سد الفرات شو بدو يلحق تيلحق... صار عمرو 35 سنة و عنفاتو ختيرو و يا دووووووووب يتحرّكو... و كمان في (هالحكي مسموع بهديك المناطق كتير) مشكلة بنيانية بالسد... قال الخبراء الروس (و ضد رأي عدد كبير من مهندسين السدود السوريين) عملو العنفات أفقية, و العنفات طبعا لازم تكون بالنصف الأعلى من السد و لذلك اذا مستوى المياه منخفض (لأنو كمية المي اللي عم تجي أقل بسبب شح الأمطار و الخ من الأسباب) مافي كمية مي و بالتالي تيار يحرّك هالعنفات بينما لو عاملينها عمودية كان عالقليلة العنفات التحتانية دايما شغالة (طبعا ما بعرف شو مصداقية هالحكي... يبدو منطقي بس لا يعدو عن كونه حكي ناس)..

اما النفط... أي ايران حبيبتنا بس كل شي لوحدو شو خلّفتنا و نسيتنا ايران؟ مانا مجبورة فينا طبعا..

الحل يكمن بالبدء بالتفكير بالطاقات البديلة بشكل فعّال و على نطاق واسع (و خصوصي الطاقة الشمسية و طاقة الرياح) ... أكيد ما رح يكفو لكل البلد بس يشيلو كتف... و شوي شوي ياخدو مكان النفط اللي عدا عن كونو غالي هلأ و راح يغلى أكتر... ملوّث فظيع

شوفي مثلا طريقة توليد الكهربا بالاستفادة من طاقة تيارات الهوا




هالطريقة بلشو فيها بالمنطقة اللي أنا فيها من شي 15 سنة... و شوي شوي صارو يعتمدو عليها و هلأ تغطي 60-70 بالمية من حاجة المقاطعة و لهالسبب و رغم انو البيترول في تصاعد.. بفضل الطاقة الهوائية خفضو سعر الكهربا 12 بالمية خلال السنة هاي للاستهلاك المنزلي .. خفيفة و نظيفة و رخيصة (بس لازم تنحط بمكان عالي و عالساحل).. أكيد بسوريا ما رح تغطي نسبة كبيرة كون ساحلنا مو طويل كتير و ما عنا تيارات الهوا تبعيت المحيط... بس خلّي مثلا تغطي 40 بالمية من محافظات الساحل... شو ما كان هاد ضغط يخفف عالشبكة و يخفف استخدام البترول


و كمان الطاقة الشمسية شغلة كبيرة كتير... و ماشالله عنا بادية و عنا شمس ترقع فيها تمام.. من كم يوم شفت بالتلفزيون شركة اسبانية عاملة حقل خلايا طاقة شمسية بصحراء الجزائر مدري كم هكتار.. و قال هالحقل هاد خلال يوم مشمس عادي ينتج طاقة تكفي مدينة سكانها 50% نسمة لمدة 3 تيام ...

انت قرات الموضوع اللي حطيتو عن شركة سورية بتعمل بيت كامل مع تجهيزات طاقة شمسية وبتكلفة البيت تبع السكن الشبابي ؟؟
اذا مزبوط حكيهم رح نقدر نسغنى عن الطاقة الحالية بنسبة تتجاوز 70%

بلا كترة حكي .. بـ الحارات الـ مو مدعومة الكهربا بتجي ساعتين تلاتة عندون بـ الصيف ..

و الحارات الـ مو مدعوة بتقطع عندون الكهربا تلت أربع ساعات كل ؟؟؟؟؟؟؟ 40 سنة ؟

أي قريت هالحكي.. و قريت كمان انو كان بدهون يعملو مشروع قانون انو كل بناية طابقية جديدة (شقق سكنية) يجبروهون يحطو طاقة شمسية على الأقل بشكل يكفي سخانات المي ... لو يعملوها فكرة حلوة كتير و الله. لأنو توفير ضغط عالشبكة و توفير كلفة عالناس بالفواتير (هالقانون موجود بالدول الأوربية.. و اذا زاد عندك طاقة من خليتك الشمسية الشركة تاخد الفائض و تنقّصلك قيمتو من الفاتورة القادمة)

هلا سد فرات في قصة تانية انو في مشروع لاصلاحه وتظبيط الكهربا من خلال النهر للحسكة والرقة ودير الزور وقال اجت شركة اسبانية لتساويه بس قال بعدين ضغطت عليها اميركا وانسحبت( في خرط بالقصة) وقدمت شركة صينية وانسحبت لنفس السبب

وفي اقتراح انو تساعدون تركيا بس كيف ما بعرف

عالاغلب محطة التوليد هي بتشتغيل عتبريد الهوى ما تبريد المي ...
وعكل الاحوال التوليد ما كتير بيلزمو تبريد , التحويل الي بيلزمو اكتر

وهلق سوريا كتير مهتمة بمصادر الطاقة المتجددة
على سبيل المثال, اذا الواحد بدو يركب الواح طاقة شمسية ببيتو, الحكومة بتدفع نص تكاليف الانشاء

وهلق سمعت من جماعة انون رح يبلشو بتسويق المراوح الي بتولد الكهربة.. بس هدول مشكلتون انون غالين كتير كتير..


ببحبشة صغيري عن شوية ارقام بتتعلق بالموضوع لقيت انو بيكلف وسطيا سعر الكيلو الوات 1000 دولار .. وما بتوفي مع حدي انو يحط مروحة بتطلع كام كيلو وات بس.. فبيبلش الحكي بالميات .. وهلق بشكل عام اكتر الشي دارج هي مروحة ال 500 كيلو وات, يعني بتصير تكلف المروحة 500 الف دولار , يعني 25 مليون ليرة سوري, هدول لحتى نرجعون أذا فرضنا رح نبيع هالكهربة للمستهلك دغري وبسعر 1,8 ليرة سورية للكيلو وات الساعي .. بدنا نشغل هالمروحة 27777 ساعة .. يعني بيطلعو تقريبا شي 3 سنين وربع... هادا الحكي كلو اذا انتي عما تستخدم هالمروحة بطاقتة القصوى طول هالفترة .. وهادا الشي مستحيل... وسطي الحساب بيكون بال 8 ساعات عمل باليوم باحسن الاحوال وما بتوصل للاستطاعة القصوى بنوب
هلق كل هالحكي اسا بدنا نضفلو شغلتين كتير مهمين .. اول شغلة القسم الهندسي .. والي هوي انك توصل هالكهربة الي ولدتا بالمروحة للشبكة العامة .. وهادا الحكي مانو سهل بنوب ... يعني بيلزمك اول الشي استطاعة مستاهلة لحتى الواحد يساويلون شكبة ومحولات ومن هالقصص .. وهدول عطول حقون كتير كتير غالي ..
والشغلة التاني هي الشغلة الاقتصادية .. يعني مين رح يجمد 25 مليون ليرة مشان مروحة هوا بدا مدري كام سنة لتطلع حقا .. للمقارنة حق مولدة كهربة باستطاعة 500 كيلو وات بتشتغل عالمازوت ما بيوصل لل 3 ملايين ليرة!!!

خيو هادا الحكي كلو هلق بشغلة بحبشة صغيري عالانترنت وكتير اسألة لأب سعيد ( شيخ الشباب والله :gem:) ققدرت جمعون .. بس اسا الموضوع اكبر بكتير بكتير .. يعني بدك اسا تحسب انو اديش بقيان اسا نفط . واديش عما تلوث البيئة هلق بكل كيلو وات عما تأنتجو .. يعني بتصير شغلات بدا بحبشة اكتر بكتير . ومعلومات كتيرة اسا ما عندي اياها ..
بركي بعد سنتين تلاتي انا وغابي منقعد نشرحلكون اكتر عن الوضع:lol:


ومتل ما قلت انت قبل .. في عنا الطاقة الشمسية كمان شغلة ما طبيعية.. وهلق حكومتنا ما مقصرة بالموضوع .. ولو انون متأخرين شوي .. بس صل متأخرا خير من ان لا تصل ...


عكلن بغض النظر اذا انقطعت الكهربا بالشام او بواشنطن (اصلا عيب علينا نقارن الشام بكل عظمتة بشقفة واشنطن ,من كام مية سنة ما كانت موجودة بنوب:p) الدنيا رح تجي عيوم اسود اذا ما لقينا مصادر طاقة بديلة عن النفط .. وغير الطاقة الذرية الملوثة للبيئة اكتر من النفط

لا تأخزونا طولنا عليكون وفوتناكون بالف حيط .. بس الموضوع صار حلو كتير ومهم كتير كتير .. وجرجرني بالبحبشة والحكي اكتر واكتر
:D