|
اقتباس:
خيو مفاهيمك للحياة غريبة كتير , يعني معتبر انو توفر السكن اللي ف بيت في مي وكهرباء هو الشي الطبيعي واي شي تاني هو فزلكة !!!:? الانسان الطبيعي من حقو يتمتع بحياتو متل ما هو بيحب مو يعيش متل الدابة و يشتغل باكلو وشربو وهو مبسوط واذا هالظروف مو متوفرة بوطنو و ما في امل تتوفر قريبا فوين الغلط اذا راح على بلد بييحقق في هالشي اللي بيخلي يعيش كبني ادم بيحترم نفسو |
اقتباس:
الأكل و الشرب و المسكن, ضرورات أساسية, بس مش الوحيدة... في ضرورات تانية لا تقل عنها أهمية أبداً, و ما عم احكي عن رفاهيات, عم احكي عن ضرورات نحنا بشر, مش آلات أنا ع كل حال أدليب بدلوي, و بعتقد اللي بدو يفهمني فهم عليي.. و اللي مابدو, هاي مشكلتو اقتباس:
|
أنا حتى حسابات الأكل و الشرب ما بتطلع معي لحتى واحد يقدر يأسس أسرة براتبو
خلينا نقول راتبو 10000 و انو الزلمة كبس ع حالو و عاش ب8 آلاف, منيح؟ (آجار و مواصلات و أكل و شرب, الزلمة لا عندو موبايل و لا يفوت عالنت و لا يروح و لا يجي, من البيت للشغل و من الشغل للبيت, و كمان ما بيبرد و ما بيجيب مازوت) هالزلمة بيوفر من راتبو 2000 ليرة كل شهر, ع هالحسبة بيوفر 24000 كل سنة... اذا اعتبرنا انو خلال العشرين سنة المقبلة ما صار معو طارئ, و لا مرض, و لا حتى اشترى تياب و ما طلع من الشام ع ولا مطرح... بعشرين سنة بيوفّر 480000, يعني نص مليون الا طجة... عشرين سنة مشان يوفّر عشر آلاف دولار وحدة من تنين.... يا بيسرق, اذا بيطلعلو, يا بيهاجر, كمان اذا بيطلعلو.... و عمار يا بلد |
اقتباس:
|
اقتباس:
تخيل الواحد بدو يشتغل شغلتين و تلاتة احيانا مو مشان يلم حق بيت او سيارة او يخبي شوية مصاري لولادو لما يكبروا, وانما بس ليأمن لولادو ياكلو ويشربو ببلد الدولة معتبرة مجرد انو عم تعطي الموظف راتبو هي منية , لاء وكل سنة بيمننوا بزيادة راتب هزلية عم تضر اكتر ما تنفع وبعد كل هالشي ليش الناس عم تهاجر , غريب ما :frown: |
اقتباس:
لو بتشوفوا ايرادات شركة الاتصالات وشركة ام تي ان وسرئة تيل ... بالسنة ... لتقول الشعب السوري مليونير .. لحتى عم يدفع كل هالارباح لهالشركات ! ولسا عم نقول انو المواطن السوري عايش !:? |
اقتباس:
طيب هاي واحد توظف و عمرو 25 سنة (بفرض دبر حالو و توظّف بهالعمر)... بدو عشرين سنة ليصير معو نص مليون.. وين تشتري بيت النص مليون؟ هاد بعمرو ما رح يتزوج أنا بصراحة جداً أأسف لأنو صار مفهوم بسوريا (مفهوم فرضتو الظروف) انو الحياة أكل و شرب و آجار, فقط لا غير... و الباقي كلو كماليات... و هاد مانو مزبوط, و مش بعرف غربي أو شي, اذا بنقول هيك عم نلغي 200 سنة تطوّر انساني من الثورة الصناعية و حتى اليوم... و المشكلة انو ما عم توصل فكرة انو هالكم حوت بالبلد اللي صار ملياردير على مستوى العالم جمّع ثروتو من المصاري اللي كان لازم تكون بايد هالشعب المسكين, و للأسف هالشي صار طبيعي و مقبول عايشين بزمن "حلال عالشاطر".. هاد هو المفهوم الوحيد الشغّال, مافي قيم انسانية, و اذا ما دبّرت راسك... بيكون الحق عليك |
اقتباس:
هاد حكي تاني... سامر حكى قبل عن الطبقية... و هلأ البلد طبقتين, الطبقة الوسطى طارت إلى غير رجعة على ما يبدو... (عندك أغنياء بدرجات متفاوتة, و فقراء بدرجات متفاوتة) عندك من العشرين مليون سوري في عندك بضعة ألوف ثرائهون فاحش, يعني بيسابقو أغنياء أوربا بجدارة و يغلبوهون, شي رهيب انو الواحد يسأل هدول من وين طالعو كل هالمصاري بهالبلد؟ بعدين عندك 1-2 مليون ثراء عالي أو وسط... هدول كمان تلاقي حياتهون بمعايير فوق العالمية ويبقى عندك مليونين أو تلاتة.. مستورة و الحمد الله (هاي بقايا الطبقة الوسطى.. ببلد وضعو الاقتصادي جيد لازم 70-80 بالمية من السكان يكونو هون) و بعدا شي 5-8 مليون, عايشين حسب مفهوم الشباب أكل و شرب و نوم.. و بالزور (حياة الموظف المعتّر الغنية عن التعريف) و بيظل عندك عدد هائل من السكان تحت خط الفقر, يعني هدول أكل و شرب مش مأمنين, و هالحكي دراسات حكومية يعني مش من عندي, شوفو تقارير وزارة الاقتصاد بالسنين الأخيرة كل سنة بيرفعو نسبة السكان اللي تحت خط الفقر (الأمم المتحدة تعرّف خط الفقر بانو هو 2 دولار يومياً للفرد). حسب دراسة من سنتين (دراسة للأمم المتحدة بالتعاون مع الحكومة السورية) اذا ماني غلطان كانو حاسبين انو في 2,2 مليون سوري تحت خط الفقر المدقع (يعني أقل من دولار واحد باليوم). تحديث: تأكدت من النسبة, و حسب هيئة تخطيط الدولة بعام 2007, نسبة الفقراء باستخدام خط الفقر الأدنى بسوريا هي 11.4% أكيد الأسباب كتيرة و متشعبة, فساد, سوء ادارة, انفجار سكاني, ظروف خارجية... الخ الخ الخ.. بس اللي بعتقد نكرانو هو متل تخباية ضو الشمس... هو انو الوضع الاقتصادي للبلد سيء... لك مسؤولين الحكومة عم يقولو انو سيء جداً معقول في حدا يزاود عليهون؟ |
اقتباس:
اخي الحبيب انت خليت الخليج وكأنها جهنم في المريخ مع انها جاره لسوريا.... سوريا نعتبرها بلدنا ووطننا وماعندنا مانع نموت عترابا والعيشة في سوريا بتسوى الغالي والنفيس... وحكيك ع الخليج وكأنه سجن للاشغال الشاقة مو صحيح العالم بتجي على الخليج محترمة وبتطلع محترمه مستفيدة..اكيد فيه البعض يفشل في تجارة في الخليج او يفشل في صنع ثروة لكن هذا مو معناه الجميع فشل انا اعرف الكثير من السورين حققوا ثروات بالملايين في خلال 5 سنوات والبعض يعمل في شركات بمرتب خرافي وسوريين مميزين في الخليج في الاعمال الصحية والتعليمية والادارية والاقتصادية والتجارية وفيه البعض اللي يعمل مجال المقاولات والبناء والنقل هؤلاء قد يكون هم من يعمل في اعمال شاقه وفي ظروف صعبة وساعات اطول وفي اي بلد هذه المهن صعبة وشاقة حتى في سوريا.....مع هذا الخليج ليس جنه او ملاذ وظيفي امن لكل شخص حتى ابناء الخليج انفسهم لم يعد لهم الحال كما كان في السابق................................شكر ااااااااااااااااااااااااا اااااااا * للعلم......لم اصوت |
اقتباس:
حكيك بيخلي الواحد .. يفنجر عيونو ويقول العمى !!!!! وين عايش انا :frown: 11.4 % تحت خطر الفقر ...! العمى وهيئة تخطيط الدولة فرحانة بالله ...او بالاحرى الحكومة فرحانة بهالانجاز مثلاً :frown: لأ وبيجي حدا بيطلع عالتلفزيون وبيتفزلك وبيقول انو وضعنا عال العال والاقتصاد كل مانو عم يتحسن ... والميزان التجاري متوازن !! :? |
عمي ابو جعفر كيفك ..:D
بما اننا " انا وانت يعني " لسعتنا طلاب وما دخلنا بشكل نظامي بسوق العمل فعلى الأغلب حكينا بده يكون تنظير بتنظير ، وبده يكون توقعات بشو بده يصير معنا .. وبيني وبينك كتير اوقات بفكر بوين رح تكون أراضي بعدما اتخرج .. من كتر ما بيوجعني راسي بروح نايم طب على وجي حاليا وضعنا مانه مزري متل أفريقيا .. اي مزبوط معك انا بس ليش حتى نقارن حالنا بأفريقيا بالأصل ؟ يفترض نستنى نصير بمستوى افريقيا لنقول انه وضعنا سيء؟ عم تقول اننا عم ناكل ونشرب .. اي من ناحية تانية يفترض نصل لمرحلة ما منقدر فيها ناكل ونشرب حتى نقول يا جماعة نحن وضعنا سيء ؟! بالنسبة لوضعنا المادي كل الاحزاب والفئات والمولاة والمعارضة متفقة على ان وضعنا حاليا سيء إلى حد ما وطبعا بتختلف الحجج والمسببات .. المعارضة بتقول بأن الفساد والنهب عم يعملونا فينا هيك والموالاة بتقول بأن اللاحرب واللاسلم الوضع اللي العايشين من من 30 سنة عم ياخد أكتر من 75% من ميزانية الدولة لتسليح الجيش والمكنة العسكرية بس بالأخير الكل متفق بأن الوضع أبداً مو طبيعي ما بدي قلك بأن المواطن الفرنسي المتشرد ( للوصول لنقطة مشتركة بينك وبين ياس بفرنسا بسموهم smf يعني sans maison fixe = بلا منزل ثابت هدول بياخدوا راتب من الدولة بعادل تقريبا 550 يورو .. اذا بده ياكل ويشرب يومياً من محلات الـ 2 يورو ولا على باله .. وبيبقى عايش ومرفه كمان (اذا اعتبرنا أكل المطاعم ترفيه بهي الحالة ) بس واقعنا بزعل وما خرج نطلع كتير على حالنا بدك تقلي شوف وضعنا بالتمانينات وهلق وكيف العالم بتوقف علدور مشان تنكة السمنة طب ما تاريخنا أقدم من التمانينات .. جدي كان زلمة موظف وبرقبته 5 أولاد + هوي وزوجته + والدته عايشة معه بالبيت وكان قادر يطعمي ولاده ويلبسن وحتى يفوتن بالجامعات ويخلين يكلموا دراستن .. مين في موظف حاليا بيقدر يعمل هي الشغلة ؟ روقنا ابو جعفر ما متعودين نشوفك معصب :D |
اقتباس:
بحب صحح معلوماتك عزيزي أنو مسيرة التطور عنا أبطئ من البطئ , إزا مفتكر الإنترنت بسرعة 56 كيلو و الموبايل على أبشع شبكة في العالم و هالسيارات الجربانة اللي بتدفع دبلين حق السيارة بين رفاهية و جمارك تطور فا أنت غلطان .. يعني هالإشيا لازم نكون منتهين منا من عشر سنين أقلا شي , من إيمتا في ببيروت موبايل قبلنا بأديه و مع العلم لبنان كلا أد عقلي و ما عندا موارد نفطية بالصلاة عا الأنبيا متلنا ؟! أديه في فرق بأسعار السيارات بينا و بين الدول المجاورة شو نحنا ولاد الرقاصة و غيرنا ولاد الشريفة !؟ اقتباس:
و بتعرف كم مليون جحش شغل هون عنا بسوريا عما يشتغل من أول النهار لآخر النهار من السبعة الصبح لآخر الليل مشان عشر تالاف راتب شهري و ألفين إضافي ما بتكفيه حق فلافل لعيلتو .. في مليون مثال و مليون عيلة لنضرب مثال عيلة وضعا جيد جدا ً بالنسبة لغيرا الأب متوفي و الأم مكفوفة عندون أربع أطفال و شب كبير عما يشتغل مكنسيان بيلتعن سلافو لياخد بالشهر 12 ألف ليصرف على عيلتو .. حسبلي ياها أزا بدو كل واحد ياكل ست صندويشات فلافل كل نهار تنتين للفطور و تنتين للغدا و تنين للعشاء .. غليانة صندويشة الفلافل صايرة هلأ ب 20 ليرة مع غليان المواد الأولية فا ضربا بآلة حاسبة صغيرة بيطلع معك بدو كل نهار 360 و بالشهر 10800 ببقا معو 1200 ليرة مواصلات لشغلو . طيب يا أخي ما بدو مي ما بدو كهربا ما حنحكي عن التليفون و لا الموبايل .. و لا رح نحكي أنو رح يحبلو شي وحدي و ينجبر على عيد الفاللانتين ياخدلا هدية .. أيا تطور و أيا مستوى معيشي , لك ما ليكون في مستوى معيشي , ما لنكون عايشين أول شي .. |
عدلنا المشاركات واخدنا شوية اجراءات ادارية بس لازم وضح هون كم شغلة:
يلي فايت يخانق ويفرض رأيو يلي هو مقتنع فيه ومانو حابب يناقش وأي حدا بدو يناقشو بدو يتعرضلو شخصياً فالصالون مو مكان مناسب لهالشي يلي بدو يقلل من قيمة أي طرح أو فكرة ويسخفها أو يتفهها لمجرد انو مو طابقة على فكرو كمان بلا ما يحط موضوع ويناقش يلي مقتنع انو البلد جنة مافي داعي يناقش بوضع البلد اذا ماعندو استعداد يناقش بهالقناعات يلي طالب بنقل الموضوع من الصالون لاخد الحرية بحب وضحلو انو كل الاقسام باخوية بتنطبق عليها نفس شروط النقاش بس الفرق بطبيعة الموضوع هي يلي بتحدد القسم المناسب لإلو شكراً للكل :D |
الوضع المعيشي بسوريا سيء جدا ...واسوا من قبل بكتير ...
والمفروض يكون احسن من اي وقت .كونو سوريا بلد قادر يعتمد الاكتفاء الذاتي او الانفتاح مع الخارج .. وعذرا انا لم أقرا ولا رد ..بس حبيت اعطي رأي انه الوضع كتير مأساوي ....والمفروض يكون احسن |
فعلا مظاهر
اي خيو بتنزل الشام القديمة مليانة مطاعم عاطريق المطار برضه والمولات عم تزيد والبنوك ولا اكتر ووحياتك صرت شوف كنزة حقا 25 الف اي اي وحياتك وفي مين يشتري بس هيدول قديش من الشعب السوري او من الشباب السوري يعني بين ال15 لل35 ياسيدي؟ ما بيزيدوا عن 15% صح صار في قطاع خاص ورواتب كبيرة كتييييير بس حبيبنا هي عم ياخدا بس 15% من الموظفين فيه والباقي بلا ولاشي وبفتكر انو هال85% هني اللي عم نحكي عنون وملتعن سلافون ببلدون |
اقتباس:
اقتباس:
اقتباس:
بتعرف قديش نسبة الفقر بلبنان ..!! مابعرف قدي .. بس بعرف انو النسبة كبيرة كتير ... اقتباس:
دولة تانية بوضعنا .. اكيد كانت رح تكون على شفير الهاوية والإنهيار الإقتصادي .. اقتباس:
|
اقتباس:
|
اقتباس:
أول شي المقدمة التوجيهية لأرائنا ( بأنو الوضع رائع ) حسسني للحظات انك ما عايش بسوريا أي نحنا في وضع مزري فكرت مثلا ً إذا مرض ؟ " هادا الهاجس المجتمعي بامتياز " لك إذا رح ياخد دوا ضغط كل شهر 500 ل ، بتكسرو وبتكسر عيلتو في فقر ، والاكل والشرب والمي ما بيكفي في شباب بدا تأمن بيوت وبدا تتجوز ولا الجازة صارت حلم الغني ، بدو يصير اب .. بيحقلو ما فيك تمنعو لمجرد أنو الظروف المادية والله ضدو ! بدا تتعلم ، وتشوف دكاترة ، وتقرا ، وتعيش ( بكل متطلبات الحياة اليوم ) مدينتي ؟! ما فيها شباب .. كلما بطلع حواليي بلاقي الشباب يا مهاجرين يا عم يحلمو يهاجرو والأغلب لأنو ما فيهن يبدو بسوريا من الصفر ويصلو لمحل .. :D |
| الساعة بإيدك هلق يا سيدي 05:06 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون
