|
اقتباس:
بدي اعتزر عن الاغلاط الاملائية الكتيرة بس والله عم اكتب على كمبيوتر فايت بالحيط وعم يعلق ومافيه عربي فلا تأخذونا :D |
بعد ما قريت الردود مرة تانية ...بعترف انو يمكن انا ما عندي الأسلوب الخاص بالكتابة ..متل مثلا VivaSyria ..Yass
بس هيك انا طبيعتي ,,عم اكتب كأني عم احكي مع رفقاتي بشي مقهي مثلا ..و ماني مضطر ابدا اكتب بأسلوب غيري و قلدو لأنو رح يطلع شي مشوه مشان انو امريكا عم تعطي التبرير للنظام ليعزز اسلوبو ...يعني يا استاذي الكريم Yass..انو النظام اذا انزعج من امريكا بروح بينتقم من شعبو !! لأعطي مثال .... ايام المجازر الأسرائيلية بغزة ...اتحفنا المعلم بتصريح ,,عنجد بتحس انو جاي على بالك تكسر التلفزيون بس مشان تخلص من كلامو .. التصريح كان عم يقول ,,,بما انو اسرائيل ما عم تحترم حقوق الأنسان بفلسطين ..لهيك ما بدنا حدا يتدخل بحقوق الأنسان بسوريا !!! يالله ...يعني انو اذا اسرائيل عم تقتل الفسطينيين من دون اي انتقاد ..تركونا لكن نقتل شعبنا كمان من دون انتقاد !! ,,,انا عنجد خجلت انو انا سوري و هادا سوري !! ليش الرئيس الأسد بجولتو بفرنسا ,,كان كل همو يوصل للأوروبيين رسالة انو رجاء ما حدا يتدخل بحقوق الأنسان بسوريا ...لنقدر نتفاوض عا شغلات تانية !! بحس انو كرامتنا و حقوقنا و اخلاقنا عم يتم التجارة فيها مع الأوروبي .... |
اقتباس:
الجزئية الأولى: لما يكون في عقوبات أو مشاكل و يكون في صوت عالي و يكون في كل هالحكي دائماً يكون في حجة عند أي نظام لحتى يشد الحبل على الحريات و الحقوق بحجة الأمن القومي.. لاحظ انو حتى بدول ديمقراطية هالحكي صار (طبعاً مع فروقات) فيعني لما يكون في تهديد خارجي و لو كان اعلامي فأي فرص عمل حقوقي أو في سبيل الحريات تلاقي قدامها تقييد شديد بحجة التهديد الخارجي, و هالحجة تمشي عالشعب و خصوصي لما في تخويف من مصير مشابه لمصير العراق أو شماتة بـ "ديمقراطية" لبنان ... راح تقلي انو أي نظام ديكتاتوري ما يحتاج إلى حجة أو مبرر لحتى يقمع الحريات, و هذا كلام صحيح تماماً و لكن لما يكون الوضع هادئ دائماً الأمر أصعب لألهم. الجزئية التانية: وقت أميركا تحكي عن حقوق الإنسان بسوريا فرضا رأساً رح يكون في توجّه إعلامي انو مصطلح "حقوق الإنسان" هو منتج أمريكي, و كلمة منتج أمريكي سوقها الشعبي مضروب جداً (بما يخص السياسة.. ) و يضرب هالشي بمصداقية كل المدافعين عن حقوق الإنسان حتى لو كانو ضد أميركا بشكل شرس.. لأنو خلص أميركا حكت عن حقوق الإنسان يعني هدول رفقاتها.. و نفس الشي عن الديمقراطية و نفس الشي عن كل هالأمور... و القصد انو أميركا تعلم انو تضر بهالقصص لما تدّعي دعمها و بالتالي أنا بفكر انها تتعمد هالشي لأسبابها السياسية الخاصة تذكرو لما طلعت كوندوليزا بتقول انو الإدارة الأميركية خصصت 5 مليون دولار لدعم جهود المعارضة السورية من كم سنة.. و طبعاً هالتصريح طلع بكل الجرايد التابعة للحكومة و شبيهاتها.. و لكن ما حدا نشر انو 90% من أحزاب المعارضة (اللي أنا ناقد لتقريباً كل شي بيعملوه و مع ذلك هون تصرفو صح) مش بس التزمو الصمت و انما رفضو هالحكي رفضا قاطعا و قالو انو ما بدهون دولار واحد من برا (و بتذكر مقال ساخر لميشيل كيلو بهالخصوص قبل اعتقالو).. حسب ما اتذكر مافي إلا الغادري رحب بهالحكي بس ما شاف فرنك منهون... كوندوليزا ما بتعرف انو هالإعلان يضر بالمعارضة السورية و يقوّي القيادة السورية شعبياً؟؟ أكيد بتعرف و جداً, معناتا ليش عملتو؟؟ عملتو لأنو من مصلحتهون انو تكون المعارضة السورية غائبة.. هامشية... و مش حبا بالقيادة الحالية انما بيعرفو انو هالموجودين لازم يكونو أقوياء لحتى الاتفاق معهون يكون ذو مفعول دائم و بدون مشاكل... أنا هاي نظريتي التآمرية... و العقوبات هي استكمال لهالنظرية.. حتى لو كانت ذو مفعول محدود (رغم انو أنا ما بشوف انها ذات مفعول محدود.. ) |
- انفقدت كمية كبيرة من الأدوية أغلبها عم يفوت تهريب و كانت تتصنّع وطنياً لأنو في أجزاء من التركيب تملكها شركات أميركية ترفض تصديرها لسوريا, و كان هالشي سبب من أسباب أفلاس عدد من شركات الأدوية. (رغم انو العقوبة نظرياً لا تشمل الأدوية و المواد الغذائية لكن العديد من مركبات الأدوية تحوي مواد كيميائية, هيدروجينية على الأغلب, تعتبر ذات استخدام ثنائي و لذلك لا تباع لمن لا يرغبون..) و إحدى الشركات المتضررة هي تاميكو..
- في تضييق من شركات تقنيات الانترنت تجاه سوريا, يعني مو مكفينا الحكومة تحجب مشان يجو كمان يضيقو على هالخلق, و بعرف انو يكفي تغيّر اسم مكان اقامتك ليمشي الحال بخصوص الخدمات المجانية, و لكن هالشي بذاتو يكفي ليكون إزعاج لمواطن سوري برئ, ليش لحتى يكتبو أهل البلد انو عايشين بغير بلد ليقدرو يعملو حساب غوغل أو يفوتو عالمسنجر؟ شو يعني سوريا بغير كوكب؟ - خلال سنوات عديدة ما دخلت قطعة صيانة وحدة للسورية للطيران, و كانت الإدارة الأميركية واضحة جداً بمنعها, و انخفاض عدد الطائرات خلا الشركة تلغي كتير محطات و تقلل عدد الرحلات الأوربية خصوصاً متل من اسبانيا, اللي كان يجي منها 4 رحلات على دمشق و حلب أسبوعياً و هلأ صار في رحلتين فقط من مدريد حصراً و فقط إلى دمشق, و كانت الرحلة بتموز بحوالي الـ 400 -500 يوريو ذهاب إياب و السنة الماضية كانت التذكرة بـ 940 و صف عالدور.. يا تطير هالشهر يا ما تطير.. هالشي كان بسبب العقوبات, حتى لو آخر سنة و نص تلحلحت الأمور الإدارية و صار حكي و اتفاقات شوي بس لحد هلأ ما أجت طيارة وحدة على سوريا رغم انو ناطرينها, و على اعتبار أنا مواطن سوري و متضرر من هالشي متلي متل كتير مغتربين فبعتقد بيحقلي قول انو هالعقوبة أضرتني كسوري بدون ما يجي حدا و يحاول إخراسي.. - بالنسبة للتجاري السوري, حوالات من مغتربين إلى الداخل كانت تمر عبر التجاري السوري من الولايات المتحدة و كندا و غيرها تمت عرقلتها و الإجبار على البحث عن طريقة أخرى لتنفيذ هالحوالات (و ما بيهمني اذا الطرق الأخرى موجودة.. بيهمني انو أكبر بنك بسوريا مصنّف كإرهابي, و فيو تعاملات لشريحة واسعة من المواطنين السوريين لأنو الحرامية حساباتهون بسويسرا و ببنما و جزر الكايمان.. مش بالتجاري السوري). يجوز ما منعت شي بشكل كامل هالعقوبات.. يعني مش متل عقوبات كوبا أو العراق, و لكن بدرجة منيحة أضرّت بناس سوريين أو على الأقل صعّبت عليهون بعض الأمور.. و حتى لو.. حتى لو ها, ما كان الها أي مفعول... شو مشان الولايات المتحدة الأمريكية تعاقب سوريا؟ شو سلطتهون الأخلاقية ليعملو هالشي؟ حاوين أوسخ وسخات العالم و جايين يتشارفو علينا؟ أنا معارض للنظام السوري و مع ذلك كرامتي (أو مفهومي للكرامة) بيمنعني من أنو أوافق على انو بلد أجنبي يجي يفرض عقوبات على بلدي, حتى لو مالها مفعول, و حتى لو المقصود هو النظام و مش أنا... |
اقتباس:
بغض النظر عن انو ما شغلة أميركا.. لكن لو سلّمنا فرضاً انو عندها تفويض بانو تحكي باسم حقوق الانسان, اتذكرلي فرضاً.. شو اختلف الوضع من هالناحية من 2005 لحد اليوم؟ أنا شايف ما اختلف شي, نفس اللعنة و نفس الشي... ليش بهداك الوقت النظام السوري كان الشيطان الأكبر لألهون و هلأ حبيبنا ألا ربع و وفد جاي و وفد رايح؟ هاي مانا متاجرة بحقوق الإنسان السوري حسب المصلحة؟ فليش لازم نوافق على هالمتاجرة؟ أميركا بدها مصلحتها و فقط مصلحتها, فليش لحتى نقبل انو يتم استخدام قضايا سامية متل حقوق الإنسان, اللي لازم تكون أكبر من أي متاجرة و أكبر حتى من كل السياسة و علمها بتجارة المصالح؟ |
اقتباس:
مشكلتي اني ما عم اعرف شو اللي عم تعارضه المعارضة .. الحكومة ولا الشعب ؟! اذا الحكومة ففخار يكسر بعضه وخلي السياسيين ينبسطوا بمعارضتن شد ما بدن .. والأشخاص المعارضين للحكومة شخصيا ما عندي اي موقف منن ولا بل ممكن اني اعجب فين وبطريقة تفكيرن الإصلاحية .. وأكبر مثال ممكن اوردلك اسمه هوي كريم عربجي اللي تم ادراجه تحت اسم ( المعارضة ) بينما شخصيا بصفنه بأول قائمة الاصلاحيين . حتى وقت بصير النقد لهدف النقد بعيد عن الغاية الاصلاحية فقط توجيه اتهامات لتحقيق مكاسب شخصية على امل الوصول للكرسي ببقى محايد متخذ موقف ( فخار يكسر بعضه ) بس وقت بده ينط انسان ما .. معارضة نظام نبي مستبصر .. ايا كانت صيغته تكون .. وقت بده ينط سنجق عرض بوج الشعب وبيضرب بعرض الحائط مصلحة الشعب .. فهاد شو اللي ممكن قول عنه ؟! عم يأصلح ؟ عم يحاول يغير ؟ عم يحاول يوعّي الشعب ؟! شخصيا ما بنظرله بغير نظرة الاحتقار كونه بايع أرضه وراكض ورا مصلحته الشخصية . اقتباس:
بدنا تبقى المعكرونة والزيت والمحارم والسكر متل سعرا هلق ( بعد التضخيم يعني مش قبل سنة وقت كانت الاسعار هادية لسع ) ؟! تجربة التمينينات وقت كانت العالم توقف طوابير للحصول على تنكة سمنة مانا كتير بعيدة وما لحق التاريخ يطوي صفحتا .. وما بعتقد الجهات المهددة عندا مانع لتعيد تطبيقا . ماني خبير اقتصادي بس وقت عم تحكيلي بأن (لك اذا معمل سيارات عنا ) بتخيلك عم تحكي على دولة مستقلة اقتصاديا انتاجها بزيد عن استهلاكها بكميات عملاقة وتعتبر اولى الدول بالتصدير .. ما كأنا عم نحكي على سوريا اللي وقت بيضرب موسم الرز والحبوب ركضنا لتأمين حالنا ونستورد من بقية الدول . اقتباس:
ولنفرض جدلا بأن العقوبات موجهة فقط إلى هلكام حوت البالعين البلد ما بتتوقع في ظل الوضع الرأسمالي الاقطاعي اللي عم نعيش فيه بدنا نكون نحن اول مين بده يدفع الفاتورة ؟ :D |
مشان موضوع المعارضة ,,طبعا ..من دون خلاف ..شب من الشباب بالسجن ..احسن من مية الف واحد برا ..و مليون واحد متلي !! انا عم احكي و شرب فنجان القهوة ,,بس في شباب عم تعيش ظروف ما بتنوصف ,,اكيد الفرق كبير ...
بس انو ما بتظنو انو في كتير من الناس بتنبسط لما بتسمع خبر سجن الشباب هدون !! ,,يعني هدون معليش ينبسطو ,,,بس اذا انا انبسطت لأنو المسؤووليين السوريين ما صار فينون يلعبو بلاك جاك ب لاس فيغاس ,,فصرت انا غير وطني ,,, العقوبات يلي بتفرضها النظام و يلي بتبدا من الأحكام العرفية و بتنتهي بمحاكم استثنائية بظن انو بتزعج المواطن المسكين اكتر من حرمان المسؤول الفلاني من النزلة عا لاس فيغاس...بس هيك السوري ,,كيف ما بتضربو بيجي واقف ....ورا قيادتو , عنجد بتخيل السوري متل المصارع يلي مجبور يشارك بِنزال معروفة مسبقا نتيجتو ,,الكل متفق على النتيجة مسبقا ..و ما علي غير انو يوقف بوسط الحلبة و ياكل الضرب من هاد و من هاد ,,,و ايدو متصالبة بشكل ...خليني قولها ..للأسف بشكل ابله !! و انا مصارع متلي متل بقية السوريين ....صرت عنجد اتمنى انو يجي مين يضربني الضربة القاضية ,,,انا مليت انتو كملوا ..ما الكل عندو نفس القدرة على الأستحمال !! |
اقتباس:
شوف هالموضوع.. - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - ..مشان يزول الاستغراب بس:lol:لألك شغلي..مشان الشباب والسجن.. نحنا هاي الشغلي كتير اثرت سلبا فينا.. لأن في شباب من أخوية انسجنو..(وما ادراك ما شباب الاخوية) وهاي كانت صدمي للكل.. صدمي أنو شخص متل كريم عربجي يلي آل"انا بدي خلي الله يشتهي يصير سوري" صدمي انو شخص متل هاد ينسجن.. بتهمة اضعاف الشعور القومي.. وحقيقة انو نحنا مافينا نعمل شي..مافينا نحكي شي..وشعورنا بالعجز ..عملت حالة يأس واحباط كتير كبير.. ولو بتشوف المواضيع قبل 2006 وبعدها بتحس بالفرق.. لو مفكرانو اذا حدا اتجرأ وحكى وانسجن.. انو نحنا تقدمنا خطوة للحرية.. انت للآسف ..للآسف.. غلطان.. |
اقتباس:
اذا بدك تحول مصاري عالمصرف التجاري السوري مافينك .. بالمصرف بسوريا بيقلولك بتحولها عبنك باوربا و بتحط انو منه يتحوّل عسوريا لسوريا بس هون قال مافي هيك شي لانو مافي علاقات متبادله مع سوريا .. و هالشي صاير معي شخصيا مش جايبته من ولا جريده او اي مصدر ا علامي .. .. أنو كل واحد عم يقول انو ما في تأثير عالشعب السـوري يجي يحط عينه بعيني عمي حط عينك بعيني و خلعلي ياها ... ليش السورين اللي عايشين باميركا بطلو ينعدو عالشعب السوري مثلا ؟؟ شـخص عم يدرس او يشتغل بأميركا كل يوم بيتذكر وجود اشكالات بين الدولتين .. و بأبسـط الاشيـا لاعقدها يعني المسـج عالتلفون اللي هي مسـج الواحد بيبعتها ليقول هاي لاهله ليعايد حدن بعيد ميلاده بعرس جارتنا او بولاده قطتنا:lol: .. توقفت من فتره و لما اتصلت بشركه التلفونات انو اسألو شو المشكله قلي شركتنا وقفت علاقاتها مع سوريا .. و هلأ عن جديد صار لازم تحط رمز قدام رمز النداء السوري لما تتعرّف شركه التلفون على الدوله اللي عم تبعتلها المسج و ما تكتشف انها سوريا و تاكلك المسج .. و بتنخزك كرامتك .. في أنـّو وقت بدك تسافر بالمطار و معك جواز سوري بفتشوك كأنك عاملك شي عمله و بيخلو الكلاب البوليسيه تشمشمك و بينكتولك أغراضك فوقاني تحتاني و بتحس انو كرامتك عم تنخز عليك بس مافيك تفتح تمك .. أيـضا في أنـّو بعض الناس المطلعه شوي عالاحداث الخارجيه لما بتقلها انك من سوريا بتكون رده فعلها انو : نظامكون بعثي ؟ شو رأيك بالنظام ؟ دكتاتوري ؟ مرتاح الشعب ؟ و انو انت لو شو ما كان رأيك مانك متطر تتشارك مع كل الناس فيها برأيك على بلدك او حكومته بأي طريقه كانت .. يعني متل لما واحد بيسألك انو سمعنا صوات طالعه من عندكم من البيت مبارح فانو اهلك تخانقو ؟ مين بلش الخنقاه ؟ ابوك ضرب امك شي ؟ .. لذلك بتبتسم و بتغير المـوضوع و بتنخزك كرامتك كمان مرّه .. هدول الاشيا اللي بتتكرر و في كتير مواقف تانيه و لكن ما بتذك انو مر يوم ما تذكرت فيه وجود الاشكالات بين سوريا و اميركا اقتباس:
أيـّا كانت أعمال هالنظام الداخليه فهالنظام بضله بمثل وجه سوريا بالخارج و ما لازم يكون من حق اي حدا بالخارج يقرّب على هالحكومه و اللي بيقرّب عالحكومه بكون عم يقرّب البلد و انت شخصيا مهما كانت وجهه نظرك بهالحكومه ما لازم تسمح لحدا مش سوري يحكي عليها أو يمسها بشعره وحده .. لأنها طالما هي على رأس عملها فهي بتمثل سوريا سواء شئنا أم ابينا .. و سواء عجب الجميع هالشي او ما عجبهم . فرجاء اللي مو مأثره عليه هالاجراءات ما يعمم و يقول انها ما بتأثر عالشعب السوري كاملا يقول انو عمي انا مش مأثره علي وعلى شغلي و يشكر الله .. |
اقتباس:
ثانيا بستغرب انو في شخص عايش بأمريكا و بقول انو لازم المتغربين يدافعوا عن حكومتون برا !!! يعني اكيد حضرتك بتشوفي الDaily Show/Jon Stewart والColbert Nation و بتسمعي الكلام يلي بينحكى.. و هدا النوع من الثقافة يلي ما بيعرف حدود ...والله بعمرك سمعتي ديمقراطي عم يتحفظ على انتقاد سياسة الجمهوريين قدامك مثلا لأنو انتي سورية !! و القول انو النظام بمثلنا ..فهدا في كتير ظلم للناس ..لأنو اول شي ما حدا اخد رأيون بالتمثيل هادا!! ...ثانيا بتكوني حملتي الناس كلها مسؤلية سجن الشباب ,,مجزرة صيدنايا و مثيلاتها ..وكل الظلم اليومي يلي عم يتمارس ..ببلدك الأم ..... الكلام سهل من شيكاغو و باريس و لندن ..بس ليش لما الواحد بيرجع من هيك مدن عا سوريا بحس انو دخل معبد مو دولة و صورة الأله بكل مكان !! ..و يبقى منشوف شو نوع الكلام يلي بينحكى !! بعرف انو معظم الشباب متغربين و مشتاقين لبلدون ..بس هدا الشي ما بيمنع انو الواحد يحكي ! ..لأنو ما حدا عندو الحق انو يمنع !! |
اقتباس:
القصة مو بس قصة انو النظام او الحكومة هيي وجه سوريا للخارج ... القصة هيي انو كيف بسمح لحالي انبسط لما بلد .. متل اميركا .... عم تفرض عقوبات على سوريا (ان كان نظام ولا شعب) !! ويلي عم بيقول انو هالعقوبات ما عم تأثر ع الشعب .... فا مستغرب منو جداً ...كونو هوي مو عايش بالبلد ومو حاسس بالشي يلي عم بيصير ! مع العلم اني ما بعرف شو هيي العقوبات .. بس بعرف انو فيي تقييد اقتصادي عالبلد .... وبعمرك سمعت تقييد اقتصادي على بلد او نظام لبلد .. ما بيأثر على الشعب شيت هاد البلد ؟ وان كانت البلد مثلاً كلها لرامي مخلوف ... طيب ما ازا ضيقوا على رامي مخلوف مثلاً هادا الشي ما رح يأثر ع الشعب ؟؟! الخ .... :D |
اقتباس:
اقتباس:
يعني خليني ارجع شبه البلد بالعائله و قول انو وقت بتصير مشكله بيني و بين ابي .. فأنا ما رح اطلع امشي بالشارع و احكي على أبي .. و نهائيا ما من حقي اتقاوى بجارنا او بمختار الحاره حتّى ليحللي هالمشكله .. و كذلك امور الدوله الداخليه ما من حق اي طرف خارجي يتخدل لحلها .. اقتباس:
أمـّا انك خلطت الدنيا ببعضها بأمثلتك عن الاعمال الداخليه بالسجون و معتقلي الرأي و هالقصص فـهاد حديث تاني مش رح فوت فيه لانه بعيد عن الموضوع الاصلي .. و لكن بطلب منك اعاده قراءه ردي و التشديد على أنـّو عم احكي خارجيا بالعلاقات الخارجيه سوريا أكيد ما بتتمثل من خلالي انا و انت .. و بالمناسبه فأنا بشوف سياسه سوريا الخارجيه تختلف عن سياستها الداخليه مع بعض التحفظات و بتعجبني المواقف السياسيه الخارجيه لسوريا بكتير احيان مع بعض التحفظات ايضا .. اقتباس:
أنا جربت عشـت بسوريا و جربت عيش خارجها و لحد هاليوم 13\5\2009 فأنا مـصرّه أرجع عسـوريا بس اتخرج .. لأنو ببسـاطه البلد مسـؤوليتي متل ما هي مسـؤوليه أي شخص بيحمل الجنسيه السـوريه و ولأنـّو وقت رح يجي ابن ابني يقعد بحضني بعد خمسين سنه و يـقلّي تيتا ليـش هيك البلد .. فأنا وقتها بـدّي قلـّو و أكـدلو اني ما تـركت و مشـيت .. أنـي حاولت .. يـمكن ما أعـمل شـي تاريخي أو ما أعمل شي أصلا و لـكن شـعوري أنـي مش أحـسن من اللي عايش بالبلد يـكفيني لـحتى أشـعر بالراحه الداخليه تجاه هالموضوع .. و بالنتيجه من هون لاتخرج ما بنعرف شو بصير .. هلئ أنا ماعرفت انت كيف ربطت هالشي لكلامي و لكن أنا عم احكي عن خارجيا لما بتكون قاعد برا البلد و يجي شي صيني مثلا يحكي عن النظام السوري .. أي لو كان النظام السوري قاتلي أبي * مش رح بسمحله يحكي عليه .. لأنو ببـساطه بالنهايه طالما هالنظام على رأس عمله فهو يمثل سوريا بالخارج و مش رح بسمح لحدا يحكي عليه .. *قاتلي أبي : مصطلح للتعبير عن فظاعه الفعل المرتكب .. اقتباس:
يا عزيزي انت عم تطلع عالموقف من الزوم ان الممدد جدّا .. يعني هل انت حاسس انو فشولك خلقك الاميركان مثلا من خلال هالاجراءات اللي عم يقوموا فيها ضد سوريا ؟؟ أو متل ما عم تقول انت ضد الحكم بسوريا ؟؟ يعني اذا انت مبسوط هيك و مزهزه و مكيف ؟؟ فكتير تمام شو بدك أكتر من هيك ؟؟ |
اقتباس:
|
اقتباس:
بالفعل المقال ممتع جدا و في نواحي كتير صحيحة يمكن الواحد ما بينتبه الها بهيك قصص ... بس هادا الفرق بيني و بين صاحب المقال ,,هو كان عم يحكي بطريقة اكاديمية ,,,انا بحكي متل هادا الشخص يلي بيقعد بزاوية البار و بيبقى معصب و متشنج و عم ينتقد كل شي و مو عاجبو شي ..على اي حال كل واحد فينا عندو اسلوبو بالكلام و محدا مضطر يحكي بغير اسلوبو مشان يجامل حدا ..اسف لأنو عم احكي هيك ,,بس انا جديد هون و لاحظت انو لما غيري بيحكي نفس الفكرة يلي انا بحكيها بتكون ردة الفعل عليه طبيعية ..بينما انا.. الشاطر هون بدو يسمعني كلمتين و يهزلي بدني على الطالعة والنازلة .... مشان اكرم و بقية المدونيين و كل سجناء الرأي و الضمير ..خسارة كبيرة انو يكونو جوا السجن ...رجعت على ارشيف أخوية قبل و قريت ل عاشق من فلسطين ..ما فيني قول غير خسارة ,,,خسارة السنوات يلي بالسجن ...خسارة لألنا ... مشان هيك و مشان ما حس حالي اني صغير قدامو ,,,حبب اعتذرللشباب يلي فهموا انو انا قصدت اساءة ,,مع اني وحق كل الغوالي ما قصدت الشعب ..كان قصدي النظام ,,,, ماشي ...مناخدا اخوية ,,و ما غلط اذا الواحد اعتذر من اخو ,, اسف شباب ... ابو طوني ..ام الجود ,,سونا ,,و كل البقية |
اقتباس:
ومين قلك يا حبيب أنو الشعب كلو مع النظام! اللي مع النظام هن تلاتة لا غير: الأول طائفي ( يعني بؤيد النظام لأنو رئيس النظام من جماعتو ) التاني مستفيد ماديا و سلطويا من بقاء النظام التالت ينتمي لأقلية دينية تخاف حكما اسلاميا متزمتا اذا زال هذا النظام غير هدول التلاتة من النادر انك تلاقي, وعلى كلن هدول التلاتة لا يمكن ان يشكلو بأي حال من الأحوال أغلبية. بل ان اغلبية الشعب السوري معارضة لهذا النظام ولكنها اغلبية جبانة ان صح التعبير, ولا أعرف ان كان من حقنا ان نلومها على جبنها وذلك لأن 40 سنة من الارهاب الاجرامي الذي مارسه البعث الاسدي ولا يزال يمارسه من الطبيعي ان يزرع هذه الدرجة من الخوف في نفوس الناس. بالنسبة للعقوبات فلا اعتقد ان لها هذا التأثير الكبير ضد النظام, يعني لو امريكا بتحب تساعدنا كشعب سوري فياريت لو هي واسرائيل ترفع حمايتها عن النظام السوري على الاقل , وان تعزل هذا النظام دوليا ودبلوماسيا وتعقد المؤتمرات في المجمعات الدولية حول وضع حقوق الانسان , وحتى ان تفرض عقوبات قاسية جدا ضد النظام حتى لو زادت تلك العقوبات من فقر الشعب وجوعه , معلش فمن ناحية يضعف النظام ومن ناحية اخرى عسى انو يتحرك هادا الشعب الجبان ضد النظام من شدة تردي الاوضاع |
اعلى ما بخيلون يركبوووووه وسوريا صامدة غصبن عن الكل انشالله :gem:
|
اقتباس:
|
اقتباس:
يبدو بالشهرين هدون بأخوية ,,رجعنا تعلمنا تبويس الشوارب ,,, لا عنجد ..انا كان قصدي طريقة الصياغة ... بس اخد على خاطري ...انو اعتذرنا من الشباب و الصبايا ...و ماحدا كلف خاطرو انو يقول اعتذرك مقبول ! ..ما كنت بعرف انو اموضوع خطير لهيك درجة ...لك ما يكونو هدون متل رامي مخلوف و محجوز على ارصدتون بأمريكا !! لحتى هيك اخدينها جد زيادة كتيير !! بس حتى يلي متل مخلوف ما بتأثر عليه حجز الرصيد بأمريكا ..لأنو بكون عندو مئات الأرصدة بدول تانية ! |
| الساعة بإيدك هلق يا سيدي 01:42 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون