|
اكيد ما حدا قال انو ناخد مصر كمثال ,,لأ ... ما هني هدوك كمان عندون ديكتاتورية و قانون طوارئ متل عنا ...ولو اخف من ناحية الصرامة ,,او من نواحي اخرى ( تجميلية ما اكتر ) ..متل الصحافة و نقابات المحاميين و غيرها ,,,بس اكيد مو الوضع الحالي بمصر هو الشي يلي نحنا منطمحلو ,,,,انا ذكرت بعض الوقائع بمصر يلي نحنا ممكن نتأثر فيها ...متل الأضرابات الشعبية احتجاجا على الاسعار ,,,و بس ,,هادا كان كل شي ...
حاليا ..صار في معارضة بدول متل البحرين و قطر ...و بالكويت عم يصير في استجواب للوازراء ....و مظاهرات شعبية ...بدول من المفترض انو نظام الحكم فيها ملكي !! ... و نحنا يلي كان عنا انتخابات قبل دول كتير متحضرة ...هلئ صرنا بنفس الخانة مع كوريا الشمالية ..يلي الناس هنيك بيأمنو بالرئيس كأله ! |
أول شي لازم نتفق انو اذا المعارضة جزء من الشعب, فيعني الحكومة و النظام و حتى السيد المسيح كمان جزء من الشعب السوري. النظام الحالي ما أجى من الصومال.. جزء من الشعب و نتيجة تصرفات الشعب السابقة (الظلم التاريخي ضد الأقليات)
بقى لازم نعترف بهالشي و ما نعملهم aliens .. خاصة انو النظام ما بقى مجموعة من الضباط بل صار مؤسسات و موظفين.. حكينا بهالموضوع على كل حال و مافي داعي نرجع نخوض فيه.. بس حسيتها شوي غير واقعية انو نصرح بهالقوة انو النظام مو من الشعب بس المعارضة لازم تكون من الشعب اقتباس:
شو برأيك السر تبع تطور دول الخليج؟ ليش هالدول عم تنحو نحو ديمقراطية؟ بظن مثالك هذا يا عزيزي بيدعم فكرتي (أو فكرة butterfly) الأخيرة بخصوص انو نتعامل مع النظام الحالي كواقع و لحالو مع الوقت بيزبط الاقتصاد و المصاري بتعمل عمايل... دول الخليج مضطرة تصير حديثة و فيها شفافية اقتصادية بسبب كونها صارت جزء من اقتصاد عالمي و فيها مشاريع على مستويات.. صحيح امراء الخليج رح يستفيدوا من هالمشاريع بشكل مباشر أكثر من الشعب.. بس الشعب رح يستفيد اكثر كمان.. و بظن الشعب نسبيا عايش حياة احسن مما كان عايشها قبل النفط! نفس اسلوب التفكير ممكن ينطلي على سوريا... دعمنا للمنظومة الحالية على كل علاتها و مشاكلها و قرفها, ممكن يساعد إنو سوريا توصل لسلام, و بالتالي تنفتح فيها مشاريع و استثمارات و تتحول لدولة متطورة اقتصاديا.. هالشي اجباري رح يخلق جو من المنافسة الاقتصادية داخل البلد و رح يشكل ضغوط على السيد الرئيس انه يوضع حد للفساد الموجود ضمن الشخصيات الكبيرة... لانو وضع حد للفساد بيعني المزيد من الاستثمارات... بالتالي بالنهاية المزيد من المصاري للدولة.. و رخاء للمواطن حتى لو ما وصل للمواطن كل حقه الشرعي.. بيضل win win situation و بنفس الوقت يلي الشركاء الغربيين رح يعطوا حوافز للاقتصاد, كمان رح يعاقبونا على التجاوزات القانونية ضد الشعب... بقى المفروض يصير في تلحلح ملحوظ اجتماعيا و سياسيا.. ولو ضلينا ضمن هيكلية بعثية مخابراتية.. شو عليه.. اذا هالشي بيعني انفتاح و سلام و تطور.. معليش.. انا مستعد اتعايش مع هالوضع متل ما كتير دول متعايشة مع مشاكلها الدخلية.. كل دولة عندها مشاكل داخلية! و نحنا نسبيا ممكن يكون وضعنا احسن من غيرنا انا شايف هيك اتجاه ممكن ينجح .. و خاصة انو البلد ألريدي ماشي بهيك اتجاه و فيك تلاحظ بسهولة انو كتير من شبابنا بيشوفوا الوضع السياسي الحالي مدعاة فخر لاحظ شو عمل الاتحاد الاوروبي بدول اوروبا الشرقية و كيف دفعها لتحسن من اوضاعها بحيث صارت مقبولة نفس الشي ممكن ينطبق على سوريا و في شي يبشّر بالخير و هو انو نحنا شعب ذكي و عنا نسبة كبيرة من المتعلمين و المغتربين بقى ايا علاقة مع دولة تانية رح تكون شراكية و ما رح تكون استغلالية.. ما رح يكون وضعنا متل شي دولة افريقية عم تنسرق. سوريا سوق عذراء جدا و فيها امكانيات كبيرة و هالشي فرصة إلنا اننا نستغله لتحقيق مكاسب اجتماعية و سياسية و حقوقية |
اقتباس:
|
تماما ..التحليل هاد عن الأسباب ورا الأنفتاح السياسي النسبي بالخليج منطقي جدا ...بس بسوريا ما بشوف نفس الوتيرة المتسارعة للعجلة الأقتصادية متل نظيراتها بالخليج ..يعني نحنا مو جزء من الأقتصاد العالمي ( و اكبر دليل كلام وزير الصناعة السورية عن انو العالم مكن ينهار اقتصاديا بس سوريا لأ :lol: ) ..لهيك ..ما فيني شوف في امكانية لتحسين قوانيين بتتعلق بالفساد مشان اعطاء أقتصادنا دفعة عن طريق جلب استثمارات ..لأنو ببساطة اقتصادنا مبني على الفساد بحد ذاتو .. مؤسّسات الدولة الأقتصادية الكبيرة هي ال Cash-Cow لألون ,,عدا عن انو ما في شفافية اقتصادية عنا, خلت حتى خبراء الأقتصاد يتعجبو كيف الأمو عم تمشي عنا ! ..هلئ نقطتين ممكن تجلب للشعب السوري نوع من الفائدة متل ما قلت ..السلام مع اسرائيل و الشراكة الأوروبية ,,و هدون لوحدون موضوعين كبار و بدون كتير كلام ,,,بس فيني قول بأختصار انو انا بسمع بالتنيين من لما كنت طفل ..و لهلئ ما مشينا شي بالطريق هاد ...و ما واضح انو في امل بالفترة البعيدة ...ليش ..! لأنو ببساطة الشباب عندون قلق من اتخاذ اي خطوة ممكن تأثر على وضعون داخليا .... سواء كان من نواحي سياسية او اقتصادية ...يا ريت كون انا يلي ظني سيء و هني ما يكون هيك بالفعل ....بس ..ما شفت شي ممكن يخليني فكر انو هاد كان بس مجرد سو ء ظن !
اقتباس:
بنت بدوية ..و يتحركشو فيها ...:lol: ..يا رجل .....يعني انا سمعت من قبل انو اتحركشو بكل واحد اتعاطى بالشأن العام ...و اتحركشو بشعب كامل و مدن كاملة بسكانها ...و تحركشو بصيدنايا و تدمر ....بس مو متل بشاعة انو يتحركشو ببدوية ! اكيد فهمان شو بتقصد ....بس لأ Joe ..بأكدلك انو مو فارقة معون البدوية ...و كل مين ورا البدوية هي |
اقتباس:
chapeau bas |
فلنفرض انو الخوف ما لو علاقة بالموضوع أو يشكل جزء لا يزكر منو ....
هل الوضع الحالي في سوريا مقبول من ناحية اجتماعية، اقتصادية وسياسية؟ اذا مقبول فاللي نحكا قبل ممكن تطبيقو ضمن الخطوط الحمر اللي حكت عنهم بترفلاي ... ما مساحة الحرية الموجودة لتقدر على تطبيق هالأفكار؟ يعني ما مدى حرية الصحافة مثلاً كأحد وسائل التغيير والتوعية؟ هل فعلياً في حرية لتطرح شي مشكلة؟ وبتضمن انها ما تتعارض مع أهداف شي مسؤول من الفئة الفاسدة. الجو اللي بدك تعمل فيو هالتغيير بوجود الطائفية والمناطقية والذي منو اللي حكيت عنو يا (جو)؟ مثلاً، اذا طرحت فكرة معينة ممكن الطرف الآخر ما يتقبلها لمجرد انك مو طايفتو... والجميع بيعرفو شو يعني عقلية طائفية ومدى تأثيرها على فئة كبيرة من الشعب. ما ثقل أي خطوة ممكن يقوم فيها فئة نخبوية من الناس لهدف فيه مصلحة اجتماعية أمام ثقل الحكومة، الطائفية، الأوضاع الاجتماعية نفسها، القانون ....الخ وشو تأثيرها؟ مثال: حفرة كبيرة وشخصين تلاتة عم يحطو فيها تراب ليملوها، كم من الوقت بيلزم لحتى تتملا؟ وهاالشي على فرض انو ما في عدد أكبر من الأشخاص عم يشيلو منها التراب. لازم يكون في هدف مشترك أو مصلحة عامة مشتركة بين الحكومة والشعب ككل... لحتى يصير تغيير ... غير هيك رح تلاقي مين يصدك سواء الحكومة أو فئات معينة من الشعب .. اذن، شو هي المصلحة المشتركة بين الحكومة وجميع فئات الشعب؟ وإن تعارضت هالمصلحة مع مصالح الحكومة، كفة مين رح ترجح؟ وإن تعارضة هالمصلحة مع فئة ما من الشعب؟ لو في مصلحة مشتركة أو هدف مشترك بيجمع الحكومة والشعب بجميع فئاتو واللي هوي من أجل وطن أفضل لما كان في مشكلة من الاساس وكان ببكون في مجال لطرح أي مشكلة والأخد والعطا فيها وما كنا بناقش بهالموضوع من أساسو.. لأنو كان بإمكانا نطرح المشاكل وحدة وحدة ونحكي فيهم ... بس نحنا وكانو عم بناقش بكيفية التحايل على الحكومة والطائفية والذي منو كمان، من أجل القيام بتوعية وتغيير بسيط وخطوات خجولة. وأخيراً، هل الخطوات البسيطة كافية ليصير تغيير على المدى القريب أو البعيد ضمن كل اللي زكرتو أعلاه؟ |
هلأ شو اللي بيخللي أيا نظام يستميت بالدفاع عن استمرارو بالحكم؟ طبعاً فينا نقول حب السلطة والمال وهيك شي، بس بالعمق بعتقد أنو السبب هو الحفاظ على حياة الأشخاص اللي بيمثلو هالنظام، يعني تداول السلطة بيحتاج أنو الطرف اللي عم يترك السلطة يحس بالأمان أنو ما رح يصير عايش بوضع سيء بعد ما كان بأفضل الأوضاع، وهاد بيحتاج لمجتمع مستقر وعلى درجة كافية من الوعي، بأميركا ما عم يقدرو يحاسبو ديك تشيني على كتير من الفضايح اللي عملا وكمان في كتير قرارات طالعا جورج بوش ما عم يلغيها أوباما رغم أنو ضدا بس لأنو إذا عمل هالشي رح يفتح باب على حالو بعد ما هو كمان يترك الكرسي،
أنا مع بترفلاي أنو المواضيع اللي عم تطرحا المعارضة السورية ما رح تحرك المواطن العادي لأنو ما فيك تقول لواحد عم يشتغل كل النهار روح فوت عالحبس كرمال إلغاء قانون الطوارئ، أصلاً في كتير من الناس ما بيعرفو حتى أنو سوريا تحت قانون الطوارئ، بس العالم تحركت ضد قانون الأحوال المدنية الجديد لأنو بيمس حياتن الشخصية واليومية، يعني يمكن لازم نبلش بالمواضيع الاجتماعية والمعيشية وهي بس تتحسن أكيد لازم تؤدي لتحسين الوضع السياسي أو عالأقل بيصير الناس عندن الوعي الكافي ليعرفو أهمية تغيير الوضع السياسي وتأثيره على حياتن اليومية |
يمكن أنا ومتل كتير غيري ما عندي علم بقانون الطوارق والذي منو كتير...وبارئينا الوضع الحالي مقبول.. بس بتضل الحرية هي هدفنا لأنو الانسان هوي غريزيا بيسعى للحرية.. يعني اي واحد اذا بتقلو بدك تتخلى عن حريتك ميشان أي شيئ شو ما كاان..بقلك مستحيل ما بقبل.. ومن خلال هالشي.. فبرأيي التغير لازم يكون بتوعية الشعب لحقوقن(متل أنو لازم كون حر ولازم ما كون مظلوم..الخ..)وشوي وشوي بتصير تتبلور عندن قناعة أنو الوضع لازم ما يكون هيك والاوضاع مانا مقبولي.. وبيصير كل واحد بينطلق من حالو لتغيير واقعو.. لأنو التغير دفعة وحدة مستحيل يصير متل ما قلتو بدون فوضى و... هاد للفئة الاولى أما بالنسبة للمثقفين يلي بيدركو واقعون فبرأيي لازم يكون في حراك للتكاتف مع بعض.. متل هون..يعني وقت الشباب راحو(الله يردن بالسلامة)ما حدا نسيهم وضل في شجب وتنديد باعتقالن..والخ... وهاد ما بخلي غير يلي تم من قبلو اعتقالن يعرف انو مانن لحالن وفي مين بعدن وماشي وراهن..وكل ما كترو المتكاتفين مع بعض ما عد فيهن يعتقلوهن كلن..هيدا الشي ما بيخليهن غير يتخلو عن سياستن والانطلاق من حالن للتغيير.. --------------------------------- يمكن كون لغبصت بتوصيل فكرتي (لا تواخذوني)..ويمكن كانت شفافي عقد معرفتي وما تطرقت للوضع الاقتصادي العالمي ولا عطيت امثلة عن احداث تاريخية ولا..الخ...بس كل واحد عندو رأي ممكن يشارك ويساهم فيه. :bye: |
يعني صايرة الشغلة متل مين اجا قبل.. البيضة او الجاجة
انا برأيي من المستحيل ان تتم اي خطوة لمصلحة الديمقراطية في سوريا قبل اسقاط النظام , فمثلا احد الحلول اللي انطرحت في سياق النقاش هي علمنة المجتمع ورفع وعي الشعب قبل الخلاص من هذا النظام, طيب... هلئ حزب البعث الحاكم هو حزب علماني ولكن اذا شاف ان هناك نشاط علماني واضح يتنامى بين الشعب وقد يهدد وجودو صدقني ساعتها ليرفع الشعارات الطالبانية والاسلاموية لايقاف هالشي ومثال ذلك عنا قناة المشرق اللي هي تجربة فريدة نوعا ما في ساحة الاعلامي السوري المظلم واعتمدت بشكل واضح عالشباب وطرحت قضايا جريئة تخص المجتمع السوري وهي اول قناة سورية ألقت الضوء على الاقليات القومية في سورية متل الارمن والتركمان والشركس و عملت برامج عنهن وكانت النتيجة اغلاق مكتبها بدمشق وانا سمعت كتير من اتباع النظام عم يبرروا هالشي بأنوا هالقناة عم تعرض برامج من داخل ديسكويات دمشق وهادا الشي لا يتلائم وتقاليد المجتمع السوري فتفرج يرعاك الله!!! |
اقتباس:
وليش يا اخي المعارض لتحط حالك بموضع الاتهام ؟ ليش ما يكون عندك ثقة بالنفس؟ وطز بالنظام وبأزلام النظام وابواقه واتهاماته. بعدين في شغلة هي ما يسمى بالخطوط الحمراء , يعني مثلا عدم التعامل المطلق مع امريكا او مع اوروبا ولا حتى السفر لهنيك , ليش يعني؟؟ هي النظام عم يتفاوض مع اسرائيل بتركيا وما حدا شايف عم يتهموا بالعمالة؟ وليكو بشار بيك عم يعزم اوباما على سوريا والابواق معتبرة هالشي انتصار, اما اذا واحد معارض راح على امريكا وعطا كام تصريح للاعلام عن حقوق الانسان بسوريا فهو خاين وخلو يتختخ بالحبوس متل الدكتور كمال اللبواني مثلا واللي بخلي الواحد يتخوزق انو بعض القطعان الماشية من ابناء شعبنا العظيم يرددون كلام النظام بلا تفكير ويتهمون اللبواني وغيره بالعمالة لامريكا لا يا عيني نحن لازم نحط ايدنا بايد الشيطان اذا اتفقت مصلحتو مع مصلحتنا, اذا امريكا حبت تعطي المعارضة السورية دعم مادي او اعلامي ليش حتى لنرفض لا لازم نقبل ونوظف هالشي في سبيل فضح النظام في العالم كله. ضروري جدا التحرر من القيود والخطوط الحمراء الموجودة في ادبيات حزب البعث المتخلفة العفنة واللي حتى البعثيين ما عم يطبقوها. |
نهال :
انو حكيك كلو فايت ببعضو لدرجة ما فهمت عليك بس على اللي فهمته رح قلك كم شغلي 1- باكد على اللي قالته ميمو فوق انو في كتار وكتار مو مهم بالنسبة الون النظام والحزب بقدر مو مهم انو يكون في قوانين تمشي صح او حالة اجتماعية واقتصادية متل الخلق وهي ما بدها اسقاط نظام 2-شو الارقام اللي استندت عليا لتقول انو هالطوائف بدا تغيير وبالاساس ليش الحكي بالطوائف ؟ اقتباس:
|
مو صحيح أنو أغلبية الشعب بدها التغيير ( لو الشعب مستاء للدرجة اللي وصفتها كان تحرك ، أو أبدى أي شي من التململ ، بجانب ما في شي من الاستقرار اللي الشعب حابب يحافظ عليه . حتى لو ع حساب انو يتحمل تجاوزات السلطة ) تاني شي ، تعليق المعارضة كل التغييرات الممكنة بحجة أنو النظام فاسد وأنو التغيير يبدأ من إسقاط النظام ( خلا اغلب هالناس اللي عايشة بالداخل واللي عم يصلها حكي المعارضة .. حاسة أنو المشروع طويل الأمد جدا ً إذا ما كان مستحيل لهيك غسلت إيدها منو ) بتحس أنو عمي هالمعارضة اللي بدها بس تاسقط النظام ، ما همها الشعب السوري ولا بتعرف تخاطبو ، لك عمي على عيني عندا طموحات سياسية مشروعة بس نحنا ما بيهمنا ، نحنا بيهمنا يتحسن الوضع بأقل خسائر ممكنة ( ما في ولاجهة عندا استعداد تبذل دم وتضحيات مشان التغيير هاد ) تالت شغلة بدك تتعامل مع أميركا كويس ،في نقطتين هون : شو الثمن اللي رح تدفعو ، يعني اميركا ما حبا ً بالسوريين بدا تأسقطلن النظام مو ؟ " شو الثمن ؟ " تاني شي الذكاء السياسي ، فقط ، بيحتم على المعارضة ما تنهج هالنهج لأنو الشعب السوري عندو حساسية عالية جدا ً من اميركا ، ورح يضل يشوفك خاين وخطتك خاينة حتى لو جابتلو الرفاهية ، فلذلك حتى لو انت مقتنع انو اميركا ممكن تفيدك ! بدك تتعامل مع معطيات انك بالنهاية بدون تأييد هالشعب ، بتضل ولا شي .. ما فيك تغير :D |
اذا بتسمحولي شارك بالموضوع.. ولو انو مش عايشي معكن واكيدي معلوماتي بسيطة كثير عن الوضع عشان مش عايشتو بحذافيرو وتفاصيلو..
بس بدي اسأل لما الواحد بيكون في شي كاتملو نفسو مثلاً كيس على راسو، وبنفس الوقت بيكون جوعان.. مش قبل ما يفكر بالاكل راح يفكر بالاوكسجين يلي لازم يتنفسو؟ وعلى نفس مبدأ الأولويات، لما الواحد بيكون جوعان وبنفس الوقت محبوس بسجن مش مهم اذا سجن كبير او سجن صغير، مش أول شي بيفكر فيه هو كيف بدو ياكل؟ بتخيل انو كل الانظمة العربية مش بس بسوريا كانت ومازلت عبتمارس لعبة الحمار والجزرة (وعفوًا من الحمار الحقيقي). طول ما الشعب جوعان ما راح يلاقي الوقت انو يفكر ينشر الثقافة والتوعية! ما راح يفكر انو يقدم للجيل الجاي حضارة افضل.. كل اللي راح يفكر فيه انو كيف يعيش.. بعرف عبحكي اشياء ممكن جاهزة وبتعرفوها كثير منيح واكثر مني. بس حبيت قول انو الاقتصاد هو المحور الاهم (طبعا الأشياء يلي حكى عنها joe مهمي) بس الشعب حاليًا "جوعان" بفضل النظام. ليش سوريا بكل ثرواتها دولة فقيرة؟ ليش اسرائيل بكل صغرها جغرافيًا وشحة ثرواتها تعتبر جدًا قوية اقتصاديًا (طبعًا وغير افتصاديًا يا شحاري)؟ ليش من ابشع المواقع هون بيصنعوا جنة؟ ليش من اتفه الامور بيخترعوا حضارة لألهون؟ ليش مثلاً من العنب اللي طعموا عادي كثير مثلاً مثلاً بيسوقوا حالهون بفرنسا وبيصيروا على الرفوف الاولى بصناعة النبيذ؟ من الوهلة الأولى يمكن بيبيين انو الأشياء عادية.. بس لا. ومليون لا. في عندهون خطة طويلة الأمد، أعمق من أعمق شي فكرنا فيه حيال وطنّا. الاقتصاد الاسرائيلي، ولو انو بيجيبو أغلب الوقت بوسائل الاعلام عن خط الفقر باسرائيل، بس الاقتصاد ثابت، جيب اكثر واحد غبي بالاقتصاد هون وأذكى واحد ، ثنينهون بيعرفوا انو مستحيل اسرائيل تتزعزع اقتصاديًا. وخط الفقر يلي بيحكو عنو "مجرد خط" عشان الرفاه الاجتماعي يظلو بنشاطو.. واسا بسأل. شو الفرق بين اليهودي (الاسرائيلي طبعًا) يلي بعدو جاي اولت مبارح من طلوزة، وبصوتو بيقدر يغيير كل شي، او اليهودي الاسرائيلي اللي صار من عمر الدولة، وبيقدر يشيل ويحط بس بدو، شو الفرق بينهون لما يفكرو هني بوطن الهون، وبين السوري او العربي لما يفكر بوطن الو؟ الفرق يمكن عالم اجتماع يحكيلنا عنو، بس انا بقول ببساطة انو الاول لو خربت الدنيا (مثال على هيك أزمة الاقتصاد العالمية) ما بخاف على حالو ما يلاقي دولة تاخذو بالاحضان، والثاني، وقتو مش فاضي "للحكي الفاضي" بس يعني انو اليهودي الاسرائيلي عندو عقل اكبر من عقلنا؟ او مشاعر أوسع من مشاعرنا؟!! حاولت اعمل نموذج مقارنة. لازم يمكن نعترف او نعتبر بالاحرى. عبتحكو عن الاختلافات الدينية؟ اذا بتقسمو المجتمع الاسرائيلي لفئات، أو ل"الوان"، يمكن راح تتفاجأوا الروس عندهون حياتهون لوحدهون، ولحد اسا مع بعضهون بيحكو بس روسي ومش عبري، والولد يلي بيخلق بيتعلم يحكي روسي قبل ما يتعلم يحكي عبري. الاثيوبيين شرحو، وخصوصًا انو بيخلقو مع عقدة نقص كونهون سود والغالبية بيض البشرة. المزراحيم او "اليهود العرب" شرحو، كمان مع عقد نقص ومعنويات هابطة قدام الاشكيناز أو "يهود أوروبا". وهذول كمان - الاشكيناز- عايشين بعالمهون الخاص. وكمان وكمان مليان مناطق يلي ناسها هون عايشين بتكتل مع بعض. وبعدين في عندك الانقسامات الدينية تبعهون يلي ما بفهم فيها. بس عندهون مليون معتقد. المتدينين نفسهون بينقسمو لمليون مذهب. وكل هذا الخليط الغير متجانس أبدًا أبدًا، وقت الحزم بتلاقيه صار كتلة وحدة ما فيك تفصل واحد عن الثاني. كلهون بيصير مخهون يشتغل بس على مفهوم واحد: القومية اليهودية- الاسرائيلية. نحنا على شو مخنا بيشتغل "وقت الحزم" - هذا لو كان في وقت حزم؟ مش عارفي شايفي وعذرًا كمان مرة من الحمار- حمار وعبيركض ورا الجزرة. (حتى انو عبسأل: الحمار بياكول جزر؟!) كمان ملاحظة: مش انو اسرائيل فرتيكة لحالها بحالها بصناعة هذا الاستقرار واللي مقارنة بغير محلات بيتسمى "رخاء" اقتصادي، وغير كمان مفهوم اميركا اللي بيطبق هون: time is money ، بعرف انو يلي داعم اسرائيل هونيك مفش منو لو طبقت السما عالارض، نسخة عربية تدعم ببلادنا.. وبهيك بكون بعّدت كثير عن المداخلة الاولى.. فعذروني.. بس بالمقارنة بتخيل بتبرز الامور أكثر.. |
انا مع انو المعارضة تقرأ السياسات الدولية و تحاول توظفها بالضغط على النظام يعني تماما متل ما بيحاول بشار الأسد استغلال المناخات السياسية الجديدة مع الأوروبيين بهدف الطلب منون انو يتغاضو عن انتهاكات حقوق الأنسان بسوريا .....بس ...بالطريق هاد ما لازم نروح كتير بعيد .... لأسباب كتير ...
و لو انو نحنا السوريين كتير مغنجيين ...يعني ما بدنا تدخل خارجي لتغير النظام ...و ما بدنا نضحي حتى اقل التضحيات مشان نوصل للحرية ..و بدنا ضمانات انو في حال صار التغيير ما يستلم اليسار او اليمين المتطرف السلطة ... و ما بدنا يصير اي هزّة بالبلد و لو كانت بسيطة في سبيل الوصول للهدف النهائي .....بس معلش ....نحنا بيلبقلنا الدلع و الغنج :D |
اقتباس:
لأنو النظام زرع الطائفية طول السنيين الماضية .. ليش بسمع من ابي انو كانو يطلعوا مظاهرات بالخمسينات و المشاركين من كل الطوائف ...اصلا لو انو كان في طائفية متل هلئ ..ما كان قدر تكتل طائفي بالجيش يستلم السلطة بالأصل ...ما عم قول انو كنا مثال بالتسامح و الأخوّة ...لأ ...بس ما كنا ابدا متل هلئ .. يعني بعد اربعين سنة من تطبيق معايير طائفية لتسيير الأمن و الجيش و باقي مؤسّسات الدولة .الفكر الطائفي انتشر متل السرطان بالجسد السوري .... لك حتى غير المستفيدين من النظام متل المسيحيين ( ما بقصد هون انو العلوية هني مستفيدين من النظام ,,,برأيي النظام اساء للطائفة هي متل ما اساء لسوريا كلها ) صارو يفكرو انو دينا و ثقافتنا بدها تتأثر في حال زوال النظام ,,,و هون خطأ كبير ..الربط بين مستقبل طائفة عاشت بسوريا من قبل الأسلام و هي مكون رئيسي لمجتمعنا مع مصير نظام التاريخ علمنا انو نهايتو ما رح تكون بتسر ! ...لأ المسيحية اكبر بكتيير من نظام استبداي قمعي ...و العلويين كمان اكبر من شخص سرق الطائفة و البلد كمان .... متل مو هي اساءة ..الربط بين السنة و الأرهابيين الجهلة ...كمان اساءة الربط بين المسيحيين و العلويين ,,,,,و النظام الأستبدادي ..... السني يلي بيقبل الربط مو الأرهابيين ...بكون اكتر جهلا منون ... و المسيحي او العلوي يلي بيربط نفسو مع النظام بكون اكتر ستبدادية من النظام بحد ذاتو خلونا على الاقل نفكر بهيك طريقة ...لوقت ما بيجي نظام ليبرالي بيوضع دستور بيراعي فيه كل الثقافات و الأديان المختلفة بسوريا . |
موضوع أنو المعارضة لازم تحط ايدا بإيد الشيطان بعتقد في كتير تجارب بتثبت فشله، ما بعتقد أنو اللي صار بالعراق وصل الشعب العراقي للي بدو ياه، يمكن وصل بعض المعارضين السابقين للحكم بس خرب البلد على روس باقي العباد. بعدين مبين أنو أميركا مانا حابة أصلاً أنو يتغير النظام بسوريا ودعما لبعض فئات المعارضة هو لخلق ورقة ضغط وابتزاز للنظام مو أكتر، وواضح من يللي عم بيصير بلبنان أنو أميركا بتدعم مجموعات لإزعاج النظام السوري وبعدين بتفاوضو على رقبتن.
|
اقتباس:
هاد اللي طلع معك ؟ الناس عم تفكر بمنطقية وعقلانية شوي بعدين شو هالحكي هاد تبع الطائفية يعني قلة وزرا وضباط منون علويين السلطة بتختار تبعا للاكثر ولاء مش للطايفة حاجتك بقا اللي بيسمعك بيقول رح تولع حرب اهلية الا شوي |
اقتباس:
هلئ انت سميتو منطقية و عقلانية ...انا سميتو غنج و دلع ...ما كتير فرقت ... بالنهاية العقلانية حلوة ... انا ما قلت انها عيب !! ...خدنا بحلمك يا رجل ! .... استاذي انا كنت عم احكي تاريخ وقت قلت انو التكتل الطائفي بالجيش هو يلي استولى على السلطة و هو يلي استغل عدم وجود طائفية ليوصل للحكم ...و ليزرعها بعدين . انا ما جبت سيرة الطائفية ...بس ردا على بعض الأراء يلي قالت انو العلوي و المسيحي ما الو مصلحة بالتغيير انا قلت انو لأ الطائفتين هدون اكبر من نظام استبدادي ,,و مسيرتون ثقافيا و اجتماعيا ما نتتحدد بمصير نظام ما ,,,,ممهما كبر النظام هاد او صغر . :D |
اقتباس:
كلامك الاخير صحيح مية بالمية انما جو والشباب قالوه كرمال يوضحوها من هالمنظور بس وهي الك:D |
اقتباس:
ماعدا 3 حالات يلي هنن رفعت الاسد والاخوان المسلمين وعبد الحليم خدام طبعاً بيإسفني اني سميهون معارضين بس العرف يلي بيقول انو المعارض هو من عارض نظام الحكم بيسميهون معارضين.. طبعاً الحالات التلاتة مرفوضين شعبياً مع انو كان عندون امكانيات جيدة نوعاً ما بس ماقدرو يستفادو منها بحكم الرفض الشعبي من المواطنين بالداخل وبالاغتراب لإلهون وكان الجواب انو انتو قبل ماتعملو معارضة لازم تتحاكمو على جرائمكون بحق الشعب المهم طلع شي اسمو اعلان دمشق وهو اول تنظيم للمعارضة الوطنية الشريفة وطبعاً نشأ من الداخل بناءً على وعود الإصلاح والشفافية والتطوير حتى اعتقلت قيادته بالداخل والقصة يلي بتعرفها.. انجبر الاعلان يوقف نشاطو العلني بالداخل ونشأت فروع للإعلان بدول الإغتراب تبدو انها مشروع واعد وتحديداً بعد الجمعيات العمومية يلي عقدتها من حوالي 3 شهور باغلب الدول ويلي قدر فيها الاعلان يجمع عدد لابأس فيه من السوريين ويطرح مشروع الانتقال للديموقراطية بشكل عملي..طبعاً هي النشاطات كلها تمت بجهود شخصية من سوريين بدول الاغتراب نظمو مايعرف بالأمانة المؤقتة للاعلان ميزات اعلان دمشق الاساسية انو تجمع مدني ديموقراطي لاديني لامذهبي.. رفض كل اشكال التعاون مع الخارج بعز فترة الضغط على النظام ورفض التعاون مع المرتزقة امثال خدام رفعت... وبنفس الوقت بتتفاجئ انو بهيك امكانبات قدر يجمع ألاف السوريين بكل بلد اثناء الجمعيات العمومية.. مابنكر انو اليوم الاعلان بعدو بالبدايات وعم يمشي بخطوات بطيئة بسبب انعدام التمويل واعتقال اغلب القيادات بس بيبقى هو أرقى مشروع معارض عرفتو سوريا من عقود وبيكفي إنو مطالبتو التغيير هي مطالبة سلمية وبيرفض اي تدخل او دعم خارجي... وبيعتمد بهالمطالب على شي اساسي وهو تكوين قاعدة شعبية برا وجوا تضغط باتجاه التغيير المطلوب مابعرف اذا عندك فكرة وافية عن الاعلان بكل الاحوال هي الموقع اذا بتحب: - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - سلامات :D |
تماما ... اعلان دمشق ...واحد من تيارات المعارضة يلي ما فيك غير تحترمون على الشي يلي قدموه خلال الفترة القصيرة الماضية ...بس في شغلتين انا برأيي ضرو بفاعلية التيار هاد ..اول شي ملاحقة السلطة لكل اعضائو يلي وقعو بيان دمشق ـ بيروت ..يعني بأيام قليلة اعتقلو اكتر من تلاتمية شخصية من الأعلان على خلفية توقيع البيان هاد ...و بعدين افرجو عن قسم و حكمو على قسم آخر بالسجن ...يعني عملون من الداخل السوري ما ساعدون على التفاعل مع المجتمع السوري ..بس بالعكس جعل اعضاؤون بمتناول القبضة الأمنية السورية ...لهيك ..للأسف ..داخليا اتحجمو ..و نجح سيف التسلط بأسكات الأحرار من جديد ...و ربح الجولة مرة تانية ... هلئ بلشنا نسمع عن نشاطات برا سوريا ..و كأنو ابتدو يقتنعو انو العمل على الأرض السورية فقد عم يجيب نتائج عكسية بظل اصرار شعبي رهيب على الأستمرار بالصمت ...الشي هاد بياخدنا للنقطة التانية يلي بظن انو الأعلان نفسو ممكن ينلام عليها ...هي المكنة الأعلامية و التعبوية للأعلان ...ما بعرف ...يمكن لأنو الأعلان نفسو ما بيعتبر حالو حزب او تيار سياسي لهيك ما لازم يكون عندو اهداف تبشيرية " سياسيا طبعا " ..او اي نشاطات بالوسط الأجتماعي ...يمكن يكون الشي هاد سببو السلطة كمان من جديد ...تحجيم الأعلان و ابقاؤو كأعلان لمجموعة من المحاميين و الناشطيين بالشاأن العام دون السماح الو انو يتجاوز الشي هاد ليصير تنظيم سياسي حقيقي ...يعني خليني اعطي مثال ...انا كسوري ابتديت اسمع بالأعلان من حوالي سنتين او تلاتة ..و كان عندي اهتمام كبير بفكرة اعلان دمشق ... و دايما بدخل على موقعون يلي دايما يا مهكر ..يا ما عم يستجيب ...حاولت كتير شوف بطريقة او بأخرى طرق للتواصل مع الأعلان هاد بس ما في خواص ...لك حتى انو عقدو مؤتمرين بالمدينة يلي كنت ساكن فيها و بالمرتين ما بسمع عن المؤتمر غير بعد شهر او اتنيين بالغلط ...يعني ما بعرف ...فيفا انت قلت انو مؤتمراتون برا عملت نجاح كبير ..انا بسرني الكلام هاد ...بس بشوف انو اداؤون اعلاميا و تعبويا لازم يكون افضل بكتير من اداؤون حاليا .....غير اذا هني نفسون مقتنعيين انو الأعلان هو ما اكتر من بيان وقع عليه مثقفين سوريين للمطالبة بحلحلة الوضع السياسي و الأمني و الأعلامي بسوريا ...مو اكتر
على اي حال ..انا بشكرون على شغلون ..و بحيي شجاعة معتقلين الأعلان ....مع كل معتقلين الضمير بسوريا . |
اقتباس:
|
اقتباس:
انا اللي بدي قولو انو لو حصل اختلاف ما في زمان ما ومكان ما ولسبب ما بين امريكا والنظام السوري فيجب على المعارضة السورية ان توظف هذا الاختلاف في سبيل تحسين وضعها وظروف مجابهتها للنظام بحيث تعمل على فضحو اعلاميا وتعقد المؤتمرات في البرلمانات الدولية للتعريف بوضع حقوق الانسان في سوريا بعدين هادا الشعب اللي عم تقولي انو بتحسس من امريكا كتير هو نفسو الشعب اللي بحب الموسيقى الامريكية وافلام هوليوود وهو نفسو اللي طلابو اول ما يتخرجو من الجامعات بحلموا حلم انن يعملوا دراسات عليا في احدى الجامعات الامريكية وهو نفسو اللي اذا أمنتي هجرة لامريكا لشي واحد منو رح يضل يدعيلك طول عمرو ما فيكي في ظل وجود نظام الرعب هذا انو تقولي انو غالبية الشعب بتكره امريكا,,, شوفي مثلا العراق ايام صدام كانوا العراقيين يطلعوا بالملايين مظاهرات ضد امريكا و لما اجت امريكا اللي وقف ضدا كانوا بالمئات أو الالاف لا غير , اما غالبية العراقيين ضلت قاعدة ببيتها. بقى ما فيكي تقولي انو غالبية الشعب السوري تكره امريكا .. حاليا على الأقل.:D |
عزيزي فيفا سيريا شكرا على رابط الاعلان.. بس ما بعرف اذا الموقع مهكر او شي, بس معظم اللينكات ما فيها شي .. مثلا لو بتكبس على "من نحن" ما بيطلع شي و جربت اكتر من متصفح.. و كمان كاتبينها how us بشريط العنوان
و باقي اللينكات على اليسار ما عم تشتغل او مافيها شي بعرف انك مانك المسؤول التقني تبع الموقع :p بس يعني حبيت سجل خيبة الامل.. هادا المجال الوحيد يلي بيقدروا يستخدموا ليقدموا وجهة نظرهم و صورة حلوة عنهم.. مثلا غرافيكس محترمة.. موقع شغال(!) ... ما بعرف شو راس مالها؟؟ شي ألف دولار لشركة اجنبية بتعملك احلى موقع و بتستلمو للابد يمكن.. |
| الساعة بإيدك هلق يا سيدي 19:42 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون