منع زواج القُصّر في سوريا
 

في حملة أثارت الكثير من الجدل، طالب عدد من الحقوقيين السوريين بمنع زواج القُصّر (ما دون 18 سنة) في سوريا.


والجدير ذكره أن قانون الأحوال الشخصية في سوريا يحدد سن 15 سنة للفتى و13 سنة للفتاة، بعد تحقق شرط البلوغ، كحد أدنى للسن المتاح للزواج قانونياً في سوريا.

ويعتقد بعض الحقوقيين والتربويين وبعض العاملين في المجال الاجتماعي بضرورة رفع الحد الأدنى للسن الذي يتاح فيه الزواج قانوناً إلى 18 سنة كحد أدنى، ويعتقد هؤلاء أن الفتى أو الفتاة غير مؤهلين لا نفسياً ولا جسدياً ولا سلوكياً لتأسيس أسرة وتحمل مسؤولياتها تحت سن 18، ويؤكد أصحاب هذه النظرية أن كثيراً من المآسي الاجتماعية والتربوية تترتب على زواج الصغار ممن هم دون 18 سنة خاصة زواج الصغيرات.

في المقابل يدافع البعض عن نص القانون السوري الذي يربط الحد الأدنى للسن المتاح للزواج بتحقق شرط البلوغ الجسدي فقط، مؤكدين على وجود حالات معينة تدعم دقّة هذا البند من القانون وصوابيته، كما يطالب آخرون بعدم إغراق الدولة في شؤون العلاقات الاجتماعية، في حين يحذّر فريق ثالث من أن الشرع الإسلامي أباح الزواج فور توفر شرط البلوغ الجسدي، مما يعني أن رفع الحد الأدنى للسن المتاح للزواج يمثّل تجاوزاً للمنظومة الدينية التي تعد المصدر الرئيس لقانون الأحوال الشخصية في سوريا.

فما رأيك فيما سبق؟
هل تؤيد تحديد الحد الأدنى للسن المتاح للزواج بـ 18 سنة؟
أم تعتقد أن في ذلك تدخل غير مبرر من جانب الدولة في الشؤون الاجتماعية والدينية؟ :larg:


عن سيريانيوز

مع مع مع مع مع وكتييييييييييير
لانو دخلكون الي تحت ال18 شو بيفهم لسا من هالدني؟

شكرا للمشاركة:larg:

شي منطقي يكون الزواج للقصر ممنوع (قانونا).. لأنو يفترض انو القاصر غير مؤهل نفسيا و فكريا لحتى يقدم على امور مهمة... و الزواج مصير حياة يعني يفترض الواحد أو الوحدة يعرفو شو عم يساوو

يجوز فعلا في ناس يصير عمرها خمسين سنة و ما تعرف شو بدها و بالمقابل في ناس 15-16 سنة تعرف تماما مكانها و شو بدها.. لكن القانون لا يحتمل النسبية و اعتقد انو حد البلوغ موجود لأمور كثيرة و لازم يكون للزواج كذلك


و شكرا عالموضوع

وانا مع كمان ... بس يعني في اختلاف بسيط ... انو هالشب بارادتو بعض الاحيان ... بس الضربة انو في كتير بنات بيتزوجو بضغط من الأهل وبهيك حالة ضاع مستقبلهن يعني لا دراسة لا شغل ولا اي شي وما بشوفو شي من هالدنية يعني بينتقلو عسجن بهيك حال ... وهالقانون اجا حماية الهن

مع وبشدةةةةةةة


:D

هلا بيك و شكرا على مشاركتك:larg:

نورت وشكرا على المشاركة:larg:

شكرا على المشاركة، وياهلا:larg:

شلون ما بيفهم بعصرنا جيبي ولد ابن عشر سنين بتلاقيه مخضرم بالحياة

طبعا انا مع مع مع

بأيد وبشدة اصدار القرار من هاد النوع وما بدي احكي كتير اللي قبلي حكوا كل اللي بدي اقوله :D

وبضيف على كلامك يعتبر جريمة بحق الاطفال في حال الانجاب

جريمة مشترك فيها الوالدين " مع تحفظات " والأهل اللي رضيوا يصير هال نوع من المهازل

:deal:

يعني بدون ما اقراء المقالة صوتت مع

لك طبعا مع ومليون مع وحتى 18 لسا صغيرة :jakoush:

انا مع انو يتحدد ها الشي لأسباب كثيرة وكبيرة
اهمها الزمن يلي وصلناله والأهم نسب الطلاق المرتفعة


اي نحنا هلىء بال 26 وماعم نعرف نختار:oops:

بس في شغلة يعني انا كتير بحترم رأي الأهل بهكذا مواضيع نظراً للخبرة ولنظرة الأهل الكبيرة لمصلحة الأولاد
بالنسبة للزواج

اختي كانت تحب شب من ايام الجامعة وطبعا امي كانت اتعاملنا كاننا رفقات
فكانت دائما تقلها انو ها الشب مو منيح وهي حرة
كنت انا كتير اتجاكر وقلا لأمي لك شو عرفك شو شفتي منو قبيح
وفعلا طلع كلامها صح

ولما تقدم شب لخطبة اختي كزواج تقليدي وافقت امي وقالتلا انو هو ابن حلال
وفعلا طلع الشب ابن عالم وناس

ولما انا انخبطت من 4 سنين كان رأي امي لاء وقالتلي انو رح اندم وفعلا ندمت وفسخت الخطوبة علما انو كان عمري انذاك22 سنة


يعني انا مع انو البنت لا تبكر كتير بالزواج ماعاد الزواج صار مهم بحياة البنت متل ايام زمان
الزمن اتغير ونحنا اتغيرنا

بتخيل صار في شي بها الحية اهم من الزواج وهو انك تحصل على مستوى علمي عالي
وتأمن مستقبلك بعدين فكر باشياء أخرى

موضوع حلو تحية اب ريتا

ماتغيروا الموضوع و شكرا للتثبيت :larg:

طبعا مع

ولا يا سيدي مو مع انو يتغير لل 18 لازم لل21 كمان


مايسترو

الأرقام اللي طلعت للاسف بتزعج

انه 19 واحد مع انه يمنع الزواج تحت ال 18
وشخص واحد مع الزواج

الشي اللي بيزعج انه رقم غير منطقي بالنسبة للشارع السوري اللي بيتعامل مع الامور بنسب مقلوبة وبعكس الاستفتاء النسب اللي طلعت معنا وبالتالي منقدر نعرف انه اغلبية الشعب السوري ما يفوت على النت وبالتالي ما بيستخدم الانترنت ( ما عبقول اذا فات على النت ضروري يكون بالأخوية )

بس على الاقل منقدر نعرف انه ما حدا من الشعب الجاهل بيستعمل الأنترنت وبالتالي كافة حملات التوعية اللي بتصير عن طريق النت بسوريا ما عبتصل للعالم اللي لازم تصلهم وبالتالي الأنترنت صعب يصير وسيلة توعية وهيك خسرنا نحن كسوريين اهم وسائل التوعية العالمية .

:D

( ابو ريتا الموضوع فعلا بيستاهل التثبيت )

ثبتو من اول ما نزل

لك انت مافي منك

بس شوها سمايلي هاد

طيري لقول لك عند رؤى حتى اطق حنكي معك :lol:

انا مع هاد الموضوع تماما لانو نص العالم بتجوز بناتها على بكير بعدين بعد ما تحبل وتولد البنت بيطلقها جوزها لانو عقلها صغير وبياخد الولد منها وبتصير البنت معقدة وما بعرف شو غير طبعا الولد شو صار بنفسيتو

وطبعا من النادر انها ترجع تتزوج مرة تانية اما لانها تعقدت من الجواز او لانو المجتمع ما بيحبذ المطلقات

وكل هالنتائج بسبب الزواج المبكر

انا لو فيي صوت اكتر من مرة ما كنت قصرت انا مع هاد القانون وياريت يكون اكتر من سن 18 كمان

ليش بال 18 بيصير الواحد عاقل...
لا خيو أنا ضد فكرة المنع...لأنو مو بال 18 سنة بيتحدد إذا الواحد خرج يتجوز ولا لأ...

بساطة بكون الانسان بعده بمرحلة ( المراهقة ) وما فيه يختار قرار مصيري بانه يحدد شريك العمر اللي بده يقضي معه حياته او الباقي من حياته الا اذا كان فكرة الطلاق مشروع كتير عادي بالنسبة الك واوكي مافي مشكلة يتزوجوا هلق وبعدين يتطلقوا ويصير عندهم خبرة فهاد حديث تاني .

غير انو بكون بعمر المراهقه وما فيه ياخد قرار وعقلو لسا ما اكتمل ونظرة للامور والحياة والدنيا لسا ما اكتملت .. بس هل هوي - هي جسمهن قادر فسيولوجيا للزواج لانو تحت ال18 ما بتوقع بيكونو لسا اكتملو وبيكونو ففاهميين حالون منيح !!

وهل هني فيهن يتحملو مسؤووليات بيت واسره واطفال وعيله !!

لهيك بتشوفي حملات التوعية طارشة الدنيا مشان يتخلصوا من مشاكل العلاقات في مرجلة المراهقة يعني عنا بينصحوا بالزواح بعد ال 18 بينما برا بينصحوا باستخدام موانع الحمل قبل ال 18 بيختلف المنظور لكن الفكرة واحدة واللي هي عدم استيعاب ابعاد العلاقة ومسؤولياتها


معك 100 بالمية يا ريمي بس ما عبيعجبني السمايلي اللي حاطتيه :frown:

أكيد أنا مع..ولكن
 

.. الزواج مؤسسة اجنماعية لازم ماننسى هالشي.. والقانون دوره هو دور العراب في الحقيقة..
والمسؤولية بتقع على عاتق الأهل.. لأنو القانون بالحالة اللي ذكرتوها بيشطرط موافقة الأهل لإتمام المعاملة قانونيا.. بقى مافي كتير مساحة للقانون بهيك حالة.. لأنو اللي يرتكبوها فيون يستنوا كم سنة لتزويج من يشاؤن ممن يشاؤون.. واللعب هون بدو يكون عالوتر الاجتماعي.. بدو شغل عوعي الناس..
يعني هيك قصة الصحافة بتلعب دور فيها أكبر وأكتر تأثير من القانون نفسه.. لأنو بالنهاية المسألة راجعة للأهل أصحاب القرار في تلك الكنتونات.
والسلام:D

اكيد انا مع هالقانون

ضد ضد .. وبرجع بزكر الاسباب

خطوة كتير مهمة
ورائعة اذا بتطبق جد
هيك بتلغي سيطرة الاب وبتمنعو من التحكم بمصير بنتو تحت حماية القانون

مع تعديل القانون وضروري جدا ...
لان متل ماذكرو الاخوة فوق الشب او البنت ماتهيئ لانفسيا ولاجسديا لهالشي ....
وبعدين طبيعه الحياة تغيرت عن القديم .... قديما كان الشب يتزوج ويجب هالمرا على بيت اهله ويسكن ويشتغل مع والده وهيك بكل بساطه

اما هلأ بدو يامن بيت وشغلو لبين مايتخرج ويزبط وضعو بدو عشر سنين وين رايح بالعجئه ..... والبنت نفس الشي بنات باعمار الزهور عم ترتمي على بيت زوجها وهي مافهمانه شي ...

وطبعا نحن عم نحكي على نسبة الاغلبيه بالمجتمع .

يعطيك العافيه على الموضوع والاستفتاء

مرحبا جميعا ..

ثانكس ابو ريتا عالموضوع ..

هلا .. انا بصراحة ماني عاطي موقف .. 100 % انو مع هيك قرار .. بس برايي في نسبة صغيرة .. بتضل برانية .. لل ضد .. يعني ما دائما .. كل الحالات بتكون .. بتقبل ..

في بنات هلا ... وخصوصي هلا بهيك وقت .. عم يكونو ما شا الله حولن .. البنات عرفانين حالن .. من ال 16 او ال17 ..

بس .. انو بضل في شي اسمو .. حالات خاصة يعني .. صعب انك تطبقا على .. الكل ..

بس النقطة .. اللي جد بتخليك تعطي .. نعم لهيك جماعات .. انو تطالب بهيك شي .. هية انو البنت من حقا انو تتعلم .. وتكمل دراستا .. وما من حق حدا .. انو يختارلا .. هلا قبل ال 18 ممكن تضل سيطرة وتاثير الاب على البنت .. كبير لدرجة .. انو بتقبل من تم ساكت .. بتوقع ... من بعد ال 18 .. بتكون ولو قدرت تفكر .. وتاخد فكرة كاملة عن حياتا .. وشو بدا تساوي .. :D

** انا صوتت ببالغلط على لا .. نقصولهم واحد :p

:D

حبيبتي هلق صبي عمرو 12 سنة بيعلمك وبيعلمني وبيعلم الكل عن الحياة

بس اكييد وقطعا وابسولوتلي نوت
لا اؤيد زواج القصر

يا زلمة خلي البنات يعيشو حياتون لسا الدني باولها
وبعدين يكملو تعليمون بالاول ويعدين يفكرو بالزواج لانو هيدا التاني مسؤولية كبيرة ولا زملها تروي باتخاد القرارات مو خبط لزء وبعدين منلاقي الرجال متزوج ع مرتو مرة تاني

طبعا انا قلت ضد هالقانون ورح قول ليش ضد ..
اول الشي .. هلأ اللي قالو مع قالو مشان عمر البنت وانو مابتكون بتفهم شي قبل الــ18 وجاهلة بكلشي ..
انا ضد هالرأيي .. بالعكس في بنات عمرن 14 او 15 سنة وبيفهموا وواعيات وعقلن اكبرن من بنات عمرن 20 مو 18 وقادرين يتحملو مسؤوليات وع قدر كبير من المسؤولية + انو بيعرفوا كل الامور اللي بتخص الزواج واموروا وبعلموني وبعلمو بنات عمرن 18 وفوق .. اكيد مو من باب الفكر المامنيح .. بالعكس هنن يعني ناضجين ومن سن ال14 حتى وعقلن كبير .. ويعني مناسبين تمام لتحمل المسؤولية .. وزواجن مو غلط بالمرة ..
حتى من ناحية الشكل وبنية الجسم .. يعني لما بتشوفن بتقول انو مابتصدق انو هدول بنات 14 :shock:
يعني بتعطين اعمار 20 .. و25 وفوق ..
بينما في بنات عمرن 18 واكتر ومبين عليهن بنات 15 سنة من مناعية ولسه اصلا مابكون مكتملين لا جسديا ولا شي ..
وطبعا عنا بحلب هالشغلة كتير منتشرة .. وزيادة وانا بصراحة في بعيلتي وبالعيل القريبة من ومن الرفقة والناس القريبين تقريبا بنات كتير وكتير كتير .. متجوزين من عمر الــ14 او ال15 وحتى في وحدة بال13 :shock:
وقريبين علي كتير ..
وطبعا كل هدول صلن سنين متجوزين وسنين طويلة وعايشين بصراحة حياة ولا اروع من هيك الله يهنين وصار عندن ولاد .. ورايحين يصيرو جدود .. وماشاء الله عليهن حياتن سمنة ع عسل ..
وبينما عمنشوف ناس متجوزين من عمر الــ18 وفوق .. وحتى فوق ال25 .. (ع اساس فهمانات ومتعلمات وهيك )
ومع هيك حياتن سيئة وماكتير متفاهمين مع جوازن وولادن وهيك ..
(واكيد مو للتعميم هالحكي دير بالك :sly: بس شرائح كبيرة من اللي عمنشوفا)
+ شغلة كمان .. يعني هلأ الوحدة لما بتتجوز وعمرا الــ14 وبتجيب ولد بعمر الــ15 سنة فرح يكون فرق بينا وبين ابنا 14 سنة مثلا .. فيعني هادا شي كتير كتير حلو .. وانو بعودو تقريبا متل الاخوة .. مو متل ام وابنا .. يعني انا بعرف ناس قريبين علي الفرق بينا وبين ابنا 14 سنة .. واللي بشوفن بفكرون اخوة مو ام وابن .. وشي حلو كتير هادا
(طبعا هالحكي مو للتعميم هي تقريبا شريحة كبيرة من اللي انا شايفو واكيد مافيني عمم وحط الف خط تحت مو الكل )
هلأ هي شغلة ..


شغلة تانية .. الشغلة اللي زكروة اللي قالو مع هالقانون انو الغصب ع الزواج من قبل الاباء وهالحكي هادا ..
فبقلن انا .. يا اخي هالحكي ماضل من شي .. هالحكي اللي عبتحكو كان من 40 .. 50 سنة او اكتر شوي ..
يعني ع زمن باب الحارة وهالحكي .. بس هلأ يا اخي هالحكي انقرض وانقرض بدرجة كبيرة وانا كتير واثق من هالحكي .. ماعاد حدا يجوز بنتو غصبالعنا متل اول .. اول الشي معظم الاباء عقولن تفتحت من التوعية وغيرو وحتى اللي باعلى درجات الجهل .. ماعاد عندن هيك شي .. والناس صار عندا توعية وماعاد الاب يجبر بنتو ويغصبا ع هيك شي متل الزواج .. لانو هالشغلة بالتحديد مابينغصب عليها .. كمان يا اخي بنات هالوقت انو ماعاد ينغصبوا ع شي .. يعني فلنفرض مثلا مثلا يعني انو ابوة غصبا .. يعني كمان مالن قصيرين حربة وماعبيرضوا بهالشي وباغلب الحالات ماعبصير هالزواج حتى لو الاب غصب البنت والبنت مابدا .. علمن انو هالشي انقرض وماعاد في اباء تغصب بناتا .. الا ما ندر

الشغلة التالتة .. يا اخي هي حرية شخصية .. اخي بركي بنت ال14 عاجبا واحد وبدا تتجوزا :shock:
اخي بركي البنت كسلانة ومو فالحة بدارستا ومابتحب الدراسة ومالا شي بالدراسة وبدا تتجوز يا اخي .. هي بارادتا .. مين بحقلو يمنعا .. وهالشي في منوووووووو كتير وكتير كمان بنات هنن بدن يتجوزوا من عمر ال14 بدون ماحاد يجبرن .. فهيك بنات ماحدا بحقلن ينمعن لا قانون ولا منظمات تشريعية ولا الحكومة زاتا .. هي حرية شخصية .. وخط احمر .. وكل واحد بيتحمل نتيجة حريتو .. وماحدا ابدا بحقلو يمنعو عنا ..
مشان هيك هالقانون غلط وغلط كتير كمان ..

وهي وجهة نظري انا بتفصيل ..
:D

لا تروحو عالحالات الخاصة... القانون لازم يحكي صورة عامة... اذا القانون يعتبر انو شخص تحت الـ 18 عام غير مؤهل للانتخاب مثلا, أو البيع و الشراء بممتلكات, و بدو ولي أمر لحتى يفتح حساب بنك... اذا القانون معتبرو غير مؤهل ليعمل كل هالقصص كيف راح يكون مؤهل لحتى يقرر شي مصيري بحياتو مثل الزواج؟؟

انا معك yass
حكومة حكياتك مقنعين بس باكتر الحالات منشوف انو الصبايا المتزوجات من سن 12 سنة او 14 سنة اكتر عرضة للطلاق او للزواج عليهن
هيي حقيقة في صبايا عمرن 16 او 17 وبيعرفو كل شي واوعى من الصبايا ذوات العشرين والاربعة وعشرين بس مش كلن لانو بيجي نهار وتزهق الصبية من حيات الروتين اللي عايشتا لانو ماتكون ديجا عايشة حياتا وسنّا كرمال هيك مابأيد هالزواااااج بنوووووووب

في الي رجعة..:D.

انا اكيد معو وبشدة وقوة كبيرين لاسباب خاصة بالحبيبة :cry::cry::cry::cry::cry::cry::cry::cry::cry::cry: :cry::cry::cry::cry:

اي ياسيد Government معك حق في نسبة زواج بسن 15 او 14 وبتنجح وبتستمر بس نحن عم نحكي بشكل عام وهلأ لو سألت اي بنت تزوجت صغيرة وماكملت دراستها بتقلك ياريتني كملت دراستي وبعدين تزوجت ....

وبعدين انت عم تقول على البنات والبنيه الجسديه صحيح في هيك بس صدقني مو فهمانه شي مجرد بنت مراهقه وعم تلعب وبدها تحب وتعشق وبتجيها فرصه الزواج وبتتزوج وبتجيب ولاد وبصير عنا 2 و 3 وهي عشرين لسى ماطبقت .....
وفي لهلأ بزمنا ناس مابتعلم البنت إلا للصف السادس او الاعدادي اقصى حد وبتزوجوا هالبنت وخلص .... ولاتنسى انه الولاد الي رح يجو رح يتربو بنفس الطريقه الي تربت فيها الام او الاب ...

وبعدين نحن هالجيل سواء الشباب او البنات محور حياته ان يتزوج وبس يتزوج كانه حرر فلسطين ... ماعاد علينا شي

براي لازم يتم تحديد سن للزواج ..:oops:

انه ما زبطت معي البنت بتكون واعية بال 16 / 17 ووقت بتصير 20/24 بيختفي الوعي منهل وبروح وبترجع جاهلة ؟!