|
بالفعل هل المرة أثبت النظام مدى غبائو الي لايقل عن غباء بوش ولو ردت سوريا لن تتجراء الولايات المتحدة على فتح ولاحتى ربع ربع جبهة
أثبتت هذه الاداره الامريكيه مره بعد مره أنهم مجموعه من الحمقى والمغرورين بالقوه العسكريه التي فقدت شعبيتها والشعب الامريكي غارق بهموهة الداخلية ولايريد حرباً أخرى ولو فكر بوش على اتخاذ قرار بشن حرب لزحف الشعب الامريكي الى البيت الابيض سوريا ليست العراق، سوريا ليست تنظيم القاعدة ، سوريا ليست حركةطالبان ، وأعداء بوش تعاظمو بشكل كبير كان بالامكان أن لاتكون سوريا مكتوفة اليدين الولايات المتحدة لاتستطيع التنصل من عدوانها ولا تستطيع حل الموضوع بالقوه هم لا يدركون حجم الورطة و المشكله التي كانت ممكن أن تحصل لو اسقطت أحدى المروحيات على أراضينا فحجت الغبي بوش بشن حرب جديدة على سوريا مستحيلة .. وخاصتاً أن سوريا وجيشها يعملون حرس حدود لدى الامريكيين ، والاوربيين سيقفون بوجهه بوش أقوى مماتتصوره أن كانت الحراب على العراق وصدام قد سببت مشكلة كبيرة للأدارة الامريكية فكيف وهي بهذا الحال السىء .. حتى الجمهوريين لايردون أن يخسرو اكثر وأن تددهور شعبيتهم أكثر مماهيا علية .. ولاننسا أن الأوربيين والحزب الديموقراطي جل اهتمامهم بالملف النووي الايراني الذي يرون فية الخطر الحقيقي وليس حماقات بوش .. وكذالك تنامي قوة طالبان لدرجة قول قائد القوات البريطانية بأنة من المستحيل تحقيق نصر على طالبان و الناس يلي عندون إعتقاد بالقوه العسكريه الأمريكيه . هؤلاء لا يفقهون عمق المشكله التي تواجهها أمريكا ومازالو يعيشون في عبق الماضي القريب. لوتصدينا على هذا العدوان لرتفعت أسهم النظام داخلياً وعربياً وعالمياً .. حقنا الطبيعي أن ندافع عن بلادنا ولكن نحتفظ بحق الرد هلء هاد هوه حال الشعب السوري الأبي رمز الصمود والتحدي والمقاومه؟ من ذا الذي يقول أن سوريا سكتت ؟ سوربا لن تسكت بل ذكرت وللمرة الألف بأنها تحتفظ بحقها في الرد. ولن نكون أنثاف رجال لك أذا دمائنا هانت على حكومتنا وشباب بعمر الورد حاكموهم على تهم سخيفة ولا أخدو بعين الاعتبار لا الشب ولا وأهله وأقرابائه..بقا بدكم هنن يحموكم ولا بدكم الامريكان يحترمونا ! لك لحنا اشبه بالحشرات والطفيليات لما بنحكي بأمورنا الداخلية يلي أبسط بكتير من مطالبة الشارع بحق الرد على الولايات المتحدة الرد بكرة في شنو>>>> سمعت أنو في مظاهرة غداً ولح نسب ونلعن ونحرق العلم الامريكي والاسرائيلي وكفا الله المؤمنين شر القتال |
اقتباس:
والله انا بشوف انو هي كلمة حق الرد لازم نحزفها من القواميس والمعاجم ونستبدلها بواجب الرد , حقنا نحن كشعب أن نرد ,واجبهم هم تجاهنا أن يردو . لانو الانسان ببعض الاحيان بيتنازل عن حقوقو لسبب من الأسباب وبيكون عندو مبررات يعني أخلاقيا مقبولة. أما يلي ما بيأدي واجبو بيكون إنسان متقاعس . |
لك العمش وصلت فين الحقارة والدونية لهون.............أنو ميازنية الدولة الي عم بتروح على جيشنا المغوار وينها!!!!!!!!!!
لك وبعدين مع رب هل الحال.......... |
يعني لو ذهبت ضحايا خلال عملية الرد لرفعنا رؤوسنا أمام جميع العربان الشامتين من تعليقات حكومتنا الرشيدة بالاحتفاظ بالرد والشجب والادانة .. بس ان المواطن السوري يصير ملطشة من هب ودب وحكومتنا تحتفظ بحق الرد شوف كم حق رد صار محتفظين فيه الى الان ؟! صار الامر لايطاق
الله يرحم هؤلاء الشهداء الابرياء .. وخلي الحكومة تحتفظ بحقوق الرد لنشوف آخرتها .. ولنشوف هالجيش الخارق اللي بيسحب 75% من ميزانية الشعب ايمتا بدو يأرجينا قدراته ولو باسقاط طائرة هلكوبتر واحدة مو اكتر لنحس بالفعل انه يوجد لدينا جيش بالفعل اقتباس:
بالنهاية حزب الله حزب لبناني يدافع عن ارض لبنانية وفي حال تم تحرير مزارع شبعا فمارح يجي حزب الله ويتكرم عليك بتحرير الجولان السوري المحتل ! لك والله حزب الله ذو الامكانيات المحدودة بيستحي من عدم الرد على اي انتهاك ! ونحنا بنتحفظ بحق الرد في الوقت والمكان المناسب هاهاها حفظناها هالديباجة بصم ... يلعن ديبكم يازلمة اشتهينا مرة نسمع عن رد صادر من الارضي السورية وليس من خارج الاراضي السورية ... نريد أن نرفع رؤوسنا عن طريق المقاومة السورية او عن طريق الجيش السوري وليس عن طريق حزب الله وحماس ولو لمرة واحدة عالاقل اقتباس:
عندك علم خيو انو حضرتكم من اصول تركية او كردية روح شوف شجرة العيلة ساعتها بتبطل تردد شعار البعث العظيم أمة عربية واحدة ...ذات رسالة خالدة ههههههههههههه ونعم الشعار :p |
اقتباس:
|
صباحنا بؤس وذل وإنكسار , والموضوع اأنو خلص , عقل ينحكى فيه ما ضل, وما عم تظبط معي , ولمين بدنا نرد وشو بدنا القول وصرلنا كل العمر بس منقول , من بعد إذن الجميع , مع احترامي للجميع من كاتب الموضوع الأخ تحيا سوريا إلى الأخ أبو حلب , رح بحكي حكي مجانين الصبح على بكرا ولا تواخذونا
مين بدو يرد وكيف بدو يرد وليش بدو يرد ولمين لازم يكون الرد وكيف وصلنا لهون , ومين قادر يرد , وشو قدرتنا على الرد لما المواطن السوري صار متل الكلب بسوريا ناطر حدا يرميلو عظمة ليسد جوعوا لأنو الحرامية سرقو كل خيرات البلد ومعظم السرقات من ورا الجيش العظيم حامي الحما الي صنع أبطال فعلا بس أبطال بالسرقات والنهب والنصب , يا بدو يكون الواحد حرامي , يا مطلوب منّو يهج برا الوطن إذا كان نزيه وشريف , يا يزور بيت خالتو إذا فتح تمو وحكى , أو إذا حدا من الشباب الطيبة عمل فحص دم لش مواطن وطلع عندو نسبية حب الوطن بالدم مرتفعة , وإذا كانت الدولة بتتألف من الطرفين , يعني المواطن المقهور الملتعن رب ربو لربو وراطض ورا شي عظمة يسد جوعو من طرف , واللصوص والحرامية من طرف , اللي بدو يرد إذا تركولو مجال يرد ... يا حرام شو بدو يرد , ولك والل شي بيضحك لحد البكاء , حتى يحكيلنا شغلة بتنفس شويه ضغط رح منطق يا شباب , صرنا نشوف المطر ذل وقهر, وصرنا نخاف من حبات المطر , وين نروح و[اي حيط بدنا نفوت , أصلا ماضل حيط مافتنا فيه كان عندي فكرة ما بعرف شو مدى إمكانية تطبيقها , إذا في حدا قريب من أهالي الشهدا وممكن نساهل نحنا كمواطنين مهجرين بجزء من تعبنا للتخفيف عن هالناس بطريقة ما يا ريت تلاقولنا طريقة وبسرعة قبل مانطق نحنا ونصير محتاجين للمساعدة واعذرونا عالتطويل وإذا لم أحترق أنا وتحترق أنت ونحترق نحن فمن إذا سيصنع وطنا ً لأطفالنا |
اقتباس:
بس حابب أعطيك معلومة صغيرة انو نحن لو رادين بأرضنا وموقعين هالطيرات أو على القليلة آسرين الجنود ماحدا بالأرض بيقدر يحكي حرف... بحكم انو الهجوم صاير على أرضنا وبالداخل السوري ولعلمك أميركا وقت بدها تجتاح سوريا مو ناطرة حجة ولا ناطرة مبررات.... بس القصة قصة عملو يلي بدكون ياه بس لاتقربو على الكراسي تبعوتنا.. |
طبعا سوريا دولة الممانعة والصمود وووالخ
وسوف ترد في الوقت المناسب والمكان المناسب هذا وقد دان رئيس جمعية المهندسيين الاروبية الهجوم الامريكي وجمعية حقوق الحيوانات في جمهورية بوركينا فاسو استنكرت العملية الوحشية. ولسا في كتير جمعيات رح تستنكر العملية فانتظروا يا جماعة !! برأيي انو ما رح يكون اي رد لا عسكري ولا دبلوماسي، من الناحية العسكرية المنطقة هنيك خالية من اي معدات عسكرية ثقيلة لحتى يتم الرد على هيك خروقات جوية او برية واما من الناحية الدبلوماسية ما في هديك التمثيل العالي بالبلد رح يكون الرد ذات معنى. اغلب الظن الرد رح يكون عبر الكلام وتجميع الاستنكارات والقلق والتنديد من الدول والجيران وبس طبعا هالاختراق رسالة واضحة انو يا قيادة بسوريا اوعى نحن بنقدر نفوت ونقتل على كيفنا واول مرة فتنا شي كيلو متر وطبعا الاعلام الرسمي غطى على الخبر وما حدا دري بالموضوع، وتاني مرة 8 كيلو متر وبكرا يا على دمشق او القرداحة مادام النفط عم ينزل سعرو فما مشكلة ازا فاتوا لجوا شوي وللعلم فقط بانو اخر صفقة اسلحة بين سوريا وروسيا كانت صفقة شراء اسلحة فاسدة وايضا الاعلام غطى ولفف الخبر عن الجماهير المكدوحة من اسفلها أمنية اخيرة: بفرض لو حدث هالامر ببلد اروبي او بشي بلد غير بعيد عنا لكان استقال وزير الدفاع ورئيس اركان الجيش من مناصبهم، فهل هالشي رح يحصل عنا ويحطوا انفسهم تحت تصرف المسائلة امام الشعب؟ بانتظار الاجابة |
اقتباس:
وتراني أنا مقتنع بهالحكي بس الله بيقنع الشباب , ما في أمل , خض المي وهي مي , تركون عمرهون ما يعرفو بكرا بيندمو |
اقتباس:
وليصير عنّا حقوق , بعدين مطالب فيها ولا يضيع حق وراه مطالب ويا مقدر المقادير بهالبلد كل شي بيصير , بطاطا تصير محطة ... وترين بيمشي بلا خط |
اقتباس:
آمييييييييييييييين |
 تشييع ضحايا المجررة الأمريكية في البوكمال غريب هالعهر والحقارة... بتصور هالشهداء بيستاهلو جنازة رسمية على القليلة... انو ينلفو بعلم بلدهون على القليلة... لك يجي كم واحد من حكومة الصمود والممانعه يحضر الجنازه... بس بصراحة منيح يلي ماحدا منون حضر ولا كان تشييع رسمي... خلي الجثمان طاهر والجنازه شريفه. |
اقتباس:
لا بأحلام ولا بأوهامك... لك حتى بلحلم مافيك تحلم فيها...قال يستقيلوا قال.. |
صور الجنازة فعلا مؤسفة... هاي جنازة شهداء؟؟ وين رئيس الجمهورية عم يعزّي الأهالي, وين فرقة مراسم الجيش حاملة النعوش؟ وين طلقات التحية؟؟؟
طبعا بعد يومين ما حدا متذكر الضحايا و أهلهم... اللي تيتّم و اللي ترمّلت... الجيش ما عندو مصاري يتكفّلون لأنو لازمون الميزانية لشراء اللكزس و المرسيدس... لك شي بيقرّف ... |
ما الهون عين يوصلو عند اهالي الشهداء...
|
اقتباس:
إي أنـا بشوف أنو بأغلب الأوقات سوريا بتستخدم نقاط قوتها كـ (سوريا) ، وهاد شي مو غلط ، يعني نحنا ممكن نكون ما عنا إستطاعة عسكرية لأي سبب كان (كمان شي مؤسف) ومو حديثنا ليش وصلنا لـ هالمرحلة لكن الأهم أنو نستخدم أي نقطة قوة إلنـا رداً على هالشي يلي عم يصير ، مو كل الدول قوية عسكرياً ، (هاد الشي مو دفاع ، لكن إذا كان بتملك قوة بمكان آخر .. ببقى الموضوع أهون من الضعف الكلي) وهلأ عم نطالب سـوريا تلعب و تستخدم هالأوراق ضد العدو الأمريكي ، بأي طريقة كانت تحفظ فيها كرامتنا و أمريكا تريد إستفزاز سوريــا لغاية في نفس يعقوب ، يعني الأمر سياسي أكثر ماهو عسكري .. المهم أنو المخططات الأمريكية في الشرق الأوسط , العراق , لبنان و فلسطين أفشلناها وبكل جدارة ونحن فقط من أفشلها! (بيني وبينك أنا بتمنى الرد السوري يكون عسكرياً وبقوة .. لكن السؤال أنو هل سوريا جاهزة للحرب الآن؟) لهيك أنـا عم قول ما بفضل الخيار العسكري ل سوريا وبفضل تستخدم أوراق اللعب بـ هالوقت الحالي :D |
اقتباس:
حاج مشان ألله حاجتك... عم نحكي عن قتلى سوريين ع ايد كوماندوس أمريكي و حكومتنا متل الدجاجة ما استرجت حتى تطرد القائم بالأعمال (لما ع أقل منها كان لازم يوصل ع واشنطن برفسة من أول حمار تلاقيه بالبرّية) دخيل النبي اللي بدك ياه, موضوع عن جريمة قتل من الطراز الأول... احترم رهبة الموت على الأقل ازا ما جاي ع بالك تحترم شوية هالذكاء اللي عنا, و خليلنا الاجتماعات الحزبية لغير وقت و شكرا |
اقتباس:
ماعد فيني غير هنيك... عن جد الله يهنيك ويهني حكومتك فيك |
بشرفي ماعد طلع معي الحكي... لك الحقيقة عم تنكتب بدمنا صارت وفي ناس مصره تدعس على هالدم... عمي اهتفوا وهللو والقو خطابات لتشبعو... بس مو تدعسو على جثامين شهداء أبرياء وأطفال ونساء مشان ترفعو لافتة تأييد للنظام...
أبو حلب يرضى عليك مابدنا نحتد على بعض ولا نزعل بعض... روح عملك كم تصميم وكم صورة لبطل الصمود والتصدي واتركنا نحكي بهالجريمة وبجريمة السكوت عن الجريمة... دخيل عينك والله عم حاكيك وأنا ضغطي مرتفع... مشان مانزعل بعض... لأنو والله ماعد طلع معي حكي ولاعد اقدر ناقشك... مابعرف شو بدي قلك عن جد... كتير حابب قلك شغلات بس كل مابقرا اجوبتك بنزعج أكتر.... الله يرحم يلي ماتو والله يتنقم من كل الخونة والأذلاء والفاسدين والساكتين على دمار بلدون بأي طريقه كانت... |
اقتباس:
,والله يا معلم معك حق شي بيرفع الضغط عن جد يعني شي غريب , قال افشلنا المخططات الامريكية وما نسترجي نطرد القائم بالاعمال الامريكي من بلدنا بعد اللي صار , على كل اليوم قال المعلم وليد بيك المعلم نترنا تصريح , قال المرة الجاي رح يردوا الشباب يعني ببساطة هالمرة مو محسوبة , والمرة الجاية(الله لايقدر ويكون في مرة جاية) منعتبرها تحذير و هيك بقى لانو نحني ما عنا وقت لهيك حوادث تافهه , عم نفشل المخططات الامريكية لانو يعني ما قلتلنا ابو حلب , هي ما رح يردوا الشباب ولا رح يعملوا اي شي , ما رح تغير رايك فين ؟؟؟ اما قصة الجنازة فالنظام بدو القصة تنتسى بسرعة , لانو هو عم يعتمد على عامل الوقت , وكل شوي مناكل ضربة والعالم بتنسى الله يرحمن عن جد منيح اللي ما حضروا الرفاق المجرمين الجنازة , لانو كانوا دنسوا دماء الشهداء |
اقتباس:
يعني بكل ندالة عم يقلك انو نحنا ساكتين وماعم ندافع عن أرضنا... بس المرة الجاية ياويلكون شو بدنا نعمل... بيجوز نستدعي القائم بالأعمال السيرلانكي... هالمره سماح يلي ماتو مو محسوبين... المرة الجاية ياويلكون. |
اقتباس:
ع الاقل بلا المراءاة واكل الهوا وطق الحنك . يلي مات مات وبالت=ناثض من جنازة فيها من النفاق بخلي الناس تقرف بدل ما تحزن .. عن جد احسن اقتباس:
|
اقتباس:
شي بيأسّي فعلا.. |
اقتباس:
شر البلية ما يضحك ...... |
الله يتغمد أرواح الشهداء برحمة وجنان عرضها السموات و الأرض ،
|
مشاركة من أحد الشباب بأخوية بس مو حابب يحطها هو بحكم وجودو داخل سوريا:
اقتباس:
|
  تشييع لاتليق بكم أيها الشهداء... ربي يرحمكون |
هاي الصورة اللي كان بدي جيبا... شفتا بالمرصد السوري من شوي...
يفترض هاي صورة صلاة الجنازة... يعني لو في "وجه سحّارة" كان طلع بأول صف... بحكم اني ابن المنطقة الشرقية فيني قلكون انو لو جنازة شيخ عشيرة كان لاقيتو المحافظ و أمين الفرع و قائد الشرطة و وين في أمين شعبة و عضو قيادة فرع و مجلس تنفيذي و رئيس بلدية ... كلهون محتكرين الصف الأول... لأنو بفلسفة الـ "لا للعشائرية, لا للطائفية .. نعم للُحمة الوطنية" شيخ العشيرة مهم كتير... حاكم ع عشيرة لأنو, و بالتعريف هو انسان متخلّف يسهل اللعب بعقلو... بينما هون شايفين انو الصف الأول "يبدو" انو ناس بسطاء فقط شاركو بالجنازة بدي ينفهم علي صح.. بعرف انو من الأفضل عدم وجودون (و بالعكس هيك حقيقية أكتر... لأنو هاد الشعب عم يشيّعون.. أهلهون.. الشعب البسيط)... لكن يا أخي و الله كبيرة انو بجنازة شهداء مافي تمثيل رسمي.. بيظل هاد تمثيل للدولة يا ألله !!! بينما لو جنازة شي فاسد أو شي منافق بتلاقيهون متسابقين... الله يرحم الشهداء... |
على مايبدو مابدون يكبرو القصة وبدن ياها تنتهى بأقل تغطية اعلامية... انو ماتو الله يرحمون يلا دفنون وبلا مهرجانات وخطابات وبلا تغطية اعلامية... انو مشوها هيك...
وعلى فكرة أنا مابستعد انو في خوف من ردة فعل أهل الشهداء لأنو عن جد ممكن انو حدا ينفعل ويعمل فيون شي مصيبة... مشان هيك قالولون تخبوا بمكاتبكون... بدال العلم السوري ملفوفة الجثامين بشراشف.... منيح شكلو متل العلم النمساوي بس ناقصو نسر بالنص... ياحرام بس |
اقتباس:
فعلاً ... تشييع لا يليق بهم كشهداء على الإطلاق |
لك ياااااااااااااانااااااااا س....
ارحمونا بقى ....عن جد القصة زادت عن حدا .. لك شو قطيع غنم اللي راح ولا كم كلب جعاري -استغفر الله- اللي ماتو؟؟.....اي لك لو ميت كلبو لابن شي واحد منن علي الحلال بيزعلو علي اكتر من هالشهداء اللي راحو... معقول!..الخبر بينزل ع الفضائية متل كأنو صاير بشي بلد تاني أو شي عالم تاني ......ووزير خارجية بيطلع بيقول بكل برودة دم.... المروحيات الأمريكية توغلت لعمق ثمانية أميال داخل الأراضي السورية وإنها أسفرت عن مقتل ثمانية أشخاص غير مسلحين. انو حاسبينا كمان .......تمن أميال ع التكة..... الله يرحمكن ياولاد بلدي....... |
وأخيراً أتى الرد الحكومي الساحق على المجزرة الأمريكية:
الجزيرة :مجلس الوزراء السوري يقرر إغلاق المركز الثقافي والمدرسة الأميركيين في دمشق. بالفعل يا أخي لقينا طريقة موجعة للغاية... وأنا من هون بدي وجه اعتذار لكل الشباب يلي كانو عم يقولوا انو الرد قادم وأنا ماكنت مصدق... وبصراحة ماتوقعت الرد يكون بهالقسوة وبهالنوعية... والاعتذار الحقيقي من الشهداء الأبرار على هالرد المخزي. |
عيب والله عيب ... راسنا صار بالارض بشرفي .. قال نشجب ونستنكر .. شي بوطي الراس
ولو برجعوا مرة تانية وبضربوا بنص الشام كمان رح نشجب ونستنكر وان *ريناها بوصلوا لمجلس الامن .. جد شي بيخجل |
اقتباس:
:frown: |
محسسيني المركز الثقافي رح تنضرب امريكا كلا منو .. بكون كلو ع بعضو معهد تعليم لغات بمنهج امريكي .. 99% بالمية من طلابو سوريين
يعني قطعو عليهن الدراسة ع جماعة البكالوريا والتوفل مسخرة |
و حياة الرب مخنوق صرلي يومين
يوسف العظمة ...انت هلق متت يرحمك الله يا يوسف العظمة يرحمك الله يادريد لحام يرحمك الله يوم قلت: الله وكيلك يا ابي صرنا فرجة الله يرحمك يوم صرخت وقلت:الله يرحمك يا ابي مو ناقصنا الا شوية كرامة بس |
قمة الوقاحة تظهر لما الاستخبارات السورية تعرف وتتساهل مع تنفيذ العملية وهي اللي بتعرف انو الاميركان شغلتون بالحياة القتل بالغلط
يعني بكرا بتوصل لحمص والشام ةبحجة والله في عندكون ارهابيين بدنا نصفيهون سلام على سوريا |
يعني مع انو جزء من الاراضي السورية محتلة و باقي الاراضي مستبحة من قبل الامريكان و اسرائيل و بدون ان يتجرأ احد من شراذمة البعث الاسدي على الرد , بطلعلك دكتاتور دمشق ويتهم البعض على انهم انصاف رجال وانو هو الرجل بصراحة ما بعرف انا, هل الرجولة هي اغلاق المركز الثقافي الامريكي الرائع مقابل تسعة قتلى سوريين و استباحة الاراضي
|
المقداد يتوعد بالمزيد
أكد نائب وزير الخارجية "فيصل المقداد" في محاضرة له أمس, أن سورية ستتخذ إجراءات مؤلمة رداً على العدوان الأميركي الذي طال أراضيها يوم الأحد الماضي, وأشار إلى أن هذه الإجراءات ستصب في مصالحتها الوطنية من جهة ولن تتعارض مع القانون الدولي من جهة أخرى, ذلك لتمسك سورية بمنهجها العقلاني (الذي يتسم بضبط النفس).
و أضاف: إن بعض هذه الإجراءات سيتم تطبيقها عما قريب بشكل تتابعي, أما بقية الإجراءات فإن الجهات المعنية ما زالت تناقشها. كما وصف المتحدث باسم الحكومة العراقية "علي الدباغ" (بالمعتوه) وذلك دون تسميته بشكل مباشر, نتيجةً لتصريحات الأخير حول العدوان الأميركي وتبريره لها. ودون ذكر أسماء, اتهم "المقداد" بعض الحكومات والدول العربية بتمويلها للإرهاب ودعمه وزراعته في الأراضي السورية, إضافة إلى شمال لبنان وذلك لتحقيق غاياتها المشبوهة والمكشوفة لدى الجميع. أما بالنسبة (لقوى 14 شباط) فقد عبر عن أمله في تخفيف روحهم العدائية التي يتميزون بها, و إعطاء المجال للحوار حتى يتمكن السفير السوري المرتقب من الجلوس معهم والتوصل إلى حلول ترضي الطرفين». |
اقتباس:
|
| الساعة بإيدك هلق يا سيدي 05:24 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون