|
اقتباس:
ما بقدر كتير أعطي رأي كوني غير قادر ع فهم كلمات الاغنية...بيضل الغناء ملامسة بين الكلمة واللحن وتكامل بيناتهن..... للوهلة الاولى...ممكن أُعجب بكون المغني طفل من أصل قد يكون عربي...عم يغني بلغة أجنبية ممكن تكون أيطالي.... برفع القبعة وبستنى كم سنة...لاسمعه مرة تانية... |
اقتباس:
صرت خاف اسمعها...صوتها صار يجرحني...يحرقني...صرت أتجنب اسمعها... بيذكرني بحبيبة الروح...يللي ما بقدر أنساها كل العمر.... |
التواقيع....
اقتباس:
الحب شعور...والمشاعر تصدر من القلب...ولا مكان للعقل فيها.... أجمل ما في الحب هو حالة الجنون يللي بترافقه...فيض المشاعر يللي ما بيعترف لا بسدود العقل ولا بجدران المنطق... " إذا ما دعاكم الحب فاتبعوه... ولو كانت دروبه عالية تحفها الصعاب... واذا ما لفكم بجناحيه..فأسلموا له... ولو أدماكم في ريشه السيف الخفي... إذا ما حدثكم صدقوه... ولو عصف صوته بأحلامكم كالشمال تحيل الروض الى يباب" |
اقتباس:
تاريخيا...كل النظريات الانسانية والاجتماعيى فشلت وقت وصلت لمرحلة التطبيق وقت كانت أدوات تطبيقها خاضعة بشكل أو بأخر لرغبات الانسان...وبالتالي انا موافق مع الشطر الاول من التوقيع...(في حال كان الكاتب يقصد انو المسافة شاسعة والتطبيق صعب)... بس بالنسبة للنظريات العلمية...كل نظرية صحيحة نظريا فهي قابلة للتطبيق العملي... أما المسافة بين الحلم والحقيقة فهي مسافة قابلة للتعديل بشكل واسع من اللانهاية الى الصفر...بمعنى أنو وقت بمتلك الادوات والاصرار فهالمسافة تتناهى الى الصفر ولما ما بمتلك اي من هالمقومات فهالمسافة تسعى الى اللانهاية وبيصير التطبيق مستحيل... :shock: |
اقتباس:
بخاف تصير صورة قائلها أهم من الجملة بحد ذاتها... بصراحة...أول مرة قرأت هالجملة من زمان فكرتها للمسيح...بعدين عرفت انها لتشي غيفارا... الجملة بحد ذاتها إنسانية رائعة.... بس السؤال الاهم بالنسبة الي؟؟؟ هل قدر قائلها انو يورث روحه الثورية لكل محبينه حقيقةً وفعلا ً ولا ورثهن بس صورته ودقنه ونظرات اعجاب البنات؟؟؟ بالحقيقة...بتمنى لو كان عندي الجرأة اني اتبنى هالجملة وهالفكرة... ع هامش هالتعليق بحب قول لمستر سامو...اشتقنالك.... |
اقتباس:
ببلدنا صارت قيمة الانسان كم كيلو لحمة بيقدر يشتري بالشهر... كم مرة بيقدر يشتري تياب لولاده بالسنة... كم مرة بيقدر يطالع ولاده سيران ع قاسيون لانو اجار السوزوكي غالي.. كم مرة بالسنة بيقدر يمر من قدام الخضرجي والبقال بيدون ما يخبي راسو منشان ما يقولو وين حساب الشهر الماضي... كم مرة بيقدر يشعل الصوبيا بالنهار لانو صار حق تنكة المازوت شي مدري قديش... كم مرة بيرتي بنطلونو وكم مسمار بيدق بصباطو قبل ما يقدر يشتري غيرهن... هي هي قيمة الانسان الجديد... اما الثورة...والمجتمع...والوطن فصارو ******* |
اقتباس:
لا تعليق.....أبداً |
اقتباس:
في ثنائية الطب - المسرح....شو نقاط التقاطع ونقاط الاختلاف بين هالاتنين؟؟ |
الوصايا العشر
1- أوصي صديقي الذي يسكن معي ب بما أنو حالياً قاعد مع رفيقي لفترة مؤقتة....بدي قلو أنو يبقى يوطي صوته بس يحكي وما يصيح.....ترى أنا تعودت ع الحكي بصوت واطي وصار الصوت العالي يوجعلي راسي.... لاء هلق جد... الوصية لرفيقي...مو بالضرورة يللي ساكن معي...هو أنو ما يطعني بضهري متل ما كتار من رفقاتي طعننوني...يا عمي عاملوني متل ما انا عاملتكون...لو كنت غلطت وطعنتكون...قتلوني...بس لا تظلموني... 2- أوصي اخوتي ب بوصي أخي الوحيد...أنو يصفعني يوم بغلط..... 3- اوصي حسام (الحكيم الغالي) أنو يقوي حالو شوي بالعربي....بدو كم دورة إملاء.... غير هيك...مافيني وصيه...االشي الوحيد يللي ممكن فكر فيه هو أنو ما يتخلى عن أخوية بس عاد هو من زمان قال...أنو أخوية وجدت لتضل...بوجوده او بغيابه... 4- أوصي اساتذني في كلية الطب بدمشق ما ينسو أنو العلم من حق الجميع...مانو تجارة ولا هو مزاد...من حقنا نتعلم...ومن واجبهم يعلمون صح...ويللي ما بيقدر يعطي...الله معه.... 5- أوصي ان يتم التبرع بما املك الى أملاكي المادية...الى جمعية أطباء العالم Médecins du monde أملاكي المعنوية تُحرق اذا ما طلبها احد أفراد عائلتي... 6- اوصي ان اكفن ب بفضل قول أوصى بأن أكفن مع... - حفنة تراب من أرض ضيعتي بسوريا - غصن زيتون من شجرات أرضنا - منديل أمي - خصلة شعر حبيبتي - شمعة وكبريتة...لأني بخاف من العتم 7- اعترف بشئ لم اقله من قبل بخاف من الوحدة...وبخاف من الصمت...وبعدني بصلب أيدي ع وجهي أخيانا مع أني مو مؤمن... وما راح حب مرة تانية بعد اليوم.... 8- اوصي الشعب الفلسطيني ب مع أني ماني ثورجي...بس بدي قلهن أنو ما يوقفو...عملو يللي نحن ما عم نقدر نعملو...قولو لاء... 9- اوصي جميع اعضاء اخوية ب أخواتي بأخوية....أخوية وطن...لانو ما عاد في وطن حقيقي يجمعنا...لا تعملو فيها متل ما صار بالوطن.... 10- اوصي بمتابعة تنفيذ وصيتي ما بعرف... |
اقتباس:
يا صاحب القرار.... ما هكذا تورد الابل.... ما هكذا تصنع الأوطان.... ما هكذا تصان الحريات... أصنعوا وطن...لا تكسروه...ازرعوا جواتنا حب سوريا...الغيرة ع سوريا...استعدادنا لندفع دمنا وروحنا كرمال سوريا... بيكفي يللي انسرق منّا...لا تقضوا ع بقية الحب الباقية جواتنا لبلدنا... التوقيع...مواطن سوري.. |
يسلمو طارق لانك عطيتني الرغبة أني أرجع اكتب...رغبة فقدتها من زمان....
وان شاء الله ترجع هالرغبة مرة تانية ما ترجع تخمد... تتمة برنامج وحوارات موفقة... :akh: |
اقتباس:
وطريقة ردودك للوصايه العشره .. لك تحياتي و حترامي ، لردودك ، يلي من منظوري ، كانت افضل بكتير من ردودي ... وفعلا طريقة ردك بتعبر عن شخصيه كتير مميزه :D |
بشكرك آش ع لطفك وذوقك....:akh:
بجد خجلتني.... |
اقتباس:
الطب العلم الانساني الرايق الممتع والمسرح الفن الانساني الراقي كلاهما فن يرتقي بك لحدود اخرى وعوالم اخرى |
اقتباس:
أسف ع الازعاج |
صباح الخير
ضيفي اليوم الاكثر اثارة للجدل البعض اعتبره خائن وعميل والبعض اعتبره بكلامه حرية راي بكل الاحوال هو منا وفينا صار واليوم رح نتعرف عليه بوجه جديد فاوست نورت صمت الحواس اهلا وسهلا فيك |
فاوست خبرني شوي
فهمت من ردودك الاخيرة انك تتقن اكثر من لغة برافو عليك وواضح انو ثقافتك عالية بس شو السبب انو ما بنشوفك الا بالسياسة ومن الطبيعي انو مو ممكن تكون حياتك من الصبح للمسا سياسة |
فقرة انا ارى والصور الخمسة
 |
| الساعة بإيدك هلق يا سيدي 22:48 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون