|
اقتباس:
في مجال تذكرلي اسم هالدولة اللي منعت الحجاب وقالت انو علمانيتها ما بتسمح بهالشي ؟ إذا قصدك على فرنسا فـ بهيك تصرف آخر شي ممكن ينسمي عالعلمانية هوي هيك تصرف .. فـ رجاءً لا تقلي العلمانية هيك بتفرض. |
اقتباس:
بعدين حابب وضح شغلة بردي انا ماقلت دول علمانية تمنع الحجاب انا قلت اقتباس:
غير فرنسا عندك تركيا وعندك تونس دول علمانية فيها اشخاص عمتنادي بمنع الحجاب لانه رمز ديني وهاد ابعد مايكون عن العلمانية بس اذا بتلاحظ تبريرهم للمنع بتلاقيه مبني على اسس علمانية وتم التلاعب فيها |
اقتباس:
أعتقد أنا رأيي واضح، ليش تنفرض على حدا لبس معين و ليش تنفرض عليه يشلح؟ بالنهاية احنا شو دخلنا؟! صعبة كتير هاي انو نتقبل الكل في نفس الوقت؟ |
عم تنادي بمنع الحجاب شي والدولة مطلعة قرار تمنع الحجاب شي تاني
|
انو ميرو :angel: يحرء حريشك شو حركة انت :p
بعدني متابعة :melody: |
كل صبيه حره بلباسها :D
خير الكلام ما قل ودل ;) |
الحجاب حرية شخصية ... لكن هل من حق الدول العلمانية ان تمنع الحجاب أو لنقل الرموز الدينية في الجامعات والمدارس ؟؟؟
برأي هذا شيء صحي وضروري ... من أجل إلغاء كافة أشكال التمييز ... تحياتي :D |
اقتباس:
لانو بهالحالة انت مش بس عمتلغي رمز انت عمتلغي شي اساسي عند المرأة المسلمة معناها اذا انت كدولة علمانية بدك تمنع الحجاب فلازم تغيير عقيدة المراة المسلمة ووقت مايتم هالشي رح نستمتع جدا مع مسلسل ارهاب الجماعات المتطرفة وحلا ازا بتنحل :D |
اقتباس:
وبعدين التمييز شي الو علاقه باللي براس البني آدم مو باللي ع راسو !!!!!!!!! |
اقتباس:
تتحجب برا وتعمل اللي بدها اياه ... لكن ضمن الجامعة المدرسة ,,,, إلخ ... هي مواطنة بهالدولة العلمانية لازم تلتزم بقوانينها ... بالنهاية الحجاب رمز ديني أكتر من أنو فرض ... :D وحتى بالاسلام كلو مافي حجاب ... وجبلي آية وحدة بتقلك انو لازم تتحجب المرأة ... الحجاب اجا فقط للتميز بين زوجات الرسول وغيرهن فقط ... وبين الأمة والحرة ... مو لتحجب كل بنات الله تحياتي :D |
اقتباس:
انه بيبقى حرية شخصية وما عندي مشكله مع الشخص اللي عما يمارس حريته بالطريقة هي بس هاد ما بخلي تعجبي واستغرابي يزول .. يعني كلمات ردك كانت معبرة عن فكرتي اكتر من كلماتي ذاتها:deal: تحياتي :D |
اقتباس:
وشو الفرق ياعزيزي بين مؤسسات الدولة وبرا المبدأ من الحجاب انو يغطي مفاتن المراة عن الرجل (على حد قولن) وبمؤسسات الدولة في رجال اما بالنسبة للفتاوى حول الحجاب انا ماعندي اتطلاع عليهن ومابيحقلي اني افتيلك |
اقتباس:
لكن المؤسسة العلمية لازم تبقى علمية بحتة ... ومايكون فيها تمييز ان كان طائفي او عنصري ... ووجود رموز دينية بتأدي لنوع من التمييز اللي مالازم يكون موجود ... لهيك انا بأيد منع الرموز الدينية اللي من بينها الحجاب داخل المؤسسة التعلمية وحتى داخل مؤسسات الدولة ... بعدين مين قلك انو اللي براس الانسان مو على راسو ... ماعم بيصير بعصرنا انو اللي عراسك هو براسك :larg: تحياتي :D |
اقتباس:
|
بس بالأخير في نظام وعلى الكل يمشي عليه
بالحديث على منع الحجاب بالدول العلمانية دائما بتظهر براسنا فرنسا والقصص اللي صارت فيها طب ولنفرض انه بسوريا اجا طالب بوذي الاعتقاد ، هل بدا توافق المدارس على حضوره باللباس الخاص فيه ام يفترض انه يلتزم باللباس المعتمد من قبل الدولة ؟ وهي صورة للبوذي في حال حدا ما بيعرف كيف طريقة لبسن :  |
هووون حطنا الجمال هلا بما انو انا ما عندي اتطلاع واسع عالبوذية بس مابعرف هاللبس يعتبر فريضة او رمز
لانو برجع بقول الحجاب يارعاك الله فريضة عن المسلمين مافيك تقارن هاد في حال انو هاللبس ماكان فريضة |
اقتباس:
بالنهاية وقت بدك تسن قانون ما فينك تعمل احصائية لكافة الرموز والمعتقدات وتحاول تراعي الدين الفلاني والتقليد الفلاني كمؤسسة حكومية رسمية مطلوب منك قانون تأصدره بناء على الواقع وبناء على اللي يفترض يصير ، المدرسة يفترض انها مكان للدراسة مافي تمييز قومي بين عربي او سوري او فرنسي او اميركي تماما متل ما لازم يكون مافي تمييز مذهبي بين مسلم ومسيحي وبوذي ، داخل المركز الحكومي او المؤسسة بكون الانسان ماشي وفق القانون الخاص بالمكان الل فيه ، وخارجها هو حر بوضع القانون اللي بده ياه . |
اقتباس:
|
اقتباس:
يفترض يتم الشرح بأن المكان هاد بتم التعامل معه بعيد عن الانتماءات الدينية والعرقية والقانون هاد بيمشي عليك تماما متل ما هوي ماشي على البقية .. فاذا فهم الشخص الفكرة معناها ما لازم يكون في مشكلة واذا ما فهما معناها وجوده خطأ بالمحل هاد كونه مانه قادر على استيعاب قوانينه وشروطه . |
اقتباس:
طيب شو رايكم نعمل زي موحد لكل العالم للصغار والكبار والرجال والنساء بما ان حتى المراة والرجل ما في فرق بيناتهم:p جد هي طريقة تفرقة معناها يا بخلع حجابي يا بروح دورلي على كوكب تاني " انا وكل المحجبات" ما بقي عندنا حق ندرس و لا نشتغل :cry: شوف قديش بيكونو تعدو على حريتنا وحقوقنا يعني يندفع حتى المسلمين المعتدلين نحو التطرف ليش غير المحجبة مسموحلها تغطي شعرها بالشتاء البارد والمسلمة لا المفروض غير المسلمين يدافعو عن الاسلام المعتدل اكتر من المسلمين انفسهم |
هوي بالدول العلمانية القانون فوق الدين... وهذا يطبق لمصلحة الدولة.. كما يراها المشرعون و بالتصويت..
بس المشكلة بالدول المتدينة... مثلا منع الخمر بالسعودية... او اضطرار غير المسلمين للتقدم للامتحانات بمواد الديانة الاسلامية(التي يتجاوز عددها الخمسة في كل عام) للنجاح بالمدارس العامة..! او منع المسيحيين من انشاء كنائس...! او ارتداء صليب.. او حق التبشير و حتى التحدث بما يتنافى مع الاسلام...! او منع غير المسلمين من دخول مكة.. يعني اذا عندك صديق او صديقة من مكة ما فيك تزورهم (!) يعني انا برأيي نناقش قضية الحجاب من منظور المنطق و نبتعد عن الدين و تشريعاتو.. مازال المنتدى خليط من كل الاطياف..:D |
اول شي السلام عليكم جميعا حابة احكي انو الدين امرنا بالحجاب بس اكيد في ناس بفكرو انو الحجاب بس انو الوحدة
تغطي راسها وبس المقصود بالحجاب هو تغطية جميع الجسم يعني لبس اللباس اللي بيستر كل بدن المرأة وما يكون جسمها مفصل مش انها تحط على راسها الشالة وتلبس بنطلون وبلوزة والوان وما بعرف شو وتحكي انا محجبة وكمان احنا ما بنحكم انو ازا وحدة محجبة يعني ملاك ومحترمة ومن هالحكي اهم شي الاخلاق الحميدة والدين .:hart: بتمنى يكون الجميع استفاد من كلامي |
اقتباس:
مشان قصة البحث على كوكب ، ما كان هاد القصد من الفكرة ، القصد انه مثلا انا كشخص لست مسلم وقت بدي فوت على جامع لازم اخلع حذائي واحترم قوانين المكان صح ولا لأ ؟ تماما متل ما الشخص اللي فايت بدولة علمانية يفترض منه وواجب عليه احترام قوانينها ، مع الملاحظة بأن مافي دولة علمانية بتقلك ممنوع الحجاب :? الفكرة هية ممنوع ارتداء الرموز الدينية في الأماكن الرسمية التابعة للدولة وخارجها ارتدي اللي بدك ياه واعمل اللي بدك ياه . الاسلام المعتدل شبه غايب حاليا عن الساحة ، بس شخصيا بضم صوتي لكل صوت معتدل وبشد على ايد صاحبه .. فيكي ترجعي على رد سابق الي بالموضوع هاد وتشوفي كيف " عمليا :p " عما شد على ايد بيرسونيتا وقت استمعلت السمايل هاد " :deal: " . |
اقتباس:
|
اقتباس:
|
اقتباس:
بس سؤالي الك : اعتبري نفسك مؤسسة حكومية تمتلك نظام معين يفرض على الطلاب طريقة لباس محددة داخل المؤسسة ، بتتغاضي النظر عن الشخص هاد اذا اجا على المؤسسة كونه رداء يعبر عن ثقافته واعتقاده بمععنى آخر جزء من هويته ؟ |
كل واحد حر يحط ما يحط يصطفل
برايو مانو قيد ولا حرية هيك عادي |
هلق اول شي
انو كتير كتير كتير مبسوط انا لانو الي زمان ما شفت موضوع متل العالم والخلق والناس عم تتناقش فيو و النقاش حامي الوطيس ف بالتالي كل الشكر لصاحب الموضوع تانيا انو خيو مالح ارجع عيد كل الحكي عن انو حرية وما بعرف شو بس انو بدي اخد الموضوع منوجهة نظر تانية انو بالفترة الاخيرة في كتير صبايا اتجهوا للحجاب....ليش؟ تانيا انو خيو اذا بدنا نتصرف كدولة علمانية بالشكل المزبوط فانو سن قوانين صحيحة وخلي الدولة علمانية الف بالمية وقتها احكي اللي بدك يا ومنعو بالدوائر العامة... |
اقتباس:
اقتباس:
من ناحيه تانيه ممكن تشترط عدم لبس شغلات معينه متل الجينز او الوان غير مقبوله مشان المظهر العام للمؤسسه اما لحجاب ممكن هالمؤسسات تفرض لون معين او شكل الو بس تمنعو ما بشوف انو هالشي مبرر |
الحجاب من الموضوعات اللي اكل عليها الدهر وشرب بالاخوية ولكن يحدث دائما تجديد للافكار المطروحة للنقاش عبر المتناقشون الجدد .
سأركز العرض حول نقاط محددة 1- الحجاب والحرية 2- الحجاب والاخلاق 1- الحجاب والحرية يجب أن يكون لدى المراة كامل الحرية في ارتداء الحجاب او عدم ارتدائه ، فاذا ارادات المراة عدم ارتداء الحجاب وتم اجبارها فهذا يكون ضد الحرية وايضا اذا كانت تريد ارتداء وتم منعها فهذا ضد الحرية (مهما كان المبرر) 2- الحجاب والاخلاق ارتداء الحجاب قد لايرتبط بالاخلاق اطلاقا ، والا فما حال اخلاق النساء قبل ارتداء الحجاب ؟ قبل نزول الاسلام ؟ على كل حال فاعتقد ان الحجاب يتعلق بالشريعة الاسلامية ومن المؤكد انه امر جيد ولكني لا اعتقد انه يرتبط بالاخلاق ، فهل اذا قامت من ليس لديها اخلاقيات ،بارتداء الحجاب ، فهل بذلك اصبحت تملك الاخلاق ؟ هل هكذا يكسب الانسان الاخلاق ؟ بقطعة قماش ! لابد ان الاخلاق اكبر من ذلك بلا شك . عزيزي كابي قد تحققت امنيتك اقتباس:
ومن قال ان الحجاب للتمييز ؟ |
اقتباس:
لف راسنا من دون حشيشه اه افرطوها بقى:jakoush::jakoush::jakoush::jakoush::jakoush ::jakoush: |
انا برأي في كذا شخص بهالمنتدى عم يحاول يقنع بعض الاعضاء بأفكاره الصهيونية....
مو شرط على هالموضوع ... الحجاب مفروق على كل امرأة مسلمة ... فلسفة زايدة ما بدنا رجاءً مو كل شخص في بباله فكرة يروح يحكيها .. في ناس عم يتأثرو من هالكلام في كتير صغار بالمنتدى ( مراهقين ) وهذا الكلام خطير على هيك عقول |
اقتباس:
اها ... و من وين بقى استشفيت هالصهيونية :shock:؟؟ اقتبس الردود و ورجينا بالبرهان القاطع و بلا شلف حكي بالهوا ... اقتباس:
أنا بدالك كفين لكل واحد عالماشي و بلا ما وجع قلبي :frown: اقتباس:
أو (ينصح بوجود الأهل) بيمشي الحال ؟!؟ :p |
اقتباس:
والله يا ام الجود في اقوال : انا لا ضد ولا مع الحجاب .... وكتير في افكار سوداء مثل وقت بيشرح ( شخص ما ) انو الاهل غلط يجبروا البنت على الحجاب هو هيك اولا عم يتدخل بأمور لا تعنيه ..روح ربي ولادك بالأول ... شغلة تانية انو مين قلك غلط؟ في بعض البنات بيستاهلو انو ينجبروا على الحجاب ... وعلى فكرة انتو عندكن فكرة ( اجباري ) انو بالضرب ههههه لا مو شرط يا خواجات .. ممكن ينقال ( اتحجبي مشان ما اغضب عليكي ) هذا مثلا يعني ممكن يشرحوا كيف الحجاب افضل للبنت والبنت من حالها تتحجب في الف طريقة بس للأسف مالي اب لحتى اشرح اكثر ... ولا انتو اباء لتعبروا عن رأيكن بهي الطريقة _____________________ انا اكيد ما رح اضرب كل واحد كف بس سبحان الله العرب العنف بدمهن .... يعني اذا كان رأي مختلف بصير انا الجزار القتال المجرم الحقير الواطي ههههههههه هي حرية التعبير .. انا ما حبيت اعمل اقتباس او اذكر اسامي مشان ما اجرح مشاعر حدا ___________________ وكمان بخصوص الــ18+ .. نتي اخدة الموضوع مسخرة..... مو ضروري ينحكا كل شئ على المفتوح خلص كل واحد لازم يقدر انو في بنات وشباب مراهقين بهالمنتدى ولا اللهم نفسي؟؟ |
اقتباس:
ليش اللي عم يحكي هيك عم يروح لعند البنت المحجبة و يكشفها ؟؟ هو حكي و الحكي ما عليه جمرك .. كل مين بيقول رأيو و بالأخير البني آدم ما بيعمل غير اللي مقتنع فيه اقتباس:
بغض النظر عن طريقة الإجبار .. هو بالنهاية إجبار .. ليك لقلك شغلة ... لما بتجبر ابنك على شي (ان كان بالتهديد بالضرب أو بعدم الرضى) بدو يعملو قدامك بس لحتى يتحاشى القتلة أو ليكسب رضاك .. بس كون واثق أنه مجرد ما صار بعيد عن نظرك رح يرد يعمل اللي بدو ياه .. ليش ؟؟ لأنو مو مقتنع بجدوى الشي اللي عم تطلب منو ينفذو .. و التنفيذ بالنسبة الو رح يكون مربوط بوجودك فوق راسو كأب .. مو بشي تاني و بغيابك بيزول الداعي لهالتنفيذ ... و أنا بالجامعة تعرفت على صبايا بيطلعوا من بيتن محجبات و بس صاروا بحمامات الكلية بينقام الغطا و بيطلع الأحمر و الأصفر و الذي منو ... فمنرجع هون للرد اللي استفزك .. أنا برأيي من الأفضل لهالبنات انو يبقوا سافرات ولا يسيئوا لصورة البنت المحجبة و يشوهوا الحجاب كرمز لعفة المرأة المسلمة .. و أنا ما قصدت أستفزك .. بس ردك السابق كانت لهجتو حدة شوي .. و تحيتي الك :D |
لك على راسي والله
انا لقلك شغلة ... بكره كتير وقت منتجاهل انو كلامنا عم يأثر على اشخاص وبصراحة معك حق تماما باللي عم تقوليه..... خلص لكن متفقين ههههههههه تحياتي الك كمان :deal: |
اقتباس:
عمرو ما كان الاجبار حل هلا بجوز ينفع مع ناس بس ع الاغلب ما بينفع وبعدين من ورا الاجبار صرنا نشوف تشوه بالحجاب اللي مطلعه غره واللي رقبتها مبينه واللي لابسه بنطلون رش واللي بدها بربيش اطفاء ليغسل وشا بتقولو فساد وعفه ما دخل الشريفه شريفه من جوا لا لبسها ولا ختانها ولا عيون المراقبه عليها رح تنفع بتقلي لحجاب فريضة صح انا لو لحجاب مو فريضه ما بلبسو بس هل لحجاب ازا لبسنا عملنا كل الفرائض لأ عملنا وحده من الفرائض واغلبنا مقصر في كتير من الفرائض فكل واحد يلتهي بتقصيرو وما يطلع لتقصير الناس :D |
اقتباس:
هاد الرد أكتر رد ضحكني من شي 3 سنين بيشرفي انك نهفي يا زلمي انو أديش فكرت حتى طلع معك هيك رد عذرا جميعا و لكن أجد نفسي مطرا للقول و لو انو ضد عقلي هالحكي بس بلعو يا صهيونية و امبريالية و رأسمالية عالمية و أميركا و كولدشتاين بلعوا لقلكن مانكون أحسن من الباقي الحجاب مفروض على كل مرأة مسلمة طيب على عيني و الشب تبعك يلي بعد شوي بيفوت و برد عليك ما عاجبوا هالحكي شو بدك تساوي يعني يا أخي بدال ما تقعد و دخللنا الله بالقصة ناقشوا و فرجينا رأيك الحلو حبيبي المنتدى حر يعني الواحد بيفوت بيكتب يلي بدو ياه و الفكرة يلي بدو ياها من دون ما ياخد رأي حدا يعني اذا بدو يسب الله انتي ما دخلك بعدين مينو هاد يللي قللك انو المنتدى معبى عالم صغار سألت sos مثلا اخخخخ و لك اخخخخ هلأ بشوف اذا في شي محل لنبلع و لا حاج :lol: |
اقتباس:
يعني من ناحيتي انا مليت من هالمواضيع رح تقولولي ليش فايت رح قلكون لحتى ابدي رايي بالبلع يعني نوعا من السبام المقدس وهلا وسهلا |
بصراحة الحجاب هو حشمة بس للي بيعرف يحتشم فيها
متل هون بتلاقي الصبية طالعة كاشفة وجهها والمكياج كيلو على وجها وصدرها باين وميت سلسال فيو وبتحط لماع وهيك شغلات ولا بتكون العباية على قد جسمها بالزبط يعني عم تمشي فيها مسطرة من كتر مو ديقة أحلى شي صار معي موقف بسوريا بيضحك : لمن نزلت بالطيارة انا كنت متحجبة وعم أمشي مع أخويي مالقيت ألا واحد نط من جنبي أستغفر الله عليه تأول أبليس مابعرف عصاية وميش شعرو ولابس أبيض ( أبيض فبيض خير اللهم أجعلو خير )>> كأنو كابوس المهم قلي تتجوزيني :shock:انا أنقطع قلبي ومسكت بأيد أخويي ومشيت كأنو مافي شي بس قلبي هبط برجلي ولمن كنت أمشي بسوريا وانا لابسة برقع كنت على علم حتى لمن أتنقبت وحطيت نضارة صرت شبهة بالأخير أخويي قلي ماعد تطلعي معي لتشيلي النضارة بس يلا سنة ومرت |
| الساعة بإيدك هلق يا سيدي 22:36 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون