|
صديقي الفيل :p يمكن انا ما عرفت وضحلك وجهة نظري : انا كنت عم بدعوك لعدم الانجرار للمعسكر المناهض للأديان و تصير طرف متطرف بهالموضوع في قضية ما يتعلق بمخالفة الاديان للقوانين فـ هون بيجي دور القوانين العادلة الي بتعطي لكل حدا حرية الاعتقاد بما لا يتعارض مع المصلحة العامة . مثلاً : الدين الاسلامي يقول برجم الزانية .. القوانين تمنع هذا الفعل وتجرمه . بالتالي ما حدا بيقوم فيه . الك حق استنكار بعض الممارسات الدينية لكن لا تخلي نفسك بمواجهة مع عقائد الاخرين ككل بل بالعكس كون بموقف المدافع عن حرية الاعتقاد و خلي هدفك الأساسي بالمرتبة الاولى هو العدل و الحرية و النقاش العلمي في كل ما يخالفهما . بعتذر للخروج المتكرر عن الموضوع من جهتي أيضاً . و بتمنى تكون واضحة فكرتي وشكراً :D |
لتطرف مفهوم نسبي بيختلف تبعا للطرف يلي عم يفرض رأيو ...
حضرتك مثلا بتأمن انو حماس متطرفين ...بس لأنو العالم كلو بيشوفون هيك !! المسلمين صح قليل كتير منون يلي بعاقب بالرجم للوقت هاد ..بس ما تنسى انو بسبب الدين ..الزانية هي يلي ما عم تنرجم بس المجتمع اخد عنها فكرة انو ساقطة يعني قلل من انسانيتها ....عدا على انو في كتير ممارسات بيصير بحقها من ورا الدين ..متل تزويجها اجباريا ,,او تركها لتموت ببطئ بغرفتها ,,,ليش ..لأنو ما في مين يقول ....! .و هدا بسبب الدين ,, لحد ما .... ثانيا مشان النقاش العلمي ...قلتها من قبل ..انو نحنا مجتمع عاطفي //مو علمي او عقلاني ,,,لهيك المناقشات العلمية يمكن بكتير احيان تتحجم , و فينك تشوف الشي هاد من الموضوع و المشاركات السابقة ...يعني باستثناء رد واحد ...ما حدا من الدينيين ممكن يعمل بحث ليشوف كيف اتفندت نظرية داروين علميا ,,, ببداية الموضوع سجلت رأي الطرفين ..و حتى كمان وضعت احدى الصور يلي مكتوب تحتها الأسباب يلي بتخلي البعض يأمن انو ال Neandertals هني نوع تاني غير البشر ..مع انو هاد ضد قناعتي الشخصية ...فينك ترجع للرد رقم واحد و تشوف الصورة التانية ,,,يعني انا عرضت وجهة النظر العلمية ضد داروين ,,,,,يلي الدينيين ما ذكروها هون !! صديقك الفيل |
لحتى ما يستمر مسلسل تضييع الموضوع رح انهي كلامي بملاحظة بسيطة توضيحية و ازا كنت حابب انو نكمل بنقاش فـ بفضل يكون هالشي برايفت او بموضوع مستقل .
انا بعرف و فهمان عليك تماماً انو بعض الافكار الدينية أو التمسك ببعض التعاليم المتعارضة مع المنطق في بعض الاوقات ادى لتأخر مجتمعي ولكن الحل للسيطرة على هالقضية هو اثارة الجدل العلمي المنطقي حول قضايا التعارض مع الدين وليس نفي الدين ككل ( حيث انت لما حطيت الصور أشرت الى انه هذه هي ممارسات المتدينيين و تكلمت و كأن اي متدين هو عدو ) وهالجملة بتبين و كانو في تنافي بين العلم و التقدم الانساني من جهة وبين الدين كمعتقد من جهة اخرى يعني الفائدة هي احداث نقاش علمي حول القضايا و انتقاد ممارسات معينة و توضيح انتقادها فقط لكي لا يبدو للبعض بانو دعاة التقدم يريدون من المتدينيين نسف معتقداتهم . و تحية الك صديقي الفيل . |
[quote=Elephant And Castle;1269717]
- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - اتأكد ابو الجود انو ما حدا عم يغشك و عبيعطي معلومات مشان يضيعك ...الرابط هاد بيفرجيك المقالة عن موضوع العمود الفقري .. و خليني اصدمك شوي ...العمود الفقري هاد بعود لمستحاثة A afarenisis قبل حوالي تلات ماليين سنة يعني حتى قبل ال Homo hobilis & homo erectus عزيزي الفيل حبيب قلبي يرضا عليك فهام علي التشابه لا يعني مطلقا نفس يعني تشابه عنصرين لا يعني انهم من اصل واحد. وانت عم تعطي معلومات انت مقتنع فيا بس ما بالضرورة تكون صح وغيرك مقتنع لأنو قناعتك جاية من خلفية الحادية وبما انو عندك هالخلفية الالحادية ما رح تشوف غير اللي انت بدك تشوفو .وتقتنع بالشي اللي انت آريه. وبالنسبة لنقاشك مع الباشق بلاحظ عندك حقد عميق ع الدينيين ، يا أخي تروك الدين خليك بالنقاش ما حدا عم يجبلك سور من القرآن أو شي من التوراة والانجيل حتى يقنعك بس انت كل مرة بتدخل ع الدين وبتنقدو ومتل ما قال الباشق صرت متطرف يعني ما في فرق بينك وبين اسامة بن لادن وشلتو ولازم تحترم انو في ناس متدينة يعني 95% من البشر دينيين بغض النظر شو دينن ( اسلام مسيحية يهود بوذية سيخ الخخخخ) ...................... هلاء بدي اعرف انت عم تحاول تثبت نظرة دارون ولا انو ما في خالق؟؟؟؟؟؟؟؟؟؟؟؟؟؟ لأنو نظرية دارون لاتنكر وجود خالق وهالشي سبق ذكرتو . بس الداروينيين هنة بينكروا الخالق. اذا بدك تثبت عدم وجود الخالق طلاع من هالموضوع . غير هيك انت بتشوف النقاط اللي عندك فكرة عنا وبترد عليا ونقاط تانية بتتجاهلا لعدم قدرتك ع الرد متل الانفجار الكوني وتشكل الأرض وما كان قبل ها الحدثين الضخمين بتارخ الكون وانا نقلتك نظرية الأنفجار بدون أي تعديل وهون برجع بأكد انو ما حدا بيعرف شو كان في قبل الانفجار العظيم وكل ما يحكا مجرد نظربات وتخيلات عم يحاولو اثباتا بس عم يفشلو لهلق وآخر شي الفشل اللي صار بسويسرا وتعطلت الأجهزة وتحتاج أشهر لأصلاحا . مع هيك برجع وبرجع بقول حسب نظرية الأنفجار العظيم يعني الحرارة شديدة الكثافة الي انبثق منا الكون من وين اجت . وبالرجوع لنظرية التطور اللي هية موضوع الحديث رح جبلكن هالمعلومات بتمنا تتمعنوا فيون ويكون الرد برا الدين تقول نظرية التطور: إن السلم قد بدأ بالكائنات وحيدة الخلية وتحت تأثير الظروف البيئية تم التطور إلى كائنات أكثر قدرة وأكثر تعقيداً بتفوق الأصلح في الصراع من أجل البقاء مع انقراض الأفراد الأقل صلاحية في التنافس والصراع، وهذا الافتراض الثاني تنقضه الحقائق التالية: 1 ـ رغم مرور ملايين السنين منذ بدأت الحياة على الأرض فمازلنا نرى كائنات دقيقة وحيدة الخلية وعديد من الكائنات التي لم تنقرض رغم أنها ضعيفة بسيطة التركيب ولا أدل على ذلك من أننا نكتشف فيروسات جديدة كل يوم كما نكتشف أنواع البكتريا ذاتها في حفريات الفراعنة· وبالنسبة لعمر هالتطور المفترض هناك حقائق علمية تثبت ان عمر الأرض وعمر الكون لايكفي لحدوثه مثلا: ـ قام العالم >شارلز إيجين جاي< بحساب احتمال التكون بعامل المصادفة لجزيء بروتين واحد، فوجد أن هذا يمكن أن يحدث مرة كلما مرَّت فترة زمنية لاتقل عن 10 أس (243) من السنوات، وهذا يزيد على بلايين أضعاف عمر الأرض، وهذا هو احتمال تكون جزيء واحد فقط من البروتين غير المتخصص· _ في العام 1962م، قام عالما الكيمياء الحيوية >ماكولم ديكسون<، >أيدويب< بحساب احتمال تكون جزيء البروتين ذاتياً نتيجة مجرد التقاء جزيئات أحماض أمينية في مخلوط منها ـ وقد تبيَّن أن هذا الاحتمال لكي يتحقق يقتضي حجماً من مخلوط الأحماض الأمينية المعروفة يصل إلى أضعاف حجم الكرة الأرضية بمقادر 10 أس(50) ضعفاً كل ذلك لمجرد تكون جزيء بروتين واحد من النوع العادي غير المتخصص، أما احتمال تكون جزيء بروتين متخصص مثل >الهيموغلوبين<، فإن الحساب قد وصل إلى ضرورة توافر حجم من مخلوط الأحماض الأمينية لا يقل عن 10أس (512) ضعف حجم الكون كله· بينما أجسامناً لديها القدرة على أن تبنى هذه الجزيئات بدقة بالغة ليلاً ونهاراً حتى ونحن نيام، ـ وفي العام 1987م قام العالمان >والاس<، >سيمونس< بدراسة احتمال تكون جزيء بروتين متكون من 100 حامض أميني في ترتيب معين ـ ولما كانت الأحماض الأمينية المعروفة 20 حامضاً، فإن هناك 20 احتمالاً للحامض في الموضع الأول، وهكذا، وتصبح احتمالات شغل الأحماض المئة في جزيء البروتين = 20(100) = 1.25 * 10أس (130) أي احتمال في كل 10أس (130) احتمال· وإذا أخذنا في اعتبارنا ملايين الجزيئات في ملايين الخلايا نجد أن الاحتمالات الإحصائية تقطع باستحالة البناء الذاتي بالمصادفة لتكوِّن جزيئاً بروتيناً واحد فضلاً عن الخلية الحية الكاملة· تحياتي وبالنسبة الي النقاش انتهى وشكرا ع سعة الصدر. |
بشرشفي ماحد عم يقرأ الموضوع:pos:..
بالنسبي لنقاش باشق وElephant فما بدي اعلق فيه :lol: اقتباس:
اقتباس:
بس برجع بئول شغلي بمعنى انو المجموعة الكبيري من الصخوروالغازات يلي انفجرت ما ممكن تكون اجت من العدم..هيدا شي مو مقبول في مين خلقو هوي الله.. بس مقبول يكون الله اجا من العدم..ما حدا خلقو..طيب من وين اجا ؟؟ اقتباس:
الكائنات وحيدة الخلية عايشي ببيئة ملائمة إلها ولحياتها..وبالتالي شي طبيعي تكون موجودي لحد هالحظة وتستمر:D..وهالشي ما بيتعارض ابدا مع النظرية الداروينية.. اقتباس:
اقتباس:
اقتباس:
:D اقتباس:
اقتباس:
تحياتي |
بالحقيقة كنت حابب احكي عن نقطة اخيرة ...و هي تفسير تطور الدينية خلال العصور استنادا لقوانين داروين عن التطور ....بس بما ابو الكل انهى الحديث ..ما فيني غير انا كمان انهي ...
و الشكر ل عبر المحيط ,, جيمي..ذا مورنينغ..الباشق ..ابو الجود ..و وائل و كل البقية ...و .... في جولة تانية ............اذا الله عيّشنا !! |
اقتباس:
وعم إستنى الشوط التاني و:D:D:D:D |
لسه عم تحكو بنظريه داروين
وعلماء الغرب نفوها من زمااان عن جد تخلف |
اقتباس:
|
اقتباس:
وبتمنى تكمل صديقي هون او بغير موضوع... كنت حابة حكي جيمي كتير .. :D |
برايي
انو داروين ما قتل الله .. بالعكس بين انو الفرضية يلي ساقت ناس كتير للتبعها هيي نظرية فقط وقابلة للنقد يعني بين انو نظرية وجود ما يسمى الله شيء يمكن نقده علميا وداروين اعطى بدايات هالتوجه عن طريق نظرية التطور وبالنسبة للي قال انو ليش شي اتطور وغيرو ما اتطور .... برايي انو ما منقدر نحكي هالشي لانو التطور حالة مستمرة تسير ببطئ .. لانو التطور للوصول للكائن الانساني احتاج ملايين السنين وما منعرف بعد ملايين السنين الجاية شو ممكن يتطور .. ( رايي بمثلني انا باعتباري ملحدة ولا اؤمن بنظرية وجود ما يسمى الله ابدا .. لا باخوية ولا بغيرها) :D |
اقتباس:
و:D |
اقتباس:
|
The human being himself is the center of the universe
مرحبا أحلا عالم
بصراحة ما قريت كل شي , بس اطلعت عمعظم الاراء و بحب اشكر الكل وهايدا اللينك هدية مني لأحلى عالم وبالاخص Elephant &Castle - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - بتمنى ما ينط حدا ويصححلي اخطائي الاملائية , لاني بعتقد انه الهدف من اللغة ايصال الافكار والتواصل وحاولت تكوون الكتابة مفهومة وأحلى عالم :D |
نظريه داروين دخلت متحف النسيان بعد اكتشاف قانون (مندل)الوراثي و اكتشاف وحدات الوراثه(الجينات)باعتباره الشفره السريه للانسان و اعتبار ان الكروموسومات تحمل صفات الانسان الكامله وتحفظ الشبه للنوع عشان هيك العلماء اكدوا انو وجود تشابه بين الكائنات الحيه دليل واضح ضد النظريه وكمان اقتبس قول لعالمين: الدكتور سوريال في كتابه " تصدع مذهب داروين" : ان الحلقات المفقودة ناقصة بين طبقات الأحياء، وليست بالناقصة بين الإنسان وما دونه فحسب، فلا توجد بين الحيوانات الأولية ذات الخلية الواحدة والحيوانات ذوات الخلايا المتعددة، ولا بين الحيوانات الرخوة ولا بين المفصلية، ولا بين الحيوانات اللافقرية والفقرية، ولا بين الأسماك والحيوانات البرمائية، ولا بين الأخيرة والزواحف، والطيور، ولا بين الزواحف والحيوانات الأديمية وقد ذكرتها على ترتيب ظهورها في العصور الجيولوجية. اما الكونت دي نوي فيقول: كل مجموعة، كل فصيلة تبدو وكأنها جاءت إلى الوجود فجأة، إننا لم نعثر على أي شكل انتقالي، ومن المستحيل أن ننسب أي مجموعة حديثة إلى أخرى أقدم يعني نظريه داروين اصلها علمي ولكن داروين خلاها فلسفه عشان يفسر نشأه الحياه وهنا الخلاف فهذه النظريه ليست امر علمي بحت مثل نظريات الكهرباءوالمغناطيس ...لا....هي لها بعد ايماني او لاايماني و اعتقد ان اهميه النظريه كان لوجود صراع بين الكنيسه واهل العلم التجريبي لانها مخرج وحيد لتفسير الحياه لمن لا يؤمن بالله سبحانه وتعالى.... |
يعني صراحة هادا الحكي الي بيتصدق
|
الدين أفيون المجتمع
كارل ماركس |
اقتباس:
اللادين أفيون الملحدين wile ,:D |
اقتباس:
يعني ببساطه علم نقض نظريه فلسفيه |
اقتباس:
نظرية داروين تدرس كركن اساسي بكل جامعات المانيا..ماسمعت اي من بروفيسورات قسم البيلوجي بجامعتي بيقول بنقظها عكس ما كنت بسمع من الخوري الي كان ماسح بشرف داروين الارض لما كنت بالبلد من الي مع او ضد النظرية يقرو كتاب اصل الانواع وبعد ماتسمعو شو اشتغل هالانسان ل40 سنة قبل النقد :D |
بما انو الموضوع انفتح من جديد ...أول شي بطلب من المهتمين بالموضوع هاد نظرة سريعة على موضوع تاني يلي هو عبارة عن خبر صغير (بالحجم النصي )
- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - اقتباس:
اقتباس:
هلئ بصراحة الموضوع اخد طريقين و شفت انو من الصعوبة بمكان الفصل بينهم ..الطريق الأول كان نقاش حول نظرية التطور ...و الطريق التاني كان النقاش حول الألحاد ( استنادا على ما تم ذكره عن التطور و امور اخرى ) حاليا عم اشتغل على مقال ( استنادا على ترجمة العديد من المقالات و المحاضرات ) بدي انشروا هون بس اخلص منو .. اكتر من هيك ما في شي قدمو بالموضوع لأنو بخاف انو يتحول لساحة صراع بما انو النقاش متل ما لاحظت سبب حساسية عند البعض ...و رغبة مني بتجاوز الأسلوب الهجومي التقليدي لكتير من الملحدين يلي انا كمان اتبعتو احيانا ببعض الردود هون اقتباس:
اقتباس:
على فكرى ..اسلوبو ممكن يكون مقنع اكتر من عشرين كتاب و نظرية .................................................. .................................................. ....... بظن انو صديقنا الأممي رد على صديقتنا الماسة . اخيرا بالفعل ...يعني افضل شي قبل نقاش نظرية داروين هو قراءة كتابو اصل الأنواع " The Origin Of Species " بحثت عن نسخة عربية للكتاب مشان أوضعها هون بس ما لقيت .. يا ريت اذا حدا بيعرف شي رابط للنسخة العربية للكتاب يوضعها هون و منكون ممنونين |
تحية : طبعا انا طلعت من الموضوع سابقا لأني شفت ما عاد في شي جديد والكل عندو رأي ومتشبث فيه ،حتي أحيانا هالتشبث عم يكون لمجرد تسجيل نقاط وعدم التراجع ، المهم حبيت حط فكرة عن كاتب أصل الأنواع من موقع الويكيبيديا.
ترجمة مصرية كاملة لكتاب «أصل الانواع» 2005-04-30 أحمد مغربي  اصدر «المشروع القومي للترجمة»، الذي يشرف عليه الدكتور جابر عصفور، والتابع لـ»المجلس الاعلى للثقافة» في مصر، ترجمة لكتاب «اصل الانواع/ نشأة الانواع الحيّة عن طريق الانتقاء الطبيعي - أو الاحتفاظ بالاعراق المفضلة في اثناء الكفاح من اجل الحياة»، وكان ألفه عالم البيولوجيا الانكليزي تشارلز داروين، وصدرت طبعته الأولى في العام 1859. وكان الكاتب المصري اسماعيل مظهر، ترجم الكتاب عينه سابقاً في مطلع القرن الماضي، واعطاه عنوان «اصل الانواع». وقد وضع الترجمة الراهنة مجدي محمود المليجي، معتمداً الطبعة السادسة من الكتاب عينه (صدرت في العام 1872)، والتي تحوي باباً اضافياً يتحدث عن الاعتراضات المختلفة التي ثارت، حينها، في وجه نظرية الانتقاء الطبيعي. والحال ان نظرية داروين كانت دوماً مثاراً لنقاشات مديدة. وخرجت من مجال العلوم البيولوجية، لتتصل بنقاشات اكثر عمقاً في الفلسفة والثقافة عموماً.لذا فمن المتوقع ان تثير الترجمة العربية الراهنة لهذا الكتاب نقاشاً حاداً، على جاري العادة مع كتابات داروين. فالترجمة هذه تجيء وقد تغيّر موقع الكتاب الاصلي في الثقافة الغربية نفسها، وبات موضع تحد كبير، بعد ان رسخ النشوئية طويلاً كنظرية مرجعية في العلم والفلسفة. وكأن الزمان دار دورة كاملة ليعود بداروين، وبنظرية النشوء والارتقاء كلها، الى نقطة الانطلاق. فمرة اخرى، يسود تشكيك كبير تلك النظرية في الغرب، كما كان الحال عندما ظهر هذا الكتاب للمرة الاولى. اعتبرت نظرية داروين، بتلاوينها المختلفة، من احجار الزاوية في العقلانية الاوروبية. لم يتردد توماس كون، في كتابه «بنية الثورات العلمية» (جامعة شيكاغو - 1962) في اعتبار ما فعله داروين أنموذجاً لما تكونه الثورة العلمية، بمعنى انها النظرية العلمية التي لا تبقى مجرد تطور تقني، بل يبلغ من قوتها وجرأتها ان تضع منهجاً جديداً في التفكير، بحيث تغيّر جذرياً من المفاهيم الاساسية، وكذلك طرق التفكير، التي سبقتها. ووضعها على قدم المساواة مع الثورة التي احدثتها نظريات السير اسحاق نيوتن، عند نشره كتاب «المبادئ الاساسية للفلسفة الطبيعية»، والتي وضعت حداً لسيطرة مقولات الفيلسوف الفرنسي رينيه ديكارت وثنائياتها. وفي العام 1996، اعتبر عالم الاناسة الاميركي فرانك سولووي ان داروين يفوق اهمية ألبرت اينشتاين, وان نظرية الاول عن علاقة الانسان مع الطبيعة احدثت هزة في عمق نظرة الانسان الى هويته، وطريقة تفكيره في الطبيعة والكون، فيما انحصر الاثر الاساسي لنظرية النسبية، التي وضعها اينشتاين، في المجال العلمي، ولم تغيّر في عمق نظرة الانسان لهويته الكونية. وقارن اثر نظرية داروين وجرأتها، بالاثر الذي احدثته المقولات الجريئة لعالم الفلك كوبرنيكوس (الارض تدور حول الشمس وحول نفسها)، التي اطاحت بصورة نهائية فلسفة ارسطو ونظرياته عن الطبيعة والكون، وتقاطعت مع الانشقاق الذي قاده القس مارتن لوثر عن الكنيسة الكاثوليكية وباباواتها! لم تنقص داروين الجرأة في القول بعلاقة الانسان مع الطبيعة. ففكرة التطورية، سواء في العلم أو الفلسفة، سبقت داروين. قبله، اقترح هذه الفكرة علماء التاريخ الطبيعي الفرنسيون مثل جورج لويس بوفون (1804) وجان باتيست لامارك (1809). ولعل ابرز من توصل الى نظرية التطورية في البيولوجيا قبل داروين، وأعوزته الجرأة لقول ما اكتشفه، تمثل في عالم البيولوجيا الانكليزي تشارلز لايل. ويظهر ذلك في كتابه الذي يحمل عنوان «تاريخ قديم للانسان» ( 1863). بعد نحو قرن ونصف قرن من صدور كتاب تشارلز داروين، في امكاننا ان نرى ان تاريخ الداروينية لم يكن ايجابياً خالصاً. لنبتعد عن النقاش العلمي حول صحة مقولات داروين، التي اثبت العلم لاحقاً خطل الكثير منها. روج داروين لفكرة الانتقاء الطبيعي والصراع للبقاء الذي يفوز به الافضل. أليس ذلك صلب نظرية الانتخاب الطبيعي، الذي ترجمه الفيلسوف الانكليزي هربرت سبنسر (1820- 1903)، صديق داروين، الى مقولة البقاء للاصلح. لم تكن فكرة «اليوجينيا» Eugenia، الصفاء العنصري مبررة بمقولة بيولوجية داروينية عن ضرورة الاحتفاظ بالنخب الاقوى من البشر، سوى امتداد مباشر لنظرية داروين. وسار بها ابن اخته فرانسيس غالتون، الذي نظر الى ضرورة تخلص الجنس البشري من الفئات التي تحمل «صفات متدنية». انشأت المانيا النازية معهداً علمياً حمل اسم غالتون. ووجدت في مقولات داروين وغالتون خير تأييد لمقولاته العنصرية عن تفوق اعراق معينة من البشر على غيرها. والنتيجة؟ تعقيم ملايين النساء والرجال لئلا ينجبوا اولاداً يحملون «صفات اقل»، اضافة الى معسكرات الابادة الجماعية، لليهود والغجر والبولونيين والروس، في داخاو وأوشفيتز وسواهما. من الصعب ان «ننزه» داروين عن تفلتات الفكر النازي في السياسة والفكر. والارجح ان المقولة الجاهزة عن سوء استخدام السياسة للعلم، تمثل تبسيطاً مملاً لأمر معقد تماماً. فبأثر من قوة نظريات داروين وانتشارها، راجت مقولات اليوجينيا (الصفاء العنصري) في المانيا النازية, وفي بريطانيا الديموقراطية والولايات المتحدة الشديدة الديموقراطية. بقيت بعض قوانين اليوجينيا مطبقة في بعض الولايات الاميركية لسنوات طويلة بعد الحرب العالمية الثانية. وظلت هذه القوانين فاعلة في السويد والدنمارك وهولندا حتى السبعينات من القرن العشرين. تصعب تبرئة داروين من هذا الارث. ترى أليس مشروعاً ان يتمرد العقل البشري على نظرية وضعها بشر آخرون؟ أليس القول بضرورة الاحتفاظ بالداروينية نوعاً من «الاصولية العلمية» التي تنفي قدرة العقل على الابتكار المستمر؟ لا تبدو المسألة شائكة فقط اذا نظرنا الى داروين في ظل مذابح هتلر ومقولات العنصرية. يصبح الامر اكثر تعقيداً اذا اراد البعض تحويل داروين الى مطلق لا يستطيع العقل البشري ان يتحداه أو يتجاوزه! وتلك الامور كلها في حاجة الى تدقيق اكبر. |
اقتباس:
اقتباس:
اقتباس:
اقتباس:
|
اقتباس:
وتحياتي . هاي الرابط: - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - |
اقتباس:
شكراااااااااااااااااااااا ااا |
إيه حاجتنا ضحك على بعض يعني مستر داروين شكلو كان سكران لما إخترع نظريتو
لك روحو شوفو شي برنامج عن التمويه في الحيوانات بعدين تعو قولولي إنه هي الي عم تموه عن نفسها لك الكون لو راقبته ودقة توزيع الكواكب والبحار لو شاهدتها وشفت أنواع الكائنات والأرض لو شفتها وشفت حيواناتها وأفعلها التي تسمح لها بالحياة مع إنه ذكائها ضعيف كل هذه أدلة على وجود خالق لهذا الكون الواسع ومدبر له ولو لم يكن له مدبر لإنتهى منذ زمن |
إيه حاجتنا ضحك على بعض يعني مستر داروين شكلو كان سكران لما إخترع نظريتو
لك روحو شوفو شي برنامج عن التمويه في الحيوانات بعدين تعو قولولي إنه هي الي عم تموه عن نفسها لك الكون لو راقبته ودقة توزيع الكواكب والبحار لو شاهدتها وشفت أنواع الكائنات والأرض لو شفتها وشفت حيواناتها وأفعلها التي تسمح لها بالحياة مع إنه ذكائها ضعيف كل هذه أدلة على وجود خالق لهذا الكون الواسع ومدبر له ولو لم يكن له مدبر لإنتهى منذ زمن |
اقتباس:
اقتباس:
لو الكلام هاد مو صحيح كنا سمعنا شو هي تعليقاتكون على بعض فقرات الكتاب ...بس كل شي عم اسمعوا ..كلام منتديات اسلامية او دينية .. اقتباس:
يا رجل .. قرأت الك اكتر من 15 تعليق هون بالموضوع هاد ...بس ..ما عرفت شو هي فكرتك..كل تعليقاتك هي عبارات متل " اي والله هدا الكلام يلي بينسمع " ..او "هادا هو الحكي السليم " ...او " هدا الشي يلي بيتصدق " تحت نصوص مقتبسة من اشخاص مختلفين ...يعني عنجد ,,كنت عم اسأل حالي ...هلأ وائل شو رأيو بالقصة !! ما طلع معي شي ما عرفت ..لما بتقتبس اراء من اكتر من شخص لازم يطلع في تناقد او تنين بالأراء ..يعني ما بصير تقول انا مع الكلام هاد ..و مع اكلام هاد ...انت شخص واحد ,,,و لازم يكون الك رأي واحد .. هلأ ...عم قول هلأ ..بدي اسمع رأيك من دون اي اقتباس ... عم احكي من موقع محبة اخي وائل ...لأنك اكتر واحد تابعت الموضوع ..و بشكرك عالشي هاد ...بس ما عرفت شو رأيك !! :deal: |
رأيي هو أنو لو فعلا نظرية دارون صحيحة
كنا هلق عم نشوف القرد عم يتحول لأنسان أو بالأصح كان مارح يكون في قرود لأنو كلها تحولت لناس وهاد الشي معناتو أنو نظرية دارون غلط... شكرا لطرح الموضوع:D |
ولكن عزيزتي ماري نظرية داروين ما قالت انو القرد تحول لانسان..وبالتالي تحليلك هوي يلي خطأ..
----- عزيزي ELEPHANT بحب طمنك انو بالعلوم والوراثي مابرحلي ولا علامي :gem:.. بس شو مشان نكشتو الموصوع بوئت امتحاناتي.. |
اقتباس:
ما أحلاك و أنت ناقصك شي علامة بعلم الأحياء و الوراثة بعد مشاركاتك كلها ..طبعا بشوف نتيجتك طبيعية جدا ,,,,بس بتمناها ما تكون طفرة من طفرات داروين :lol: و عقبال كل المواد ما بينقصك فيها ولا علامة ..و بيطلع من اخوية واحد من الأوائل على مستوى القطر ..( على فكرى بعرف انو هاد بقدر ما هو تشجيع بقدر ما بيوضع الطالب تحت ضغط ..كنت اسمع نفس الكلام بالبكالوريا و بعرف شو كان موقفي ...) .. بس ما في خوف |
والله يا معلم ومن دون إقتباس أنا مابعرف شي عن الداروينية مشان هيك ماني صارع الشعب
وصراحة أنا ما بحب إحكي بموضوع ما بافهم فيه |
هل خلق الله داروين ؟؟ ما اتوقع انو داروين خلق نفسه أو جدو القرد متلا خلقه لهيك كيف بدو يقتل الله ؟؟ مين يلي بينحط جوا التاني الطبق الكبير ولا الصغير ؟؟؟ يعني داروين بالنسبة لكل الكون الطبق الصغير فكيف بدو يكون واسع الطبق الكبير؟؟؟ |
في كتير كلام خطأ بهذا الموضوع إما من المناقضين للنظرية او حتى للمدافعين عنها.. الأحسن قبل ما نحكي عن شي, خاصة اذا بدنا ندافع عنه, انه نتعلم منيح حتى ما يكون في أخطاء جسيمة بالكلام لانك اذا كنت عم تدافع عن شغلة و انت نفسك عم تغلط, فبتكون هيك عم تسيء للفكرة لسا اكتر من يلي عم يهاجموها
خلاصة الحكي انو نظرية داروين مانها شيء خاضع للنقاش. هي نظرية قوية جدا و متغلغلة لدرجة كبيرة بالاوساط العلمية و على اساسها في علوم كاملة مبنية .. و طبعا الداروينية اتطورت و الشكل الحالي مختلف عن الشكل يلي انطرح بالبداية تقريبا 99% من الانتقاضات عم تكون انتقاضات قديمة و مجاوب عليها شي مليون مرة و فوقها عم تجي بدون مصادر.. او لمؤلفين كتبوها بالنصف الاول من القرن الماضي.. يعني شيء قديم كتير و خلال هالفترة معلوماتنا تغيرت و اتطورت كتير اذا بتبحثوا بالمؤلفات و النشورات العلمية الحالية ما رح تلاقوا اي وجود لتناقضات و تعارضات مع الداروينية.. اي انتقاضات رح تكون قادمة من مجموعات دينية راديكالية و هي ما بتصلح انها تكون مصدر علمي يلي حابب يتعلم عن نظرية التطور ما ضروري ابدا يقرأ كتاب أصل الأنواع. اصلا الاحسن ما يقراه.. بس ايا كتاب بيولوجيا حديث او بعض المؤلفات لبعض العلماء العصريين احسن بمليون مرة.. كتاب اصل الانواع ضخم جدا بالحجم و غالبا الترجمة العربية رح تكون ركيكة و تجعل القراءة صعبة و غير ممتعة. ممكن قراءته كنوع من التثقف التاريخي للنظرية او للمتعة.. بس اذا حابب تستفيد فالاحسن طبعا قراءة كتاب عصري لانو على ايام داروين ما كانت لسا معروفة الكروموزومات و لا الدي ان ايه.. فرح ينقصك كتير معلومات مهمة و اساسية شغلة تانية.. الداروينية ما إلها علاقة بوجود او عدم وجود إله. هيي اكيد ما بتساعد على تدعيم فكرة وجود خالق بس بنفس الوقت هي نظرية علمية متعلقة بنشوء التنوع الحيوي.. اما اذا اصل هادا التنوع الحيوي انخلق او كان موجود عن طريق الية اخرى.. فهادا شغل تاني بالتوفيق للجميع للوصول للحقيقة و لمعرفة الاشياء كما هي و ليس كما يمليها الدين او المجتمع او اي تأثير خارجي |
اقتباس:
بتمنى انك تأشر على اخطائنا ..لأنو الهدف الأخير انو نستفيد جميعا |
انا بصراحة ما قريت كلشي بس هلق رجعت و تابعت محل ما كنت موقف و اكتشفت اني غلطان. انا قرأت اول صفحة بعدين قرأت متفرقات من اخر كم صفحة و شفت الناس لسا عم تحكي انو ليش القرد ما صار انسان و ليش الحمار إلخ
و كان اول رد إلك على هالسؤال انه السبب هو الطفرات يلي حصلت عند بعض القرود عدا عن غيرها... هالشي ممكن يعطي انطباع انو القرد ما زال بحالة متاخرة ناطر لحتى يتطور لإنسان.. طبعا هالشي ما صحيح. بقى لما قرأت اخر كم صفحة و كان لسا السؤال كأنه مطروح.. فتهيألي انو ما حدا جاوب بشكل صحيح و قال انو بيشتركوا ب most recent common ancestor ... بس شفتك بالصفحات التانية موضح الموضوع على التمام التمام.. بقى سوء تفاهم ما تواخزنا .. موضوعك جميل جدا و فيه كتير معلومات حلوة على فكرة انا من اشد المعجبين بدوكينز متلك على ما يبدو ... و بهنيك على الصبر يلي عندك... انا من زمان كان عندي صبر اقعد و ناقش العالم بس هلق لاء لانو بعد خمس سنين من النقاش لسا نفس الاسئلة بتنطرح و بيجي واحد بيقلك انو "نظرية الجينات" بتنفي التطور.. انا وقت قريت هالمداخلة الذكية وقفت قراية :p |
اقتباس:
يعني معقول وجد بالضغط والحرارة؟؟؟؟؟؟ وليش ما عاد طلع غيره؟؟؟ وبعدين الكائن هادا موته المنطقية الممكن حدوثها أسهل من ولادته اللا منطقية يعني المفروض يموت وينقرض بسرعة وليش ما عاد عدنا شفنا هلأ كا ئنات عم تنوجد من قبيل المصادفة؟؟؟؟؟؟؟؟؟؟؟ إيه معلم جاوبنا و:D |
عزيزي ويلي بس سؤال انتي عم تقرأ نحنا شو منحكي..
لك لسا ما عزبت حالك تعمل بحث صغير عغوغل.. ولا عزبت حالك تقرأ سطر.. كل اسئلتك مجاب عليها هون بهالموضوع.. وباالنسبي لسؤالك ليش ما عاد شفنا مخلوقات عم تظهر فجأة.. فنحنا قلنا سابقا انو الغلاف الجوي تغيير والارض نفسها تغيرت ونسب الغازات تغيرت..عدا انو هيك عملية بطيئة جدا..بتاخد ملايين السنين..فكيف بدك تلاحظ.. |
اهلين wile
عزيزي في كم شغلة لازم تعرفها بالأول - كون الحياة من مصدر واحد هذه فرضية و لا أحد يدعي انها الحقيقة لانها لم تبلغ مستوى النظرية بعد بحيث نستطيع تبنيها و قياس التجارب عليها. و لكن هناك "بعض" الأبحاث التي تشير إلى احتمالية نشوء الحياة من مواد كيميائية و بيوكيميائية أولية.. المشكلة في هذه الأبحاث انها قليلة العدد و لا تتلقى الدعم المالي الكافي.. لانها ليست مسألة حرجة نريد الاجابة عليها الان مثل حاجتنا لحلول للأمراض السرطانية مثلا. عليك وضع هذه الفكرة في البال دوما لان التقدم العلمي مرهون بكمية المال الذي تخصصه له. و أيضا مهم فهم الفرق بين الفرضية و النظرية و عدم التسرع بالدفاع او بالهجوم قبل فهم موقف الطرف الاخر.. - مع هذا, هذه الابحاث التي ذكرتها اعلاه تحقق بعض التقدمات بين حين و اخر.. و الكثير من الاسئلة التي كانت صعبة جدا او تبدو انها حواجز مستحيلة تم الاجابة عليها او على الاقل تقديم حلول ممكنة.. و لدينا الان بعض الافكار العامة هنا و هناك و لكن ما زلنا نفتقد لنظرية كاملة بهذا الخصوص. و لكن كل فترة تظهر ابحاث جديدة لتغطي بعض الثغرات - هناك عاملان اساسيا لا يجب تجاهلهما ابدا عند اي حديث عن التطور او نشوء الحياة من العدم: العامل الزمني, و العامل الذي سأطلق عليه اسم العامل الشخصي - العامل الزمني: عمر كوكب الارض اكثر من 4000 مليون سنة! بينما الانسان بدأ بالتحري على كيفية نشوء الحياة فقط من الخمسينات تقريبا من القرن الماضي على ما اظن و بشكل متقطع و بدعم مالي متواضع. يعني الحياة كان لديها حوالي البليون سنة لكي تظهر .. بينما انت تريدها ان تظهر الان و امام عينك؟ انا عندي اعتقاد ان هذه ممكن مع ذلك. و لكن سيأخذ بعض الوقت. و سيتبين لنا ان الموضوع قد يكون اسهل مما نعتقد.. و لكن قد لا يكون كذلك ابدا و ذلك بسبب العامل التاني - العامل الشخصي: يوجد حوالي بلايين و بلايين من الكواكب التي نراها حولنا.. و الذي لا نراه قد يكون اعظم. احتمالية وجود كواكب اخرى بظروف مشابهة لظروف كوكب الارض يعتقد انها عالية جدا و اعلى مما كنا نتصور .. لدرجة انه من الممكن ان يكون هناك كوكب بظروف مشابهة للارض يدور حول كل نجم نراه في الفضاء. هذا يعني الاف و الاف الكواكب في الفضاء التي قد تكون شبيهة بالارض.. بالتالي.. قد يكون عليها حياة. نحن الان هنا على كوكب الارض نتناقش حول الحياة و التطور و الانتخابات اللبنانية.. لماذا؟ لان كوكبنا من بين كل تلك الالاف من الكواكب المؤهلة حصلت عليه الصدفة ذات الاحتمال الضعيف و تطورت عليه اشكال الحياة بشكل تلقائي.. ثم ارتقت حسب الالية التي طرحها داروين (و التي اثبت الزمن انها الية متينة جدا و نظرية صحيحة). في حال لم تحصل على هذه الكوكب تلك العملية التي قد تكون صعبة و ذات احتمال ضئيل.. ما كنا لنكون هنا لنتناقش حولها... و لكن لربما كنا سنظهر على كوكب اخر... ثم نعتقد اننا الوحيدون في الفضاء يعني.. بسبب وجودنا, هذا يجعلنا نعتقد ان وجودنا حتمي و ان احتماله صعب جدا اذا اردنا ان نعتقد انه وليد الصدفة... و لكن اذا اخذنا بالحسبان الاف و الاف الكواكب الشهبية بكوكب الارض و التي قد لا يكون عليها حياة, سنلاحظ اننا نعتقد ان الموضوع "صعب" فقط من المنظور الشخصي... بينما من المنظور العالم للفضاء ككل... فبعض الكواكب سيكون عليها حياة... و بعضها لاء... و نحنا هنا على كوكب عليه حياة... لذلك نحنا هنا نفكر و نتناقش بالموضوع!! الفكرة هذه قد تكون صعبة و هذه اول مرة احاول شرحها بالعربية.. و لكن يمكنك القراءة عنها و هي اسمها ال Anthropic Principle و يوجد منها عدة نسخ و تنطبق على عدة قضايا.. هناك ال Strong Anthropic Principle و ال Weak Anthropic Principle ... انا شخصيا لا اتفق مع المبدأ القوي.. و لكن المبدأ الضعيف مقنع جدا و كافي لتفسير هكذا اسئلة و تقريبا كل العلماء يتفقون معه... بينما المبدأ القوي "بيزودها" شوي تحياتي |
اقتباس:
ما كنت عرفان انه تم التطرق لهادا الموضوع و الا ما كنت عزبت حالي... ويلي... ويلك لو ما تقرأ يلي كتبتلك اياه :x:p |
| الساعة بإيدك هلق يا سيدي 13:33 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون