صعبة بس مو مستحيلة .. طيب عم قلك بنحاول بنحاول قلي شو حنخسر ؟ عم تحكي عن تأهيل المجتمع طيب أخوية مو مجتمع صغير ؟.. نحنا هلأ بهالموضوع عم نأهل أفكارنا ونتناقش ونصل لأبعد نقطة نقاش ... رح حط بعدين مقترحات ونناقشها ونتعهد بتطبيقها اذا بلشنا 10 منيح بعدين 15 وهيك .. موأحسن من الصفر .. طيب مشان قصة الأعضاء الجدد .. هدول مو متعودين عجو أخوية ولا قوانين أخوية عيفوهن .لاتردو باساءة . رح يتخالفو وتنحذف ردودهن ويعرفوا القوانين .. طيب اذا رديتوا باساءة للدين مثلا شو رح تكسبو ؟ أنو هيك جكر ؟ طيب اذا رديتو رد موضوعي أو مارديتو وخجلتوهن من حالهن مو احسن .. اذا كنت أنت الكبير ؟ سمحلي هلأ عقب على جملة بحكيك "راح عن بالهم انهم صرّحوا بموقف صريح انهم ما بيسووا شي وانهم خلقوا للعبادة والتعبد والعبادة هية الفرق الوحيد بينهم وبين بقية الكائنات من حيوانات ونباتات";طيب مو ملاحظ التهجم ؟ قلي ؟ ايا شخص مؤمن عندو رابط بينو وبين الاله مابدنا نسفه معتقداتو ..ما بدنا !! اذا احترمنا الآخرين رح ينجبروا يحترمونا .. متل ما أيا شخص ملحد عندو رابط مع رمز علمي قكري أو نظرية بيدافع عن تسفيهها ؟ ولا كيف ؟
|
اقتباس:
بيناتنا gaberiel العضو اللي يكتب مشاركات و يلاقي كذا رد ما عجبو ...فيه يجاوب بطريقة دبلوماسية بعيدة عن التجريح و المساس بمقدسات التانيين... يعني الحل كتيييييييير سهل و في متناول الجميع..بس يصير للواحد وقغة مع حالو...يعني بيصير هو رقيب ردودو و قبل ما يزت مشاركاتو لازم يوضع نفسو بدال الشخص اللي بدّو يقرأ الرد...و هيك ما رح نلاقي اي صعوبات :D |
دعوة للتعايش..مبادرة كتير حلوة..وصدقاً شـايفة انو ممكن نتعايش كلنا سوا ازا قدرنا نستوعب الاخر..وازا قدرنا نفهم انو مشان الناس يحترمونا لازم نحنا كمان نحترمهن..وانو هالانسان اللي قبالنا عندو افكار ومعتقدات غير عني مش بالضرورة تكون متوافقة مع افكاري او مش شرط اكون حابيتها بس لازم اعرف انو الو الحق يحكي فيها ويعبر عنها طالما انو هو ما عم يجرح بمعتقداتي ولا عم يهينها ولا عم يدحشها بطريقة سخرية واستهزاء بمواضيعو :frown:..يعني يا عمي عندك كل الحق تعبد وتقدس مين ما بدك بس ليش تا تتهجم على ربي ..كل واحد حر بآلهتو بس ما في حاجة يتعدى على معتقدات الغير..وكمان هون الحق مش بس على اللي بتعدى على معتقدات الغير لأ كمان على اللي بفوت على موضوع ما بعنيه..
متلا بفوت مؤمن على موضوع لملحد وبحطلو رد ديني يعني طالما هالملحد ما جاب سيرتك وسيرة إلهـك بالموضوع ليش تا تلحش دينك بالنص! والاهم من كل هاد ومشان يصير في تعايش حقيقي لازم يكون عنا استعداد للتسامح ومش لازم ندئّر على كل كلمة بتنحكى من باقي الاطراف بس مشان نحّولو لجدال ساخن !! بس فـي نـاس بدمها الشــي ما بتـقدر بلا مـا تزت حكي شـمال يمين..وبلا ما تثبت حالها عن طريق إلغاء الآخــر :pos: على كل برجع بقول مبادرة كتير حلوة..ثانكـس أوبـسـنا :D |
matya , سوا ربينا biomen ,black iris , مالي خايف فهمت انكن موافقين وشايفين في أمل ... كتير حلو خلونا نتابع سوا :D
|
SANDRA أي مزبوط أهم شي احترام الآخر ياريت كلنا نبدأ من هون ... MARWA مزبوط حكيك التسامح مهم .. خلينا كخطوة أولى مانلقي لوم عالآخر .نبدأ من نفسنا.. أنتو معي صح ؟ خلونا نحاول سوا :D
|
عزيزتي اوبس انا بشوف و بعد سنة كاملة بالاخوية انو عم يمر هالموقع بحالة تغيير شاملة و هالشي من تغيب بعض الاعضاء و ظهور آخرين يعني بالاول كان كلو مسيحية و بعدين اعتدلو و بعدين التغت فكرة الدين و صار الموقع علماني و برأيي زينة العقل اغلاق الاقسام الدينية لأنو كانت مو للحوار بل للمعارك و طبعا انا مع التعايش بين الجميع شو ما كان دينهن لأنو الدين بالنهاية يتعلق بالشخص بحد ذاته و ليش للاشهار و مشان الواحد يتعصب و يعملي احزاب و خناقات واللي عندي صح عندك غلط و عندو و عندها صح لذلك ما حدا دخلو بدين حدا و منتعامل على الشخصية و بس و شكرا عالموضوع لأنو كتير كنا عم نعاني من هالشي
|
اقتباس:
هلق باللحظة هي ينزل شي ملحد موضوع محتواه سؤال لمفتي السؤال بشكل " هل يحق للاطفال التفرج على توم وجيري " الجواب " نعم ... لكن بوجود رقابة كون مسلسل توم وجيري يسيئ للذات الإلهية " بعتقد اول شي بدي اتخالف وبدي الاقي استهجان مع العلم انه من فترة حط واحد هيك موضوع .. وانحذف طبعا ... لكن الردود كانت متل العادة " جزاك الله كل خير .... فعلا فكرة ..... جعلها الله في ميزان حسناتك " الفكرة بدها تخفيف اذدواجية شوي يعني اكون انا حاطط موضوع تبع لفظ الجلالة على لحم المدري شو سما ربه ... يا لطيف شو كان صار ... يا لطيف يا لطيف .... اقتباس:
على مبدا التجاهل معناها انا كمان بتمصخر وهوي يتجاهل مصخرتي .... بس بالأصل ليش حتى يحط الآيات والكتب المقدسة والأقاويل الخالدة والشخصيات المنزهة عن الخطا موضوع نقاش وموضوع " شواهد " متل ما كنا نعمل بالعربي ايام البكلوريا منحط بيت شعري كشاهد ... صار العالم تكبس آية دينية كشاهد على كلامهم .... اقتباس:
اقتباس:
صلّي معي يكونوا عبيحضروا يوميات مدير عام ومتأثرين بالشارة ... ما يكون قصدهم انها فعلا عوجا ... |
| الساعة بإيدك هلق يا سيدي 11:51 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون