أخوية - حب من طرف واحد

والله يا شباب وصبايا حطيتوا ايدكم على الجرح
بس اللي ايده في النار مش مثل اللي ايده بمي باردة

بالنسبة الي اني اشعر بالحب هاي بحد ذاتها نعمة

اما الحب من طرف واحد، باعتقادي قمة الألم اللي بتختاره بإرادتك
وفي حال بحثت عن حل والله هداك للنسيان
فما رح تزبط معك
لأنك لو بتحب بجد ومن كل قلبك، بكون العطاء عندك بلا حدود، يعني ما بتستنى مقابل
لكن لحظة الجرح بتكون لما اللي بتعطيه ما بحاول ياخد اللي بتقدمله اياه، وبيتجاهل وجودك

وبرغم هيك، ما بتقدر تحول الحب بداخلك لتجاهل ونسيان ونكران
بالعكس حبه رح يضل موجود لكن الشطارة بتكون لما تعرف كيف تتعايش مع نفسك بوجود حب بلا نهاية، وتقدر توصل لاتفاق بينك وبين نفسك انه هالحب اللي قدمته ما كان خسارة بالإنسان اللي حبيته ولكنه ما بادلك نفس الشعور، لأنه لولا انه هالإنسان كان فعلا مميز ما كنت حبيته وأعطيته اسمى وأحلى شي ممكن ينعطى ""الحب""

بالتالي ما تندم على اللي بروح لكن تعلم كيف توظفه للجاي، وخليه بأعمق أعماقك وسكر عليه بالمفتاح وكبه، ولما تحس حالك بتحن للحب الأول ارجع وشوف شو صار وقارن شو كنت تتمنى بالواقع رح تعرف انه حبك حب من خارج الزمن، حب من عالم وردي لكن الواقع أحبطه.

اخلق من مواجهتك للواقع رؤيا جديدة لحياتك وخد الحلو من الماضي وخليه يكون أمل للمستقبل
اعتقد هيك الدنيا بتمشي، بحلوها وبمرها.

والله لا يطعمكم وتحبوا من طرف واحد، او حتى تحبوا حب بلا نهاية حتى لو كان حب من الطرفين