|
اقتباس:
بتمنى تكون وصلت الفكرة بكل الاحوال شكرا فيروزة عالمرور :D |
اقتباس:
بس بلشنا بالحكي من هي النقطة رح يبلش الخبيط ورح نضطر نسكر الموضوع وانا حابة نكمل فيه لسه اذا في مجال:D |
انا ضد القتل الرحيم بجميع اشكاله لانو اذا بموافقة المريض فهو انتحار واذا بعدم موافقته فهو قتل
هلأ اذا قلنا انو كل واحد بدو يحس بوجع بروح ماخد حياتو اصبح كل الناس بتمنوا هيك وشو يقولو يللي مرضانين بالسرطان بيحسو باوجاع رهيبة وانا شايفة الشغلة عن قريب مو بحكي بس ... وتا قلك شغلة صايرة مع واحدة قريبتي مرضت مرضة عادية يعني رشح وكحة وهيك وانتقلت تا صار عندها مشاكل بالرئات وبالقلب وقعدت شي شهر بالمستشفى وهي مرة بتصحى عن حالها ومرة لا واكيد كانت تحس باوجاع مانا طبيعية واقترحوا علينا ناس نعمل هالشي مع انو ممنوع قانونيا عنا حتى انو في يوم وقف القلب عندها وضلوا يحيوا فيها لمدة نص ساعة تا عاشت كمان مرة ..... هلأ انا جبت هالشغلة تا قلك انو ما في شي مستحيل صحيح انو في معقول وغير معقول بس ممكن بالمرة اللي بيقرروا فيها يموتوا المريض يكون في عندو فرصة بس بالاخير انا بامن انو كل انسان بعيش حياتو يعني لو انو اجت الدقيقة يللي بدو يموت رايح يموت .... بقا بالاخر انا ما بامن بالقتل الرحيم وتسلمي على الموضوع المثير :D |
انا ضد القتل بكافة اشكاله رحيم ورجيم
|
اقتباس:
وهي اكيد لما بنحكي عن الموت الرحيم بنكون عم نحكي عن اشخاص معون سرطان او مرض من هالنوع التقيل هاد وبحالة كتير متأخرة من المرض يعني لما بيبطل يكون في امل :cry: |
انا مع القتل الرحيم بجميع انواعه
ولماذا سموه قتل رحيم؟ :?: هذا السؤال موجهه للي ضد الفكره |
اقتباس:
|
اقتباس:
شكرا الك :D |
اقتباس:
يا صديقتي لو نظرنا للجملة رح نشوف انو عبارة القتل الرحيم فيها الكثير من التناقض القتل يعني العدم وهالشي قبيح والرحيم ما بدها تعريف اما عن سبب بروز هالظاهرة في البلدان الغربية ومتل ما سعمت قانون هولندا بيسمح بالقتل الرحيم السبب هو باعتقادي الحكومة مصاريف العلاج وتكاليفو الباهظة بترهق خزانة الدولة اما لو قلنا انو المريض هو عم يوافق على قتل نفسه طبعا بعد يئس الاطباء من شفائه فهاد اسمه انتحار لكن بطريقة واسلوب مغلف بشوية انسانية على اساس القتل الرحيم في مهنة الطب ما في ولا يوجد وخلينا نراجع قسم الاطباء لما بيتخرجوا |
اقتباس:
بس لما بتفكر بالموضوع بشكل اكتر وبحالة المريض اللي رح يطلب هيك شي رح تشوف انو حالتو واصلة لدرجة الموت بالحياة يعني انسان بالغالب وصل لدرجة العجز المطلق او شبه المطلق وماعاد قادر ينتج اي شئ او يعمل اي شي حتى ابسط الامور متل انو ياكل او يشرب بدون مساعدة حدا وضيف عليها الآلام الجسدية الفظيعة اللي عم يحس فيها بتشوف انو هيك شخص وصل لحالة اسوء من العدم وهي الألم وبس الألم :cry: يعني بظن انو بس تفكر فيها هيك مارح تشوف الموت هون انو عدم...... بالعكس هوي رياحة بكل الاحوال انا هاد رأيي الشخصي ومرحبا فيك وبرأيك:D |
بالبداية انا رأيي مو مع القتل الرحيم...
ثانياً ... لما بنقول انو المريض وصل لحالة ميؤسة يعني ما عم يقدر ياكل ولا يشرب ولا عم يقدر يقضي حاجتو بنفسو وهو عبارة عن كتلة من بقايا لحم ع عظم وكل شي عم يتم عن طريق الاجهزة المساعدة للحياة ... هل يا ترا الموت ارحم الو ؟؟؟ طبعاً لا ... ليش لا ؟؟؟ لانو ما حدا عرف طعم الموت لحتى يرجع يخبرنا ويقول كان كان نزع الروح من الجسد وآلام هالنزع ؟؟؟ هاي شغلة ... طبعاً من جهة الدين ... الاديان السماوية ما بتسمح لهيك قتل ... لانو جوهر الحياة مقدسة هلأ مطالعتي للموضوع لقيت انو اصل الكلمة هي Euthanasia وترجمت هالكلمة للعربية بالموت الرحيم مو القتل الرحيم والمعنى بالانكليزي: Euthanasia: painless killing of a person or animal who is terminally ill, mercy killing واذا رجعنا لليسانيات رح نشوف انو هالكلمة معناها الموت الجيد او الموت دون آلم.. وبتنصف Euthanasia(اليوثانيجيا) إلى كم حالة: اليوثانيجيا الاختيارية ( Voluntary Euthanasia ) اليوثانيجا الغير اختيارية(Non Voluntary Euthanasia) اليوثانيجيا الإلزامي (Involuntary Euthanasia) وما يسمّى القتل الشفوق أو القتل الخلاصي Compassionate Homicide وما يسمّى مساعدة الانتحار (Assisted Suicide) هلأ القتل الرحيم او Killing Mercy متل ما قال انسان وبس انو القتل شي قبيح ودايماً بكون للمجرم والشرير اما كلمة الرحيم فبتكون للمحب ولله عملية مزج هالكلمتين بيمزج عند الانسان احساس داخلية بتخلي الشر خير يبدو والخير شر، طبعاً بالنتيجة هي قتل وتعدي على الحياة... مثال في هولندا الدولة المعروفة بهالقانون متل ما الكل بيعرف انو في اكتر من طبيب اعترف انو مارس هالموت الرحيم ع المرضى وكذبوا بشهادات الوفاة بشأن الموت... وصارت حادثة في امريكا انو طبيب قتل ما يقارب عن 130 مريض طبعاً تحت بند الانتحار بمساعدة الطبيب وهو حالياً بالسجن ... القانون بامريكا ضد الموت الرحيم وكمان هون بكندا القانون ضد الموت الرحيم ... وتعتبر جريمة ويعاقب الفاعل... انا بأيد فكرة انو فكرة الموت الرحيم ظهرت لما فشل الطب وزاد التكاليف ع اهل المريض ... ظهرت هالفكرة للخلاص ... برأيي ما حدا عندو صلاحية ليتخذ قرار بانو يقول هذه مثل هذه الحياة ليس جديرة بان تعيش ... وتحياتي لكِ امرأة من ورق ع طرحك للموضوع |
اقتباس:
خيتو برجع بقلك ما في دكتور وما في حدا بيقدر يحدد للمريض وقت محدد للموت يعني ما بيقدر يقلو بتاريخ كزا رح تموت بيقلو معك شهرين بس مو اكيد يعني ممكن يقلو خيو معك شهرين بس يطلع المريض من العيادة يطب يموت وممكن يقلو معك شهرين تسحب معو سنة يعني ما فيكي تقولي والله معو شهرين اذا بهالشهرين ما كان في دوا نازل على السوق رح نموتو موت رحيم هاي شغلات ما فيكي تحدديا يعني انا ما عم اعرف ليش ما بتعطو المريض فرصتو للاخير |
تسلمي سيدتي الرائعة عالموضوع الحلو، و الظاهر إنك مع الموت الرحيم، أما موقفي الشخصي سيدتي الغالية هوي متل موقف هاني داغر تماما، لأن الطب عميطور كل يوم، و كل يوم عميطلع ألف دوا و دوا، فما بعيد نموت شخص و بعد فترة نلاقي إنو مرضو اخترعولوا دوا، تاني شي في شغلة بالإنسان إنو متسرع، يعني ما دائما بيحسبها صح بالذات لما بيتعلق الأمر بالصحة و إرضاء الذات، بتلاقي الإنسان دائما بدور عراحتو حتى لو إنها ضد مصلحتو، فمن نقطة هالضعف هي إجت فكرة الموت الرحيم. أنا من زمان كنت مآمن بهالفكرة و مآمن بنفعها، بس لما سمعت و شفت قصص كتيييييييييييييييير من هالنوع بصراحة اقتنعت و غيرت رأيي، و القصة اللي قلبت الموازين(القشة التي قسمت ظهر البعير) صارت مع صديق للعيلة، كتير عزيز علينا، إمو عمرها شي 75 سنة، دخلت بغيوية، و ضلت على هالحالة شي سنة إلا شوي تقريبا، و ولادها و عيلتها خلص، نهوا الموضوع و قرروا ينهوا حياتها و يريحوها من هالعزاب( الأهل بهيك حالات بيتعزبوا أكتر من المريض) و بالفعل الجماعة جهزوا التابوت و جهزوا مراسم الجنازة و حتى نفسيا تهيؤوا للموضوع، و بيوم من الأيام بتفيق الإم و بتتحسن و بيضطروا يلغوا كلشي عملوه و ما خبروها باللي صار، و ماشاء الله، عاشت بعدها قريب العشرين سنة، و عدت التسعين و بالأخير ماتت موتة عادية.
و صدقيني هي قصة وحدة من بين ألف قصة، و في فلم اسمو (the dead zone) عملوه مسلسل بيحكي عن نفس الفكرة، واحد بفوت بغيبوبة لمدة ست سنين و بيوم واحد و فجأة بيرجع حتى أحسن منما كان، فدائما العجلة و الضعف ما لازم نستسلملهن، لازم نقاوم و نحارب لحتى آخر نقطة و مهما كانت النتائج.:gem: :gem: :D :D |
اقتباس:
هاد ياسيدي بدي علق اول شي على فكرة انو ماحدا جرب احساس الموت ولهي يمكن اصعب من ألم المرض....... بس بدي قلك انو هالمريض متل اي انسان رح يمر بتجربة الموت اولا واخرا يعني الموت الرحيم ماهوي المسؤول عن مرور المريض بهي التجربة هوي بس تقريب الها ومنشان انو مصطلح الموت الرحيم بيخلي الخير يبين شر والشر يبين خير بحب قلك انو بالحياة مافي شي اسمو خير مطلق او شر مطلق ومافينا بالاصل نقول انو هالشي شو ماكان هوي خير بالمطلق او شر بالمطلق يعني مافينا نقول انو الحياة بكل الظروف هيي خير والموت دايما شر يعني مثلا بالعمليات الاستشهادية متل اللي قام فيها مالك وهبة وسناء محيدلي تحول الموت برأيي عالاقل لبطولة ودفاع عن الوطن واللي هني خير يعني خلينا نعطي حق للمريض هوي يقرر انو اي فيه خير اكتر حياتو او موتو واخر شي انو لما قلت انو ظهرت هالفكرة للخلاص وخليتها تبين انو خلاص لفشل الطب وللمسؤولية المادية للاهل وبس اما هيي وبكتير حالات عم تكون خلاص للمريض من حياة صارت مو مستاهلة برأيو هوي بالدرجة الاولى...... يعني خلاص للمريض اكتر ماهيي خلاص للطب وللاهل وشكرا كتير اسيرو على رأيك وعلى المعلومات اللي عطيتها :D |
اقتباس:
ومنشان الفترة اللي بقيانة للمريض اكيد مابقول انو حكي الطبيب اكيد 100%..... معك حق انو ممكن بحالات قليلة يقولو الاطباء ماضل الو غير شهرين ويعيش اضعافها...... بس برجع بقلك انو لحتى ينزل الدوا عالسوق مابظن لا ست شهور ولاسنة رح تكون كافية..... ليش؟؟ لانو الدوا اول شي بدون لحتى يركبوه بشكل صح وبعدين يتجرب اذا كان بيشفي المرض والشغلة الاخيرة واللي بظن انها بتاخد وقت لسه اكتر هوي تجربة شو الاعراض الجانبية واللي بتظهر بكتير اوقات بعد انهاء العلاج..... يعني مابدنا نشفيه من مرضو ونحط فيه ألف علة ومرض تاني بقى لحتى نعمل كل هالفحوص والتجارب مابظن انها بتخلص بسرعة وخلال شهور :D |
اقتباس:
هلأ منشان التطور العلمي وايجاد الادوية فرديت عليه بردي مع هاني واما منشان الامثلة اللي ذكرتها بحب قلك انو منشان الفلم اللي حكيت عنو هاد بالفعل فلم ومن الخيال تماما لانو مستحيل انسان عاش بغيبوبة لست سنين وفجأة يرجع متل ماكان..... يعني عالاقل بدو فترة طويلة من التأهيل العضلي لانو بعد ست سنين بدون حركة بيصير مشاكل كبيرة بالعضلات على الاقل ...... يعني خيال ومنشان المثال التاني اللي ذكرتو..... هاد اي مثال واقعي بس طيب شو نسبة هيك شغلات وهيك قصص من نسبة الناس اللي عم يوصلو لهيك مرحلة وبعدين يموتو؟؟؟ وبعدين منشان رأيي برجع اكد انا مع الموت الرحيم بحالة وحدة وهيي وعي المريض على وضعو وموافقتو واصرارو كمان عالموت الرحيم..... يعني انا عن حالي ضد انو نوقف حياة شخص غير واعي ويمكن يكون بيتمنى يتحسن بقى خلينا نعطيه هيك فرصة بالاضافة لانو هيك شخص بهيك حالة مانو عم يتألم يعني حياتو مافيها عذاب كبير الو :D |
i will be back :D
because i don't have arabic keyboard |
اقتباس:
لقلك ما في واحد بيتمنى الموت لحالو هلأ ايمت بيتمنى الموت وقت بيفقد الامل تماما بالشفاء طيب وقت بيقول انو بدي موت موت رحيم ليش ما بعطي امل انو مثلا ممكن يكون بغرفتو يجي واحد من برا هيك ومنفعل واي والله اليوم سمعتلك خبر بالتلفزيون انو لقو دوا لمرضك وبدو ينزل خلينا نقول شهر الجاي (هادا كمثال بسيط ) ولو انو خبر كزاب بس بتلاقي المريض نفسيتو تغيرت بتلاقي انو كانو تجددو الشهرين اللي بقيانيلو يعني انا ضد انو تستلم لارادة المريض المريض بيكون بيتمنى يموت موت رحيم مو من الالم بس كمان بجوز شايف عيلتو عم تتعزب شايف عيلتو ما عم تقدر تعالجو هون بيتمنى يموت فيني سمعو بين المرة والتانية انو نحنا ما النا غنى عنك وانو الله يقوملنا ياك بالسلامة وترجع بيناتنا وهيك من هالحكي بتلاقي كمان بطل يفكر بهالاتجاه هادا برجع بقلك انا ضد الموت الرحيم لو شو ما كانت الاسباب |
انا كمان ضد الفكرة
حتى لو مافي أمل بتضل الشغلة شغلة انو لو مافي أمل يرجع يصح ماكان هالمخ ضل شغال او الدماغ او شو ماكان اللي ضل عايش انا وقت خلقت كان عندي اخت توأم. كانت أكبر مني بعشر دقايق المهم الدكتور الآدمي سحبها بالفاكيوم مو بأيدو. راس اختي كان كتير هش والدماغ كتير تضرر فقدت كتير وظائف حيوية يعني ماكانت تشوف ولا تسمع ولاتحكي وكانت بوجع لايحتمل على طول تبكي. لاتقدر تاكل ولا تنام. يعني لمدة تلت سنين كانت حياة اهلي لاتحتمل وفوق كل هالشي امي رفضت حتى تبعتا على اميركا. خالي قللا انو بتعيش بس مارح تشوفيها مارضيت بعمرهون مافكرو بقصة الموت الرحيم مع انو الكل عرفان انو البنت فاقت اليوم بيجوز بكرا ماتفيق ويمكن انا او اي حدا تاني لو بنتي بدها تضل عشرين ولك مية سنة على هالحالة مابفكر اني آخد هيك قرار اللي بآمن فيه كتير انو الحياة اقوى من الموت وعلى طول في امل انو هالمريض يعيش حتى لو الامل منتهي مانو حقنا ابدا نتصرف هيك تصرف وننهي حياة الشخص حتى لو بطلب منو هالشخص اكيد عم يطلب هيك تحت الوجع, بس لو بيوم من الايام خف وجعو اكيد رح يندم على الفكرة ومتل ماقال هاني يعني اللي ميت ميت هيك هيك بيقول انو صبرت كل هالصبر مابصبر هالكم يوم الباقيين؟ الله لايحط حدا بهيك موقف واذا بدو يموتنا يموتنا هيك خبط لزق لاوجع ولا من يحزنون |
اقتباس:
اول شي الالم الجسدي بس اكيد لحالو مو كافي ابدا لاني اتمنى الموت تاني شي متل ماذكرت انو رح حس بوضع اهلي والي بحبوني واني سبب بالعذاب الون وتالت شي واهم شي اني لما بوصل للعجز وبعرف انو مافي امل او يمكن امل خفيف يعني مابيتجاوز الواحد بالمية انو اطلع من هاد العجز رح حس اني فاقدة انسانيتي وهاد اللي رح يخليني اتمنى الموت ورح تكون امنية حقيقية يعني انا بحس بانسانيتي لما بكون قادرة على العطاء انو اشتغل شي فيد فيه المجتمع بشكل عام حتى لو كان العمل بمجال وظيفة صغيرة بس اكيد عم كون عم ساهم اني مشي شي للمجتمع او يمكن يكون العطاء انو شوف شخص تعبان وواسيه بكلام او بهدية صغيرة او بلفتة تخليه يرتاح اما لما بوصل للعجز وانو غير قادرة اعطي اي شي لاي انسان وكون من هلأ لاخر عمري متلقية وبس عن جد رح حس اني فقدت انسانيتي ووقتها الموت اريحلي بكتير هلأ كلو بيضل خيال لوضع ماعشتو وبتمنى ماعيشو ومابعرف يمكن اذا بعيشو بالواقع (بعيد الشر) تتغير افكاري بس عالاكيد في ناس عايشتو بالواقع ومتمناية الموت كتير بس المحيطين فيون ماعم يحاولو يتفهمو هالحاجة اللي عندون وتحياتي :D |
هلأ خلال قرائتي للردود طرق مخي سؤال وهو:
لو في يوم صادف مريض ميؤس من شفائه يعني احتمال يموت باي لحظة وهو مغذى بجهاز تنفس اصطناعي وحيد بالمستشفى وبنفس الوقت اجى مريض شاب عامل حادث ومتضرر صدرو من الحادث والاطباء أكدو ع عيشو اذا تم وصل جهاز التنفس الصناعي الو ... وطبعاً ما في بالمستشفى غير جهاز واحد ... هل يا ترا يحق للطبيب فصل الجهاز عن المريض الميؤس ووصل الجهاز للمريض الشاب ؟ حتى لو طلب المريض الميؤس ذلك... |
اقتباس:
بس انتو عم تحكو انو اذا خف وجعو واذا تحسن وضعو...... بس ليش ماعم تفكرو بانو احتمال يكاد يكون معدوم انو يتحسن وضعو وصدقوني انا عن حالي بفضل انو اذا وصلت لهيك حالة موت لحتى حافظ على احساسي بانسانيتي...... يعني موت عندي احسن بكتير من انو عيش وكون مجرد عالة عالاخرين ورح كون عم حس حالي حشرة طفيلية اكتر من كوني انسانة يعني امنية الموت امنية حقيقية ومانها مجرد طلب تحت الالم الجسدي |
اقتباس:
بس برأيي اخلاقيا وانسانيا بيحق الو وهاد اللي لازم يصير شكرا اسير:D |
اقتباس:
وقت بيصير مستحيل بيموت منو لحالو بيجوز لو كنت انا الشخص اي بطلب اني موت ( مع اني متعلقة كتير بالحياة ) بس اني انا آخد هيك قرار بحق حدا مستحيل لو شو ماكان لو بدو يكلفني عمري مابتخذ هيك قرار |
اقتباس:
ممكن يصيرو يجو الطلاب اللي عم يدرسو طب ويعملو دراسة عن مرضك عن الاعراض عن كل شي كمجال للبحث العلمي او هيك شي وهيك انتي بتكوني عم تفيدي المجتمع لما المرض او العزاب او الاعاقة بدن يخلوني افقد انسانيتي ما كنت شفتي واحد عندو انسانية بالنسبة لسؤال اسير اكيد لاء ما بيحقلو لانو مستحيل حدا يحدد اذا الانسان مفقود الامل منو او لاء لانو الانسان ما بيضمن شو رح يصير معو لبكرا فمستحيل تقول انو هالختيار رح يموت وهالشب رح يعيش ممكن الشب يموت حتى لو الاطباء اكدو على عيشو ما حدا بيقدر يحدد هيك شغلي وهيك بتكون خسرت التنين بالنسبة لرد امراة من ورق التاني ما عم نحكي اذا خف وجعو لاء بالعكس عم نحكي هوي وبقمة الوجع وقت بتعطي امل الا وما تتغير نفسيتو ويتحسن ولو بشي بسيط |
اقتباس:
بس طالما بنتخيل انو نحنا فعلا ممكن نتمنى الموت والرياحة ليش بدنا نحرمو لغيرنا؟؟ |
اقتباس:
يعني فيون يعملو الدراسة على جثتي بشكل يمكن افضل بالاضافة كتير ممكن اتبرع باعضائي الغير متضررة من المرض لشخص بحاجتها لحتى يعيش حياة سليمة بالمية مية واما عن نظرتي لفقدان الانسانية انا ماقلت انو المعاق او المريض او العاجز لازم يفقد الانسانية بنظر الاخرين بالعكس هاد اكتر واحد ممكن ولازم يكون انسان بنظر الناس...... بس انا بعد مابكون عايشة سنين طبيعية ومتعودة على العطاء بدرجة معينة وبعدين اعجز عن هالشي رح افقد انسانيتي بنظر حالي وهاد الشي الصعب |
يا عيني خلص انا فقدت الامل اقتنع منك وفقدت الامل انو تقتنعي مني احسن شي لاني فقدت الامل يمكن الموت الرحيم :p
رايك وموضوعك وطريقة نقاشك تستحق ان نرفع لها الشابو تحية الك :D |
اقتباس:
لو كنت بهيك موقف واني عم اتألم وبتمنى الموت وطلبتو من اهلي صدقيني رح كون من جوا عم اتمنى انو مايقبلو ( it's just me ) مابعرف بيجوز بحكم طبيعتنا العاطفية وتربايتنا الكتير عاطفية وانو مندخل العاطفة قبل العقل بكل شي بحس هيك موضوع مرفوض بآمن كتير انو الارادة بتعمل المستحيل لو نحنا حسسنا هالمريض بمحبتنا وانو نحنا بدنا ياك تكون معنا وترجعلنا وتعيش معنا احتمال كتير هالشي يعمل أثر جزأ كبير من علاج كتير من الامراض هوي نفسي والارادة بتلعب دور كتير كبير مابعرف بالنسبة الي مافي شي بالعالم بيبرر هالتصرف انو شو بدو يكلفني مصاري تعب سهر ؟ بس انا هالشخص بحبو ولما بحب شخص بفديه بعمري كلو بيجوز عم فكر بأنانية شوي انو بحالي بس ماعم فكر بالمريض بس أد ماكان متل ماقلتلك بالنسبة الي مافي شي بيبرر هالتصرف ومشان موضوع الانسانية اللي بيفقدا الانسان: في كتير ناس بتعمل حوادث وبتصير عاجزة بشكل كامل. بتاكل وبتشرب وبتحكي بس مانها قادرة تقدم شي وهي عالة كاملة على عيلتا ياترى بتكون فقدت انسانيتا؟ |
اقتباس:
لولا ارائكن ومشاركتكن المحترمة كان صار الموضوع بخبر كان |
اقتباس:
اما منشان فكرة الانسانية فانا وضحتها برد سابق انو الانسان اذا عجز ممكن يفقد انسانيتو بنظر حالو ومو بنظر الاخرين |
اقتباس:
أما مشان الفلم أنا مو قصدي التفاصيل اللي فيه، عمبقصد الفكرة، إنو في كتير ناس تعذبوا سنين، إي سنين، و ما استسلموا لا هنن ولا أهاليهن، فخلي دائما عندك أمل، ما تستسلمي لليأس و للقرارات المتسرعة، إنتي عمتتعاملي مع روح بني آدم، مو قرار عادي يمكن يمر بحياتو و إذا طلع غلط بعدلوا بعدين. و الموت من الشغلات اللي لازم نتركها تجي هيي عراحتها، مو نحنا نتحكم فيها، و مو لازم نخل بتوازن الطبيعة أو نتدخل فيه. |
اقتباس:
اهلين ابو طريق :D هلأ منشان الفكرة الاولى انا معك لحد ما..... يعني اكيد مع اني مع فكرة الموت الرحيم كمبدأ بس مارح اقبل باي شكل انو يتلبى طلب المريض من اول مرة ولا تاني ولا عاشر مرة بالعكس لازم كل ماطلب نحاول نحسسو باهميتو وغلاوتو عنا ونعطيه امل بحيث انو اذا كان اخد هالقرار بلحظة ضعف نخليه يتراجع عنها اما اذا ضل مصمم على هاد القرار وقتها لازم نحاول نفهم وجهة نظره بالموضوع (اللي ممكن تكون قوية ومانها عبارة عن لحظة ضعف) ونحترم رأيو اما منشان الفكرة التانية وهيي انو الانسان مالازم يتدخل بموضوع الموت واخلال توازن الطبيعة..... طيب ابو طريق العلاج شو هوي؟؟؟ هوي عبارة عن محاولة شفاء انسان مريض ولولا هاد العلاج رح يموت يعني العلاج هوي محاولة للتدخل بالموت واخلال توازن الطبيعة ومع ذلك مابظن في انسان بالوجود رح يمانع انو نقدم العلاج لشخص مريض طالما انو هالعلاج فعال :D |
اقتباس:
أما ردك التاني أنا ما قصدي ما نعالج المريض، لأن هي ما دخلها بتوازن الطبيعة، أنا عمبحكي عن الأمور المصيرية متل الموت، هي الإنسان ما بحق للإنسان يتدخل فيها، لأنها ماشية بنظام معين، ما تاخدي حكيي على أساس إنو ديني، لأ على أساس إنو الطبيعة هيي اللي بتتحكم بالبني آدم، و بعدين بدك تجي للصح أنا بآمن إنو علاج كل الأمراض موجود بالطبيعة، مو ضروري يكون بالكيمياء. |
اقتباس:
وبالرد عالقسم التاني من كلامك حبيت قلك انو لما بدك تمشي مع الطبيعة وتراعي التوازن اللي فيها فلازم تلاحظ انو بالطبيعة الوضع الطبيعي انو المريض بمرض شوي صعب انو يموت وبلا ادوية ولا عمليات جراحية وبلا شي وعلى هاد الاساس بيمشي التوازن بالطبيعة بس لما نحنا كبشر دخلنا بالانسانية وانو بدنا نعالج المريض ونشفيه ونردلو الحياة اللي كانت رح تروح منو وقتها اخلينا بالتوازن الطبيعي ولاحظ من اثارها حاليا هيي الكثافة السكانية الهائلة...... يعني اجبار الانسان بالاستمرار بالحياة هوي الاخلال بالطبيعة والتلاعب بالموت والحياة وعلى فكرة الموت والحياة وجهان لعملة واحدة يعني لما بترد لانسان الحياة عن طريق العلاج بتكون بعدتو عن الموت وبالتالي بتكون لعبت بالموت :D |
اقتباس:
بس بالاخر اسمو ::: "قتل" |
اقتباس:
درر .... 100% صح .... مية وردة الك :D |
اقتباس:
المهم، شكرا كتير إلك سيدتي لأنك طرحتي موضوع الموت الرحيم. |
يلعن ها بكيتوني
اول مرة بعد زمن طويل بيصير هيك نقاش محترم بدون تجريح باخوية وينك يا نيرفانا :cry: |
يا ستي اذا بدك الرأي الشخصي بقول لك ان التكنولوجيا الحديثة قدرت توصل لمرحلة اطالع فترة تعذيب الانسان يعني مثلا متل الملك حسين الله يرحمه بقي 3 ايام عايش وبنفس الوقت ميت يعني كل اعضائه ميتة باستثناء قلبه . حتى القلب كان عايش عن طريق الأجهزة :pos:
وبنفس الوقت ما بتقدري تقولي انه يموت أفضل له لأنه نفس بشرية ولا يحق لانسان ان يتحكم بها . مشان هيك ما بعرف انا بقول انه لكل حالة في الها اوضاعها الخاصة :? |
| الساعة بإيدك هلق يا سيدي 06:07 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون