|
الانطباع الاول من زيارتي لبلدي.
مسا الحب.
كل واحد منا ازا غاب عن بلدو بيحب يرجعلو يلاقيه متغير للأحسن ومنطقياً التغير للأفضل بتفرضو ظروف الخط البياني لتطور المجتمعات والحضارات . بهالموضوع ما رح احكي عن الغلا غير المبرر ولا رح احكي عن التماطل والوعود الحكومية و الفساد المستشري ولا بدي احكي عن البطالة ولا عن ازمة المي والكهربا. بل بدي احكي عن سوريا بلدي الي تاريخو بيشيد باعتدال شعبو وتسامحو .. هالبلد يا شباب شفت انو عم بيتعرض لغزو تيارات دينية والقصد (المد الديني) والافكار الدينية بوسط الشباب .. افكار غريبة عن مجتمعنا كتير منها متشدد وغير وطني ومستورد.. انتشار النقاب بنسبة اكبر ولباس ديني للرجال ولحى طويلة كمان. هل الوضع الاقتصادي للبلد هو السبب بلجوء الناس للدين .. هل الظاهرة عرضية وستزول وتتلاشى سريعاً ؟؟؟؟ ما رح كون متفائل للأسف .. هالمد الديني نتائجو برأيي غير محمودة و ظاهرة تستحق الوقوف والتأمل .. انا مو قصدي هون الا التشدد الديني المسئ للوطن والتسامح والوحدة والوطنية. شو رأيكون شباب ؟ باكول هم البلد ؟ ولا باكول هوا وبتفرج على نور وسنوات الضياع متل بقية هالناس :cry: |
الحمدلله على سلامتك صافو ومعك معك بتكتشف أشيا كتيرة
أحسن شي تعملو "أوم فوت نام وصير حلام إنّو بلدنا صارت بلد". |
ياصديقي اللجوء للتشدد الديني سببه الرئيسي هو قمع الحريات و الديكتاتورية.. لأنو الإنسان يلي ماعندو أي مجال يعبر فيه عن حالو مضطر يلجأ لنوع من أنواع التشدد و هاد الدليل على انو كل الحركات الارهابية بتنشأ بالدول الديكتاتورية..
النظام بسوريا ياصديقي ماعندو مشكلة انو المجتمع يتدمر مقابل الاستمرار بالحكم.. يعني تستشري الحركات الأصولية و الناس تلجأ للتعصب الديني بالنسبة الو أحسن بألف مرة من انو المجتمع يكون مجتمع مدني و حضاري و راقي.. بوعدك اذا بدو يبقى النظام عم يحكم بهي الطريقة رح يستمر هاد التيار بالانتشار و خلال كم سنة رح نصير متل السعودية أو مصر بمستوى التخلف و التشدد.. |
المد الديني منتشر بكل العالم مو بس بسوريا والمصيبة وقمة المصائب انو بتلاقي عالم عباقرة وتفكيرهم لامحدود مع هالشي بينجذبو للتيار الديني المتشدد انو اوكى كل واحد حر بتفكيرو بس بالنسبة للمتشددين دينيا مافي شي اسمو حرية التفكير بالنسبة للدين يعني ومن الأخير اذا انت اعترضت عليهن اعتبر نفسك كافر ويجب اقامة حد الله عليك لذلك ياعيني لاتاكول هم حدا كول مناقيش وتذكرني وادعيلي اني ارجع كمان
|
يازلمة .. هلأ ازا طلع شوية تشدد صارت ظاهرة خطيرة هي .. :shock:
ولو لك اب صطيف طول بالك .. مو هيك الشغلة اخي الشغلة حرية شخصية .. ان الزلمة طول دقنو .. وصار متدين هي حريتو ولا ازا لبست النقاب .. كام صارت ظاهرة غلط ع حد تعبيرك .. ولو يازلمة خلين يلبسو ويعملو شو مابدن ويدينو متل مابدن .. هي حرية شخصية بتخص الفرد .. بتوقع ماحدا الو دخل بطريقة عيش حدا .. يعني انو الشغلة عادية ولو طبعا ازا كان هالتدين نابع من القلب ومو منظرة .. واكبد هي اولا واخيرا حرية شخصية .. اكيد مو متل ماصنفتا انت ظاهرة .. وكل واحد عليه من حالو اللي بتلبس نقاب عليها من حالا .. واللي بتلبس التنورة لفوق الركبة كمان هي حرية شخصية وعليها من حالا بس .. وهادا من وجهة نظري .. وبعدين الظاهرة اللي حكيت عنا (ع حد قولك انت صنفتا ظاهرة التدين) يعني هي موجودة من زمان .. حسستني من حكيك انو طالعة موضة وماصلا سنة .. ولا كم شهر .. يازلمة هي صلا يعني من الاصل .. مو شي جديد ابدا وتحياتي صافو والحمدلله ع سلامتك اخوي |
اقتباس:
بما انو لمست هالشي ياريت تحكيلنا عن الحركات والمد وسياسة تغيير المذهب يلي عم تصير بسوريا وخاصة بالمنطقة الشرقية |
والله موضوع الدين هاد حرية شخصية ولا كمان ممنوعة بسوريا وما بيصير المرة تلبس نقاب والرجال يطول دقنو لازم كلو يكون متفرع أنا برأيي فصل بلد على كيفك بددون نقاب ودقون أحسنلك |
الموضوع مو عل نقاب و الدقن بقد ماهوي عل الاستيراد المبالغ ..
يعني يلي لابس اللباس الأفغاني و ماشي بالشارع مع دقن طويلة و كزا هاد عندي متلو متل يلي لابس طقم جلد و جنزير و حلق بالمنخير ... كلو مستورد بشكل غير منطقي.. فراغ ما و كبت بجانب آخر يؤدي لمثل هذه الظاواهر .. كتير من الشباب العاطل عن العمل بيتجه للدين .. و كتير من الشباب يلي مصروفو مؤمن بيتجه للأشياء الأخرى .. في غير هل حالتين بكون التوجه واعي أكتر .. و بكون في قضية بالنص .. هلأ ماهو المستورد و ما هو المحلي و ما هو المنطقي نستوردو و ما هو غير المنطقي هاد برأي نقاش شبه عقيم لأنو القناعات و المجالات واسعة جدا |
اقتباس:
و ببعض المواضيع ( و ردك هاد منهم ) بلاقي ردوك تهجمية و ما ألها علاقة بالمنطق بالنسبة للموضوع أنا برأيي متل ما قالو الشباب و الصبايا موجة الدين منتشرة بالعالم كلو و الأمور المستوردة الي حكا عنها سيزر شغلة عالمية يعني بكل مكان الشباب حابة تجرب و تغير و تتميز أنا ما شايفها قضية كبيرة لأنو مصيرها للزوال |
اقتباس:
|
ما تعتل هم صافو هي الظاهرة مش بس بسوريا
بكل البلدان العربية وبعتئد ظاهرة النقاب واللبس الافغاني وهيك شي وسيلة بس لعدم توافر الخدمات ووظائف العمل وهيك اشيا نورت صافوو |
بالحالات الصعبة الانسان دائما يسعى نحو الشعور بالأمان... لما يشوف حالو ضعيف و لما يشوف ما في شي بيحميه بيحتاج نفسيا لشي يخلّيه يشعر انو في شيء ما نفسي يشعرو بالقوة... لذلك أمر طبيعي جدا انو الناس تنحو باتجاه الدين بهالفترة ببلادنا.. لأنو الايمان يعطي شعور بالأمان..مو بس الايمان بالله.. قصدي لما عندك فكر معين و ايمان بشيء ما يملئ الفراغ الفكري. و الفكر الجاهز و الشامل و المتوفر ببلادنا هو الدين. و هاد السبب الرئيسي.. عدا عن اسباب ثانية أهمها ازمة الانتماء الموجود عنا.. الانتماء الوطني انقضى عليه و الانتماء القومي انتهت صلاحيتو لذلك غير الانتماء الديني ما بقيان..
طبعا هالأمر غالبا مرحلي طالما هو وليد ظروف معينة و بنهاية هالظروف تنتهي الظاهرة.. لكن الأمر لا يخلو من خطر استغلال هذه النزعة (اللي مبدئيا ما مفروض تكون مشكلة... كل واحد على دينو الله يعينو) و ممكن استخدام النزعة الدينية من قبل بعض النفوس المريضة و استغلال الحمية و الحماس الديني من أجل تمرير مصالح معينة |
اقتباس:
على كل حال انا عندي معلومات عن الموضوع بس مارح جاوبك لأني لمست من خلال ردك في نوع التعالي والسخرية .والاهم من هاد مابحب ادخل باحاديث طائفية وخاصة انا من الاشخاص يلي بيكرهو الطائفية . فبعتذر من سيادتك . وعلى قولة حكومتنا : انا بحتفظ بحق الرد في المكان المناسب والوقت المناسب |
اقتباس:
أما انو تحتفظي بحق الرد... منطق نقاشي برأيك الواحد يحط فكرة و ما يثبتها انما يطالب من لم يضعها باثباتها؟ بالنسبة للحكي اللي بالأزرق... ماني محتاج حدا يشرحلي.. أنا ابن المنطقة الشرقية.. ومن اكل الهوا اللي عم ينتشر بمواقع عديدة... فما بدو واحد يكون ابن المنطقة الشرقية انما بس يكون عندو شوية معرفة بهالمنطقة لحتى يكتشف انو كل الحكي كذب و افتراء من الدرجة الأولى.. |
اقتباس:
اي .. و شو مشان اللافتات بـ الطرقات كلا ..مكتوب عليا .. لا الله ألا الله .. لا تنسى ذكر الله .. و الحمد لله .. و ما بعرف شو .. أنو لافتة طويلة عريضة .. بنص الطريق .. أول على الشجر بـ الحديقة .. مكتوب عليا لا تنسى ذكر الله .. طيب لو كاتبين عليها مثلاً ( شو مشان المازوت صار بـ 25 ليرة ) ما كانت بتفيد اكتر ؟ |
اقتباس:
|
ولو انو الرد اجا متأخر بس حبيت اكتب رايي بالموضوع . صراحة الظاهرة كتير منتشرة وبشكل مزعج خاصى اني لما نزلت اخر مرة ع سورية وع مدينتي اللاذقية كتير تفاجأت بانتشار الحجاب والمظاهر الدينية. برايي في عدة اسباب منها يلي صار بحرب تموز 2006 بدل الناس ما تتعلم من حزب الله طريقة المقاومة تعلمت قشور دينية وانو صارت الناس تتشيع من شان تفكر انها شاركت بالحرب:shock: وبسبب المشكلة الطائفية كمان صارو السنة عم يبروز نفسون كسنة كرد ع المد الشيعي ( يلي صراحة مبلش من قبل حرب تموز بفضل اموال بعض افراد العائلة الكريمة الحاكمة ) المهم بدك تعرف اذا لازم تقلق؟؟من ناحيتي انا قلقت وخلصت:cry:
|
اقتباس:
|
awal chi hamdelah 3asalama
tani chi walah ya sadikna halmechekla ma bihis fiha ghir yali tgharab bisir ma3ou sadma leanou bibasata byakhoud ma3ou sora labaladou ou bes yerja3 bilaki chi tani ou ya3ni riheltine wahda bizaman ou etanya bilmakan ou masalat edin hey ba3d inticharha elmahoul bi douwal gharbya fala tet3ajab menha bibouldan 3arabya bes elmechekla enou byakhdou lekchour ou loub edyana byeterkouh ama 3an elkafza enaw3ya ektisadyan fa hey ma estafad menha echa3b ktir inama elhoukoumat hya yali 3am techba3 ou tkaber elfajwa in elfakir ou elghani leanou tabaket el3oumal talachat tahyati |
ذكرتني بغنية " عالهوارة "
خصوصا بالمقطع اللي بقول : " ناس بتمشي لقدام وناس بترجع لورا " وهور يا بو الهوارة :D |
اقتباس:
|
اقتباس:
|
اقتباس:
يعني صحيح انا مو دارسة لغة عربية بس يعني مو لهلدرجة حتى ما اعرف شو مضمون ردك بعبارتك , كان فيك تسأل بطريقة تانية مثلا: فيكي تخبريني عن الموضوع , ياريت تعطينا تفاصيل اكتر , شو مدى صدق هالمعلومة والخ........ على كل حال انا مافيني قول شو بدك تحكي او ماتحكي انت او غيرك بس انا من حقي اني رد عليك بطريقتي وقت بشوف رد فيه قلة احترام ولاتنسى كلمة "بالله" وخاصة حرب الباء وموقع الكلمة في الجملة . وبرجع بذكرك انا لو مو مفتوح هيك موضوع انا ماكنت كتبت ولا حطيت هالتساؤل بس وقت شفت هالموضوع وهالظاهرة يلي حكا عنها صاحب الموضوع طلبت منو يحكلينا عن الظاهرة التانية يلي بسوريا منتشرة وخاصة انو صاحب الموضوع على ما اظن له خلفيات من فتح هيك موضوع . وبما انك ابن المنطقة الشرقية ففعلا مومحتاج حدا يقلك شو عم يصير وانا بكلامي قلت انو هي الظاهرة بكل سوريا وخاصة المنطقة الشرقيةو وبلشت هنيك وانا بكلامي ما عم ذم لا اهل المنطقة الشرقية ولا الجنوبية ولا اي منطقة نحنا كلنا اهل . فوقت عم تقول اكل هوا يا عزيزي هالشي انا مو جايبتو من بيت ابي وبغض النظر حتى "لو" انا عم افتري عليكن انت ببساطة بحكم اولا عندك معلومات عن الموضوع وثانيا ابن المنطقة الشرقية ان اولى من غيرك ترد على هالشي بكل وضوح وشفافية وتبيلنا الصح من الخطأ , فما كان بدا هالضوجان كلو وتطلعني وكأني انا شي وحدة عم تفتري على الناس , فروق وطول بالك وهدي اعصابك لأنو نحنا بحاجتك |
اقتباس:
|
اقتباس:
|
اقتباس:
2) كلمة "حضرتك" بستخدمها و بكثرة عند حديثي مع ناس ما بعرفهون, صيغة احترام يعني... لذلك التكهنات هاي اللي من عندك بلاها لأنو مانك براسي لحتى تعرفيها و لا يحقلك تتهميني بشي ما عملتو الا بمخيلتك اقتباس:
اقتباس:
اقتباس:
اقتباس:
في الي موضوع عن هالشي بالذات.. و هاد رابطو: - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - و في موقع آخر ... تحديدا منتدى مصري لقيتو من فترة .. حاطين فيه موضوع طويل عريض بذم رؤوس التشيّع بمنطقة الجزيرة السورية ( واللي حاط الموضوع يفهم من سياق كلامو انو منتمي للاخوان المسلمين) و من ضمن الاسماء اللي حاطها حاط اسم عمي أخو أبوي.. و السبب بسيط.. عمي خريج تاريخ و عامل دكتوراه بالتاريخ الفارسي و زاير ايران بسبب دراستو و تعاونو مع جامعة طهران بهالمجال من قبل الثورة حتى... عملوه متشيع رغم انو من أقدم أعضاء الحزب الشيوعي السوري بالمحافظة و مازال (يبدو في التباس عند الأخ صاحب الموضوع بين شيعي و شيوعي). 2) يكفي, متل ما قلت سابقا, معرفة نذر يسير من التوزيع الديمغرافي لمنطقة الجزيرة لمعرفة انو أغلب المقالات عبارة عن هراء ... و المضحك انو ماسكينها عالجزيرة بسبب المسجد اللي عملوه الايرانيين بالرقة عند قبر اويس القرني و عمار بن ياسر , هالمسجد بلشو عمل فيه بالاشتراك مع الاسكان العسكري بالـ 85 و مشانو دمرو مقبرة الرقة القديمة و ما حدا ضاج.. أهل البلد قلنا بالكي بكرا يجو سياح و يحركلنا البلد, و هلأ من كتر التخويف و التهويل من حملة التشييع صار الواحد ما يسترجي يمر من قدامو أو يدخلو اذا خايف ع سمعتو يقولو عنو متشيع... مزبوط عملوه الايرانيين بس هالشي لا يعني انو عاملين حملة تشيع.. و المضحك انو عبد الحليم خدام صارع ربنا بقصة حملة التشيع لما كل المشاريع بلشو فيها لما كان هو نائب رئيس سوريا.. وين كان صوتو؟ بعدين بس الايرانيين عم يفتو مصاري ع دور عبادة؟؟؟ هو هالجامع بالرقة عاملينو الايرانيين مقابل فوق العشر جوامع مولوهون ناس من السعودية و جابو عليهون شيوخ سوريين مهاجرين بالسعودية و حطوهون يعلمو الناس المذهب الوهابي و عينك عينك .. ليش الاخوان ما يحكو عن هالشي؟ سمعنا من المقالات و سمعنا حكي عالم ... أنا ما شفت شي.. ما شفت هالايرانيين بالشوارع عم يوزعو مصاري عالرايح و الجاي متل ما العالم تحكي.. ذاتا 80% من زوار الأضرحة السابقة الذكر لبنانيين .. و ما بنكر انو بمنطقتنا في ظل النزعة الدينية الوهابية المستوردة من كثرة المهاجرين بالسعودية صار اذا بدك تقضي ع سمعة واحد تقول عنو متشيع و خلصنا.. ما بيهمني ازا عاملين حملة أو ما عاملين حملة.. اللي شايفها حملة بشكل واضح هيي حملة الاخوان ضد حملة التشيع الافتراضية اللي عم تكرّه الناس ببعضها و عم تزرع طائفية شوي شوي... كل يوم نقرا مقالات قال انصرو اخوانكم السنة في ديار الشام و حاربو الرافضة الصفويين و من هالحكي... شو من وراها رح يجي؟ تفجيرات بالست زينب؟ يصير اللي ما فيو يفجر حالو بالعراق يجي ع سوريا؟ الله يستر... انو مافي شيوخ يدعوون لعقيدتهون؟ بالتلفزيون و عالراديو و بالكتب و محاضرات و كل شي؟؟ يعني حتى لو في شيوخ شيعة شو المشكلة؟ كل واحد يعتقد اللي بدو ياه و كل واحد ع دينو الله يعينو اقتباس:
و شكرا |
اقتباس:
|
اقتباس:
اي بس هدول وبضيف عل اللي قاله ياس انو طق الحنك او اكل ................ وصل لجيران الرقة يعني الحسكة ودير الزور طلعت اشاعات كتير انو في قرية اسما الحسينية على طريق الرقة قلبت معاهد شيعية وانو شعب الدير عم يقبل عليها بقوة كونه عم يعطو مصاري كتير |
اقتباس:
خود مثلا - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - و هاد - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - تسالي جدا كمان (قال بسوريا يجيبو الشب من الجامعة و بيعطوه مال و جاه و نساء ليصير "شيعي خميني" )...و - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - كمان |
اقتباس:
أما عن المعاهد الشيعية .. ما بظن أنو اهل البلد هي يلي فتحوها .. بس أنفتحت بهل منطقة لأنو ظاهرياً المنطقة مبينة أكتر تقبلاً لهيك أمور من المنطقة الغربية و الجنوبية |
عم قلك اشاعات هي المعاهد
|
نتيجة لظروف استثنائية انا ما قدرت كون كتير اون لاين لتابع سير هالموضوع او بأخوية على كل ممكن انفهم الموضوع غلط. انا مع حرية الاعتقاد وحرية الفرد بالاعتقاد بل بسعى لحماية هالحق ولكن كل شي بحدودو. يعني الظاهرة الي انا حكيت عنها تيارات متطرفة تهدد الاحساس الوطني تتحدث عن حكم اسلامي بطريقة رد فعل قمعية لكل ما يسمونه (( فساد )) وعلى (( جند ابليس )) ويقصدرون بهم الفنانين والمطربين و مقيمي الحفلات وكل من اراد الحياة باسلوب عصري اختاره هو. هنا اصبحت تهديد لا مجال معه للمجاملة والقول انه حرية شخصية وظاهرة لا تتعدى كونها ردة فعل طبيعية على شئ محدد وليست زهد ولا ما شابه. خطورتها تكمن في فصل نسيج الشعب الواحد وتقسيم المجتمع الى مؤمن وكافر .. و فاسق و صالح . وهذه الافكار تنتشر وهذا الانتشار الغريب عن طبيعة الشعب السوري المعتدلة هو ما يدعو للتساؤل . ففي سرافيس المدينة تسمع محاضرات دينية تدعو الى كره وبغض اصحاب الديانات الاخرى وعدم اتخاذهم اخلاء واصدقاء وفي المطاعم تجد رجال الدين واللحى هم اصحاب الكلمة وفي كل المجالس تصبح افكار السلفيين هي محور كل نقاش ومحط كل اهتمام. اقتباس:
بتمنى كون جاوبتك والمسألة بتتعدى كونها حرية شخصية ومانها نقاب ولبس افغاني بس. اقتباس:
كل استفساراتك ردو عليها الشباب بشكل ارضاني. بس كيف كل حق يراد به باطل ما فهمتها هي ؟!! وعن هالتيارات الي حكيت عنها بيكفي تغيبي عن البلد فترة وترجعي لتلاحظي المد السرطاني للأفكار السلفية ببلدنا. واسف ع التأخير. :D |
اقتباس:
|
اقتباس:
هيك قالولك وهنن ماشيين بالطريق ؟؟؟؟ شو البلد أو الشام يلي عايش فيها غير الشام يلي لحنا عايشين فيها :shock: |
اقتباس:
مين يلي قلك انو انا معتبرة او بدي يصير في موانة معك او مع غيرك ؟ انا جديدة هون هي اولا وتانيا انا بعامل الناس يلي مابعرفهم على الرسمي والرسمي كتير كمان اقتباس:
اقتباس:
اقتباس:
اقتباس:
اقتباس:
اما بالنسبة لكلامك الباقي فيعني كلام منطقي بدل على شخص عايش الوضوع تمام وشرحتو بشكل مببسط جدا ومشكور عليه وخاصة انو احد اعمامك على صلة بالموضوع انو اتهموه بهالشي يعني انت بداخل المعمعة . هلئ انا صار لازم برر ليش سألت سؤالي لصاحب الموضوع بطريق الصدفة عرفت عن الاخ صاحب الموضوع انو يتبع المذهب الفلاني وهو كان قد صرح بهالشي علانية باحد المواضيع وفعلا كان شجاع على جرأته وانا بهنيه عليها , بس وكلمة بس بحط تحتا خطين حمر انو يجي صاحب الموضوع وينتقد المذهب الاخر فهالشي انا مابسمح فيه ابدا (اهل مكة ادرى بشعابها ) وان كان لابد من انو ينتقد او يحط ملاحظة فكان من الافضل انو يحكي عن كل الظواهر يلي عم تمر فيها البلد . للتوضيح مثال بسيط لكل الاعضاء اذا انا كنت منتسبة لحزب يساري وشخص أخر منتسب لحزب ليبرالي بقوم بيجي اللليبرالي بنتقد حزبي فهالشي مرفوض الا في حال جلسنا وحطينا كلشي سلبي عن الحزب اليساري وحزب الليبرالي وقتها ممكن نسعى للتطور علما انا مابخفي الظاهرة يلي حكى عنها صاحب الموضوع اقتباس:
اقتباس:
وشكرا الك كمان على الهامش انا احترم كل المذاهب والطوائف والاديان وردودي بهذا الموضوع ليست طائفية بل هي من اجل الحرية وحرية التعبير والنقد الذاتي علما ربما اكون لست من ذلك المذهب او ذاك وربما اكون من دين آخر |
اقتباس:
يا باشق انت كنت صريح وانا كنت صريحة كمان بالمشاركة يلي قبل هي بتمنى تفهم كلامي بشكل كامل وانا مافي شي لا ضدك ولا ضد غيرك بس صدقني ماشفت من يلي شفتو انت :D اقتباس:
اهلين بالمحارب العتيق والشامي الاصيل :D |
اقتباس:
اقتباس:
و ما لازمني أبرر... ليش لحتى أبرر؟ ما مشكلتي أنا سوء ظنك فيني اقتباس:
اقتباس:
اقتباس:
اقتباس:
ببساطة و عفوية و قمة بالصراحة كلامك أنا شايفو طائفي (عم قول كلامك ما عم احكي بشخصك... و عم اوصف كلام مكتوب بوضوح)... يعني حضرتك شفتي انو صاحب الموضوع شيعي... و بالتالي رديتي عليه بطريقة طائفية لأنو أخدتي بعين الاعتبار طائفتو قبل أي شي تاني.. بدل ما تردي عالموضوع رديتي ع صاحبو (رديتي بسؤال ذو نية ثانية). بعدين نظرية انو ما بيصير واحد ينتقد فكر (بفرض انو صاحب الموضوع انتقد فكر.. هو انتقد ظاهرة ..فقط لا غير) الا اذا منتميلو... يعني ما بعرف... بتذكرني بالنقد الذاتي تبع الشيوعيين.. هاي نظرية أصحاب الفكر الشمولي .. اصحاب فكر نحن نعرف و نحن نفهم و غيرنا ما ينتقدنا الا لأنو يكرهنا و ما عندو سبب موضوعي للنقد انما ينتقد من قبل حقد الاختلاف ... أما مثالك تبع الحزب الليبرالي و الحزب اليساري فما بشوفو هيك... انا يساري... ماشي؟ ما فيني (أو بالاحرى مو مافيني... انما مضيعة وقت) أروح ع حزب يميني انتقد كيف يدير نفسو... لكن لما الحزب اليميني عندو طموح يقود مجتمعي و يوجهو بطريقة فكرية ما تأثر فيني فطبعا مو بس يحقلي انما من واجبي أوقف بوجهو فكريا و أبيّن وين الغلط بنظري... عدا انو المناظرة الفكرية ضرورية... مافي يمين بلا يسار و لا في أبيض بدون أسود... اللي مزبوط هو انو ما يصير تنأخذ وجهة نظر جهة وحدة و تنفرض كمقياس أو كموديل أو كأساس و نجي بعدين نقيّم على اساسها.. لكن انو شخص ما فينو ينتقد أو يحكي عن طريقة تفكير غيرو هاد اسمو قمع.. ببساطة اقتباس:
و بخصوص الظاهرة اللي حكى عنها صاحب الموضوع بدي عقّب ع شغلة.. حكيت رأيي بظاهرة التدين برد سابق بهالموضوع و قلت انو بشكل عام ما تخيفني كتير و لا تقلقني انما هي رد فعل طبيعي على مجموعة من العوامل المحددة... لكن هو ساكن برا و أنا كمان و لذلك متفهم انو لما تغيب فترة طويلة و ترجع فعلا يلفت النظر النزعة الدينية عند الناس بشكل عام و الشباب بشكل خاص . بزيارتي الأخيرة صدفت شهر رمضان... في شب صديقي كنا سوا بالمدرسة و كان لا يصوم و لا شي و سيكارتو بتمو من الصف الثامن و أزعر يعني... كنت بزيارتي ما فيني واعدو لبعد الـ 12 بالليل لأنو قبل الافطار هو يشتغل.. و بعد الافطار كان يروح عالتراويح و يظل بالجامع بعد صلاة العشاء يقرا قرآن و يحضر دروس دينية و ما يغيب يوم واحد لو تنقلب الدنيا.. هاي حالة متطرفة جدا بس بشكل عام مزبوط لاحظت نزعة دينية عن أقرباء الي ما كانت موجودة و حتى احياء ليلة القدر مختلف عن ما تعودنا عليه.. قصدي من هالحكي انو الغياب فترة يخلي التغيير يبدو أكبر و أكثر اثارة للملاحظة... |
اقتباس:
ما فهمت :? |
اقتباس:
كيفني معك ماني محلل فيزلوجي بالله :p |
اقتباس:
لسى في كومة مواقع هدول وقت بكون ملاّن ببحبش فيهون... يطلعلك واحد سعودي ما عرفان سوريا وينها يحلل بتركيبتنا و يتفهمن علينا... غوغل كتير بتشوف كتير بالزمانات تخانقت مع واحد اردني هون بالمهجر... قاعدين عم نتغدى ببيت صديق مشترك و هو ماسكها تطرف اسلامي شي مو طبيعي.. عن جد يعني حتى أصدقاء متدينين بعرفهون ينفرو منو .. فأنا ما كنت أيامها بعرفو كتير و صار يحكي طالع نازل عن الجهاد و حكم الشريعة و مدري شو و ما بعرف كيف رديت عليه على شغلة بتخص سوريا لما بلش يخبص عن انو كيف العلوية بيخلو الطلاب يسبو عمر بن الخطاب بالاصطفاف بالمدارس و من هالحكي هاد و قلتلو عمو ما بتعرف الله وين حاطك.. و فلت علي.. أول ماسألني انت شو ملتك (كون عرفوه علي انو أنا سوري) قلتلو ما شغلتك ملتي و هاي خصوصية لألي ما بيحقلك تسألها, فصاحب البيت مشان يلطف الجو اجا يقلو الأخ علماني و شوية حباشات من مثقف و متنور و يعني قعد يعطيني اطراءات هيك مشان يلطف جو.. اجا الأخ طلع معو: أيواااا علماني... علماني يعني شيوعي .. شيوعي يعني بعثي.. و بعثي يعني علوي.. اي ما بستغرب خجلان و مستحي تقول ملتك (يا شباب ريتها تنكسر ايدي اليسار اللي بكتب فيها ازا عم زل عليكون بحرف).. طبعا نهاية الخناقة ما كتير مهمة بس ما وصلنا للضرب بمعجزة.. قصدي من رواية هالقصة انو بوجود هيك عقليات ( وهاد محسوب علينا مثقف لأنو طالب جامعة و عندو شهادتين و شغلة كبيرة معتبر حالو) فتخيل شو فيك تلاقي حكي طالع نازل بهالانترنت... أنا كتير بخاف من الغمز الطائفي و فعلا اعتبرو استهداف للبلد و خط أحمر.. احمر جدا.. اغلبكون يعرف اني معارض و اني ضد التخويف و التهويل الأمني... لكن من هالناحية بخاف..ما بخاف ع أهل البلد بين بعض.. ما رح توصل لشي هالشغلة.. خوفي من ورا الحملة هاي تبعيت انصرو اخوانكم السنة في سوريا انو المصروع السعودي او اليمني أو السوداني أو أو ... بدل ما يروح يفجر حالو بالعراق يجي يفجر حالو بالشام و معتبر حالو عم يجاهد.. هاد الخوف |
| الساعة بإيدك هلق يا سيدي 06:38 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون
