|
عطر البرتقال: افرضي.. انو في بنت وحسب قولتك "غلطت" وسلمت جسدها (واسمحيلي ما بقدر قول سلمت شرفها) لشب بتحبو وعن قناعة ذاتية انو الجنس جزء لا يتجزء من حياتها العاطفية... واهلها بيشوفو هشي طبعا غلط...
كيف ممكن انهن يصلحو هاد الغلط برأيك؟؟؟ بانهن يقتلوها مثلا!!! انا ما بدي اتناقش بشو هيي الحالات يلي فيها البنت بتفقد شرفها... لانو قلت انو "الشرف" هوي مفهوم بيختلف من انسان لآخر... بس الشي المهم يلي بدي ناقشو هوي الجريمة... شو مبرر هاي الجريمة... وهل في الها اي مبرر؟؟؟ معقولة نضل ساكتين والنساء عم تنقتل لاتفة الاسباب... ويلي في بعض ناس ممكن يشوفو البنلون بيمس بشرفهن ويقتلو البنت مشان لبستو... القصة قصة مبدأ يا جماعة... انتو بتوافقو ولا بتعارضو؟؟؟ شفتو قانون العقوبات... حسب رايكو منصف؟؟؟ معقولة يعني؟؟؟ |
اقتباس:
أكتر شي فيكي تعملي عملتي لما فتحت هالموضوع.. وسجلتي موقفك.. وغيرك سجل.. والحوار بهالموضوع شي جميل.. لأنو الحوار دائما شيء جميل وحضاري.. ولكن مابحل القصة.. غير تعديل القانون بالبرلمان..:D تحياتي:D قال برناردشو"عندما يقوم رجل غبي بفعل مُخجل، يدّعي بأنه واجبه |
نزلتو بمشاركتي يا مروى :D
اقتباس:
اقتباس:
|
اقتباس:
وتغيير القانون في البرلمان... مرتبط بالشريحة المثقفة فينا... يلي ابداً ما بترضى بهيك وضع مهين لئلنا كلياتنا... واقل شي فينا نعملو هوي انو نرفع الوعي بمحيطنا... لحتى دائرة المعارضة لهيك جرائم تتوسع ولحتى يصير الكل يطالب بتغيير القانون... وفينا بس ممكن تبلش الطريق نحو التغيير... |
اقتباس:
|
اقتباس:
|
اقتباس:
|
اقتباس:
|
شغلة اثارت انتباهي بديننا الحنيف انه الزوج لو شاف مرتبو عم تزني قدامو ... بدو يلف وشو حوالين راسو مية مرة.. يروح يجيب اربع شهود ليشهدو معه ع الزنا حتى يقام الحد .. يلي هو الرجم حتى الموت للزاني او الزانية المتزوجة انا بعرف الموضوع مالو علاقة بالاسلام.. بس انا استشهدت بهالحكي مشان ورجيكم انه انا بالنسبة الي الله هو الاعدل وحكمو هو افضل شي للبشر .. امرنا نتروى عند هيك حادثة -ماراح احكي عن البنت يلي نامت مع حبيبها برضاها لانه مابتستاهل احكي عنها - هلا لما المجتمع والاهل كونو بدن يقتلو البنت الفاقدة بكارتها بالاغتصاب.. معناها اول شي رح تحسو البنت يلي تعرضت للاغتصاب هو الحقد حقد ع الرجال.. حقد ع المجتمع.. حقد ع القوانين ليش هي تنطخ لتغسل العار والشب يضل حر طليق بقلك المجتمع برضو ماعطا للشب فرصة للتفكير لانو الكل رايح يحكي بهالموضوع بطريقه استفزازية ومحدا رايح يرحم الاهل يلي بنتهم تعرضت لهالحدث الاليم انا بحط الحق ع المجتمع اولا.. انو المجتمع يلي بدو يحط هيك قانون تعسفي يسمح لللاب او الاخ او العم بقتل البنت بحادثة الشرف بدو اول شي مايكون فيه نوادي ليلية مثلا..او يسمح باي شي بادي للاختلاط... مثلا بعدين هلا صارت كزا حادثة .. ازا الاب شاف بنتو قاعدة مع شب بس بروح بطخها وبقول الشرف الشرف بعدين برايي هي جريمة اخرى لازم يلي بطخ بنته مشان العار ينطخ برضو لانو مو هو المخول ليطبق القانون وكمان الغضب عما ع بصيرتو فوق ما البنت تعرضت لهالوحشية هي برضو تموت ومحدا يترحم عليها برايي هالقانون كتير صعب والله يبعد ولاد الحرام وبنات الحرام عنا يارب بس انا ضد القتل لغسل العار شكرا مروى |
اقتباس:
شكراً :D |
القتل هو القتل مهما كانت الأسباب
وإذا كان متل ما قال البعض أنو نحن شعب عاطفي ومعروفيني بعصبيتنا فهاد أبداً مو مبرر لهالجرائم بكل بساطة لما الواحد بيعرف أنو اذا قتل أختو مشان الاستشراف (كلمة شرف مو زابطة) ومارح يتعاقب عقاب قاسي فبيقتلها وبيصير حامي شرف الوطن اما لما بيعرف أنو في عقاب صارم وقاسي بانتظارو لأنها جريمة قتل بالنهاية فهون رح يعد للمية قبل ما يقتل ويستشرف علينا |
كل من يقتل هو مجرم .. باستثناء حالة " الدفاع عن النفس " ..
بس يعني خطر على بالي سؤال .. ليش في مجتمعنا ما بحاسبوا الشباب على اخطائهم ..!!! |
اقتباس:
فطبيعي أخطائها تكون أعظم |
اقتباس:
|
اقتباس:
طبعا انا ضد الجريمة هاي....وياما بنات راحو ضحايا وفوق هاد يطلع بالاخير ظلم وما تكون عاملة شي اكيد هالقضية لازم حد يوقف الها....مش بس الجريمة هاي كمان شغلة انو البنت تتخللى عن شرفها بدافع الحب لازم نعالجها كمان....يعني اي بنت المفروض انها ما تتخلى عن شرفها...واتوقع انك توافقيني بهيك شي انا ارفض بشدة جريمة قتل النساء بدافع الشرف وضدها بدرجة كبيرة....ويا ريت فينا نعمل شي وكمان ارفض بشدة انه البنت تكون سهلة وترخص حالها وتسلم شرفها لشخص غير زوجها وبالنسبة لقانون العقوبات مش منصف....عنا بالاردن كتير بنات ينقتلو كل يوم وبالاردن اكتر نسبة فيها هاي الجريمة خالي ضابط بالشرطة وكان يحكيلنا شو كان يشوف.....الي يلاقو جثتها بكيس...ولي يلاقو راسها مع ابوها....واكتر شي خلاني اتضايق...انه بنت دهسها اخوها بشاحنة....دهسها اكتر من مرة...وتوقعو شو صار بجسمها وبالاخير طلعت بريئة.....بعد ما ماتت.....طبعا العقوبة تكون مخففة على الشب لانو شغلة شرف. هاد الشي حرام ولازم نعمل شي غير الحكي مرة تانية اشكر على هالموضوع المهم وتقبلي احترامي اختك عطر البرتقال :D |
اقتباس:
صحيح أنها عم تبدا بدائرة صغيرة ...اسرة ، اصدقاء ...منتدى لكن مع الأيام بتتوسع هالدائرة هلا ممكن من خلال العمل المنظم انشاء منظمات غير حكومية معنية بتأمين لجوء إنساني عاجل للحالات اللي بتدخل ضمن هذا المجال وفيها خطورة على من تتعرض حياتها للتهديد بالقتل من أي شخص كان بحجة الشرف لإنقاذ حياة كل إمرأة مهددة بهالشي :D |
اقتباس:
|
اقتباس:
ليك يا كابي رحلة الألف ميل تبدأ بخطوة أنا ما عم قول أنو بمجرد ما نحن حكينا فرح نغير أكيد هالتغيير اللي عم نطلبو بيحتاج لوقت ووقت كتير ومتل ما قلت بتبدا بمجموعات صغيرة وبعدها بتتوسع دائرة الناس المهتمين والواعيين لهالقضية بالنسبة لدرجة تقبل المجتمع لهالفكرة فبعتقد أنها موجودة بشكل أفضل من قبل على سبيل المثال ...من قبل كان عيب وعار على البنت تروح للجامعة وتدرس ...بس العائلات الغنية أو الارستقراطية كانوا يهتموا بتعليم بناتهن وهلا بأيامنا طلع لوين وصلت المرأة بالتعليم رغم كل الضغوط اللي بتتعرضلها ومن كافة الطبقات الأجتماعية. وبعتقد نفس الشي لهالقضية .... وبرأيي نحكي ونوعي الحوالينا أفضل من أننا نقعد بس ننتظر المجتمع ليتغير لأن لوما كان المجتمع بحاجة لتغيير وتوعية ,,, لما كان في داعي لكل شي عم نحكيه هلا وعلى قولة كونفوشيوس أن تضيئ شمعة خير من أن تلعن الظلام :D |
اقتباس:
|
يمكن معكم حق بس على مثال ساندرا تبع الجامعة كان في طبقة او مجموعة راقية بتشجع الفكرة وكان بقية الشعب الفكرة غير مستحبة بالنسبة الهم .
لكن الانسان الفقير كان ينظر للانسان الغني على انه راقي وان الجامعة شي من الرقي وبالتالي الدراسة ممكن انها تدخل او بالأحرى دخلت بالمفهوم الاجتماعي لأن كان في طبقة راقية بنظر الجميع بتمارس هاد التصرف . لكن بقصة الشرق بشوفوا انه التخلي عن القتل بهي الحالات بكونوا عبصيروا متل الغرب الفاسق وهنن ما بيرضوا على حالهم يتشبهوا بالفاسقين بعكس الانسان الفقير سابقا اللي كان بيحلم انه يتشبه بالغني سواء بالشكل او باللبس او حتى باسلوب الحياة . انا كلّي امل تموت هي الفكرة لكن لمجتمع حيضل متشبث فيها لان بيعتقد هويته مرتبطة فيه وتميزه عن الفسق والغرب مرتبط بهي العادات اللي ما ممكن يتخلى عنها . |
وهون بيتوقف دورنا بالتوعية وبتيجي مسؤولية الدولة والقانون.... لمل بينوضع عقوبات قلسية ومشددة بالذات على هيك جرائم.... ولما بيبطل في تساهل بهيك حالات... العالم بتصير تفكر قبل ما يرتكبو هيك جرائم... وبالتالي نسبتها تدريجيا بتقل... وهيك منكون عم نسعى لتحقيق مجتمع افضل وارقى... وبس هيك مجتمعنا فيو يتغير...بس بتعرف كتير مرات بقعد بفكر انو الشرطة والدولة اصلاً في خدمة من؟؟؟!!!
|
اقتباس:
مشكلتنا ما بس مع هي النقطة بالذات مانها مع جرائم الشرف فقط مشكلتنا في كتير اشياء تابعة متتالية بنفس الفكرة وحلقها بيطلع من فكرة ( لو بصير العالم بفكرو ) يعني لو بتصير العالم بتفكربتنحل قصة جرائم الشرف وبينحل معها شي 100 مشكلة بالعبطة . بالنسبة الي التوعية اهم بكتير من فرض الجزاءات والعقوبات . :D |
اقنعتني.... وانا كمان بالنسبة الي التوعية اهم بكتير... وبفكر انو بوجود امثالك بيضل عنا امل بالتغيير... بس بالنسبة للجملة يلي انت ملونها متل ما قلتلك اقنعتني... لانو احنا شعب ما بيحب يفكر... بس بيصيرو يخافو اكتر من العقاب... لانو بيصير العقاب كتير مشدد... اليوم الشب بيعرف انو اذا قتل اختو اذا ما بطلع براءة بياكل فيها 3 اشهر حبس.... بس اذا بتشدد العقوبة وبيصير ياكل فيها 30 سنة حبس بيخاف وبيفكر شو قبل ما يقتلها...وساعتها النسبة بتقل وبالتالي وكمان تدريجيا التأييد الها بيقل... ولهيك انا بشوف انو دور الدولة كتير مهم... عدا عن انو القانون والدولة هني السلطة العليا وموقفهن ازاء هيك قضايا الو تأثير ع المجتمع اكتر بكتير من موقفي وموقفك...
|
انا سوري .. ما كنت مع الموضوع من الاول .. قريت اغلب الموضوع .. بس عندي نقطة صغيرة بدي علق عليها ..
بعيدا عن انو رايي .. بكون اكيد ضد وضد هيك فكرة .. تخلفية لانو .. كتير بفوت بنقاشات مع عالم مختلفة بهيك امور .. لاعطي مثال صغير .. صار من فترة .. 4 شهور صار المثال .. بالبلد اللي عايش فيا .. انحط بالجريدة تبع الجامعة عنا .. وانو .. في اخ مغرق اختو بالبحر كرمال شو ؟! قال زوجا شاكك فيها .. انو كانت بتحكي مع غيرو ! صراحة .. يوما قاعدين شلة وهيك وقعدنا نحكي .. اللي استغربتو انو .. نسبة كتير كبيرة من الشباب كانت مع .. وبشدة .. يعني صار يصرخ ويعيط ويقلي لا .. هادا شرفي وهاد مدري شو .. انو شرفك وين .. بعدين يا ابن الحلال .. شرفك بيضل صافي لو قتلتا لاختك ؟ !! ما وصلنا لنقطة اتفاق .. لانو عامي قلبو تمام .. عن انو .. يقدر يتناقش ويفهم .. اقتباس:
قبل ما نشدد القانون مروة .. لازم يكون القانون مو مع هي العقوبات !! .. وقت بيكون القانون اللي عندك بيسمحلك انك تقتل .. وبهمجية .. وبلحظة بتكون فيا .. معصب .. او شي .. بيكون الحق اولا على القانون برايي .. وقت بكون في شي بيردع .. ممكن العالم تبلش تفكر اول .. تصير تحاول انو تشغل مخا قبل ما تشغل الروح الهمجية اللي مخبيا جوا .. وقت بتجي .. متل هاد المثال اللي حكيتو القانون ما عاقبو ولا يوم .. ليش .!!!! قال لانو هي اسما . دفاع عن الشرف .. ووبوقتا ما بكون .. الزلمة عقلان وبكون معصب .. لازم نصلح القوانين فوق .. بس لحتى .. نقدر نوقف شوي .. التفكير الهمجي .. لبين ما يرجعلو التفكير العقلانيي للبني ادم .. يسلمون مروة عالموضوع .. وكتير للاسف قد ما منحكي .. طول ما في هيك قانون .. بدو يكون في هيك .. جرائم :D |
والله يا يمون جرائم الشرف متفشيه بالمجتمع الاردني كتير كتيييير مع الاسف ....
يا اخي ما عم اقدر افهم لهلا ... شو هوي مفهوم الشرف عندون !!!!!!!!!!!!!! |
اقتباس:
هلا ما بعرف .. شو الوضع بس اللي عم بقراه بجريدة الجامعة شي ببكي والله شي ببكي .. وقت بتحكي مع العالم بالجامعة .. بتشوفي انو الشب .. بيمشي باليوم مع 100 بنت ... بروح بياخدا .. وبروح على كزينوهات ولا عشو ما كان هوة عادي ... ما عندو مشكلة .. ! ما بيعتبر من ضمن نطاق دائرة الشرف اللي محددها .. صراحة المرة الماضية وقت حكينا .. ما عاد فضلت احكي .. لانو وقت بتحكي وبكون الكل ضدك صعب انك تحكي .. !! |
صعب انك تحكي بس لازم تحكي ... اذا نحنا ما حكينا هدول العالم بتاكل الدنيا :cry:
كان عندي احصائيه عن الاردن وجرائم الشرف انا اشتغلت عليها بشغلي ,,, ع وجهكون ما عاد لقيتها:lol: |
اقتباس:
|
بتعرفو شو مشكلتنا
مشكلتنا انو ما منشوف من المراة غير شي واحد---------------- وبعدين شو ما كانت مثقفة ومحترمة ودارسة هادا ولاشي انا ماعم ادعي انو العلاقة حلال بس في ناس بتغلط ونحنا منشنقا على هالغلطة |
طيب سؤال شو هوي شرف البنت
او شو الشي اللي بيحدد شرف البنت لحتى نعرف شو هيي جريمة الشرف يعني معقول انو بنت تنام مع شب نقتلها طيب اذا بالاسلام قلك انو عقاب الزاني و الزانية مية جلدة يعني ما وصل للموت بأي حق منقتل او بيقتلو |
اقتباس:
|
اقتباس:
|
اقتباس:
|
اقتباس:
اي يعني صاححلي مثال حي عن التخلف بزاتو.. ولسى بدك ياني ما اضحك:o بعدين بركي انا نظري اعوج وبشوف المواضيع من قرنة تانية:D |
أول شي بدكن تعذروني لأني منرفزي ومعصبي:x من وقت ما رد هادا يلي اسمو "جان علاء" ال****
بلا مأحكي... يعني هيك نوعيات بترفعلي ضغطي...:frown: اقتباس:
أنا بس بدي اعرف كيف واحد بيعطي لحالو حق ياخد حياة شخص تاني...فكيف إذا كانت اختو .... من هال****** يلي عطاه هالحق.... أنا حرة بحياتي وعقلي براسي .... وبفهم أكتر من يلي عامل حالو فهمان وأخلاقي أكيد أعلى من كل المجريمين هيدول وبعرف مصلحتي أكتر من كل الدني:?.. وشرفي بحافظ عليه حسب معاييري أنا.. مو حسب معايير زبالة المجتمع... أنا مو كتير متأثرة بهالوضع المتخلف هاد... أنا بمنطقتي صارت جريمة وحدي من هالنوع من ستين سنة.. وماصار غيرها لهلأ...... ومارح يصير... و ميشان سؤال gabriel ل ساندرا اقتباس:
ياما أعدين وحاكيين بهيك مواضيع... (نحنا رفقات دراسي وشلتنا أنا بعتبرها كتير واعية....) وفي شباب متحريين وواعيين أكتر من ما بتتخيل.. بحيث أنو فكرة كف... واحد ضرب اختو كف... هيي شغلي كبيري.. هيدا شخص بيحتقروه:sly:... فكيف ضرب همجي وقتل...:cry: وهني يلي حكولي عن موقع نساء سورية...والشغلات يلي متصير عنّا:frown:... القوانين يلي عنا:jakoush:... بس الحسرة.. أنو أكترية الشعب متخلف واعمى |
شكراً لكم يا ابناء وطني على هذه الردود الجميلة، ما اجمل آرائكم العقلانيّة الرافضة للقتل أيّ كان نوعه.
إذا كان شرفك هو قتل الأخت وسلب حقّها أن تحيا ونسيان الاخوّة وعظمتها، لا بل نسيان السنين الطويلة التي خدمتك فيها وأذللتها لتبني أنت مملكتك الذكوريّة؛ إذا شرفك مرتبطٌ بغشاء؛ فالبهيمة واللهِ أشرف منك. صدقوني لن نرقى ولن نرى النور إلا إن تخلصنا من هذه الرواسب البالية في حياتنا. كلما سمعت بجريمة "شرف" أتخيّل الفتاة كيف تنظر إلى عيني اخاها وهو يغمس السيف في صدرها، هل سيرى هكذا انسان وجه الله؟ أنا اضع الحق على الحكومة، فإذا انزلت أشد العقوبات بالمجرم الأول والثاني والثالث والعاشر فلن يتجرأ أحد بعد على قتل اخته او زوجته او ابنته بهذه الطريقة البشعة... وإذا لم تغير الحكومة قانونها فانا اطالبها بالتالي: - بما ان الحكومة لا تعاقب القاتل في جريمة "الشرف" فهذا يعني انها تحلل قتل الفتاة التي تمارس الجنس بطريقة غير شرعية، إذاً عليها إنزال أقصى العقوبات بكل طبيب يقوم بترقيع غشاء البكارة! لان ذلك يعدّ التفافاً على المواد 192 و 242 و 548 وحرماناً للقتلة المدللون من ما حللته لهم حكومتنا المصونة!!!!!:jakoush:8-) وبمساعدة مخابراتها الفذّة سيتمكنون من القبض على كل الأطباء المتمردون على القانون! اوك انا محشش اليوم بس بجد في شي غلط--- يعني عم تقولو انو الشرائع الدينية ما حللت جريمة "الشرف" وبنفس الوقت حكومتنا عم تعتبر نفسها "علمانية"! ومع هيك حطت هيك قانون ومادام الحالة رح تضل تعبانة فخلي يحمو هالقانون عالقليلة :larg: بعيداً عن المزاح ودعونا من الشرائع التي خبطها الإنسان "بالف حيط"! فانا واثق بأن كلّ فتاة كان الحبّ سبب موتها قد وجدت مكانها بين يديّ الله المحبّ بلا حدود وتنغم الآن برحمته وحنانه الحقيقيّ الذي يعلو أي حنانٍ أخويِ كاذب! ناهيكم عن اللواتي قتلن لمجرّد الشكّ او لمجرّد الحب العذري!!!!!:cry: |
لك هاي اختي من لحمي ودمي ربينا سوا شفنا الحلوي والمرة ائتلامعؤلي مين عندو عئل بيعمل هيك جريمي بتئرف ما بتمت للشرف بشي ومين مفكر حالو يلي بيحئلوا ياخد روح غيرو:aah: بس يلي بيدعو انو هني بخافوا على شرفهم وبيفرضوا على الناس معايير اخلاقياتون يلي بيحددوها حسب الموضة وكيف ميشي السوء(ق) هيدول هني سبب تخلف مجتمعنا وهمجيتو يروحوا يطلعوا جوات روحون السودى يلي ما بتعرف من الدنيا غير الجنس والله يلعن هيك قوانين بتخلي المجرمين برات الحبوس:evil: والله يعين يلي في بمجتمعن هيك نوعيات:cry: بشكر الله لأنو مجتمعي نضيف |
| الساعة بإيدك هلق يا سيدي 05:10 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون