يا معلم سكران ....انا رديت على حكيك ما جبت شي من عندي انت كاتب شغلات غلط وانت فتحت موضوع التاريخ ..وحبيت صححلك معلوماتك.....مو اكتر من هيك ...وازا لاحظت انا جاوبتك على تساؤلاتك باكتر من رد بس يبدو ما بدك تقتنع انت ..وانت عم تتهمني اني ما باخود براي حدا وفوراً بتهمو بالعماله ....ليكو السيد فارس عجبني ردو لانو عم يناقش بمنطقيه ...بس انت هون بس لحتا تجرح مو اكتر من هيك وهي مو طريقه للنقاش ....بتعرف ليش نحنا لسا بكير علينا انو ناخود الديمقراطيه ..لانو اولاً الديمقراطيه سلاح خطير ..وما الا حدود لانو ما فينو حدا يحطلها حدود ...ومنهون الشعب السوري بكير عليه لانو اولاُ بدك احزاب ...ليكو صاحبك ابو شريك انا عن بحكي تاريخ قلبلي ياها طائفيه ومتلو متايل..وانت بتعرف انو الشعب السوري في كتير عالم لسا ما وصلو بتفكيرون للتعامل بوضع الدين على جنب ...بالتعامل على اساس الانسانيه اولاً و الاخوه بالوطن ثاناُ وبس ..عنا دائماً التعامل بحسب الدين ..وشوف انت من المنتديات بيبين معك ...بقا شو رايك يصير في عنا الحزب السني و الشيعي و الدرزي و الما بعرف شو ....منشان نحنا نكرس الطائفيه تكريس ...ولا تقلي انو ازا عطيت الديمقراطيه مارح يصير في هيك احزاب ..رح يصير وانا وانت متاكدين من هاد الشي ...لهيك انا بظن انو المواطن بينعطا الديمقراطيه لما بيوصل بتفكيرو لخدمة الوطن اولاً ..وطبعاً لا تقلي انو النظام هوي يلي خلا تفكير المواطن هيك ..لاء بالعكس انت بتعرف انو النظام عم يحارب الطائفيه و التكريس الطائفي ....بس هاد الفكر بسبب فكر واسلوب تربيه وانت بتعرف انو الطائفيه موجوده من وقت ما توفى الرسول ...مو من عام 1970 لحتا تقلي النظام ...

يا عيني انا بالعكس ما قصدي اجرح ولا شي واذا دايقتك بكلامي انا اسف يا عمي !!
بس انا بالعكس بحب اناقش اي حدا يكون عكس راي لانو يمكن اخود منو افكار او شغلات انا ما بعرفا !!
بس انا رديت عليك فوق اول الصفحة على قصة التعليم وقصص كتيرة كتبتا فوق من قهري وحبي بنفس الوقت لسوريا !!!
انا بس احكي اي شي ضد النظام البعثي بيفكروني العالم اني ما بحب سوريا !!!
او اني عميل !!!
او اني مع امريكا او اسرائيل !!
انا لو ما بحب بلدي وشايف انو هيك عنا الوضع مالو منيح ما كنت حكيت ووجعت راسي بالعكس كنت رحت ومسحت جوخ متل مابيعمل الكتير !!

انا على قصة التاريخ وشو صار انا ما جادلتك فيها لانو هاد مو موضوعنا اصلا !! ولو كنت انا غلطان او صح مارح يزيد شي او ينقص شي انا قلت هيك حطيت مثال صغير !!
طيب هي مو بالتاريخ بما انو انت مسلم مو قال ربك (وامركم شورى بينكم)
يعني هاد مو موضوعنا لانو الدستور عنا قريب للعلماني اكتر منو للاسلام !
وانا انسان علماني !
وعلى قصة الاحزاب يا اخي مين قلك انو رح اتصير طائفية ؟!!
ما هنن بمؤتمر البعث قالو انو رح يصدر قانون للاحزاب بس ممنوع ترخيص لاي حزب على شكل طائفي او ديني !!
يعني لاتخاف ماحدا رح يرضى انو يكون هيك انو رح اتكون احزاب سياسية بحتة !!
وبعدين انت ليش كتيير هيك مستهين بشعبك وانو ما بيعرف وانو اهبل ومن هل الحكي ؟!
يعني الديموقراطية سبب للتقدم وسبب للتنمية !
انت عمتقول انو شعبك ما بيفهم !
طيب لو جيت معك ما بيفهمو وماعندون حرية اختيار لانو مافي غير شي واحد ادامون انو عملو هيك او ما تعملو !!
يعني راي واحد بس ما بيكفي
ايد وحدة ما بتسفق
فلما تكون في احزاب سياسية لا دينية ولا طائفية وقتها بصير في اكتر من راي واكتر من برنامج واكتر من توجه وهون بصير القائمين على هل الاحزاب يعرضو برامجون على الشعب فهون الشعب بصير عندو اكتر من خيار وحتصير عندو افكار جديدة وبعدين وين هو بيقتنع بروح بيرمي حالو !
وبصير مرشحيين من الاحزاب لمجلس الشعب يعني بصير عنا مجلس شعب حقيقي مو علاك ومسخرة وبتصير ناس اتصوت ايه وناس اتصوت لأ وبتتشكل الحكومة على حسب مين فاز اكتر عدد من المقاعد وبعدين يااما بيرشحو كذا رئيس على حسب كل حزب مين بدو يرشح وتصير انتخابات شريفة ونزيهة على الرئاسة والي الشعب بصوتولو اكتر هو بينجح ووقتها ماحدا بيفتح تمو بكلمة !!

افهمت شلون معلم !! واذا بشار واثق من حالو انو كويس اذا صار في ديموقراطية وفي اكتر من مرشح اكيد رح ينجح ووقتها انا مارح افتح تمي على هل النظام بالعكس !!
فهمت موقفي خيوو
ولا تزعل مني
سلام

لك ما هوي هون الفكره ازا انت ما مقتنع بكفاءة حزب البعث ولا بكفاءه النظام ..على اي اساس بدك تقتنع بالاحزاب يلي رح يتم ترخيصا من قبل حزب البعث...بعدين انت ليكك حكيت رح يصير في احزاب ...بس بدا قوانين تضبطا ..زوبكرا بس تطلع الاحزاب انو رح تجو وتقولو انو هي القوانين وهي الاحزاب ترخصت من حزب البعث ولخدمة حزب البعث ....ورح يطلع علاكين كتير انو نحنا يا اخي بدنا ديمقراطه ,,,وبدنا نعمل حزب على اساس ديني وما حدا الو عنا
مزبوط ولا لاء......بعدين انا ما ني مفكر شعبي اهبل ..وما بيفهم..عفواً منك بس لاتحكي شي ما حكيتو انا انا عم قول الشعب لسا عندو تعامل على اساس طائفي ..مو ما بيفهم في فرق ...ازا انت وانا ما عنا هالشي مو معناتا انو كل الشعب هيك ....نزيل وشوف ...وقلتلك من منتدى اخويه و المنتديات التانيه شوف ...لساتنا عم نتقاتل انو المسيح انصلب ولا لاء.....ابو بكر احق ولا علي بن ابي طالب احق ...ياخي والله هي هم شعبك هلق ...
لك يا سكران والله الديمقراطيه سلاح ذو حدين ...انا عم احكي من مبدا الخوف عالبلد مو اكتر ...المشكله اني عم مر بتجارب يوميه ملموسه من عالم ما فيك تتخيل المستوى الثقافي يلي وصلولو ..طبعاً و العلمي ....مع هيك لسا في عندون نظره طائفيه رجعيه مدمره .....اذا هدول المهندسن و المثقفين هيك..مارح اعتب عالفلاح و العامل و الاستاذ و الشيخ وغيرو وغيرو لما بيتصرف هيك

حيلو كتير حكيك انا وصلني حقي تماماً بما انك لسا بدك تعمل بحث عن موضوع الخلافه فمعناتا انت ما بتعرف شي بنوووووووووب وعم تحكي شغلات ما بتعرفا ......على كل حال انا بانتظار بحثك بس ياريت يكون بحث علمي تاريخي وموثق علمياً بكتب تاريخيه لمؤرخين مو بكتب دينيه بعد ازنك يعني ...مع انو عالحالتين مارح يطلع معك شي غير يلي حكيتو انا....

العفو منك انا ما قلت انك جاهل ومتخلف ...بالعكس انت شب كويس ومثقف بس بتحكي بشغلات ماعندك فكره عندا ...وانت اتهمتني انو عم يعلموني التاريخ غلط ...وانا قلتلك انا بدروس تاريخ وشغلتي هي الشغله و معلوماتي مو جايبه من كتاب ولا مت كتابين ...صرلي اربع سنين عم بدروس تاريخ ..وعندي تعدد بالمصادر وهاد اهم شي ...
وقلتلك ناطرك وعلى مهلك خود وقتك انا ماعندي شي بس تخلص بحثك ردلي خبر شو رح يطلع معك...