|
اقتباس:
أهل الشام كمان أطياف متعددة كتير متل كل السوريين.. وانا بعرف من هدول الناس كتير يعني متل ما حكى زين مزبوط.. في بين الشوام كتير ناس متعصبين وفي كمان ناس بناتون معبيين ديسكو الشيراتون.. متل مو الشوام هنن اهل الميدان كمان هنن اهل حارة السنأور ""سمعان فيها هي الحارة بالصالحية بالشيخ محي الدين اسأل اهلك عنها ليحكولك عن العادات..:p ومشان بيع افلام البورنو يمكن انت مانك جدي بهادا الطرح.. بتوقع انك كتبتو بسرعة بدون ما تفكر.. لانك بتعرف انو بالريف السوري ما بيبيعو افلام بورنو.. |
ما بعرف عنجد ليش السجال دايما حول موضوع الريف والمدن ...عندي نظرة انو ابن الريف متل ابن المدينة تماما بسوريا ...انا عنجد ما بقدر ميز بين التنين ...التنين متخلفين اكتر من بعض و التنين مفكرين انو العالم هو عبارة عن الضيعة او الحارة يلي عايشين فيها ..و تفكيرون ما بيطلع برا هالنطاق الضيق ...
مثلا كنت مرة ب الوبي بواحد من اوتيلات الادقية فسمعت عامل الأستقبال عم يحكي مع احد السائحات ...قالتلوا اني اجيت للتو من منطقة الجزيرة السورية و نبسطت كتير برؤية الحياة البدوية التقليدية . رد عليها عامل الأستقبال يلي ما بيعرف من المدنية غير يحمل شناتي و يوصلها للغرف " او كيف استحملتي الناس المتخلفة هنيك " كان عم يقولها مع ضحكة غبية واضحة ...السائحة اتفاجئت و ما عرفت شو بدها تقول ,,بس كان ردها بأستغراب .." ليش هيك عم تحكي عن الناس هنيك ,,انا ما شايفة فرق بين هون و هنيك !! بس هنيك الهوا انضف و ما في ضجة و وسخ متل هوون " !!! .... |
كمان هامش
في شغلة اسمها عادات أيام زمان ... و عادات هالأيام ..... بكل مكان يعني مين قال أنو عادات الشوام من 50 سنة .. هيي نفسها عاداتهم هالأيام تطور الحياة ... جاب معو عادات جديدة وين ما كان يعني مو كل عادة سيئة .. هي جابوها أهل المدن التانية عالشام ... بالعكس ... كل مدينة سورية الها عادات منيحة و عادات سيئة |
هامش تالت ..
مين هني أهل الشام ..؟؟ تغير الحياة البشرية و التوزع الديمغرافي بدل أنو ما في شي ثابت بهالخصوص .. يعني إذا بالغنا شوي بالرجعة لورا .. رح نشوف ناس بتقول ... أنو الشام اغتصبت و انتهكت من قبل الامويين يللي اجو عالشام و احتلوها و غيروا عاداتها و تقاليدها و حولو كنائسها إلى جوامع أيام ما يسمى بالفتح الاسلامي القصد أنو هالتعصب .. و هالدعوات للتقوقع ... هني بالنهاية شي سلبي .. و ما بودي لنتيجة |
اقتباس:
والتقسيم اللي قصدتو جغرافي مو شي تاني |
وقت بكون الشهادة اللي بيطمح ياخدها مافي منها غير بالشام شو يعمل الواحد بحاله ؟
هندسة طبية مثلا في الها فرع وحيد بالشام فقط .. انه شو يفترض واحد يعمل بحاله ؟ وفرص العمل معروف انها معدومة بالريف والمدينة وحدها قاردة على تأمين فرص العمل .. فطبيعي يصير تنقلات للبحث عن فرص افضل ...وعلى فكرة سيادة اهل الشام العما يتشكوا من اهل الريف و"ثقافة " اهل الريف .. بتمنى يدققوا ليعرفوا ان اهل الريف بدورن قرفانين رب العيشة بزحمة الشام وقرف الشام وضجة الشام وتلوث الشام .. ولولا وجود الظروف الأفضل لكانوا طفشوا من زمان . |
الشام هية العاصمة وما اختلفنا انو العاصمة لازم تتحمل كل الناس
بس المشكلة انو الشغلة ماعادت تنطاق الغريب عن الشام عم يقعد بالشام ويستقر ويشتغل وكلوا على حساب ابن الشام يعني عم ياخدلوا فرصتو بكلشي لان استيعاب الشام مليونين ويلي هنن اهل الشام بالوقت يلي قاعد على قلبنا خمس مليون من برا بس الله بيعينا وهي ضريبة انو نحنا ولاد العاصمة مع احترامي لكل الغربا المستقرين بالشام بس انا عطيت رأيي ورأي كتير من الشوام مو الكل طبعاً |
اقتباس:
|
اقتباس:
شو بدك تعمل شامي عنصري :p الله يحمل معك ياشام قولتك برجع بلاقيها ولابتكون رايحة رحلة سفاري للقامشلي:deal: |
اقتباس:
الي رجعة لرد على الموضوع . بس لفت نظري كلامك . طبعا الشام مطوبة لاهل الشام . لكن مطوبة للصينيين ولا أهل المريخ . ولا الشامي مطوبلو حمص :? |
اقتباس:
والله بيجوز . لأنو بدنا نضل نزاود بالشعارات . الوطن للجميع والمساواة وغيرها ( طبعا بس بهيك شغلات ) ز والشام بدها تضل بالنسبة الهم فرصة ومكسب وبس |
اقتباس:
اذا عندك أخبرا بهلمجال هات نورنا :? |
انا عندي اقتراح
لازم يصدر قانون بيجبر اهالي الريف السوري الحصول على فيزا قبل الدخول لدمشق ...فيزا عمل ..فيزا سياحة ,,يعني بتصير الشام تماما متل اوروبا ...و الشوام بصيروا اوروبيين ....بس الشام عندها ميزة عن اوروبا ...انو محاطة بجبال و ما بتطل على مسطحات مائية ,, لهيك ما بوصل المهاجرين غير الشرعيين على زوارق الموت ,,لمدينة الموت حسب علمي و فهمي لحقوق الأنسان ,,,البني ادم بحقلوا يتنقل بين الدول دون اي عوائق ,,,,فكيف بين المدن داخل الدولة الواحدة ... ثانيا ابن الشام المتحضر لازم يلاقي حل لمشكلة اهجرة للعاصمة بمعالجة اسباب الهجرة بهديك المناطق ...هلئ بقلك ابن الشام المتحضر كيف فينا نعمل هلشي و الشام محاطة بمدافع من اربع جهات !! هون صار نقاش تاني ..بوقف هون مشان ما يضيع الموضوع |
اقتباس:
لا . بس يظهر أنا نسيت أنو الشام مدينة مهجورة . أجت الناس وعملت فيها أحياء . كل حي لطائفة أو قومية أو محافظة معينة . والشامي بدو يضل ساكت . لأنو طبعا لحنا بلد الشعارات . بس ماجاوبتني بالأول . عن أنو اذا الواحد جاب فرع في منو بمحافظتو وراح سجل بالشام . مع أنو ترى بيحبها هه . مابيكون غلط هاد الشي . ومابيعمل أزمة سكنية لأهل الشام ؟ . ولساك مقتنع بقصة الكفاءة والرجل المناسب بالمكان المناسب . وهي الشعارات يلي بتظبط بكل الدنية الا عنا ؟ . خلص ياجماعة . عنا شعارات بتطعمي خبز . الوطن للجميع والشام ما اخدت استقلالها . جيبو غراضكم واتلاكو البلد وتعو سكنو بالشام :? |
اقتباس:
ظريفة كتير هالأتكالية يلي كل مالها عم تبين سبب المشكلة الحقيقي . أنو أنا ماعندي تنمية بمنطقتي . بروح على الشام وباكل خيراتها . واذا بدي أرجع . لازم أبن الشام يعملي تنمية ( مجبور فيني والا ) . بدل ما أنا المفروض أنو بحب منطقتي وبدي أخدمها وأعمل تنمية فيها . الله يرحمك يا سامي معتوق . يلي رغم شهادتك يلي صعب تشتغل فيها بالضيعة . ورغم كل نشاطاتك المدنية . ورغم سكن أهلك بالشام من زمان . أبيت الا أنك تعيش بضعيتك وتخدمها . وتحاول ترفع من شأنها . قديش كنت كبير وبعيد عن الشعارات |
من منبري هاذا اعلن اعترافي بجمهورية الشام الشقيقة
لا قلك بلاها هي شقيقة .. خليها العدوة اعلن حربا مفتوحة الأبعاد على أعدائنا الشوام يرجى الاتزام بارتداء الزي الأزرق في مباراة الجلاء ممثل جمهورية حلب المستقلة مقابل نادي الجيش ممثل الأعداء . وشكرا لتعاونكم . |
اقتباس:
فرص العمل ( إن وجدت ) فهي نتيجة انماء غير متوازن من قبل الحكومة ..يعني كل السورين دافعين حقا و إذا صار إنماء بغير مدن .. ما بيعني أبداً أنو ابن الشام يللي عمل هالتنمية يعني من ناحية بدكون تختزلو الدولة و من ناحية تانية بدكون تنعزلو عن باقي المحافظات |
اقتباس:
على فكرة لما بتجي شركة متل أعمار . الها تجربتها التنموية . وبتعمل مشروع متل تلال دمشق . وهية يلي قادرة تعمل مجمعات سكنية وصناعية كبيرة . مين الك أنو لحنا منكون مبسوطين . لأنو هاد تكريس للخطا الأجتماعي . سورية فيها مشكلة أجتماعية ديموغرافية كبيرة . بس للأسف الحلول عم تجي غلط . بدل مايعالجو أسبابو . بيحاولو يلاقولو حل مؤقت |
اقتباس:
إذا شاب من طرطوس مثلاً تخرج من كلية الصحافة .. و تعيين بجريدة البعث لازم يرفض الوظيفة .. لأنو هالجريدة شامية ..؟؟ ما كل الجرايد موجودة بالشام ...معناها منمنع غير ابن الشام يدرس صحافة ..؟؟ طيب ... أنا جبروني اخدم جيش بالشام برأيك كان المفروض بعد الضهر ... ارجع نام بطرطوس مثلاً ..؟؟ و قيس و عد أمثلة كتيرة ... هيي يللي عم تاخد الناس للشام أكيد ما حدا حابب يترك بلدو .... |
اقتباس:
بذمتك . أنت فهمت مني من كل كلامي أنو أنا بقصد هالمثالين :?. هلأ رغم أنو أحد الأخطاء هو وجود كل هالقطع العسكرية بالشام وحواليها . بس المشكلة الأكبر . هو أنو بعد مايخدم جيش كتير منهم بيبطل يرجع . وعلى قصة الصحافة . الله وكيلك رفيقتي خريجة صحافة . صرلها متخرجة حوالي السنة . وماكانت تلاقي شغل . من حوالي العشرين يوم أجاها شغل بجريدة الوحدة باللاذقية :? |
هلئ المغزى من الموضوع مافي مغزى
يعني مافي امل |
اقتباس:
. الجيش لحالو أكتر من نص مليون بني آدم ... و معظمون مو من الشام يعني هني الجزء الاكبر من القصة بس انتشار القطع العسكرية من الشام و باتجاه الجنوب بيخضع لعدة عوامل مو بإيد الدولة اقتباس:
طيب برأيك إذا قبلت الشغل ... و توظفت باللادقية .. بتكون عم تسيء لأهل اللادقية ..؟؟ القصة أكبر من هيك .. شعبنا بالنهاية معتّر و مغلوب على أمرو و آخر همو التأثير الديموغرافي ..... الناس عم تهاجر عالأمريكيتين لتلاقي شغل ... فما بالك بمدينة تانية بسوريا |
اقتباس:
معناها وصلنا لنتيجة أنو في مشاكل . الفرق يابدنا نطنش وكل واحد يلاقي البلد مجرد مكسب لازم يستفيد منها . ( بتهرب ضريبي . بواسطة . من أنو حتى يهجم بمحلو 10 سانتمتر لبرة وياخدها من الرصيف . بكتير شغلات ) . أو بدنا نعترف بوجود خطأ ونعمل على أصلاحو . أنا لما بدي دافع عن الشام بدافع عنها من منطلق محبة . لأنو هية وطني البدائي والنهائي . وبتمنى كل سورية يكون فيها أنماء . وعايشة برخاء . بس هاد بدو شغل . لا شعارات ولا امنيات . وكلشي بيقولو الشامي . بيحكيه عن حياة يومية عايشها . مو من نسج الخيال |
اقتباس:
ما نص يلي عم تحكي عنون مخابرات من صاحب لتكسي لصاحب الكشك |
اقتباس:
انو شو الشام بلدي النهائي يا سيدي وانا الشام بلدي النهائي يعني متل أغلب أهل الشام كلون اجو من مناطق مختلفة واستوطنوا الشام يعني متل العيل التركية و الجرائرية والمغاريبة أجوا ع الشام وصارو من الشام انا اهلي صرلون خمسن سنة بالشام وانا ولدت هون وربيت هوون ع المحافظة اللي انا منها ما بطلع كل خمس سنين مرة فلهيك حكما صرت من الشام فيك هيك تحسبها ;) واذا ما بدك تحسبها هيك لكن تلات رباع الشوام لازم يرجعوا ع ضيعهون بس انو صار لازم نعمل موضوع عن المواطنة انو شو انا بنتمي لسوريا ولا لطرطوس او الشام يا حسرتي كتار راح يطلعو وينتموا لمنطقوا مو لبلدهون:cry: انو لو سمحتو ماعاد حدا يقول الغريب عن الشام ع يشتغل وابن الشام قاعد وكلو ع حساب أبن الشام:? هالحكي مانو منطقي بالمرة بعدين لا الشام مطوبة لأهل الشام ولا حلب لاهل حلب وهكذا داوليك لتشمل كل المحافظات يعني وين ما بتروح بتلاقي ناس من غير محافظاتون موجودين بكل مكان وصحي مو متل الشام ومنرجع نقول الشام عاصمة وهاد شي طبيعي مابعرف ليش عم تحاولوا تفرجوا القصة أنها أكبر ما لازم :? وشي طبيعي تتركز أكتر الوظائف بالشام و اللي بيحب يكون سوري من كل سوريا بكل شبر فأهلا أما البيحب يكون بس من جزء من سوريا ف باي باي :p |
اقتباس:
صحيح الجيش مهمتو يدافع عن كل سوريا ... بس شاءت الظروف أنو يكون عدونا الرئيسي من جهة وحدة و هادا خلى الجيش يتواجد بمعضمو بالجزء الجنوبي من سوريا ( في حل بقترحو إذا بيرضي أهل الشام .... ينعفى أبناء المحافظات الأخرى من الخدمة الإلزامية و تنحصر الخدمة بس بأهل دمشق ) اقتباس:
ابن سوريا ككل .. ما عم يسرق من ابن دمشق شي اي مشروع اقتصادي بصير بالشام .... كل أبناء سوريا دافعين تمنو و هالشي بصير بكل العالم ولا مرة سمعنا بالإعلام مثلاً أنو ابن باريس عم يتذمر من فرنسي آخر اجا ع باريس لا بالعكس .. المجنسين الغير فرنسيين بيتمتعو بكامل حقوق المواطنة اقتباس:
المشكلة انك عم تلزق كل سلبيات المجتمع الجديدة ..... بغير أهل الشام .. و هادا غلط مين قال أنو أهل الشام أفضل من غير باقي المحافظات .. لا بالعكس في كتير محافظات متقدمة كتير على الشام ثقافياً و تعليمياً ....و اجتماعياً كمان السلبيات يللي عم تحكي عنها ... ناتجة عن جو سلبي عام نتيجة تحوّل المجتمع ككل .. بما في ذلك المجتمع الشامي يعني أنا مثل بشوف المجتمع عنا من عشرين سنة كان أفضل .. هادا ما بيعني أنو ارمي مشاكل مجتمعي الحالية عالآخرين |
مع اني مو سوريه بس بظن الي وجهة نظر
يعني بحس العاصمة بكل مكان مو حكر لأهلها والعاصمة ع الاغلب بكل الدول العربية بتكون بضم ناس من اماكن مختلطة ينعي لو اخدنا كيلو متر بالعاصمة وشفنا السكان بتلاقيهم من مناطق مختلفة. دايما فرص العمل بتكون احسن بالعاصمة لأنو المشاريع لكبيرة والمستثمرين بتوجهو الها ومقابل هالشي اللي عايش بالعاصمه بدو يدفع ضريبة العيش فيها ع الاغلب بتكون اسعار لبيوت واجرتها اعلى من غير محافظات لهيك انا بشوف اللي الو مجال عمل بمحافظه تانيه بكون افضلو اقتصاديا يستقر فيها متل مهنة التدريس وين ما كان ما في مشكلة بفرص عملها اما في اشياء صعبه تتواجد بغير محافظات يعني لو حدن بدو يشتغل بالفن بدو يضطر يعيش بشام بس بنفس الوقت شغله اخيرة مرات المحافظات بنظلمو على حساب العاصمة لما كتير كفاءات تفضل تعيش فيها متل الاطباء اللي معهم اختصاصات نادرة وحملة الكتوراة ......الخ لهيك لازم يكون في توعية وطنية في التوزع الكمي والكيفي لسكان بجميع انحاء الوطن |
وانت فكرك انو اهل المحافظات مبسوطين انو عم يدرسوا برا بلادون ؟
يعني مثلا ابن حمص ما طلعله هالفرع بخمص بس طلع بالشام برايك يعيد البكالوريا ؟ لا عم يدرس واول ما بيصحله ينتقل عم ينتقل كونه عم يكلف اهله هديك الحسبة مصاريف بعدين عذرا عم تقلي جابوا اهل الريف؟ ليش شبون اهل الريف وفيك تنككر انو 3/4 من رجالات سوريا بكل المجالات هني من محافظات ثانية مو من الشام ؟ |
اقتباس:
|
اقتباس:
|
انو ليش لما ابن الشام بيحكي عن مشاكلو الي عم يعاني منها بوجود الكم الهائل من الناس من كل صوب بيصير شخص مغضوب عليه ولما غيرو يحكي أو ينفذ عادي بيحقلوا لأنو ما عندو هالإمكانيات, يعني مثلاً عنّا أرض بشمال سوريا شارينها من عشرين سنة تقريباً طبعاً كل ما بننوي نعمّر هالأرض حتى نستفاد منها بيطلعولنا أهل المنطقة أو القرية بيوقفوا بوشنا بحجة انو مالنا من أهل المنطقة فما بيحقلنا نعمرها, يا أما بنخليها أرض شجر يعني أو بنبيعا لشخص من أهل المنطقة غير هيك ما بنقدر.... ليش أنا لمّا عاني من مشكلة سكن بالشام وافتح تمي واحكي بصير شخص أناني ومابفكر بالناس التانية الي عم تعاني ليش لما بدي فكّر اشتري بيت لازم أول منطقة فكّر فيها أي منطقة بعيدة عن الشام 20 كم مع انو الي الأفضلية بالسكن بقلب الشام بيحكم اني ابن المدينة...... أنا مع انو العاصمة بينوجد فيها ناس من كافة المناطق بس مو بوضعنا الإقتصادي هاد, يعني الشباب عم تقارن الشام كعاصمة بنييورك وطوكيو, أنا لما يصير مدخولي نفس مدخول الناس الي عايشة بنييورك بوعدكون مارح افتح تمي... بس كمان لازم يكون في تفهّم للوضع الي عايشينو مو المهم نلقي شعارات"بس متل ما بيقولوا يلي بياكل العصي مو متل يلي بيعدّا" اقتباس:
ممكن تقلي شو الفروع الموجودة بالشام ومو موجودة بالمحافظات التانية كوني ما بعرف أي فرع موجود بالشام ومو موجود بالمحافظات التانية :D |
حبيباتي عم تطرحوا مشاكل ما دخل اهل الريف فيها و سببها ما دخلو بالسوريين بالعكس اثرت ع كل السوريين
متل ما عم تقول انو انت ما بتقدر تشتري بالشام ليش مين فينا بيقدر يشتري واللي عمل هالازمة هني العراقيين اولا يعني هلاء اللي بيجي ع الشامن من غير محافظة مستحيل يستأجر بيت لحالو بقلب الشام فهي مانها مشكلة تعلقوها ع الناس المانون شوام وانو مشان شغلة البكالوريا يا اما مانك بالبلد عايش او ما مقدم بكالوريا فيها يعني في صيدلة بالشام وبالادقية بس ممكن واحد من الشام ما يحقلوا يدرس بالشام ع فرق علامة فاجباري بيروح ع اللادقية والعكس صحيح بعدين كل برجع بقلك كل عاصمة بيصير فيها هيك بغض النظر عن الحالة الاقتصادية للمواطنين :D بظن لهلاء ماحدا قدم سبب منطقي ومقنع لهلقصة |
اقتباس:
وبالنسبة لحكي زين عن ازمة السكن ... فا انا معو العراقيين وقت اجو ... هني يلي ساووا هالازمة ! بمساعدة السماسرة السوريين الحرمية :frown: |
اقتباس:
|
كمان ادارة المشاريع الصغيرة مافي منها الا بحلب
قولتك بطل روح ع حلب أدرس ؟؟؟ |
سواء من داخل السور أو خارج السور
الناس هون كلها غرباء ابن دمشق غريب بين القادمين الكثر والقادمين الكثر غرباء في أقدم مدينة في التاريخ (فيلم سنوات الضياع) ؟؟؟ ليش هي قصة طويلة وكتير ... بشعة ؟ |
كتير عم شوف نبرة عنصرية غريبة عجيبة بهالموضوع صرلو فترة مفتوح وانا عم راقب
بس انو يعني كتير صارت القصة غريبة الشام متلا متل طرطوس وحلب وادلب مانا ملك ابو حدا ولانا مطوبة لحدا وانا الي الحق عيش واشتقر واربى واتفتل محل ما بدي ومو منية من حدا وقت بدو يجي على بالي اشتري بالشام واسكن واشتغل ابقى الشوام لايبيعوني ارض او بيت شو هالغرابة هي كنا نحكي قوميات ونسميها عنصرية القومية العربية صرنا نحكي وطنيات ونكبر معلاق بالعنصرية الوطنية ياحبيبي ليك وين صرنا بصراحة شي بيخلي الواحد يقرف كتير |
حزفنا المشاركات الخارجة عن الموضوع وخالفنا الخارجين عن سياق الموضوع
يرجى الالتزام بالموضوع :D |
من المؤكد حق المواطن السوري في التنقل بين المحافظات واختيار المكان الانسب اله ولمعيشته .. هاد حق طبيعي للمواطن السوري ..((اذا العراقي الغريب عم يسرح ويمرح بين المحافظات نستكثر عالمواطن ابن هالبلد هذا الحق ؟؟)) المشكلة ليست باستقبال اكبر مدينتين في سوريا دمشق وحلب للأعداد الهائلة من مواطني المحافظات الأخرى ... المشكلة هي بتجاهل التنمية بالمحافظات الاخرى الامر الذي أدى بأبن حماة مثلاً بأن يحلم أنه يحصل على فرصة عمل بدمشق العاصمة ويستقر فيها .. ويتناسى مدينته حماة باعتبار أن الشي الموجود بالشام لايمكن أنو يكون متوفر بحماة ... مشكلة تانية .. الواسطات والولائات والتبعيات شركة البترول تشيلبيرغ وهي شركة عالمية مرخصة من الحكومة بمنطقة الجزيرة عدد عمالها وموظفينها 10000 عامل ... 9000 عامل منهم من منطقة الساحل طب ليش ؟؟!! خصوصاً أنو منطقة الجزيرة تعاني من بطالة بنسب كبيرة ... شو المغزى أنهم مايوظفوا ابناء منطقة الجزيرة العاطلين عن العمل !وما أكثرهم نفس الشي بالشام .. التوظيف بالقطاعات الأمنية والمناصب العالية بالوزارات محرمة على ابن الشام .. ومحتكرة على جماعة معينة كمان ليش ممكن حدا يعطينا رأيه بالموضوع ؟! هل الموضوع الو دخل بالولائات مو كلنا على اساس ابناء بلد واحدة ! الحل برأيي الشخصي هو المساواة بفرص التنمية بجميع المحافظات بحيث أن المواطن بأي محافظة لايفكر ابداً بالانتقال لمحافظة أخري لسبب أقتصادي أما لأسباب أخرى (أجتماعية.. سياحية.. دراسية ..الخ) فالوطن للجميع |
اقتباس:
|
| الساعة بإيدك هلق يا سيدي 22:54 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون