|
منصة "الشرف" الباريسية... أخر ثلاث خطوات من الصمود و التصدي
 لم أدري و أنا أشاهد منصة "الشرف" الباريسية المخصصة للزعماء لحضور عرض الباستيل بمناسبة عيد فرنسا الوطني مااذا شعرت... ثلاث خطوات كانت تفصل الرئيس السوري عن إيهود أولمرت!!!. أين الصمود و التصدي و الممانعة و المقاومة؟ أين الوفاء لدماء الشهداء؟ أين جولاننا؟؟ أين أسرانا؟؟ أين شعبنا من هذا الموقف؟؟ كيف وصلنا إلى زمان يعتبر فيه الوقوف بجانب أولمرت و إجراء المفاوضات معه هو الشرف و الوطنية بعينها وحب الوطن وحرية الفكر و التعبير والنقد البناء في سبيل عزة الوطن هو الخيانة و التآمر الذي يعاقب المنادون بهم في المعتقلات وأجهزة المخابرات... لم يصل أحد من المعتقلين السياسين في سوريا ومهما كان عميلاً وخائناً وموهناً للشعور القومي إلى هذه المسافة من أولمرت رئيس الحكومة التي قتلت شعبنا في الجولان و لبنان وفلسطين... لم يفاوضه أحد منهم ... و لم يستمع أحد منهم إلى خطاب من أولمرت بشكل مباشر... ولم يتناول أحد منهم الطعام معه على طاولة واحدة... كل هذا حصل في باريس !!! يبدو أن حدود الوطنية "حسب تفسير نظام الحكم" تُختصر كل يوم.. حتى وصلت اليوم إلى النصف متر التي فصلت بين أولمرت ورمز الصمود و التصدي على منصة الشانزليزيه... بعد كل هذا لا أتصور أن هناك أحد من أبناء المعارضه السورية "الحقيقية" من الممكن أن يخوّن أو يشكك في وطنيته أو تآمره على وطننا... لا أحد من أبناء ربيع دمشق أو إعلان دمشق أو من المجتمع المدني فعل شيئاً من الممكن أن يقارن بما حصل بباريس... إذا كان كل ما حصل في باريس مباحاً وصحيحاً يجب علينا التفكير في الأسباب الحقيقية لقمع الحريات و قانون الطوارئ و الإعتقال التعسفي وما السبب الحقيقي لوجود آلاف الأحرار في زنازين المعتقلات... ألم يحن الوقت لمصالحة و مصارحة وطنية شاملة؟؟ ألم يحن الوقت لتسمية الأسياء بمسمياتها؟؟ ألم يحن الوقت للإفراج عن المعتقليين " الخونة العملاء المضعفين لنفسية الأمة"؟؟ ألم يحن الوقت لرفع قانون الطوارئ؟؟ سقطت الأقنعه... وجفت الأقلام... ورفعت الصحف. |
الشكر الجزيل للصديق M i i i D O على المساعدة التقنيه الرائعه...
|
اقتباس:
بس متل ما شفنا بالفيديو ... الرئيس الاسرائيلي كان عم يحاول الاقتراب من رئيسنا لأحراجو ..و يصير في مصافحة بيناتون .. بس الرئيس السوري انسحب بهدوء و بدون ما يثير أي نوع من البلبلة عموماً .... حضور الرئيس السوري للاحتفال الباريسي ما كان خطأ بالعكس ... كان انجاز أنو يندعي لهيك احتفال بعد كل يللي صار بالفترة الماضية بين الدولتين .. و اذا رح نترك كل المحافل يللي بتحضرها اسرائيل ..... كان لازم بالبداية ننسحب من الامم المتحدة و من كل المنظمات الدولية يللي بتضم اسرائيل الكلام بهالبساطة ..و خلط الأمور ببعضا ......كتير غلط .. لازم نشوف الموقف كموقف .... يعني بتجرد عن رأينا بالشخص .. و من هالمنطلق ..... حضور احتفال باريس أكيد ما كان خطأ |
كانت محاولات أولمرت للسلام او حتى لتلاقي النظرات مع بشار الاسد مركز تندر كتير من وسائل الاعلام وكان تهرب الاسد من هيدا السلام كمان مثار كلام كتير .
لا خلاف بايا نقد حول السياسة الداخلية يلي عم نعانيا كافراد من الشعب السوري ولا عن الدفاع عن المعتقلين السياسيين وخاصة سجناء الرأي ..بس ع الساحة الدولية اثبتت السياسة السورية انها قادرة لحد الان تمشي مصالحها الخاصة وللاسف يعني السياسة الدولية اولا واخيرا شغلة مصالح وفرنسا او سورية عندها مصالحها اولا بلا موقف انساني بلا راي شعبي او غيرو وليكون متل العسل نسو الفرنسيين كل الحكي الماضي لا وهلق ما بعرف في موقع لمعارض سوري بفرنسا معطل . يبدو انو كل ما اتحست النوايا مع السوريين كل ما اتحجمت حرية المعارضين كمان بالخارج ع فكرة بشار الاسد اتغيب عن خطاب اولمرت بس انا معك بالفكرة العامة انو التهم جاهزة ومعلبة |
اقتباس:
تمام هو هي النقطة نفسها اللي عم يحاول يقلك ياها , المشكلة هون مو انو صافح اولمرت ولا لاء انما لو اي معارض سوري كان بنفس الموقف مع اي اسرائيلي لكانو سلخو جلدو, وخونو و ما خلو تهمة خيانة الا ولزقوها في , اذا ميشيل كيلو لا شاف وليد جنبلاط ولا طلع معو بالصورة وحاكموه على اساس انو وقع على بيان موقع عليه جنبلاط معناها بنفس المنطق بحق لاي سوري يطالب بمحاكمة بشار الاسد بتهمة اضعاف الشعور القومي |
اقتباس:
أول شي حبيب انو أنا ما عم احكي عن الموقف كموقف... أنا يلي عم قولوا هاد الموقف شو كان رح يكون رأيهون فيه لو كان حدا من المعارضه يلي عاملو؟؟ تاني شي كيف بتتخون المعارضه لشي أقل من هيك بكتير؟؟ تالت شي و هو الأهم هل بعد هاللقاءات و المفاوضات ماصار وقت رفع قانون الطوارئ و اخراج المعتقلين من السجون بحكم انتفاء سبب وجودهن فيه؟؟ يعني الشعور القومب و ماعد "ينوهن" أكتر من هيك والمعارضيين مارح توصل فيهن الجرأه انهن يعملو يلي صار بباريس... المشكل ينحصر بأنو الحكومة اعتادت مبدأ يلي بدنا ياه منعملو وأي شي بيصير ممكن نسميه بأي اسم و أي شخص ممكن نلزقو بأي تهمه. |
اقتباس:
بالنسبة لباقي حكيك أنا ماني ضد يلي صار ببس ضد الكيل بمكيالين دائماً و فيكي تقري ردي السابق.. |
اقتباس:
المقارنة غلط بين الموقفين .. يللي صار أنو الرئيس اندعى لاحتفال بفرنسا ...و هالدعوة الها دلالات كتيرة لناحية تحسين العلاقة مع فرنسا و مع أوربا بالعموم و كون رئيس الوزراء الاسارائيلي كان موجود ... هاد ما بيعني أنو الرئيسين كانوا مجتمعين .. يعني ما بعرف ليش البعض بيحكي بس ليحكي .. مو ناقص غير تطالبوا بانسحاب الوفد السوري من الاولومبياد |
اقتباس:
مو حاسس انو الطريقة هي غلط شوي بالنقاش؟؟ أنا ما قلت انو القصه أكبر من يلي حكيتو انت بس شو الفكره انو لما واحد متل ميشيل كيلو بيوقع على بيان من ضمن الموقعين عليه وليد جنبلاط بينزت بالسجن و بيصير خاين؟؟ شو الفكره انو عارف دليلة اجتمع بالسفير الفرنسي مشان حقوق الانسان بسوريا صار عميل لفرنسا و نرما بالسجن؟؟ شو الفكرة انو كل شي للنظام مسموح و ممنوع على المثقفين و الوطنيين؟ |
يعني الغلط أنو ماصافحو
ولا الغلط المرة الماضية لما صافح الرئيس الاسرائيلي بجنازة البابا :? |
اقتباس:
لأنو الاجتماعات يللي كانت تحضرها بعض أطراف المعارضة ... كانت اإلبها اجتماعات لأسقاط الحكم في سوريا ....و يعني ما كانت بس اجتماعات بحضور أطراف اسرائيلية يعني المقارنة مو راكبة بين الموقفين اقتباس:
يعني برأيك كان الرئيس لازم يرفض دعوة متل هي ... بس لأنو كان عم يحضرها اولمرت ..؟؟ اقتباس:
يللي صار هو حفل عادي ..و كان حضور الرئيس الاسد كتير ضروري .. و كتير غلط يتقارن باجتماعات بعض المعارضة بتل أبيب أو بلقاءات خدام بالبيت الابيض لأنو موقع رئيس الدولة بيفرض عليه احترام أعراف دبلوماسية و بروتوكولية معينة و خاصة بمتل هالوقت و متل هالظروف |
اقتباس:
أنا عم قيّم الموقف ... الرئيس ما وقع ع بيان وقع عليه أولمرت .. و لا التقى بأولمرت و لا نسّق مع أولمرت .. بقى وين وجه الشبه بين الموقفين هاد ما بيعني اني مع اعتقال المعارضين السوريين ... بس المقارنة بين الموقفين غلط |
اقتباس:
الا ترى انو الرئيس دايرلو ضهروا بكل الصور....وانو اولمرت مكعب وراه بس بدو يلحق شي صورة تجمعهون بس ما قدر وبهيك محفل كبير ....وجود رئيس دولتنا ومسلط عليه كل هالاضواء...شو بتريدو يعمل احترنا يا اصلع منين نحلقلك !!1:frown: |
اقتباس:
اقتباس:
اقتباس:
اقتباس:
اقتباس:
|
اقتباس:
يعني ما بذكر أنو الاسد وقّع شي مع أولمرت .. أو بمعني تاني لو ميشيل كيلو حضر احتفال عيد الاستقلال اللبناني ..و كان من ضمن الجمهور جنبلاط .... أكيد ما كانو اعتقلوه ........ هيك بتصير المقارنة و برجع بقلك هاد ما بيعني اني مع اعتقال كيلو |
اقتباس:
لاء اذا الفرق الوحيد هو مسألة التوقيع المشترك فهنن قوعوا بيان مشترك بالقمه الاتحاد من أحل المتوسط... و اذا الموضوع انو مضمون البيان من مصلحة سوريا فكمان موضوع البيان يلي وقعو ميشيل كيلو ما طلب بأكتر من علاقات طبيعية مع لبنان ومنح شوية حرية للشعب السوري... كسف مابدك تقارن الموضوعين متل بعض.. بس الفكره انو أي شي بتعملو الحكومه صح و أي شي بتعملو المعارضه غلط وخيانه. |
يعني متل مابيقول المتل
ماضل بالساحة غير حديدان ضاقت العين عليه بكفي انه الوحيد يلي ماعمل سلام معون لهلىء ليش لنطلع على نصف الكاسة الفاضي خلينا نطلع على المليان بغض النظر عن اي سياسة داخلية |
اقتباس:
بالفعل لازم ننسحب من أي اتفاق مع المجتمع الدولي اذا اسرائيل اشتركت فيه اقتباس:
يكتر خيرو و خير جنبلاط يعني ما بعرف اذا وصلت السذاجة فينا لنصدق هيك كلام اقتباس:
مانك ملاحظ انو كتير فرق بن وجود رجلين باحتفال أوربي بدون ما يلتقوا أو يصير بينون أي احتكاك و بين اجتماع كيلو مع جنبلاط لتحديد خطوط سياسة سوريا الداخلية و الخارجية ..!! |
اقتباس:
|
مشاركة سوريا بهيك محفل كانت مهمه جدا و جدا كمان ... عنا اوضاع وعلاقات حارجيه لازم انزبطها ... واذا بدنا نقصي حالنا عن كل شي بتشارك فيه اسرائيل عمرنا ما بنوصل محل ...
سؤال واضح .. ايا كان احسن رفض الدعوة او الحضور؟ + ليش؟ |
اقتباس:
اللي صـار انو الأسـد ما سلّم على اولمرت و المفاوضات مع اسرائيل تمّ الاعلان عنها سـابقا من فتره شي شهر يعني هو ما عم يخبّي شي عن المفاوضات مع اسرائيل , يعني باختصار اكتر نحنا بهمنا العنب قبل ما يكون بدنا نقاتل الناطور في اولويات بتنطرح و بناء عليها بتنطرح المسؤوليات و بتم تحديدها اقتباس:
مااتخيّل طريقه هالربط بين السـياسه الخارجيـّه و السـياسه الداخليه امر منطقي ولا بشكل !! كلنا بنعرف انو مش بس الأسد هو اللي عم يسيّر السـياسه الداخليه و يتـحكّم بزمام الامور و كلنا بنحمل بعض اللوم تجاه هالمـوضوع لكن السـياسه الخارجيه و لحد الان تُـرضي الـشعب الـسوري كما اعتقد . الـشعب اكيد ما بدّه حرب و مش جاهز مدنيا لذلك , اتخيل. خليـني خبرك انو ما من مصلحه الشـعب انو تقوم كل الدول و خاصـه دوله متل فرنسا بمقاطعته ثمّ لوم الحكومه على غلاء الاسـعار و لومها في حال حضرت مؤتمر متل المزكور .. لقلّك انو من فتره رحت بدي ابعت رسـاله عسـوريا بأحدى المؤسسـات الخـاصّه مش العامه مع العلم يعني , و لمّا قلتلها سـوريا قالتلي ما عنا علاقات مع هي الدوله .. السـياسه فن مش حرب و بس اقتباس:
:D |
اقتباس:
بالفعل الموقفين متل بعض .. يعني مصافحة بمجلس عزاء بروتوكولي ... متل زيارة اسرائيل و متل التخطيط مع جنبلاط لرسم سياستنا الداخلية و الخارجية و متل زيارة الكونغرس و الطلب منو غزو بلادنا |
يا الله شو بيتشعب الحوار عنا ...! ليش ما بعرف ...
صديقنا مو قصده انو اللي صار غلط او بمعنى اخر ما عم يركز على الموضوع اكتر ما عم يركز على فكرة انو شو بيكون موقف القيادة السورية من المعارض اللي بيكون على نفس المسافة من قيادي صهيوني ؟؟؟ سؤال مهم جدا تحياتي الحارة ظل جيفارا |
اقتباس:
|
يا سيدي مشكلتنا هي النمط الواحد من الوطنية ورفض اي شكل اخر لها ..
مشكلتنا احتكار الوطنية احتكار المقاومة .. لا مقاومة إلا لدى النظام لا وطنية إلا لديهم .. على فكرة حضرتو اللقاء تبع الرئيس السوري على الجزيرة ؟؟ تحياتي الحارة ظل جيفارا |
اقتباس:
الخيانة: هي كل ماعدا ذلك. |
تماما هيدا قصدي ...
" عالهامش صرلي فترة عم إقرأ كلماتك صحيح ما عم رد على كلشي بس عم اقرأ ... بتعجبني بكتير احيان بس بحس انو كتير بعاد عن بعض بالتكتيك بس " تحياتي الحارة ظل جيفارا |
مو مهم التكتيك.. المه الهدف والأفكار.. كل واحد حر بطريقتو طالما متفقين على الهدف يلي هو مصلحة البلد..
|
تحياتي
وانا معك بالسؤال ... اذا وقف اي معارض سوري على نفس هالمسافة " انا اول واحد رح ارفض اي اقتراب من اي عديم انسانية صهيوني" شو رح يكون موقف السلطة ؟ تحياتي الحارة ظل جيفارا |
هلأ خلوني وضّح شغلة وحدة بس: مبدأ انو نقاطع كل شي تشارك فيه اسرائيل بعتقد انو مبدأ غبي.. لأنو عم تعزل حالك لحالك .. يعني طلّتنا البهية كتير مطلوبة بهالعالم و ما تحلى السهرة بلانا لحتى قاعدين نتدلل؟ مافي أسهل منها.. انو و الله ازا راحت اسرائيل أنا ما بجي, و على اعتبار اسرائيل أذكى من أنو تتشارط بهالطريقة و عندها مقدرة على تحويل هالطريقة الغبية بالممانعة ألى اتهام بالعنصرية و معاداة السامية و ما الى هنالك.. فالجواب ع الدلال هاد راح يكون: انشالله عمرينك ما اجيت الله لا كان جاب الغلا
هلأ من هالمنطلق شايف شي طبيعي انو الرئيس يروح ع فرنسا ... (بغض النظر عن لامنطقيات أخرى ماننا بصددها هلأ) لكن... كمان ما بيصير الواحد يظل ينتقد شغلة و يعملها خيانة عظمى بعدين يروح يعملها.. ما حلوة (و ما عم اقصد انو و الله لو معارض سوري واقف جنب حدا اسرائيلي شو كان صار فيه.. أصلا ماني شايف ليش معارض سوري لازم يكون جنب حدا اسرائيلي في أي مكان).. انما عم يخطر ببالي هلأ الشرشحة اللي أكلها أدونيس لما شارك بمؤتمر و كان فيو كتّاب اسرائيليين.. مؤتمر أدبي و قاعد مع شعراء.. أغلبهون يساريين ( و في ناس باليسار الاسرائيلي قلبهون عالفلسطينيين قد كل العرب مجتمعين.. و أوري أفنيري مثال ع هالشي) و كيف طلع علي عقلة عرسان (هاد متل صباح عبيد بس للكتّاب.. مدري مين حطو مرجعية أخلاقية ليقسّم ع كيفو) شرشحو بكل الجرائد و الدوريات العربية و فصلو من اتحاد الكتّاب العرب لأدونيس... يا ترى هلأ المأجور هاد يسترجي يقول كلمة وحدة عن الرئيس؟ برجع بقول.. مو غلط... لكن ما بيصير مو غلط لألك لكن غلط لغيرك... و بس |
اقتباس:
|
ماخفي اعظم اذا كان الظاهر هيك فالله اعلم الواقع شو
|
أه يا بروتوكولي انت....
اقتباس:
لأنَّ كل شيء في السياسة وارد، تبقى المشاهد غير مقيدة بالشرح أو التشريح... وتفسيرها وربطها وفكها ووضعها بأطر تفاؤلية أو تشاؤمية مسألة شخصية غير مقيدة إلا بخلفية وانتماء كل فرد. |
صدق من قال ( إرضاء الناس غاية لا تدرك ) |
ياريت يطلع بيان يشروحلنا فيه شو الخيانة وشو الوطنية
لأنو صايرة الشغلة متل المطاطة . اذا كان أجتماع باريس لمصلحة سورية . قيمت قالو المعتقلين السياسيين أنهم ضد سورية . على الاقل الكل بيعرف انهم ضد التدخل الخارجي . ويمكن اذا بيصحلهم يقابلو مسؤول أسرائيلي مقابل أنهم يستلمو السلطة بسورية مابيعملوها . طبعا معتقلي اعلان دمشق مشان ماحدا يزاود وليلي عم يدافع هون . اذا طلع تسريبات عن لقائات سرية صارت بباريس كيف حتدافعو ساعتها ؟ |
| الساعة بإيدك هلق يا سيدي 04:18 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون