|
مين اللي قال انو الاخوان المسلمين هنن تمثيل لحكم الاسلام وانهم ممثلين لكل المسلمين ؟؟ .. وانهم هنن الطريقة والاسلوب الوحيد اللي خيكون عليه حكم الاسلام اوا استلم امنور الدولة ؟
الاخوان تيار قائم عالاسلام (سواء كان فعليا او نظريا) ... لكن ممارساته وادبياته وافكاره مو بالضرورة (او فعليا) تمثيل فعلي لطريقة الاسلام بالحكم !!! الاسلام كدستور حياتي ماكان ولاحيكون بيدعي لالغاء وجود الاخر شو ماكان ... أما الاخوان المسلمين فهدول حكاية تانية !! بالمختصر ... الاخوان المسلمين مو تمثيل للاسلام ... متل ما الصهيونية واسرائيل مانهم تمثيل لكل اليهود بالعالم ... وشخصيا.. بعتبر الفكر الاخونجي "غبي" ... والا ماكان عملو اللي عملوه وقلبو قلوب الناس عليهم .. على الهامش : ياريت حدا من الشبيبة يحطلنا روابط لمواضيع قديمة هون بالاخوية ناقشت تاريخ الاخوان وافعالهم وتحية لكل شب سوري خايف على وطنو وعلى ارضو ... :D |
انا ماعندي اي ثقة بأي حزب مبني على أساس ديني أنو يحكم بلد لانو البلد فيها تنوع كبير جدا وأكيد البلد اذا حكموها راح تنحكم بطريقة دينية واللي شاف حقلة بالعربي مع مرشد جماعة الاخوان بسوريا البيانوني بيعرف انو غايتو يطبق الحكم الاسلامي بسوريا وبعدين بالدول المجاورة
:D |
كل مرة نسأل نفس السؤال ...
بس طالما تسائلنا عن الفكر الاخواني على مدى العالم العربي ... ما هو دستور الاحزاب الاسلامية او حركة الاخوان المسلمين ؟؟ زو كيف نتعامل مع ناس لا يؤمنون بالدولة كدولة حقيقية طالما هي قوانينها وضعية و لا تطبق القانون الديني (ما رح اقول القانون الالهي) ... يعني ممكن يتجاوز كل القوانين المدنية و الجنائية ... طالما انها ليست دينية او شرعية ... اي اسم حط ببالك عن تجربة مع ايديولوجيات عدة احزاب اسلامية ببلدي |
الاخوان بيسيئوا لسمعة كل انسان مسلم مؤمن بالله واحداً وبالرسول محمد..
الرسول عليه الصلاة والسلام حذر اكثر من مرة بأن يعطي المقاتل ذمة الله في حربه..فلو هجم مثلاً,فلا يدخل الله بالنص ويقول احنا عملنا كذا علشان رب العالمين !.. هالاخوان حاطين على نفسهم حصانة,وهي انهم جنود الله..فنبلقاهم زي كنيسة القرون الوسطى في اوروبا,بتقتل وتنهب وتسرق وتقول هذا امر الله..فبالتالي لابد ان الشعب يثور عليهم ان عاجلاً او آجلاً..واظن انه ثائر عليهم بالاساس.. وزي ماقالوا الاخوان,دول سياسيين وعايزين الحكم.....بيستعملوا الدين فقط كمجرد وسيلة لتخدير الجماهير وضمهم |
مشان الله شباب ما تنخدعوا بالاسم، الإخوان المسلمين جماعة مادية سياسية بحتة، بس بيعرفوا نقطة ضعف شعبنا العربي، واستغلوها.
آسف ما قدرت اقرأ ولا رد، لأن بس حبيت علق عالموضوع الأساسي. |
اقتباس:
انا عندي تساؤلات محددة على مشروع الاخوان السياسي ما بعرف إذا بامكانك تساعديني بالاجابة عنها: أولاً: موقفهم من تطبيق أحكام الشريعة الإسلامية المدنية والجزائية. ثانياً: موقفهم من الأقليات غير السنية ودورها في المشاركة بصنع القرار وتولي المناصب (أَيُّهَا الَّذِينَ آَمَنُوا لَا تَتَّخِذُوا الْيَهُودَ وَالنَّصَارَى أَوْلِيَاءَ بَعْضُهُمْ أَوْلِيَاءُ بَعْضٍ وَمَنْ يَتَوَلَّهُمْ مِنْكُمْ فَإِنَّهُ مِنْهُمْ إِنَّ اللَّهَ لَا يَهْدِي الْقَوْمَ الظَّالِمِينَ ) ثالثا: موقفهم من الديمقراطية وفي حال صوت مجلس الشعب مثلا لقانون يتعارض مع الشريعة الاسلامية أو السنة النبوية الشريفة. رابعا: موقفهم من القوى والأحزاب الأخرى وخصوصا العلمانية منها وهل يقبلون بتأسيس أحزاب وقوى دينية غير سنية أو غير اسلامية. اقتباس:
معناها إذا ما بتنسبني ما بتشرحلي يعني طالما مامني أمل لشو تعذب قلبك. بعدين نحنا ما شفنا لهلق من مشروع الاخوان غير المجازر والاغتيالات وبظن من حقنا ناخد هالفكرة الاجرامية عنهم خصوصا إذا كان عندك بالعيلة مشوه أو شهيد مدني ما كان إلو علاقة غير إنو حظو التعيس وكونو لا يملك سيارة سياحية خلو يسافر بالقطار. ليس الهدف من النقاش أن تقنعني أو أقنعك وإنما الارتقاء بمستوى الأفكار والحوار والتعرف على الآخر. |
اذا طلّعنا على اللوحة الأكبر او الاسم الأعلى اللي بتم ادراج الاخوان فيه كحزب .. الاسلام السياسي
في شي تجربة ناجحة للإسلام السياسي ؟! وبالأصل هل مطلوب من الاسلام كدين تأدية مهام سياسية ؟ هامش : ما كانت حتتغير صيغة السؤال لو في احزاب سياسية بتعتمد على الديانة المسيحية كواضع لخطوط الحزب الرئيسية .. هي قبل ما يتم اتهامي بالطائفية :pos: |
اقتباس:
بكل الاحوال اذا في تصحيح للأفكار اللي انا كتبتا فبكون كتير ممنون ان قدرتي تساعديني بتصحيح معلوماتي واكتساب ثقافة جديدة ووجهة نظر جديدة .. اما بس نعت الرد بالمغلوط والمعمم والمتسرعة فما بعتقد بده يفيدني او يفيد القارئ بشي . |
اقتباس:
ما بعرف شو هية المعايير الممكن نتبعها لنقيم نجاح تجربة سياسية بس ايران ع سبيل المثال دولة خاضت تجربة سياسية اسلامية وتمكنت تصير دولة ذات نفوذ اقليمي وحراك عالمي. |
اقتباس:
أنا بشوف انو جيل الشباب الجديد . مقتنع تماما بانو الاخوان اسوء مافي الوجود مع أنهم المفروض من طبقة عمرية ماشافو افعالهم . متل مافي مواضيع كتير هاجمت الاخوان في باخوية وخارجها كتب كتير شرحت كيف انو الاخوان اخطأو لكن ايضا غرر بهم وجبرو ( متل ماصار بمسلسل أعترافات فتح الاسلام ) على الاعتراف باشياء حصلت وبأشياء قامت بها المخابرات السورية لتشويه صورتهم ( واحدها مذكور بكتاب تاريخ الصراع على السلطة في سورية الموجود بمكتبة اخوية ويلي كاتبو شخصية محايدة ) . فما نقعد نتهمهم بما يحملو وبما لا يحملو . ونحكم عليهم سلفا بالموت وبأنهم لا يتغيرو . أو على الأقل نعتبر الشعب السوري مجموعة من الأغبياء ( بانو الاخوان حيكونوا سيئيين للغاية ولكن رح يضل ينتخبهم ) |
ما بعرف كيف شخص بيدعو لألغاء الأخوان ,,و بنفس الوقت بيطالب انو ما يتهمش !! ...
شئنا او ابينا ,,,بيبقوا جزء من المجتمع السوري ..و في معون جزء كبير من السوريين ,,,,ثانيا حسب ما بسمع من الأخوان ما عندون اي شي بأدبياتون بيدعي لتهميش الأخر ... مشان هدون يلي مزعوجيين من حكم ديني ,,,,سوريا صرلها اربعين سنة من حكم ديني عسكري !! ,,,,بالحقيقة مزعوجيين بسبب نظرة طائفية بحتة ,,,,,,,,,,,,,ولأقليات بحب قول ,,مو من مصلحة اي اقلية انو تضع نفسا بموقع المعادي للسنة .. .انا مو مع هدون و لا هدون ,,و يلي صدف و قرالي شي رد من قبل بيعرف انو انا ما بأمن حتى بشي اسمو سوريا ,,,لأنو هي كذبة كبيرة ...لأ والشباب عابتحتفل بعيد الأستقلال ,,,,و كأنو امورنا زبطت و عين الله علينا ,,,يا محلا الفرنسي ... |
اقتباس:
باتريك سيل كان لا يفترق عن حافظ الأسد ... والكتاب تم أخد المعلومات منو من الأشخاص التاليين : ابتداءً من بشرى وباسل الأسد مروراً بمصطفى طلاس وعبد الرؤوف الكسم وفاروق الشرع واحمد اسكندر وزير الاعلام ونجاح العطار وبديع الكسم وراتب الشلاح وأنطوان توما... بالإضافة لمقابلاته مع حافظ الأسد .. فـ ما بقدر شوف أي حيادية بالكتاب ... إنما فيه سرد للوقائع حسب وجهة نظر الحكم آنذاك ... والحكم يعني حافظ الأسد قولاً ومضموناً ... :D |
اقتباس:
على الاقل كان دار "طلاس" طبعتو ....مو شركة المطبوعات للتوزيع و النشر ببيروت.. :D |
اقتباس:
بالنسبة لـ منعه الكتاب تم طباعتو عام 1999 بيحكي عن حقبة معينة .. بفترة حكم حافظ ... فيك تقلي شو كانت الكتب المتوفرة ؟ مثال صغير .. محمد الماغوط الأرجوحة 74 كاسك يا وطن 79 خارج السرب 99 الحدود 84 ازا شلنا كاسك يا وطن والحدود 84 على اعتبارهم سياسيين .. الأرجوحة عام 1974 ... تم منعها ... لآخر نفس .. خارج السرب أيضاً مسرحية بعيدة عن السياسةو و و والخ ... تم منعها مافينا ننكر بفترة حافظ الأسد كان في تضييق ثقافي - فكري عالشعب ... مو بس بالنسبة لحافظ الأسد بأي دولة .. بأي نظام حكم .. النظام ... دايما بيتحاشى المواجه ومجابهة المثقفين والمفكرين / الفعليين / لهيك دايماً بالأنظمة الدكتاتورية .. في تضييق خناق بمجال الثقافة .. بيهم النظام دائماً الشعب يقرا ويتثقف لحد معين .. لهيك هالكتاب .. كان ناشر اشياء على الرغم من انها عن لسان حافظ الأسد ذاته ... لكنه ما كان راضي عن نشرها بوقتها .. او مو قصة ما كان راضي .. ما كان مخطط او متوقع ليتم نشرها بهالسرعة وبعتذر عن الخروج عن الموضوع... ازا بتحب منفتح موضوع منفصل فيما يخص التضييق الفكري مثلاً |
اقتباس:
لأ الكتاب أسمو تاريخ الصراع على السلطة في سورية ويلي كاتبو كان سفير هولندا في سوريا على ما أذكر وهي رابط الكتاب - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - |
اقتباس:
|
اقتباس:
يعني رؤية للخلافات من منظور طائفي خليته يفقد منظور منطقي للأمور وهيدا الشي وضح بعدم قدرته على تقديم تفسير منطقي للخلاف الأهم يمكن " الأسد-جديد" مع ذلك كتاب في كمية من المعلومات تحياتي الحارة ظل جيفارا |
اقتباس:
|
جماعة الأخوان المسيحيون
لاحظت معظم الردود جأت تهاجم جماعة الأخوان المسلمين وتصفهم بالوحشيين وكل واحد عم يذكر اسباب معينة وتتشابه في معظمها
ولكن السبب الحقيقي يكمن بكلمة المسلميين وانا متأكد واقسم بالله العظيم لو طلعت جماعة تانية اسمها جماعة الأخوان المسيحيين واهدافها عنصرية بحته ودموية ووحشية حنشوف أن معظم الأعضاء حيكونو متعاطفين معها بل ويدعموها اذا يا حبايبي انزعوا اقنعتكم وقولوا أن السبب بكلمة مسلمين |
اقتباس:
ثانيا : في جزء كبير من الأعضاء المشاركين بالموضوع والمعترضين على حزب الأخوان مسلمين في الديانة وهلشي ما من حقك تشكك فيه ثالثا : حزب الأخوان مُعترض عليه من فئات كتيرة وكان في اعتراضات داخلية لسياسته الدموية ، فقلب المشهد لمحاولة معارضة وجد الإسلام في المضمار السياسي يهين بالدرجة الأولى الاسلام نفسه بسبب الممارسات اللي تمت داخل الحزب واللي بحالتك هي عم تنسبها للإسلام نفسه وأخيرا : في حال ظهور حزب سياسي مسيحي العقيدة والارتكاز وباني توجهاته على تعاليم الانجيل وكان تاريخه مشبع بالأحداث الدموية وما شفت نقض موضوعي بيبقى بحقلك تتهمنا وتقسم بإتهامك ويا هلا |
اقتباس:
ثانيا اكيد ما رح يظهر حزب مسيحي دموي لأنه اصلا مو قادر ينشأ في دولة متل سورية والأغلبية العظمى هم المسلمين ولو كانت الأغلبية هي المسيحين يمكن لشفنا هلشي صار وظهر بدل التيار عشرين تيار يميني متشدد ثالثا مافيك تقول انو كتير من فئات المجتمع انتقدت الأخوان المسلمين لأن مجتمعك يا حبيبي مافيه ديمقراطية واللي بدو يدافع عن الأخوان المسلمين او حتى يتعاطف معه ولو بكلمة رح يروح ورا الشمس منشان هيك متل هيك مجتمع مالو اي مصداقية ولا ممكن تستند بأقوال اي اديب او مفكر او قسيس او حتى شيخ مشايخة المسلمين. ومية الف هلا |
اقتباس:
|
اقتباس:
معلش يا سيدي بدي افهمك واطعميك ياها بالمعلقة بيخافو ما يصير فيهم متل ما صار مع كريمبو .... بالمناسبة بتعرف كريمبو؟ الله يرحمك يا كريمبو كنت زلمة طيب |
اي اهلين
هون الكل عم يناقش ويطرح ومو خايف وانت عممت ياسيدي لقلك شي طلع بهالبشر من حواليك بتلاقي الاخويه الوحيده اللي مافيها خوف لانها من يوم يومها ماعرفت الخوف ياصاحبي اللي بخاف بيسكت او بيهرب مابينتقد متل ماحضرتك ذكرت واهلين اخويه دوله مستقله عن الدنيا كلها |
اقتباس:
اي لكن منشان الله اكتبولنا شي موضوع عن مجازر حماه وحلب ولا هدول ولاد كلب ومو بشر لأنهم مسلمين عم تنتقدو الأخوان المسلمين على دمويتهم وما انتقدوا المجازر اللي راح ضحيتها الاف الأبرياء وانتهكت فيه أعراض بنات حماه الشريفات من كلاب الجيش المسعوريين اللي جايين من المزابل. |
اقتباس:
الموضوع مطروح للنقاش وفيك تناقش بها الشي بلا اتهامات لاي طرف اقتباس:
وكل شخص عندو تفكير او وجهة نظر على حسب معرفته او اطلاعه والحوار مبني على هالشي وبأكدلك مافي تحيز لاي دين او حزب |
اقتباس:
الموضوع عم بناقش حالة خاصة كتير وهوي عودة حزب الاخوان الى الساحة السورية ام لا.. وفي مواضيع كتير من قبل ناقشت مسألة المجازر.. ومسألة ردة فعل النظام.. وما كان في داعي للتطرق للموضوع هون لانو مو محلو.. ولانو محكي فيه كتير.. على كل حال اذا بتحب ممكن تفتح موضوع خاص بهي المسألة وتحكي فيه مرة تانية.. بس انا بتمنى منك انو ما تحكي بطريقة فيها توتر .. وما تهاجم الاخرين .. وروووووق مشان تقدر تجمع افكارك وترتبها واذا بدك تفتحلنا موضوع عن المسألة اللي بدك ياها.. :D |
طالما حضرتك بتعرف كريم-الله يرجعلنا يا بالسلامة ومنشوفو بيننا مرة تانية عن قريب-
ومتل مو مكتوب تحت اسمك انك نورتنا ب 2006 فيفترض انو بتعرف -ولو شي بسيط شو هي اخوية- بالتالي مستغرب منك هيك حكي انا مسلم ومعترض على وجود شي اسمو اخوان..ومالي خايف يا سيدي وكلامي مو من خوف او اي شي ومتل ما قال ساتو ما بيصير تبرر مجزرة بمجزرة والموضوع كلو مفتوح حول عودة الاخوان..وشو موقفنا منو كشعب بدولة يفترض من حيث المبدا انها علمانية |
اقتباس:
|
اقتباس:
ايه هاد الحكي اللي بنسمع مو هديك المرة حكينا كلمتين قام حضروا عضويتنا وكمان هديك المرة نزلت موضوع عن مجازر حماة قام حذفوا الموضوع يعني اخوية بنفسو مو مع الأخوان المسلمين بس هوا موقع بيدعم " خدام " لكن ياعمي من المواقع الصديقة |
اقتباس:
وخلي موضوعك فيو موضوعة ولا تحولو لحرب طائفية ودينية وما رح يتسكر.. :D واذا هيك رايك باخوية بتكون ما بتعرفها منووووب عدم المؤاخذة يعني |
اقتباس:
عضويتي انحضرت مرتين وكل مرة لمدة شعر ونص لأنو نزلت موضوع على احداث حماة وحكيت ع النظام طيب انا جبت وقائع حقيقية وموثقة بأحداث صارت ومع ذلك انحضرت واللا يعني بصير الناس تحكي ع الأخوان بس النظام لأ . هاد مو حكي معلم وبعتقد هاد رأي خاص |
اقتباس:
كنت عم قول وين غاطت !! بعد زمان كل موضوع بينفتح عن حماة بينط سبعمية واحد ليردد كلام السلطة ..و بما انو اموضوع كتيير حساس ..الواحد ممكن يفقد اعصابو !! ,,لهيك نفس النتيجة ...كنت عم اقرى بأرشيف اخوية شفت نفس الشي ... نحنا الأختلافات بينا كسوريين مو بس عقائدية و سياسية ..لأ اكتر من هيك بكتير و بتتعلق بصميم شي اسمو المواطنة !! ...يعني مثلا جيب واحد يهودي من نيوزيلاندة و اشرحلو شو صار ..رح يقلك انو الشي هاد كان مجزرة بشعة و اللي عملها مجرم ابن مجرم ,,,,بس اخوك السوري ما بيعترف حتى بالمجزرة ...لهيك ممكن تحس انو اليهودي النيوزيلاندي اقرب من ابن بلدك !! |
تنويه: الموضوع تم اغلاقه اشرافياً بسبب ابتعاده المتكرر عن الموضوع الأساسي و استخدامه لاتهام الموقع و المشرفين عليه بتبعيات كاذبة و لأغراض دنيئة.
أخوية نت موقع شبابي سوري مستقل لا يتبع لأحد و لا يوالي أحد و لا يتعاون مع أحد, و أعلنت إدارة الموقع مراراً و تكراراً عن استنكارها استخدام اسم الموقع من دون إذن من قبل المدعو عبد الحليم خدام في موقعه "سورية الحرّة", و لن نسمح إطلاقاً باستخدام موقعنا لاتهامنا بتبعيات لأحد. و في النهاية, من يحمل بقلبه هذا الحقد على الموقع و رواده و مشرفيه فليتركه و يرتاح و يريحنا و شكراً |
| الساعة بإيدك هلق يا سيدي 13:49 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون