|
مما لاشَكَ فيهِ أنَ العُنف بـِ شَتى أشكاله ظاهرة مُتفشية وَ تصرف لا إنساني وَ مما لاشَكَ فيهِ أيضاً أنَ جَميع الأديان السَماوية حَثت على إعطاء المَرأة حُريتها وَ في الإسلام أعطيت المَرأة حُريتها " لكن " بحيث لا تخرج عن طاعة زوجها أو أهلها تلكَ الطاعة وَ الأحكام الإلهية وَ القانونية وَ الإجتماعية جعلت مِنَ الزوج أو الأب مُمثل الرب في المنزل وَ الآمر الناهي فيه وَ المالك لذلك الجَسد الأنثوي اللطيف وله حق التصرف فيه كما يشتهي وَ يشاء وَ إن اعترضت المرأة قانونياً على تلكَ الاعتداءات المُتوالية من قبل الرجل قد يتحجج بأي حجة وَ يهرب من قضبان العدالة أي أغلب حالات العنف لا يُعاقب عليها القانون العنف الجسدي ليسَ ظاهرة شرقية تسود مُجتمعاتنا بل تسود العالم بأكمله هناكَ عُنف أشد وطأة وَ قهراً للمرأة " العنف المَعنوي " وَ لا يترك آثار للكدمات نهائياً بل يحرمها من حقوقها الأساسية بالتعليم وَ العمل وَ الاستقلال الاقتصادي حتى في حق الإنتخاب هذا النوع منَ العنف يؤثر سلباً على شخصية المرأة مما يؤثرُ على نفسيتها إن العنف الجسدي وَ المعنوي ضد المرأة أمرٌ مستمر وَ سَـيستمر ما لم يتصدى له المُجتمع المُتمدن بمزيدٍ مِنَ الوعي وَ الحزم و ما دامَ هذا المجتمع يُخفيه وَ يَتستر عليه وَ ما دامَ أؤلئِكَ الجُناة لا يلقونَ العقاب عما اقترفوه المرأة كائنٌ إنسانيٌ لطيف سِمَتهُ الرقة .. فعاملوهُ بـِ رقة ,. تحياتي :D |
حاجبلك مقاربة الانسان المكبوت اذا فجأة وفرتله كل ماكان مكبوت عليه شو بيصير ألا يفقد توازنه
بعدين الامرأة المسؤولة منك لك الحق في تنمية شخصيتها ومساعدتها بالاعتماد على نفسها ثم تركها تختار بنفسها بعدين الامرأة اذا لم لها استقلالية اقتصادية فعبث |
اقتباس:
|
اقتباس:
تنمية شخصية المرأة أو الطفل لا تأتي بالعنف الجسدي أنتَ معي أم معهم ؟ ولماذا ؟ |
اقتباس:
في كتير رجال بيضربو نسوانون عالطالعة والنازلة بدون سبب وحجة ... هدول مابحكي عنون، يعني حالة موجودة بكتير مجتمعات طبعاً مع اختلاف واضح بالنسبة واختلاف طريقة تعامل القانون والقيم الاجتماعية معها.. بس المشكلة الكبيرة الي بمجتمعنا والي هيي المصيبة، انو الرجل العربي لما بتغلط مرتو معو (مخالفة بالرأي أو اهمال الواجبات الاسرية) بيلجأ فوراً للضرب وبعدين بيفكر انو مرتو رح تنسى الضرب والذل بمجرد بوسة او ضحكة وما بيعرف شي اسمو تفاهم بالحوار والنقاش = الشي بيميز "الانسان" عن غير كائنات.. وهالشي صار قاعدة أسرية، انو كون منيح مع مرتك بس فيك تضربها لما بتخالفك,,, والمراة كمان قبل ما تفوت لبيت الزوجية لازم تعرف انو في آمر ومأمور واذا ما عرفت هالشي فرح تتعلمو قريباً جداً!!! لأ وبتصير بعدين مقتنعة بهالشي وأنو صار من البديهيات، يعني طالما الزوج "بيستر عليها" وبيطعميها ويلبسها --> فَـ فيه يضربها اذا غلطت وخالفت أوامرو!. يعني الجريمة بجتمعنا هي انو الرجل بيتعدى على حقوق المراة وهي مقتنعة، وانا بصراحة بسميها عبودية، لولاها كانت المرأة رح بتبني بالمجتمع مو بس متل الرجل، ويمكن اكتر منو.. والعبودية هيي لما يقول "الذكر" انو طالما المرأة راضية ومستورة وما بتشتكي....الخ معناها مافي تعدي على حقوقا. اقتباس:
يعني فيني قول نفس الحكي الي حكيتو فوق تقريباً .. المشكلة انو الحلول لهيك مسائل مانا سهلة بمجتمعنا: يعني نحنا بنعرف الصح وممكن نتفلسف على غيرنا، بس ما فينا نطبقو ما عنا قدرة على كسر القيود الخاطئة -يلي صارت عادة اجتماعية-لأننا بنخاف من حكي الناس ما عنا القدرة على الاجتهاد والاستقلال بالتفكير لانو في ناس اخدت هالمهمة عنّا أكيد لازم يكون الواحد واقعي وخصوصا انو بمجتمعاتنا الشرقية في قيم وتقاليد حلوة بنفتخر فيها، بس الي بحكي عنو هني الشوائب الي لا العقل ولا المنطق ولا الشرائع بتقبلها... شكراً فادي |
اقتباس:
يا عزيزي .. كلشي بالتريج و اهم شي البداية الصح يعني اذا البنت تربت في عائلة متحررة و تحترم المرأة ... اكيد مع تقدم العمر تزيد الامتيازات .. و بالتدريج ... سؤال اذا كان الرجل انسان غير جيد ... تعتقد ممكن زوجته تربيه من جديد ؟؟ |
اقتباس:
هالحكي(الملون بالاحمر) كأنو مأخود من أحد مشاهد مسلسل باب الحارة .. طيب الرجل كمان اذا مشي على عواطفو بيبعد عن كلشي اسمو عقل.. فليش ما نقتصر هالشي عالمراة فقط. يعني ،مع احترامي الك، بس هالافكار هيي الي بتخلي المراة عنّا أقل قيمة من الرجل.. |
اقتباس:
انا مش فاهمة قصة انو ينمو قدراتها لانو انا بشوف انو المرأة قدراتها اكبر من قدرات الرجل بس شو بدي قول على مجتمع متل.... |
اقتباس:
|
المرأة مخلوق عاطفي وضعيف (( بسبب المجتمع )) دائما الناس بتوقف مع الرجال ضد المرأة ... وللأسف حقيقة مجتمعنا أنو المرأة لايمكن تحقق شخصيتها وذاتها وتاخد حريتها واسقلاليتها وكرامتها إلا تحت موافقة ورعاية الرجل ... لو بدا تعمل شي وهو مو موافق بكفيين بخليها تعمل الي بدو ياه .. هو صحيح فكرة العنف مرفوضة لكن مين بيسمع ... والمرأة احيانا في سبيل انو تعيش حياة من غير اهانات ممكن تتنازل عن كتير من حقوقها وفي النهاية بتوصل لمرحلة من التهميش لحد ماتقدر تدافع عن نفسها وتفقد شخصيتها وتصير مسيرة ...
المرأة الاجنبية لما بتكبر وبتقرر تستقل المجتمع بيتقبلها لكن مجتمعنا العربي بيرفض استقلالية المرأة ولو وحدة عايشة لحالها معناتها هي من هداك النوع ..... للأسف .... |
اقتباس:
|
اقتباس:
أنا عايشة بغربة ... وطول حياتي مبهورة بإستقلالية المرأة ونفسي عيش لوحدي نفس الحياة الأميركية وتكون الي حريتي وحياتي الخاصة من دون تدخل .. حبيت واحد وهربت من بيت أهلي لأتزوجوا وانا عمري 20... أربع سنين زواج وبنت عمرها 3 سنين وبعدين خنقني بحبوا ولازم ولازم ولازم ... لحتى انفجرت وتولدت عندي حالة تمرد وقررت اعمل الي براسي .. وطلعت اطلقت اخدت شقة وهي انا عايشة لوحدي .. أخدت حريتي ؟؟؟؟ لأ وستين ألف لأ ... رفض يجدد الفيزا والدولة بتوقف بصفوا ولقيت حالي انا ضايعة ... والأمل الوحيد الي كان موجود زميلي الي بيحبني والي عرض علي الزواج بس ليحل مشكلتي على اساس كل واحد بحالو وهي خدمة انسانية ... وبما انو ما كان في حل وافقت .. أي حرية وأي بطيخ .. بشوي تهديدات وكفين خلاني انسى كل حريتي واستقلاليتي وخسرت ذاتي وكل شي تاني وبعد كل شي عملتوا رجعت مرأة من عصر سي السيد وفرض علي قيود لاتحتمل .. وانا هلآ انسانة ماشية حسب قناعاتوا بغض النظر عن قناعاتي حتى ما إخسر كل شي باقيلي ... حاربت وتمردت وفي النهاية شو استفدت !!!!!!!!!!!!!!! للأسف اذا كان هاد مجتمعنا ومابيوقف مع المرأة بسبب العادات والتقاليد ... فما تتأملي كتير .... صح المرأة عندها قوة تحمل بس انت حبيبتي مو عايشة بأمريكا ... |
اول شي كان كتير صعب عليي اني اسمع قصتك... قلبي معك... وتاني شي انا كمان مرة بعارضك في قولك كلمة ضعيفة... واكبر مثال على هشي هو انت... بشوف فيكي مرأة كتيرقوية, الظلم خلاها تكون مستضعفة من قبل حالات سلطوية ما بينقال عنها بني آدمين, عملت كل شي بحسب ارادتها وبحسب قناعاتها, ودفعت تمن حريتها كتير غالي... بس بالاخير بشوف انو اكتر شي ظاهر فيكي وبيميزك هو القوة وشيء من الجبروت.... وافظع غلطة ممكن تقترفيها بحق حالك انو هلأ وبهي المرحلة تختاري الضعف والاستسلام... بس بكل الاحوال انا بفهمك وبفهم اختيارك.... وبدي قلك انو بعد هيك تجربة انت بالذات ما لازم تحكي هلحكي ولاوم تدفعي وتحثي كل مرأة بهدنيا انها تطلق صرختها وترخي العنان لحريتها....
|
برايي سببين اساسيين لهي الحالة.... الاولى نابعة من اساس ديني باعتبار انو الرجال قوامون ع النساء وانو الضرب مباح دينيا وانو حواء التي اغوت ادام الها مكانة منخفضة بالترتيب الاجتماعي .... هي بتوقع معظم الاديان بتاخد فيها وما فيها خلاف كبير
بس الحالة التانية يلي بلاقيها مشكلة حقيقية هي التربية الاجتماعية .. وباعتبار انو الام هيي المربية الاولى فالمشكلة بتتعلق المرأة بحد ذاتها وبكيفية تربيتها لاولادها .. المراة الام بتعلم ابنها انو هوي شغلة مميزة وبتحرض في بعض الحالات انو يضرب وانو يستبد كاثبات لرجوليتو .. حتى المرأة يلي بتعاني من استبداد زوجها او ابوها لاسف بتساهم جدا بانو ابنها يعامل زوجتو او اختو او بنتو بنفس الاستبداد يلي عانت منو .. يعني المراة بتساهم كمان بشكل مباشر وغير مباشر بظلم المرأة الاخرى ( وخاصة زوجة الابن او ابنته ) احيانا منعايش حالات متناقضة ضمن مجتمع النساء .. مثلا وحدة بتعمل مشاكل هائلة لزوج بنتها ع اساس انو عم يسيء معاملتها وبتكون هيي بذات الوقت محرض اساسي لابنها من شان الاساءة لزوجتو.. اكيد في حالات استثنائية موجودة بس غالبا ما بتترافق بكلمات متل ( خروق ) و ( مو رجال ) ( متل البنات ما خرجو شي ) الى اخر هالكلمات التافهة يلي غالبا كمان بتطلع من النساء الاخريات صح المجتمع ما بيساعدها لانو بيرفض الرجل يلي بتربيه من دون هالفوقية وهيي ما بترغب انها تدفع الضريبة لتغير عادات التربية .بس بتوقع انو اول خطوة تقع ع عاتق المرأة ذاتها المراة لازم تنزع حالها من هي التربية ومن تداعياتها عليها كامراة .. . صايرة الشغلة نوع من الدائرة المغلقة يلي منضل عم ندور فيها |
اقتباس:
طيب هاتي لنشوف ... خلينا نحط الرجال على جنب ونحكي عن نسوان ببعضون .. وهاتي رأيك ... بما أنو الأهل ما كانو موافقين على هل الزواج انبسطوا كتييييييييييير بالإنفصال ورحبوا فيي وكأنوا عرس بس بشرط إنسى اني مخلفة وانو عندي بنت لأنو اعتبروا عار .. وطلع في الأخير كل طلب الرجع مشان يرجع شرفون لا أكتر ولا أقل وهي عم احكي عن الوالدة فقط من غير تدخل اي حدا تاني بالعيلة .... وطبعا رفضوا رفض تام اني كمل حياتي بطريقتي مع اني مو صغيرة ... فإذا كان هاد الحال بين أم وبنتا ... مافي انصاف ... فكيف بدك اطالبي بحرية وانصاف المرأة بمجتمعنا ؟؟ احنا صرنا مهمشين .. والمجتمع عم يسايرنا .. مع العلم انو موضوع استقلالية المرأة بمجتمعنا تعتبر عار وشرف ... وحتى ما نطلع عن الموضوع الرئيسي ... العنف ضد المرأة مو بس جسدي ... العنف النفسي أشد خطورة وتأثير وممارسة عليها من قبل المجتمع عن العنف الجسدي.... العنف الجسدي سهل اصلاحوا بس العنف النفسي لا يمكن يتصلح بالمرة واثاروا بعيدة المدى .... |
الاسباب مش دينية بقدر ما هية اجتماعية وتاريخية بدرجة كبيرة...
أنا اؤمن كما الكثير من ابناء ديني وشعبي انو في فهم خاطىء للدين وتطبيق خاطىء للشرائع...اضافة الى انو حابة اصحح جملة إجت بتعليق sona 78 اقتباس:
كتير من العادات والتقاليد المأخوذة عن اجدادنا واجداد اجدادنا اجت ضد المراة وضد تقدمها..ولما اجت الاديان يا اما صار في تحريف للوقائع وللكلمات ..يا اما فهموا الكلام غلط وما عادوا يفهموا انو حياتنا اليوم تختلف عن الماضي والشي ياللي كان صحيح زمان يمكن ما عاد صحيح اليوم.. ع كل انا مش رح ومش عم ادافع عن الاديان لكن صدقا انا شايفة انو العادات والموروثات والتقاليد هية اللي بتؤثر اكتر لانو كتير مرات منشوف عادات اللي ما بتمت بالدين بصلة واحيان بتكون عكس تعاليمو لكن منطبقها وما بعرف من وين منألف الها احاديث وروايات تسندها..وازا ما لقينا منقول هيك عاداتنا " قالوا حسبنا ما وجدنا عليه آباؤنا " وشكرا ع الموضوع :D *هاد الرد ع السريع..يمكن الي رجعة..حسب الظروف =) |
| الساعة بإيدك هلق يا سيدي 21:59 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون