|
:o حسام بجلالة قدرو بالمقلاية ..رحمتك يا رب
سؤال صغير كتير شو رأيك بهاالكم شغلة ... الله حمص سوريا قهوة الروضة . . . شغلات اكبر هون نزار قباني هتلر شارون الدكتور .. النظام الفساد الطائفية وسؤال صغير لحالو هاد ... كيف فيني شوفك بس انزل ع حمص ؟؟؟؟ وتحياتي إلك :D |
حسام أنا انطبزت بصراحة .. :frown:
بس سؤالين صغار لو استلمت رئاسة سوريا .. لمدة عشرة أيام و مسموح الك كل يوم تسوّي شي .. شو حتسوي و بالترتيب .. و التاني لو كنت مطرح الله شو بتغير و شو بتضيف وشو بتنقص عالشي اللي سوّاه .. |
يالله ليش اول سؤال بسألك هوي بتقلي يش يش كلون خمس سطور والله حرام عليك يا شيخ :cry:
رح غير السؤال روح انبسط لتشوف قديشني كويس :larg: السؤال هوي .... لخصلي حسام بتلات كلمات وبس وازا بتقلي يش يش بدي فجر بحالي قنينة كاظوظ ام الحجم العائلي و حملك المسؤولية :frown: وفي الختام سلام |
هههههه روق يوسف بيك .... ولو معقول
اي حسام راجعلك مسويات بس لمخمخ يعطيك العافية :D |
كيفك حكيم .. ميرسي :Dأنا مو كتير بحب الأسئلة الشخصية ....لذلك رح أسألك كم سؤال بخصّوا المنتدى : أخوية صار ألو مكانة كبيرة عند كل عضو من الأعضاء حتى أنو صار طقس من طقوسنا اليومية بقى ما رح أسألك شو مكانتو عندك ...أو شو بيعنيلك ( و من هالحكي ) بس بدي أسالك قديش بياخد المنتدى من وقتك يومياً ..؟؟ ** من سنة لليوم .... تضاعف عدد أعضاء أخوية خمس مرات تقريباً بس يا ترى أنت شايف أنو المنتدى بهالسنة .... تقدم ...و لا تراجع ..؟؟ ** من لما رجع المنتدى من التهكير ... يعني من حوالي 4 شهور يا ترى قريت شي موضوع و لقيتو ( متل ما بقولوا ) بعبي الراس ..؟؟ ** ليش ما عاد كتبت بالمنتدى حتى ردودك صارت ( تقريباً ) بتقتصر عالبريد |
ماتت الاخوية ولا لسه عايشة ;)
الله يرحما |
ورد خطا بالرد السايق ماقصدي ماتت الاخوية انا قصدي عن المقلاية لاتواخذونا
وهلأ لنتبهت عليه بعد ماراح وقت التعديل فلاتواخذونا على هالخطأ المطبعي :oops: ووجب التنبيه |
حكيم هاي اسئلتي المعتادة:
1. شو الشي الي ما فيك تعيش بدونه؟ 2.ازا عندك الصلاحيات انك تغير شي واحد بسوريا شو ما كان...شو بتغير وليش؟ 3.ازا كنت لحالك عجزيرة و بدك تضل معزول عن الناس واي شي خارج الجزيرة لمدة سنة و فيك تاخد معك شخص واحد و3 اشياء من اغراضك الخاصة شو بتاخد وليه؟ (ما فيك تاخد موبايل او تلفزيون او كمبيوتر او اي وسيلة اتصال مع العالم)وطبعا مو اكل وشرب وهاي الاشيا لأنه اعتبرها مأمنة الك بس بدك تاخد شي بعز عليك وبعنيلك انه يضل معك 4.شو تعريف الغربة بالنسبة الك؟ عفكرة معك 3 ايام تجاوب فيهن عالاسئلة وبعدها بتزت حدا غيرك بالمقلاية...بس بدو يكون مو مزتوت فيها من قبل واكيد اكيد مو انا لأني حبابة وما بتحمل القلي..:p موفق بالمقلاية .. والله الشباب مو مقصرين بالاسئلة الله يعينك :o :D:D |
تلج .... تلج عم تشتي الدنيا تلج ...:shock:
بس يرد الحكيم على هدول .... بجرب اسال |
لك أنا شو قلتلكن
هع هع هع زتوا زبون غيروا:lol: |
لا لا انطرو شوي ... لح نحاول:D
|
اقتباس:
اقتباس:
اقتباس:
اقتباس:
اقتباس:
اقتباس:
اقتباس:
اقتباس:
اقتباس:
اقتباس:
وهي لمينالك الاسئلة حسام.... ناطرينك:D |
;)
يرحم روحوا بياع العجة |
اهلا مجددا، عذرا على التأخير (ان كان في تأخير حصل..) عموما .. بالعودة للموضوع ...
ستكون ردودي ما هي باللون النهدي هذا اقتباس:
اقتباس:
|
مشكور كتير حسام عالرد :D
|
هذا الرد التاني ..
[sweetbaby]كيفك حسووووووووووووووووم هلا بماانو انت مشتقلي كتيير بعرف والك زمان ماحاكيتني رح تجاوب ع كل اسئلتي وبدون يش يش او مدري شو:jakoush: اي يلا كم سيجارة بتدخن بالنهار؟؟؟ يش يش انت ليش هيك؟؟؟ هيك .. شو اكتر غنية بتحبا؟؟ وليش؟؟؟ يش يش مين مطربك المفضل؟؟ليش مافي مطرب مفضل .. انا بحب الأغاني تبع المطربين مش المطربين، اصدي بحب لفلان كذا وكذا وكذا ، وهيك ، بس هوي المطرب كباكيج بالأغاني الي فيه و غيرها ما بيستهويني (او للصراحة ولا مرة فكرت بالموضوع انو متل اذا بدك تروح على جزيرة مين بتاخد من المطربين معك ؟؟ ما بعرف بفضل بيجوز آخر iPod .. بس مش المطربين بزاتهم).. هلق للحديث تتمة ، يعني اذا زنقوني بالزاويي بقول "شهد برمدا" بس اذا ما انزنقت ما بسمي ولا مطرب .. .شو المواضيع اللي تقراها بالمنتدى اكتر شيئ بقرا بأخوية مشاكلكم ، تفششاتكم ، تاني اكتر شيئ بقراه ، مسبات الي وللإدارة وللمشرفين .. :lol: شو حلمك بهالحياة فشي .. من زمان كنت اطمح ، واحلم ، اليوم صرت عم شوف المستقبل رؤيا العين المجردة .. عارفة يعني لمن مثلا في مثلا عقد الماظظظظ بالسوق مشتهيتيه و حقو 100 الف دولار، بس عاجبك كتير .. بتحلمي انك تجيبيه ، انت بجيبك في 10 الاف .. بس بتعرفي كيف فيكي تشتغلي وتجيبي ال 90 الف اللازمة ، بالتالي يصير معك حقو .. هيك بيبطل انتي بتحلمي فيه .. بيصير انتي عم بتشوفي حلمكم (سابقا) رؤيا العين المجردة ، عم بتشوفيه كواقع ، لمن بيصير انت شايفة الطريق واضح وجلي لتحقيق الحلم هذا ، بيبطل يكون حلم ، بيصير طريق عم تمشيه .. و رح توصلي لآخرو .. اي يعني هيك شي صاير الموضوع .. بطل عندي حلم بمعنى الحلم بحلم فيه .. ، صرت متل ما تقولي عم شوف الأشياء (الي كنت احلم فيها سابقا) رؤيا العين المجردة ، عم شوف المستقبل متل ما شايف المونيتر هلق ، متل ما بشوف الشمس بوضح النهار .. هيك شايفها اماماي ، بطلت بحاجة احلم فيها .. كلي الي بحاجتو هو اني كفي مشي .. شو الصفات اللي بتكرهها بالانسان ولا مرة فكرت بالموضوع ؟؟ عم فكر هلق شو بكره ما عم لاقي شيئ مهم .. عليه القيمة .. والصفات اللي بتحبها كمان ولا مرة فكرت بالموضوع .. بس على رأس الأشياء الي بحبها "بالإنسان" _حلو اصطلاح الإنسان هذا _ ، هوي بيجوز يكون "حب المعرفة" مش قصدي المعرفة ، يعني ما ضروري يكون بيعرف او متثقف مثلا او مطلع ، بس موضوع حب المعرفة انو يكون بيحب يفهم اكتر بيحب يعرف اكتير بيحب مغامرة العقل بالبحث و التنقيب من الداخل .. و بنفس الوقت يكون بيحب المعرفة "بفضول الأطفال" بدهشة الأطفال هوي وكبير ياخد الجديد ، بإنبهار الأطفال .. مش متأكد بصراحة شو بحب اكتر شي بس بعتقد هذا من الأشياء الي بحبها بالبني آدم .. "موضوع حب المعرفة و الإستكشاف والبحث المعرفي " .. شو حكمتك بالحياة حكمتي هي انو مافي حكمة واحدة بتنفع بالحياة ، احسن حكمة انك تفضل عم تتعلم من الحكم كلها .. من التجربة التراكمية للأفراد والجماعات والأمم .. وهيك .. شو هيي صفات امراة احلامك تشبهلي اذا ربحت مليون دولار, شو بتعمل فيها؟؟ ما حددتي كيف بدير ابحها؟؟ اذا قصدك بالشغل يعني اني اشتغل و بشغلي اعمل مليون دولار ؟؟ فإذا هيك على الأكيد ما رح بعمل شي رح ضلني عم بشتغل ليصيرو مليونين و10 و مليار و 100 .. انو تسالي .. مو اكتر .. اذا قصدك باليانصيب ربحتها .. فما بعرف.. شو ممكن اعمل فيها .. بس غالبا بنفقها على ملزاتي الشخصيي :lol:(بس عاد ملزاتي الشخصيي شوية مختلفة، يعني العمل الإجتماعي و مساعدة الآخر كي يساعد نفسه .. وهيك مسائل تبع نفخ القلب و التسالي هيي ملزاتي الشخصيي .. ) انت سعيد بحياتك وليش اي سعيد .. بس فيني كون سعيد اكتر من هيك .. و مبسوط بس فيني كون مبسوط اكتر من هيك .. .اذا فشلت بتحقيق حلمك شو رح تكون ردت فعلك؟ بغير الطريقة او الإسترتيجية و بكفي او ابلش من جديد .. وشو هي اكتر مادة بتكرها و كمان ليش؟ شلون يعني مادة ؟؟ (متل شو زئبق كبريت فوسفات يوريا ؟؟ شو قصدك بالمادة؟؟) هل بتامن بالابراج ؟ و علل جوابك بزمانو لمن كنت في مقتبل العمر شاب متل الوردي بأول طلعتو .. :lol: (اي) كنت افتح بمبوني الصبح (كان عنا مجمع بنبون هيك بصينين دائما فيه بنبون) .. المهم كنت افتح بنبوني وانا وعم افتحها قول اذا طلعت حمراء فاليوم رح يكون رهيب جدا وفظيع .. وبالفعل كنت افتح البنبوني اذا كان تطلع حمراء فكنت كيّف.. انو معناها اليوم احلى يوم ، اليوم رهيب .. اذا ما طلعت حمراء ، فكنت قول لك هلق من عقلك البنبوني بدها تحددلك كنو اليوم حلو .. اي اكيد اليوم حلو ونص .. شقدك بايخ عم بتحط عقلك بعقل بنبوني .. فبكلى الحالتين كنت انبسط .. و اصطهج واتفائل باليوم تبعي .. وهيك الأبراج بالنسبة الي .. اذا منيحة كان به ، اذا مش منيحة ما بهتم .. عموما ما بقراها بس انو هيك بالمجمل اذا صار وقريبتها شي وقت بيصير .. يعني بإختصا لا بآمن ولا ما بآمن .. ببساطة ما بيهمني الموضوع .. سواء كانت صح او خطأ فسيان بالنسبة الي .. هل بتامن بالقدر؟ علل جوابك اي بآمن بالقدر ، بس مش النوع المكتوب على الجبين ، النوع الي بنعملو بإيدينا ، النوع الي انت بترسمو و بتصوغو و بتعمرو و بتبنيه بإيدك .. في تدخل بيحصل خارجي ما منعرف اليتو بعد ، ما منفهم شو هوي .. بس نسبة هال التدخل كتير صغيرة .. اليسير من القدر منعملو احنا .. هل بتامن بالسحر و المشعوذين؟ علل جوابك هوي بالمجمل لاء .. بس كمان هذا المضووع ما بيهمني يعني ال بأكد ولا بنفي السحر .. ببساطة ما بيهمني سواء كان صح او خطأ ما رح يغير معي شي .. عرفلي البيروقراطية والديكتاتورية يش يش (طويل) شو اكتر شي بيعصبك؟ الجهل .. بيلبكني اكتر ما بيعصبني .. شو اكتر شي بيفرحك؟ انو غير الأكل الطيب المعمول على مزاجي و بالطريقة الي على كيفي بيفرحني الإكتشاف المعرفي، اني اكتشف حل لمسألة كانت شاغلة بالي ، لإشارة استفهام كنت ما عم لاقي حل ليها هيك .. شو رايك بقضية الشرق الاوسط؟ شي ظريف .. شلون تعرفت على أخوية ..؟شلون صارت الفكرة(بالنسبة لالك) بالصدفة مين أكتر أعضاء بتقرالون بالأخوية .. Hus عنجد مو تخويت ، لإني بنسى شو كتبت وعن شو كان الحكي فبطر دائما ارجع اقرا ردودي لأعرف شو صار ووين صرت بالحكي او الشغل او غيرو .. يعني ردودي او مشاركاتي بالنسبة الي متل نقاط علام برجعلها لأعرف وين وصلت .. كم اخ و اخت عندك؟ شب (شيخ الشباب هوي على سن ورمح وعين الحسود فيها عود) و اختين توأم.. (كلهم اصغر مني_بالعمر_) مين من اخواتك هوي المفضل عندك وليش؟ كل واحد منهم الو شقفة بقلبي مطوبي بإسمو غير قابلة للبيع او التنازل .. او النقل .. شو هوي فيلمك المفضل وليش؟ انا جديد على عالم حضور الأفلام ، بالسنة سنتين الأخيرات لصرت احضر افلام ، قبل ذلك بكل حياتي ممكن كلشي حضرانو شي فلمين تلاتي .. بس بالسنة سنتين الأخيرات جمعت رفقاتي كذا مرة (من حضيري الأفلام وخليتهم يعملولي دروس بأسماء الممثلين والمخرجين والأفلام الي مهمة _منشان ما بين طشم اذا نذكر شي مرة قدامي اسم شي ممثل او فلم مهم_ .. و بعدها عملت قائمة بأفلام الي لازم احضرها (كرمال نفس السبب السابق) و بلشت احضرهم .. حضرت جزء منيح .. بس من بين الأفلام الي حضرتها اكتر فلم اثرر فيني و هيك اتاخدت فيه جداا .. هوي .. The Village مين ممثلك المفضل وليش؟ ما بعرف اسماء اذا عطيتيني صور بقلك هذا الي بحبو وبحسو حقيقي ، بس منشان ما اترك الجواب في شي جاي عبالي قولو .. انو لو بيكون في محل نختار فيه او نصوت ليلي منكرهون مش الي منحبون .. يعني ببرامج متل ستار اكاديمي وهيك شغلات انا بحياتي ما صوتت ولا بعرف حدى من الي حواليي بحياتو صوتت. . بس لو في تصويت لمين اكتر شخص بتكرهو ، او لو في تصويت ليلي ما بتطيقو (اصدي تصويت مضاد يكون) ، فبأكدلك اني ما رح اترك الموبايل من ايدي.. و بعرف افواج وافواج من البشر متلي .. عفكرة لو اكتشفو هاي الفكرة جماعة البرامج هاي رح يطبقوها فورا ، هني مش متخيلين كم الناس اي عندها استعداد تقول شقد مانها طايقة فلان ، او شقد شايفة فلان بايخ وسخيف ومبتزل .. هني بعدهم لهلق معتمدين على انك تصوت ليلي بتحبو، بس لو بيكون التصويت هذا بتع sms " تصويت و تصويت مضاد " مثلا شيئ من قبيل اذا بتحب فلان بعات مسج فيها رقم 1 ، اذا ما بطيقو و بدك تبطل تشوفو بخلقتك لمن تفتح التلفزيون و باللحظات الي عم تنقل فيها من محطة لمحطة ، ابعت الرقم 0 .. بقدر اكدلك انو رح يقصو دهبببببببببببببببببب وباكدلك كمان انو في موايزن رح تختلف تماما ، يعني كان على الأكيد شهد برمدا اخدت سوبر ستار، مثلا .. كان على الأكيد شخص متل هداك (ما بعرف شو اسمو) ما ربح بهداك البرنامج (كمان ما بعرف شو اسمو) .. وهيك يعني .. المهم طولت بالحديث، كان بدي قول انو في ممثل مشهور اخد صيت على الفاضي "بالعرب عم بحكي لإن متزكر اسمو" بس انا ما بحبو (كممثل ) هوي "حسين فهمي" كشخص كتير منيح ، و بني آدم بالمجتمع كتير نموزج منيح .. بس كممثل فاشل فاشل فاشل، ما بيعرف يمثل ، حركاتو هيي هيي بكلشي و ما بيتقمص الدور بنوب ، مدري كيف بس كممثل بالحيط ... عم بذكرو لأنو اخد اكتر من حقو بكتييييير كتير .. لإنو شكلو حلو و ابن عالم وناس فاخد ادوار مهمة كتير ما كان بنوب بيستحقها .. بالوقت الي ممثل متل نور الشريف / عادل امام / وكمشة كبيرة من الممثلين السوريين .. ، اذا بتشوفي افلامون من لمن كانو فرخ من اول ما طلعو بتحسي محترفيــــــــن جدااااا .. يعني موهبة التمثيل ولداني معون بدمون بيتمقصو الشخصية بطريقة رهيبي، ممثلين تانيين اتعلمو التمثيل متل ما بيتعلم الواحد النجارة فهني مش ممثلين بالفطرة وانما صار التمثيل عندون صنعة او حرفة ليس اكثر .. اوكي الجواب طويل بس بقيت البحصة .. مشي الحال .. شو اكتر شي بتحبو بالحياة وليش؟ الحياة شو ناوي تدرس؟شو عم تدرس؟ ايمت بتخلص؟ شو ناوي تعمل بعد؟ طب بشري لهلق ، رح ادرس بعدها XX ناوي اعمل بنهاي المطاف صفيحة و كبي نيي .. شو أكتر معادلة كيمياء حفظتها بحياتك؟ يش يش (اذا قلت في ناس رح تفهم شغلات ما بدي فهموها هيك) شو أحلى قصيدة مرقت معك؟ شو قصتك انت ورقم #1 احلى كذا واحسن كذا واكتر شغلة كذا .. انا بحب رقم #2 اكتر من رقم واحد بحسب المنافسة محتدمة دائما على رقم 1 و تاركين رقم تنين فاضي .. بالوقت الي كل المتنافسين على رقم 1 ما رح غير يرهقو بعض ، لو حدى بيحجز رقم 2 احسن.. ليش مافي شركة طموحها تكون تاني احسن شركة كذا بالسوق؟؟ (لو في شركة بتسوق لهذا فبسهولة رح تحصل على مكانة 2 احسن شركة بالسوق بكذا ) بس لإنو كل الشركات عم تتنافس على رقم واحد فولا وحدي فيهم عم بطول رقم واحد ، عم بيضلو يخبطو ببعض .. على الفاضي .. رقم تنين اسهل للنيل و احسن سدقوني .. اريحي يعني .. تركون يدبحو بعض على رقم واحد وقعود برقم تنين انت ومدر رجليك .. شوي شيو بتلاقيهم كلون صارو وراك .. و منغير ما تحس بتصير رقم واحد .. شو درس العلوم المفضل يلي حفظتو؟ هوي بالبكلوريا كان درس خصوصي كان اول درس عن الدارونية و الإصطفاء الطبيعي (كان سهرة يوم سبت) .. هداك اليوم ما بنساه ، كان استاذي الإستاذ"دعاس ناصيف" من مؤلفي كتاب العلوم والكيماء و من علماء بلدنا الأجلاء بمجالي الأحياء والكيميا وعندو العديد من المؤلفات بهال المجال بالعربي والإنكليزي .. المهم .. بهداك اليوم قعد عندي الإستاذ دعاس ممكن اربع او خمس ساعات .. كان انا اخر حصة انا و كتييييييييير انبسطت بالمحاضرة و اخدنا الحديث والنقاشات وهيك شغلات و بعدين عملتلو عشاء وقعدنا تعشينا ، واتفقنا نتابع تاني يوم من الصبح .. كانت الماما مدري وين فإجا لعندي الصبح و عملت الفطور فطرنا تقريبا بيض و بندورة او هيك شي عملت يومها .. و تابعنا الحصة تبع الي بشت اليوم الي قبلو (كان يوم احد) للضهريات تقريبا .. هاي اكتر حصة بذكرها .. كان الموضوع بالنسبة الي كتييييير شيق ، وكان اول مرة بعرف فيها عن الإصطفاء الطبيعي.. كان اول مرة بسمع فيها بالموضوع من اساسو و بالنظرية يعني .. و كان عندي مآت الأسئلة بزهني عم بتدور عم بتدور عم بتدور عن كتير امور .. واجت هاي النظرية متل جواب لعشرات الأسئلة الي كانت ببالي فهيك كان يعني يوم عظيم جدا .. شو حدود سوريا الجغرافية؟ اوف.. سؤوال من النوع الأصلي .. بهنيكي على حسن اختيار هال السؤوال .. فعلا احنا بحاجة لإعادة انعاش ذاكرتنا و بحاجة ماسة لتصحيح معلوماتنا من الحين للآخر .. بما هو دقيق ووافي .. اي .. يحد سوريا شمالا بشريط حدودي بحدود 900 كيلو متر ، جبال سوريا العليا و سلسلة جبال منابع الفرات العظيم (اوما يعرف بالخارج بتركيا) ويحد سوريا شرقا شريط صحراوي بطول 600 كم يسمى بالباديا السورية الكبرى (او ما يعرف محليا بالعراق) يحد سوريا جنوبا باديا سوريا الجنوبية .. (ما يعرف بالأدرن) بشريط حدودي 375 كم، بالإضافة لإمتداد شريط البادية السورية الكبرى مع العراق .. يحد سوريا غربا على شريط ساحلي حركة 350كم البحر السوري الكبير.. (او ما يعرف بالعامية بالبحر الأبيض المتوسط) كما يحدها بشريط جبلي سلسلة جبال سوريا الفينيقية - سلسلة جبال منابع العاصي العظيم .. (ما يعرف بسلسلتي جبال لبنان الشرقية والغربية وسهل البقاع ) بشريط حدودي حركة 375كم .. يحد سوريا من الجنوب الغربي بشريط حدودي 75 كم بلاد جنوب غربي سوريا (او ما يعرف بفلسطين الحبيبة) .. مع اطلالة مهويي سياحية على بحيرة سوريا الجنوب غربية (ما يعرف باللغة الدارجة ببحيرة طبريا) .. هاي المعلومات الصحيحة ، واي معلومات عندك بخلاف هذا فهيي مدسوسي .. سوريا حدودها جنوب و شرق بادية سوريا ، بالشمال في جبال سوريا ، بالغرب في بحر سوريا الكبير .. هذا الي بدو يفضل بزهنك دائما .. كيف ما فتلت بوصلتك في اراضي بتكتسب توصيفها و موقعها بالنسب لسوريا .. هاي حدودك .. وهاي بلادك .. عرفها منيح ..وخليك واثق من معلوماتك .. ما تخلي لحدى الفرصة يمرقلك معلومات مضللة .. انت الصح وفطرتك السليمة هيي وبس الصح ... الي هني ما بيعرفو والي وحدك بتعرفو .. ان الفرات قبل ما ياخد روافد البليخ والخابرو كان بيرفدو الأبهر من شريايينك .. والعاصي قبل ما يصب بالبحر السوري الكبير كان يتسكع بوريدك .. نحنا مش بحاجة ندرس جغرافيا الكتب هاي .. جبال بلادنا و سهولها و انهارها و بحيراتها وصحاريها و تلالها وقراها و حواضرها .. بالفطرة ولداني معنا .. التانيين بحاجة يثبتو انتماؤون دائما .. التانيين بحاجة بكل وقت يسبتولنا ولائهم لهال البلد ولهال الأمة ، ودائما رح نفضل حاطين اشارة استفهام جمبون .. و كرمال هيك بتلاقيهم شي بيحطو علم صغير على الجاكيت شي بيحط نجمة على سيارتو شي صورة فلان .. شي نسر بالساعة .. وكتير كتير مظاهر بيتسمو فيها الي بيحسو بخلل بإنتمائهم ، بيحاولو يعوضوه بمظاهر ما .. وهني محقين في هذا .. هني مطالبين من قبلك و من قبلنا كلنا دائما يأكدولنا انهم اوفياء وانهم بالفعل بينمتمو لهال الأمة .. انت مش متلهم لإنك ما بحاجة تأكد لحدى اي شي .. اسرار روافد الفرات .. و تسكعات العاصي وحدك الي بيعرفها.. و لهيك عمرك ما حسيت باي عقدة انتماء او وطنية ما .. ما حسيت بأي وقت بحاجة تعبر عنها بالصور والرسمات والخطوط والألوان والشعارات .. خليك على فطرتك .. هيي وبس الصح ... رح يفضلو يحددو طبريا بخطوط عرض و طول .. ورح تفضل وحدك بيعرف بالظبط مكانها الحقيقي براحة يدك اليمنى .. رح يفضلو يحكو عن سهل الغاب وامتدادو و و و .. ووحدك مش مهتم ..ورا إبتسامتك مخبي سر هال السهل تارة بخدود صديقة و تارة بجسد رفيقة و حبيبة .. خليون عم يحكو .. قلون حكو حكو.. شدو حالكون .. وانت ابتسم .. ابتسامتك بتخبي اشيا كتير .. و بتفضح اشيا كتير .. فبتسملون .. وهز راصك .. و خليون عم يحكو .. هني بحاجة للحكي هني ما بيملكو غير الحكي .. فخليون يحكو ... شو طبيعة لبسك : سبور -فنكي -رسمي ؟ تياب منيحة .. مش كتير بغيير ، بس بستنضف .. شو اكتر موقف محرج صار معك؟ لا ماهو الموقف كتير محرج .. فما بينحكى .. بس كل ما بتذكرو بحمر .. وبستحي على دمي .. بتعتبر حالك ن الناس ياللي بيحكو كتير؟ اي .. بالمقاييس المتعارفة (اذا قسنا كام كلمة الواحد بيحكي واخدنا المتوسط فرح كون فوق المتوسط بحكي) .. بس على الرغم من هذا انا بشوف اني بحكي اقل بكتيييييييير من الي لازم ينحكى، و اكتر بكتير من الي بتمنى احكيه .. (بس بشكل عام بيني وبين حالي بشتغل اكتر ما بحكي ..) شو اكتر اسم بتحب للشب وللبنت؟ يش يش مين قضوتك بالحياة ؟ يش يش شو رأيك بالطفولة و الولاد ؟ حلوين كتير .. بس بوقت محدد ولوقت محدد .. يعني ما بحب يجيني ولاد من النوع الي بدو يبكي بالليل ويفيقني من النوع الي بدو يعمل بي بي على المخدة الي بدي نام عليها .. بس بحب العب معون بأوقات الفراغ.. و هيك شوفون عم يكبرو كل شبر بندر .. بس ما كتير يلزقولي مين أعز شخص على قلبك و ليش ؟ عيلتي بشكل عام ، واخي بشكل خاص .. و رفقاتي الفرسان الثلاث _مع انو عددون كبير كتير بس بيفضلو الفرسان الثلاث قد ما كترو_ و هيك .. كلون عزيزين على قلبي و من غير ليش .. إذا كنت على طرف جبل و لا سمح الله لا سمح الله شخص من عيلتك متعلق بإيدك اليمين و حبيبة القلب بالإيد التانية و مدندلين لا سمح الله يعني و مافي ترفع غير واحد صحي أنت قوي بس هلق مافيك تساعد غير واحد مين بتساعد ؟ هلق اذا بدي اعمل بهلون وبحبها ببمخلوقة من قلب ورب فما بعرف شو ممكن اعمل ممكن زت حالي انا وهني واخلص .. بس اذا وكان لهال البد بدي افلت حدى فأكيد اكيد مش حدى من عيلتي .. (بغد النظر مين ما كان الي بالطرف التاني .. هون بيبطل يكون مهم مين الي بالطرف التاني لمن بالطرف الأول حدى من عيلتي ) شو أحلا أيام حياتك؟ الي لسا ما اجت .. شو الحياه بالنسبه إليك؟ mission possible وتسالي.. شو بنظرك دموع الفرح أم بسمة الفرح؟ بسمة الفرح شوالشي الذي تتمنى أن يرجع؟ موسى الصدر :? :lol: موقف صار لك ولا تقدر تنساه؟ لحظة حطيتونا بالمقلايييييييييييييي .. :jakoush: شو أفضل لديك بمراحل النمو هل هو الطفوله ام المراهقه ام الشباب أم الشيب؟ الشيب زيت المقلاية عم يحرقك شي؟ لاء بس عم بيطرطش .. لهيك كان افضل لو نشفتو المقلاي قبل ما تسكبو فيها الزيت، اذا المقلاي اترها ميي (ماء) و حطيت زيت عليها وعلى النار بتصير اتطرطش وتعمل طرش تش فش .. و هيك بيتوسخ الغاز و شغلة معتي .. حاجتك هول هلا بس رح فكرلك بكم سؤال خص نص لالك عيوني وراااااااااااااااااجعيييي يييييييين يستر عليكي .. اختي خليكي مطرح ما انتي ولا يكنلك بالك .. قال راجعين قال :lol: |
اقتباس:
هلا .. سؤوال مهم فعلا .. قلت فوق برد ما انا ما اتغيرت فعلا ما اتغيرت.. الي اتغير الظروف، الي اتغير المعطيات المحيطة .. الي اتغير طريقة سير الأحداث.. عم تمشي الأمور بطريقة غريبة .. بالفعل فيكي تقولي مجازا قبل التهكير وبعد التهكير ، لإنها كانت نقطة مفصلية مهمة .. الي صار كان لا يطاق بأي مقاييس و اكبر من طاقتنا حتى .. ما بعرف كيف قدرنا رجعنا كفينا .. الي صار وقتها كتير مزعج ، ما كان موضوع اختراق لأخوية و صالله وبارك .. كان هدم لعمل ناس وشغل بشر ضلو عم يشتغلوه سنوات .. بيجي شخص لإنو في شغلة بمطرح ما ما اجت على مزاجو بيمحي كلشي بيحزف عمل هال الناس وجهدون لسنوات بدقائق .. شيئ مؤثر و محزن جدا .. عموما رجعنا .. و نشكر الله .. فيكم يعني رجعنا .. بالأعضاء وبمحبة الناس و عمل المنسقين والمشرفين والأمناء .. رجعنا لولا هيك ما كان ممكن ابدا ترجع اخوية .. في اليوم اخوية قبل التهكير وبعد .. وفي كمان اخوية قبل الإعتقالات والتحقيقات و ما اليه و بعد .. في اشياء بتصير اوقات بيكون كل الخيارات واحد .. عموما الله يقدم الي فيه الخير |
حساااااموووو
رجعتلك بسؤالين بس اول سؤال حسام كشخص عم بيخطط ويشتغل بشغلة واللي حواليه عم بيقولولو انو لازم تزبط من هالناحية وماتعمل هالاشيا وهوي ماكتير مقتنع بيطنش وبيعمل اللي ببالو بدون مايقول شي ولا بياخد برايون؟؟؟؟ السؤال التاني شو اصة الخطبة:jakoush: |
| الساعة بإيدك هلق يا سيدي 06:55 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون