|
اقتباس:
بس كنت محشش وقتها شوي.. لا تواخزونا |
عن الإعلانات بالتلفزيون السوري؟ الإعلان عمي فايق.. هو صناعة.. حرفة.. فيه علم وإبداع.. فـ التوك اللي مخلّي برامج التلفزيون السورية بتهوّي.. نفس التوك اللي مخلّي "الإعلان التلفزيوني" بيخجّل.. رغم إنو.. ما بيخلى الأمر أوقات.. ينفد شي إعلان هيك متل الخلق (نفس الشي مع البرامج) بس بتضل السمة الأبرز.. هي الفشل وجرزة الفشل.. أرخص طبعاً من جرزة البقدونس |
اقتباس:
أول الشي الدعايات عن شو .. من علكة و محارم .... فهي بتعكس النشاط اللاقتصادي يللي بالبلد هون تذكرت بالتسعينات لما نزل قانون رقم 10 و يللي قدم بوقتا شوية تسهيلات إدارية لتشجيع النشاط الاقتصادي بشكل عام وقتها ما شفنا غير شركات النقل + مصانع العلكة يعني ما شفنا اي صناعي اجا اشتغل على شي منشأة اقتصادية استراتيجية كلو اشتغل على الصناعات الخفيفة السريعة الربح ... و معظم الصناعيين كانو عم يفكروا أنو يفتحو منشآتون و يسكروها قبل ما تخلص مدة الاعفاء الضريبي تاني شي عن صناعة الإعلان ... هي كمان كلها شركات و مكاتب خاصة ... بس بتفتقد للخبرة متل مو مبين .. أو للزوق ما بعرف الاعلان قبل ما يكون صناعة هو فن ... برأيي ما لازم يشتغل فيه غير الفنانين ... أو عالأقل يللي عندون حس فني و لحد الآن عم نشوف بعض المنشآت الاقتصادية ... عم تعمل إعلاناتها برا البلد يعني بالحالتين .. بما يخص الاعلانات .. برأيي التفزيون ما دخلو فيها القصة كلها بالقطاع الخاص ... يللي لسا نظرتو للتسويق قاصرة شوي |
اقتباس:
مو هو اللي عم يعرضها؟ ما فيه يعمل "رقابة" على "سخافة" الإعلان مثلاً؟ بيعمل رقابة على كل شي.. بدءاً من الحكي.. ومو انتهاءً بـ طول تنورة المذيعة.. (سمعت بآخر تفنكة لوزير الإعلام لما فرض ع ضيوف التلفزيون يجوا بـ البدلة والكرافة؟) كلن هيدول بتتدخّل فيهن "رقابة" الهيئة العامة.. بس ما بتتدخل بسوية الإعلان؟ ليش بالله؟ إنو الشركة العامة للإعلان (شو كان اسمها دخلك؟) بس شغلتها تقص مصاري؟ فيهن.. يحددوا "عتبة" دنيا.. للسخافة المسموحة بالإعلانات.. بيمشي الحال ثم هيدا تلفزيون حكومي.. ما لازم يكون هدفو الأول الربح.. أوكي لازم يربح.. وبيقدر يربح طبعاً.. بس مو على حساب الشي اللي عم يفرجينا ياه.. لإنو هيدا تلفزيون البلد.. ما فيني حاسبو متل ما بحاسب تلفزيون شي متموّل (متل قناة شام مثلاً) اللي هدفو الأول والأخير الربح! بس إذا كان رب التلفزيون بالطبل ضارباً.. فـ شيمة الإعلانات كليتها السخافة |
اقتباس:
القضية تجارية بحتة .. المنتج بياخد هالاعلان و بيقصد محطة معينة ... و بيطلب عرضو لقاء مقابل مادي ... و خالصين نفس هالإعلانات الفاشلة عم تنعرض أحياناً عالمحطات اللبنانية .. خاصة NEW TV و بيقدرو يعرضوها بأي محطة لما بيدفعو المشكلة برأيي بصاحب هالمنتَج ... يللي عم يقبل هالإعلان السخيف يعبّر عن منتجو |
خيو اليوم الشركات الكبرى عم تعمل اعلانها برا وعم يطلع ظابط
خيو لا تروح لبعيد في اعلانات مو تجارية بس ناجحة متل البركة بالشباب او تبع الاسلام ملون كتير حلوين او اللي عملتون الدولة بلبنان خلال الانتخابات تبع بدنا نصير لبنانيي وهيدول كتير نجحوا هون عنا فشل ذريع لانو لسا مو مقتنعين العالم يدفعوا شوي زيادة كرمال اعلان محترم |
اقتباس:
بس أنا هون مانو همّي الأخ.. لإنو فيه يروح يعمل إعلان سخيف ويحطّو بـ قنوات الهشّك بشّك.. هاي مانها مشكلة (انتبه.. حتى بعد ما يصير عنا "مخ" اقتصادي مهم بالقطاع الخاص.. رح يضل في "جلابيط اقتصاد" صغار.. يعملوا إعلانات تافهة.. ويحطّوها بالقنوات الخاصة) أنا مشكلتي مع التلفزيون السوري.. هيدا تلفزيونا.. المفروض يعبّر عنا.. وما لازم تكون -بالتلفزيون السوري حصراً- القصة تجارية بحتة متل بغير تلفزيونات |
طب ما هوي كمان بدو يربح
الواحد بدو يلحق مصلحته |
اقتباس:
بس إنو.. ما فيه يربح إلا ع ضهري؟ ع حساب صحتي؟ الفكرة بسيطة.. متل ما طلع وزير البريستيج بقرار يفرض ع ضيوف التلفزيون يلبسوا بدلة وكرافة.. كان الأولى فيه يعمل قرار يخفف النطوطة والبياخة بالإعلان.. يا خيي.. هلق بعض جلابيط المطربين.. بيدفعوا حتى تنحط أغانيهن بالفضائيات بيقبل التلفزيون السوري يعرضهن؟ لأ.. لإنو فيه شي اسمو رقابة على "سوية الغنية".. بيدققوا ع كلماتها حصراً.. وشوي.. ع المشلحة بالكليب.. هلق مطبقة.. صحيح ما كتير عم يلتزموا فيها بطريقة صح.. بس إنو في هيك شي.. مثلاً.. عندك علم إنو غنية فارس كرم "تقبر قلبي هالضحكة" ممنوعة.. بالإذاعة والتلفزيون؟ قال ليش؟ لإنو بيشجّع فيها ع الانحلال والفسق والفجور لما بيقول: "شفافك ما خلقت ت تحكي.. شفافك خلقت ت تنباس" :lol: طيب هلق بحياة ربّك.. هيدي الغنية تنمنع.. ودعاية علكة آرتيست.. تنعرض!! مشان شو؟ مشان الربح!! |
هيي فيها وجهة نظر
|
للأسف الهيئة ماممكن لا يطورو و لا يمكن يتقدمو لحد الأن الخطاب في التلفزيون السوري موجه بطريقة بدائية لاحظت في شهر رمضان دعايات عرضوها عفا عنها الزمن و طواه بذكر الدعايات كانو قبل أن أغادر سوريا و لحد الأن عما يعيدوها
ممكن لاأنو بيعرفو أني الجيل الحاضر ما بيشاهد القناة السورية و لذلك عما يوجهو الخطاب للي عايشين من أيام زمان برلك |
اقتباس:
لأإطيك مثال على كلامي السابق من فترة مريت لعند رفيقي ( مدير تسويق بشركة السعدي وكلاء عدة ماركات عالمية من ضمنها تويوتا ) كان عم يشوف عروض إعلانات ( مجلات مو تلفزيون ) اختار تصميم حلو و بعدين حب ياخد رأي مدير الشركة يللي بدورو رفضو نهائياً ... و اختار تصميم أقل ما يقال عنو أنو بشع بدورو مكتب الاعلانات ما كان عندو مشكلة تنفيذ هالتصميم .. و ما في ولا مجلة رفضتو بس بالنهاية المشكلة من مدير الشركة يللي برأيي طالما في ناس مختصة بالشركة .. المفروض ما يدخل بهيك قصص لازم يصير عنا عقلية احترافية أكتر |
اقتباس:
أقدم عاصمة بالعالم نعم، بس مو بالتاريخ! اقتباس:
إذا طلعلها توصل لكاحل بيروت كتّر خير الله! اقتباس:
|
اعلاناتنا بتهوي عليم الله بياع المازوت يللي بحارة من حواري الشام عندو ابداع اكتر من تبعون الاعلانات الهابطة بالتلفزيون عنا :pos: انا بعتقد مستوى الاعلان بتعلق بمستوى المحطة المعروض عليها الاعلان يعني مابظن ان المنتج حيدفع مبالغ كبيرة لاعلان يبث على محطة ذات مستوى فني متواضع او عدد مشاهديها محدود نص العاملين في المجال الاعلامي والاعلاني بالتلفزيون السوري فاتو بالواسطات انو واحد ياجماعه مابيعرف تلت التلاته كام عم يعمل برامج حواريه والتاني ما معو ابتدائيه عم يخرج اعلان والتالت صرلوا خمسين سنه عم يقدم اخبار فأي صناعة اعلام او اعلان هي اللي عم تحكوا عنا .. بالاول ضروري يطورو التلفزيون عنا اعلاميا بعدين منطلب اعلان تجاري مرموق بعيد عن الاسفاف ماهيك ؟؟ وبرهان على كلامي..هل حتقبل محطة متل mbc بعرض اعلان متواضع متل يلي بعرضوه على تلفزيوننا ؟؟ اكيد لأ .. :D |
اقتباس:
أنو التلفزيون مو هو يللي بيصنع الإعلان التلفزيون بيعرضو بس بينما أغلبية هالتحف يللي عم نشوفا هي شغل مكاتب إعلان خاصة حتى هالبنات يللي بيتنطوطو .... هدول تابعين لمكاتب تانية غير مكاتب الإعلان .. و بيستأجروهون استئجار لتصوير إعلانات أو كليبات أغاني |
اقتباس:
طيب ليش بكل العالم ما بتشوف هالإعلانات السخيفة إلا عندنا؟ بدّك تقلّي لإنو عندهن اللي بيشتغلوا إعلانات.. محترفين وفنانين وكذا هاي وحدة نعم.. بس التانية لإنو عرض الإعلان ع المحطات (متل كل شي بينعرض فيها) إلو معايير.. إلو ضوابط البي بي سي عطيها مليون دولار.. مستحيل تحطلّك إعلان تافه.. القصة مو بس ربح وقتي.. القصة سمعة واحترافية ومستوى ما لازم يهبط عن سوية معينة ثم.. بتلاقي بـ "بلاد برّا".. ناس بلا موهبة وبلا احترافية.. وبيعملوا شغلات تافهة.. بس ما ممكن يلاقوا طريقهن للتلفزيونات المحترمة |
اقتباس:
السؤال ليش التلفزيون عنا يقبل تنعرض هل اعلانات السخيفه يلي مافيها ادنى احترام لذكاء المشاهد على شاشتو ؟؟ تقريبا معظم الاعلانات عنابتعتمد عى أغنية جاهزة. مع تغيير بكلماتها مشان تصير ملائمة للمنتج المعلن عنه وين الابداع بالافكار بهاي الطريقه مابعرف العتب على التلفزيون مو مكاتب الاعلانات يلي العاملين فيها ماعندهن شهادات تؤهلهن للعمل بإسلوب إحترافي. بتوقع كل يلي بشتغلو فيها من نوعية (عندك كم دورة فوتوشوب بتصير مصمم ) :D:D |
اقتباس:
مامنفتقر لا إلى الأفكار الابداعيه ولا إلى المواهب القوية والدراما السوريه بتشهد على هاد الشي عنا كوادر ومحترفين وفنانين بمجال الاعلان وغيرو بس المؤسف اكتر انو هل كوادر كلا عم تهرب برات البلد وتلاقي فرصتها بغير بلد :D:D |
اقتباس:
مين قلك عالقنوات المصرية مثلاً ..... في إعلانات لسا أتعس من هالإعلانات يللي عم تشوفا عنا اقتباس:
هون عنا متعودين أنو عبارة إعلان تلفزيوني ... يعني كم بنت عم يترقوصو على لحن شي غنية ضاربة بهالموسم و تطبيق كلام جاهز سلفاً لكل سلعة يعني لما بتسمع أنو شي للنضارة و للسيارة مثلاً .... بتعرف أنو يللي جاي هو إعلان محارم اقتباس:
إذا بتدفع عشرة مليون دولار لشركة فيلب موريس .... ما رح ترضى أنو دعاية مارلبورو تطلع من استديو شركة ( طيف ) اقتباس:
هادا موضوع تاني بيرجع للفساد و المحسوبية يللي موجود بكل القطاع العام عنا عالهامش أنا ضد أي رقابة فنية بتصير سواء عالأغاني أو عالمسلسلات أو حتى عالإعلانات الغربلة لازم تكون من قبل الجمهور ... و الذوق العام لما انمنعت اليسا و هيفا من الغناء بسوريا .... ما بطلو الناس يسمعوهون .. بالعكس شعبيتهم زادت المفروض لما شركة بتنزل إعلان سخيف ... تعرف أنو تأثير هالإعلان على تسويقها إن ما كان سلبي فهو حتماً غير إيجابي بغير بلدان لما شركة بتنزل إعلان بتقيّمو ....و بتشوف صداه بالشارع عنا بيرجعو بينكشو إعلان أوريس يللي انعمل من 25 سنة ... لحتى ما بتكلّفوا على إعلان جديد |
للأسف
اقتباس:
فيه وحدة صديقتي اجت لعنا عسوريا بالشتوية ونزلت بفندق الله وكيلك ما صبرت يومين ورجعت هربانه بردانة ,لا تسخين ولا نضافة ولا خدمات ما بدنا نحكي عن الابتسامة واللباقة لأنها غير موجودة اطلاقا بقاموس المستخدمين |
اقتباس:
ماد.. يخليلي ياك وجع المصريين متل وجعنا.. "كلنا في الهمّ شرقُ" اقتباس:
إنو من حيث المبدأ.. معك حق.. المفروض الشعب هو يعمل "رقابة".. بس هيدا بيفترض قبل إنو يكون هالشعب قادر على هالشي.. مثالك عن هيفا بيدلّك قديشو قادر.. مو؟ شيلك عن إنو طريقة الباشق صباح عبيد كانت "منفخة واستعراض".. المهم منرجع للتلفزيون.. حسب حكيك.. بيصير بدنا حتى نزبّط التلفزيون السوري.. نروح قبل نزبّط كذا مليون سوري؟!! إي لا وصلت.. :) تخيّل إنت فوق.. ونص هالشعب تحت.. وقال بدّك تشد كل هالعالم وتطالعهن لعندك!! مين اللي رح يغلب؟ مبينة مو؟ ثم.. طيب.. لازم الجمهور يتطوّر.. ويتحسّن ذوقو ووعيو وكذا مذا.. جيد.. شو الأدوات؟ شو العـِدّة؟ وكيف؟ وقديش بدّك وقت؟ ع العـِـدّة.. أكيد التلفزيون واحد منها (مو بس بالإعلان.. بكل شي بيطلع بهالتلفزيون) من هون كان قصدي.. إنو خلّينا نزبّط التوك اللي بالتلفزيون.. هيدا أهون بكتير.. ويا بيي شو بكتير.. من إنك تنطر الشعب حتى يتطوّر ذوقو العام ثم.. بتتخيّل إنو تنلغي الرقابة ع المدى المنظور؟ لأ.. إذن؟ خلينا نشتغل شغلة مفيدة منقدر نشتغلها |
يعني اليوم وبكل فخر لفتت أنتباهي شوارع أقدم عاصمة من حيث عكس النظافة .." التلوث البيئي"
لأن أنا أكتر شي بيقهرني بغض النظر عن الشغلات الباقية هو الشوارع والتنظيم العمراني والنظافة بقصد الوساخة ..أنو هاد الشي عم نعيشو كلنا .. لأن وين ما رحنا منلاقي موجود .. إلا ببعض المناطق ال.....حلوة .. ليش مانكون متل الدول التانية مارح قول متل أورووبا أو شرق آسيا .. وأميركا .. رح قول متل الاردن ولبنان والإمارات يعني متل الدول الشقيقة .. لك اليوم فقت الصبح كالعادة وركبت السيارة وماشي وبأمان الله وإذا بشغلة سودا بتنزل خبط على بلور السيارة وبتكسرو.... لك شو هاد ....؟ عرفتو شو هاد رح قلكون ماطلع كيس زبالة معقولة يعني لهدرجة وصلت أنكب الزبالة من البلاكين والله عيب... فهموني أنتو ياأخوية على مين السبب... على هالعامل المسكين ولا على المدراء تبعون العامل ولا على المواطنيين... فهموني الله يخليكون انا زلمة إستيعابي على قدي... ليش هيك عم يصير ليش.. |
بدي فوت بالموضوع دغري اليوم...
التبول في شوارع دمشق الى متى (عذرا عالكلمة بس ما لقيت احسن) معقول شوارع دمشق اصبحت مبولة لبعض الاشخاص عديمي التربية والاحساس مين فينا ما بشوف او بشم الرائحة يوميا لشخص تافه عامل عملتو بشي شارع وماشي هل هناك من تفقره ال 10 ليرات ليستخدم المرحاض المخصص للعموم هل من الصعب الشرطة تفرض غرامة 500 ليرة على من يقوم بهذا العمل الحيواني لا اعتقد ان الموضوع صعب الحل على الاطلاق اففففففففففففففففففففففف شو قرفان من كل شي وتحية لوزير الأوقاف المحترم.. |
اقتباس:
|
اقتباس:
|
حدّث ولا حرج
حكينا كتير ونقدنا كتير وشفنا ولاحظنا كتير بس الحكي لوحدو مابيكفي .. وين الفعل ؟ بدنا ناس تسمع وتنزل عالشارع وتشوف مع انها بتشوف بس سياراتهم الفاخرة "مفيمة " منشان مايشوفوا ويقرفوا والناس البسيطة من كتر مو شايفة العين بصيرة والايد قصيرة بتكتفي بتقول يلا شو فينا نسوي المهم البلد بخير والله يخليلنا الناس اللي فوق والحمد لله اخ بس لاحول ولاقوة الا بالله شكرا يافايق |
| الساعة بإيدك هلق يا سيدي 16:17 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون