|
اقتباس:
هدول العسكر مين هني؟ ما هني اتباع الحكم؟ مدة سنتين,, حكومة انتقالية,, يا اخي مع اني ما بحب جيب هالمثال بس لبنان اكبر مثال قدامك والتاريخ بيحكي |
اقتباس:
بدون ما أدخل بنقاش حول اذا الشعب السوري مبسوط و للا لأ.... لأنو ساعتها راح نكتئب كلنا بدي بس قبل كل شي أعقّب على غمزتك الأخيرة (هاد السمايلي بدي شي يوم اجمع تواقيع مشان يلتغى :lol:).. لأ مو متفق انو صعب كتير تتحقق الديمقراطية, أنا ما قلت هالحكي, أنا قلت انو غير ممكن الآن بهذه اللحظة.. ما قلت صعب كتير... بدو فترة انتقالية يجوز تطوّل بين 5 و 10 سنين أو حتى أكثر شوي...على كل هاد حديث تاني أي كتير صعب طبعا تعرف الشعب اذا مبسوط أو لأ... و خاصة لما عم تقول انو شعب ما خرجو ديمقراطية... الشعب اللي مبسوط لما الأمور بخير و مزعوج لما الأمور مو بخير هو شعب خرجو ديمقراطية... ما تزبط معك وسيم الشغلتين.... انو شعب ما خرجو ديمقراطية (أو صعب كتير.. حسب رأيك)+نفس شعب يعرف يقرا النتائج بنفس الوقت ما تزبط... يا هاي يا هاي, الحالتين بنفس الوقت ما بيزبطو, في تناقض بالأمر لي عودة لأنو الموضوع عم يحلى... في أمور كتير حلوة انطرحت بدي ارجعلها عالسهرة |
اي شو كل العسكر الموجودين هلئ هن اتباع للنظام؟
ويا سيدي بلاها حكومة العسكر , فلتكن اي حكومة انتقالية , شو خليت سورية من الوطنيين؟ بعدين شو بها لبنان؟ صدقني لولا تدخلات النظام السوري و الايراني بالشأن الداخلي اللبناني لكان لبنان مثلا يحتذى به بالديمقراطية و الرقي, الشعب اللبناني شعب متحضر و لكن تدخلات الجوار اوصلته الى ما هو عليه الان. بالنسبة للاقتتال الطائفي اللي ممكن يصير بسوريا, طبعا اكيد رح يصير انفلات امني و يمكن اقتتال طائفي بس وين المشكلة ؟ اذا امريكا صارت فيها حروب اهلية و شوف هلئ هي اعظم دولة. طبعا كل شي الو ثمن , و الحرية غالية كتير و تستاهل يصير حروب مشانها. ويمكن ما يصير انفلات امني , هاي موريتانيا , مجتمع قبلي عشائري صرف و متناحر و مع ذلك تم انتقالها من الدكتاتورية الى الحرية بدون مشاكل و بشكل تجعلني انحني للشعب الموريتاني احتراما. بعدين يا صديقي انا كأني فهمان من كلامك انك مرتاح كتير للوضع الحالي و مبسوط, و الله يا شريك انت حقوقك كمواطن اكتر من هيك بكتير. واذا ما كنت مرتاح متلنا شو الحل الأمثل برأيك للوصول بمجتمعنا للديمقراطية؟ |
اقتباس:
اقتباس:
يعني هون,, بصراحة,, انو الشعب غبي ومانو عرفان مصلحة حالو,, ولا زكي وبيعرف شو بدو هون التناقض صح صح,, بعد القراءة العميقة ,, اكتشفت انو (( برغم تحفظ البعض على هالكلمة)) بس الشعب ما خرجو دومقراطية,, ليش؟ لقلك ليش لانو اللي عم يقرو النتائج,, هني عالم بيفهمو بالسياسة,, وبالمصطلحات متل ديموغاجية ومن هالحكي هاد,, وبعتقد ما كل الشعب عندو هالمستوى من التفكير,, يعني ازا صار متل ما عم يقول بيبرس رح يصير في قتاااااال طاااااااائفي او فتال حزاب عالقليلة ولنا عودة |
طيب طيب,, بيبرس
ما كل البلاد موريتانيا,, ولا امريكا,, وطبعا ما كل البلاد ,, لبنان اقتباس:
مرتاح,, من جهة مرتاح,, اي والله مرتاح,, بدك تسألني ليش,, لانو من جهتي انا ,, ما بعرف شو هيي حقوقي المدنية ولا بدي اعرف بالاساس بعرف اني عايش بهالبلد ومبسوط وعم ادرس يمكن بس خلص دراسة يفرق عليي ما بعرف,, طيب ازا مرتاح ما فيني جاوبك شلون الحل الامثل للديمقراطية,, رح اعتبر انك قلتلي اي فلذلك يا حبيبي بتكون ,, بالنقاش ثم النقاش ثم النقاش بقلك يمكن النقاش ما نفع ,, ويمكن ها في عالم جربو ,,, طيب برأيك انتي بيكون بالدعوة للانقلاب بدون ما يكون في جو ملائم يعني هلأ ازا عملنا انقلاب رح يصير في عنا انفلات البلاد العربية ما رح تقدر تعمل شي (( كالعادة طبعا)) ما بدي ارجع قولا بس امريكا,, امريكا ,, رح تكون هيي المنقذ الوحييييييد للشعب من النظام اللي مانو متفق مع امريكا (( في عالم بيعارضو هالفكرة ,, وانو النظام السوري متفق مع امريكا,, بس انتي من مثالك عن ايران ,, وسوريا,, تبينلي انك بتعرف انو سورية ضد امريكا "بشكل من الاشكال")) بما انو صار في عندك انفلات امني,, (( كمان متل ما انتي قلت)) فأكيد ما رح تنحل بالمصالحة ( لانو اتفق العرب ان لا يتفقو) ما بعرف يمكن كترت حكي ويمكن تكون وجهة نظري خطأ ,, ويا ريت تصححا ويمكن تكون صح ,, ويا ريت تتقبلا |
اقتباس:
و شغلة انو الشعب ما بيعرف حالو اذا مبسوط او لاء رح جاوبك عليها بمقطع من مسرحية سورية لهمام حوت قديمة شوية ... بس رائعة ... - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - اقتباس:
|
لك شي يخبطك خبط عند هالمسا
لك ليييييييش ؟ ليش عم خبط يمين وشمال لك حبيبي ,, قرا الردود كلياتا انتي ما تقرا بس تبعوتك انتي وياس عالهامش:: سوري عالسبام:sosweet: |
رجاءا ما تطلعوا برا الموضوع و يصير النقاش عن السياسة الخارجية :D
|
اقتباس:
|
اقتباس:
لا الله يخليك العسكر خليهون بعاااااااد كتير.... بارودة و سياسة ما بيمشو مع بعض بنوب مهما كان السبب اعتقد سنتين ما بيكفو... أكتر بكتير, مو أقل من عشر سنين (لتحويل ديمقراطي كامل).. السيناريو المناسب هو ميثاق وحدة وطنية بين كل الأحزاب و القوى السياسية السورية.. مع مجموعة اجراءات طويلة لكن ضرورية مشان يكون الشغل صح.. على كل هاد مو موضوعنا, فينا نحكي عن هالأمر بموضوع آخر |
اقتباس:
|
اقتباس:
والله يا صديقي انت حطيت ايدك عالمشكلة الحقيقية للشعب السوري وهي ان شعبنا لا يعرف ما هي حقوق المواطن المدنية في اي دولة , فالمواطن عنا مفكر أنو اذا تزوج و شرب و اكل خلص هاي قمة الرفاهية و ما عد بدو شي, المسكين ما بيعرف انو هو مصدر السلطة و هو من حقو ينتخب ممثليه كل فترة و بيحقلو ينتقد اي مسؤول بالدولة وبحقلو يتظاهر و يعمل اعتصامات بشكل سلمي و يحقلو شغلات كتييييرة. اما بالنسبة للنقاش ثم النقاش ثم النقاش , والله ما فهمتها الفكرة , نقاش شو و بين مين و مين و كيف رح يعطي نتائج ايجابية وهل النظام السوري قابل للنقاش؟؟ وانا بالتأكيد مع الدعوة للانقلاب حتى و بدون وجود جو ملائم , لأنو يا صديقي هادا الجو الملائم ما رح ييجي ابدا صدقني . بعدين في عدة شغلات ما عرفت كيف استنتجتها: 1-كيف استنتجت أنو انا بعتقد أنو النظام السوري ضد امريكا؟ لا هادا شي مو صحيح , قد يكون هناك اختلاف في بعض المواضيع و لكن نقاط الاتفاق اكتر بكتير من نقاط الاختلاف, و انا ارى انه لنجاح أي حركة لتغيير النظام يجب اولا ضمان رفع حماية اسرائيل و امريكا عن النظام تبعنا, و هذا شيء صعب جدا جدا , فمن غير الممكن ان تقتنع اسرائيل انه ممكن لأحد ان يوفر لها الحماية و الهدوء على حدودها مع سوريا كما يوفره الان النظام السوري, فاسرائيل هي الحامي الأول للنظام السوري وهذه مشكلة عويصة لا ادري كيف سنتجاوزها. 2-طيب انت ليش مفكر أنو اذا صار انفلات أمني , فالمنقذ الوحيد هو امريكا و ان العرب شغلتهن فاضية؟؟ لا يا معلم نحن ما بدنا مساعدة لا امريكا و لا حدا من الدول العربية , فالعشرين مليون سوري لن يدخلوا كلهم في الاقتتال الطائفي , طبعا ستكون هناك فئة واعية وطنية مثقفة وهي قادرة على حل المشكلة و ايجاد ميثاق وحدة وطنية كما اقترح الأخ ياس بين الاحزاب و التشكيلات السورية المختلفة, وليستمر الانفلات الامني قدر ما يشاء فالمهم هناك حرية و ديمقراطية في نهاية الطريق الطويل . |
كونو طلعتو عن الموضوع و طلعتو سماع لقلك لكن
ليك حبيبي: الحرية و الديمقراطية اللي عم تحكي عنها بلبنان شي بيهوي .... ما الها علاقة برب شي اسمو ديمقراطية ... عن موريتانيا ما بعرف شي بس اللي بعرفو انو طالما هالحكومة الانتقالية اجت كمان تحت حماية عسكرية يعني ما اختلف شي عن الوضع السابق لانو لسى في سلطة عليا ماسكة كل شي و عم تتحكم بكل شي على كيفها يعني تي تي تي تي متل ما رحتي متل ما جيتي بس انو تغيير اشكال مو اكتر و انو بدك تعمل ثورة و انقلاب؟؟ فهيم .... يعني بتشيل العالم من تحت الدلف لتحت المزراب ... ولك العالم مو ملاقاية شي تاكلو بدك ياها تفوت بحروب طائفية و اهلية هلق .... قبل ما نفكر بشي اسمو ثورة و انقلاب برايي انو نفكر انفع للشعب ... بشي يشبعو لقمة الخبز بالاول ... بشي يخليه ما يشحد ... بشي يخليه ما يعود يفكر كيف بدو يركض ليل نهار مشان ما يبيع بناتو.... عالهامش ياس.....شفت المقطع؟ |
اقتباس:
|
اقتباس:
اقتباس:
أما بالنسبة للنظام.. طبعا لما بيناقشو واحد و اثنين و عشرة... مكانهون عدرا يا صيدنايا... بس راح يجي يوم.. راح يناقشو الآلاف... ساعتها مافي سجون تكفي.. اقتباس:
هلأ طبعا في استثناءات لهالأقوال.. لكن اعتقد انو ما عنا مقومات يكون عنا استثناء.. و الوقت اللي راح يمضي لحتى يصير عنا مقومات ليكون عنا استثناء هو أكبر من الوقت اللازم لتحريك الديمقراطية السلمية. اقتباس:
لما انت مقنع ألد أعداءك انو يا انت يا الطوفان... يصير عدوك حاميك, أو لما عم تقنعو انو اللي تعرفو أحسن من اللي تتعرف عليه... شي مريح هلأ النظام السوري لاسرائيل مريح.. ليش.. لأنو أول شي محافظ على وقف اطلاق النار المباشر بشكل شبه مقدس (اسرائيل تعتبر حدود الأردن أقل أمنا من حدود الجولان) و عم يحارب برا أرضو و رضيان انو اسرائيل تحارب برا أرضها.. يعني متفقين يتحاربو بلبنان... و عدا عن ذلك النظام السوري الو لهجة تعامل عم تحافظ على جو الخوف اللي موحّد "الشعب" الاسرائيلي.. لأنو صدق انو اسرائيل راح تنتهي ساعة ينتهي الخوف عندهون.. مافي شي موحدهون الا الخوف اقتباس:
- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - اقتباس:
تحياتي للشباب  |
اقتباس:
طيب صديقي ياس في تشرحلي برايك شو الاسباب اللي بتخلي اي سوري بعد الحالة اللي وصلت الها البلد هلق يدافع عن هيك نظام ويحاول يبيض صفحتو؟؟ |
اقتباس:
في جهاز بروباغندا شغال عالـ 24 عم يوصل فكرة قطبية واحدة... عنا غياب للآخر و تخوين للآخر و كره للآخر, ربينا عليه بمدارسنا... يعني طبيعي هالشي نوعا ما.. ما بعرف... يعني شو بدك تحكي لتحكي |
تسجيل متابعه ..........
|
| الساعة بإيدك هلق يا سيدي 17:05 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون