|
مرحبا أخ s1 daoud:
انا حبيبي سوري متلك، عايش بالشام متلك، بشرب من الفيجة و باكل متل ما انت بتاكل تمام صارلك من أول الحوار عم تتهمنا بالعمالة و الخيانة مارح كون متلك و قول عنك خاين .... رح خيرك يا أما انت مجرد مواطن سوري مقتنع بالحكم يا أما انت مستفيد من الحكم اذا كنت مجرد مواطن سوري فانت حبيبي و روحي و انا لما بحكي بحكي لمصلحتك و مصلحتي يعني انا لما بطالب بتغيير قانون الطوارئ بكون عم طالب فيه لمصلحة الكل انا ما بيهون عليي انو اذا انزعج منك شي ابن مسؤول يقوم يبعتلك مفرزة تجرك من بيتك ادام كل معارفك كأنك شي جاسوس او شي سفاح لمجرد انو يرضوا ابن المسؤول وما بيهون عليي كمان انو اذا كان عندك محل او مطعم او شركة يتسلبط عليك شي ضابط لمجرد انو بيقدر يخرب بيتك نحنا منطالب بالغاء قانون الطوارئ لحتى ما يقدر حدا يخرب بيتك غير القانون و اذا ثبتت عليك التهمة بعد محاكمة عادلة كتير علينا يعني انو يكون في قاضي شريف يحكم معك او ضدك بدل الضابط الجاهل يللي ما بيفهم بالقانون اكتر من ما بتفهم ياباني؟ طالما انت بتحب سوريا لازم تحب السوريين كمان يعني مابيصير تشتري علبة الكولا لأنو شكلا حلو أو لأنك بتحب صاحب المعمل، لازم تحب الكولا لحتى تشتري علبة ونفس الشي اذا كنت بتحب سوريا لازم تحب السوريين و اذا بتحب السوريين لازم تعطيون فرصة انو يدافعوا عن حالون بمحاكمة عادلة و إلا فالنتيجة متل مانك شايف البلد مين بيعرف مسؤول أكبر بيقدر يمصع راس غيرو و إلا ما يجي يوم و تواجه ابن مسؤول ساعتها الله يساعدك عرفت ليش نحنا بدنا نلغي قانون الطوارئ بعدين انا متأكد انو في بسوريا ناس بيطلع بإيدون يحكموا مو بالضرورة أحسن من الرئيس بشار بس أكيد بيطلع بإيدون يمكن تكون انت يمكن أخوك أو أبوك أو صاحبك هاد الشي لا أنا لحالي و لا انت لحالك بقررو....... الشعب هو يللي بيقرر يمكن الشعب يقرر انو الرئيس الحالي هو احسن واحد للحكم ما فينا نعرف غير بانتخابات ديمقراطية مو تعطينا ورقة يا أي يا لأ لبشار انتخبات بمعنى الكلمة بيحقلك تختار يللي بتشوفو أصلح و هاد الشي كمان ما فيو ضرر لألك (باعتبارك مجرد مواطن مقتنع بالحكم) شغلة تالتة سوريا من أغنى الدول يمكن أغنى من الإمارات أو ع القليلي متلها بس المواطن السوري مانو أغنى من المواطن الاماراتي لانو بسوريا الحرامية كتار و كبار كمان بقى انا عم طالب بحقي من الثروة الوطنية ما عم طالب انو الدولة تصرف عليي بس يتركونا نشتغل مو انا و انت يفرضوا علينا ضريبة بتوصل لل75% و غيري لأنو ابن مسؤول بيعفوا من الضريبة بدي الضريبة تكون متساوية ع الكل لحتى اقدر نافس بالسوق هاد اللعي كلو في حال كنت مجرد مواطن سوري مقتنع بالحكم اما اذا كنت مستفيد من الحكم (ابن مسؤول مثلا) فبحب قلك انك انت الخاين و انت الحرامي و جايي اليوم يللي بتسري عليك العدالة السورية و ساعتها رح تكون هالعدالة قاسية لنعملك عبرة لمن اعتبر انت و غيرك من الحرامية و الخونة والعملاء و بحب قلك كمان انك مانك ابن سوريا وسوريا متبرية من امثالك و دمتم :D |
اقتباس:
وشخص عادي لاابن مسؤول ولا من يحزنزون وسوريا هي بلدي ومن حقي كمان قول يلي انا شايفوا هي الشغلات يلي قلتها مزبوطة ومعك حق بس مالاحظت انو تقريبا ولو شي بسيط انو يهل 4 سنين صاير شوية تغيير وبرجع وبقلك اني انا متلي متلك بتقلي ابن مسؤول |
اقتباس:
مع انو انا ما جزمت انك ابن مسؤول بس انا بعتذر اقتباس:
اقتباس:
بهال 4 سنين العالم كلو انقلب فوقاني تحتاني انا شايف انو بهال 4 سنين رجعنا لورا نسبة للتطور يللي صار عند غيرنا يعني اذا انت حابب تعمل مشروع (بروكسي انترنت مثلا) مستحيل يسمحولك بس اذا نزل معك شريك شي ابن مسؤول بتلاقي الدولة عم تطبل و تزمر لمشروعك و تحكي عنو قديش بينفع البلد اذا عم تحكي مشان الجامعات الخاصة فهاد مو تطور شوف ترتيب هالجامعات و شوف ترتيب جامعات فتحت بنفس الوقت حتلاقي الموضوع بيخجل فعلا السيارات؟ بدل ماترخص غليت الإعاشة؟ شوي تانية بيلغوها ع الآخر صارلون 4 سنين عم يحكوا عن البورصة و لهلأ ما حطوا آلية تنفيذ ع الأقل و الألعن انو بوكرا بتفيق الصبح بتفتح الجريدة الرسمية يللي مفروض عليك تشترك فيها بتلاقيون دجولك مرسوم عن البورصة دجني دجتك العافية و بآخر المرسوم بيكتبولك انو الآلية بيحطا الوزير المختص بما يراه مناسبا و بيصيروا يطبلوا و يزمروا بكل وسائل الإعلام السخيفة يللي عنا ع أهمية القانون شي 3 شهور و بيروح تلاتين وزير و لا واحد فيون بيحط آلية التنفيذ و لحتى ما تقول اني عم خرف أو حشش رح أضربلك مثل: من شي سنتين لغوا المرسوم 24 (المرسوم يلي منع تداول القطع الأجنبي و العملات و انشأ محكمة الأمن الإقتصادي) و لهلأ لسا ما في قانون بيحدد مهنة الصرافة يعني من قبل كنت اذا مسكوك عم تصرف عملة بتعرف حالك انو رحت دبلكة هلأ ما بتعرف اذا صرفت بتكون عم تخالف القانون أو لأ أما لو كان المرسوم عن شي ضريبة جديدة كنت لقيت آلية التنفيذ تاني نهار انت بتعرف انو مافي ضريبة بالدنيي ما عنا منا بسوريا حتى الTVA أجوا ليطبقوها آموا انطعجوا و لقوها مطبقة من سنة 1976 يعني قبل ما تخترعها اميركا ودمتم :D |
وبرجع ويقلك انو انا معك كمان من هل الناحية
بس نحنا في عنا كتير تشديد على هل الامور وانت كمان على راسي بس برايك انو الحل هو الحكم لا صدقني مو لح نلاقي احسن من يلي موجود لان يلي لح يجي مو احسن وانت بتعرف ليش وبقلك انت كمان على راسي |
على راسي كلكن يا شباب
بس أنا رح قول إنو الظالم حتى لو عدل ما رح تقدر بيوم تنسى ظلمو بعدين خيو تعالو لنشوف يعني هي كرسة الي خلفو ؟ ونحنا عمنشلحو اياها؟ طيب هو مواطن متلنا بس بيشتغل رئيس يعني هي ما كار محتكر لعيلي معينة هي شغلة بيقدر يشتغلها غيرو شوفو مثلاً بلبنان يعني كل الناس صارو يشوفو لحود راس المشكلة وهو تنح وكبر راس ومل كان يتحلحل عن هالكرسي يلعن أبو المناصب شو هيي طمعة... أصلا المنصب ما بيبكون طمعة غير بس يكون باب رزق غير شرعي أما وقت الي بيكون مسؤولية وأمانة (المنصب) بتلاقي أنو ما في مشكلة ينشال مسؤول وينحط غيرو يعني هي شغل مو مصالح المنيح والشغيل بيضل لكن طالما الشغلة مصالح والمنصب وسيلة رزق غير مشروع و (بخلي صاحبو مليونير بسرعة وبدون تعب) فمن المستحيل إنو المسؤول يتركو كمان بالنسبة للناس الي مش قادرة تصدق إنو ممكن يتغير هالرئيس هذول ما بيعرفو إنو موظف (طبعاً بمستوى عالٍ) بيعرفو صاحب منشأة (إذا ما قالو ورثانها) والوظيفة لا تعبر عن شخصها بل عن موقعها s1_daoud لا ألومك على محبتك للرئيس ولكن المحبة شي والشغل شي ثاني ما هيك؟ يعني أنا إذا أخي ما بيعرف يشتغل منيح عندي بشيلو عالمكان الي بيناسبو وبجيب واحد غيرو وما فيها زعل يعني هي مصلحة شعب مو لعبة كرمال شخص واحد بتوقف أمة أو بتتفرق أصلاً هذا عيب وانت بتقول الي شايفو الي شايفو إي والله هلكتنا كل الناس شايفي الفساد والي موشايفو أعمى معقول عمنكذب لهادرجة؟ والكل شايف إنو الرئيس ما قدر يحل الفساد طيب يا اخي يرتاح هوي ببيتو وخلي غير ويشتغل لشو تاعب حالو (طبعً إذ اكان موظف مؤتمن) وأنا مارح شكك بها الشي كرمالك |
اقتباس:
أي شو يعني مثلا" معنى كلامك .. هلا البعث أحسن شي لسوريا .. واللي بعدو أسوأ .. أي رح أجي معك .. البعث مانو الله لحتى يستمر للأبد .. هذا يعطي هالأسوأ اللي بعدو رح يجي .. وكمان ما راح يدوم .. وعلى ولايتين تلاتة بتكون سوريا طارت من الكرة الأرضية أرضا" وشعبا" وتاريخا" .. شو هالسياسة الانهزامية هي .. يعني رح أجي معك أنو يا أخي الحكومة الحالية منيحة .. ماشي .. بس هون نحنا مننظر لاماكانية بلدنا وطاقاتو .. وثرواتو وموارد .. وشعبو المبدع ( أي المبدع) لا تستغرب .. لأنو وجود عالم بسوريا قادرين على رؤية الحقيقة بعد 40 سنة من قلع أعين البصر والبصيرة وتحطيم النفسيات وزرع الخذلان .. يدل على ابداع وارادة جبارة .. المهم لنرجع وين كنا . أي أنو حكومة البعث منيحة .. أي بس في أحسن .. وهون ما في قناعة كنز لا يفنى .. وما في جود من الموجود .. ولا خلف من المخلوف .. هون لازم نجيب الأحسن .. فيا السلطة بتتعاون مع الشعب ( اللي هنن الدولة والوطنن الحقيقيين) يا أما خيو تتركنا بحالنا .. ونحنا مسامحينها بكل الأموال اللي سرقتها .. وكل شي عملوه معنا .. أخي خدو مصرياتكن وشبحاتكن .. شبكات الخليوي تبعكن .. وافرقونا بريحة .. طيبة يا أما حطوا أيدكون بأيدنا لنعمل الأحسن لهالبلد .. ولا تواخذنا خيو .. :D :D |
هو شباب انا معكم من ناحية الفساد عنا
وهيدا الشي معروف محليا ودوليا طيب شباب بكل صراحة لو افترضنا يلي بدكون اياه صار الحكومة نزلت والبعث تفكك فيكن تقولولي مين الانسب بدكن تقولولي انو شي واحد من هل الشعب ماهيك ولو افترضنا صار بس قولولي من وين بدنا نبدا لك من وين بدنا نبلش حبيب الرئيس عم يحاول كل مابيقدر ولا انا ولا انت فينا نشكك بهل الشي بس بدكن تقولولي وين الشغل الو 4 سنين ماهيك بس بهل الاربع سنين هو اشتغل وعم يشتغل وعم يحاول بس عنا الاوضاع السورية بتعرفوا كيف كل واحد بيهمو مصلحتوا وماحدا عم يجي مع التيار يلي ماشي فيه السيد الرئيس يعني مفكرين انو رئيس يعني هو مرتاح وعم ينبسط بس انا وانتوا بنعرف انو مابينام الليل يعني مافينا كل اللوم نحطوا على الرئيس انا عم حاكيك كشخص عادي انا والله مالي لا باالسياسة ولا باي شي لحتى انا ماني منتمي ولا لاي حزب بس متل مابيتهمكن هي البلد ياابناء سوريا كمان انا بتهمني وبفكر شو بدو يصير فيها |
اقتباس:
|
| الساعة بإيدك هلق يا سيدي 18:01 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون