هلأ يمكن يكون عم يمزح ..أو بجوز هو ما بدو ياخدكن لأسباب خاصة فيه ..بس ما حدا بيزعج حدا هنيك
أنا رفقاتي راحو وانبسطو وما في أي مشاكل ..بالعكس صارو بدهن يروحو مرة تانية وتالتة :lol:
ونشالله بتزورها قريبا

هلأ ما فينا نبالغ صديقتي.. اذا كنتي انتي شركسية فمعناتا لازم تكوني بتعرفي انو في أغلبية غالبة متعصبة بين الشركس.. ولازم تكوني بتعرفي انو اذا عرفو انو الشب مو شركسي وعم يتمشى بالضيعة ونطرفت عينو على شي صبية شو ممكن يصير..
لانو الشركس متل كل الاقليات او الاكثريات فيهون ناس تافهين وناس متفضيين وفيهون الزعران كمان.. والغريب انو يتصادف انو هدول الزعران هنن الأكثر تعصبا دايما وعلى طول الخط وبكل الاقليات.. وهنن اللي بيعملو المشاكل.. والسكاكين شغالة

حلوة بير عجم..

زرناها الربيع الماضي.. وقال أخدونا الشباب تمشاية المسويات على هيدا الكورنيش الطوييييييييييييييل.. على بنا شو؟

منشرب من النبعة بآخر البلد..

إه.. طلعت النبعة منشّفة!!


قلنالهن بسيطة.. مناخدلنا بيرايتين من شي محل!!

قال هون ما في بيرة!!

شو؟ بيرة بيرة يا جماعة!!

قال هـء..

ولا محل فيها بيبيع بيرة يا إمّة الله!!


إنو بالشوب شو بيشرب الواحد؟

كولا!!


إه..

بس أبو سيزار كان نشمي.. قرط مشوار ع القنيطرة.. جابلنا ورجع :)


-------------

هلق في نقطة تانية.. بين المزح والجد.. سمعت كتير قصص عن الجان!!

في شي منها بيضحّك.. بس في كتير ناس مسدقينها :)

هلأ مشان الجان .. بقا حسب انت ومين مرافق.. يعني بيجوز رفقاتك هيك بيفكرو.. ما فيك تعمم..

ومشان النبعة مو منشفة بس كانت مغلقة عن الاستعمال العمومي لاغراض صيانة وهلأ شغالة ومرممة كون البير تبع بريقة الو طابع اثري "روماني على حد علمي"

ومشان البيرة.. مافي بيرة ببيرعجم لأنو أهل الضيعة مسلمين "سنة" يعني البيرة محرمة :o ورغم طابع الانفتاح اللي ممكن الواحد يشوفو بخصوص العلاقات بين الشباب والصبايا الا أنو المشروبات الروحية غير مستحبة اجتماعيا بين الشركس بشكل عام.. وطبعا هادا مو رأيي:larg:
والمرة الجاية بس تجي عطيني خبر بأمنلك بيرايتين:lol:

الشركس اذا بدي قلك باختصار هنن شعوب منطقة القفقاس الموجودة حاليا بروسيا بين بحر قزوين والبحر الاسود هاجرو بالنص التاني للقرن ال 19 نتيجة الحروب من قبل الروس بالمنطقة لتفريغ المنطقة من سكانها ..
وبالاتفاق مع العثمانيين تم تهجير الشركس الى الاراضي اللي واقعة تحت الحكم العثماني بوحدة من ابشع الهجرات اللي شافتها الانسانية.. وتم تهجيرهون بوقتها الى تركيا بالدرجة الاولى وسوريا "حلب دمشق الجولان حمص" والاردن وفلسطين وبلغاريا..
الشركس مسلمين سنة .. وتعصبهون الاول هوي تعصب قومي وليس ديني.. رغم انو الكل بيحب البلد اللي عايش فيها الا انو الشعب الشركسي كما كل الاقليات برأيي بيعاني من أزمة انتماء.. وبالتالي ازمة هوية..

شي حلو بالفعل ياريت لو يجي بالهم يساوو كل كم حي بدمشق قرية ويطبقوا عليها نفس مبادئ القرية الصحية لأنو الحال صاير كتير بهدلة ............

من زمان كان الي صديق شركسي كنت اعتبره الصديق الوحيد لي بمعنى الصداقة الحقيقية وكنا صغار ومابعرف شي عن اصل الشراكس فسألته سؤال طفولي ( شركاسانه اين تقع ) ضل شي نصف ساعة يضحك وحكالي قصة الشراكس ........بالفعل الشراكس من أطيب الناس وأخلصهم وأحبهم لقلبي :D

الشركس هم من الناس المظلومين في سوريا و من الناس الأكثر تهميش مثلهم مثل باقي الشعب السوري المهمش و المغلوب على أمره

هذا الرابط يحكي عن أخواننا الشركس ذاك الشعب العظيم

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -

الشركس هنن أكتر أقلّية بسوريا من بين باقي الأقليات العرقية عندهم انتماء ووطنية لهالأرض وهالوطن اللي عايشين فيه

بإيامات المدرسة.. تعرّف على "بوكس" شركسي.. :abo3aen: هيك وجه لوجه.. بس مو بالضيعة.. لأ بقلب الشام..

كنا طالعين من جودت الهاشمي.. :hart: الـGـو بتاعي :hart: .. ورفيقتها.. وأنا..

رحنا قعدنا بحديقة زكي الأرسوزي.. وأكلنا درة..

هني فلّوا.. ويا غافل إلك الله.. أكلتها علقة..


عرفت بعدين إنو.. رفيقة رفيقتي.. شركسية!! :shock:

يحرق حريشك.. ولشو حضرتها تلزق فيك انت ورفيقتك مادام هيك..
يلا الحمد الله على السلامة.. ولا تؤاخذنا بما فعل السفهاء منا..

صدقيني ما بالغت بحكيي في فكرتين :
أول وحدة أنو الشركس أكتر أقلية عندا أنتماء لسوريا وحقيقة صارو بيعتبرو حالن سوريين مقارنة مع غيرهن من الأقليات
تاني فكرة أنو أنا معك أنو أوقات في شباب غير شركس بتنضرب ببريقة وبيرعجم بس ليش؟ ياترى لأنن عم يتمشو بأدبهن وبيجو الشركس المتعصبين بيضربوهن ؟ أكيد لأ .. يلي عم يسبب المشاكل لما شباب مو من الضيعة بيجو عالضيعة ليبصبصو ع بنات الضيعة ويصوروهن بالكاميرات من غير ما ياخدو أذنهن فطبيعي هالبنات يدافعو عنهون أخواتن أو أبناء ضيعتهون ..يعني هالشي ما دخلو بالتعصب وبتوقع بأي ضيعة بسوريا لما حدا يقلل أدب وهو مو من الضيعة حياكل أتلة ..بس يلي عم يتصرف عادي ويتطلع عادي ما حدا بدايقو بنظرة حتى من الزعران يلي زكرتيون (بزكر من فترة طلع كم شخص مو شركسي برحلة كلها شركس وع ضيعة شركسية وما حدا رجع زعلان)

:D

:o.. والله ضحكت من كل قلبي ..بس عنجد كيف شافوك من أول مرة هدول شغل استخبارات
يمكن صار سوء تفاهم أو شي ..خاصة أنو هيي رفيقة رفيقتك .. بس يمكن هالشي كان يصير من زمان أكتر
بهالوقت ومن كم سنة حتى لو كانت رفيقتك شركسية ما حدا بيتدخل طالما البنت بدها تحكي معك ..
وبكل الأحوال sorry عنجد
:D

جيّد هالحكي..

رح جرّب.. و.. ببقى بخبرك شو بيصير معي :)

حاج تقولولي صوري.. خجلتوني :oops:

حاسس حالي عملت ابتزاز عاطفي بقصّة البوكس..

إنو صار مارق ع القصة أكتر من عشر سنين!!








:D

هيي القصة انو مجرد شخص متعود يحمل سكين بجيبتو معناتا هوي أزعر ومانو متربى.. سواء كان الشخص شركسي ولا عربي.. والملفت للنظر انو نفس هدول الزعران اللي بيضربو الشباب العرب ببيرعجم هنن نفسون اللي بيتقاتلو بين بعضون وبيدبحو بعض لما يكونو سكرانين..
قصص البصبصة بتصير والتلطيش بيصير وين ما كان مو بس بضيعة معينة.. ومو كل مرة الملطش بياكل قتلة .. لانو مو هيك بتنحل الأمور..

لما شخص بينكسرو كل سنانو وبينكسر حنكو وبيطلعلو تعويض مشان القتلة أكتر من 300 الف ليرة ما بيكون هادا رد فعل تعصبي؟؟.. ولما واحد قدامي السنة الماضية بيطلع دماغو على الارض كمان بيكون بس لأنو لطش بنت؟؟
لازم نعترف انو عنا زعران ومو متربايين متل كل الاقليات التانية ولازم يكون في حل جدي وتوعية لهدول الاشخاص مو دفاع عنهون وايجاد مبررات ما حدا بيصدقها غيرنا..

انا ما عم قرب أبدا على موضوع انتمائنا لسورية .. هي القصة انا متأكدة منها بس ما عنا أزمة هوية كشركس.. أكيد عنا.. الشركس مو قادرين على تحديد وطنهون الحقيقي ورغم محبتهون لسورية بس ما بشوف انو بتعنيهون كتير قضايا البلد انا شخصيا بشوفون ماشيين الحيط الحيط يا رب السترة.. حتى اللي استلمو مناصب كبيرة بين الشركس كانو ماشيين على مبدا الحيط الحيط كمان..
الشركس عندون أزمة هوية لأنو غير قادرين على الاندماج وقبول العرب بسوريا.. غير قادرين على تقبل مسألة زواج أبناؤهن من سورييين عرب .. وغير قادرين على استرجاع لغتهون اللي عم تضيع.. وغير قادرين على العودة لوطنهون وتأسيس حياة جديدة لأنو الظروف هونيك ما بتشجع... وحديثا وبعد الردة الدينية اللي منشوفها عند كل السوريين بما فيهون الشركس صار عندون صعوبة كمان بايجاد معادلة محلولة بين الدين والعادات الشركسية..

بعتذر للاطالة ولكن وجب التوضيح:D

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -

هذا الفيلم:
يوضح ما يمكن للأفراد أن ينجزوه عندما تتوفر الإرادة للعمل.

احتاج هذا العمل إلى:
ـ أشخاص متطوعين
ـ ساعة ودقائق
ـ أدوات بسيطة
إعمل لمجتمعك.. إعمل لـ بئرعجم.

قدم هذا العمل في الاجتماع المتهيدي لمجلس تنمية قرية بئرعجم التابع لبرنامج القرى الصحية ـ اليونيسيف ـ سورية.