كلامك مثبت على الأقل بارتفاع معدلات الجريمة اليوم بسوريا وموضوع التربية يلي بيدخل بشكل أساسي بالنوعية هو المأساة الإنسانية يلي ماحدا منتبه عليها كل يوم بقسم الأطفال بالمشفى منشوف أطفال عم يدخلو المشفى الحكومي المجاني ع آخر رمق نتيجة الاهمال تخيلي في أولاد عنا يعانون من نقص في التغذية مشابه لما يحدث في أفريقيا بس هونيك بسبب المجاعة وعنا بسبب الاهمال وقلة العناية خصوصا لما بتكون الأم طفلة عمرها 16 سنة.

في مرة بالعيادة العظمية شفت بنوتة عمرها 14 سنة جايبنها أهلها لأنو عم تعرج وبالصورة الشعاعية تبين إنو عندها خلع ورك ولادي ونتيجة الإهمال عنق الفخذ حفر بعظم الورك مفصل جديد نتيجو الاحتكاك لهيك البنت عم تحسن تمشي تخيلي وهلق لما أجا موسم الخطبة صار بدون ياها ما تعرج وماحدا انتبهلها لهلق إهمال مرعب ويمثل النصف الاكثر إيلاما من المعاناة.

هيك أظبط شي
واريح

موضوع المعاينة عند الصيدلي نتيجة حتمية لعدد الأولاد الكبير بس المشكلة إنو حدود خبرة الصيدلي تنتهي عند الأمراض البسيطة الشائعة والمشكلة إنو الشكايات الجدية هية يلي عم تتعرض للاهمال ومنضيف عليها إنو البيئات الفقيرة والمتخلفة هية يلي بيشيع فيها بشكل كبير زواج الأقارب وبتزيد فيها الأمراض الوراثية.

هادا غير موضوع التربية والنمو الانساني والاجتماعي بيكفي منظر الأولاد النحيليين دوما يوم العيد عند مدينة الملاهي وكل واحد ماسك سيكارة بايدو والألفاظ والشتائم يلي بيقولوها ويمكن بدون ما يعرفو معناها يمكن.

ولسا جايين ع موسم صيف وسباحة بكل مسطح مائي ممكن من الترع وقنوات الري للبحيرات الملوثة ومجاري الأنهار وكل يوم غريقين تلاتة والأولاد بلا حسيب ولا رقيب.

ما دام الموضوع فات بجماعة الصيدليه انا الي زمان محروقه ع دكاترة وبدي فضفض
عزيزتي ناي الدوا اللي بتقولي عنو سوري ما بعرفو بس من اسمو بجوز يكون ديكلوفينات الصوديوم 12.5 وهاد مسكن وخافض حرارة بينعطى للأطفال بعد السنه مو قبل
انا مع معاينة الدكتور وانو الصيدلي ما يعمل فيها مشخص بس لمصيبه دكاترتنا هالقد نطاسيه بارعيين وفي كتير منن بيعطو المريض ادوية قوية حتى يتحسن ويعمل لحالو سمعه متل ابرة الديكلوفينات والكورتيزون اللي الها ماجيك اكشن والمرضى بينبسطو منها
غير موضوع المضادات الحيوية اللي المفروض الطفل قبل السنه يتجنبها إلا بضرورة القسوى وبينزلو بناس بتراكيب قوية هديك المرة اجاني بيبي بعرف ابوه عمرو 45 يوم ومكتوبلو مضاد قوي خرست وما حكيت لأني صحبه مع الدكتور بعد بأسبوعين نفس الطفل ونفس الدكتور مكتوبلو مضاد حيوي وقتا ما رضيت اصرف الوصفه وأصريت يروح عطبيب تاني يعني عياش احنا بنشوف بلاوي مرات بنسكت ومرات ما بنقدر وقت الدكتور يصير ثقه انا البنادول ما رح اصرفو غير بوصفه مع انو او تي سي

بموضوع المضادات الحيوية أنا معك مية بالمية عنا بالشرق الأوسط استخدام عشوائئ للصادات وفعلا يمكن ما يلحقولنا تطوير أجيال جديدة من السيفالوسبورين له المجد والاكرام والمصيبة إنو إذا إنت قررتي ما تصرفي الوصفة أو ما تعطي المريض الدوا ما تضمني إنو صيدلاني تاني يتصرف بنفس الشكل يعني بيجوز تقلب الحكاية لتطفيش زبائن بس ولسا نحنا عنا موضة ألعن هية إنو أقل من نص الصيدليات بيقعد فيها الصيدلاني والباقي ما بتشوفي فيها غير بياع أتخن شهادة معو ثانوية وبيصرف البدك ياه.

وبموضوع الإبرة السحرية(ديكلون وكورتيزون) صارت متل الزهورات مين ما كان بيحضرا وخود ع سفق ابر....

هاد بيان لشيخ الازهر بخصوص تنظيم النسل


شيخ الأزهر .. لا يجوز أن تصدر الدولة قانوناً لتنظيم النسل

أكد الدكتور محمد سيد طنطاوى شيخ الأزهر أنه لا يجوز للدولة إصدار قانون لتنظيم النسل، وقال إن تنظيم الأسرة من المسائل الشخصية المتعلقة بالزوجين وحدهما، والتى تختلف من أسرة لأخرى حسب ظروفها، مشيرا إلى أن القوانين لن تعالج الزيادة السكانية أو ما يتعلق بالزوجين.

جاء ذلك أثناء استقبال شيخ الأزهر صباح الثلاثاء لوفد علماء المسلمين من وزارة الأوقاف والشئون والمقدسات الإسلامية الأردنية، برئاسة جمال البطاينة وزير أوقاف محافظة أربد، ورأى طنطاوى أن التوعية وإشاعة الفهم الصحيح للدين هما الحل، مؤكدا أن الاستخفاف بالمسئولية نحو الأبناء والجهل بأحكام الدين وشئون الدنيا أديا إلى التهاون فى قضية تنظيم الأسرة.

وأشار طنطاوى إلى أن تحديد النسل بمعنى منعه مطلقا ودائما «حرام»، ومثله التعقيم، الذى يعنى القضاء على أسباب النسل نهائيا، وقال إن الفقهاء أجمعوا على حرمة الإجهاض، واستثنوا من ذلك حالة الضرر التى تقع على المرأة الحامل إذا رأى الأطباء الثقات خطورة الحمل على الأم.

وقال للوفد الذى التقى الشيخ ضمن زيارة للمركز الدولى الإسلامى للدراسات والبحوث السكانية بجامعة الأزهر، للاطلاع على تجربة مصر فى مواجهة المشكلة السكانية، إن تنظيم الأسرة مباح إذا كان الرجل كثير الأولاد، ولا يستطيع القيام بتربية أبنائه التربية الصحيحة، أو إذا كانت المرأة ضعيفة، أو كثيرة الحمل، أو كان الرجل فقيرا أو أصيب أحد الزوجين أو كلاهما بأحد الأمراض المعدية.

عفوا نور
بس يعني هاد كلامووو فاضي يعني انا ما بسمع لكلامو اذا بيصير يحددو النسل او ما بيصير بالنهاية مين هوي ؟؟!! ليقرر هيك شي يعني هاد شخص مالو مصداقية بالمرة
و اذا ما بدايقك ف يضرب هوي وشكلو وكلامو البلا طعمة متل حكايتو
:D

يعني مشكلة التضخم السكاني في وطنا العربي هي مشكلة اجتماعية ناتجة عن الفهم الخاطئ للبيئة يلي عايشين فيها ..قراءة بسيطة للواقع العربي منوصل لنتيجة انو المساحة الجغرافية للوطن العربي تستوعب العدد السكاني ...لكن الإستغلال غير الشريف و النزيه للثروات العربية بتحتم علينا ننادي بتحديد النسل و ليس بنوعية هل النسل....كمان حالة طبيعية يكون الفقر العلمي و الاقتصادي هو اللاعب الأساسي في هكذا موضوع ...
المفهوم العشائري و الطائفي و الأهلي بشكل عام هو الشرارة للإنفجار السكاني العشوائي........
في ناس الفقر الاقتصادي بيمنعها من انجاب اكثر من طفل و في ناس و هي الأكثرية الساحقة تنجب الكثير من الأولاد في حالة الفقر الإقتصادي لمجرد انو الولد بيخلق و بتخلق معووو رزقتو ....و هل المجتمع العربي القائم على العادات و التقاليد و الفقر العلمي و الاقتصادي يحتاج ثورة على ما هو عليه.....يعني بعطيكن مثل الامارات ...
المواطن الاماراتي ما عندوا مشكلة بعدد الأولاد ..لانو الامارات سكانها الأصليين قلائل مقارنة بفيرها من الودول المماثلة لها بالمساحة .. ومع المال الكثير هناك حلول كثيرة للأحوال الأقتصادية للمولودين الجدد ..و مثال على ذلك مشاريع الشيخ محمد بن راشد للمولودين الجدد ( حاكم دبي ) يعني الولد وقت بيخلق بيخلق معو الفيلة تبعوا ...المهم انو عنا بالوطن العربي في ثروات هائلة ...و فهمكم كفاية

أنا أؤيد أن الموضوع اجتماعي بالدرجة الأولى لأن الكنيسة أيضا تحرم موانع الحمل ويمكن بشكل أكتر تشددا من المرجعيات الاسلامية ولكن نلاحظ أن المجتمعات ذات الغالبية المسيحية ليس لديها ذات المشكلة في التزايد السكاني فالموضوع مرتبط بالعادات والتقاليد أكثر من الدين خصوصا أن رواسب الشعوب العربية هي رواسب عشائرية وزراعية والثقافتين تحفزان على زيادة النسل والاكثار من البنين (الذكور).