كاتب النص الأصلي : LaMoUsH (مشاركة 1073671)

هلا فيك خيتو :) واسفة هلأ لانتبهت للرد.. وانا هاد اللي بحكي عنو اسرائيل بتحاول (تهوّد) كل شي تطمس كل معلم من المعالم العربية في كل محل.. حتى الموسيقى والأغاني وكل اللي بتحكي عنو ما بتتأثر فيه بتنسخو ليصير جزء من ثقافتها هي.. والموضوع مش واقف عالمحلات والشوارع والاغاني الموضووع وصل للبني ادمين.. حتى اللي مش عايشين ضمن الاراضي المحتلة واراضي ال 48 في محاولات انو يطمسو هويتهم بس الضغ علينا اقل، الاحتكاك المباشر معهم، سيطرتهم الكاملة على التعليم اللي بتتلقوا، وأشياء تانية كتير غيّرت فيكم كتير، تعاملت مع ناس من عرب ال 48 بيستخدموا المصطلحات العبرية اكتر من العربية، بسمعو عبري اكتر ما بيسمعو عربي وفي نسبة منهم ما بتعرفش شو اللي بيصير بالبلد، ومرة تانية ما بقصد التعميم بس بطرح فكرة موجودة :)

اهلا لموش
صحيح انو اسرائيل بتحاول تلغي الطابع العربي وتسرق تراثنا وتجعلو تراثها .. هادا الاشيب معروف وواضح
اصلا لمى تروحي على تل افيف مثلا او عكا الجديدة او حيفا ما بتحسي او بتشعري انك ببلد عربي مسلم.. لانو فش اشي يدل على عروبة هالبلد الا للغة العربية يلي بتسمعيها من العرب وهني يحكو مع بعضهن او من النساء والمتدينات واللابسات حجاب .. بس ما بدي منك انو تربطي لانو احنا منسمع عبراني ومنحكي عبراني بأنو احنا ما عنا وطنية او ناسيين اصلنا وتااريخ هالارض يلي عايشين عليها .. لموش ما تربطي كل الجوانب او الامور ببعضها .. يمكن الاختلاف بيني وبينك انو انا بشوف كل شغلة او كل جانب لحالو والانسان ما بيقدر يهرب من واقعو والوضع المفروض عليه ويعيش لحالو
كل انسان بيتأقلم مع وضعو وواقعو ..


في يهود مغاربة ويهود مصريين ويهود عراقيين ويهود سوريين ويهود يمنين ويهود من كل محل في الوطن العربي كانو عايشين كمواطنين يحملون جنسية البلد اللي هم منها، في يهود سامريين كمان في فلسطين وهدول مش مع اسرائيل هدول مواطنين فلسطينيين الهم اللي النا وعليهم اللي علينا وعايشين معهم بتعايش كامل..التعايش مع اليهودي اشي ومع اليهودي الاسرائيلي اشي .. فكرة التعايش يعني حل دولتين، والحل هاد اسرائيل مش قبلانة فيه ومن ناحية انصاف فهو مجحف بحقنا لأن كل ارضنا راحت ما عنا سيطرة ع موادر ولا حدود برية ولا جوية ولا حتى عالبحر :) ما اتهمتك بعدم الوطنية بس فكرة حل دولتين فكرة ضد المقاومة..والتعايش يعني سلام يعني بدنا نبيع كل اللي عملنا ونرجع لنقطة الصفر..

حتى لو صار في دولتين وصار في دولة فلسطينية هاي الدولة راح تقوم حد دولة اسرائيل وبالحالتين ما في تحرير لانو نص فلسطين بعد ما تحررت .. دولة فلسطين الى جانب دولة اسرائيل هادات مش تعايش؟

العرب بكل مكان بالدنيا مش صعب ابدا يستجيبو لأي تيار بيحفزهم يصيرو عايشين عالنمط الغربي، انا ما بحكي عن حجاب بس بحكي عن شوية التزام بالقيم اللي عنا اياها، القيم العربية اللي بتخص المسلمين والمسيحين واليهود العرب واي انسان عربي، بيجوز في تقليد للغرب بمناطق منفتحة بس زي ما قلتلك قبل الضغط اللي علينا مش زي الضغط اللي عليكو لهيك صعب تقارني الوضع بالضفة بالوضع بالمناطق المحتلة عام 48 :)
طيب بدي اسألك سؤال شو بدو يصير لو صار في تعايش بين العرب واليهود وكيف بدو يصير الوضع؟
ممكن تبطلو تعاملو كطبقة دنيا تأتي بعد اليهود الشرقيين ؟؟ ممكن ما تنتقص حقوقكو ؟؟؟
بعد التعايش حتصيروا مواطنين تحملون الولاء لمين ؟!
وشو متوقعة التعايش يحققلكو؟
احترامي الك :D

كاتب النص الأصلي : نسمة حيفا (مشاركة 1070234)

ياهلا
يلي بغدر افيدك فيه انو اليهود لمى بلشت هجراتهن على ارضنا كانو يهاجرو من كل بلدان العالم
يعني منهن يلي هاجر من دول عربية ومنهن يلي من دول اجنبية
ما عندي فكرة كيف كانت حياة اليهود او نسبتهن بالدول العربية قبل بدأ الهجرة .. يعني ممكن ازودك بمعلومات تكون خاطئة لانو مش متاكدة من معلوماتي
بتغدر تشوف بجوجل تتاخد المعلومات الصح
ولحد إسا في بسوريا اقليات او تجمعات يهودية وبكل البلدان العربية مش بس بسوريا خاصة المغرب
يعني بالرغم من انو صار لليهود دولة من 60 سنة الا انو في يهود ما هاجرو وقت الهجرات ولحد إسا مش مهاجرين لأسرائيل .. مثل الاقليات يلي عايشين عندكو او بدول ثانية

كاتب النص الأصلي : Urhoy (مشاركة 1074501)

يا هلا بنت حيفا
عندي معلومات عن اليهود بسوريا قديماً وحديثاً... بس قصدي بالسؤال (ما وضحتو منيح بالبداية) شو وضع اليهود السوريين باسرائيل؟ وين متجمعين اكتر شي؟ الون نمط معيشة معين, أشغال او عادات معينة؟ هيك شي يعني.. لانو بعرف باسرائيل فيكي تميزي اليهود بين بعضون حسب المنطقة الي اجو منها, يعني اجتماعياً وثقافياً ..الخ
اذا عندك معلومات ياريت تضيفيها لانو عندي فضول اعرف هالشي.
كوني بخير