هـء.. ما زمّر بنيـّـك يا ستي.. خوش لإنو بالحركة التانية.. لما صار عندك: بميلة تلاتة تقال.. وبالميلة التانية تلاتة خفاف.. هون الطابة اللي عم نبحبش عنها ممكن تكون بالميلة الأولى وتكون أتقل.. وممكن تكون بالميلة التانية وتكون أخف.. موووو؟ وينك رايحة بهالعجقة.. لحد هلق.. صوري يعني.. بس ما فيني سلملك ع ولا شركة برمجة.. حكّي جبينك كمان مرة :)

كمان ما زمّر.. أول باشتان: لما حطيتي (بالوزنة التانية) تنين بتنين.. ثم شلتي وحدة.. هيك صاروا تلات حركات.. ثم شلتي وحدة.. صاروا أربعة.. رجعتي حطيتي.. صاروا خمسة.. مو؟.. ثم.. تاني باشتان: ديماً عم تاخدي حالة وحدة.. وهي إنو بالوزنة الأولى تساوت الكفتين (هيدا احتمال واحد.. بس هيدا الأسهل.. في احتمال تاني إنو من الوزنة الأولى يختلفوا.. كفة تطلع.. كفة تنزل.. تالت باشتان: التقسيم لأربعات مزبوط.. هيدي بداية الحل الصحيح.. صاروا خمس دقايق؟ :)

وكأنو بدهم اكتر من تلت وزنات

له يا زعيم.. وحض رقبتي بتلات وزنات بس بيمشي الحال.. حك جبينك كمان شوي.. قلنا البداية التقسيم لـ تلات أربعات.. احرقلك شوية فوسفور.. ليش لأ؟ :)

فاصل توضيحي لـ ماري بيل عن (تزمير البـُـنـَـيّ) :) هادا يا ستي.. (ما زمّر بنيّك) جملة تراثية تعني فيما تعنيه من معنى: (ما مشي الحال/ما زبطت معك).. أما عن المعنى الحرفي.. فـ زمّّر من زمور.. تزمير يعني (أو طزمير ع قولة الجنبلاطية لليزبكية).. أما بنيّ.. فـ تعني لعبة أو دمية.. وقصة القصة كما أظن.. ولد عندو لعبة ع شكل زلمة.. بتزمّر (المفروض إنها تزمّر).. فـ خربت.. فـ أخدها لحدا يصلحلو ياها.. فـ قعد يحرتق فيها.. فـ بالآخر زبطت.. زمّرت يعني.. فـ شو قلو؟ قلو: زمّر بنيّك؟.. ثم شو؟ قال فذهبت مثلاً :)

81 مصافحة

إتز توو ليت يا شريك.. خوش أول إشي: جوابك غلط.. تاني إشي: انطرح الجواب الصح من شي أسبوع (وهو 45 مصافحة).. تالت إشي: صرنا حاطين بعدها شي ست سبع مسائل.. فـ جرّب بغيرها

اه انا اسف شكلو الصيام ماثر علي ابو شريك :D

UP .....

داق خلقك؟ يعني كعيتي :) .. ما رح قول الحل.. إفساحاً في الشو اسمو لغير زباين..

بما إنو ماري بيل زبونة وما بدنا نخسرها.. فـ منعطيها هيك مسألة ع الخفيف (بتقدر تغش فيها باستخدام الكالكوليتر).. هاد يا ست الحسن الحزورة -اللي بدها جواب ع الطاير- بتقول: ما هو العدد الذي نصفه وثلثه وربعه وخمسه وسدسه وسبعه وثمنه وتسعه وعشره عدد صحيح؟

ازا هيك يعني,فلرقم هوي:2520:gem:
يا ريت يكون صح:?

صوح.. وصوح الصوح كمان (بس هيدي سهلة.. لا تقوليلي!!) ومشان الأعزاء المشاهدين.. منقول الـ 2520 (الجواب يعني) هو المضاعف المشترك الأصغر للأرقام (6، 7، 8، 9، 10)

كمان وحدة (بدها جواب ع الحارك).. تنين واقفين وضهورتهن لبعض.. بلشوا المشي بنفس اللحظة بخط مستقيم لمسافة 3 امتار.. بعدين كل واحد منهن مشي 4 امتار لجهة اليمين عندو.. فـ قديش صارت المسافة بيناتهن؟

ولي على بعضي.. ومرغرغة الدمعة بعينك! من شو خايفة؟ صح.. طبعاً صح

كمان وحدة.. عندك سيارة.. بدك تمشي فيها 32000 كيلومتر.. وعندك استبنة وحدة (دولاب احتياط واحد).. وقال مشان ما يهتروا الدواليب.. لازم شو؟ تستخدميهن كلهن قد بعض.. يعني تخلي الدواليب الخمسة كلهن يمشوا نفس المسافة.. فـ السؤال.. كل دولاب قديش رح يمشي؟

بعرف صح,بس تواضع:p
:ss:

ييي ما يبلى! فكّري بالسيارة.. فكّري

25600 كم

صح.. فيك تخبّر المشاهدين كيف وصلت للجواب؟

كيف وصلنا للجواب ؟؟ عن طريق التجربة ( لك لا شو تجربة وما تجربة :p)
هي كل سيارة بتمشي على اربع دواليب ، اذا اعتبرنا كل اربعة وحدة واحدة معناها الخمس دواليب بيطلعوا وحدة وربع يعني 1.25 وبالتالي :25600=32000/1.25
طبعا في غير طرق بس بالاخير كلهن بيعطوا نفس الاجابة .:D

حلو الحديث.. طيب خلينا نمشي خطوة تانية لقدام.. يا سيدي.. إذا سألتك.. وإنت عم تسوق السيارة.. وبدك تخلي كل دولاب يمشي 25600.. كل قديش رح توقف وتبدل الدواليب؟ يعني أيمتى وكام مرة رح تصير عملية التبديل؟

ممكن نقسم المسافة الى 32 جزء كل جزء ب 1000 كم ونغير كل مرة لحد ما نكون قطعنا 30000 وبكون بقي علينا 2000 كم بصير منغير كل 400 ، هلق نظريا لازم نغير كل 6400 كم بس ما بعرف ليش ما كتير اقتنعت بهي الحسبة .
وعلى ما اظن كانت بتطلعمعنا من قانون متبادلات بس كمان بهذه العجالة ما ظبطت ... ليش ... بجوز من العطش :lol:

اوف لشو كل عالتعقيد..انو 32000 منقسمها ع 5 و هيك بيطلع عنا 6400 كيلو
الدواليب هي(1.2.3.4.5)

اول 6400 كيلو منستعمل(1.2.3.4)
و تاني 6400 (5.2.3.4)
و تالت 6400 (1.5.3.4)
و رابع مسافه(1.2.5.4)
و خامس شي(1.2.3.5)

و هيك كل دولاب من الدواليب منستعملو اربع مرات خلال الخمس مراحل..
يعني 6400*4=25600 كيلو لكل دولاب


:gem:

لما قسمت التلاتين لأجزاء ألف ألف.. كام مرة غيرت؟ وكل قديش؟ نفس السؤال عن الـ 400.. ونفس السؤال عن الـ 6400 كيف؟ زبط حسبتك بعد الفطور :)

مش قليلة يا ماري بيل.. :)

:shisha:...

قالتلك ياها ... وفكتني من الجواب :p

لشو كل هالتعقيد!! هوووووووون كل القصة.. بكتير مسائل بالرياضيات والفيزيا.. التفكير الصح بيعطي جواب سريع وصح.. بينما التفكير الغلط.. إما بيعطي جواب غلط.. أو بيحوّل المسألة لقصة معقدة جداً.. هون فينا نرد القصة لـ موهبة.. أو نضافة بالمخ (هيك كان يقول واحد من أساتذتي بالجامعة لما إقرطو شي جواب يعجبو :) ) هلق بعد شوي.. رح حط مسألة بتوضّح هالفكرة تماماً.. اعطونا شوية وقت

اي شو عليه طلعنا من جماعة المخ السميك :jakoush:

له يا أزرق.. مش هيك القصد.. بس إنو شوية نوستالجيا لإيامات الجامعة :)

قال هاد يا سادتي الكرام.. عندك محطتين قطار (1 ، 2).. بيناتهن سكة مستقيمة طولها 400 كيلومتر.. ببداية السكة عند كل محطة في قطار واقف.. انطلق القطار الأول من (1) بسرعة 150 كيلو متر بالساعة باتجاه (2). بنفس اللحظة انطلق القطار التاني من (2) باتجاه (1) بسرعة 250 كيلومتر بالساعة.. همممممممممممم.. وقال شو؟ بين هالقطارين في دبانة (ما تقرفوا).. هالدبانة سبحان الذي خلقها.. بتطير بسرعة 400 كيلومتر بالساعة.. انطلقت هالدبانة بنفس اللحظة من مقدمة القطار الأول باتجاه التاني (بسرعتها الأربعمية).. ووقت وصلت لمقدمة القطار التاني.. عكست سيرها ورجعت طارت صوب الأول.. ولما وصلت لمقدمة الأولى عكست ورجعت.. وهيييييييييييييييييك.. حتى اصطدموا القطارين.. وانفعست الدبانة!!.. فـ هلق السؤال: قديش هي المسافة اللي قطعتها هالدبانة قبل ما انفعست؟ (يعني قبل ما اصطدموا القطارين).. هاتوا لنشوف :)

الدبانة بتقطع 400 كم

هلأ الدبانه لحقت تقطع شي:o
!!!!:jakoush:
ما رح احزف المشاركه خليها :p