تسجيل متابعة

بيجوز تأخرت ع الرد بس بعتقد أنو أسلوبي ما كان فيه أي تهكم أو استخفاف أبدا وبعتقد أنو التساؤل يللي انطرح ما انطرح بهدف السخرية منك ام من أرائك بل كان بهدف اني افهم وجهة نظرك بما يتعلق بمستوى المعيشة بسوريا خصوصا أنو ما كتير مقتنع بوجهة نظرك عن تقييم هالمستوى المعيشي المتواضع جدا أو حتى الضعيف للمواطن السوري.....

ياسيدي المحترم انا ماعم مسح جوخ ولا بعمري عملتها ولا رح اعملها ولاعم دافع عن باطل..... بس عم احكي اللي شايفتو ............وكمان ماني بحاجة اسأل حدا انا شايفة بعيوني وعايشة الوضع متلك واكتر يعني لما كنت عم اشتغل باوراق البعثة ضليت حوالي النص السنة متشنشطة بين الدوائر الرسمية بين الساحل الي ساكنة فيه بالاصل وبين الشام ولحد هلأ كل زيارة عسوريا عندي شغل بلاوي بالدوائر الرسمية يعني حافظتها حفظ وشايفة بعيوني الفرق الشاسع بين المنطقتين بنسبة العلويين بالدوائر الحكومية...... وبقلك عالاكيد انو مافي هالشي اللي متخيلو من احتلال العلويين للدوائر الرسمية
وبتمنى منك او من اي حدا يجبلنا احصائيات بالموضوع اذا بتتوافر واكيد تكون الاحصائيات مو عن الساحل اللي فيه اغلبية سكان من العلويين
وع فكرة لا انا ولا انت ماعم نألف حكي بمعنى التأليف بس كل واحد الو ملاحظات وللاسف ملاحظاتنا كانت متضادة وبظن الفصل الاكيد رح يكون باحصائيات:D

بدك إحصائيات؟؟ أنا معك، لازم تعرفي إنو أنا و كل مواطن سوري، و بالأخص الشباب، عبارة عن دائرة إحصاء عامة مستقلة بذاتها، ابتداءا بإحصاءات الرواتب و انتهاءا بإحصاء عدد المواطنين السوريين يللي عايشين على و تحت خط الفقر، نحنا مارق عراسنا كلشي بتعرفي و ما بتعرفي، اسمحيلي وين رحتي بالشام؟؟؟ عالتعليم العالي و التربية و التعليم و الخارجية؟؟؟؟؟ كلن كام دائرة، و ما احتكيتي هالاحتكاك يللي نحنا مرينا فيه، بس قبل ما احكي أي شغلة لازم تعرفي إنو أنا ماني ضد حدا، مشان الله فهمي هالشغلة، مو يعني إزا عمعلق على هي الظاهرة معناتو أنا ضد طائفة معينة، و الله مو هيك، بس الفكرة إنو هالموظفين عاملين شغلة إنن من جماعة الرئيس حجة مبررة للفساد تبعن، يعني يللي متلن بسهلولوا أمورو، بس لما يشوفو مو موافق عتصرفاتن ببلشوا يتمردوا عليه، أما يللي مو منن ما بمشوه إلا بواسطة أو رشوة، و نادرا ما يكونوا ولاد حلال و أكابر.
و الله العظيم كلشي حكيتلك ياه هوي من وحي الواقع، يعني أنا عمبلمسو شخصيا، أما هدول يللي بالشام، بجوز لهجتن مغيرة لأن تعودوا على لهجة أهل الشام، بس هادا الشي ما بينفي تمييزن العنصري، و الدليل أكتر من 16 مليون مواطن سوري مذلولين من ورا هالشغلة.
بس بتعرفي، إزا هالنقاش رح يسود صفحتي و يطالعني طائفي و كذاب، فأنا بعتذر و ما رح علق عشي، فخار يكسر بعضو، المهم أنا مرتاح من أشكال الموظفين يللي بتقطع الرزق، و مرتاح من معاملتن المهينة و المذلة و لأسباب طائفية بحتة، صحي صرلي أكتر من 10 سنين بهالدوائر، و كل سنة عمكحل عيوني بشوفتن البهية، بس هلأ انا مرتاح:melody: ، و إنشالله دوم هيك.

[MEDIA][/MEDIA]انا لما حكيت عن احصائيات رسمية مو احصائيات اشخاص متلي ومتلك لانها بتكون بعيدة عن العواطف بمعنى تاني مانها مع طائفة ضد طائفة (وانا ماعم اتهمك انت انو هيك) وكمان مانها مع النظام او ضد النظام ....... لانو لما بنكون عم نعيش واقع مع نظرة مسبقة الو بنصير نشوف الشي اللي بيخدم نظرتنا المسبقة وبس...... يعني لما عندك نظرة مسبقة عن الوضع انو الطائفة العلوية هي الاغلبية وهي عم تشجع الفساد بتصير لما بتشوف كم واحد منون (وانا مابقول انو مافي شي منو ابدا) بتصير تحس انو هالشي كتير قوي واقوى بدرجات من الواقع الحقيقي

وانا ماقلت انك طائفي وماقلت انك كذاب وبعتذر اذا فهمتني هيك...... بس رأيي سبق وشرحتو بالكم كلمة اللي فوق بانو مافي اي انسان يكون واقف عالحياد من اي ظاهرة حواليه وبالتالي وبشكل لا شعوري رح ينظر للظاهرة بطريقة عاطفية ممكن تضخم من هي الظاهرة:D

بتمنى يكون وضح رأيي وماتضل مدايق مني :D

يعني ملاحظ انو مصطلحاتك كتير كبيرة وعم تبين انك متحامل علينا بس مانك حاسس وما بدك تعترف
بس الله يسامحك بتعرف ليش ولا يلا بلاها احسن ما اجرح مشاعرك متل ما انت عملت :D

وهي لامراة من ورق :D

........:D

لك كيف ما سمعت هاد ابن حارتي ولو :p
اهلين صيادو
واهلين بالاخ بس روق روق هيدا الشي منو كتير ولا تدايق حالك يعني عم ينحكى عالكل
يعني متلنا متلن .. لا تزعل ولا تحملها كتير .. وهيدي الك :D

نسجيل متابعة ومشاركة :p

مرحبا شباب هاد الموضوع فعلا مهم، بالإضافة للأشياء يلي حكيتا فوق بدي علق على نقاشكم أول شي و بعدين ضيف رأيي:

هلق أنتو الأثنين عم تحكو من وحي تجربتكون الخاصة مو الإحصاء يعني بغض النظر عن التحيز اللاشعوري أو الأفكار المسبقة اللي حكت عنو امرأة من ورق ، بدكون تاخدو بعين الاعتبار التجربة الشخصية بتتأثر بظروف الشخص، يعني أمرأة لما بتجي من الساحل حيث التركيب الطبيعي أكبر بتحس بفرق كبير و بوجود عدد أقل و بشكل ملحوظ من العلويين، بينما أبوطريق و بسبب حساسيتو الظاهرة للموضوع بحس بأنو أعداد هائلة بالوظائف، الشغلة التانية أنتو الاثنين احتكاكون بطبقة معينة هني موظفي الخدمات العامة و الإدارية و يلي باحتكاك مباشر مع المواطنين بينما الدولة فيها وظائف إنتاجية و غير إنتاجية (معامل و مؤسسات إدارية..) يعني كيف ما كان تجربتكون مو شاملة أبدا و العينة كتير متحيزة و ضيقة (دوائر محددة بوزارات محددة) احصائيات رسمية مافي

الشغلة المهمة أنو على أي أساس عم تحددو و تعرفو أنو الموظف علوي؟ على لهجتو؟ شكلو؟ عفوا بس في إذا أخدنا موضوع اللهجات و تحديدا حرف القاف.. الغالبية العظمى من الناس بتفكر أي واحد بيقافي علوي و هي مغالطة كبيرة لأنو في كتير ناس لهجتون فيها قاف بتبدا بلهجة الدير و الحسكة اللي سهل تمييزها عن الساحل و بتمر بلهجة السويدا يلي أصعب شوي و ما بتخلص بقرا حمص و حماه و أدلب و حتى الساحل يلي فعلا صعب على غير سكان هديك المناطق تمييزها و حتى إذا تميزت اللهجة فهي مو دليل أبدا على دين أو طائفة صاحبه و اللي بيعرف اللهجات بيعرف تماما شو اللي عم بحكي عنو أنا

المحصلة : لا تاخدو تجاربكون الشخصية كمصدر وحيد للتعميم و البث في الأمور و إنما سمعوا و نوعوا مصادركم و حاولو تناقشو لب المشكلة بدون ما تنحازوا عاطفيا (طبعا الكلام بينطبق علي و على الكل )
هلق أنا باعتقد أنو أمرأة من البداية ما قصدت تكذبك و إنما تعلق على وجهة نظرك و بالنسبة للتملق أنا فعلا متابعها بحياتي ما شفت عندها تملق أو حتى مديح للحكومة
أبوطريق أنا فعلا بحس أنك مانك طائفي من حيث المبدأ و من كتاباتك و آرائك يلاحظ أنك بتفهم شو يعني طائفية و بتكرهها و بتحاول تتفاداها بس بنفس الوقت أنت ببعض الأحيان ممكن تقول شي أو فكرة فيها محتوى طائفي بس بعتقد المهم المبدأ و أنتي لما بتغلط فهي ناجمة عن الوضع الخطأ للنظام

أنا حابب ناقش الموضوع أكتر من ناحية دور الحكومة والسياسات الحكومية يلي هي حجر الزاوية بالموضوع بس مابدي بس صف حكي و مشاركات طويلة مملة يعني رح اترك هي النقطة لألكن لتحركوها بعدين بحط مشاركة فيها

دمجت موضوع "عيب يا جماعة" مع هاد الموضوع لأنو رد على هاد الموضوع

لاوديسا يا عيوني، فكرتي ما عمتوصل، أنا ما عبشمل كل العلويين، أنا عمبحكي عن النسبة الضئيلة منن، و يللي مستلمين مناصب حكومية، هدول بيعتبروا حالن من جماعة الرئيس، و بالتالي هنن فوق القانون، هدول اللي وصفتن بولاد الحرام، مو كل العلويين لا سمح الله، قسما بالله كتير انقهرت لما حسيتك فكرتيني عمبحكي عن الكل:cry: :sick: ، أما مشان الموظفين من الطوائف التانية، مانن أنظم، كمان فاسدين، و مو كل الموظفين العلويين فاسدين، في منن أكابر و ولاد حلال، بس المشكلة بالموظفين العلويين الفاسدين عميحتموا بظهر الرئيس، و هالشي كتير خف من لما استلم بشار، و الدليل إنو تجوز وحدة سنية و زت الطائفية ورا ظهروا، و كأنوا عمبقول للموظفين العلويين الفاسدين، لا تحطوا إنو إنتو علويين متلي حجة للفساد، هي انا الرئيس أخدت وحدة من غير طائفتي، و كانت هي رسالة واضحة لكل العلويين يللي عميستبدوا و يذلوا الشعب بحجة إنهن من جماعة الرئيس، و للأسف هدول الزمرة من الموظفين الفاسدين هنن أغلبية بالدوائر، و إزا مو أغلبية فبكونوا مستلمين مناصب حساسة، يعني مافي معاملة بتمرؤ بدون موافقتن.
أما مشان إني متحامل، إي أنا متحامل، بس متحامل على كل الموظفين الفاسدين بالدولة، شو ما كانت طائفتن، متحامل عليهن لأن خلوا الفساد يعشعش بالمواطن السوري.
أما دانيتو فإنو كيف بقدر ميز الموظف، فهي مو معقول اعتمد عاللهجة، لأن القروي بيحكي بالقاف، مو بس العلوي، يعني مو معقول خبرة شي 10 سنين بدوائر الحكومة المختلفة تعلمني هيك‘ بس لما تاخد و تعطي مع الموظف مشان تعرف شو نوع الرشوة يللي بدو ياها، و طبعا لازم تضرب صحبة معو مشان يمشيلك المعاملات الجاية، و هيك بتعرف أصلو و فصلو، سيرة حياتو من طقطق لسلام عليكم، و للأسف بتلاقين متعاجقين إننن من جماعة الرئيس، و ما حدا بيسترجي يحكي معن لأنن مدعومين من فوق، و بيقولوا إنن حرروا الشام .
بتمنى تكون وجهة نظري وصلت منيح هالمرة، و آسف للإطالة.

أنا معك، و بظن دور الحكومة مهم كتير، ولازم يبدأ بالرئيس نفسو، و هادا الشي أنا بعترف إنو صار، و تحديدا لما تجوز الرئيس من الطائفة السنية، هي كانت رسالة واضحة لنبذ العنصرية، رغم استياء و امتعاض عدد من العلويين، و مرة سمعت كلمة، طبعا بحكم فوتاتي و طلعاتي بالدوائر الحكومية، سمعت موظف قال "ربوا و اتعبوا" هي لما بشار تجوز أسماء الأخرس، و بظن هادا الارتباط كان متل صفعة للعلويين الفاسدين بسوريا، و طبعا بوقتها كلنا تفاءلنا ببشار و قلنا في تغيير جذري رح يصير بسوريا، بس للأسف كانت هي الخطوة الوحيدة للأمام، لأن الفساد ضل متل ما هوي، و الاعتقالات التعسفية ما انتهت، و الظلم لساتو عمبهددنا، لسا الشرطي بيرتشى و الموظف بيرتشى و أقرباء الرئيس لسا ماسكين البلد، و اللي صار من تغييرات اقتصادية أو ما يسمى باصلاحات كان هدفها إيجاد تبرير قانوني لثروة آل مخلوف و غيرن يللي ما جمعوها إلا على حساب 16 مليون مواطن سوري مذلول و منهان.
ما بدي طول أكتر و بدي خلي مجال لغيري إنو يشارك بهالنقطة، آسف عالإطالة.

شكرا شباب وصبايا مرة تانية على مشاركاتكن في الموضوع

بحب زكّر الشباب والصبايا انو موضوعنا واضح وما في داعي ندخل بجدالات بيزنطية ونبتعد عن الجوهر الرئيسي للموضوع وهوه:

الطائفة العلوية جزء أساسي ورئيسي من البنيان الطائفي السوري يجب أن تحترم ، اصيبت مثلها مثل باقي الطوائف السورية بالظلم جراء الممارسات الاجرامية التي مارسها النظام الغير شرعي على سوريا..

وبنفس الوقت بندعو العلويين يكونوا بصف سوريا مو بصف حزب المجرمين والعملاء وقيادتة الخائنة

ما بدنا طائفية
 

الظاهر ما بتعرفو للاخ ... زاهي.:pos:.؟!؟!!؟

الاخ ... همو الوحيد بشار الاسد والعلويين..ومواضيعو دايما طروحها هدامه....!