|
انا مشتاقة لكل شي
للهوا للمي لريحة الياسمسن للشوارع للسرافيس للناس الي اذا تخوت إدامن بيفهمو شو عم تحكي مشتاقة اكل خيار وتفاح عنجد خيار وتفاح ... مشتاقة لريحة الحمص الي عم ينسلق والله هوا حمص ( الي عاساس ملوث) بيسوا دنانير الدنيا كلها |
مشتهي شم ريحة هوا بلدي واشرب من مية بلدي هاد اكتر شي مشتائلو
واكلة فول عند حج عبدو وش الصبح بكون عاملي شي خمس ست برتيات بعدين اكلة فول ولا اروع منها واطلع بباص الدائري الجنوبي اكفر شي ستين سبعتين كفرية عالطريق وانزل على باب جنين مشان اتذكر المأساة اللي كنت اعيشها لمى انزل مع ابي مشان يشتري خضرا وفواكة وانا ماشي معو حاج شو بدكون اكتر من هيك |
اشتقت لكي شي حنيت لأكل امي اكثر شي لأنو العزوبيه والغربه حرمتني من طبخها :cry:
حنيت ارجع لشعبنا وشوف حياتو كيف صارت وتراب ارضنا واهم شي انزل عالجبل لعنا واقطف من تفاح كرومها واكل من عنب عناقيدها .... ااااااااااااااااه كل شي ببلادي حلو .... ( خليها عربك يا مواطن :sick: ) .... |
مشتاقة للأمن أمشي بالشارع من دون ماكون خايفة
مشتاقة لأني اطلع الصبح على شغلي او جامعتي واركب السرفيس واقعد اخر كرسي بالزاوية وحط راسي عالشباك والشوفير يكون مشغل فيروز وعم تصدح وتقول دخلك ياطير الوروار رحلك من صوبن مشواررررر................................ مشتاقة اني اعد على شباك المطبخ ببيتنا اللي كان بيتنا مشتاقة اني اشطف درج البناية مع بنات الجيران ونرش بعضنا بالمي مشتاقة للأكل كلو وللأرجيلة مشتاقةةةةةةةةةةةةةةةةةةةة ةةةةةةة للمتة |
والله وانا كمان مشتاقة للامان
قال مبارح قررت اني روح مشي(بالمكان الي انا في الي هوي الكويت) لعند رفيقتي الي بتبعد 10 دقايق عن سكني طبعا سبيت مليون مسبة لانو مفكرينا الناس هنيك إننا (prostitute) : السيارات الي بتوقفلك كل الطريق ولحقي على طلعي وما تطلعي والله شي بيقرف الله يرحم ايام المشي ايمتا ما بدنا الصبح المسا .... دخيل ترابك يا حمص |
اقتباس:
|
يووووووووووووووووووه
مع إني زمان مااجيت عسوريا بس اشتهيت اطلع على الجبل واجلس بالساعات لأتذكر الساعات الحلوه اللي جلستها فيه ااااااااااااه ياجبل قاسيون حماك الله ياسوريا عن جد بكيتوني |
مع اني مو برات البلد ............
بس بظن اني مغترب .... ببلدي بشتاق لبلدي اللي كنت احلم فيها ..... او يمكن بشتاق لبلدي اللي كانو اهلي يرسمولي صورة الها ..... بعد ما كبرت ووعيت ..... صرت اعرف شو هية بلدي ..... صرت اعرف انو من المستحيلات اني ارجع لبلدي بطفولتي ....... باختصار انا مواطن بلا وطن ........بس مع ذلك بشتاق لوطني :cry: |
احسنت ميدو ممتاااااااااااااااااااااا اااااااااااااااااااز:deal:
|
اقتباس:
هي مأساتي اليومية انا مشتاق سافر واخلص من هل وضع |
اقتباس:
|
مشتاق لأن اخرج من غربتي
|
مشتاق لصحنايا وأهلها :cry:
|
مشتاقة حط رجلي بنهر بردى وضل اسبوع بعدها ما نام الليل من وجع رجلي:sick:
|
مالي مشتاق لشي .. ومابدي اشتاق ومافي شي خرج الواحد يشتقلو
هون الحمدلله الوضع مابخليك تشتاق لشي .. ولا بدك ترجع تشوف شي والحمدلله عايشين وبلا مانشتاق ;) وبتضل سوريا سوريا ام البلاد ومي بحاجتي ولا حاجة غيري ان اشتقلا او لأ |
اقتباس:
|
صحيح نسيت قلكن اني مشتاقة لأكلة تسئية يالله شو جاية عبالي :cry:
|
اقتباس:
|
اقتباس:
لا وحياتك لو مشتاق كنت حكيت ماعندي مشكلة مالي مطر اكزب |
اقتباس:
بس هيك احساس على كل حال لا تزعل شكلك مانك مشتاق ومتل ما قلت سوريا مانا بحاجة حدا يشتاقلا |
اقتباس:
|
اشتقتلكو جيت طل عليكو وروح
|
ضاع العمر
اه ...... والله هل المقال فتح علي الجروح اما بالنسبة لي اشتقت لأهل البلد ومزحهم الجميل والضحكات العفوية لانو بالغربة كلها وجوه عبوسة لا تعرف المزاح اشتقت لعادتنا الاجتماعية والسهرات مع الاهل والاصحاب اشتقت لرمضان وجو رمضان بالحبيبة الشام و قبل الافطار ومدفع الافطار والسحور والتراويح اشتقت للحارات الشامية القديمة وانا منها من باب سريجة اشتقت لصحن الفول والتسقية وميدان الشام والجزماتية وعمك بوز الجدي اشتقت للشادروان والربوة وسهراتنا فيها على نهر بردى حتى الصبح بس اكتر شي اشتقت له ولن انساه مهما عشت حبيبتي التي عرفت الحب لأول مرة معها ...اه على ذلك الزمان اكيد تزوجت .....الله يوفقها......ضاع عمري بالغربة هدر |
[quote=يمان Rooooonaldo;980852]:cry:
من قاسيون اطل يا وطني .. :cry: والله ورب الكعبة سهرة وحدة عقاسيون بتسوى بلاد الدنيا كلها .. والشاورما .. يا عمي بدك بالحكي .. هي النعمة الشعب السوري ما بقدرها .. :pos: أقسم بالله العظيم انو من اربع خمس تيام كنت قاعد و هبت نسمة هوا و اتذكرت قعدات قاسيون و الاركيلة و هيك قصص و الله نزلت الدمعة من عيني بس شو اكتر شي بشتقلو بالبلد اهلي رفقاتي حارتي زحمة شارع الثورة الضهر لك حتى باصات النقل الداخلي اشتقتلها في كتير شغلات ما كنت حتى لاحظها مشتقلها بياعين الكتب عالطريق هيك شغلات بسيطة ما منلاحظها بس هلق عم تقتلني هي التفاصيل |
لتر انبيت (نبيذ) براس التل فوق, وهوا مربعانية الشتا أحووووو |
اشتقت للحمدية,,,, و الشام القديمة,,,, و مطاعم الشام القديمة و باب توما,,,,,
و الله لما أنزل أطلع من باب المطار بحس بشئ بقلبي راح يطير,,,لكن للأسف الأاوضاع اللي بالبلد هي التي اجبرتنا ان نعيش بعيد.... شكرا على الطرح الرائع للموضوع.. بونيتا |
اشتقت لبنت اختي شام وللدكنجي بزاوية حارتنا وللضجة والمواعيد المفشكلة ولشرب المتة مع الجيران وكورنيش البحر ولريحة الهوا -بهالوقت بزهر الليمون وبتعبي ريحتو اللادقية-واشتقت للعفوية وكلمة اتفضلو لعنا نسهر ونعمل نفس اركيلة اشتقت لريحة البحر والمشاوي ع استراد تشرين
بحبك سوريااااااااااااااااااااا اااااااااا:hart: |
بالفعل سوريا مو بحاجة أنو نشتقلها لأنو لو بحاجة ما سافرنا نتغرب .. هي بالنسبة إلي و لولا أهلي فيها مابزورها إلا كل سنة يومين مع أني بحبها حب كبير كتير بس اتغيرت عليي كتير .............:cry:
|
حننا ولو كان في وسعنا
سعينا إليك على الأرأس إذا آنس الصب ذكر الحبيب ففي غير ذكراك لم آنس هواجس تثني إليك المنى ولولا المنى قط لم أهجس.. وإني وقلبي ذاك الرقيق يحن إلى صخرك الأملس وبلدتي ذل تميت الشعور فمنطقها الحر كالأخرس..! أحب بلادي لو لم أخف بها شر ذي الغدر ذي الأشرس.. يجادب قلبي إليها الهوى ويأبى المقام بها معطشي..!! جفوني ولا ذنب إلا الإباء وإن طاب من بينهم مغرسي وقالوا:تناسى الحنين فقلت: وهل بلبل حن للمحبس..! :D |
| الساعة بإيدك هلق يا سيدي 18:52 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون
