|
عمنا المسحراتي, لايمتى....
مع كل رمضان تتكرر مأساتنا من جديد ويتخربط نظام النوم وما عد نعرف لا نفيق الصبح ولا نشتغل ولا ندرس وبنتم نعسانين طول النهار وكلو مشان حضرت جناب المسحراتي ذو العصا والطنجرة اللي ببلش خبط فيون بعد نصاص الليالي ليطلع صوت يفيق الأموات قبل الاحياء بحيث ماعد فيك تنام من بعدو.
انا بدي اعرف لايمتا رح تضل هالظاهرة منتشرة بمدينة دمشق؟؟ للأبد على خير؟ يعني فهمنا من زمان كانت شغلتو يفيق هالعالم مشان ما يروح عليها السحور, بس هلئ شو الفائدة منو بوجود الموبايل اللي بيقدر اي واحد يربط المنبه فيه لأي ساعة بدو اياها. واللي ما معو موبايل يا سيدي انا بجبلو منبه ابو الخمسة عشرين ليرة من بسطات البرامكة بس يبطلولنا شغلة هالمسحراتي بقى. |
هلا من كل عقلك بدك تجيب لكل اهل الحارة منبه ابو الخمسة وعشرين ليرة ما بقى بتلحق لهيك خليه يطبل ليشبع ...
بعدين بيجوز بيطبلو بس مو كل يوم والصوت عندي ما بيصل قوي لانو بسابع طابق بيتي محسوبتك .. بس بلكي من شان يدق ع بابك اخر رمضان متل العادة ويتحجج بمنية انو عم بيفيقك وانت ولا بعمرك شفتو ولا بتعرفو بيقلك ايدك عالعيدية :p |
اي يا بي ..
كرمال ال 100 وال 200 ورقة اللي بدن ياخدوا اخر الشهر نحنا بحارتنا اتفقنا معو .. ونزلا قلنالو لك ابي تعا اخر الشهر وخود بس روق ولا بقا تمر من عنا .. قام قال اوك .. وهيك كمان ما عاد خلينا .. هدول اللي مالن .. لا بيفتلو ولا شي .. يجو .. وهاكزا .. |
بالعكس المسحراتي مظهر كتير حلو من مظاهر رمضان بعدين المسحراتي ما بيفوت الا عالبيوت اللي بتقلو يفوت عليها
و ما بيسبب اي ازعاج عا كل حال انا ما بتذكر اني كنت نام الا بعد ما يروح المسحراتي بزمان بالإمارات ما عندن المظاهر اللي عنا ياها و انا كتير بحب هالعادة و التقاليد الرمضانية عنا و لازم تضل مستمرة لأنو ألها جوها الخاص سلام:D |
ابو اليمن اكد على كلامي انو طابو رسمي .. يعني كل وجعة هالراس كرمال العيدية والمنية انو عم بيعزب سواعدو وبيدقلك لتفيق حضرتك شفت هالمنية شو كبيرة بحقك :?... ليك بالنهاية مو كل المسحراتيين متل بعض يعني ما كلون لطفاء بس بحسون اغلب الاحيان بيستدعو منك الشفقة او انو بيمثلو دور الفقير الغلبان يلي ما معو قوة يومو اخر الشهر .. لانو في منون كزابين كتير وما منفتحلون الباب ..:p
ويا سيدي هاد مظهر حلو بس مو دايما اي خلو العالم تنام لسا ما صار السعة 2 ونص بيبلش يرقعلك بهالطبلة مدري الطنجرة ع قولتك :pos: |
اقتباس:
الله وكيلك مافي بيت بالحارة قايلوا يفوت, لك أصلن نحن ما حدا عنا بالحارة بصوم ومع هيك عم يطربنا كل يوم بتغريده . واذا بدك هالعادة تضل مستمرة اترك الامارات اللي مافيها هالعادة وتعال عيشلك شي اسبوع زمان عنا بالحارة لحتى تشوف اذا في ازعاج شديد او لا. |
يعني هو مظهر فلكلوري مو اكتر ... يعني المسحر اقترن برمضان وهيك ... ومشان هالمعتر يضمن قرشين على هالعيد .
بس معقول انه هالدقتين اللي بدقهن بفيقوا العالم وما بخلوهن ينامو ؟ يمكن مبالغة شوي ما ؟!! :p |
المسحراتي الى الابد
و خليه قاعد على قلبكوون و يزعجكون الصبح و يتخربط نظاام النوم تبع حضرتكون و تعطوه اخر الشهر العيدية الي بدوو يعني ليش مدايقين من رمضاان ما بعرف صار ما بقى بدكون يكون في رمضان استغفر الله العظيم |
ممم هلا اسلوب خليل مو حلو منوب شلون يعني يقعد ع قلبنا انا من ناحيتي ما عم يوصلني ازعاجات بس في ناس يا اخي مو مسلمين يسطفلو كمان هدول بدو يفيقون ع سحور .. يعني حتى المسلم بيكفروه ثم بدي قول شغلة رمضان حلو وجو رمضان كتير بيعجبني عالرغم من صعوبتو عند البعض بس جو رمضان حلو كتير واسطفل انا برايي ما الك حق تقول خليه قاعد ع قلبكون ما حلو هالرد منوووب ترى:frown:
|
اقتباس:
! ااي اما شو دينا هالطريقة من مناقشة وهيكه طريقة حكي خيالية ... حاجة مشان الله بقا حاجة .. |
اقتباس:
عني من شي سنتين وقبل ما يتفقو معو .. معليم .. كان الله وكيلك كل يوم يجي ويمر من ال 2 ونص طيب الفجر بيأدن عال 5 كان .. انو والله بكير كتير لسا ويطلعلو المزكور جارنا الله يزكرو بالخير عمك اب يوسف بالباجوق العالي من فوق .. وامك واختك وانت نازل وتعلق بيناتن .. يحرق كفرو شو كان راسو يابس .. كل يوم .. يجي بنفس الوقت .. لحتى .. وصلت معو هاد الجار اللي فوق عقد مانو مشرشح .. انو نزل تقاتل معو تحت وجابو الشرطة :p .. بقا شريك .. يعني هوة بيدايئ بيني وبينك .. |
اقتباس:
لك هو قلبه عليك ... مشان ما تروّح عليك السحور وتقضيها جوع وفشفشة بهالعباد تاني يوم :lol: اقتباس:
|
يعني من جهتي أنا بحبو للمسحراتي..أبو طبلة........بس يعني متل الوضع عند الخال هون.........يعني ما حدا بيصوم بل الحارة......يئطع عمورو شو مطيلس...........هفففففففففف مسخرة حتى بهل الئصة صار سلبطة
بعدين من شان حجي خليل....شبك معصب.........مين ئال الناس بدا تلغي رمضان أيدي بزنارك طولي يا لبلك......من شان الدنيا صيام.....يصرلك شي والله خطي |
أنا من جهتي بحب المسحراتي كتيير
ولأني بالغربة بحاول حدد موعد زيارتي على سوريا لتشمل كم يوم برمضان لأن ما بحس بجو رمضان الا بالمسحراتي عند الصبح والعيد كمان طيب انتو اذا زاعجكون المسحراتي اذا كنتو غير مسلمين او ما بتصومو ليش ما بتحكو معو لما يوصل على بيوتكن ما يدئ وبالنسبة للمسحراتي فهو انسان أنا كتير بحبو بحترمو لأنو بيفيق حالو بنص الليل ليفيق الناس وشغلتو مو سهلة بنوب برأيي هو أصلا ما بيشتغل هالشغلة الا اذا كان بحاجة مصاري لأن لما يدو يفيق من الناس صباحية العيد لياخد العيدية شغلة مو سهلة بنوب لأن هيك بيطلب من الناس وبرايي ابشع شي الطلب من الناس وخصوصا هالايام. الله يعطيه الف عافيه للمسحراتي. |
اقتباس:
انو هلا صارت شغلة عالفاضي .. ومتل شحادة .. بس .. انو بصيغة تانية .. احيانا فعلا .. بحب انو يكون عنا هيك تراث مثلا او .. تقاليد ... بس حلوة يعني .. بس بالمقابل .. وقت يجيني .. عالساعة 2 .. الصبح عم يدق .. ويفيقني .. ويدايقني .. قبل بوقت معين .. اي يعني هلا نحنا .. بالقرن العشرين وما عاد الو هاللازمة لانو ايام زمان ما كان في منبه وساعات .. لزلك كان مهم .. وعفكرة هوة ما عم يدق بيت بيت .. وقت يكون جاية .. من تحت من البناية عم يدق .. عالطبلة .. بيفيق الكل .. لانو دقتو عالية وصوتو عالي .. وخصوصي ازا في ولاد او شي .. اي والله بينقزو .. شكلو مسحراتي جديد هاد .. وبدو اب يوسف يطلعلو .. :p |
اقتباس:
|
المسحراتي بكل سوريا .... بدق على طبلة صغيرة ..
إلا عنا بجيب معو طبل ... شغل فرقة مراسم و حرس شرف |
معقول التصييف يللي صاير عنا بالمنتدى ..
صار يللي بيحكي عالمسحراتي .........كأنو عم يسب الاسلام .. أو القرآن شخصياً الله يرحم ايام الشيخ لايص |
| الساعة بإيدك هلق يا سيدي 17:23 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون