|
انا ما نسيت الموضوع وما هربت
بس اسا قراية الفتوى الطويلة اللي حطها ابو نهلة بتدايقني شوي رح حاول ارجع خلال هاليومين الجايات بلكي بيكونو الطاسوسات تحسنو شوي :D |
بحياتي ما كنت متخيلي أنو قول هالعبارة:shock::
أنا بأييد فتوى هشت نشت:? وبقوة .. إي هاني انتبه عحالك... ----عالهامش----- هشت نشت بعرف أنك ملحد..:shock: إذا ملحد وعشوي رح تدخل كتاب غنس لأطول فتوى بتاريخ التشريع.:shock: مليح الي مانك مؤمن:lol: :bye: |
عدنا والعود احمد صحي تاخرنا بالعودة بس حاليا انا قاعد باوتيل بعيد سبع ساعات عن بيتنا بمنطقة جديدة عليي
تخابطنا مع الشغيلة بالاوتيل لقدرنا حصلنا انترنت ابطأ من الدايل اب كل النهار برات الاوتيل باحتفالية كبيرة للشركة اكلت من الستة ونص الصبح للساعة 10 ونص بالليل بس كيفنا وكما يقول ابو نهلة : ان تاتي متاخرا خير من ان لا بالعودة للحديث عن الشركة 1-) نوعا ما اعادة للحكي اللي حكيتو بالرد السابق شو اللي بيخلي شركة متل AEGON او WRL او ING او FIDELITY او CHARLES SCHWAB اللي بيعتبرو من اكبر الشركات بامريكا انو يتعاملو مع WFG في حال WFG رح تنهار يوما ما 2-) بالكلام عن الليكر ستورات المجال اللي عم اشتغل في حاليا واللي صرلي اشتغل في سنتين واسعتني عم اشتغل في حاليا ولو انو بدي ضيعكن شوي معلمي اسمو آمال (اسم بناتي بس هوي زلمي ) آمال كان يشتغل متل اي واحد بوكس بوي بعدين صار كاشير بعدين اشترى ستور وصار اسمو BUSINESS OWNER آمال شغّل عندو شب اسمو عماد وشغل عندو شب اسمو سامي اشتغلو الشباب عند آمال سنتين او اكتر قلهن آمال شو شباب شو رأيكن تحطو شوية مصاري ومنشتري انا وكل واحد منكن ستور حط عماد 70 الف دولار وحط مصاري 70 الف دولار وآمال حط شوية مصاري كمان اشترو ليكر ستورين عماد استلم ادارة الاول ما بيشتغل شي بايدو بيشتغل الوراق والحسابات بس ما بيبيع وحط حدا بيشتغل تحت ايدو اسمو نور وسامي استلم ادارة الستور التاني نفس عماد وحط حدا بيشتغل عندو اسمو بسام وآمال ما بيشتغل شي ما بيعمل وراق ولا حسابات ولا بيشتغل بايدو بالستورين بس بيستلم ادارة الستور الاول اللي هوي بالاصل في بس بيقبض من شغل الشباب بالستورين البقية شو صار عنا هلأ آمال براس الهرم عماد وسامي الطبقة التانية ونور وبسام صارو الطبقة التالتة نور وبسام بيبيع البضاعة بيستفيد عماد وسامي بس مين بيستفيد اكتر آمال شو بيكون صار عنا هلأ ؟ بنية هرمية بس بدال مانها عم تنزل بالعمق عم تتوسع وكلو على حساب مين على حساب قاعدة الهرم اللي عم تحقق ربح لراس الهرم هل فينا نقول انو الليكرستور خدعة او نصبة ؟ كل الشعب السوري بيشتغل بالليكر ستور هل منقدر نقول انو الليكرستور رح يتوقف بيوم من الايام ويدمر حالو بحالو ؟ مستحيل ليش لانو عم يقدمو خدمة للعالم واللي هيي شي بيحتاجو واللي هوي الكحول والدخان واللي مستحيل يبطلو عنهن 3-) البنية الهرمية اللي بتعتمد على بيع المنتجات يعني بجي بقلك يمان اشتري مجموعة هالعطورات ب 500 دولار بس ما تفكر حالك خسران اذا بتقدر تجيب خمسة كمان يشترو هالمجموعة رح نعطيك مصاري فانت بتجيب 5 بيشترو نفس المجموعة ب 500 دولار يعني بمجموع 25 الف دولار انتي بيطلعلك منهن 800 دولار وبتكون مبسوط منها لانو ما قدرت تعمل هالشي هادا بيوم واحد بحياتك نفس القصة بتصير مع الخمسة اللي تحتك بتقول لكل واحد منهن لاقو خمسة يشترو وبتاخدو مصاري وهيك لتوصل لنتيجة انو العالم معد بدها عطورات او العالم اللي بالقاعدة معد تقدر تبيع ووقتها بيصير انو القاعدة بتبطل اللي فوقهن بيبطلو واللي فوقهن بيبطلو وهيك انتي بتكون بقيت لحالك وبكون النظام الهرمي دمر حالو بحالو 4-) بالنسبة ل WFG وحسب اخر الاحصائيات اللي موجودة وعم احكي عن الحكي اللي صار اليوم والارقام اللي شفناها نحنا حاليا بمنطقة اسمها سان خوسيه عدد السكان هون 1.2 مليون بني ادم احصائيات WFG بتقول انوعدد ال CLIENTS يعني عالم استفادت من خدماتنا اللي بالشركة هوي بين مليون و 2 مليون يعني عدد سكان سان خوسيه فقط لا غير + - عالم تخيل اسا قدامنا اميركا كلياتها لنساعدها وتخيل قديش بدنا عالم لحتى نقوم بهالمهمة لانو بعدد العالم الموجودين هلأ ما رح نقدر نساوي شي بعدين الشركة توسعت على دول تانية متل كندا الصين تايوان الهند المكسيك يعني عالم اكتر واكتر لحتى نساعدهن (حكيان هالحكي من قبل ) تاني شي في فرق كبير بين نحنا شو منقدم للعالم وبين شو باقي الشركات بتبيع للعالم نحنا منحاول نساعدهن ما منبيعهن شي ما منحاسبهن شي ما مناخد منهن شي منحاول نشرحلهن شوية امور بمجال الاموال اللي ما تعلمو بالمدرسة منحاول نشرحلهن شوية عن امور الانشورانس وكيف انو حماية الك ولعيلتك هادا كل شي منساوي ما منحاول نبيعهن عطورة او جرابات او بناطلين ايمت بيتوقف شغل شركتنا وقت العالم بتبطل تستخدم المصاري وقت العالم بيبطل بدها مساعدة بامورهن المالية وهادا مستحيل يصير (اللي بيعرف الوضع باميركا حاليا واللي عاش باميركا فترة منيحة من الزمن بيعرف تماما انا شو عم احكي ) مستحيل شركتنا توقف عن الشغل لانو العالم بكل زمان وبكل مكان (بالولايات المتحدة حكيي وعلى ما يبدو كمان بكندا وبالدول اللي فيها شركتنا ) ينقصهن معلومات عن امورهن المالية وكيف ينظمو امورهن وبعتقد شركتنا عم تساوي شغل كتير كبير بهالمجال هل ممكن يتوقف شغلنا؟ مستحيل هل ممكن تكون شركتنا خدعة ؟ مستحيل هل انا مآمن بهالشركة ؟ جدا هل متوقع اي حدا منكن يآمن ؟ لاء ليش؟ لانو انا شايف على ارض الواقع اشياء انتو ما شفتوها كلمة اخيرة : كل صاحب شغل او شركة بيآمن بالنظام الهرمي لانو شركتو رح تقوم على هالاساس اللي ما بيآمن بالنظام الهرمي هوي كل واحد بمنطقة ما من اسفل هالهرم وبيخاف يطلع لفوق لانو بيفكر انو ما بيقدر يوصل لفوق :D انا انهيت حكيي عن النظام الهرمي وتوابعه رح ارجع احكي عن الشركة ونظامها (للي اسعتهن مهتمين ) بس ارجع على البيت :D |
او ل شي الحمد الله ع سلامتك ...و سلملي ع سان خوسيه ....بعزو كتير لهالزلمي انا
اقتباس:
عماد وسامي مانن بالطبقة التانية ...اساساً مافي طبقات هون !! عماد و سامي مشاركين آمال ...شركة هدول ..هلأ مين عندو اسهم اكتر من التاني هاد حديث ....تاني نور و بسام موظفين بشركة .... و هني بالهيكل الاداري تبع الشركة بيجو تحت مديرهن ..ايا يكن هالمدير يعني ...ممكن يكون موظف متلن و ممكن يكون صاحب الشركة نفسو ....و هون ممكن يكون في هرمية بالهيكل الاداري ...و هي شي كتير طبيعي و عادي ...باي ادارة او سلطة في هيكل هرمي...و هاد طبيعي و عادي ...اللي مانو طبيعي هو الهرمية بالتسويق . اقتباس:
اقتباس:
اقتباس:
هاد الفرق الكبير هو اللي بخليني كتير متأكد من الجماعة انو يعني WFG منظمة خيرية ؟؟....هيئة غير ربحية ؟؟ ..من الامم المتحدة يعني شي ؟؟ انو بتقدمو خدمات ببلاش ؟؟ .....حكيلنا يا مان ..منيني الشركة بتجيب رواتبكن ؟؟ كيف ما بتفلس مثلا يعني !! انو معقول مانك شايف شي غريب بالموضوع !!!! اقتباس:
يعني شو هي الشغلات اللي شفتا ع الارض ....ما ممكن توصفا يعني ؟؟ اقتباس:
اذا هرم السلطة ...ما حدا عندو اعتراض على الهرمية بتصور اذا هرم الكنيسة الكاثوليكية ...انا شخصيا ماني حابب صير بابا روما ...بكفيني اني كاردينال :lol: اذا هرم خوفو و خفرع ..بدو الواحد يكون متسلق و قلبو قوي اذا كان الهرم اللي بالي بالك ...ما بدي ياه ..و لا بدك ياه حتى ... النظام الهرمي اللي عم نحكي عنو هو بشكل واضح اللي حكيت عنو بمثالك التاني ....و هو التشويق متعدد المستويات ...و هو عبارة عن اسلوب نصب عالمي و عابر للمحيطاتت بالنسبة ل WFG لحد هلأ ما حكيتلنا شو بتعملو فيها بالضبط....يعني ما فهمنا منين بتجيبو مصاري و كيف بيستفيد الزبون و كيف بيستفيد العميل !! يا ريت تحكيلنا بالتفصيل هالقصص ..و بعدين منشوف اذا كانت MLM او لاء تحياتي :D |
يا جماعة بس على مهلكم بالزلمة ..
شوي شوي يعني أنا بصراحة شايف الموضوع حلو كتير وما فيه أي شي أما بخصوص التسويق الهرمي فهذا النوع فيه بعض التعاملات الي منعتها بعض الدول العربية صح .. أنا معك استاذ hashtnasht بس مش كلشي قلته صحيح يعني بخصوص الفتاوى .. أنا في عندي معلومات كبيرة عن هذا الموضوع , وبعرف ناش بيشتغلو بهيك نوع من الشركات , وحكولي كتير قصص عن الفتاوى الي عم تنزل بالانترنت , وشو هي الاعتراضات والمشاكل الي عم تواجههم اذا بدكم تفاصيل بقدر انزلها بعدين بس لحتى اخذها من المصدر الاصلي بالاول ويا استاذ hany dagher أنا معك وشو بده يصير خلي يصير :gem: تحياتي |
راجع الكم بعدين
مع معلومات ومصادر جديدة حول هذا الموضوع بس اللي بده اياه منكم انه لا تحكموا عالموضوع قبل ما تسمعوا كل الآراء الي فيه تحياتي للجميع :ss: استاذ Hany Dagher عجبني كتييييييييييييييييير الموضوع الي حكيته عن ال Baby Boomer تحياتي لك , وأنا معك :gem: |
| الساعة بإيدك هلق يا سيدي 01:04 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون