|
اقتباس:
مو معقول بدها تنحط خطة لقسم ترفيهي متل المسابقات (لازم يكون عليه مشرف يسيّر أمورو بس هاد اللي صار.. عنا أزمة و مشرف عام غير متواجد و عنا أولويات ما فينا نفرّط فيها)... يعني واضح من اسمو شو هو... طيب مافي مسابقات غير لعبات العد؟ انو اللي بدي اوصلو انو شو الدافع تبع العضو اللي بعد ما شاف في عشرين موضوع عد للمدري شقد و كول تفاحة يجي يحط كمان واحد ع نفس النمط.. و لأ و كمان انو الناس تشارك.. أخي أبدع شوي.. يا زلمة حتى العناوين منقولة.. عالقليلة اخترع من عندك شو لازم يعمل اللي يوصل للخمسة.. و لا تفكر قصدي بس عن العد... قصدي عن التكرار الممل اللي يخلي شغلة حلوة تصير مملة من كتر ما تنعاد... انو النكتة بحد ذاتا يحكولك ياها مرة تفرط من الضحك... بس انو بعد 50 مرة راح تظل تضحك؟ |
اقتباس:
خلص الرسالة وصلت... المشرفين فاشلين سلامات |
اقتباس:
و حتى لو سكرتوها .... المشاركين فيها ما رح يتحولوا عالسودوكو و المسائل الحسابية يعني مثلاً ... لما نقيب الفنانين منع هيفا من الغناء بسوريا ..... الناس ما بطلت تسمعها و لا قلّت شعبيتها أنا نزلت هالموضوع بس لعبّر عن استغرابي ...... أنو كيف هيك نوع مواضيع .... بتجذب هالعدد الكبير من الأعضاء بينما في اشيا كتير أرقى و كتير متعوب عليها بأخوية ما قدرت تجذبون |
اقتباس:
الحل من الاعضاء ما ظنت ان هاد حل لان نذكرت جزئيه بتخص عمر الاعضاء وهاد حكي صحيح حتى الواعي والمثقف والجامعي الو الحق في بعض الاحيان لفترة من الفترات ان يفوت ع هل مواضيع ويتسلى ولا تنسى كمان ان عدد الاعضاء كبير يعني اذا كل واحد فات حط مشاركه واحده اندفش عدد المشاركات باليوم الواحد 300 - 400 مشاركه اذا ما اكتر فا الاعتماد ع وعي الاعضاء مش كافي ابدا لازم حل من والي الامر الي بيمثل فيكم الاداره ككل واذا ادخل المدير مو معناتها الاعضاء قطيع ولازم ينساق بالعكس تدخلو وئت الحاجه ضروره ملحه و محببه مشان الصالح العام ومشان ان اخويه عم تقدملنا مكتبه من ارقى المكتبات ع النت هاد شي اكيد بس لا تنسى ان الاعضاء هم الي انشئو هل المكتبه بكل فخر بدون منيه :D |
اقتباس:
أخي تعليقي على انو العضو بدو يتسلى.. يا حياتي كلنا بدنا نتسلى... متل ما قلت قبل.. شو الحياة من غير تسالي.. القصد انو يا أخي كلو نفس بعضو ما بتمل؟ كان ابن جيراننا القصاب كل يوم يتغدى كباب بمحل أبوه... ولاد الصف كانو يحسدوه بس هو كان كرهان كل شي اسمو لحمة.... انو كل يوم كباب كباب كباب.. أخي غيّر.. نوّع.. بدّل... وصلت؟ |
اقتباس:
كلام رائع ياسين ..... والله العظيم كلام رائع ولا غبار عليه ابل شوي كنت عم اتناقش مع صديق عن موضوع بدي نزلو يكون نمط جديد وطرح جديد ويجذب اكبرعدد من المشاركات الفاعله الي يستفاد منها الكل ... بس ما قدرنا نصل لصيغه ترضينا فا اجلت الموضوع بس برجع بطرح نفس التساؤل شو الحل؟؟؟؟ ياريت تسائلات سامر تثمر بحل يفيد المنتدى عم اولها من كل البي :D |
اقتباس:
ماني عم افتح احقاد دفينة ولا شي انا ماني من النوع اللي بيحقد على هيك قصص انتي كنت عم تقول انو المشرف تبع القسم ما بيقدر يعمل شي لانو مهمتو بس انو يرستق ويشكلس امور القسم وانا عم قلك لاء في مجال انو يوجهو باتجاه مفيد لكل الاقسام ومسلي بالنسبة للمسابقات بنفس الوقت وعطيتك مثال وماني عم قول المشرفين فاشلين بس مو معقول تشيل المسؤولية عن المشرفين وتشلفها بشكل كامل عالاعضاء لانو المشرفين اعضاء كمان قبل ما يكونو مشرفين يعني انا مو بس مشرف على قسم المسابقات او المنبر او شو ما كان انا عضو بهالقسم كمان وانا بساهم متل اي عضو بانو هالقسم يصير يشد عالم لما بدي كون بموقع قائد لفريق او لجيش او لمنظمة وحس انو جماعتي بلشو يخربطو ويخبصو واوقف انا لومهن وقول انا ما دخلني انا ما شغلتي انو زبط طريقهن انا شغلتي انو اذا حدا عندو سؤال جاوبو علي واذا حدا عندو استفسار وضحلو يا ومهمتي بتنتهي هون ما دخلني هني باي طريق بدهن يمشو بكون قائد ما بستاهل منصبي القيادي اقتباس:
اب سمرة لما بتقول لهالمشاركين انو في عندكن موضوع واحد من مواضيع العد بيحقلكن تشاركو في وبس ما رح ينزل مواضيع جديدة من هالنمرة وقتها العالم ممكن تتوجه لاشياء ممكن تكون ممتعة الها باخوية ما كانو شايفينها من قبل غير قسم المسابقات لاعطيك مثال انا لما بفوت على اخوية بفوت على قسم المسابقات بشوف عشر مواضيع من هالنوع هادا بفوت بحط رد على واحد تنين تلاتة اربعة بيجي واحد تاني بيحط رد على الموضوع رقم واحد برجع انا عالرقم واحد بحط رد بيكون واحد تاني حط رد على موضوع رقم تلاتة بروح انا بلحقو وبرد وهيك خلال عشر مواضيع انا راح نهاري يكلو ضمن المسابقات بدون ما اقدر شوف شي تاني لانو في عشر مواضيع شغالة بنفس الوقت وقت بيكون في موضوع واحد بحط رد وبدال ما اقعد انطر خمس دقايق لبين ما حدا تاني يحط رد بكون انا طلعت شفت مجموعة صور شاركت بموضوع تاني برجع بحط رد بتبع المسابقات برجع بروح بسمع غناي |
عالقليلة يجوز اللي يقرا هالموضوع.. يجوز ها... يفكر بينو و بين نفسو انو و الله مزبوط مواضيع العد كترانة و مالا داعي كتير (كمثال مواضيع العد طبعا) خلينا ننوع و نعمل شي جديد...
هو يجوز كمان انو ما نستفاد شي... بس انو ما بعتقد انو الحذف مفيد و مجدي.. و ما رح نلجئ للمنع الا لما يستفحل كتير الأمر و شفنا انو مافي خيار تاني و كتوضيح كمان... ماني ضد انو قسم المسابقات كقسم ترفيهي يكون هو الأكثر حركة ... بالعكس هاد أمر طبيعي .. بكل كليات جامعات الدنيي أكتر مكان فيو عالم هيي الكافتريا .. اللي بدي أوصلو هو انو حتى تسالينا يكون الها طابع خاص made in akhawia و ليس نفس التكرار المبتذل تبع كل منتديات الدنيي |
اقتباس:
بس لما بتصير الحياة كلا تسلية ..... أكيدر رح تفقد قيمتا اقتباس:
يعني يا ريت هالـعدد من الأعضاء يشاركوا بالمواضيع التانية متل ما بشاركوا بالعد اقتباس:
ما اقتنعت بهالحكي .. الوعي لازم يكون موجود بعدين بتجي وظيفة المنتدى بأنو يأمّنلك المادة المناسبة يللي بتطوّر و بتنمّي هالوعي اقتباس:
بس عدد قليل من الاعضاء ..... بس أعضاء نشيطين و مميزين عالهامش .... مكتبة أخوية قديمة مانا وليدة مبارح و الفضل الاكبر بغناها بعود لفارس و مرسيل |
شكرا ع جهودكم
|
اقتباس:
اقتباس:
و كمان ماني شايل المسؤولية عن المشرف.. اللي عم قولو انو المشرف مانو موجود.. و هلأ في منسق.. مزبوط . منسق لبّسناه المسابقات تلبيس و عندو كذا قسم غيرو و عدا هيك فوتاتو قليلة.. اللي ما رح اعملو هو انو بشيل المسؤولية من الأعضاء... لأنو ما فيك تبرر تعدايتك الاشارة الضوئية و هيي حمرا بانو مافي شرطي عالزاوية يراقب.. أساسا بالدول اللي تحترم حالها مو شغلة الشرطي يتفرج مين يحترم الاشارة و مين لأ.... مافي مشرف هاد خطأ... لكن الخطأ لا يبرر الخطأ.. و كون مافي مشرف لا يعني انو نعمل مواضيع مكررة لشبعانة و نفس النمط الممل.. و مو حل يجي المشرف يحذف و يسكر و خلص... لأنو ما وصلنا غير لأنو كبتناه و سكّتناه... الغاية هيي انو يتعلم يتسلى بشي ابداعي مفيد... و ازا الشباب عم يحكو انو أعمار معينة و هيك... فأحسن و احسن.. بهالعمر ضروري تتعلم تتسلى بشكل مفيد و ممتع بدل ما تقعد تعد... يعني احسبوها ككبار.. ما تنصح الأصغر منك؟ و بس |
شباب أنا شايف كل وجهات النظر توضحت... وتحول الموضوع عن مسارو يلي كان بدو ياه كاتبو...
بالنهاية المشكل أكبر من الأعضاء و من المشرفين و من كل الأسباب.. المشكل هو مشكل تفكير في ناس بتلاقي حالها بالمواضيع الجدية و في ناس مابتلاقي حالها بهالمواضيع لأسباب قد تكون تتعلق بالعمر أو بالثقافة أو بالتفكير أو بالظرف المحيط... فإذاً مافي حل يعني ما ممكن تجيب شباب مواضيع التسلية تجبرهن يلعبو سوديكو أو شطرنج لأنو من الأساس هنن مو فايتين لهون يفكرو و يعبوا وقتهن بشكل مفيد و هاد بالنهاية حقهن يلي مافينيا نحرمن منو.... و المشكلة الحقيقة تكمن بالنسبة نسبة هالشباب أكبر من نسبة الشباب يلي فايتين يعبو وقتهن بشي مفيد و الحقيقة هاد يلي زاعجني شخصياً... يعني ببساطه بمجرد الضغط على جديد المواضيع فيك تعرف نسب ماهي المواضيع الأكثر طلباً في أخوية... و بالحقيقة أنا بقول هيك أحسن خليهن بمواضيعهن و مايدخلو بمواضيع تانيه أحسن لأنو بصراحه شفت حالات مأساوية لما يقرر واحد منهن يدخل بموضوع كبير شوي ( بيفوت الدنيا بالحيطان نتيجة جهلو بشو عم يكتب وعدم وجود خلفية فكرية عن الموضوع)... الخلاصة: مارج نقدر نعمل شي فطلبنا الوحيد عيشوا و خلونا نعيش.. يعني ياريت تلعبوا قد مابدكن بس ما تكتسحوا الأخوية بمواضيع الدرجة العاشرة.. يعني اكتفوا بعدد محدد من هالمواضيع مشان مايكون الانطباع العام عن اخوية انها موقع "تسالي"... بعتقد الموضوع حاجتو لهون وإلا تحول لموضوع من مواضيع العد. وعذراً على الإطالة. |
اقتباس:
|
اقتباس:
لاحظ عم قول انو شخص يعد بقصد بهالشي الشخص اللي يتسلى بطريقة خلينا نقول غير مثمرة أو غير ابداعية أو غير مجددة... ما عم قول انو شخص يتسلى.. بعتقد التسالي هامة كتير و ضرورية كمان |
اقتباس:
عطينا حل |
اقتباس:
من فترة صار تسليط ضوء على مشكلة النكش الفارغ للمواضيع القديمة.. و عن طريق "التوعية" (مو مصطلح دقيق بس شي مشابه يعني) صارو الأعضاء ما ينكشو.. و حتى اللي ينكش بيشوف ما حدا يرد وراه أو ما حدا يستحسن النكش انما يستهجنو.. و انخفض معدل النكش بدون مبالغة بـ 70-80 %... هون لازم يصير نفس الشي.. انو يصيرو الناس من حالهون يستهجنو هالنوع من المواضيع |
فاصل اعلاني :
التاريخ 29/09/2007 يعني فيكم تقولوا سنة الا كام شحطة .. اقتباس:
|
اقتباس:
|
اقتباس:
من فترة أنا عملت لعبة عن المصطلحات الأجنبية أنا كنت ملاقيها حلوة كتير بس للأسف ما كان تفاعل الأعضاء معها متل ماني متوقع بالعكس الموضوع ما تجاوز كم مشترك تفاعلوا مع انو اللعبة مابدها غير شوية تفكير و شوية بحث بمواقع الانترنت و كتير مفيدة.. برجع بقلك المشكل مشكلة طريقة تفكير ومشكلة مخزون فكري و ثقافي. |
اقتباس:
|
اقتباس:
|
اقتباس:
بدها حركشة و شغل... بس مافي شي ما بيصير.. المهم الناس بدها تتعاون... هاد أهم شي .. لأنو بدون تعاون من الشعب و الله لو بنجيب أحسن مشرف بالكون ما رح يمشي الحال |
اقتباس:
هاد الحكي ممتاز و أنا معك فيه 100%... بس بهي الطريقة منكون حولنا أخوية لمنتدى نخبوي "بمعنى نخبوي من حيث مستوى النقاشات و المواضيع" بس للأسف بدنا نخسر كتير أعضاء من جماعة سنوات الضياع يا ترى هل هالشي مناسب لأخوية؟ |
اقتباس:
أنا سعادتي تكون لما بسمع من شخص انو مفاهيمو أو أفكارو تطورت و تقدمت بأخوية.. و هالشي ما بيتحقق بمنتدى نخبوي.. |
من جماعة سنوات الضياع
مساء الخير... شو فين جماعة سنوات الضياع؟ ليكون مو عاجبينك؟ أنت نظرتك لهالشي تختلف عن نظرتي، ومو بالضرورة تقييمك لهالشي صحيح لأن الحياة ومفاهيما نسبية وما ضل فيها شي مطلق. |
اقتباس:
يعني بفهم منك أنت مُعجب بـِ " لميس " إلا بالمسلسل :lol: |
اقتباس:
|
اقتباس:
|
القصّة مو قصّة لميس أو رفيف... القضيّة أنا بشوفا أكبر من هيك بكتير.
بس المشكلة لما يكون في عالم تفكر أنو منظارها هو الصح!!!!! |
اقتباس:
|
اقتباس:
|
القصة موضة
هلأ طاحشة هي المواضيع وفي ناس تدايقت قبل بفترة كانت طاحشة مواضيع الملطوشات وفي ناس تدايقت ولما بيطحش شي معين حتى بالمنبر في ناس ممكن تدايق يعني القصة متل موضة وبتخف أنا مع أنو في مواضيع متشابهة . وفي منها كتير سخيف . بس اذا بدنا نلغيها . مالازم نترك المنتدى بدون نافذة تواصل بين الأعضاء متل ماممكن الشباب يتدايئو من بعض وحتى يكرهو بعض لتنافر أفكارون بالمواضيع الجدية . ممكن تكون هيك مواضيع نافذة للتواصل والمصالحة بين الأعضاء |
اقتباس:
|
اقتباس:
أفكارنا يجبُ أنْ نبتلعها أو ننفذها بـِ شَـكل ٍ صحيح ! سؤال مَنْ يأتي أولاً الدجاجة أم البيضة ؟ :lol: |
واضح جداً بحكيك... بس لما تقول :أنو لأسف بدنا نخسر كتير من جماعة سنوات الضياع، هون صفّا تقييم وحكم.
وبحب قلّك أنو أنا من جماعة سنوات الضياع من هيك لما جبت سيرتي رديت عليك مباشرةً. الموضوع مو هاممني لأنو بصراحة بشارك هون وهون، فإذا ضلوا المواضيع فهالشي يتعلق بالمشرفين، وإذا انحذفوا فهالشي رح يتعلق بالأعضاء!!! ولو كنت بفضل متل ما تفضل المشرف الإداري أنو القضية تتعلق بالعضو بدرجة رئيسية. عكل حال موفقين بالنقاش وبتمنى توصلوا لحل... بس الإنسان لازم يعرف أنو مو كل شي عندو هو الصحّ، لأن الشغلة مو مرتبطة بصح وغلط، مرتبطة بإنسان وظروف وثقافة وبيئة... إلخ. |
اقتباس:
اقتباس:
|
أفكارنا يجبُ أنْ نبتلعها أو ننفذها بـِ شَـكل ٍ صحيح !
سؤال مَنْ يأتي أولاً الدجاجة أم البيضة ؟ عزيزي أبو النور شو قصدك من الجملة الأولى؟ قولا بالمقشر لو سمحت!!! أنا تعبان وما لي خلاق ناقش ولا أكتب، بس لما نزل اسم سنوات الضياع هون صرت معني بالموضوع. وما عاد بدي نام... انهز بدني! وبعدين شي أكيد أنو الدجاجة قبل البيضة بس لا تسألني عالجواب هون كرمال السر ورح قللك ياها بوكرا بيناتنا، اتفقنا؟ |
اقتباس:
أنا بعرفك تعبان مشان هيك حابب أتغالظ عليك :lol: يلا بُكرا :D |
اقتباس:
|
اقتباس:
|
| الساعة بإيدك هلق يا سيدي 04:43 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون