|
سوريا ياحبيبتي أعدت لي حريتي أعدت لي كرامتي :lol:
ع القليلية لسه عنا مبادىء بتعرفوا أنو الفرنساوية بيقولوا إذا قعدوا مع واحد سوري خدوا بالكم ياعمي هيدا سوري شو في حدن قد مواقفنا ؟؟ |
سوريا حللوة بزبالتها بشعبها بقرفها حلوة بحاراتها الضيقة بياسمينتا اللي بيزينو ارصفة الشوارع بالعجئة بريحة المازوت بحميمية ركبة المكرو بعلقة الشباب بنص الشارع بالبنت اللي عم تتمايع بالطريق انا قاعدة عم راقب كل هالاحداث من بعيد وبهدوووووووووء بكتشف انو الشام وسوريا ككل فوضى عارمة بالحياة وبالحرية وبالحب بئى لا حدا يقللي انو في احلى من سوريا كلمة حلوة وكلمتين .. حلوة يا بلدي |
هااااااااااي انا بحب سوريا بس اكيد الواحد ما في بعد بلدو.........
|
سوريا بحبك حب الشباك للبرداية ، بحبك حب الأرنبيط للكوساية ...! بحبك حب الشلمونة للكولاية .. بحبك حب الطشت للكبجاية..! بحبك حب الزيت النباتي للمئلاية .. بحبك حب الجرابات للصرماية ..! حشاكن :oops: لك بحبك حب سلاحف النينجا للبيتزاية!!! بحبك حب المألمة للشنتاية... يا ريت تكوني عوجا وكون أنا العرباي.. يا ريت تكوني طربيزة… وكون أنا كنباية. يا مدلوئة حياتي وشعيبيات عمري ووربات بئشطة روحي..يا أحلى زبدية محلاية... بحبك حب الريموت للتلفزيون... بحبك حب درفة الباب للمندلون.. بحبك حب بنت اختي الفصعونة لسبيس تون... بحبك حتى لو كان صوتك متل موتور الدبابة..سمعيني شوي لحتى احكيلك الأصة... يا ريت تكوني حنفية مي عم تشرشر ... وأنا بعصّا.. انشالله ما يبلا هلطول ... متل عرئ الفصة... لك يا ريت تكون معي هيكة كمشة بزر وأعطيكي نصا لك بتسدئي ؟؟ بحبك حب جورج بوش لتوني بلير... بحبك حب السعادين للقرود... بحبك اذا كنتي ساكتة أو عم تحاكينا... بحبك حب ابن اختي الفصعون لبوظة كارينا...بحبك حب البردآن للكرمنتينا! حاجة بأه جننتينا!!!!! بــــــــــــــــــــــــ ــــحــــــــــــــــــــ ـــــــــــبـــــــــــــ ـــــــــــــــــــــــــ ـــــــــــك |
لك دخيل الله ليش في احلى من الامة السورية
|
سوريا الشام الكبيرة لاتكتشف مقدار غلاوتها الا اذا غادرتها مثل السنونو عندما يغادر سربه
ترى النظام نظافة الشوارع اسفل التنانير المتطايرة من على الأدراج المتحركة الحسناوات الشقروات تترك كل هذا لتبحث عن حارات ضيقة تتكاتف جدرانها متحدية الزمن تبعبق برائحة الزبالة احيانا وبرائحة الياسمين احيانا أخرى عن ود الأصحاب والخلان عن سوريا ياحبيبتي :gem: |
عنجد سوريا كتير حلوة
انا شخضيا كتير بحب سوريا ومستعدة اموت مشانها |
اقتباس:
لك سوريا كمات بتموت فيكي |
هالموضوع كل الردود اللي فيو حلوة ومعطــرة :D
|
اقتباس:
|
سوريا بقلوبنا ومنحبها
ولما بيكون في شي سلبي منحكي رغبة في الكمال |
انا كمان مش سوريه
بس بحب سوريااااااااااااااااااااا ااااااا:hart: |
اقتباس:
لك يسلملي ه التم والله كاني قاعدة بقلبي..... :deal::deal: |
اقتباس:
الله يعمر بسوريا بشبابا اللي بحبوها |
وبالاخير بحب اشكر كل من رد
وعمااااااااار يا سوريا |
الله يحفظ لكم سوريا ويبعد كيد الاعداء عنها ..
ودمتم بود |
مشكورة ع مرورك اميرة التوت
|
انا بحب سوريا :sosweet: بس يا ترى /////////////////////////////////
لما بدي اعبي مازوت و مامعي مصاري ...!!؟؟ و لما بتنطفي الهربا 24 ساعة باليوم و لما بتنقطع المي من الساعة 9 و لما بجي بدي دور على وظيفة بيطلعلي مية وحش و لما بحكي حرف واحد برات الطريق ما بينعرفلي طريق ولما بنزل على الحارة بلاقي جور المي و النشح و الدبان و غيرو وغيراتو عم يسرحو ويمرحو و لما بيخلص الراتب من تاني يوم و لما بيغلى النزين و الشمنيتو و بيصير حئ البيت بلوة ومهر الي بدي اتجوزها تلت بلوات لما ما بدوء اللحمة غير ازا حدا دبح خاروف للفقرا و لما بيجي وقت المدرسة وولادي عريانين وقت الشتي منقضي على زيت وزعتر // زيت نباتي أو زيت قطن من المؤسسة لما بيصير حئ صفت البيض 170 ليرة و حئ جرة الغاز 250 ليرة و كيلو اللحمة 500 غنم و 300 بقر ولك اش بدي اعدلك لأعدلك ضلت على هالورقة الي عم تنكب :shock: مالمواطن بحد ذاتو عم ينكب بالشارع :sick: لا تمسكيها حنبلية وخلي الناس يعيشو ازا انت عايش ومعك غيرك عم يلقط عقب السيجارة ليشربو مرة تانية من ورا الناس ...... اي انا بحب سوريا كتير /////////////////// بس لأنو انا مغتربة :o |
فعلا سوريا حلوة لعجقتا و طجقتا و هالناس يلي مبحترة بالشارع و كلمين أيدو ألو باختصار في حياة..يعني الناس أد ما صار معهون بيعشو و بتلاقي الكل مبسوط مع أنو في بلاوي زرقا صايرة بس مبسوطين من جوا مرتاحين :hart:الشام:hart: حبي الأول و الأخير:cry:..ولا غيرك يا حبيبي قلبي بهواك أسير:p |
قرد و الله عم تحكي صح بس هاي الشغلة ما لها علاقة بحب الوطن يعني يلي بكب زبالة هو بكون وسخ بس مش معناها ما بحب وطنه و شغلة تانية الاديان كلها بتدعي للنظافة و القوانين الارضية و الاخلاق حتى في بعض الحيوانات بتنضف و راها حب الوطن شي تاني بتمنى نفهمه من خلال التفافنا على وحدتنا الوطنية يلي كتير من الدول بتحسدنا عليها و يلي بحبنا بيقول و بيعرف انه الشعب السوري واحد موحد خلف قائد عظيم رحل بجسده عنا بس بعدها مبادئه عايشة بقلب كل مواطن سوري خاصة و مواطن عربي شريف عامة و الدول المعادية و الحسودة راهنت على تفكيك وحدتنا بعد رحيل القائد حافظ الاسد بس ما عرفه انه الاسد باقي و رحل و هو واثق انه شعبه الوفي رح يكمل مسيرته مع قائده بشار يلي بعده عم يزرع فينا المبادى الوطنية و القومية و عم يبني معنا سورية الاسد يلي كتير من دول العالم و الغربية بالاخص بتحسدنا على وطنا و على شعبنا الواحد الموحد
|
| الساعة بإيدك هلق يا سيدي 00:39 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون