|
صار الموضوع محتاج موضوع منفصل .. عن علاقة العرب بالسوفيت تحديدا
ذكرتوني بمقال في احدى الصحف ... عن مؤتمر لدول عدم الانحياز احتدم النقاش بين عرب موسكو و عرب واشنطن ! .. لا موسكو كانت تدعم العرب ببلاش ... و لا واشنطن تدعم العرب ببلاش ... بس الحق يقال ... الاتحاد السوفيتي ساند العرب ضد اسرائيل في حروب 67 و 73 ... بس العرب ما حاربوا لاسباب معينة ! و مثل ما الاميركان ما باعوا السلاح مجانا للخليج .. الروس ما باعوا السلاح للعرب مجانا .. و دبابات T72 الروسية كانت ما تضاهيها اي دبابة في العالم ... |
اقتباس:
هلأ انا بالنسبة للحكي يلي عم احكي مالي جايبو من أي مصدر عربي بالعكس كلها مصادر أجنبية هاد أول باشتان تاني باشتان لو بدنا نحكي شوي عن تجميع اليهود بفلسطين فنحنا ما عم نحكي عن قرار اتخزوا كم دولة يعني خلينا نكون واضحين أكتر في وثائقي أميركي هلأ بهاللحظة هي عم اتفرج عليه عم يحكي عن شي اسمو الماسونية أكيد هالحركة معروفة للجميع لنرجع لقصة اليهود والروس وشو علاقة الماسونية بالموضوع ياسيدي العزيز موضوع وضع اليهود بفلسطين والقرار هاد ماتم بيوم وليلة وهالقرار هاد تم من هالمجموعة هي يلي تدعى الماسونية ولما هالمجموعة هي تاخد قرار بيكون بناء على دراسة جدا عميقة للأبعاد تبع هالقرار وكيف رح تكون ردة الفعل من قبل الناس التانية وشو بدو يكون ردنا على ردة هالفعل هي هلأ هالجماعة هي بتفرض رأيها عالحكومات وبتفرض على كل حكومة شلون بدها تنفذ هالموضوع هاد يعني لما نحكي انو روسيا داعمة اسرائيل فأنا ماعم احكي عن الفترة الي كان فيها عبد الناصر وحافظ الأسد عم احكي عن فترة قبل بدءا من اتخاذ قرار نقل اليهود على فلسطين ولحد هاللحظة هي سياسات الدول كلها بالوقت الحاضر ومن 80 أو تسعين سنة لورا كلها مسيسة من قبل هالجماعة هي |
اقتباس:
|
ياس وأيهم يا شباب أنا والله ماعم قول عنون حلفاء ولا عم قول انو الجماعة حاملين قضايانا الوطنية وراكضين فيها وماعم قول انو تواجدون بسوريا مفيد لإلنا.. بالعكس أنا يلي عم قولو انو الجماعه مابيهمن غير مصالحون وانو من كم يوم كان اولمرت بموسكو ووصفوا بوتين بالحليف الأكبر للكيان الروسي.. وبرجع بقول انو هالصفقة تبع اليوم هدفها من النظام كسب روسيا لصالحو بحال صارتلا شي دربكة عليه وبغض النظر عن المصالح الوطنية يلي بعمرا ما كانت هاممتو...
بس النقطه انو مع كل هاد السوفييت تاريخياً انو أخدين العرب كحليف استرتيجي شئنا أم أبينا... تجارة صناعه مصالح اتفاقات شو مابدكون سموها... بس بالوقت يلي العالم كلو كان ضد العرب الروس كانو مع قضاياهون وبرجع بقلك بغض النظر ليش بس هاد يلي صار... |
اقتباس:
تعليقا على قصة نبني قصور من الرمال , بزمانو بسنة 1982 لما كانو الفلسطينيين محاصرين ببيروت الغربية ,راح فاروق القدومي (وزير خارجية منظمة التحرير الفلسطينية) على موسكو ليستنجد بالرفاق السوفييت وحسب ما بيروي القدومي نفسو ببرنامج حرب لبنان , الرفاق السوفييت نصحوا يستسلم هو وجماعتو ويطلعوا من بيروت , فالقدومي استغرب وقلون انتو اللي قدمتوا للعالم دروس بالصمود ب ستالينغراد جايين عم تنصحونا نستسلم , قاموا ردوا علي انو ب ستالينغراد كنا عم نستنى الجيش الاحمر يجي يحرر المدينة انتو هلق مين عم تستنوا؟؟ يعني بطريقة دبلوماسية فهموا ياها انو حل عنا ودبروا راسكن وقيس على هالحادثة لتشوف مدى الدعم السوفييتي السابق والروسي الحالي للعرب |
اقتباس:
|
اقتباس:
ما تقدر تقول سبب خسارة الحرب بال 67 هو صفقة الاسلحة الفاسدة فقط ... على علمي ما كانت بس مصر تحارب ضد اسرائيل ... اضافة الى ازمة الفساد بالجيش المصري .. |
اقتباس:
انت برأيك في حدا قايم العرب من أرضون أو معبرهون أو مستني رأيهون |
اقتباس:
الاتحاد السوفيتي يا فادي ما كان يشوفنا حليف استراتيجي.. كان يشوفنا صديق لا أكثر و لا أقل.. حليف استراتيجي يعني قوتو من قوتك.. و ضعفو من ضعفك.. و انت و ياه واحد (اسرائيل بالنسبة للولايات المتحدة).. في فرق بين حليف استراتيجي .. و دولة صديقة.. و بينك و بينها تعامل تجاري و هيك.. فرق كبير كمان |
اقتباس:
العرب ما كانوا و ما رح يكونوا قوة واحدة ,,, حتى يجي واحد يدعم العرب ككل و ثاني شي ... العرب ما ساندوا القضايا في العالم ! و ثالث شي.. السوفيت ما دعموا العرب مجانا .. بس لان مصالحهم تتقاطع مع هذا الشي .. و مع ذلك ما قصروا مع العرب ... و كثير دول عربية مديونة للاتحاد السوفيتي ... بمبالغ كبيرة بس ارجع و اقول .. مو ببلاش طبعا ! |
اقتباس:
تمام معناها كانت ضايعه ولقيناها... وصلنا لنتيجة انو الاتحاد السوفيتي كان دولة صديقة وأنا ما عم قول أكتر من هيك... دولة صديقة تفيدك بمقابل أحسن من دول عدوة تضرك بدون مقابل... يا أخي والله أنا فهمان فكرتك وموافقك عليها 100% مستحيل نطمح بيوم لأنو تكون علاقتنا عضوية بروسيا متل علاقة أميركا بإسرائيل.. لعدة عوامل بتبدي بإنو أميركا غير روسيا دولياً واقتصادياً وعسكرياً ومابتنتهي بإنو سوريا غير اسرائيل تاريخياً واقتصادياً وعسكرياً واستراتيجياً لك وحتى على صعيد الاعتراف الدولي والتمثيل الشعبي بالسلطه... ياعمي بعيدة كتير كتير كتير... نحنا خلي الحكومة تتحالف مع الشعب بعدين منفكر نتحالف مع روسيا.. |
اقتباس:
|
اقتباس:
صديقي تابع الحوار شوي بتوضحلك فكرتي أكتر... أنا ماعم انكر هالعلاقة القديمة بين السوفييت واليهود بس يلي عم قولو انو العرب متل العاده حملو الطبل ونزلو تطبيل بالقصة عالطالعه والنازله. |
هي سياسة العرب الطبل والزمر لحتى نلتهى بالقصص الي بتكون فاضية بس بيعملوا منها شغلة كبيرة كتير وبالتالي بتفضالون الساحة ليعملوا الي بدون ياه تحت فكرة عدو و صديق
|
اقتباس:
يعني كنت بدك انو السوفييت يفوتوا يدعموا أبو عمار وجماعتة يلي أساساً فايتين بحرب مانها ببلدون مع فصائل لبنانية تانيه حتى يكونو داعمين للعرب؟؟؟!!! أما بدك الجيش السوفيتي يفوت يبعت سلاح لفصيل فلسطيني فات بحرب أهلية لبنانية حتى يعبر عن دعمو لقضايانا؟؟!!! ليش بدي اسألك هون سؤال العرب كانو مجمعين على دعم منظمة التحرير بهداك الوقت؟؟ لاء أكتر من هيك بدي اسألك الفلسطينين كانو مجمعين على دعم منظمة التحرير؟؟؟ كيف عم تطلب من الاتحاد السوفيتي دعم حدا فايت بالمكان الغلط وبالزمان الغلط وكل القصة غلط؟؟؟ اذا هاد معيارك لكون السوفييت دعموا العرب أما لاء فبقلك أكيد مادعموهن ولا بيصير يدعموهن. |
اقتباس:
|
اقتباس:
انت بتقبل انو كانت موسكو تدعمهون بهداك الوقت؟؟ ليش ومشان شو وعلى حساب مين؟؟ بدها تدعمون بمواجهتون مع اللبنانين بلبنان؟؟ مشان يزيد الدمار ويزيد التقسيم؟ |
اقتباس:
و مو أنا اللي بقبل.. هاد كان الحكي بهديك الأيام.. انو الاتحاد السوفيتي من هون و الاتحاد السوفيتي من هنيك و حبيب الشعب الفلسطيني و مع حقوق الشعب الفلسطيني و حرب لبنان ما كانت حرب فلسطينيين.. اللبنانية فاتو ببعض.. و اللي فاتو مع الفلسطينية كانو حلفاء موسكو شئنا أم أبينا.. و الاتحاد السوفيتي سمح انو حلفائو ينسحقو.. و انو اسرائيل توصل لقلب عاصمة عربية بدون ما يتحرك روسيا كان لازم توقّف اسرائيل عند حدا و ما تسمحلا بالوصول الى بيروت متل ما وصلت... ما دام حليف استراتيجي عالاساس.. خلي جيش عربي يقرّب حد اسرائيل.. و الله لسى ما تحرك شبر واحد فيها بتلاقي الاسطول السادس تبع البحرية الأميركية بظرف ساعات كلو عندك |
هلق انا مابعرف شو سبب كل هالجدل بس باين شعبنا شعب بيحب يلعي كتير
في واقع بالعالم اسم دول متحالفة مع بعضها يعني بالوقت الي الخليج وشرق اوربا عم يتعبا قواعد اميركية يمكن تضرب اي بلد اليوم عدوا لاميركا فبعتقد ان من حق روسيا وحقنا الطبيعي ان نوجد حدا نتحالف مع هلق مراح قول ان الروس يمكن يدافعوا عنا بس في حال وجودهن راح يكون ورقة ضغط علي اي بلد بد يعادينا باعتبارنا حلفاء الهن هاد من جهة ومن جهة اخري راح يكون اداة لنخلص من هالديون المتراكمة فوق روسنا اما من الناحية الاهم فالروس حلفاء تاريخين للعرب وداعمين الهم (بغض النظر عن سواد عيونا)من الثورة الاشتراكية لحد هاليوم وعلي مبدا عدو عدوي هوه صديقي وبعتقد المشكلة الاخيرة الي صارت بجورجيا خير كفيل ان الروس مابيتركوا حدا من حلفائهن لحالو عند الحاجة بالوقت الي العراق وتركيا فيه قواعد اميركية والاردن ولبنان دما ظل غربية وجارتنا اسرائيل بعتقد وبعيد عن كل الفلسفات العظيمة عن وجود اجنبي علي اراضينا فهالتحالف امر واجب لابد منه |
اقتباس:
انو مزعج كتير يفوت حدا بالعرض و يهين العالم اللي عم تحكي بهالطريقة.. ما حبيت منك هالتعليق بنوب.. بحكيلك يعني بصراحة ها و شكرا |
اقتباس:
الوجود كان شرعي صحيح بس ما كان توطين كان حل مؤقت ليلتقى حل للمشكلة الفلسطينية... اقتباس:
اقتباس:
اقتباس:
|
اقتباس:
اقتباس:
صح ما كان لازم تتدخل بحرب اهلية, لكن الاجتياح الاسرائيلي ما كان جزء من الحرب الأهلية و كان خرق واضح لتوازن القوى. اقتباس:
السوفييت... باعو الفلسطينية, و سمحو انو يتدبحو و سمحو انو ينسحقو.. و ما عم نحكي عن حرب اهلية انما عم نحكي عن اجتياح اسرائيلي.. بعدين.. بالمناترة السورية الاسرائيلية صار في احتكاك و السوفييت عملو شبه تهديد انو ازا اسرائيل ما رجعت لبعد الليطاني فهنن راح يعطو يدعمو سوريا...بس بعد شو؟ بعد ما تحاصرت بيروت و تدمرت, و بعد ما اسرائيل حققت كل أهدافها |
اقتباس:
كانو الفلسطينية يكافحو الاجتياح الاسرائيلي و هنن ناطرين موسكو تتحرك .. متل لما كانو العرب بالأندلس بينازعو بالأيام الأخيرة قبل ما ينطردو.. و يروحو كل يوم عالبحر يشوفو ازا قرّبت أساطيل المسلمين الجاية لتنصرهون... و ما اجت هالأساطيل... |
اقتباس:
رفيق ياسي بدك تسمحلي بس هاد الحكي انا سمعانوا من شيخ كان بالجامع الي حدينا عن ان الشيوعين كانواا اعداء الاسلام وكل الي كانوا عم يعملوا دعم هوه من اجل كسر شوكة المسلمين بس وحدلي الله شوي شيخي 1-لولا الاتحاد السوفيتي (العميل) ماكنت تسمع بشي اسم صمود مصر بالعدوان الثلاثي لان وكما انت بتعرف ان جيش المصري من الله ليوقف بوجه 3 جيوش ولولا وقتها الله يرحم ترابوا خروتشوف هدد بدخول الحرب كان لاصفا قناة سويس ولا بطيخ حتي يتامم 2- السد العالي الي المصرين فرحانين فيه من تصميم لدعم لوجسيتي للمصاري من الاتحاد السوفيتي 3- وقف النار الي صار با67 كان بتدخل سوفيتي كمان ولولا حفظ ربك كنا بنطالب بالحسكة اليوم مو بس بالجولان 4-السلاح السوفيتي كان بيوصل للعرب بسعر التراب من سام لسوخوي وتوابع وكنا بنبعت حقو حنطة وشعير:shock: 5-هالبلد الي عم تحكي عليه كان بيقدم منح بالاف للطلاب العرب (الي طبعا اليوم بيشاركوا بعملية السب والشتم عليه) 6-عام 82 لما انزل الاسرائلين 99 طيارة سورية سفير الاتحاد السوفيتي قدم طلب للرئيس حافظ اسد ان اذا لزمو بيبعتولو طيارات مع طيارينها من موسكوا وبوقتها الرئيس حافظ طلب بس طيارات 7-السللاح الي قاتلنا فيه بال73 كلو روسي وكان معظم ديون انحذفت بعدين 8- لولا تدخل السوفيت بال73 كان اولاد عمنا اليهود اخدو القاهرة لان سينا اتاخدت بعد الحرب باتفاقية سلام 9-الروس ظلوا داعمين الفيتنامين طول الحرب ولولا الدعم كان الرفاق بفيتنام ماطولو اكثر من سنة بايد الاميركان 10-دعم الروس للرفاق بكوريا الشمالية بحربهم ضد الجنوبين ؟ هاد كلوا جزء من مواقف السوفيت مع حلفائهم علي الهامش:انت ذكرت قضية بولندا بالحرب العالمية الاتحاد السوفيتي كان عامل اتفاقية عدم اعتداء مع النازين توجب عليه عدم الهجوم عليهن مادام هنن ماهجموا عليه ومع امكانيات روسيا الي كانت بتخري سنة 1939 بعتقد تلافي جوريف ستالين للدخول بالحرب كان امر كتير حتمي ومابيقبل نقاش اما عن تدخلهن بلبنان كانت القصة كتير سهلة الرفيق جورج حاوي سافر لموسكو خلال حصار بيروت الشرقية وطلب الدعم من موسكو بس فيك تقلي الروس مين كانوا فيهن يدعموا؟؟ يارفيق بعلمك كان في دعوة من منظمة الحزب المركزية في موسكو لكل الاحزاب الشيوعية في الشرق علي ارسال رفاق لبيروت لدعم المحاصرين وبالفعل انا ابي الو الشرف ان كان هونيك وقاتل مع الابطال بس بنفس الوقت سالت ابي ان ليش الروس ما اتدخلو بجيشهن ؟الرد كتير بسيط بالوقت الي فيه اميركا وفرنسا وسوريا وفيما بعد اسرائيل انهزموا اجمعين بلبنان فكيف بدك بلد داخل بجيشو بافغانستان منشان يدافع عن معادلة مافي حدا حتة اللبنانين نفسهم ان يفهموها اسف علي الجريدة الي وردت اعلاه بس بعتقد ان من المعيب جدا ان بعد مابيسقط هالبلد الي ظل محامينا وداعمنا اكثر من 50 ان نبلش نشوه فيه....عيب |
اقتباس:
الخلاف كلو بقصة انو انا شايف انو السوفييت تاريخياً دعموا العرب إلى حد ما ولأي سبب كان.. وانت مصر انو هنن مادعموهن... بس بتعرف وين النقطه انو بالنقاش كلو اذا بترجع لردودك ولردود الكل معترفين انو الجماعه عطونا سلاح وانو الجماعة عطونا غطاء دولي وانو الجماعه كانو مناح نوعاً ما... بس المشكلة بتوصيف هالقصص وتسميتها وتبريرها.. |
اقتباس:
الحكي هاد كلو فوق يجي حسب مين يحكيه ... و بخصوص حق الأسلحة.. ازا بتراب المصاري معناتو من وين دين روسيا على سوريا 15 مليار لهلأ؟ أنا ما بشوّه بحدا, بس ما اعطي لحدا أكتر من حقو... فقط لا غير.. و الاتحاد السوفييتي أخد حقو و أكتر كمان و في الك عتاب فوق.. روح شوفو... قبل ما تحكيلي عن المعيب |
اقتباس:
اسمحلي قلك انك فهمان الموضوع غلط, اللي صار بجورجيا هو انو الجورجيين هجموا على مقاطعة كل مواطنيها بيحملوا الجنسية الروسية يعني هدول مو حلفاء للروس هدول هني نفسن روس يعني ما احلاها دولة عدد سكانها 143 مليون تسمح لدولة عدد سكانها 4 مليون تعتدي على مواطنيها وكمان تسكت هي صربيا اهم حليف متبقي لروسيا باوريا , ضربها حلف الاطلسي لشبع ايام حرب كوسفو ,سنة 1999 شو عملتلها روسيا ؟ بعتو سفينة للبحر المتوسط ما استرجت تقرب على سواحل صربيا وهي عم تنضرب وهي من فترة فريبة شلحون كوسفو شو عملتلن روسيا؟؟ حلفاء موسكو الاوربيين كلن صاروا او رح يصيروا اعضاء بالناتو شو عملوا الروس ؟؟ باختصار اذا مشان حلفاؤن الاقرب بنص اوربا ما بيقدروا يعملولن شي , شو بتتوقع ينفعوا دولة متل سوريا ؟ |
اقتباس:
أيوا... جيت عالحكي المزبوط.. الحكي اللي بالأحمر هو الصح... ناس متل الرفيق أممي بتشوف انو مفضلين فوق راسنا... و انا بقول انو ما فضلو علينا بفرنك.. كلو بحقو و لسى استفادو منا كمان طبعا بيظلو احسن من غيرهون... و بصراحة ازا بدي اعدد ايجابيات الاتحاد السوفيتي (كأمور فعلا اشتغلوها عن قلب و ليس عن مصلحة) فأكيد راح احكي عن الجانب الأكاديمي و الثقافي.. بهاي فعلا مفضلين علينا.. أيام الاتحاد السوفيتي كان الكتاب شغل دار رادوغا أو دار التقدم أو دار مير بينجاب بسعر جيد جدا و كتب ذات جودة عالية... |
بريك اعلاني ياشباب:
نتائج التصويت لهلئ 24 صوت مقسومين مناصفةً 12 صوت مع و12 صوت ضد :? أول مرة بشوف هيك نسبة باستفتاء.. معقول الشعب لهالدرجة مقسوم بهيك قضية؟؟ أما المشكلة بتفسير كل شخص لهالوجود العسكري ومبراراته وأهدافه؟ |
اقتباس:
بس لازم نعرف تماما ... الشغلة اخذ و عطا .. اميركا مثلا مستفادة من اسرائيل تمام الاستفادة و وجود اسرائيل هو خدمة لأمريكا ... أميركا مستفادة من الخليج و نفط الخليج و مياه الخليج و بيع السلاح و الطيارات مستمر ... للمجلس التعاون .. بس تقدر تقلي ... الروس شلون استفادوا من عرب موسكو ! |
اقتباس:
الحكي الي فوق فيك اذا بتحب تتاكد من صحت دور عليه بالانترينت او بحيالله برنامج وثائقي بيختص بكل حادثة(طبعا اذا كنت حابب تغير رايك..ولاتعتبر اهانة بس انا من كل نقاشاتي معك مابعتقد ان انت بتحاور لتغير فكرتك -يمكن هاي سمة ابناء برج الاسد رفيق:lol: ) ويمكن مو بس يمكن اكيد بتعرف عدد من الناس الي جابو شهاداتهن من الاتحاد السوفيتي وبلا مابيدفعوا قرش اما منشان ال15 مليار تسليح بلد فاتت 3 حروب متل سوريا مع فوائد هالديون لمدة 40 سنة فال15 مليار مابينحكا فيهن اخيرا رفيق ياسين منشان قصة الرفاق الفلسطينين بلبنان بعقتد ان ماحدا باعنن فتح باعت قضيتها بدخولها بالحرب الاهلية بلبنان مابعتقد ان السوفيت قالوا لياسر عرفات ان احمل السلاح ضد سوريا ولا بعتقد ان هنن الي قالولو بطل تقاتل اسرائيل ثم الفلسطينين ماكانوا ملائكة بلبنان ...لك عملو مفارز بيطلبوا هويات العالم فيها غير استفزازهن الدائم للبنانين... |
اقتباس:
لاء المشكلة انو شعب غرقان وبيتعلق باي قشة , مفكرين اذا صار في اسطول روسي بسوريا , معناها ما عد تسترجي اسرائيل تبهدلنا كل شي كم شهر بغارة جديدة وممكن معن حق بهالتفكير هه , طالما ما عندك دولة فاضية تدافع عن شعبها ومشغولة بقمع الشعب اكيد الشعب بصير يتعلق بالاوهام والاحلام |
اقتباس:
انا معك بباقي الكلام رفيق أممي ... انه الروس دعموا العرب بشكل او بآخر ! بس مسألة بولندا الكل يعرف ... اجتياح وارشو .... يعني اجتياح موسكو خلال ايام و المجازر النازية ضد البولنديين تفوق الوصف مع انهم حلفاء ستالين ! و الروس انتظروا النازيين حتى يصلوا موسكو .... و ضحوا بالبولونيين ... اقتباس:
و لو تشوف حال الناس و التجارة في كوريا الجنوبية ... كثير احسن من الشمالية الديمقراطية ! بعدين موقف روسيا و موقف الصين الشيوعية من الازمة النووية لكوريا الشمالية ........ تعبان جدا و غير داعم بالشكل المطلوب بتاتا ... مقابل موقف اميركا و اليابان |
اقتباس:
حكيك كلو اللي فوق فيني فصفصو هلأ ازا بدك, و ماني محتاج ابحث عنو بأي مطرح.. لكن راح يظل الأمر متعلق بالأمر اللي يسردو, و ليش يسردو, و كيف يسردو.. اللي انت تشوفو ايجابي و تفضيل أنا يجوز بشوفو عادي, أو بشوفو من منظور آخر. غلطان ازا بتفكر انو اللي سافرو عالدول الشيوعية يدرسو ما كلفو مصاري, كلفو, مو كتير بس كلفو منيح يعني.. و بالنهاية كانت طريقة لأدلجة الطبقة المثقفة و خلص طبقة موالية للاتحاد السوفيتي تكون متعلمة و مثقفة و تكون قاعدة لأعمالها و مصالحها بكل دولة... و مع ذلك أنا الحقت بالرد انو هالأمر ايجابي كان.. بعدين خيو عن جد مليت من تكرار كلامي -و القارئ أكيد مل كمان من رؤية نفس التكرار- هلأ بدك تنتقد الفلسطينيين ع دخولهم بحرب أهلية. و تبرر بذلك عدم دعم السوفييت الهون, و انو ما كانو ملائكة؟ طيب اسرائيل ملاك شي؟ طلع كيف ما حدا قلها بخ... ما زال في عليك عتاب فوق... دوّر عليه لأنو جدا زعجني منك بالذات هالكلام.. اقتباس:
|
[quote=suryoyo;1095090]انا معك بباقي الكلام رفيق أممي ... انه الروس دعموا العرب بشكل او بآخر !
بس مسألة بولندا الكل يعرف ... اجتياح وارشو .... يعني اجتياح موسكو خلال ايام و المجازر النازية ضد البولنديين تفوق الوصف مع انهم حلفاء ستالين ! و الروس انتظروا النازيين حتى يصلوا موسكو .... و ضحوا بالبولونيين ... انا معك ان الروس ما اتحركو بس متل ماقلتك كان روس غير قادرين ان يعملوا اي شي اصلا مدنهن سقطت وحدة ورا التانية وبالوقت الي المانيا خسرت 9 مليون روسيا خسرت 26 مليون لعدم وجود سلاح كافي فكيف بدك من بلد دافع عن حالو بالويل ان يدافع عن بولندا ....شي بالمنطق يعني ثم النازين بعد دخولهن لبولندا وقفوا سنة كاملة علي اعتماد ان في اتفاقية مع الروس وهالشي الي كان نازم يصير غير ان هتلر ابن كلب ومابحترم شي وكفا اكلها بالنسبة لكوريا الشمالية .. الروس ما دعموها جدا ... و لو تشوف حال الناس و التجارة في كوريا الجنوبية ... كثير احسن من الشمالية الديمقراطية ! بعدين موقف روسيا و موقف الصين الشيوعية من الازمة النووية لكوريا الشمالية ........ تعبان جدا و غير داعم بالشكل المطلوب بتاتا ... مقابل موقف اميركا و اليابان انا عم احكي عن الحرب الكورية الشمالية والجنوبية بال1950 |
صباحُ الخير... كيفَ حالُ الأصدقاء بعدَ عراك الدّيوك؟! (ياس عمّ أمزح لا تردّ على هالجملة الله يخليلي ياك). في الحقيقة الموضوع قيّم وقد أثراه الجميع بمشاركاتهم الأقيم، وبعدَ طول قراءة أجدُ أنَّ الجميعَ يتّفقُ في كثيرٍ من الأشياء ويختلفُ في مواقف وأحداث معيّنة! ويبدو أنَّ الاختلاف الأساسيّ في المسألة هو حول روسيا (الاتّحاد السوفييتي سابقاً) ومواقفها من سوريّة أوّلاً والعرب ثانياً (تحالف أم صداقة أم دعم). بالنسبة لاعتراض ياس على قضيّة الأسلحة الرّوسيّة (مدفوعة الثّمن) فأقول له: أسلحة بثمن أفضل ألف مرّة من لا أسلحة! وإذا عدتَ لتحضرَ اعتراضك على أنّها أسلحة قديمة (وفاسدة) فهذا بسبب أنظمتنا الفاسدة التي تسرقُ في الصّفقة أكثر مما يجنيه الرّوس أنفسهم. وأي دولة في العالم هي تلك التي تكشف تطوّرها العسكريّ بسبب صفقات تجاريّة؟! فلا تنتظر من أحد أن يمنحَك أحدث ما عنده. ويكفي أنّها قدّمت في الماضي الكثير وخاصّة في مجال الهندسة العسكريّة ولولا المهندسين الرّوس (إي من ط... كنّا تجاوزنا خط ألون) لما استطعنا أن نفعلَ شيئاً في حرب تشرين. واذهب لتسأل الذين اشتركوا في الحرب! و انا بقول انو ما فضلو علينا بفرنك.. كلو بحقو و لسى استفادو منا كمان يا روحي يا ياس السّياسة مصلحة، والمصلحة تقتضي الإفادة والاستفادة. مجمل كلامك يدور حول هذه النّقطة، ساعدونا لكن بثمنه، وهل كنت تريد مساعدات مجانيّة؟ أخبرني هل نحن في الملكوت الرّوحي؟! برغم حججك الكثيرة إلا أنّها أحياناً (أحياناً فقط) تبتعد عن الواقعيّة لتغرقنا في الطوباويّة والمثاليّة. نحن نتحدّث عن بلدنا الذي هو بلدٌ ينتمي إلى العالم الثّالث (إذا لم يكن الرّابع... إلخ) يتعامل مع بعض البلدان المتقدّمة في مجالٍ معيّن. ومجمل الفائدة التي نطلبها علينا دفع ثمنها، مع الشّكر الجزيل لحذف الكثير والكثير من الدّيون. مع الشكر الجزيل للمعونات الثقافيّة والتدريسيّة، مع الشّكر الجزيل لكلّ مصلحة متبادلة! طبعا بيظلو احسن من غيرهون... وهذا بيت القصيد. تحالفنا معهم ليس تحالفاً غبيّاً، فسوريّة تعرف تماماً أنّ روسيا اليوم لن تقف في مواجهة تامّة مع الولايات المتّحدة أو مع إسرائيل من أجلِ عيونها... لكن ما تقدّمه يساعدنا كثيراً في مجمل قضايانا وخاصّة على الصّعيد الدولي والإعلامي... لا بل وجودها إلى جانبنا يعزّز وجودنا، بدلاً من أن تكون في مواجهة معنا كأميركا وإسرائيل تساندنا بحفنة ما ذكرتموه ويذكر، تعيننا في بعض المواقف هنا وهناك (الأمم المتّحدة ومجلس الأمن)، تمدّ اليدَ لتعطي وتأخذ، هذا برأيي يكفي لتُعتبر دولة صديقة من الدّرجة الأولى. وهذا الكلام يبقى مفتوحاً أمام احتمالات السّياسة العدّة: صديقُك اليوم عدوّك غداً!!! قضيّة مصالح لا أكثر. و بصراحة ازا بدي اعدد ايجابيات الاتحاد السوفيتي (كأمور فعلا اشتغلوها عن قلب و ليس عن مصلحة) فأكيد راح احكي عن الجانب الأكاديمي و الثقافي.. بهاي فعلا مفضلين علينا.. أيام الاتحاد السوفيتي كان الكتاب شغل دار رادوغا أو دار التقدم أو دار مير بينجاب بسعر جيد جدا و كتب ذات جودة عالية... بصراحة أفضل الكتب التي غزت الأسواق السوريّة على المستوى الأكاديمي والمنهجي الطباعي هي تلك الرّوسيّة، ومن بينها الكتب العلميّة الفلكيّة والفيزيائيّة، والكتب الاشتراكيّة والفلسفة الماركسيّة، والكتب الأدبيّة الغزيرة. كنتُ أوّل المستفيدين منها حتّى اليوم، إذ أجول الطّرقات في المدن السوريّة بحثاً عن الكتب التي صدرت من دور النشر تلك. كلمة أخيرة لأنّي أعرفُ أنّك تعبتَ من كثرة التكرار، لا توجد مصلحة فرديّة، عليها أن تكون مشتركة، ولا يستطيع أحد أن ينكر وجود المصلحة المشتركة بين سوريّة وروسيا ولكلّ أسبابه. وبالنسبة للتصويت فأنا اقترعتُ لصالح إقامة قاعدة عسكريّة روسيّة في سوريّة. لأنّي أنظرُ إلى سوريّة في وضعها الحالي وحاجتها إلى مزيد من الأواق وخاصّة باشتداد اللهجة الأميركيّة واتّجاه القضيّة الإيرانيّة نحو الانتهاء! وحتّى تصل سوريّة إلى درجة معيّنة من التقدّم (يعني شي بعد مليار سنة) حينها لن نحتاج إلى دول غربيّة أو أجنبيّة. وكلمة للمعترضين: المنتوجات التكنولوجيّة كلّها أجنبيّة، الأسلحة جميعها أجنبيّة، الكتب التعليميّة والمناهج التدريسيّة، العقول الناشئة في أوساط أجنبيّة، فعلامَ الاعتراض على قواعد عسكريّة؟! مع محبّتي وتقديري واحترامي لجميع أطراف الحوار. |
انا رح صوت مع وجود القاعدة العسكرية الروسية في سوريا
لأن و بكل بساطة و بعد قراءة مطولة لنقاشات الأخوة في الموضوع استنتجت انو كلب يعوي معك احسن من كلب يعوي عليك شكرا |
سؤال على الهامش إذا كانت هيك قاعدة مو ضد سيادتنا ليش مانحط قواعد أميركية وهيك منتصالح مع كل الكرة الأرضية . وبعتقد منستفيد منها أكتر من القواعد الروسية يلي حتزيد مشاكلنا مع الغرب |
اقتباس:
معناتا يا حبيب ... صرنا متلنا متل السعودية .. وبقية حلفاء أمريكا .. ومعناتا راحت كل معاني الصمود .. وكل المعاني اللي حمليتها سورية .. طول الفترة الماضية .. |
اقتباس:
|
| الساعة بإيدك هلق يا سيدي 12:43 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون