|
رساله إلى الرئيس بشار الأسد
سيادة الرئيس بشار الأسد رئيس الجمهورية العربية السورية
سأسمح لنفسي و أوجه الحديث لك بشكل مباشر.. نعم بشكل مباشر.. هو حقي كمواطن سوري أن أخاطبك مرة واحده و بشكل مباشر.. سيادة الرئيس: أقسم لك أننا سوريون نعشق سوريا و نحب سوريا لا بل إننا نتنفس سوريا.. أقسم لك أننا لسنا بخونه و لاصهاينه و لا عملاء و لا رجعيين.. أقسم لك أننا لسنا من جماعة عبد الحليم خدام و لا رفعت الأسد و لا فريد الغادري ولا البيانوني ولا سعد الحريري.. أقسم لك أننا لا نتلقى تمويلاً لا من أمريكا و لا إسرائيل و لا دول الخليج لأننا غير ممولين أصلاً إلا إذا كان الدخول إلى شبكة الإنترنت بحاجة إلى تمويل دو لي.. أقسم لك أنه لاهدف لدينا إلا ارتقاء سوريا و عزة سوريا و نهضة سوريا و حضارة سوريا.. أقسم لك أننا طوال عمرنا لم نحاول أن نوهن الشعور القومي و لا نحارب النظام الإشتراكي و لا نغير كيان الدولة بل و لا نعرف معنى هذه التهم.. أقسم لك أننا لا نملك أسلحة و لا ذخائر و لا تنظيمات مسلحه.. أقسم لك أن حزبنا الوحيد و تنظيمنا الوحيد هو محبة سوريا.. من نحن؟؟ نحن شباب و شابات سوريا.. سيادة الرئيس: نحن لانريد أن نغير النظام و لانريد أن نستولي على الحكم و لانريد أن تتدخل أمريكا أو أوروبا أو إسرائيل في سوريا و لانريد أن نستقوي بأي أحد بالخارج على وطننا و لم نحاول يوماً أن ننقلب على الحكم أو نساعد الأجنبي على دخول بلدنا في بلدنا وأنت تعرف من حاول الإنقلابات و من إنشق عن النظام كلهم ياسيدي كانو يوماً من أركان النظام.. أما نحن ياسيدي فصابرون و مقهوروون و ساكتون.. ليس لأننا صم أو بكم أو عاجزون أو متخلفون.. بل لأننا نحب بلدنا ونأمل باليوم الذي سيكون فيه منبراً للحق و الديموقراطيه.. سيادة الرئيس : في كل دول العالم ولاية الرئيس الدستورية أربع أو خمس سنوات يجب على الرئيس فيها أن يحقق كل برنا مجه الإنتخابي.. إلا في سوريا فهي سبع سنوات و لا تكفي للبدء بالإصلاح و محاربة الفساد ونشر العدالة و تأتي السبع سنوات الجديده و لاجديد بالنسبة لنا.. كم من الوقت ستحتاج.. نعرف أنك لا تملك عصاً سحرية لكننا نطالبك بالإصلاح بعد عشر سنوات لا عشرة أيام.. حدد لناالوقت و أقسم لك أننا سننتظر.. سيادة الرئيس: هل ستبقى حكومتنا و هيئاتنا الحكومية مراتع لمافيا الفساد؟؟ هل سيبقى مقياس تقييم الوزراء و المدراء مدى قربهم من هذا أو ذاك؟؟ هل ستبقى عقدة المواطن السوري سياراتي البيجو ستيشن الفرنسيه و الأوبل ستيشن الألمانيه.. لأنها سيارات دوريات المخابرات؟؟ هل سأبقى أرتجف و أنا أكتب هذه السطور لأني أقول الحقيقه؟؟ هل ستبقى سوريتنا مركزاً من مراكز خدمة سيريتل؟؟ هل سيبقى نفط سوريا برسم وكيل حصري؟؟ هل ستبقى مشاريعنا مسخرةً لخدمة أشخاص معينين؟؟ هل سيبقى أرخص مافي سوريا المواطن السوري؟؟ هل ستبقى بإختصار سوريتنا مزرعه؟؟ سيادة الرئيس: نحن شباب الوطن و يجب أن نكون نحن مصدر قوته و قوتك.. صدقني هي ليست بقوة تلك التي تستمد من فروع الأمن و ظلم الناس و قهرهم وسجنهم ومن قانون الطوارئ.. وأنت تعرف أن روؤساء هذه الأجهزه ليسوا إلا بظالمين و منتفعين.. سيادة الرئيس: أقسم لك أننا وطنيون أكثر من الذي يشكك بوطنيتنا و قدرتنا على استيعاب الديموقراطيه.. و أننا أشرف و أرقى و أنقى من أولئك الذين يقنعوك بعمالتنا .. نحن جاهزون للديمقراطيه و الإصلاح فهل أنت جاهز؟؟ إعذر لي جرأتي لكن زمن الصمت قد ولى.. شاب من سوريا |
صديقي مارح قول غير الله يسلم اصابيعك و الكيبورد اللي عندك انت حكيت باسم كل شخص عنجد وبدون تملق بيحب سورية وبيتمنى الخير لسورية هاد صوتنا كلنا منحب نوصلو لسيادة الرئيس عل وعسى بيسمعنا من هالمقال هاد :D |
الخلود لحزب البعث العربي السوري ولرسالته  |
اقتباس:
:D |
اقتباس:
;) |
اقتباس:
وسيبقى جزب البعث الحزب الحاكم بقيادة الدكتور بشار الاسد وسيكون علامة بيضاء على نزاهة الحكم واستقلاله |
اقتباس:
بجوز متل بعض الاعضاء مارح سميهم فكرت انو اذا حاطط صورة السيد الرئيس معناها يامخابرات يا اما شي شغلي متلها . ياسفني اخذل اللي هيك فكر لانو انا بوقف مع الحق :D |
اقتباس:
|
يا سيدي هالرسالة هي أجمل رسالة قرأتها بحياتي حتى أحلى من الرسالة الي كتبتلي ياها حبيبتي بيوم من الإيام وبالفعل انو تسلم ايدك وعقلك بس بحب قول للشباب الي عم تقول الخلود لحزب البعث العربي الإشتراكي ما حزرتو أبدا لأنو معنا الخلود لحزب البعث انو الخلود للرجعية والإستبداد والظلم وإذا بدنا نخلص من رجعيتنا وبدنا نعيش كبني آدمين النا كلمتنا وصوتنا المسموع لازم نتخلص من الحزب بالأول لأنو الحزب هو واقف بطريق أي ديمقراطية ممكن تصير عنا بالبلد وتحيا سورية حرة أبية |
اقتباس:
خلينا محترمين بعض :D |
اقتباس:
أنا ما أسئتلك بالكلام ولا حكيت عنك شي أو عن غيرك أنا حكيت عن حزب البعث |
اقتباس:
ومعك بالشق الأخير تحيا سوريا |
اقتباس:
لان في نسبة من الشعب ما بيلبقلن الدمقراطية لش ما بتدور على شي غير الدمقراطية السياسية فقط متل ما صار بالعراق (فعلا شعب دمقراطي) قال ديمقراطية خلي الشعب يتحضر شوي ويعرف يتعامل مع بعضو اول الشي بعدين فكرو بالدمقراطية |
اقتباس:
|
اقتباس:
|
في فرق كبير بين الشعب العراقي والشعب السوري إذا عم تقارن بين الشعبين يعني فرق من الأرض للسما
|
اقتباس:
لان في نسبة من الشعب ما بيلبقلن الدمقراطية قديمه صارت هالأسطوانه رجا اقرأ الرساله و بتفهم شو عم حاول وضح.. الشعب يلي فيه شباب متل الشباب يلي هون بتلبقلو الديمقراطيه و ديمقراطيه أحسن من كل الديمقراطيات.. الشعب يلي بعدو عايش و عم يفكر بعد كل شي مرق فيه بيكون شعب خلاق و مبدع بس هنن وصلوه يلي هو فيه.. |
اقتباس:
انت برايك مين يلي واقف بوش الديمقراطية ؟؟ وبعدين عم تحكي عن الشعب كانك مو واحد منو انت شو يلي برايك وصل الشعب لهي المرحلة ؟ |
اقتباس:
وكمان في نسبة من السوريين ضعيفي النفوس (هنن يلي قلتلك عنن ما بيلبقلن الدمقراطية ) بظن اني هل شريحة عم نتنظر اي فرصة لزعزعة النظام السوري وقيادة النظام وتقسيم سوريا وووووو نحن شفنا بالعراق اول الحرب كيف كان الشعب موالي للنظام وشادد معو و قصص كتير ولكن اكيد ما كل الشعب خونه هي النسبة البسيطة هي يلي خربة العراق متل ما قال هتلر "خائن واحد = جيش كامل " اكيد يا حبيبنا مو الكل بحب الوطن متلنا في كان الشعب بتحب اشيا غير الوطن .... وفي ناس مو فارقة معن الوطن هدول ما بيلبقلن دمقراطية :D |
اقتباس:
طيب مين بيحدد مين الخاين و مين ضعيف النفس و مين و مين و مين... الخ و الأهم من هيك مين بيحدد انو اللي عم يقسّم الناس ع هاد يلبقلو و هاد ما يلبقلو.. بيحقلو يقسّم أساسا بعدين اسمحلي قلك انو اقتباسك لهتلر غير موفق أبدا اذا عم تحكي عن الديمقراطية... و يا هلا |
يا ياسين نحن عن نحكي عن الدمقراطية ومنعرف كلياتنا اني لسا في خوبة ببلدنا
اكبر مثال هوي عبد الحليم خدام كيف بدك تعمل دمقراطية إذا كان في خونة في كل مكان وتنظيمات سرية ومخططات انقلابية بعدين قلي وين في دولة عربية فيا دمقراطية ومالها عملية ....... |
اقتباس:
اكيد اقتباس متل هاد ماهو تجسيد لمسيرة هتلر |
اقتباس:
|
اقتباس:
عبد الحليم خدام أكبر مثال انو لازم يكون عنا ديمقراطيه لانو لو كان عنا ديمقراطيه ما كنا طولنا بالنا عليه 40 سنه و خلينا نائب رئيس.. |
اقتباس:
هي الشغله ما بس رحله البحث عن الديقراطيه انما فيها شويه ابعاد اخرى على ما اظن ;) اضافه الى انو الحقوق هي مش هديه مجانيه بعلب محارم يعني ما فيها منيه و ما بعتقد احد بالدنيا يملك الحق بان يقرر مين بيلبقلو و مين ما بتجي مقاسو الديمقراطيه .. |
اقتباس:
اقتباس:
بعدين شو تنظيمات سرية و ما سرية و حركات انقلابية... أي شو البلد شوربة؟ و مين قال انو الديمقراطية يعني تسيّب؟ يعني ما بعرف أنا ضايع بكلامك بصراحية اقتباس:
شو معنى عميل؟ ماني عم دافع عن حد أبدا.. بالعكس تماما رأيي بالأنظمة العربية واضح و صريح من زمان... بس شلون يعني دولة عميلة.. هيك خبط لزق دولة عميلة.. بدي أفهم منك هالنقطة أي نرجع ... مافي داعي الشي يصير بالدول العربية لحتى نقلدو... ذاتا موقفنا السياسي كحكومة ضد المواقف السياسية لجل الحكومات العربية و هالشي ما اعتقد بدو دليل لأنو كلنا شايفينو.. معنى كلامك انو لازم نلحق العرب بشو يعملو؟ اقتباس:
بعدين القضية العراقية شي ثاني تماما و عم نحكي عن سوريا.. و سوريا مانها العراق و اسمحلي مرة تانية قلك انو الترهيب بشبح العراق حجة واهية من زمان انتهى مفعولها |
بعدين ولو انو خارج الموضوع الي عم نحكي عنو كل سكان سورية بيعرفو فساد عبد الحليم خدام من أصغر واحد لأكبر واحد بسورية فليش نحنا بنستنا الزلمة ليصير خائن لنفتح ملفات فسادو صار خائن لما طلع حكا على سوريا وصار خائن لما اكتشفو انو ناهب سوريا ليش ما كان خائن قبل ما يهرب وليش ما حاسبو قبل ما يهرب وبوكرة بنذكر بعض كل الحرامية يلي بهالبلد محدا رح يحاسبون قبل ما يصيرو برا سوريا ويصيرو يحكو على سوريا |
اقتباس:
|
كلام جميل .... اؤيدك بهالكلام ....
انا صحي بحب السيد الرئيس و مؤيد الو للعضم كمان ... و مؤيد للنظام الحاكم بسوريا ... بس هاد ما بيعني انو واحدنا يسكت عالغلط ... حتى من مين ما كان يكون ... من محبتنا لسوريا لازم نقول للغلط انت غلط ... و ما نخاف ... و نحاول نصلحو .... و ايد بايد بتصير سوريا و بتعمر و بتكبر فينا و منكبر فيها .... |
اقتباس:
بعدين إذا سمحتو واحد واحد :o |
اقتباس:
يخوّفني مصطلح ضعاف النفوس لأنو استعمالو براغماتي... يعني بموجب وضع المعارضة كلها بسلّة واحدة هيك لقب مقترن بلقب الخيانة أو أو أو ممكن ينزل ع أي واحد... اقتباس:
اقتباس:
اقتباس:
اقتباس:
شو ضرك اذا في أحزاب؟ يعني كل عشر أشخاص حزب مستقل قلتلي... ليش أحزاب الجبهة احسن؟ بعدين سبق و حكينا لطلع ع لساننا شعر انو الديمقراطية ليست وليدة يوم و ليلة .. .بدها شغل طويل و تعاون وثيق .. لكن الخطوة الأولى ما عم ينمشى فيه لأنو لا مصلحة لهم انو ينمشى فيها... لسى في ناس عم تعتقل على حكي... عمي حكي عادي... قال اضعاف شعور قومي و نشر اخبار كاذبة.. و ما عم احكيلك لا عن خدام و لا عن البيانوني... شب متلي متلك لا لو علاقة بحزب و لا ألو مراق بالعمل السياسي.. ع حكي... هاد الشي ممكن يصير مو بس بين يوم و ليلة... ممكن يصير بلحظة... بس لزوم انو الناس تعيش بخوف محافظين عليها .. هاد بيت القصيد هامش عام بخصوص "نحنا" و "انتو" و هالتعميمات من هالنوع... يا جماعة كلنا ولاد بلد و بالنهاية يفترض انو بدنا مصلحة البلد و التقسيمات هاي غلط كبير... لأنو لا كل من قال معارضة متل بعضو و لا كل من قال موالاة متل بعضو... لذلك خلونا نتعامل مع فكر و حديث و نقاش بدون تقسيمات مالها داعي و يا هلا |
اقتباس:
ما معبّي عينك كأنو؟؟؟ الله لا يبليك متل ما بلى كريم عربجي انشالله |
الله محيي الشبيبة وأحلى منبر مقال رائع فيفا
اقتباس:
اقتباس:
وكذالك لما رأيت ملك المغرب ولا رئيس الجزائر ومعمر القذافي . الشعوب ممكن أن تخدع مرة ولكن ليس دوماً ولايمكن للشعوب أن تتعلم الا من تجاربها وأرثها التاريخي في الممارسة الديموقراطية . أن الأون لأن نبني تجربتنا بيدنا . |
اقتباس:
|
اقتباس:
|
بالنتيجه و بعد كل المداخلات هل نستحق الديمقراطيه؟؟
سيدي الرئيس: أوليست خمسين أو أربعين أو ثلاثين بالمئة تأتيك من إنتخابات صادقه بأفضل من 99,9 تأتيك بإستفتاء صوري و شكلي؟ أو ليس النقد الموضوعي و الصريح والإرتقاء بالوطن بأفضل من هتافات بالروح والدم تأتيك من حناجر لا من قلوب؟؟ أو ليست سوريا بقادرة على النهوض بأبنائها الشرفاء لا بأجهزة مخابراتها؟؟ فلتكن سوريا أولاً و أخيراً وإلى أخر الدهر |
انتو شفتو الاكراد شو عملو بالعراق ؟.؟؟
برئيك الاكرد يلي بسوريا غير ؟ شو رئيك جماعة الاخوان المسليمين العملية ؟؟ انا ما بريد ادخل بهل نقاش لان بعرف اني طويل سوريا بلدنا وبتهمنا مصلحتها وطبعا مافي احلى من الدمقراطية وحرية الرأي بالنسبة للتغيرات من زمن الاب : مو شايف قصص الفساد يلي عم تنكشف ويتعاقبو عليها كبار من المسؤولين مو شايف القوانين اللي عم تتطبق ويتعاقب كتير من المخالفين انا موظف كتير من امور الفساد تقلصت واصبحت شبه معدومة هي مسيرة التطوير والتحديث والقضاء على الفساد وصار في لجان للتفتش بكل دوائر الدولة "أريد أن أطمئنكم أن سورية قوية بإمكاناتها وبشعبها وقوية بالشعب العربي .. قوية بمحبتكم ودعمكم وصمودكم . من أقوال السيد الرئيس بشار الأسد" "وشدد الرئيس السوري الجديد على ضرورة تبني النقد "البنَّاء" من أجل مراقبة عمل الحكومة وأكد إيمانه بالديمقراطية، لكنه استبعد في الوقت ذاته اعتماد النموذج الديمقراطي الغربي، وقال إن ذلك مستحيل لأنه لا يتلاءم مع خصوصيات بلاده وقال إن دولا استلهمت من النموذج الديمقراطي الغربي وصلت إلى ما سماه بنتائج هدامة " المصدر - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - " بأميركا اول ما ستلم بوش الرئاسة طلعت صبية عالتلفزيون وقالت اتمنى ان لا يكون غبياً كما يبدو عليه " هي دمقراطية ولا قلة ادب وللرئيس بشار الاسد حكمة في زمام الامور |
معلم سؤال ليش عم تلف و تدور كتير؟ أنا لهلأ ما شفت الاعتراض تبعك وين... لساتك تحكيلي أميركا و العراق و هلأ دجيتلي الأكراد بالنص... انو شو مشان؟
يخليلي ياك عم تخلط الأمور هيك كتير انت... انو شو دخل يحبسو شخص على حكي بالأكراد هلأ؟ عن جد عم حاول اشوف الارتباط و ما عم الاقيه... و ردا ع حديثك.. طبعا الأكراد بسوريا -كأغلبية ساحقة- غير... حاج تطالع أشباح مشان ألله يعني هاي عم اترجاك... |
بذكر حادثة صارت بحلب
اني من فترة اجى الرئيس بشار الاسد على دائرة حكومية زيارة مفائجة وقعد بمكتب المدير وصار يفتش بنفسو بالدائرة وطلب كل موظف متأخر يدخل على مكتبو يمكن طلعنا برات الموضوع بس لازم ننهي الفساد والنفوس الضعيفة والخونه لتتطبق الدمقراطية الغربية 100 % |
اقتباس:
ليش ما عم تطلع على الطبقات بشتى اشكالها في طبقات ما بيعرفو شو يعني دمقراطية خلصنا ياسين الفكرة يلي بدك توضحكا باينة بس انت مو حابب تطبق غير يلي بدك يا وموحابب تشوف غير يلي بدك يا وكأن الشعب يلي بسوري كلو متلنا بقدر الدمقراطية |
| الساعة بإيدك هلق يا سيدي 20:29 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون