|
وين احلامك ؟؟؟؟
احلامي رسمتها عالورق ..... والورق نزلت عليه المطر ........ والمطر انصبغ بكلماتي وصوري ...... وراحت كلها مع السيل عالمجاري ...... وصارت احلامي كلها ........... تحكيها حشرات المجاري الي رجعة عالموضوع |
اجت .. اجت اللحظة التي كنا نحلم بها .... مدري اي لحظة ما كل اللحظات تاريخية
هلئ هي اللحظة مابعرف شو بتعني بتاريخ البشرية انو كل شي بتم بلحظة بلحظة بتكون مروء وبلحظة بتكون زعلان بلحظة ادمرت مدينة بقنبلة نووية وبلحظة انهارت قرارات وضعفت إرادة بس الشعب كيف بلحظة كان.. صار .. مدري كيف بلحظة اللحظة شي صغير كتير يعني متل فقشة الاصبع بس احيانا اللحظات بتكون لسنوات ...عربيا .. بتاخد وقت يعني في نفس عميييييق جدا عند العرب بس عند الغرب اللحظة بتعبر عن اللحظة وما بتعبر عن حدا تاني وانا من هذه اللحظة .... لحظة بس ... |
هدنة
بدنا نعمل هدنة يا شباب ويا صبايا .. من منبرنا العظيم .. لنعيش بآمان واستقرار ..
طبعا لنقدر نعمل هدنة بدنا نجمع ممثلين عن كل أطياف المجتمع .. : مؤمن ملحد لاديني مسلم مسيحي سني شيعي كاثوليكي أرثودكسي بروتستانتي معارض موالي حزبي مستقل قومي وطني عربي أرمني كردي شركسي بدوي لاجئ مقيم مواطن . . . . . . :shock: بس اذا بتعرفولنا حدا من الشعب مشان يشهد على هالهدنة .. |
مؤخراً .. أو بالحقيقة قبل كم ساعة تم تثبيت موضوع بالمنبر بعنوان " الاعلان العالمي لحقوق الانسان"
فجأة تزكرت أنو نحنا ننتمي لفصيلة الانسان وهالانسان حسب النظريات الشهيرة ينحدر إما من القرد أو من الكتب السماوية "فرضاً" .. واكتشفت من خلال هالعنوان أنو هالانسان الو حقوق .. الحقيقة انا هون استغربت ... كنت مفكرة أنو نحنا يعني الانسان عايشين بالفطرة هيك .. يعني غريزياً .. لا هم دنيا ولا هم آخرة .. من وين اخترعولنا قصة الحقوق .. لا وبعدين اخترعولنا ياها .. وأخدوها منا وهلا عملو اعلان مشان يرجعو يطالبو فيها .. مو قادرة افهم هالشي .. ومن مين بدنا نطالب بحقوقنا .. من الموظف اللي عم يطالب بحقو من المدير أو من المدير اللي عم يطالب بحقو من الوكيل أو من الوكيل اللي عم يطالب بحقو من الأمين أو من الأمين اللي عم يطالب بحقو من الوزير أو من الوزير اللي عم يطالب بحقو من رئيس الوزراء ولا من رئيس الوزراء اللي عم يطالب بحقو من الحاكم أو من الحاكم اللي عم يطالب بحقو من الشعب والشعب هوي الانسان .. والقمحة عند الخباز والخباز بدو مدري شو .. وقصة .. لا وعاملين اعلان دولي .. اعلان مشان تكون فضيحة .. أكيد فضيحة .. فضيحة لانو لهلا مو ماخدين حقوقنا .. بعد ملايين السنين من الوجود ثم الحضارة ثم المدنية .. مو قادرين ناخد حقوقنا .. وعالمي .. مشان اللي ما بيعرف يعرف ... هلا عالمي هاي فهمناها .. مشان يكون لكل انسان في هالعالم نفس الحقوق ... وطبعا ومندون شك كلنا متساويين بالحقوق .. يعني اكتر من هيك عدالة ومساواة .. جريمة يعني .. طمع .. لك اهترينا حقوق .. بكفي قد ما انسحقنا .. نسينا حقنا .. ودولي أو عالمي .. مشان كل دولة تراقب أختها .. يييي لك هدول ما عندهم حقوق .. لك يييي هاي الدولة حقوقها أكتر مني .. ويا عيني ويا روحي عاللي براقب تطبيق هالاعلان .. شو انو انسان .. انسان بما تحمله الكلمة من معنى .. من رقة مشاعرو واحساسو ما حابب يفرض هالاعلان على حدا فرض .. يعني كل واحد بخاطرو بطبق هالاعلان .. ومع الاعلان العالمي لحقوق الانسان .. حابة اطالب بحقي في حقوق الانسان !! بقدر .. يعني بتسمحولي ... ممكن .. اللي مو قادرة افهمو كيف حق وعم طالب فيو .. ما هوي حق .. يعني تحصيل حاصل بمجرد كينونتي كإنسان .. يعني من لما طلعت من بطن أمي كان لازم هالحق ينولد معي .. بس يمكن بطن العالم ما بيسع كل هالحقوق !! |
اقتباس:
اه يمكن بشي كلمة لتشي غيفارا او تشي حدا تاني انو قبل ما يصيرواااااااااااا - بعض العالم - يسمو الاشياء - على اعتبار الانسان مصنوع من مادة فهو شيء ما حتما - بمسميتها .... اي مممكن نعمل هدنة بس هدنة على شو :shock: |
اقتباس:
هالهدنة بدنا ندهنها مشان كلو يسحس عكلو ويصير في تمازج وتعايش بين المربى والزبدة والبينت بتر والعسل واذا بدك اللبنة والجبنة كمان .. ما حلوة بكرا المربى والزبدة يتخانقو مثلا .. فنحنا مشان نخلق جو من السلام بين المربى والزبدة بندهنهم ومنعمل هدنة .. :shock: وهالشي بسمو في القاموس الحربي هدنة .. |
تعا ننسا تعا ننسا .. تعا ننسا تعا ننسا ..
بدي حدا يزكرني شو بدي انسا لانو حابة انسى .. ومن كتر ما نسيانة اشيا حابة اتزكر شي لانساه ... يعني حرام ملحم يغني وما رد عليه .. المشكلة وين يا جماعة أنو عكتر النسيان ما عم نقدر نرجع نتزكر شي ... والنسيان نعمة ايه نعمية .. يعني لوما نعمة النسيان ما كنا قدرنا ننسى اساءات العالم تبع الدرجة الأولى هاد .. كان ضلت الاساءة الاستعمارية غصة بحلقنا .. لكن ولحسن الحظ .. نسينا .. وما حقدنا على حدا .. وهاي الحمد لسعدو واعوانو .. رح ترجع تتكرر القصة .. بس شو بقلب صافي ونية خير اتجاهم .. بدون اي مشاكل أو احقاد قيمة !!!! |
اقتباس:
طول عمرنا بننسى ومافي غير عم ننسى يمكنهالشي بأيدنا و يمكن من كتر الضرب ع الراس عم ننسى المهم انو احنا عم ننسى بس انو هنن ليش ماعم ينسو ماعم اعرف :? |
احلام مافي ......
وايام مافي ...... وشغل مافي .... وحكي مافي .... وحشيش مافي ..... والبلد .................................................. .................. :shock: |
اقتباس:
|
اقتباس:
|
اي اتذكرت شغلة وقت قرات الرد تبع حقوق الانسان برجع بخبركن عليها
|
اقتباس:
كل شي بدنا ياه لازم يصير لحظة .. ايه نفسها اللحظة تبعتك .. ما بدنا نشتغل وما بدنا نجاوز العقبات والعثرات وما بدنا نتعب ونجتهد وننتظر النتائج .. لا يا اما كل شي بكون ماشي ومنيح من حالو .. يا اما تخرب وعلي وعلى أعدائي .. بس هي بالنتيجة علي وبس .. لانو اعدائي رح ينبسطو بخرابها .. !!! |
اقتباس:
هامش:::: اسف ع التأخير بسبب التهكير اللي صار ما فضيت لليوم . . . بخرابهامارح يسعد غير الاخوة الأعداء والفضل لسعدو بجميع الاحوال وقت قرأ الرد تبع حقوق الانسان ضحكت كتير وكتبت رد بس الجهاز فات بالحيط وفصل النت حسيت وقت حكيتي عن حقوق الانسان متل كأني عم اسمع طرفةجحا وحميرو العشرة - حشى ايمت الانسان وحقوقه- بس بتذكر بالطرفة انو لماكان يركب ع الحمار كانو ينقصو حمار ولما ينزل يزيدو حمار اي .. اي هوهيك كان يفكر هلئ شو دخل هي بهي ..احنا كــ أنسان لما بننركب بيصير إلنا حقوق وبيصيرو العالم الراكبين اطالب بهي الحقوق لهيك ندعو من سعدو انهن يحلو عنا ويفكرو ولو لحظة متل عمنا جحا ادام عزو ذكراه وحفظه :sick: |
اقتباس:
|
قبل كام يوم .. عم اسأل بنت عمي ...
هي من طول عمرها عايشة في بلد اسمو اوزبكستان وللي ما بيعرف (هي إحدى الجمهوريات الاسلامية ذات الطبيعة الفيدرالية ضمن الجمهوريات السوفياتية السابقة.. عاصمتها طشقند وعدد سكانها حوالي 20 مليون اذا مو اكتر شوي) .. المهم اجت عنا في زيارة .. وضلتها شي 3 أو 4 أشهر .. على روحات وجيات واستقبل وودع .. وصار وقت بدها ترجع لبلدها .. قلتلها .. يا بنت العم .. ليش مبسوطة كل هالقد انك رح ترجعي على أوزبكستان ؟ ليش ما تضلك هون؟ (مع انها في وقت سابق كانت متحمسة للبلد وحابة تستقر أو تضلها لوقت أطول على الأقل) قالتلي كلمتين .. No Freedom .. طبعا ما قدرت افتح تمي بكلمة .. ابتسمت شبه ابتسامة وكانت ابتسامة ساخرة خائبة .. وسكتت .. :pos: |
اقتباس:
|
| الساعة بإيدك هلق يا سيدي 01:39 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون